ach-ss-acholi_reg/50-EPH.usfm

\id EPH
\ide UTF-8
\h Jo Epeco
\toc1 Jo Epeco
\toc2 Jo Epeco
\toc3 eph
\mt Jo Epeco
\c 1
\cl Chura 1
\p
\v 1 Waraga man oa ki bot Paulo ma en lakwena pa Kricito Yecu pi mit pa Lubaŋa. Bot jo pa Lubaŋa ma tye i Epeco, ma gin aye jo ma genne i Kricito Yecu:
\v 2 Lubaŋa Wonwa ki Rwot Yecu Kricito omiwu kica ki kuc. Gum me cwiny ma gimiyo bot jo ma tye i Kricito.
\p
\v 3 Myero gipwo Lubaŋa, Won Rwotwa Yecu Kricito, pien i Kricito doŋ omiyowa kit gum me cwiny ducu ma tye i polo.
\v 4 En oyerowa wa con i Kricito ma pud peya ocako keto lobo, wek wabed jo maleŋ i nyime laboŋo bal mo i komwa pi mar mere.
\v 5 Lubaŋa pi mitte kene onoŋo doŋ oyubo con ni wan myero wadok litinone pi tic pa Yecu Kricito.
\v 6 En otimo man wek wapak motte me kica me deyo madit ma en omiyo ki wan pi Wode ma emaro.
\p
\v 7 Pi remo me to pa Wode ma ocwer piwa, doŋ gikokowa woko, giweko balwa, kit macalo lonyo me kicane dwoŋ kwede,
\v 8 ma en omiyo botwa madit lawaŋacel, Pi ryekone ki pi niaŋŋe ducu.
\v 9 en doŋ omiyo waŋeyo muŋ me mit mere, kun lubo yub maber ma ceŋ en oyubo me cobo i Kricito.
\v 10 Yub pa Lubaŋa ma en bicobo ka karene oromo, en aye me coko jami ducu ma tye i polo ki i wi lobo, ki ribogi woko kacel i Kricito.
\v 11 Pien jami ducu tine kun lubo tam pa Lubaŋa ki mitte. En oyerowa i Kricito pi tamme, wek wan wabed jone, kun onoŋo yam en doŋ oyubo woko con ni,
\v 12 wan Lujudaya ma wan aye jo mukwoŋo bedo ki gen i kom Kricito, myero wami dano gupak deyo pa Lubaŋa.
\v 13 Oyero wun Lurok bene ma wutye i Kricito, ma yam wuwinyo lok ada, ma en aye lok me kwena maber me larrewu. Wun wuye en, en mumiyo gimiyowu Cwiny Maleŋ ma con Lubaŋa ociko pire-ni, wek obed macalo lanen ma mere ma doŋ giketo i komwu.
\v 14 En aye gin ma gijeŋo ma nyuto ni wabinoŋo gin ducu ma Lubaŋa oyubbe me miyo botwa i kare ma Lubaŋa bikoko jone kikome, ma bimiyo dano gipako deyone matek.
\p
\v 15 Pi lok man, cakke ma awinyo pi niyewu i kom Rwotwa Yecu, ki pi mar ma wumaro kwede jo pa Lubaŋa ducu,
\v 16 omiyo pe akeŋ pwoyo Lubaŋa piwu, kun alwoŋo nyiŋwu bene i legana.
\v 17 Alego Lubaŋa pa Rwotwa Yecu Kricito, Lubaŋa Won deyo, wek omiwu cwiny me ryeko, dok bene onyutwu ŋec i kome kekene.
\v 18 Dok bene alego ni en omeny tamwu, wek wuniaŋ i kom gen ma en olwoŋowu iye, ki i kom mot me lonyo ki deyo madwoŋ ma en miyo bot jone wek obed megi matwal.
\v 19 Alego bene wek wuniaŋ i kit ma tekone madwoŋ twatwal ma pe pimme-ni tye ka tic kwede i iwa, wan jo ma waye Yecu. Man rom aroma ki tic madit me twer ma en tye kwede,
\v 20 ma ceŋ ocero kwede Kricito ki i kin jo muto, ka okete obedo i kabedo me deyo ka ŋete tuŋ acuc i polo.
