ach-ss-acholi_reg/46-ROM.usfm

\id ROM
\ide UTF-8
\h Jo Roma
\toc1 Jo Roma
\toc2 Jo Roma
\toc3 rom
\mt Jo Roma
\c 1
\cl Chura 1
\p
\v 1 Waraga man oa ki bot Paulo ma en latic pa Yecu Kricito, ma Lubaŋa olwoŋo me bedo lakwena, ka doŋ gimiye tic me tito lok me kwena maber ma oa ki bot Lubaŋa.
\v 2 Lok me kwena maber onoŋo yam Lubaŋa ociko pire con i lok ma lunebi yam gutito, dok bene onoŋo gicoyo woko i ginacoya maleŋ.
\v 3 Lok me kwena man maber-ri gicoyo okemo Wode. I kit me kom, Wode-nu yam ginywale i kin likwayo pa Daudi.
\v 4 Ento pi Cwiny Maleŋ Lubaŋa onyuto en obedo Wode i tic matek ma ocere kwede ki i kin jo muto, en aye Yecu Kricito Rwotwa.
\v 5 Pire omiyo wan walimo kica pa Lubaŋa, ki tic me bedo lukwena wek wami dano ma i rok ducu gulub niye pi nyiŋe;
\v 6 ma wun bene wutye i kingi, wun dano ma doŋ gilwoŋowu me bedo jo pa Yecu Kricito.
\v 7 Bot wun jo ducu ma wutye i Roma ma Lubaŋa marowu, dok olwoŋowu me bedo jone kikome: Lubaŋa Wonwa ki Rwotwa Yecu Kricito omiwu kica ki kuc.
\p
\v 8 Mukwoŋo apwoyo Lubaŋana i Yecu Kricito pi wun ducu, pien niyewu doŋ gituco pire oromo wi lobo woko ducu.
\v 9 Lubaŋa ma aworo ki i cwinya kun bene atito lok me kwena maber i kom Wode, en aye cadenna ma ŋeyo ni atuco nyiŋwu i legana i kare ducu ma pe akeŋ.
\v 10 Alego ni ka twerre, ka Lubaŋa oye, olo myero anoŋ yo me bino botwu i kare-ni.
\v 11 Atye ka paro me nenowu mada, wek apok botwu mot mogo me cwiny me jiŋowu wek wubed matek.
\v 12 Gin ma aloko en aye ni wun kacel ki an wabikonnye lawaŋacel; en aye ni niyena bikonyowu, ki niyewu bene bikonya.
\v 13 Gin ma amito wuŋe, utmegina, en aye ni onoŋo abedo ka tamo tyen mapol ni myero abin botwu, wek omiya anoŋ jo mogo ki i kinwu. Lurok mukene ducu, ento meno pe otwerre; kadi wa onyoo bene pud gigeŋa woko.
\v 14 Atye ki banya bot Lugrik ki bot lurok ma gikwiya piny, bot luryeko ki bot lumiŋ;
\v 15 en aye gin mumiyo atye ki miti me tito lok me kwena maber botwu bene wun jo ma wubedo i Roma.
\p
\v 16 Lewic pe maka pi lok me kwena maber, ma en aye teko pa Lubaŋa me laro jo ma tye ki niye, mukwoŋo Lujudaya, ka doŋ Lugrik bene.
\v 17 Pien lok me kwena maber nyuto kit ma Lubaŋa kwano ni dano bedo ma kite atir, ma man timme pi niye keken, cakke ki acakkine o kwede wa i agikkine. Kit macalo gicoyo ni, “Dano ma kite atir pi niye bibedo kwo.”
\p
\v 18 Pien doŋ ginyuto akemo pa Lubaŋa woko ki i polo pi tim pa jo maraco ducu ma pe giworo Lubaŋa, ma gitye ka geŋo lok ada ni pe oti tic, pi timgi maraco.
\p
\v 19 Pien gin ma dano twero ŋeyone i kom Lubaŋa doŋ onen woko ka maleŋ botgi, Lubaŋa doŋ onyuto botgi.
\v 20 Cakke i kare ma giketo lobo, kit pa Lubaŋa ma onoŋo pe nen doŋ onen, kun giŋeye i jami ducu ma en otiyo, en aye tekone ma pe gik, ki dit ma en Lubaŋa tye kwede. Mumiyo dano doŋ pe gitye ki lok mo ma myero gupid pi geŋo ŋegi;
\v 21 pien kadi bed onoŋo yam giŋeyo Lubaŋa, ento pe guwore macalo Lubaŋa, pe bene gupwoye, ento tamgi odwokogi i gin ma pe konyo, ki tam ma i cwinygi me miŋomiŋo bene doŋ ocido woko odoko col.
\v 22 Gulwoŋŋe kengi ni gin luryeko, ento gulokke dok gudoko lumiŋ.
\v 23 Ci guloko deyo pa Lubaŋa ma pe to woko, kun giporo ki cal pa dano ma to, nyo ki cal pa winyo, nyo me pa lee, nyo me pa twol-gu.
\p
\v 24 En mumiyo Lubaŋa otenyogi woko liyak i miti me caro ma tye i cwinygi, wek gubal kwede deyo me komgi kekengi.
\v 25 Guloko lok ada i kom Lubaŋa guwilo woko ki goba, kun giworo dok gitiyo bot ginaketa, ma ka woro ki tic bot ŋat ma oketogi, ma gipwoyo nakanaka. Amen.
\p
\v 26 Pi tyen lok man omiyo Lubaŋa otenyogi i tamgi mugom ma gitamo ma kelo lewic. Kadi wa mongi bene guweko bedo ki co i kit ma ginywalogi ni gubed kwede-ni, ento dok gucako tiyo gin mapat.
\v 27 Ki co bene kit meno guweko bedo ki mon woko i kit ma ginywalogi ni myero gubed kwed-ni, ento mitigi dok ocako waŋo komgi calo mac, kun gimito ni gibed ki luwotgi, kun co buto ki co wadgi, ma meno tim me lewic mada, ento gilimo can malit i komgi pi kit balgi-nu.
\p
\v 28 Doŋ kit macalo gin pe guneno gin mo ma konyogi i ŋeyo Lubaŋa-ni, Lubaŋa bene otenyogi woko i tamgi ma konnye pe, wek doŋ gutim gin ma pe myero.
\v 29 Onoŋo yam gupoŋ ki kwa bal mapol ducu, tim maraco, woro me lim, raccwiny. Onoŋo bene gupoŋ ki cwiny me nyeko, nek, daa, goba, ki kwarcwiny. Onoŋo bene gubedo lukwot dano,
\v 30 luyet dano, dok jo ma dag Lubaŋa. Gubedo luŋala, jo ma lyerre, jo ma wakke, lurot kit me timo tim maraco, jo ma pe winyo lunyodogi,
\v 31 jo ma kwiya piny, jo ma pe genne, pe gitye ki mar i cwinygi, kica bene pe makogi i kom dano.
