ach-ss-acholi_reg/55-1TI.usfm

\id 1TI
\ide UTF-8
\h 1 Temeceo
\toc1 1 Temeceo
\toc2 1 Temeceo
\toc3 1ti
\mt 1 Temeceo
\c 1
\cl Chura 1
\p
\v 1 Waraga man oa ki bot Paulo ma lakwena pa Kricito Yecu pi cik pa Lubaŋa Lalarwa ki Yecu Kricito ma genwa ocuŋ i kome.
\v 2 Bot Temceo latinna me ada i niye: Lubaŋa Won ki Kricito Yecu Rwotwa omii gum, kica, ki kuc.
\p
\v 3 Macalo nene koŋ abako doga boti i kare ma acito i Makedonia, amito koŋ idoŋ i Epeco wek icik jo mogo pe gupwony pwony mo mapat,
\v 4 dok pe guket cwinygi i kom lok me ododo, ki nyiŋ mogo ma giryeyo mabocoboco ma lubo te kwaro, ma kelo tam atata, pe konyo yub pa Lubaŋa ma ocuŋ i kom niye.
\v 5 Yam aciki ni iwek dano gubed ki mar ma dano bedo kwede ka cwinye leŋ dok kite ber ma pe ki bala mo i kome, dok ma niyene goba pe iye.
\v 6 Jo mogo guŋak woko ki i lok man ci gudonyo ka boko lok atata ma konnye pe.
\v 7 Gimito bedo lupwony-cik, kun pe giniaŋ kadi wa lok ma giloko, nyo kadi gin ma gitye ka lok i kome, ma gucuŋ iye matek twatwal-li.
\p
\v 8 Waŋeyo ni cik ber ka dano otiyo kwede i yo ma cik mito.
\v 9 kun waniaŋ ni, cik pe giketo pi jo ma kitgi atir, ento giketo pi lutur-cik ki pi jo ma pe ki winy, pi jo ma pe lworo Lubaŋa ki pi lubalo, pi jo ma pe gileŋ, jo ma pe keto cwinygi i kom Lubaŋa, pi jo ma neko wongi ki jo ma neko megigi, pi lunek dano mukene,
\v 10 dok pi jo ma timo tim kwele, jo ma buto ki co luwotgi, jo ma kwalo dano girwenyo kwede woko ali, lugoba, jo ma kwoŋo kwoŋ laboŋo tere, ki gin mukene ducu ma pe rwatte ki pwony me ada.
\v 11 Meno aye pwony ma noŋŋe i lok me kwena maber ma yam gimiya me atita, lok maber ma tito pi deyo pa Lubaŋa ma gipwoyo.
\p
\v 12 Apwoyo ŋat ma omiya teko me tiyo tic man, en Kricito Yecu Rwotwa, pien doŋ okwana me bedo lagen, ka oketa bene i ticce,
\v 13 kadi bed yam abedo ka yete pi keto ayela i kome ki balo nyiŋe. Ento en otima kica, pien ceŋ atimo meno ki kwiya piny laboŋo niye,
\v 14 ka kica pa Rwotwa omedde twatwal i koma kacel ki niye ki mar ma tye i Kricito Yecu.
\p
\v 15 Lok man lok me ada, myero dano ducu guye ni, Kricito Yecu yam obino i lobo pi laro lubalo. I kin lubalo an aye abedo labal mukwoŋo,
\v 16 ento otima kica pi lok man, wek i kin lubalo, Yecu Kricito okwoŋ nyuto diyo cwinye maber-ri bota macalo lanen bot jo mukene ma gibiye en, ka doŋ gicako noŋo kwo ma pe tum.
\p
\v 17 Woro ki deyo obed nakanaka bot Kabaka ma loyo kare ducu, ma pe to, ma pe nen, en Lubaŋa acel kene. Amen.
\v 18 Latinna Temceo, amiyo boti cik man ma rwatte ki lok ma yam lutit lok pa Lubaŋa guloko i komi,
\v 19 wek ka ilubo lokgi wek ilweny lweny maber, kun imako niye matek ma ii leŋ. Pi kwero tam ma i igi ma nyuto botgi balgi, jo mogo niyegi oballe woko.
\v 20 Jo mogo i kingi, Kumenayo ki Alegijada, yam amiyogi i ciŋ Catan wek gupwonnye guwek yeto Lubaŋa.