\v 21 En doŋ tye malo, loyo kit loc ducu ki twero ki teko ki dito ducu ma tye i polo, ki nyiŋ mo ma oywek i lobo me kare man ki i lobo me kare ma bibino-ni bene.
\v 22 Lubaŋa doŋ oketo jami ducu i te twer pa Kricito wek olo, dok omiye bot lwak jo muye en wek en obed macalo wic, kun loyo jami ducu maber.
\v 23 Lwak jo ma guye Yecu gin aye kom Kricito, ma miyo en opoŋ otum maber woko licwic, kun Kricito bene opoŋ i jami ducu ma i kabedo ducu.
\c 2
\cl Chura 2
\p
\v 1 kare mukato onoŋo wubedo jo muto pi turo cik ki balwu.
\v 2 I kare ca onoŋo wulubo yo maraco me lobo man, kun wuwinyo lok pa ŋat ma loyo twer mogo ma tye malo i dye yamo, ma en aye cwiny ma kombeddi tye ka tic i i jo ma dag winyo lok ma Lubaŋa waco.
\v 3 Wan ducu yam warom ki jo meno i lubo miti ma ginywalowa kwedeni, kun wacobo miti me komwa ki gin ma watamo piwa kenwa; omiyo pi kit ma yam watye kwede, kiniga pa Lubaŋa myero opot i komwa calo poto i kom jo mukene ducu.
\p
\v 4 Ento Lubaŋa lalonyo i kicane, mar ma en omarowa kwede dit twatwal;
\v 5 en mumiyo kadi bed onoŋo wadoko jo muto pi turo cikke, en omiyo wadoko kwo kacel ki Kricito. Lubaŋa olarowu pi kicane.
\v 6 Pi ribbewa ki Kricito Yecu en ocerowa woko kacel kwede, ka doŋ oketowa wabedo kacel kwede i polo.
\v 7 En otimo man ducu wek enyut i kare ducu ma pud tye anyim lonyone madwoŋ ma pe pimme me kica, ma onen ki berre botwa i Kricito Yecu.
\p
\v 8 Pien pi kicane omiyo en olarowu pi niye. Man pe otimme pi tic mo ma wun wutiyo; meno obedo mot pa Lubaŋa gire.
\v 9 Pe otimme pi ticwu mo, mumiyo ŋat mo owek wakke pire.
\v 10 Wan wabedo ginaketa pa Lubaŋa; en oketowa i Kricito Yecu ni wek wabed jo ma tiyo tic mabeco ma yam en oyubo ni myero wati.
\p
\v 11 Koŋ wupo i kit ma wun wubedo kwede, wun ma wubedo Lurok i kit me anywalli. Lujudaya gilwoŋowu ni wun jo ma pe giliro, kun gilwoŋŋe kengi ni gin jo ma gulirre, pi lirregi ma ciŋ dano otiyo i riŋo komgi.
\v 12 Koŋ wupo bene ni i kare ca-ni onoŋo wupokke woko mabor ki Kricito; yam gikoyowu woko ki i kom lwak me Icrael, pe wunywako gicikke pa Lubaŋa ki gin ducu ma en ociko ni ebitimo pi jone. Yam wubedo i lobo man laboŋo gen mo, Lubaŋawu bene onoŋo pe.
\v 13 Ento kombeddi i Kricito Yecu wun jo ma yam wutye ka mabor doŋ gikelowu cok pi to pa Kricito.
\p
\v 14 En kikome okelo kuc i kinwa, omiyo wan kwedwu doŋ wadoko lwak acel. Pi miyo kome kene en doŋ okwanyo mone woko ki i kinwa macalo doŋ omuko cel ca ma yam poko kinwa woko-ni.
\v 15 Pi kelo kuc omiyo en ojwayo cik pa Moses woko ki gin ma giciko iye ducu, wek omi wan jo me dul aryo-ni wadok rok acel manyen ma guribbe kacel i en.