\v 32 Kadi bed giŋeyo cik pa Lubaŋa ni jo ma timo gin macalo meno gibito, ento gin pe gitimo jami macalo meno atima keken, gipwoyo bene jo ma tye ka timone.
\c 2
\cl Chura 2
\p
\v 1 Pi meno, gin mo ma myero ipid pire doŋ pe, in dano, kadi in aŋa, ka iŋolo kop i kom dano lawoti; pien pi kop ma iŋolo i kom dano mukene ca, noŋo doŋ iŋolo kop oloyi woko, pien in laŋolkop kikomi bene itimo kit gin acel-lu.
\v 2 Wan waŋeyo ni Lubaŋa ŋolo kop atir dok kakare ka oŋolo kop oloyo jo ma gitimo gin macalo meno.
\v 3 Doŋ in dano ma iŋolo kop i kom jo mukene ma gitimo gin macalo meno-ni, kun in kikomi bene itimo, itamo ni ibibwot ki ŋolo kop pa Lubaŋa?
\v 4 Nyo icayo lonyo me kica pa Lubaŋa ki kit ma en jukke kwede pi bal pa dano, ki kit ma en diyo kwede cwinye. Adada in iŋeyo ni Lubaŋa lakica, pien teli wek iŋut i kom balli.
\v 5 Ento pi tek cwinyi, en cwinyi ma idag ŋut kwede-ni, meno itye ka kano giri mono me akemo pa Lubaŋa piri keni pi kuro nino me akemo, en kare ma gibinyuto iye ŋolo kop ma atir pa Lubaŋa.
\p
\v 6 En biculo dano acel acel kun lubo kit tic ma dano mo-ni otiyo.
\v 7 Jo ma diyo cwinygi kun gicanne me tiyo gin maber, ma giyenyo deyo ki woro, ki kwo ma pe to, en bimiyo botgi kwo ma pe tum.
\v 8 Ento dano ma gilaro dito, ma pe gilubo lok ada, ento gilubo gigi kit marac, Lubaŋa biculogi kun timogi ki akemo dok ki kiniga mager atika.
\v 9 Can ki remcwiny bidiyo dano ducu ma timo gin marac, mukwoŋo Lujudaya ka doŋ jo Grik bene.
\v 10 Ento dano ducu ma timo gin maber binoŋo deyo ki woro ki kuc, mukwoŋo Lujudaya ka doŋ jo Grik bene;
\v 11 pien Lubaŋa gire pe leŋŋe tuŋ bot dano mo pi kit ma en tye kwede.
\p
\v 12 Jo ma gutimo bal laboŋo cik pa Moses, gibito laboŋo cik bene; ento jo ma gutimo bal i te cik, gibiŋolo kop i komgi kun lubo cik.
\v 13 Man pe te lokke ni jo ma winyo lok me cik awinya ki itgi gin aye jo ma kitgi atir i nyim Lubaŋa; ento jo ma tiyo gin ma cik mito aye gibikwanogi ni gin jo ma kitgi atir.
\v 14 Ka Lurok ma gipe ki cik gitiyo gin ma cik mito pi kitgi ma ginywalogi kwede, meno noŋo doŋ gin kikomgi gudoko wegi cik, kadi bed cik pa Moses pe botgi.
\v 15 Ginyuto ni gin ma cik mito doŋ gicoyo woko i cwinygi, dok ŋec ma gitye kwede ma nyuto botgi balgi bene aye bedo caden kacel kwedgi, kun tamgi bedo ka yokke ayoka; mogo ŋolo ni kop oloyogi, ki mogo noŋo cwakogi acwaka.
\v 16 Bibedo kumeno i nino meno ma Lubaŋa biŋolo kop i kom dano pi gin ma gitiyo i muŋ, ma miyo Yecu Kricito aye ŋolo, kun lubo lok me kwena maber ma atye ka titone-ni.
\p
\v 17 Ento ka ilwoŋŋe keni ni in Lajudaya kono? Noŋo i jeŋŋe i kom cik, kun iwakke bene pi Lubaŋa,
\v 18 dok bene iŋeyo gin ma en mito, dok ipwoyo gin maber makato, pien doŋ gipwonyi woko ki cik.
\v 19 Doŋ ki tuŋ boti, in iŋeyo ni in latel lutowaŋ, in i ceŋ ma ryeny menyo dano ma gitye i piny macol,
\v 20 dok bene in aye ma tiro lumiŋ, in lapwony pa litino, pien i cik itye ki ŋec ki lok ada kikome.
\v 21 Doŋ in lapwony ma ipwonyo jo mukene, pe ipwonnye kekeni bo? Itito lok ni, “Pe ikwal”, in kono ikwalo kwo?
\v 22 Itito ni, “Pe itim abor”, in kono itimo abor? Cwinyi dag woro jogi, ento ikwalo gin ma tye i ot jok?
\v 23 Iwakke pi cik, ento ituro cik kun icayo Lubaŋa?
\v 24 Tye kit macalo yam gicoyo i ginacoya ni, “Giyeto nyiŋ Lubaŋa i kin Lurok piwu.”
\p
\v 25 Lirre konyo ka ce ilubo cik, ento ka ituro cik, dwoki cen ibedo calo pe onoŋo giliri.
\v 26 Doŋ ka inen dano ma pe giliro olubo gin ma giciko ma tye i cik, dano ma pe giliro-nu pe gibikwane calo ŋat ma giliro?
\v 27 Meno miyo dano ma pe gilirogi, ma gilubo cik, biŋolo kop loyi, pien itye ki cik ma yam doŋ gicoyo woko acoya, dok bene giliri, ento pud ituro cik.
\v 28 Pien dano ma nen Lajudaya ki woko keken meno pe Lajudaya kikome; dok bene lirre ma nen ki woko i kom, meno pe lirre kikome.
\v 29 Lajudaya kikome aye dano ma bedo Lajudaya ki i cwinye, dok bene lirre me ada aye lirre ma dano bedo kwede ki i cwinye, ma en aye tic pa Cwiny Maleŋ, pe nukuta ma gicoyo acoya. Doŋ ŋat macalo meno kadi bed dano pe gipwoye, ento Lubaŋa pwoye.
\c 3
\cl Chura 3
\p
\v 1 Ka doŋ tye kit meno, ci Lajudaya kato jo mukene-gu ki ŋo? Nyo kony me lirre kono gin aŋo?
\v 2 Konyo matek i yo ducu. Mukwoŋo, Lujudaya yam gimiyo botgi lok pa Lubaŋa ma pire tek kun gigenogi ni gibigwoko.