\c 2
\cl Chura  2
\p
\v 1 Lok mukwoŋo aciki ni, bako dog, lega, lega ma gilego pi jo mukene, ki miyo pwoc, myero gitim pi dano ducu,
\v 2 pi luker ki jo ma tye i rwom ma malo, wek omi wabed mot laboŋo ayela, ma waworo Lubaŋa kun kitwa beco i yo ducu.
\v 3 Man ber, dok Lubaŋa Lalarwa bene pwoyo.
\v 4 En mito laro jo ducu, dok mito ni jo ducu guŋe lok me ada.
\v 5 Pien Lubaŋa tye acel, Ŋat ma ribo Lubaŋa ki dano bene tye acel, ma obedo dano, en aye Kricito Yecu,
\v 6 ma omine kene me bedo gin-kok pi jo ducu; meno en aye caden ma yam gimiyo i karene kikome.
\v 7 Pi lok man, giketa me bedo latit-lok dok lakwena, (aloko lok ada, goba pe iye), an lapwony pa Lurok, i niye ki i lok ada.
\p
\v 8 Man aye mumiyo amito ni co myero guleg Lubaŋa i kabedo ducu, kun gitaŋo ciŋgi maleŋ malo laboŋo kiniga nyo daa mo.
\v 9 Kit meno, mon bene myero gurukke maber ki mwolo, kun gigwokke, pe i yer wic ma gikedo, nyo jabu, nyo tiko ŋut, nyo ruk mogo me wel ma malo;
\v 10 ento bergi myero onen i tic maber ma gitiyo, meno en gin ma mitte bot mon ma gilwoŋŋe kengi ni gin jo ma woro Lubaŋa.
\v 11 Dako myero opwonnye laliŋliŋ kun bedo ki winy.
\v 12 Pe aye ni dako opwony dano nyo obed ki twero i kom co; en myero obed oliŋ aliŋa.
\v 13 Pien Adam aye ma gikwoŋo cweyone, ka doŋ lacen gicweyo Kawa.
\v 14 Dok bene yam pe gibwolo Adam, ento gibwolo dako, ci omiyo opoto i bal odoko labalo.
\v 15 Kadi bed kumeno, dako gibilaro i kare me nywal, ka ce omedde ka bedo ki niye dok ki mar, kun bedo maleŋ ma gwokke kene.
\c 3
\cl Chura 3
\p
\v 1 Lok man lok ada: ka ce dano mo mito tic me bedo latel jo pa Lubaŋa, noŋo en mito tic maber.
\v 2 Latel myero obed laboŋo lok mo ma gijuke iye, obed ki dako acel, ogwokke kene, obed ryek, obed dano ma giworo. Obed dano ma gwoko welo, lapwony maber,
\v 3 ma pe lamero koŋe, ma pe lakolo, ento obed dano mamwol, ma pe da atata, dok pe obed ŋat ma maro lim.
\v 4 Myero obed ŋat ma loyo ode maber kun gwoko litinone miyo gibedo ki winy bot jo madito, ma giworo dano i yo ducu;
\v 5 pien ka ce dano pe loyo ode kikome maber, ci en twero gwoko lwak jo muye Lubaŋa niŋniŋ?
\v 6 Myero pe obed dano ma pud olokke aloka nyen, miyo kette malo ki wakke, ci cut poto woko, lok loye macalo yam oloyo Catan.
\v 7 Medo i kom meno myero en obed dano ma jo ma woko pwoyo, wek pe okel yet i kome ma miye poto i owic pa Catan.
\p
\v 8 Kit meno, ludikon myero bene gubed jo ma romo awora, jo ma pe doggi aryo, ma pe gin lumat koŋo matek twatwal, pe gubed luworo me noŋo lim;
\v 9 myero bene gubed jo ma niaŋ maber i muŋ me niyewa, kun cwinygi bene leŋ.
\v 10 Myero koŋ gikwoŋ temogi; ka ce ginoŋo ni lok mo marac pe i komgi ka doŋ giyegi guti tic me dikon.
\v 11 Mon bene kit meno, myero gubed mon ma romo awora, ma pe lucok dog dano, gubed jo ma gwokke kengi dok jo ma lugen i jami ducu.