\v 16 Pi tone i kom yatariya odwoko wan aryo ducu bot Lubaŋa i kom acel, omiyo mone ogik woko.
\v 17 Yam en Kricito obino otito lok me kwena maber me kuc botwu wun jo munoŋo wutye ka mabor, ki botwa wan jo ma onoŋo watye cok.
\v 18 Pi Kricito wan ducu, wan Lujudaya ki wun Lurok, giyabo botwa yo i Cwiny Maleŋ acel-li me o bot Lubaŋa Won.
\p
\v 19 Kombeddi doŋ wun pe wubedo lurok nyo lubedo; wun kacel ki jo pa Lubaŋa doŋ wutye ki paco acel, wun doŋ wu jo me ot pa Lubaŋa.
\v 20 Wun doŋ kombeddi wudoko ot ma gigero, ma gutine obedo lukwena ki lutit lok pa Lubaŋa. Yecu Kricito kikome obedo got madit me twoke.
\v 21 Gedo man okubbe kacel ki Kricito, dok bene tye ka doŋo me doko ot pa Lubaŋa maleŋ i Rwot.
\v 22 Wun bene gitye ka gerowu kacel i kome, wek wubed ot ma Cwiny pa Lubaŋa bedo iye.
\c 3
\cl Chura 3
\p
\v 1 Pi lok man, alego Lubaŋa piwu, an Paulo ma abedo lamabuc pi Kricito piwu wun Lurok.
\v 2 Abedo ki tam ni wun doŋ wutyeko winyo kit ma Lubaŋa omiyo abedo lakan-lim me kicane ki tuŋ botwu.
\v 3 dok bene kit ma onyutta kwede muŋŋe, omiyo aŋeyo, macalo doŋ atyeko coyo pire macekcekki.
\v 4 Ka wukwano ci wutwero neno maber kit ma aniaŋ kwede i muŋ ma otiko Kricito.
\v 5 I kare mukato yam Lubaŋa pe onyuto muŋ man bot dano adana-ni, ento kombeddi doŋ onyuto bot lukwenane maleŋ ki lutit lokke, pi Cwiny Maleŋ.
\v 6 Muŋ meno tye kit man ni, pi lok me kwena maber omiyo Lurok doŋ gudoko lule lonyo pa Lubaŋa kacel ki Lujudaya; gudoko dul kom acel kwedgi, gin bene gunoŋo gin mo ducu kacel kwedgi ma yam Lubaŋa ociko pire i Kricito Yecu.
\v 7 An giketa abedo latic me lok me kwena maber pi mot me kica pa Lubaŋa, ma omiya pi tic me twerone.
\p
\v 8 Kadi bed atidi twatwal ki i kin jo pa Lubaŋa ducu, ento en omiya mot man me kica me tito lok me kwena maber bot Lurok i kom lonyo madwoŋ pa Kricito ma tere pe tatte,
\v 9 dok me miyo kit ma en ocobo kwede yub mere me muŋ onen woko ka maleŋ bot jo ducu. Onoŋo Lubaŋa mucweyo jami ducu-ni okano muŋ man pi kare ducu mukato aŋec.
\v 10 wek kombeddi oti ki lwak jo muye Yecu me miyo luloc ki wegi twero ducu ma tye i polo guŋe ryeko pa Lubaŋa ma kite patpat.
\v 11 Man lubo tam pa Lubaŋa ma onoŋo yam tye con, ma en ocobo i kom Yecu Kricito Rwotwa.
\v 12 pire omiyo wan jo ma waye Yecu walimo tekcwiny, pien oyabo botwa yo me o i nyim Lubaŋa ki gen.
\v 13 En mumiyo alegowu ni, pe myero cwinywu odok nyap pi can ma gitye ka una kwede piwu; can man aye kelo botwu deyo.
\p
\v 14 Lok man aye mumiyo arumo coŋa i nyim Lubaŋa Won,
\v 15 en ka ma nyiŋ man me won ocuŋ iye i doggola pa jo me odi ducu ma tye i polo ki ma tye i lobo.