\v 3 Lok man bedo niŋniŋ ka jo mogo i kingi onoŋo yam gin pe lugen? Kit macalo gin pe genne-ni, man bene twero miyo Lubaŋa doko ŋat ma pe genne?
\v 4 Pe kumeno! Waket Lubaŋa obed me ada, kadi bed dano ducu lugoba, kit macalo gicoyo ni, “Wek gin ma iloko onyut ni kiti atir, dok bene wek ilo lok ka giŋolo kop i komi.”
\p
\v 5 Ento ka kitwa ma pe atir nyuto kit ma atir ma Lubaŋa tye kwede, ci wan dok wabiwaco lok aŋo? Wabiwaco ni Lubaŋa pe kite atir pi keto akemone i komwa? (Man atye ka lok i kit pa dano).
\v 6 Pe kumeno! Ka tye kit meno, ci Lubaŋa twero ŋolo kop i kom dano ma gibedo i wi lobo niŋniŋ?
\v 7 Ka ce gobana-ni miyo ada pa Lubaŋa medde ameda kun bene kelo deyo bote, ci piŋo pud dok giŋolo kop i koma calo an labalo?
\v 8 Piŋo pe watimo gin marac wek gin maber oa iye? Pien tye jo mogo ma gicoko dogwa ki lok goba ma giwacci wan waloko kumeno. Ka giŋolo kop oloyo jo macalo meno noŋo giŋolo kakare.
\p
\v 9 Gin aŋo doki? Wan Lujudaya watye maber makatogi woko? Pe wacel; pien doŋ anyuto woko i lokka me adot ni, Lujudaya ki jo Grik ducu bal doŋ oloyogi.
\v 10 kit macalo yam gicoyo ni, “ŋat mo ma kite atir pe, pe kadi ki acel;
\v 11 ŋat mo ma niaŋ bene pe, ŋat mo ma yenyo Lubaŋa bene pe.
\p
\v 12 Gin ducu doŋ guŋak woko, gudoko jo ma kitgi raco; pe tye ŋat mo ma tiyo gin maber, pe, kadi ki acel.”
\q
\v 13 “Guŋamo doggi calo lyel ma twolo, kun giloko lok mamit me bwolo dano.” “Lok ma giloko obedo calo kwir pa ororo.”
\q
\v 14 “Lokgi ducu ma giloko obedo lok makec ma giceno ki dano acena.”
\q
\v 15 “Tyengi yot giriŋo kwede madwir ka neko dano,
\v 16 balle me lobo ki cwercwiny keken aye tye i yo gudogi ducu,
\v 17 pe giŋeyo yo me kuc.”
\q
\v 18 “Pe gineno gin ma miyo gilworo Lubaŋa.”
\p
\v 19 Waŋeyo ni gin ma cik oloko, loko bot jo ma tye i te cik, wek dano ducu guliŋ woko pe guŋam doggi ka lok, ki wi lobo ducu myero obed i tye ŋolo kop pa Lubaŋa.
\v 20 Pien pe gibikwano dano mo ni kite atir i nyim Lubaŋa pi cobo cik; cik ticce aye me niaŋo dano wek guŋe bal.
\p
\v 21 Ento kombeddi kit ma Lubaŋa kwano ki dano ni kite atir pe pi lubo cik doŋ onen woko ka maleŋ. Cik pa Moses ki pa lunebi bene yam otito pire;
\v 22 en kit ma Lubaŋa kwano ki dano ni kite atir pi niyene i kom Yecu Kricito, dok bene tye pi jo ducu ma ye en. Apokapoka mo pe iye;
\v 23 pien dano ducu gubalo, pe gio i kom deyo pa Lubaŋa.
\v 24 Lubaŋa kwanogi ni kitgi atir nono, miyogi macalo mot pi kicane pi kit ma Yecu okokogi kwede.
\v 25 Lubaŋa okete me bedo gin-kok me kwanyo bal ki remone, pi jo ma ye en, wek enyut kwede kite ma atir-ri, pien Lubaŋa yam ojukke kene, pe otimo gin mo i kom bal ma yam dano gutimo con,
\v 26 wek enyut kit ma atir i kare man, ni, en kikome kite atir, dok ekwano dano ni kite atir pi ye Yecu.
\p
\v 27 Ka wakkewa kono doŋ tye kwene? Doŋ gigeŋo woko. Pi cik mene? Pi cik me tic? Pe kumeno gire, ento pi cik me niye.
\v 28 Mumiyo wamoko tamwa ni dano gikwano ni kite atir pi niyene, ento pe pi tic me cobo cik.
\v 29 Lubaŋa mono tye pi Lujudaya keken? Pe en bene Lubaŋa pa Lurok? Iyo, ada, en bene Lubaŋa pa Lurok,
\v 30 pien Lubaŋa tye acel, en bikwano dano ma gilirogi ni kitgi atir pi niyegi, dok bene bikwano jo ma pe gilirogi ni kitgi atir pi niyegi.
\v 31 Wan mono watye ka bolo cik pa Moses woko pi man? Pe kumeno wacel, wan giwa wamoko cik amoka.
\c 4
\cl Chura 4
\p
\v 1 Wan mono wabiwaco lok aŋo i kom Abraim, ma en aye kwarowa i kit me kom-mi?
\v 2 Kono yam gikwano Abraim ni kite atir pi tic ma en otiyo, kono en tye ki gin mo ma en otiyo, kono en tye ki gin mo ma en nyatte pire, ento pe i nyim Lubaŋa.
\v 3 Doŋ coc ma yam gicoyo i ginacoya waco lok aŋo? Ginacoya waco ni, “Abraim onoŋo oye Lubaŋa, mumiyo kikwane ni en dano ma kite atir.”
\v 4 Dano ma tiyo tic pe gimiye mucarane macalo mot, ento gimiye macalo jami ma en otiyo pire.
\v 5 Ento dano ma pe tiyo, ma ye ŋat ma kwano jo ma pe lworo Lubaŋa ni kitgi atir, kit dano macalo meno gikwano ni kite atir pi niyene.
\v 6 I kit acel-lu, Daudi bene yam oloko pi gum ma dano tye kwede, ka Lubaŋa okwane ni en dano ma kite atir laboŋo tic mo ma en otiyo, macalo yam gicoyo ni,
\v 7 “Jo ma doŋ giweko balgi gitye ki gum, ma balgi bene doŋ gikwanyo woko;
\v 8 dano ma Rwot doŋ pe kwano bal mo i kome tye ki yomcwiny.”
\p
\v 9 Gum man mono tye pi jo ma gilirogi, nyo pi jo ma pe gilirogi bene? Wawaco ni, pi niye omiyo gikwano Abraim ni kite atir.
