ach-ss-acholi_reg/48-2CO.usfm

\id 2CO
\ide UTF-8
\h 2 Jo Korinti
\toc1 2 Jo Korinti
\toc2 2 Jo Korinti
\toc3 2co
\mt 2 Jo Korinti
\c 1
\cl Chura 1
\p
\v 1 Waraga man oa ki bot Paulo ma en lakwena pa Kricito Yecu pi miti pa Lubaŋa, ki bot ominwa Temceo. Bot jo muye Lubaŋa ma tye i Korint, kacel ki jo pa Lubaŋa ducu ma gitye i lobo Akaya ducu:
\v 2 Lubaŋa Wonwa ki Rwotwa Yecu Kricito omiwu kica ki kuc.
\p
\v 3 Myero gipwo Lubaŋa Won Rwotwa Yecu Kricito, Won ma lakica, Lubaŋa ma kweyo cwiny dano ducu.
\v 4 En kweyo cwinywa i can ducu ma walimo wek wan bene wabed ki twero me kweyo cwiny jo ma tye ki can mo mapatpat, kun wakweyo cwinygi i kit yo acel-lu ma Lubaŋa okweyo kwede cwinywa-ni.
\v 5 Kit macalo can madit ma Kricito yam ociro doŋ opoto i komwa bene, kit meno bene pi Kricito wan bene gikweyo cwinywa twatwal.
\v 6 Ka ce waneno can, meno miyo gikweyo cwinywu, dok wunoŋo larre; ka gikweyo cwinywa, meno bene miyo gikweyo cwinywu, ci miyo wucako noŋo tek bene me ciro kit can acel ma wan waciro-ni.
\v 7 Watye ki gen matek i kom Lubaŋa piwu, pien waŋeyo ni, ka wunywako kwedwa can ma waciro, kumeno bene gibikweyo cwinywu kit macalo yam gikweyo kwede cwinywa.
\p
\v 8 Utmegina, wamito ni wuniaŋ i kom can ma waneno i Acia; pekone odiyowa mukato kare woko ma pe dok cirre, omiyo pe doŋ wabedo ki gen mo me bedo kwo doki.
\v 9 Onoŋo doŋ waŋeyo ni gityeko ŋolo kop me to i wiwa. Meno otimme wek pe wajeŋŋe i komwa kekenwa, ento wajeŋŋe i kom Lubaŋa ma cero jo muto.
\v 10 En olarowa ki i can me to marac macalo man, dok bene bilarowa; wamoko bene genwa i kome ni bilarowa doki.
\v 11 Myero wuribbe kwedwa i lega, wek omi jo mapol gupwo Lubaŋa piwa, pi gin maber ma gitimo botwa pi lega pa jo mapol.
\p
\v 12 Gin ma wanyatte pire en ene: waŋeyo i cwinywa ada ni wakwo i lobo man, makatone wan wakwo kacel kwedwu, laboŋo bal mo, kun cwinywa bene leŋ i kit ma Lubaŋa mito, pe pi ryeko pa dano, ento pi kica pa Lubaŋa.
\v 13 Wan wacoyo botwu gin ma wutwero kwano dok wuniaŋ. Ageno ni wubiniaŋ matut,
\v 14 kit macalo doŋ wuniaŋ manoknok, ni, i nino pa Rwotwa Yecu wubiwakke piwa calo wan bene wabiwakke piwu.
\p
\v 15 Onoŋo ceŋ aniaŋ man maber, omiyo yam ayubo ni koŋ acak wotta ki botwu, wek wunoŋ kica kiryo.
\v 16 Pien onoŋo yam amito awok botwu i wotta i Makedonia, ki i dwogona ki kunnu, wek wukonya i wotta me cito i Judaya.
\v 17 I kare ma ayubo kit meno onoŋo pe abedo ka cabbe acaba i lokka. Pe ayubo macalo dano mo ma koŋ ye, ka dok kwero woko.
\v 18 Macalo Lubaŋa genne, lok ma yam wawaco botwu pe waloko ka dok lacen wakwero woko.
\v 19 Pien Yecu Kricito Wod pa Lubaŋa ma yam wan ki Silvano ki Temceo watito pire botwu pe obedo ŋat ma ye ka dok lacen lokke kwero woko, ento en doŋ omoko lok pa Lubaŋa;
\v 20 i en gin ma Lubaŋa ociko ni etimo ducu ocobbe kakare i kome. Meno aye gin mumiyo wawaco ni Amen i Yecu Kricito pi miyo deyo bot Lubaŋa.
\v 21 ŋat ma miyo wacuŋ matek kacel kwedwu i Yecu Kricito, dok owirowa ki moo, en Lubaŋa.
\v 22 En doŋ omwono lanen mere woko i komwa, dok oketo Cwiny mere Maleŋ i iwa, me moko ni en bimiyowa gin ducu ma en yam ociko.
\p
\v 23 Alwoŋo Lubaŋa me bedo cadenna kun awacciwu ki cwinya ducu ni, gin mumiyo pe abino i Korint, pien onoŋo amito timowu kica.
\v 24 Pe te lokke ni wan watye ki twero i kom niyewu, ento watiyo kwedwu kacel wek wubed ki yomcwiny, pien wucuŋo matek i kom niye.
\c 2
\cl Chura 2
\p
\v 1 Ento ki tuŋ bota onoŋo atamo ni dwogowa botwu myero pe dok okel botwu remcwiny.
\v 2 Ka awaŋo cwinywu, ci aŋa ma biyomo cwinya? Pe en dano ma awaŋo cwinye-ni?
\v 3 Meno en gin mumiyo yam acoyo waraga maca botwu, wek ka abino, jo ma myero guyom cwinya pe gumiya remcwiny, pien onoŋo ageno wun ducu kun aŋeyo ni, yomcwinya en yomcwiny-wu wun ducu.
\v 4 Yam acoyo botwu waraga kun pig waŋa cwer madwoŋ twatwal pi cwercwiny ki kumo ma abedo kwede, pe pi cwero cwinywu, ento wek omi wuŋe mar madit ma atye kwede i komwu.
\p
\v 5 Ka ŋat mo okelo cwercwiny, pe onoŋo ocwero cwinya, ento noŋo otemo cwero cwinywu ducu, nyo wek awacci, jo mapol i kinwu, pien pe myero awac lok mapek mukato kare.
\v 6 Kit dano macalo meno, can ma jo mapol i kinwu guketo i kome twero romme;
\v 7 en mumiyo myero doŋ wutimme kica, dok wukwe cwinye, wek omi cwercwiny madit mukato kare pe onure woko.
\p
\v 8 Man omiyo abako doga botwu, myero wunyut bote mar ma wutye kwede i kome.