\v 16 Alego ni pi lonyone me deyo myero omi Cwiny mere opoŋwu ki teko ki kero madwoŋ i iwu.
\v 17 Kricito bene obed i iwu pi niyewu. Dok bene alego ni Lubaŋa omi wucuŋ matek i mar macalo yat ma lwite odonyo matut i ŋom,
\v 18 wek wubed ki teko, ki cwiny me niaŋ, kacel ki jo pa Lubaŋa ducu, kit ma mar pa Kricito lac kwede, kit mabor kwede, ki kit ma odoŋo kwede malo, dok kit ma tut kwede,
\v 19 wek wuŋe mar pa Kricito ma kato ŋec ducu, wek wupoŋ ki gin mo ducu ma opoŋ i i Lubaŋa.
\p
\v 20 Deyo obed bot Lubaŋa ma twero tiyo tic madwoŋ twatwal ma kato gin ma watwero lego pire nyo keto i tamwa, pi tekone ma tye ka tic i komwa.
\v 21 Deyo obed bote nakanaka i Kricito Yecu ki i lwak jo ducu muye en, i kare pa yalwak ducu. Amen.
\c 4
\cl Chura 4
\p
\v 1 Pi meno, an ma abedo lamabuc pi Rwot alegowu ni wulub kit kwo ma myero, ma rwatte ki lwoŋo ma yam gilwoŋowu iye.
\v 2 Wuwor jo mukene, wubed mwol, dok wubed jo ma ciro gin ducu ma balo cwiny dano, kun ŋat acel acel diyo cwinye i kom lawote ki mar.
\v 3 Wuket tek me gwoko ribbe ma Cwiny Maleŋ omiyowu wek wubed acel i twec me kuc.
\v 4 Kom tye acel, Cwiny Maleŋ bene tye acel, kit macalo gen bene tye acel ma Lubana olwoŋowu iye.
\v 5 Rwot tye acel, niye acel, batija acel,
\v 6 Lubaŋa bene tye acel ma en aye Won dano ducu. En loyo jami ducu, tiyo i gin ducu, dok bene tye i gin ducu.
\p
\v 7 ŋat acel acel i kinwa olimo mot me kica, ma oporre ki mot ma Kricito omiye.
\v 8 En mumiyo yam giwaco ni, “Ka ceŋ oito malo, otero opii mapol ma en oyako i lweny, ci omiyo mot bene bot dano.”
\p
\v 9 “Oito malo” te lokke aŋo? Te lokke ni olor piny bene i lobo ka matut.
\v 10 ŋat mulor piny en acel-lu bene aye oito malo ka mabor i ŋe polo ducu, wek epoŋ jami ducu woko liweŋ.
\v 11 Mot ma en omiyo gin en: omiyo jo mogo me bedo lukwena, jo mukene me bedo lutit lok pa Lubaŋa, jo mukene gubed lutit lok me kwena maber, jo mukene lukwat ki lupwony.
\v 12 Ticgi obedo me yubo jo pa Lubaŋa i ticgi me konyo dano, dok me doŋo kom Kricito,
\v 13 nio waŋ ma wan ducu wadoko acel i niyewa ki i ŋeyo Wod pa Lubaŋa, nio ka wadoko dano mucwiny, ma wadoŋo warom ki Kricito, ma en aye jami ducu opoŋ iye.
\v 14 Pi meno pe dok myero wabedu calo litino ma giweko yamo me pwony mapatpat wirogi dwokogi tuŋŋi ki tuŋŋi; ryeko pa dano, ki lok ma giporo me goba, pe dok bimiyo wacabbe acaba.
\v 15 Ma ka meno, myero walok lok ada ki mar, wek wamedde, wadoŋu malo i kit yo ducu nio bot Kricito, ma en aye lawiwa.
\v 16 En aye wic, dul kom ducu guribbe woko i kome, dok gukubbe kacel i waŋ mwot ducu ma tye iye. Ka dul acel acel tye ka tiyo ticce kakare, miyo kom doŋo maber i mar. Kwo manyen i Kricito.