\v 10 Onoŋo mono yam gikwano i kome niŋniŋ? Onoŋo gikwane ma pud pe gilire, nyo lacen ma onoŋo doŋ gityeko lire woko? Pe ma doŋ gityeko lire, ento ma pud peya gilire.
\v 11 Gimiye lirre macalo lanyut anyo lanen ma nyuto ni gikwano ni kite atir pi niyene ma onoŋo peya gilire. Meno miyo Abraim bedo kwaro dano ducu ma giye ma peya gilirogi, wek gin bene gikwangi ni kitgi atir,
\v 12 dok bene en kwaro pa jo ma gilirogi bene, pe pa dano ma gilirogi alira keken, ento pa jo ma gilirogi ma gilubo bene niye ma yam kwarowa Abraim obedo kwede ma onoŋo pud pe gilire.
\p
\v 13 Cikke ma onoŋo yam Lubaŋa ociko bot Abraim ki likwaye, ni, wi lobo ducu bibedo megi, gin mumiyo ociko, pe ni Abraim yam ocobo cik, ento pein en onoŋo oye Lubaŋa, ka doŋ gikwane ni kite atir.
\v 14 Ka ce jo ma cobo cik gin aye jo ma wi lobo-ni ducu bedo megi, kono niye doŋ konnye pe, ki cikke bene kono konnye pe.
\v 15 Pien cik miyo akemo mako Lubaŋa i kom dano, ento ka ma cik pe iye, turo cik bene pe.
\v 16 Meno aye gin mumiyo cikke pa Lubaŋa ocuŋ i kom niye, wek obed me kica, dok pi moko cikkene bot likwayo pa Abraim ducu, pe bot jo ma lubo cik keken, ento kadi wa bot jo ma gibedo ki niye macalo Abraim. Pien en kwarowa ducu,
\v 17 macalo yam gicoyo ni, “Doŋ aketi wek ibed kwaro rok mapol.” Cikke man doŋ gimoko i nyim Lubaŋa ma yam Abraim oye-ni, en Lubaŋa ma miyo kwo i kom jo muto, dok bene ma lwoŋo gin mogo ma yam komgi pe gibedo tye.
\v 18 Abraim yam oye, kun onoŋo oketo genne i kom gin ma nen calo pe gitwero geno, omiyo en odoko kwaro rok mapol, kit macalo yam gicoyo ni, “Likwayu bibedo kit meno.”
\v 19 En pe obedo nyap i niye i kare ma obedo ka paro pi kome kekene, ma onoŋo yam rom aroma ki gin ma oto, pien mwaka me ditte onoŋo doŋ cok romo miya acel kulu, dok bene medo i kom meno, dakone Cara onoŋo lalur.
\v 20 Niyene pe odok cen, pe obedo ka cabbe acaba i tamme i kom cikke pa Lubaŋa, ento niyene omedde ameda odoko matek, kun en miyo deyo bot Lubaŋa,
\v 21 ma onoŋo lok donyo matut i cwinye ni, Lubaŋa twero tiyo gin ma ocikke pire.
\v 22 “Pi niyene omiyo gikwane ni en dano ma kite atir.”
\p
\v 23 Ento lok man ni, “Yam gikwane” onoŋo pe gicoyo pi en kene,
\v 24 ento gicoyo pi wan bene. Wan bene gibikwanowa ni kitwa atir, wan jo ma doŋ waye Lubaŋa ma yam ocero Rwotwa Yecu Kricito ki i kin jo muto-ni,
\v 25 en ŋat ma yam gineko pi balwa, ci Lubaŋa ocere woko wek gikwanwa ni kitwa atir.
\c 5
\cl Chura 5
\p
\v 1 Pi meno, kit macalo gikwanowa ni kitwa atir pi niye, watye doŋ ki kuc i nyim Lubaŋa, pi Rwotwa Yecu Kricito.
\v 2 Pire omiyo giyabo botwa yo me limo kica man ma ocuŋ pi niye-ni, kun wabedo ki yomcwiny pi gen ma watye kwede me nywako deyo pa Lubaŋa.
\v 3 Makato meno, wabedo ki yomcwiny i can mogo mapatpat ma opoto i komwa, kun waŋeyo ni bedo ki can kelo diyo cwiny me ciro can,
\v 4 diyo cwiny i ciro can weko gipwoyo kitwa, ka doŋ pwoyo kitwa-ni miyowa bedo ki gen.
\v 5 Genwa meno pe kelo botwa cwercwiny, pien Cwiny Maleŋ doŋ omiyo gionyo mar pa Lubaŋa woko i cwinywa.
\p
\v 6 Pien i kare ma yam pud wagoro, ma kare doŋ oromo, Kricito oto pi dano ma pe gilworo Lubaŋa.
\v 7 Kadi pi ŋat ma kite atir, bedo tek twatwal bot dano mo me to pire. Gwok nyo ka obedo dano ma kite ber, ŋat mo twero diyo cwinye me to pire.
\v 8 Ento Kricito yam oto piwa i kare ma pud wan lubalo; meno nyuto kit mar ma Lubaŋa marowa kwede.
\v 9 Macalo wan i kare man gikwanowa ni kitwa atir pi remone, makato twatwal-le wabilarre pire ki i kom akemo pa Lubaŋa.
\v 10 I kare ma onoŋo wan pud lukwor pa Lubaŋa, en odwokowa cen bote, pi to pa Wode; ka kit meno, ma gidwokowa cen bote, wabilarre twatwal-le pi kwo pa Wode.
\v 11 Pe meno keken, ento wabibedo ki yomcwiny i Lubaŋa pi Rwotwa Yecu Kricito, pien en aye ma omiyo gidwokowa cen bot Lubaŋa.
\p
\v 12 Pi meno, kit macalo bal yam obino i lobo kun wok ki i dano acel, ka doŋ to obino pi bal, kit meno bene to onya oromo kin dano ducu, pien dano ducu gubalo.
\v 13 Bal onoŋo tye i lobo con ma peya gimiyo cik, ento ka ma cik pe iye, bal bene pe gikwano i wi ŋat mo.
\v 14 Ento to ocako loc ki i kom Adam oo kwede wa i kom Moses, ci oloyo jo ma yam pe gutimo bal marom ki bal pa Adam, ma yam oturo cik ma gimiye. Adam aye lanyut ma cimo ŋat ma mito bino-ni.
\v 15 Ento mot me kica ma Lubaŋa omiyo pe rom ki bal pa Adam; pien kadi bed dano mapol yam guto pi bal pa ŋat acel ca, ento kica pa Lubaŋa ki mot me nono ma obino pi kica pa dano acel-li, Yecu Kricito, obedo dit makato, onya oromo lwak dano mapol ata.