\v 9 Man aye lok mumiyo yam acoyo waraga maca, me temowu, wek anen ka wuwinya i yo ducu.
\v 10 ŋat mo ma wun wutimo kica bote, an bene atimme kica. Pien ka atimo kica ki dano pi bal mo, atimo meno piwu i nyim Kricito,
\v 11 wek Catan pe olowa ki ryekone, pien wan pe wakwiya tamme.
\p
\v 12 Ma doŋ ao i Teroa pi tito lok me kwena maber i kom Kricito, yam anoŋo ni Rwot oyabba yo;
\v 13 ento cwinya pe opye pien pe anoŋo omera Tito kunnu. Ci aciko jo kunnu, ka akato acito i Makedonia.
\v 14 Myero gipwo Lubaŋa ma nino ducu tye ka telowa i dorre me nyuto loc pa Kricito, dok tiyo kwedwa wek Kricito oŋene, macalo gin makur ma ŋwece duny i kabedo ducu.
\v 15 Pien wan wacal ki gin makur ma Kricito owaŋo otyero bot Lubaŋa, ma ŋwece duny mamit; jo ma tye i yo me larre ki jo ma tye i yo me rwenyo woko doki giŋweyo.
\v 16 Doŋ bot jo ma tye ka rwenyo, ŋwecwa obedo gin muto ma kelo to; ento ki bot jo ma tye ka larre, ŋwecwa obedo gin makwo ma kelo kwo. Aŋa mono ma twero tic man?
\v 17 Wan pe wacal ki pol pa dano mukene, ma girubo lok pa Lubaŋa ki lok mukene, macalo lucatwil ma pe genne; ento wan watito mere lok pa Lubaŋa keken, watito i Kricito ma cwinywa leŋ i nyim Lubaŋa, macalo jo ma Lubaŋa ooro.
\c 3
\cl Chura 3
\p
\v 1 Wan dok wacako pakke kenwa? Nyo wamito waraga me pakowa botwu, macalo jo mogo gitye kwede, nyo waraga ma wun kikomwu aye wucoyo?
\v 2 Wun kikomwu aye doŋ wubedo waraga me pakowa, ma gicoyo i cwinywa, ma dano ducu gitwero ŋeyo dok gikwano.
\v 3 Doŋ wutyeko nyuto ka maleŋ ni wun wubedo waraga ma oa ki bot Kricito, ma wan wakelo. Pe gicoyo ki vino, pe gicoyo i kom got; ento ma ka got, Kricito ocoyo i cwiny dano kun coyo ki Cwiny pa Lubaŋa makwo.
\p
\v 4 Gin mumiyo aloko kit meno, pien wacuŋ matek i kom Lubaŋa pi Kricito.
\v 5 Wan kikomwa pe waromo loko ni gin mo oa ki botwa; tekwa ducu oa ki bot Lubaŋa.
\v 6 En bene mumiyo waromo bedo lutic me gicikkene manyen, pe lutic me cik ma gicoyo acoya, ento me Cwiny Maleŋ; pien gin ma gicoyo acoya kelo to, ento Cwiny Maleŋ kelo kwo.
\p
\v 7 Cik ma yam gigoro ki nukuta i kom got apaya ma ticce me kelo to, onoŋo obino ki deyo, omiyo neno waŋ Moses oloyo jo Icrael pi nyim Moses muryeny ocaro waŋgi woko, ma ryeny i tur nyime-nu otugi rwenyo woko.
\v 8 Iyo, tic pa Cwiny pa Lubaŋa deyone pe bikato maca matek twatwal?
\v 9 Pien ka tic ma miyo kop loyo dano tye ki deyo, ci tic ma miyo gikwano dano ni kitgi atir deyone pe doŋ kato maca woko?
\v 10 Kombeddi doŋ gin ma yam tye ki deyo doŋ odoko gin ma pe ki deyo kadi ki acel mo, pi deyo mukene ca ma doŋ kate matek twatwal-li.
\v 11 Pien ka gin ma yam orwenyo woko obino ki deyo, gin ma ri myero doŋ obed ki deyo makato.
\p
\v 12 Pien wan watye ki kodi gen man, en mumiyo waloko ki tekcwiny.
\v 13 Pe dok wacal ki Moses ma yam oumo waŋe ki boŋo, wek jo Icrael pe gunen kit ma ryeny mucaro waŋgi-ni tye ka rwenyo woko kwede i tur nyime, ci otum woko.
\v 14 Ento onoŋo tamgi yam oumme woko; nio wa tin tamgi pud oumme i kite acel-lu ka gikwano botgi gicikke macon, pien laum ca twero kwannye pi Kricito keken.
\v 15 Kadi wa i kare-ni ka gikwano botgi cik pa Moses, laum pud bedo kakare, umo tamgi woko.
\v 16 Ento ka dano mo olokke bot Rwot, laum meno kwannye woko matwal.
\v 17 Rwot ma waloko pire kany-nyi en Cwiny Maleŋ; ka ma Cwiny pa Rwot tye iye, kunnu kuc bene tye iye.
\v 18 Ki wan ducu ma doŋ gikwanyo laum woko ki i waŋwa watye macalo kiyo ma miyo deyo pa Rwot nen macalo ryeny ceŋ, mumiyo watye ka lokke me doko calo en, kun deyone medde ameda i komwa; meno aye tic pa Rwot, ma en Cwiny Maleŋ.
\c 4
\cl Chura 4
\p
\v 1 Pi meno, wan ma doŋ giorowa i tic man pi kica pa Lubaŋa cwinywa pe dok tye ka dok cen.
\v 2 Wan doŋ wadag kit ducu ma gikano, ki kit me lewic; dok bene watyeko kwero tic me bwolo woko ki nyobo lok pa Lubaŋa, ento pi loko lok ada ka maleŋ wageno ni ŋec ma tye i cwiny dano acel acel ma nyutte balle bipwoyowa.
\v 3 Ka ce lok me kwena maber ma wan wakelo oumme woko, noŋo oumme ki tuŋ bot dano ma gitye ka rwenyo woko arwenya.
\v 4 Gin jo ma pe giye-nu, lubaŋa me lobo man doŋ oumo tamgi woko wek pe gunen leŋo me lok me kwena maber i kom deyo pa Kricito, ma en cal pa Lubaŋa kikome.
\v 5 Wan pe watito lok i komwa kenwa, ento i kom Yecu Kricito, ma en aye obedo Rwot, ma wan kikomwa wadoko luticwu pi Yecu.
\v 6 Pien Lubaŋa ma yam owaco ni, “Leŋo myero oryeny kun a i colpiny,” en aye ma doŋ oryeny i cwinywa, omiyowa leŋo me ŋeyo deyo pa Lubaŋa ma oryeny i waŋ Kricito.