\p
\v 17 En mumiyo awaco lok man botwu kun acikowu i Rwot ni, pe myero pud dok wubed i kit ma Lurok gibedo kwede, i tamgi ma konnye pe.
\v 18 Tamgi doŋ onyobbe woko, pe doŋ gitwero niaŋ gin mo, kwo ma Lubaŋa miyo nen gin ma welo ki tuŋ botgi, pi kwiya piny ma obino botgi pi cwinygi ma odoko nwaŋ.
\v 19 Gin pe doŋ giparo gin mo, oweko doŋ gumine kengi i tim me tarwaŋ, dok bene giwor matek i timo lwak tim caro caro mapol.
\p
\v 20 Ento lok kom Kricito yam pe gipwonyowu kit meno,
\v 21 ka kono nene wuwinyo lok i kome ada, dok gipwonyowu, wun jo ma lubo en, ki lok ada ma tye i Yecu.
\v 22 Kit kwowu macon ma yam wubedo kwede ca, kombeddi myero doŋ wuwek obedi; kit kwo maca doŋ oballe woko pi miti maraco ma obwolowu.
\v 23 Wuwek Lubaŋa doŋ oroc tam me cwinywu odok manyen,
\v 24 ka doŋ wuruk kit pa dano manyen ma giketo i cal pa Lubaŋa kikome i ada me kit ma atir ki maleŋ.
\p
\v 25 Pi meno, wuwek goba obedi; dano acel acel myero olok lok ada bot dano lawote, pien wan watye macalo dul kom luwotwa.
\v 26 Ka kiniga omakowu, pe wupot i bal; ceŋ pe myero opoti ma noŋo pud wujul wutye ki kiniga i cwinywu,
\v 27 dok bene pe wumi kare ki Catan.
\v 28 Dano ma yam bedo ka kwalo jami pa jo mukene myero doŋ owek kwo obedi; myero en ocak tiyo tic maber ki ciŋe, wek onoŋ gin ma myero opok ki jo ma megi pe.
\v 29 Lok mo marac myero pe okatti ki i dogwu; wulok lok mabeco keken ma doŋo tam pa dano i yo ma mitte, wek jo ma winyo lokwu gunoŋ kony ki iye.
\v 30 Pe wumi Cwiny pa Lubaŋa okum, en Cwiny ma gimiyowu me bedo lanen ma gimwono woko doŋ i komwu pi kuro nino ma gibikokowu iye.
\v 31 Wuwek doŋ keccwiny ducu, ki waŋ-ic ki kiniga, da i wi dano mukene, yet, kacel ki raccwiny ducu.
\v 32 Wubed jo ma lukica ki cwiny maber; dano acel acel myero otim ber bot lawote. Wutim kica i kinwu kekenwu ki luwotwu i kom balwu, macalo Lubaŋa otimowu kica i Kricito.
\c 5
\cl Chura 5
\p
\v 1 Wulub kit pa Lubaŋa, pien wun litinone ma en maro.
\v 2 Wubed kun wulubo yo me mar, macalo Kricito ceŋ omarowa, ci omine kene piwa wek ebed macalo gitum ma ŋwece kur ma gityero bot Lubaŋa.
\v 3 Doŋ pi meno tim kwele ki tim caro caro ducu, ki woro me lim pe myero gilwoŋ nyiŋgi i kinwu; meno aye gin ma myero bot jo pa Lubaŋa.
\v 4 Gin me lewic ki lok miŋmiŋ, nyo kadi ki loko lok oree ma konnye pe, myero bene pe owinnye botwu. Ma ka timo jami magi, wumi pwoc bot Lubaŋa.
\v 5 Wuniaŋ maber ni, pe tye ŋat mo i kin lutim tim abor nyo tim caro, nyo jo ma wor i kom jami, ma binoŋo dul mo ma bedo mere i ker pa Kricito ki pa Lubaŋa.