\v 16 Dok mot me nono pe rom ki bal pa dano acel ca, pien pi bal pa ŋat acel ca omiyo giŋolo kop oloyo dano ducu, ento tic me kica ma olubo bal mapol okelo loyo kop.
\v 17 Ka ce pi bal pa dano acel omiyo to obedo ka loc pi dano acel ca en Adam, makatone jo ma gulimo kica mabup, ki mot me nono ma omiyo gikwanogi ni kitgi atir, gibibedo kwo kun noŋo gitye ka loc, pi dano acel-lu bene, en Yecu Kricito.
\p
\v 18 Doŋ kit macalo bal pa ŋat acel omiyo kop oloyo dano ducu, kit meno bene tic me kit ma atir pa dano acel okelo loyo kop ki kwo pi jo ducu.
\v 19 Pien macalo pi dano acel ma pe obedo ki winy omiyo dano mapol ata gudoko lubalo, kit meno bene pi winy pa dano acel jo mapol ata gibikwanogi ni kitgi atir.
\v 20 Cik onoŋo odonyo iye me nyayo bal; ento ka ma bal onya iye, en bene ka ma kica onya iye makato ducu-ni.
\v 21 Kit meno, kit macalo bal yam oloyo loc i to, kica bene myero olo loc pi kwano dano ni kitgi atir, wek omi gunoŋ kwo ma pe tum, pi Yecu Kricito Rwotwa.
\c 6
\cl Chura 6
\p
\v 1 Wan mono doki wabiwaco aŋo? Myero wamedde ki timo bal wek kica onya?
\v 2 Pe kit meno! Ci wan ma doŋ yam wato tuŋ bot bal dok watwero bedo kwo iye niŋniŋ?
\v 3 Pe wuŋeyo ni wan ducu ma gityeko batijawa me donyo i Kricito onoŋo gibatijawa me donyo i tone?
\v 4 Giyikowa kacel ki Kricito i tone i batija ma walimo, wek wabed calo en. En yam ocer woko ki i kin jo muto pi deyo pa Wonne, wek wan bene doŋ walub kit kwo manyen-nu.
\v 5 Pien ka doŋ waribbe kacel kwede i to mo ma cal ki tone-ni, kit meno bene wabiribbe kwede i cer ma cal ki cer ma gicero en kwede-ni.
\v 6 Pien waŋeyo man, ni, kwowa macon yam giguro kwede kacel i kom yatariya, wek kwo me bal ma onoŋo watye kwede oto woko, wek wan doki pe wadok opii me bal.
\v 7 Pien ŋat ma oto, balle doŋ gik woko.
\v 8 Ento ka doŋ wato kacel ki Kricito, waye ni wabibedo kwo kacel kwede bene.
\v 9 Pien waŋeyo ni Kricito ma yam doŋ ocer ki i kin jo muto-ni pe doki bito; to doŋ pe ki loc mo i kome.
\v 10 To ma en oto, oto pi bal, tyen acel keken, ento kwo ma en kwo kwede, kwo tuŋ bot Lubaŋa.
\v 11 Wun bene kit meno, myero wutam i komwu kekenwu ni, wun jo muto tuŋ bot bal, ento wubedo kwo tuŋ bot Lubaŋa.
\v 12 Pe wuwek bal olo komwu ma to-ni, wek pe gumi wubed ka lubo mitigi.
\v 13 Pe dok wumi dul komwu mapatpat i timo bal, macalo jami tic me tiyo gin marac; ento wumine kenwu bot Lubaŋa calo jo ma gua woko ki i to, ma doŋ guo i kwo. Wumi dul komwu ducu bot Lubaŋa me tiyo gin ma tye atir.
\v 14 Pien bal pe doki bibwoyowu, pien wun doŋ pe wutye i te cik, ento wutye i te kica pa Lubaŋa.
\p
\v 15 Gin aŋo doki? Dok watimu bal, pi te lokke ni wan pe watye i te cik ento i te kica? Pe kumeno gire!
\v 16 Pe wuŋeyo ni ka doŋ wumine kenwu bot ŋat mo calo opii me winyo gin ma en loko, doŋ bene wudoko opii pa ŋat ma wuwinyo lokke-ni? Nyo wudoko opii me bal ma terowu i to, nyo wudoko opii me winyo lok pa Lubaŋa, ma telowu i kit ma atir.
\v 17 Ento myero wupwo iye Lubaŋa, pien yam wubedo opii me bal, ento doŋ wutye ka lubo kit pwony ma gipwonyowu kwede ni wulube ki cwinywu ducu.
\v 18 Doŋ gityeko gonyowu woko ki i opii me bal, wudoko opii me kit ma atir.
\v 19 Atye ka lok i kit pa dano, pi gorowu ma ginywalowu kwede. Pien macalo yam wumiyo dul komwu ducu me bedo opii me tim caro ki tim maraco, omiyo doŋ wudoko lutim maraco, kombeddi doŋ wumi dul komwu ducu gubed opii me kit ma atir, wek wudok jo maleŋ.
\v 20 I kare ma onoŋo pud wubedo opii me bal, onoŋo pe wubedo i te loc me kit ma atir.
\v 21 Yam wunoŋo gin aŋo i gin ma lewicce kombeddi tye ka makowu-ni? Agikki pa jami macalo meno ducu aye to.
\v 22 Kombeddi doŋ gigonyowu woko ki i opii me bal, doŋ wudoko opii pa Lubaŋa; gin ma wunoŋo en aye ni wudoko doŋ jo maleŋ, agikkine en kwo ma pe tum.
\v 23 Pien mucara me bal en to, ento mot ma Lubaŋa miyowa nono, en aye kwo ma pe tum i Yecu Kricito Rwotwa.
\c 7
\cl Chura 7
\p
\v 1 Utmegina, atye ka lok ki jo ma ŋeyo cik; pe wuŋeyo ni cik mako dano ka pud kwo keken?
\v 2 Dako ma ginyomo bene cik tweyo i kom cware ka cware pud kwo, ento ka cware doŋ oto, en gonnye woko i cik pa cware.
\v 3 Mumiyo ka cware pud kwo, ce dako-nu oa okobe woko bot laco mukene, gibilwoŋe ni latim abor. Ento ka cware doŋ oto, en noŋo ogonnye woko i cik meno; ka dok onyomme ki laco mukene noŋo pe otimo abor.
\v 4 Kumeno, utmegina, wun bene yam wuto tuŋ bot cik pi Kricito ma wuribbe i kome-ni, wek wudok bot ŋat mukene, en aye ŋat ma yam gicere woko ki i kin jo muto, wek wanyak nyig pi Lubaŋa.
\v 5 Pien i kare ma yam pud watye i kwo me anywalli, gin maraco me bal ma cik doŋ otugo woko onoŋo tye ka tic i dul komwa mapatpat me nyako nyige pi to.