\p
\v 7 Ento watye ki lonyo man i atabo ma gicweyo ki lobo, me nyuto ni tek madwoŋ me twero obedo gire pa Lubaŋa, pe oa ki botwa.
\v 8 Gidiyowa woko tuŋŋi ki tuŋŋi, ento pe giridowa ma okato kare; tamwa ocuŋ woko, ento genwa pe oballe;
\v 9 giunowa, ento pe giwekowa ata; gibolowa piny i ŋom ligwek, pe bene wato.
\v 10 Nino ducu watiŋo to pa Yecu i komwa, wek kwo pa Yecu bene onen woko ka maleŋ i komwa-ni.
\v 11 Pien nino ducu wan ma wakwo wamine me to pi Yecu, wek omi kwo pa Yecu onen woko ka maleŋ i komwa ma to-ni.
\v 12 Mumiyo to tye ka tic i komwa, ento kwo tye ka tic i komwu.
\p
\v 13 Wan watye ki kit cwiny acel-lu me niye ma yam omiyo gicoyo ni, “Aye, en mumiyo aloko.” Wan bene waye, mumiyo watye ka lok.
\v 14 Waŋeyo ni, ŋat mucero Rwotwa Yecu bicerowa bene kacel ki Yecu, ci bikelowa i nyime kacel kwedwu.
\v 15 Pien meno ducu otimme piwu, wek kica pa Lubaŋa omedde bot jo mapol, wek gin bene gumedde ki pwoc madwoŋ ma kelo deyo bot Lubaŋa.
\p
\v 16 En aye gin mumiyo cwinywa dok pe tye ka dok cen. Kadi bed kwowa ma woko tye ka balle, ento kwo ma i iwa tye ka roc, doko nyen nino ki nino.
\v 17 Pien un ma giunowa kwede pe pek, bedo pi kare manok mo keken, dok bene tye ka yubo botwa deyo mapek ma pe tum, ma dit matek makato;
\v 18 pien pe waciko waŋwa i kom gin ma nen, ento i kom gin ma pe nen. Gin ma nen bedo pi kare manok mo keken, ento gin ma pe nen ri nakanaka.
\c 5
\cl Chura 5
\p
\v 1 Pien waŋeyo ni ka komwa me lobo man oballe woko, ma wabedo iye macalo wabedo i kema-ni wan watye ki gedo mukene ma Lubaŋa bimiyo botwa, ot ma pe gigero ki ciŋ, ot ma tye doŋ bedo matwal i polo.
\v 2 adane wan watye ma wacur acura i kema man, kun wamito matek ni girukwa ki kabedowa ma a i polo,
\v 3 wek wabam i kom man, ma ka doŋ watyeko rukone, ci pe gibinoŋowa watye munero.
\p
\v 4 Pien ka pud watye i kema man, wacur acura pi cwercwiny ma onurowa; pe ni meno wamito ni wabed ma pe warukke, ento wamito ni waruk kom manyen i wi man, wek kwo omwony gin ma to woko.
\v 5 ŋat ma oyubowa pi lok man kikome aye Lubaŋa, dok bene omiyowa Cwinye calo gin ma Lubaŋa omiyo ma moko ni en bicobo gin ma ociko.
\p
\v 6 En mumiyo nino ducu wadiyo cwinywa maber, kun bene waŋeyo ni, ka watye i paco me komwa en-ni, wabedo bor ki Rwot,
\v 7 pien kwowa cuŋ i kom niye, pe i neno piny ma waneno.
\v 8 Wan wadiyo cwinywa maber, kun watamo ni twra wawot ma wabwoto komwa woko, wabed paco bot Rwot.
\v 9 Doŋ kadi watye i paco kany nyo kunnu, waketo cwinywa me bedo jo ma giyomo cwiny Rwot.
\v 10 Pien wan ducu myero wacuŋ i nyim Kricito wek oŋol kop i komwa, wek dano acel acel onoŋ gin mutiko en, ma lubo kit ma yam otiyo kun tye i kom, ka ber nyo ka rac.
\p
\v 11 Doŋ macalo waŋeyo ni Rwot myero gilwor, watemo ywayo tam pa dano, ma kitwa nen woko ka maleŋ bot Lubaŋa; ageno bene ni kitwa otyeko nen botwu ki ŋec ma tye i cwinywu ma nyuttiwu bal.
\v 12 Pe dok wapakke kenwa, ento watye ka miyo botwu gin ma myero wuwakke kwede piwa, wek wubed ki yo me gamo dog jo ma giwakke pi gin ma nen ki woko, pe pi kit ma dano tye kwede i cwinye.
\v 13 Ka doŋ wadoko jo ma lupoya, wapo giwa pi Lubaŋa; ento ka wiwa tye ka tic maber, meno bikonyowu.
\v 14 Pien mar pa Kricito loyo kwowa, pien doŋ waŋolo kop kit man ni, ŋat acel oto pi jo ducu, meno mumiyo jo ducu doŋ guto.
\v 15 En yam oto pi dano ducu, wek jo makwo pe gumedde ki bedo kwo pigi kengi, ento gubed ki kwo pi ŋat ma yam oto ka ocer pigi ca.
\p
\v 16 En mumiyo cakke kombeddi, wan pe waŋeyo dano mo i kit me lobo man; kadi bed yam waŋeyo Kricito i kit me lobo, pe dok waŋeye kit meno.
\v 17 En mumiyo ka ŋat mo tye i Kricito, en doŋ bedo gin ma giketo manyen; gin macon noŋo doŋ orwenyo woko, gin manyen doŋ oleyo kakare.
\v 18 Meno ducu obedo tic ma Lubaŋa otiyo, ma yam odwokowa kwede bote, pi Kricito, dok bene omiyowa tic me dwoko dano bote;
\v 19 ni meno, i Kricito, Lubaŋa onoŋo yam tye ka dwoko dano ma i lobo bote, kun pe okwano balgi i komgi, dok bene omiyowa lok me kwena i kom kit ma en doŋ odwokogi kwede bote.
\v 20 En mumiyo wadoko lukwena, luwaŋ Kricito; Lubaŋa legowu ki dwanwa, wan bene wabako dogwa botwu ma ka Kricito ni, Wuwek Lubaŋa odwokwu bote.
\v 21 Ŋat ma yam pe oŋeyo bal, Lubaŋa oloke odoko bal piwa, wek pire wadok jo ma nywako kit pa Lubaŋa ma tye atir.