\v 6 Pe wuye ŋat mo obwolwu ki lok mogo ma tere pe, pien kiniga pa Lubaŋa bino i kom jo ma pe winyo lokke pi kit timgi nu.
\p
\v 7 Pi meno, pe wuribbe kwedgi.
\v 8 Yam wubedo colpiny, ento kombeddi doŋ wudoko dyeceŋ i Rwot; kitwu myero doŋ obed kit pa jo me ceŋ.
\v 9 Pien nyig ma onyak pi ceŋ nen woko i gin ducu ma tye maber, dok atir, ki me ada.
\v 10 Wutem pwonyo gin ma yomo cwiny Rwot.
\v 11 Pe wuribbe i tic mo ducu me piny macol ma pe konyo, ento wunyut kit tic meno woko ka maleŋ.
\v 12 Pien bedo me lewic me loko i kom gin ma gitiyo i muŋ aloka keken.
\v 13 Gin mo-ni ma leŋo onyuto nen woko ka maleŋ; pien gin ma nen ka maleŋ noŋo tye i ceŋ.
\v 14 Man aye gin mumiyo giwaco ni, “Co woko, in ma inino, cer woko ki i kin jo muto, ci Kricito bimenyi.”
\p
\v 15 Wugwokke maber i kwo ma wubedo kwede; pe wubed macalo jo ma kwiya piny, ento calo jo maryek.
\v 16 Kare ma tye myero iti kwede i yo maber, pien nino me kare-ni opoŋ ki gin marac.
\v 17 Pi meno, pe wubed miŋ, ento wutem niaŋ gin ma Rwot mito wuti.
\p
\v 18 Dok pe myero wumer ki koŋo, pien mero kelo kit me caro. Ma ka mero, wuwek Cwiny Maleŋ opoŋ cwinywu,
\v 19 kun wuloko i kinwu kekenwu lok me jabuli, ki wer, ki wer me cwiny, kun wuwero dok wukuto wer me pako Rwot ki cwinywu ducu.
\v 20 Wupwo Lubaŋa Won i kare ducu pi jami ducu i nyiŋ Rwotwa Yecu Kricito. Co ki mongi
\v 21 Wumine kenwu i te loc pa jo mukene, ŋat man bot lawote, pi woro Kricito.
\p
\v 22 Wun mon wumine kenwu i te loc pa cogwu, macalo wumine kenwu bot Rwot.
\v 23 Pien laco obedo lawi dakone, macalo Kricito en aye lawi lwak muye en, en bene lalargi; gin lwak meno aye kome.
\v 24 Macalo lwak muye Kricito gibedo i te locce, kit meno mon bene myero gubed i te loc pa coggi i kit yo ducu.
\p
\v 25 Wun co bene wumar monwu i kit macalo Kricito omaro kwede lwak muye en, ci omiyo kwone pigi,
\v 26 wek elonygi gubed leŋ, ma doŋ otyeko lwokogi ki pii ki lok,
\v 27 wek ekel lwak muye en i nyime kene macalo nyako mamwonya twatwal, kun pe tye ka mo ma ojuŋŋe i kome, nyo kadi ki poyo mo bene pe, wek obed leŋ laboŋo ka mo murocce.
\v 28 Kit meno, co bene gumar mongi macalo gimaro komgi kengi. Ŋat ma maro dakone, maro kome kene.
\v 29 Pe tye ŋat mo ma dag kome kekene, ento pito ki cam dok gwoko maber macalo Kricito bene tiyo ki lwak jo muye en,
\v 30 pien wan wa dul kome.
\v 31 Yam gicoyo ni, “Pi lok man dano biweko wonne ki minne, ci giribbe woko gin ki dakone, gin aryo doŋ gidoko kom acel.”
\p
\v 32 Man muŋ madit twatwal. An ki tuŋ bota agonyo tyen lokke ni Kricito ki lwak muye en.
\v 33 Pi meno, laco acel acel i kinwu myero omar dakone macalo maro kome kene, ki dako bene myero onen ni eworo cware.