\v 6 Ento kombeddi doŋ gigonyowa woko i kom cik, doŋ wato ki tuŋ bot gin ma con omakowa. Omiyo wan doŋ watye ka tic i yo manyen me Cwiny, pe dok i yo macon ca me lubo cik ma yam gicoyo acoya.
\p
\v 7 Wabiwaco lok aŋo mono? Cik mono bal? Pe kumeno gire! Ento kono yam cik pe obedo tye, onoŋo kono gira pe aŋeyo bal. Ka kono yam cik pe owaco ni, “Cwinyi pe opukke i kom jami pa ŋat mukene,” kono onoŋo bene pe abedo ki miti macalo meno.
\v 8 Ento bal onoŋo kare odonyo i cik ca, ka doŋ ocako kelo kwa miti ducu me pukke cwiny i cwinya. Pien ka cik pe, ci bal to woko.
\v 9 Yam onoŋo abedo kwo laboŋo cik mogo, ento i kare ma cik ca obino, bal ocako bedo kwo, an ato woko.
\v 10 Cik ca-ni kikome onoŋo myero okel kwo, ento dok okelo to bota.
\v 11 Pien bal onoŋo kare odonyo i cik, obwola, ka doŋ oneka woko.
\v 12 Pi meno, cik leŋ, ki gin ma giciko bene leŋ, tye atir, dok ber bene.
\p
\v 13 Gin ma yam ber ca aye dok okelo to i koma? Pe kumeno! Bal aye onoŋo mumiyo ato, kun tiyo ki gin maber, wek omi onen woko ka maleŋ ni meno bal ennu. Kit meno gin ma giciko ca omiyo bal odoko marac mukato kare.
\p
\v 14 Waŋeyo ni cik obedo gin me cwiny; kun an dano me kom ma gicato woko macalo opii i te bal.
\v 15 Gin ma atiyo-gu ducu pe aniaŋ iye. Pien gin ma amito pe atiyo, ento dok atiyo gin mogo ma pe amito-ni.
\v 16 Doŋ ka atiyo gin ma pe amito, noŋo aye ni cik ber.
\v 17 Meno doŋ pe an aye ma atiyo, ento bal ma bedo i iya aye ma tiyo gire.
\v 18 Pien aŋeyo ni gin mo maber pe ma bedo i iya, ma en aye i koma ma ginywala kwede. Atwero mito gin ma atir, ento pe atwero tiyone.
\v 19 Pien pe atiyo gin maber ma amito-ni, ento gin marac ma pe amito-ni aye dok atiyo.
\v 20 Ci ka atiyo gin ma pe amito-ni, meno doŋ noŋo pe an aye ma atiyo, ento noŋo bal ma bedo i iya aye tiyo.
\v 21 Mumiyo doŋ onen bota macalo cik ni, ka amito tiyo gin ma atir, ci gin marac nyiko cok kweda.
\v 22 Pien amaro kwano cik pa Lubaŋa, kun alwodo lokke ki iya.
\v 23 Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu.
\v 24 An ma koma kec kuman-ni, aŋa ma bilara ki i kom man ma to woko-ni?
\v 25 Apwoyo Lubaŋa pi Yecu Kricito Rwotwa! Doŋ an kikoma aworo cik pa Lubaŋa ki tamma, kun i koma ma ginywala kwede aworo cik me bal.
\c 8
\cl Chura 8
\p
\v 1 Pi meno, kombeddi pe dok giŋolo kop loyo jo ma gibedo i Kricito Yecu.
\v 2 Pien cik pa Cwiny me kwo ma tye i Kricito Yecu doŋ ogonya woko ki i te cik me bal ki to.
\v 3 Gin ma onoŋo cik pe twero tiyo, pien kwowa ma ginywalowa kwede onoŋo oloko odoko goro, Lubaŋa aye ma doŋ otiyo. En ooro Wode kikome me bino i kit kom ma cal ki mewa ma bal obwoyo wokoni, macalo gitum ma gityero bot Lubaŋa pi bal. Kombeddi doŋ en oŋolo kop oloyo bal ma tye i komwa ma ginywalowa kwede,
\v 4 wek gin ma cik mito ocobbe i komwa, wan jo ma pe doŋ walubo kit me kom ma ginywalowa kwede, ento walubo yo pa Cwiny Maleŋ.
\v 5 Pien jo ma gibedo i kit pa dano, giketo tamgi bene i kom gin ma lubo kit pa dano; ento jo ma gibedo kun gilubo kit pa Cwiny Maleŋ giketo tamgi bene i kom gin me Cwiny.
\v 6 Tam ma lubo kit pa dano kelo to, ento tam ma lubo kit pa dano kelo to, ento tam ma lubo kit pa Cwiny Maleŋ miyo kwo ki kuc.
\v 7 Pien tam ma giketo i kit pa dano ki tuŋ bot Lubaŋa en kwor, pien pe winyo cik pa Lubaŋa, pe bene twero winyone.
\v 8 Jo ma gibedo kun gilubo kit pa dano pe gitwero yomo cwiny Lubaŋa.
\v 9 Ento wun pe wutye i kit pa dano, wun wutye i Cwiny, ka ce Cwiny pa Lubaŋa bedo i iwu. ŋat mo ma pe ki Cwiny pa Kricito, noŋo en pe dano pa Kricito.
\v 10 Ento ka Kricito tye i iwu, kadi bed komwu to pi bal, ento cwinywu bedo kwo, pien yam doŋ gikwanowu woko ni kitwu atir.
\v 11 Ka ce Cwiny pa ŋat ma ocero Yecu ki i kin jo muto-ni bedo i iwu, en ŋat ma ocero Kricito Yecu ki i kin jo muto-ni bene bimiyo kwo kadi wa i komwu ma doŋ oto woko, pi Cwiny mere ma bedo i iwu-ni.
\p
\v 12 Mumiyo utmegina, watye ki banya, ento pe me kit pa dano, me lubo kit pa dano.
\v 13 Pien ka wubedo kun wulubo kit pa dano wubito; ento ka wuneko tic me kom woko pi Cwiny Maleŋ, ci wubibedo jo makwo.
\p
\v 14 Pien jo ducu ma Cwiny pa Lubaŋa telogi, gin aye litino pa Lubaŋa.
\v 15 Yam pe onoŋo wugamo cwiny me bedo opii, wek wudok cen i lworo; ento wugamo cwiny me bedo litino me paco. Mumiyo wakok ni, “Abba! Wora!”
\v 16 Cwiny Maleŋ kikome ribbe ki cwinywa kun tuco ni, wan litino pa Lubaŋa.