\c 6
\cl Chura 6
\p
\v 1 I ticwa kacel ki Lubaŋa bene walego ni, kit ma doŋ wunoŋo kwede kica pa Lubaŋa-ni, pe wuwek oballe nono,
\v 2 pien en yam owaco ni, “Yam awinyi i kare me timo dano maber, yam akonyi i kare me laro dano.” Wunen, man aye kare ma gitimo iye ber bot dano. Tin aye nino me larre.
\p
\v 3 Wan pe wamito waket ariya mo i yo pa ŋat mo, wek dano pe guwac ni ticwa rac.
\v 4 ento i kare ducu wanyuto berwa kenwa macalo wan lutic pa Lubaŋa kun waciro matek twatwal, i can ki peko ki ayelayela ma odiyowa.
\v 5 Gipwodowa, gitweyowa i buc, dano giroko lwak me lweny i komwa, watiyo tic matek, ma nino ki cam bene oremowa.
\v 6 Wanyuto ni wan lutic pa Lubaŋa pi kitwa maleŋ, pi ŋec ma watye kwede, pi diyo cwinywa ki pi kicawa; pi Cwiny Maleŋ, ki pi mar ma watye kwede ma goba pe iye,
\v 7 pi tito lok me ada, ki pi tek pa Lubaŋa. Doŋ wamako jami lweny me kit ma atir i ciŋwa ryoryo, tuŋ lacuc ki tuŋ lacam.
\v 8 Giketo deyo i komwa, dok bene giketo lewic i komwa, giyetowa dok bene gipakowa. Giterowa macalo lugoba, ento kun wan jo me ada.
\v 9 Giterowa macalo jo ma pe giŋene, ento giŋeyowa twatwal. Gilokowa wadoko calo jo muto, kun wan mere jo makwo. Kadi gitimwa gujiguji, pe ginekowa;
\v 10 kadi gimiwa kumo, cwinywa noŋo pud bedo yom nino ducu; wanen macalo lucan, ento wan aye ma wamiyo jo mapol gidoko lulonyo; wanen calo pe watye ki gin mo, ento kun kono watye ki jami ducu.
\p
\v 11 Wun jo Korint, wan doŋ waloko kwedwu ka maleŋ, dok bene doŋ wayabo cwinywa botwu malac.
\v 12 Wan pe waumo cwinywa woko botwu, ento wun aye wuumo cwinywu.
\v 13 An aloko kwedwu macalo wun litinona; kit ma watimowu kwede, wun bene wutim kit meno; wuyab cwinywu botwa malac.
\p
\v 14 Pe wuribbe kun wubedo kacel ki jo ma pe guye Yecu, pien kitwu patpat. Doŋ kit ma atir ki tim maraco gitwero bedo lurem niŋinŋ? Leŋo ki colpiny gitwero ribbe gibedo kacel niŋniŋ?
\v 15 Doŋ tam pa Kricito ki pa Belial twero rwatte? Gin aŋo ma dano ma oye Yecu twero nywako gin ki ŋat ma pe oye?
\v 16 Ot pa Lubaŋa kono twero ribbe niŋniŋ ki cal jogi? Pien wan aye wabedo ot pa Lubaŋa makwo; macalo en Lubaŋa doŋ owaco ni, “An abibedo i igi, abibedo ka wot awota i kingi, abibedo Lubaŋagi, gin bene gibibedo jona.
\p
\v 17 Pi meno doŋ wua woko ki i kingi, wupokke woko kwedgi, man lok pa Rwot, pe wugud gin mo ma kome ki keni. miyo abijolowu,
\v 18 abibedo wonwu, wun bene wubibedo awobena ki anyirana; man lok pa Rwot Won Twer Ducu.”
\c 7
\cl Chura 7
\p
\v 1 Wun ma amaro, cikke meno yam giciko piwa. Pi meno, myero walonnye woko kekenwa i gin mo ducu ma cido komwa nyo cwinywa, kun walworo Lubaŋa, wek wadoku jo maleŋ atikatika.
\p
\v 2 Wuyab cwinywu botwa; pe watimo ŋat mo marac, pe wabalo ŋat mo, pe bene wabuyo ŋat mo pi mito lim.
\v 3 Pe awaco man ni wek kop olowu, pien yam awaco botwu koŋ ni wun piwu lit botwa mada, wek wato dok wakwo kacel kwedwu.
\v 4 Atye ki gen mada i komwu; awakke bene matek piwu. Cwinya okwe maber, dok apoŋ ki yomcwiny i canwa ducu.
\p
\v 5 Cakke i kare ma wao i Makedonia pe wabedo ki yweyo mo. Can onoŋo orumowa woko tuŋŋi ki tuŋŋi, lweny i kin dano ki lworo ma onoŋo tye i cwinywa.
\v 6 Ento Lubaŋa ma kweyo cwiny jo ma can obwoyogi, okweyo cwinywa pi bino pa Tito.
\v 7 Pe pi binone keken, ento bene pi kit ma wun wukweyo kwede cwinye. En otito botwa pi mit ma wutye kwede me nena, cwercwiny ma wutye kwede, ki kit ma wularo kwede pira, ci omedo yomcwinya ameda.
\p
\v 8 Kadi bed waragana ca yam ocwero cwinywu, an pe doŋ aŋut pi coyone, kadi bed yam aŋut pien aneno ni waraga ca ocwero cwinywu pi kare mo.
\v 9 Kombeddi an cwinya yom, pe te lokke ni, pien awaŋo cwinywu, ento pien waŋ cwinywu omiyo wuŋut. Waŋcwinywu meno onoŋo oa ki bot Lubaŋa, wek omi pe wunoŋ can mo piwa.
\v 10 Pien waŋcwiny ma Lubaŋa miyo kelo ŋut ma tero dano i larre, ma pe doŋ gitwero waco ni, “Kono yam pe atimo”; ento waŋcwiny me lobo kelo to.
\v 11 Koŋ wunen kit ma Lubaŋa otiyo kwede ki waŋcwinywu! Doŋ wunen kit ma wuketo kwede cwinywu, kit ma doŋ wuketo kwede tek me nyuto ni wupe ki bal, kit akemowu, kit lworo, kit mit ma wutye kwede me nena, kit ma wularo kwede pira, ki kit ma wuculo kwede kwor! Wun doŋ wutyeko nyutte woko kenwu i yo ducu ni pe wutye ki bal mo i lok meno.
\v 12 Mumiyo kadi bed acoyo botwu waraga, pe acoyo pi ŋat ma otimo gin marac, kadi pi ŋat ma gitimo gin marac i kome, ento acoyo wek omi kit ma wularo kwede pira onen woko ka maleŋ botwu i nyim Lubaŋa.
\v 13 Man en aye gin mumiyo cwinywa doŋ okwe. Medo i kom kwecwinywa, yam wabedo ki yomcwiny mada pi yomcwiny pa Tito, pien wun ducu wukonyo me kweyo cwinye.