\v 12 Ludikon myero gubed wegi mon acel acel, myero gulo litinogi ki odigi bene ducu maber,
\v 13 pien ludikon ma gitiyo tic mabeco ginoŋ rwom maber pigi kengi, dok gidoko jo ma cwinygi tek i kom niye ma tye i Kricito Yecu.
\p
\v 14 Atye ki gen me bino boti pi oyot, ento acoyo lok me pwony man boti wek,
\v 15 ka agalle, iŋe kit ma myero dano obed kwede i kin jo me ot pa Lubaŋa, ma en aye lwak jo muye Lubaŋa makwo, ma en aye obedo wir ki guti me te ot matek, me ada.
\v 16 Muŋ me dini ma watuco pire dit twatwal: Yam onyutte i kom, gikwane ni kite atir pi Cwiny Maleŋ, lumalaika gunene, gitito pire bot lurok, giye en i lobo ducu, ka doŋ gitero woko malo i deyo.
\c 4
\cl Chura  4
\p
\v 1 Cwiny Maleŋ waco atir ni, i kare mo i anyim jo mogo bibwoto niyegi woko, gicako lubo jogi ma gin lugoba, ki pwony pa cen maraco.
\v 2 Pwony ma kit meno a ki bot jo ma luroro ma gin lugoba, ma tam ma i igi ma nyuto botgi balgi odiŋ woko macalo del kom dano ma giwaŋo ki nyonyo malyet.
\v 3 Gin jo-nu gijuko ni dano pe gunyom, dok bene giciko dano ni gukwer cam mogo, kun Lubaŋa yam oketo cam wek jo ma ye en, ma giŋeyo lok me ada, gugam ki pwoc.
\v 4 Pien jami ducu ma Lubaŋa oketo gibeco, pe tye mo ma myero gikwer ki i kingi, ka ce onoŋo gigamo ki pwoc;
\v 5 pien lok pa Lubaŋa ki lega lonyogi bedo maleŋ.
\v 6 Ka iketo pwony magi i nyim utmego, ci ibibedo latic pa Kricito Yecu maber, ma gipito ki lok me niye ki pwony mabeco ma ibedo ka luboneni.
\v 7 Kwer lok mogo me miŋo ma tere pe ma pe me lworo Lubaŋa. Pwonnye keni i kwo me lworo Lubaŋa.
\v 8 Pwonnye me rweyo ler kom tye ki kony, ento konnye nok; lworo Lubaŋa konyo i yo ducu, pien twero kelo botwa gum i kare man ki i kwo ma ki i kwo ma bibino i anyim, macalo Lubaŋa yam ociko.
\v 9 Lok man lok ada, myero dako ducu guye.
\v 10 Meno aye mumiyo wacanne dok wacukke me tic matek, pien waketo genwa i kom Lubaŋa makwo, ma en Lalar pa jo ducu, ento makatone pa jo ma ye Yecu.
\v 11 Cik lok magi dok ipwony ki dano.
\p
\v 12 Pe imi ŋat mo ocayi ni pien in pud itidi, ento bed lanen maber bot jo muye, i lokki, i kiti, i mar, i niye, ki i bedo maleŋ laboŋo gin marac mo i komi.
\v 13 Mi kareni me kwano coc ma yam gicoyo i nyim lwak, i tito lok, ki i pwony, nio ka abino kunnu.
\v 14 Pe ibwot mot me cwiny ma itye kwede-ni oballe nono, ma yam gimii pi lok ma lutit lok pa Lubaŋa gutito i kare ma ludoŋo giketo ciŋgi i wii.
\v 15 Nyut lok magi ki tic, ket cwinyi iye, wek dano gunen kit ma itye ka wot kwede anyim.
\p
\v 16 Gwokke keni, dok igwok pwonnyi bene; mak matek, pien ka itimo kumeno, in kikomi ibilarre kacel ki jo ma winyi bene.
\c 5
\cl Chura 5
\p
\v 1 Pe ijuk ladit mo, ento cuk cwinye macalo woru; awobe myero inengi macalo omegini,
\v 2 nen mon madoŋo macalo mego, ki mon matino myero inengi macalo lumegini, laboŋo tam mo marac.
\p
\v 3 Wor mon ma coggi oto, ma doŋ gudoŋ kengi.