\v 17 Ka doŋ wan litino, ci wan lule jami, wan lule jami pa Lubaŋa kun wanywako lonyone kacel ki Kricito, ka ce waciro can kacel kwede, wek bene walim deyo kacel kwede.
\p
\v 18 Atamo ni can me kare man pe myero gipor ki deyo ma gibinyuto botwa.
\v 19 Pien ginaketa ducu gitye ka kuro nyuto litino pa Lubaŋa ki miti madwoŋ mukato kare.
\v 20 Ginaketa ducu onoŋo yam giketogi i te twero me gin ma tere pe, pe pi mitgi kengi, ento pi mit pa Lubaŋa ma yam oketo i te twero meno; kun gen tye ni,
\v 21 ceŋ mo gibigonyo ginaketa woko ki i opii me bedo gin ma top, wek gunoŋ kuc ki deyo ma gimiyo ki litino pa Lubaŋa.
\v 22 Waŋeyo ni jami ducu ma giketogi aketa, gubedo ka cur acura ki arem nio wa i kare-ni.
\v 23 Pe gin keken, wan bene ma gimiyowa Cwiny Maleŋ macalo mot mukwoŋo, ma nyuto gin ma gibimiyowa i anyim, wan bene watye ka cur acura ki i iwa kun wakuro kare me lokowa wek wadok litino me paco, en aye me koko komwa.
\v 24 Pien yam gilarowa pi bedo ki gen man. Pi meno gen ma kome nen noŋo pe doŋ gen. Aŋa ma geno gin ma en neno kome?
\v 25 Ento ka ce watye ki gen me noŋo gin ma pe waneno kome, ci wakuro gin meno kun wadiyo cwinywa.
\p
\v 26 I kit acel-lu Cwiny Maleŋ bene konyowa ka ma wagoro iye. Pe waŋeyo lego Lubaŋa i kit ma myero waleg kwede, ento Cwiny kikome bako doge ma ka-kawa, kun cur laliŋliŋ.
\v 27 ŋat ma ŋiyo cwiny dano ŋeyo tam pa Cwiny Maleŋ, pien Cwiny Maleŋ bako doge pi jo pa Lubaŋa kun lubo gin ma Lubaŋa mito.
\p
\v 28 Waŋeyo ni i gin ducu Lubaŋa tiyo pi kelo gin maber ki jo ducu ma gimare jo ma en olwoŋogi kit macalo en oyubo.
\v 29 Jo ma yam en oŋeyogi con, omoko bene ni myero gunywak cal pa Wode, wek omi Wode obed latin kayo i kin utmego mapol.
\v 30 Jo ma yam en omoko tamme i komgi con, gin aye bene en olwoŋogi, jo ma en olwoŋogi, okwanogi ni kitgi atir; jo ma doŋ okwanogi ni kitgi atir omiyo deyo botgi.
\p
\v 31 Wabiwaco aŋo mono doki i kom lok man? Ka Lubaŋa tye tuŋ botwa, ci aŋa ma lakworwa?
\v 32 En yam pe oweko Wode kikome, ento omiye pi wan ducu. Pe bene doŋ bimiyowa jami ducu kacel kwede?
\v 33 Aŋa mono ma bipido ki jo ma Lubaŋa doŋ otyeko yerogi? Lubaŋa aye ma kwanogi ni kitgi atir.
\v 34 Aŋa ma twero ŋolo kop loyogi? Kricito Yecu aye yam oto, dok makato meno yam gicere woko. En bene tye obedo i kabedo me deyo ka ŋet Lubaŋa yo tuŋ acuc, en aye ma bako doge piwa.
\v 35 Aŋa ma bipokowa ki i kom mar pa Kricito? Neno can, nyo kumo, nyo ayelayela, nyo kec, nyo bedo munero, nyo gin marac, nyo pala lucwan?
\v 36 Kit macalo yam gicoyo ni, “Gibedo ka nekowa dyeceŋ jwi piri, gikwanowa macalo romi me aneka.”
\v 37 Ento gin magi ducu watye ka loyogi matek pi ŋat ma ceŋ omarowa-ni.
\v 38 Pien aŋeyo ada ni, kadi to, kadi kwo, kadi lumalaika, kadi luloc, kadi gin ma tye i kare man, kadi gin ma mito bino, kadi teko,
\v 39 kadi gin ma tye malo, kadi gin ma tye piny, kadi ki gin mo keken i kom ginaketa ducu, pe bibedo ki twero mo me pokowa woko ki i kom mar pa Lubaŋa ma tye i Kricito Yecu Rwotwa.
\c 9
\cl Chura 9
\p
\v 1 Atye ka loko lok ada i Kricito, pe aloko goba; ŋec ma i cwinya ma nyuto balla bota bene bedo caden kacel ki Cwiny Maleŋ,
\v 2 ni, atye ki cwercwiny madit kun cwinya rem mada ma pe jukke.
\v 3 Pi mitta kekena, kono yam giceno an kikoma woko, wek gikwanya woko ki bot Kricito, pi utmegina, ma gin wadina me rokka.
\v 4 Gin jo Icrael, jo ma Lubaŋa olokogi gudoko litinone me paco, omiyogi deyone ki gicikke ducu, omiyogi bene cik ki kit yo ma myero guwore kwede, dok bene yam onoŋo ocikke pigi, ni ebimiyo botgi gin mogo mabeco.
\v 5 Kwarowa macon ducu yam obedo megi, dok Kricito bene ginywalo i kingi i kit pa dano. Myero gipwo Lubaŋa ma loyo jami ducu nakanaka. Amen.
\p
\v 6 Ento pe awacci, lok pa Lubaŋa pe otiyo gin mo; pien jo ma ginywalo i kin jo Icrael pe gin ducu jo Icrael,
\v 7 dok bene gin ducu pe litino pa Abraim, pien gin likwaye; ento yam gicoyo ni, “Litino pa Icaka aye gibilwoŋogi ni likwayu.”
\v 8 Man te lokke ni, pe litino ma ginywalogi i kit pa dano ma gin aye gibedo litino pa Lubaŋa, ento litino ma ginywalogi pi cikke pa Lubaŋa aye gilwoŋogi ni gin likwayo.
\v 9 Pien man aye gin ma cikke oloko ni, “Abidwogo i kare macalo man, ka doŋ Cara binywalo latin awobi.”
\v 10 Pe meno keken, ento i kare ma Labeka bene oyac ki laco acel, ma en aye kwarowa Icaka,
\v 11 ento ma pud peya onywalo litinone, dok bene ma peya gutiyo gin mo maber nyo marac, wek omi yub pa Lubaŋa me yer omedde, pe pi tic ento pi lwoŋone,
\v 12 giwaco bot Labeka ni, “Latin matidi biloyo latin kayo.”