\v 14 Kadi bed yam awakke i nyime piwu, lewic pe omaka; ento kit macalo yam lok ducu ma wabedo ka Tito botwu obedo lok me ada, kit meno wakkewa bene i nyim Tito obedo me ada.
\v 15 Ka ce en po i kom kit macalo wun ducu wuwinye kwede, ki kit ma wujole kwede ki lworo ki myelkom, mar medde ameda i iye i komwu.
\v 16 An cwinya yom, pien atye ki gen madit i komwu i yo ducu.
\c 8
\cl Chura 8
\p
\v 1 Utmegiwa, wamito wuŋe pi cwiny me kica ma oa ki bot Lubaŋa ma onen bot lwak dano ma guye Kricito ducu ma gitye i Makedonia.
\v 2 Gin guciro un ducu ma gitemogi kwede matek, ento gin mua ki i yomcwiny madit ma gin gubedo kwede i dye can madit mada ma yam odiyogi ca, en aye lonyo madit me cwiny ma gubedo kwede me miyo mot.
\v 3 Pien gin yam gumiyo gin ma giromo miyone, ki makatone bene, kit ma an kikoma aneno, ma pe gidiyogi iye adiya.
\v 4 Gin gulegowa ma gibako doggi ni watim ber, waye gin giribbe kwedwa i konyo jo pa Lubaŋa.
\v 5 Yam gutiyo tic mukato genwa woko, pien gukwoŋo mine kengi bot Lubaŋa, ka doŋ pi mit pa Lubaŋa gucako mine kengi botwa bene.
\v 6 Ka doŋ wacuko cwiny Tito ni, kit macalo yam doŋ en ocako tic man me kica i kinwu, myero bene doŋ ocob woko.
\v 7 Doŋ macalo wun wuloyo dano i yo ducu, i kom niye, i loko lok, i ŋec, i keto cwinywu ki i mar ma wutye kwede i komwa, ber wulo dano bene i tic man me kica.
\p
\v 8 Gin ma aloko-ni pe obedo cik ma an aye amiyo, ento anyuto botwu kit ma jo mukene giketo cwinygi, wek anen mar ma wutye kwede ka obedo mar me ada.
\v 9 Pien wuŋeyo cwiny me kica ma Rwotwa Yecu Kricito obedo kwede; kadi bed nene en lalonyo, ento piwu olokke odoko lacan, wek i canneni wun wudok lulonyo.
\v 10 Man tamma ma amiyo i lok man: twero bedo ber ka wutyeko gin ma yam wucako i mwaka mukato-ni woko. Yam wun aye wubedo jo mukwoŋo, pe i tic keken, ento i yeyo me tiyo tic bene.
\v 11 Kombeddi amito wumedde wuwot anyim ki ticwu ca, wucob woko. Wubed ki miti me tyekone ma rom aroma ki maca ma yam wukwoŋo kwede, kun wukwanyo gin ma mitte ki i kom gin ma tye botwu.
\v 12 Lubaŋa gamo mot ma dano tye kwede, tekke en obedo ki miti me miyone, ma pe paro gin ma pe etye kwede.
\v 13 Pe awaco ni jo mukene gubed maber, wun aye can odiwu, ento ni dano ducu gubed maromrom.
\v 14 Kit macalo kombeddi wutye ki jami mabuppi, wukonygi i cangi, wek ka waŋ mo gin gubedo ki jami mabup, gin bene gubikonywu ki gin murem botwu, ci doŋ miyo wubedo maromrom;
\v 15 macalo yam gicoyo ni, “ŋat ma ocoko mabup, gin mo pe odoŋ bote, ŋat mucoko manok mo, gin mo pe orem bote.”
\p
\v 16 Wapwoyo Lubaŋa pien oketo i i Tito miti madwoŋ ma rom ki mewa me konyowu.
\v 17 En pe ojolo legawa keken, ento cwinye tye iye matek, mumiyo en gire bino botwu pi mitte kene.
\v 18 Waore kacel ki ominwa ca ma ŋene twatwal bot jo ducu ma guye Kricito pi kit ma en tito kwede lok me kwena maber.
\v 19 Pe meno keken, ento lwak dano ducu ma guye Kricito yam guyere me wot kacel kwedwa i tic man me kica ma watye ka tiyone pi miyo deyo bot Rwot, ki pi mitiwa me miyo kony bot dano.
\p
\v 20 Watemo gwokke matek wek ŋat mo pe onoŋ bal mo i kit ma watye ka tic kwede ki mot man mabup ma giketo i ciŋwa-ni.
\v 21 Tamwa tye me timo gin maber, pe i nyim Lubaŋa keken, ento kadi wa i nyim dano bene.
\v 22 Doŋ waorogi kacel ki ominwa mukene ma wabedo ka temo kite pi kare malac, ci wanoŋo ni en obedo dano ma keto cwinye i kom tic mapol, ento i kare-ni doŋ tye ka keto cwinye matek twatwal makato ma yam con, pi gen madit ma en tye kwede i komwu.
\v 23 Tito lawota dok latic wadiwa piwu, ki utmegiwa mukene-gu, gin luor pa jo ducu ma guye Kricito, gin bene aye jo ma kelo deyo bot Kricito.
\v 24 Pi meno, wunyut mar ma wutye kwede woko ka maleŋ bot dano ducu ma guye Kricito, wek gunen ni nyattewa ma wanyatte kwede piwu onoŋo tye atir.
\c 9
\cl Chura 9
\p
\v 1 Kombeddi pe mitte ki tuŋ bota me coyo botwu lok i kom mot ma gimiyo pi konyo jo pa Lubaŋa,
\v 2 pien aŋeyo miti ma wutye kwede. Atye ka nyatte piwu mada bot jo Makedonia ni meno, “Jo Akaya guyubbe woko wa con cakke i mwaka mukato.” Pi cukke ma wubedo ka cukke kwede, omiyo polgi bene guketo cwinygi.
\v 3 Doŋ acwalo utmegiwa botwu ennu wek nyattewa piwu i lok man pe ogik i lok keken, ento myero wubed ma wuyubbe i kit ma awaco botgi-ni.
\v 4 Ka ce ao kunnu ki jo Makedonia mogo, ka gibinoŋo ni pe wuyubbe, ci miyo doga two woko, pi gen ma onoŋo waketo i komwu; ento wun kono?
\v 5 Meno aye gin mumiyo atamo me cuko cwiny utmegiwa me kwoŋo nyima me bino botwu, wek gin aye koŋ gunen ka mot man ma yam wucikke me miyone-ni wuyubo; wek doŋ obed ma giyubo woko macalo mot ma wumiyo giwu ki cwinywu kenwu ma pe gidiyowu iye adiya.