\v 4 Ka ce dako ma cware oto tye ki litinone ki likwaye, myero gin koŋ gukwoŋ pwonyo ticgi me dini i odigi gin kikomgi, kun gimiyo kony bot lunyodogi pi kony mogo ma yam gumiyo botgi, pien meno aye Lubaŋa pwoyo.
\v 5 Dako ma cware oto ma odoŋ kene laboŋo ŋat mo ma konye, keto genne ducu i kom Lubaŋa, dok bene bako doge kun lego Lubaŋa dyeceŋ ki dyewor.
\v 6 Ento dako ma cware oto ma yenyo yomcwiny me jami mabeco keken, doŋ oto kadi bed pud kwo.
\v 7 Ket cik man, wek gubed laboŋo lok mo ma gijukogi iye.
\v 8 Ka ce dano mo pe miyo gin mo me konyo wadine, makato pi jo me ode kikome, noŋo doŋ okwero niyene woko, dok bene odoko rac makato ŋat ma pe oye Lubaŋa.
\p
\v 9 Pe myero gico nyiŋ dako ma cware oto ma mwaka me ditte peya oromo pyerabicel nono, dok bene myero en obed dako ma yam obedo ki cware acel keken.
\v 10 Myero ginen ka ticce ber, ka ce yam opito litino, ka yam ojolo welo, nyo olwoko tyen jo pa Lubaŋa, ka okonyo jo ma yam giunogi, dok bene ka obedo ŋat ma yam omine kene i tiyo gin maber i yo ducu.
\v 11 Ento myero ikwer coyo mon ma pud gitino ma coggi oto; pien miti me komgi twero miyo gikwero Kricito woko, gicako mito nyomme doki aye,
\v 12 miyo giŋolo kop loyogi pi turo cikkegi mukwoŋo.
\v 13 Medo i kom meno, gilokke gidoko luwackom ma gibibedo ka wot awota i ot ki ot; pe gibedo luwackom keken, ento gidoko bene jo ma loko lok atata, ma giridde i gin ma pe megi, gibedo ka loko lok ma pe myero gilok wacel.
\v 14 Pi meno, omiyo amito ni mon matino ma coggi oto ginyomgi wek gunywal litino, gulo odigi, wek pe gumi kare ki lukworwa me loko gin mo marac i komwa.
\v 15 Pien jo mogo i kingi doŋ guŋak woko, gitye ka lubo Catan.
\p
\v 16 Ka ce dako mo muye Rwot tye ki wadine ma gin mon to, myero en omi botgi kony, wek pe giket peko i kom lwak muye Yecu, ento lwak muye Yecu gubed ka konyo mon ma coggi oto ma lakonygi mo pe.
\p
\v 17 Ludoŋo ma loyo loc maber myero giworgi twatwal, makato myero giwor jo ma tye ka yelle ka tito lok ki pwonyo dano.
\v 18 Pien lok ma yam gicoyo waco ni, “Pe itwe dog twon ka tye ka nyono bel,” dok bene ni, “Latic myero giculle mucarane.”
\p
\v 19 Pe iye lok adot mo ma gikelo i kom ladit mo, gwok nyo ka tye lucaden aryo nyo adek macalo ginacoya owaco.
\v 20 Doŋ jo ma pud ocuŋ i kom balgi, myero ijukgi i nyim dano ducu, wek omi jo mukene gubed ki lworo.
\p
\v 21 Aciki i nyim Lubaŋa ki Kricito Yecu ki lumalaika ma giyero, gwok cik magi ma pe i jeŋŋe i kom wat nyo larem.
\p
\v 22 Dok bene pe irune me keto ciŋi i kom ŋat mo, nyo me ribbe ki jo mukene i balgi; ento gwokke ibed maleŋ.
\v 23 Cakke kombeddi, doŋ pe imat pii keken, mat bene koŋo vino manok pi konyo ii pi two ma maki kare ki kare.
\v 24 Bal pa jo mogo nen woko ka maleŋ ma cimo atir ni kop biloyogi, ento bal pa jo mukene nen lacen.
\v 25 Tic maber bene nen woko ka maleŋ; kadi pe kit meno, pe kanne matwal ma pe onen.
\c 6
\cl Chura 6
\p
\v 1 Jo ducu ma gubedo opii, myero guti ki luditogi macalo jo ma romo awora i yo ducu, wek ŋat mo pe oyet nyiŋ Lubaŋa nyo pwonywa.