\c 6
\cl Chura 6
\p
\v 1 Wun litino, wuwiny lunyodowu i Rwot, pien meno aye ber.
\v 2 Yam gicoyo ni, “Wor woru ki meni.” Man aye cik mukwoŋo ma giciko pi gin mo maber ma bia ki iye, ni,
\v 3 “wek ibed ma nyimi leŋ dok iri i lobo pi kare malac.”
\p
\v 4 Dok wun wego, pe wuket kolo i kom litinowu ma miyo kiniga makogi, ento wupitgi gudoŋ maber kun wupwonyogi dok wunyebogi ki kit mabeco ma Rwot pwoyo. Lutic ki luditogi.
\p
\v 5 Wun lutic, wuwiny luditowu me lobo man ki cwinywu acel, macalo wuwinyo Kricito, kun wulworogi ki myelkom.
\v 6 Ticwu myero pe obed tic ma yeŋo waŋ keken me yomo cwiny dano, ento myero wuti gin ma Lubaŋa mito ki cwinywu ducu, macalo wun lutic pa Kricito.
\v 7 Wuti ticwu ki cwiny maber, macalo wutiyo bot Rwot, ento pe wutiyo bot dano ni gunen wek gupwowu,
\v 8 kun wuŋeyo ni, gin mo ducu ma dano mo otiyo maber, Rwot bicule pire ma rom aroma ki ticce ma en otiyo, kadi en latic nyo dano ma lone kene.
\p
\v 9 Dok wun wegi lutic, wuti bene ki luticwu i yo acel-lu; wuwek burogi obedi, kun wupo ni ladit ma loyogi wa ki wun bene tye i polo, en tero jo ducu maromrom.
\p
\v 10 Me agikkine, wubed tek i Rwot ki twero me tekone.
\v 11 Wuruk jami lweny ducu ma Lubaŋa miyo, wek wucuŋ kun wugeŋŋe kekenwu i roro pa Catan.
\v 12 Pien wan pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo.
\v 13 Pi meno myero wukwany jami lweny ducu ma Lubaŋa miyo, wek obikonywu me cuŋo matek i nino marac, pud wubicuŋ ma noŋo doŋ wuyelle i kit yo ducu.
\p
\v 14 Pi meno, myero wucuŋ ma wutweyo pyerwu woko ki ada, wuruk bene kit ma atir wek obed nyonyo me geŋo korwu,
\v 15 kun wuyubbe me tito lok me kwena maber me kuc ma bedo macalo war ma wuruko i tyenwu.
\v 16 Makato ducu, niye aye myero obed kwotwu ma bimiyo wutwero neko mac ki i kom atero ma Larac bayo.
\v 17 Wumak larre aye obed tok nyonyo me wiwu, ki lok pa Lubaŋa ma en aye pala lucwan pa Cwiny Maleŋ.
\v 18 Wuleg kare ducu i Cwiny ki lega me bako dog. Wubed ma wuyubbe i lega kare ducu kun wuciro peko, kun wulego pi jo pa Lubaŋa ducu.
\v 19 Wuleg bene pira wek Lubaŋa oyab doga, omiya gin ma myero aloki, wek atuc muŋ me lok me kwena maber ki tekcwiny.
\v 20 An lakwenane ma rom ki ŋat mo-ni ma cuŋ pi lobone, ento gitweya woko ki nyor. Lubaŋa omiya atit ki tekcwiny, kit ma myero alok kwede.
\p
\v 21 Tukiko, ominwa ma gimaro dok en latic pa Rwot me agena, bitittiwu lok ma dok i koma ki i kom ticca.
\v 22 Acwalo en botwu pi lok man kikome, wek en omi wuŋe kit ma wan watye kwede, dok ocuk cwinywu.
\p
\v 23 Kuc ki mar ki niye ma a bot Lubaŋa Won ki Rwotwa Yecu Kricito obed bot utmegiwa.
\v 24 Kica pa Lubaŋa obed bot jo ducu ma maro Rwotwa Yecu Kricito ki mar ma pe to.