\p
\v 6 Lok tye kit man ni, dano ma coyo kodi manok, bikayo bene manok, ŋat ma coyo kodi madwoŋ, bikayo bene mabup.
\v 7 Dano acel acel myero otim kit macalo cwinye mito, laboŋo waŋcwiny mo nyo dic mo. Pien Lubaŋa maro ŋat ma miyo jamine ki yomcwiny.
\v 8 Dok Lubaŋa twero miyo botwu jami mabeco mapol ata, wek kare ducu wubed ki jami ma romowu maber, ma weko wun bene wutwero miyo kony mabup pi kony tic ducu mabeco,
\v 9 macalo yam gicoyo ni, “Ocoro jamine mapol, omiyo ki lucan, berre bedo nakanaka.”
\p
\v 10 ŋat ma miyo kodi bot dano ma laco kodi, ki cam me acama, bimiyowu kodi dok binyayone bene, ci doŋ miyo gin mua i kom cwiny maber ma wutye kwede bedo dit twatwal.
\v 11 En bimiyo wulony i yo ducu, ma romo miyo wubedo ki cwiny maber me miyo mot i kare ducu; pi ticwa bimiyo dano gipwoyo Lubaŋa.
\p
\v 12 Pien tic me kony macalo man ma wutiyo bikelo gin ma mitte bot jo pa Lubaŋa; ento pe meno keken, bikelo bene pwoc madit twatwal bot Lubaŋa.
\v 13 Pi gin maber ma ticwu kelo, bimiyo jo mapol gimiyo deyo bot Lubaŋa, pien nyuto winy maber ma wutye kwede i lok me kwena maber i kom Kricito ma watito, ki pi cwiny maber ma wupoko kwede limwu bot jo-nu ki bot jo mukene ducu.
\v 14 Gibilego Lubaŋa piwu bene kun cwinygi paro piwu, pi kica pa Lubaŋa madit ma okato kare ma doŋ onen i komwu.
\v 15 Gipwo Lubaŋa pi motte maber ma pe wacce.
\c 10
\cl Chura 10
\p
\v 1 An Paulo akok botwu kun abako doga, an ma giwaco ni amwol dok awor bene ka atye kacel kwedwu, ento abedo ger ka atye woko cen. Alegowu i lok man pi mwolo dok pi kica pa Kricito.
\v 2 Alegowu ni ka abino botwu, pe wumiya abed ki kit gero ki tekcwiny ma ageno ni atwero bedo kwede i kom jo mogo ma gitamo ni wan walubo kit me lobo man.
\v 3 adane wan wabedo i lobo, ento pe watye ka lweny ki jami lweny me lobo.
\v 4 Jami lweny ma watiyo kwedgi me lwenywa pe obedo jami lweny me lobo man, ento gubedo jami lweny me tek pa Lubaŋa, ma turo cel gogo pa lumerokwa woko.
\v 5 Waturo kwede tam ma pe atir, ki kit wakke ducu ma tiŋŋe me pyem, ma geŋo dano miyo pe giŋeyo Lubaŋa, kun wamako tam acel acel macalo opii, waketo i te loc pa Kricito.
\v 6 Dok bene wayubbe me keto can i kom dano ducu ma gipe ki winy, ka onoŋo wun doŋ wutyeko mine kenwu i te locwa.
\p
\v 7 Wunen gin ma tye i nyimwu. Ka ce dano mo genne kekene ni en dano pa Kricito, koŋ myero otam bene ni, macalo en dano pa Kricito, wan bene watye kit meno.
\v 8 Pien kadi bed anyatte matek twatwal pi twero ma Rwot omiyo botwa, lewic pe bimaka; twero meno en omiyo botwa me konyowu, pi doŋowu, ento pe me dwokowu cen.
\v 9 Pe amito anen botwu macalo ŋat ma tye ka burowu ki waraga ma acoyogu.
\v 10 Pien dano gitye ka waco ni waragana pek dok gwa, ento ka ao botwu koma nen goro, dok bene gin mo pe i lokka ma aloko botwu.
\v 11 Jo macalo meno myero guniaŋ ni, pe tye apokapoka mo i lok ma wacoyo i waragawa ka watye cen ka mabor, ki gin ma wabitimo ka watye kacel kwedwu.
\p
\v 12 Pe watiŋŋe me kette kenwa i rwom acel ki dano mogo ma i kin jo ma gimaro korre kengi, nyo me porre kenwa kwedgi. Kit ma gitye ka pimme kwede i kingi kekengi, dok bene giporre kengi ki gin me porregi ma ginoŋo i kingi kengi, kit jo macalo meno gin lumiŋ.
\v 13 Ento wan giwa pe wabinyatte makato kare; wabigik mewa ka ma yam Lubaŋa opoko botwa, ma wun bene wutye iye.
\v 14 Wan pe wamedo ka gikwa, calo pe gipoko botwa me o botwu, pien wan aye ma yam wakwoŋo bino botwu me tito lok me kwena maber i kom Kricito.
\p
\v 15 Pe wanyatte ma okato kare i kom tic ma jo mukene aye guyelle iye; ento watye ki gen ni ka niyewu doŋ omedde, ticwa bene bimedde matek i kinwu, kun lubo ka ma yam gityeko poko botwa.
\v 16 Man bimiyo watito lok me kwena maber i lobo ma tye yo tuŋ i ŋewu kuca, kun pe wanyatte pi tic ma jo mukene gutiyo i ka tic pa ŋat mukene.
\v 17 “ŋat ma nyatte myero onyatte pi Rwot,” macalo yam gicoyo.
\p
\v 18 Pien pe ŋat ma pakke kekene en aye ma Lubaŋa pwoyo, ento dano ma Rwot dworo.
\c 11
\cl Chura 11
\p
\v 1 Kono wudiyo cwinywu manok mo i koma i miŋona-ni. Koŋ wudi cwinywu ba!
\v 2 Nyeko omaka piwu ki lakodi nyeko ma Lubaŋa tye kwede bene-ni; pien wucal ki nyako ma ayubo me nyomme ki laco acel, kun ageno ni abitere bot cware, en aye Kricito, kun en nyako maleŋ ma pud pe laco mo obedo kwede.
\v 3 Ento atye ki lworo ni, kit macalo twol yam obwolo Kawa ki ryekone, wun bene dano bibalo tamwu woko, ma miyo pe doŋ wubimaro Kricito ki cwinywu ducu ki mar maleŋ.
\v 4 Pien ŋat mo ma obino botwu, ka cako tito botwu pi Yecu mukene mapat ki maca ma watito pire botwu-ni, nyo omiyowu cwiny mapat ma yam pe wutye kwede, nyo otito lok me kwena mo mapat ma yam pe wugamo, meno wudiyo cwinywu iye maber twatwal.