\p
\v 2 Jo ma luditogi doŋ guye Rwot, myero pe gukwer worogi, ni pien gin doŋ gibedo omego, ento myero gumedde me tiyo tic maber makato botgi, pien jo ma gikonyo ki ticgi gubedo jo muye Rwot dok jo ma gin maro. Pwony lok magi dok icuk cwiny dano iye.
\p
\v 3 Ka ŋat mo pwonyo mere lok mapat kun pe lubo lok ada pa Rwotwa Yecu Kricito pi pwony me diniwa,
\v 4 noŋo en okette malo kene ki wakke, ento pe ŋeyo gin mo kadi ki acel. Iye opoŋ ki par maraco me pyem ki daa i kom nyiŋ lok mogo; doŋ lok macalo meno a iye nyeko, pyem, yet ki par maraco ma miyo gen rwenyo woko i kin dano.
\v 5 Dok bene miyo jo ma ryekogi oballe, ma mako lok me ada oloyogi woko, gibedo ka wo awoya nono, kun gitamo ni dini aye yo me noŋo lonyo.
\p
\v 6 Lonyo dit twatwal i dini ka ce iyeŋ ki gin mo keken ma itye kwede.
\v 7 Pien wan yam pe wakelo gin mo i lobo kany, dok bene pe wabitwero tero gin mo ka waa ki i lobo.
\v 8 Ento ka watye ki cam ki ginaruka, jami magi romowa gire.
\v 9 Ento jo ma mito bedo lulonyo miyo Catan bitogi ci gipoto i bal, ka doŋ gimoko i owic pa Catan pi mitgi mapol me miŋo ma tye ka unogi, miyo girwenyo dok gito woko matwal.
\v 10 Pien maro lim en aye acakki me gin maraco ducu; man en gin ma omiyo jo mogo gua woko ki i niye, ka doŋ gurwatte ki lwak can mapol ata mucorre i komgi.
\p
\v 11 Ento in dano pa Lubaŋa, leŋ yo ki jami meno, ket cwinyi i kit ma atir, i lworo Lubaŋa, i niye, i mar, i diyo cwiny ki i mwolo.
\v 12 Lweny lweny maber me niye; mak kwo ma pe tum matek ma yam gilwoŋi iye i kare ma ituco niyeni i nyim lucaden mapol ata.
\p
\v 13 Aciki i nyim Lubaŋa ma miyo kwo bot jo ducu, ki i nyim Yecu Kricito, ma otuco niyene maber i kare ma miyo lok me cadenne i nyim Pontio Pilato:
\v 14 Gwok cik ma gimiyi, bed laboŋo kit roc mo nyo lok mo ma gijuki iye, nio ka Rwotwa Yecu Kricito binen.
\v 15 Lubaŋa ma gipwoyo, en acel keken aye Won Twer, Kabaka pa luker ducu, Rwot pa rwodi, en binyuto man ka kare kikome doŋ oromo.
\v 16 En Lubaŋa acel keken ma pe to, ma bedo i Leŋo mo ma ŋat mo pe romo nyiko cok kwede, cakke con ŋat mo pud pe munene, dok bene dano mo pe twero nene. Woro ki twer ma pe gik obed bote. Amen
\v 17 Cik lulonyo me kare man ni guwek wakke, dok bene pe guket gengi i kom lonyo ma pe genne, ento guket gengi i kom Lubaŋa ma miyowa jami ducu mabup ma yomo cwinywa.
\v 18 Myero guti tic mabeco, gubed lulonyo i timo ber bot dano, i poko jami, ki i miyo mot ki yomcwiny.
\v 19 Ka gutimo meno, noŋo gukano mono maber pigi kengi pi kare me anyim, wek gumak kwo ma en aye kwo kikome.
\p
\v 20 Ai Temceo, gwok gin ma yam doŋ gimiyo i ciŋi. Gwokke i boko lok mogo ma pe me woro Lubaŋa, ki i pyemmogo ma a ki gin ma gilwoŋo gobagoba ni, “ŋec”,
\v 21 pien jo ma giwaco ni gitye ki kit ŋec meno gibayo piny nono i lok ma mako niye Kica pa Lubaŋa obed kwedi.