\v 5 Ki i tamma, aneno ni lukwena madoŋo ma gukato kare ca pe gikata kadi ki acel.
\v 6 Gwok nyo pe aryek i lok, ento aryek i ŋec mada. Meno yam doŋ wanyuto botwu ka maleŋ, i yo ducu ki i kare ducu.
\p
\v 7 Yam atimo bal ka mwolle kena wek aket dit i komwu, kun atito botwu lok me kwena maber mua ki bot Lubaŋa nono, laboŋo gamo cul mo?
\v 8 Gitwero waco ni yam ayako lwak pa Kricito ka mukene piwu, pien ceŋ agamo lim ki botgi pi ticca botwu.
\v 9 Dok bene i kare ma onoŋo atye botwu, ka can jami mo omaka, pe ayelo ŋat mo i kinwu, pien utmego ma gua ki i Makedonia gukelo gin ducu ma mitte pira. Onoŋo abedo ma agwokke, dok bene abigwokke, wek pe amiwu peko mo.
\v 10 Doŋ awaco botwu ni, macalo ada pa Kricito tye i cwinya, pe gibigeŋo nyattena i lok man i lobo Akaya ducu.
\v 11 Piŋo? Pien ni pe amarowu? Lubaŋa ŋeyo ni amarowu.
\p
\v 12 Gin ma atiyo abimedde ki tiyone, wek pe ami jo ca gunoŋ kare ma gimito wek gimi onen ni gin girom aroma kwedwa i tic ma ginyatte iye-nu.
\v 13 Pien jo-nu pe gin lukwena kikome, gin lutic ma gibwolo dano, ma gilokke woko ginen calo lukwena pa Kricito.
\v 14 ŋat mo myero pe obed ki ur i lok man, pien kadi Catan kikome bene lokke nen macalo lamalaika ma menyo piny.
\v 15 Man pe doŋ gin ma pire dit twatwal ka ce lutic pa Catan gilokke ginen calo lutic ma tiyo gin ma atir; agikkigi bibedo rom ki gin ma gutiyo.
\p
\v 16 Koŋ doki awac ni, ŋat mo pe opar ni an lamiŋ; ka ce onoŋo wutamo kit meno, ci doŋ wujola macalo dano mamiŋ, wek omiya bene anyatte manoknok.
\v 17 (Gin ma atye ka wacone botwuni pe gin ma Rwot omiya ni awac botwu; aloko calo dano mamiŋ ki gen man ma atye kwede me nyatte.
\v 18 Macalo jo mapol ginyatte pi gin me lobo i kit me dano, an bene abinyatte).
\v 19 Pien wudiyo cwinywu ki yomcwiny i kom jo ma lumiŋ, kun wun jo maryek.
\v 20 Wudiyo cwinywu kadi ka ŋat mo lokowu me doko opiine, nyo camo limwu, nyo buyowu, nyo um i komwu nyo kadi doŋo lemwu.
\v 21 Lewic omaka omiyo aye ni wan yam pe wabedo tek i yo meno! Ento gin mo keken ma dano okette me nyatte pire, an bene akette woko me nyatte kit meno, ma onoŋo pud aloko macalo lamiŋ.
\v 22 Gin mono jo Ibru? An bene. Gin jo Icrael? An bene. Gin mono likwayo Abraim? An bene.
\v 23 Gin lutic pa Kricito? An gira aloko calo dano ma lapoya, awacci, akatogi woko. Atiyo tic aloyogi, ari i mabuc akatogi, gigoya ma wel odoone pe kwanne, abwot ki i lak to tyen mapol.
\v 24 Lujudaya gugoya tyen abic ki del pyeradek wiye aboŋwen.
\v 25 Gigoya ki odoo tyen adek, gicela bene ki got kicel, mel otur woko kweda tyen adek; abuto ari i nam matutu dyeceŋ ki dyewor benebene tyen acel.
\v 26 Ari i wot mapol ma can bene opoto i koma, can mua ki i lwak kulu mupoŋ ki pii, can mua bot luyak, can mua bot lutuwa, can ma lurok guketo i koma, can ma nen i gaŋ, can ma nen i tim, can ma poto i nam, ki can ma a ki bot utmego ma gin lugoba.
\v 27 Acanne twatwal i tic matek; tyen mapol pe anino dyewor. Ari kec ki orwo pii; tyen mapol abedo laboŋo cam mo ma romma, dok abedo i piny maŋic laboŋo ginaruka.
\v 28 Medo i kom gin jami mukene-gu ducu, tye gin acel ma kelo peko bota kare ki kare, en aye par ma atye kwede pi jo muye Kricito i kabedo mapatpat ducu.
\v 29 Tye ŋat mo ma goro ma kun an pe agoro? Tye ŋat mo ma gimiyo opoto i bal ma cwinya pe owaŋ pire?
\p
\v 30 Ka ce onoŋo myero anyatte, abinyatte pi gin ma nyuto gorona.
\v 31 Lubaŋa Won Rwotwa Yecu Kricito, ma gipwoyo nakanaka, en ŋeyo ni pe aloko goba.
\p
\v 32 I kare ma onoŋo atye i Damaciko, laloc mo me dul lobo ma tye i te loc pa kabaka Areta obedo ka kiyo gaŋ meno ni wek emaka,
\v 33 ento gicwala woko ki aduku madit kun gimiyo akato ki i waŋ dirica ma i kom cel, ci omiyo abwot woko ki i ciŋe.
\c 12
\cl Chura 12
\p
\v 1 Myero anyatte; kadi bed pe konyo gin mo, abilok i kom gin ma aneno i waŋ lek ki gin ma Rwot onyuto bota.
\v 2 Aŋeyo dano mo i kin jo pa Kricito ma yam gitiŋo gitero woko malo wa i polo me adekke, kombeddi doŋ okato mwaka apar wiye aŋwen kulu. (Ka kono Lubaŋa otiŋo kome, kono nyo omiye oleko aleka, an gira pe aŋeyo, ento Lubaŋa ŋeyo).
\v 3 Aŋeyo ni dano meno yam gitiŋe malo gitere wa i Paradic. (Ka ce Lubaŋa otiŋo kome, gwok nyo omiye oleko aleka, pe aŋeyo, ento Lubaŋa ŋeyo).
\v 4 Yam owinyo lok mogo ma pe myero lokke ka maleŋ, ma pe giye ni dano mo otuci.
\v 5 Kit lok pa dano macalo meno aye bimiyo anyatte, ento pira kena pe abinyatte, ento kono pi gorona aye keken.
\v 6 Kadi bed onoŋo nen calo amito nyatte, pe abibedo lamiŋ pien noŋo aloko lok ada. Ento pe abinyatte, wek dano mo pe obed ki par i koma makato gin ma en oneno i koma, nyo lok ma en owinyo awinya ki bota.
\v 7 Me gwoka wek pe alyerre kena ma okato kare pi lwak jami mapol ma yam Lubaŋa onyuto bota, yam girwako okuto i koma, ma onoŋo en pud lwakena pa Catan wek oket can i koma, wek pe akette malo kekena ma okato kare.
\v 8 Yam alego Rwot pi man tyen adek ni jami macalo meno oa woko ki i koma.
\v 9 Cutcut en ogamo ni, “Kicana tye ma rommi, pien tekona bedo tek twatwal ka ma goro tye iye.” En meno gin mumiyo anyatte ki yomcwiny madit twatwal pi gorona, wek tek pa Kricito obed i koma.
\v 10 Pi Kricito omiyo cwinya yom pi goro mapatpat ma atye kwede, ki pi yet, ki pi can, ki pi peko mogo ma giuna kwede, ki peko ma diya matek; pien ka ma agoro iye, kenyo en aye ka ma atek iye.
\p
\v 11 Onoŋo abedo lamiŋ! Wun aye mucora iye, pien onoŋo myero wun aye wudwora. Lukwena madito mukato kare ca pe gikata kadi ki acel, kadi bed an pe a gin mo.
\v 12 Gin ducu ma nyuto ni an lakwena kikome yam otimme i kinwu ki diyo cwiny madit, lanyut mogo, taŋo ki tic me aura madito.
\v 13 ŋo ma yam oremowu makato lwak muye Kricito i kabedo mukene ducu? Gwok nyo man keken ni an yam pe abedo ka nurowu ki peko? Wutimma ber, ka ce onoŋo abalo pi koyowu woko kit meno!
\p
\v 14 Man doŋ tyen me adek ma ayubbe me bino kwede botwu, ento doŋ pe abimiyo peko nurowu. Pien an pe amito jamiwu, ento amito wun kikomwu. Pe litino aye ma myero gukan jami me mono pi lunyodogi, ento lunyodo aye myero gukan jami pi litinogi.
\v 15 Abibedo ki yomcwiny madit me miyo jami ducu ma atye kwede, kadi wa tek koma ducu, pi konyo kwo me tipowu. Wubimara manoknok ni, pien amarowu matek?
\p
\v 16 Wubiloko ni, “Meno ber, en kikome pe onurowu ki peko, ento en ladwala, yam omakowa woko cutcut ki lok goba.”
\v 17 Tye ŋat mo i kin jo ma nene acwalogi botwu-ni, ma obuyo gin mo ki botwu pira?
\v 18 Onoŋo alego Tito ni myero ociti, ka dok aoro ominwa mukene me wot kacel kwede. Tito obuyowu? Yam pe watiyo tic ki kit cwiny acel? Onoŋo pe walubo yo acel keken?
\p
\v 19 Wun wutamo ni watye ka pido piwa kenwa kare man ducu i nyimwu? Pe kumeno; wan watye ka lok i nyim Lubaŋa, macalo jo pa Kricito. Dok bene, wun ma amaro, aloko me konyowu wek wudoŋ wudok jo muteggi.
\v 20 Pien alworo ni ka ao kunnu, gwok nyo abinoŋo wupat ki kit ma amito wubed kwede, dok wun bene gwok nyo wubinoŋo apat ki kit ma wumito abed kwede. Gwok nyo abinoŋo wutye ki daa, nyeko, kiniga malyet, laro dito, yet, lok kwot, lok me bwolo ki anyobanyoba.
\v 21 Alworo bene ni ka adwogo botwu i anyim, Lubaŋana bimiyo lewic maka woko i nyimwu; ci bimiyo akok pi jo mapol i kin dano ma yam gutimo bal, ka doŋ gukwero ŋut woko i kom timgi me caro, me abor ki me kwele.
\c 13
\cl Chura 13
\p
\v 1 Man doŋ tyen me adek ma abio kwede botwu. Caden ma romo aryo nyo adek aye myero gumok lok ducu ma gikelo me alara, macalo yam gicoyo.
\v 2 Lok man yam atito botwu con i kare ma atye i wotta me aryo, dok anwoyo wacone kombeddi ma doŋ atye cen, bot jo ma yam gubalo, ki bot jo mukene ducu, ni meno, ka dok adwogo botwu pe abitimo kica ki ŋat mo.
\v 3 pien wubimito neno gin ma moko ni Kricito aye ma tye ka lok i doga. En pe goro ki botwu, ento nyuto tekke i iwu.
\v 4 Yam gigure i kom yatariya pi gorone, ento kombeddi en kwo pi tek pa Lubaŋa. Kadi wan bene wagoro i en, ento i bedowa kwedwu wabibedo kacel kwede pi tek pa Lubaŋa.
\p
\v 5 Koŋ wuŋine kekenwu, wek wunen ka ce wucuŋ matek i niyewu. Wutemme kekenwu. Pe wuniaŋ ni Yecu Kricito tye i iwu, tekke ka wubedo dano ma Lubaŋa pwoyo?
\v 6 Ageno ni wubiniaŋ maber ni wan mere pe wabedo jo ma pe gipwoyogi.
\v 7 Walego Lubaŋa piwu ni pe wutim gin mo marac, pe me nyuto ni wan jo ma Lubaŋa pwoyo, ento wamito ni wun wutim gin maber, kadi bed wanen calo jo ma en pe opwoyo.
\v 8 Pien wan pe watwero tiyo gin mo ma pe rwatte ki lok ada, ento watwero tiyo gin ma rwatte ki gin ma tye ada keken.
\v 9 Cwinywa yom ka wagoro ma noŋo wun wutek, dok walego piwu ni wudok jo muteggi.
\v 10 Gin mumiyo acoyo lok ma pud atye ka mabor kwedwu, wek pe abed ger i komwu ka abino, kun atiyo ki twero ma yam Rwot omiya wek akonywu me doŋo, ento pe me dwokowu cen.
\p
\v 11 Me agikkine, utmegina, doŋ wubedi. Wuyub kitwu doŋ obed maber, dok bene myero wuwiny kokona pi gin ma alegowu pire. Wubed ki cwiny acel, wubed bene ki kuc, ci Lubaŋa ma won mar ki kuc bibedo kwedwu.
\v 12 Wumotte kekenwu ki mot me mar.
\v 13 Lwak pa Lubaŋa ducu gumotowu.
\v 14 Kica pa Rwotwa Yecu Kricito, ki mar pa Lubaŋa, ki ribbe ma Cwiny Maleŋ kelo obed kwedwu ducu.