\v 13 Kit macalo gicoyo ni, “Yam amaro Yakobo, ento akwero Ecau.”
\p
\v 14 Wan doki wabiwaco gin aŋo? Wabiwaco ni Lubaŋa pe ŋolo kop atir dok kakare? Pe kumeno!
\v 15 Pien yam owaco bot Moses ni, “Abitimo kica bot ŋat ma abitimo kica bote, dok bene abinyuto berra bot ŋat ma abinyuto berra bote.”
\v 16 Kumeno, pe cuŋ i kom gin ma dano mito, nyo i kom ticce ma en canne pire, ento cuŋ i kom kica pa Lubaŋa.
\v 17 Pien ginacoya waco bot Parao ni, “Atiŋi malo pi lok man wek omi anyut tekona i komi, wek nyiŋa oywek i wi lobo ducu.”
\v 18 Kit meno en timo kica bot ŋat ma en mito etimme kica, dok bene loko cwiny ŋat ma en mito doko nwaŋ.
\p
\v 19 Gwok nyo ibipenya ni, “Piŋo mono en pud waco ni wan lubalo? Aŋa ma twero geŋo gin ma en mito?”
\v 20 Ento in dano adana-ni in aŋa, ma igamo dog Lubaŋa? Gin ma gicweyo acweya twero penyo ŋat mucweye ni, “Piŋo icweya kuman?”
\v 21 Lacwec pe ki twero i kom lobo, me cweyo atabo acel me wel ki mukene ma pe me wel, kun tiyo ki lobo ma en oŋino aŋina acel madit?
\v 22 Onoŋo bedo niŋniŋ ka Lubaŋa odiyo cwinye pi kare malac i kom atabo mogo me akemone ma doŋ guromo me aneka woko, pi mito nyuto akemone ki me miyo tekone oŋene?
\v 23 Otimo man wek emi lonyo me deyone oŋene i kom atabo me kica, ma en yam oyubo wa con wek obed ki deyo,
\v 24 man aye wan kikomwa, wan jo ma en olwoŋo, pe ki i kin jo Icrael keken, ento kadi wa ki i kin Lurok ducu bene.
\v 25 Kit macalo yam en oloko i buk pa Kocea ni, “Jo ma yam onoŋo gin pe jona, abilwoŋogi ni, ‘jona’, dako ma onoŋo yam pe amaro abilwoŋo ni, ‘dako ma amaro.’”
\p
\v 26 “Dok bene i kabedo ka ma yam awaco botgi iye ni, ‘Wun pe wujona,’ gibilwoŋogi iye ni, ‘litino pa Lubaŋa makwo.’”
\p
\v 27 Icaya bene yam okok ki dawn maloŋo i kom Icrael ni, “Kadi wel jo Icrael obed rom ki kweyo me dog nam, jo mogo manok ki i kingi ma gudoŋ aye gibibwot;
\v 28 pien Rwot biŋolo kop i wi lobo bicobo bene woko oyotoyot.”
\p
\v 29 Dok tye kit macalo yam Icaya oloko ni, “Kono nene Rwot me mony pe oweko botwa likwayo mogo, kono wabedo calo Codom, kono doŋ wadoko calo Gomora.”
\p
\v 30 Wan doki wabiwaco gin aŋo? Wabiwaco ni Lurok ma yam pe guyelle pi doko jo ma kitgi atir doŋ gikwanogi ni kitgi atir, ento kitgi ma atir meno gunoŋo pi niye.
\v 31 Ento jo Icrael ma yam guyelle pi cobo cik ni wek gibed jo ma kitgi atir, cobo cik oloyogi.
\v 32 Piŋo? Pien pe gubedo ka yenyone i yo me niye, ento gubedo ka yenyone calo gin ma ocuŋ i kom tic. Guyokke ki got ma yoko dano-ni,
\v 33 kit macalo gicoyo ni, “Nen, doŋ aketo got ma yoko dano i Cion, ariya ma miyo dano poto; lewic pe bimako ŋat ma oye en.”
\c 10
\cl Chura 10
\p
\v 1 Utmegina, gin ma amito ki cwinya ducu ma alego Lubaŋa pire, en aye ni myero jo Icrael gularre.
\v 2 An abedo cadengi kun aŋeyo ni gumoko matek i kom Lubaŋa, ento kadi bed gumoko, ci pe gucuŋo i ŋec kikome.
\v 3 Onoŋo pe giŋeyo kit ma Lubaŋa kwano kwede dano ni kite atir, ento gubedo ka yenyo ni gitwero noŋo kit ma atir pigi kengi, pe gumine kengi i kit ma atir ma Lubaŋa miyo.
\v 4 Pien cik doŋ ogik woko i Kricito, wek omi jo ma ye en gikwangi ni kitgi atir.
\p
\v 5 Moses yam owaco ni dano ma tiyo tic ma atir ma cik mito, bikwo pire.
\v 6 Ento kit ma atir ma ginoŋo pi niye loko kit man ni, “Pe ilok kekeni ni, ‘Aŋa ma biito malo i polo? (ni, me kelo Kricito piny),
\v 7 nyo ni, ‘Aŋa ma bidonyo i bur ma tere pe gik?’ (ni, me kelo Kricito woko ki i kin jo muto).
\v 8 Ento waco gin aŋo? Waco ni, “Lok man doŋ tye cok kwedi, tye i dogi ki i cwinyi bene,” ma en aye lok i kom niye ma watito pire-ni.
\v 9 Pien ka ituco ki dogi ni, “Kricito aye Rwot,” ma kun iye bene ki i cwinyi ni Lubaŋa yam ocere woko ki i kin jo muto, ci ibilarre.
\v 10 Pien dano ye ki cwinye, en aye miyo gikwane ni kite atir, ka dok tuco ki doge, ka doŋ miyo Lubaŋa lare.
\v 11 Pien coc ma yam gicoyo i ginacoya wacci, “Lewic pe bimako ŋat ma ye en.”
\v 12 Apokapoka mo pe i kin Lujudaya ki jo Grik; gin ducu Rwotgi acel, en bene poko lonyone bot jo ducu ma kok bote.
\v 13 Yam gicoyo ni, “Jo ducu ma gilwoŋo nyiŋ Rwot gibilarogi.”
\p
\v 14 Ento dano gibikok bote niŋniŋ, ma peya guye en? Gitwero ye en kono niŋniŋ ka pe guwinyo lok ma gitito i kome? Gitwero winyo lok i kome niŋniŋ ka ŋat mo pe ma tito lokke botgi?
\v 15 Dano gitwero tito lok niŋniŋ ka pe giorogi? Kit macalo yam gicoyo ni, “Neno tyengi ber rom mene jo ma kelo lok me kwena maber!”
\v 16 Ento pe gin ducu yam guye lok me kwena maber; pien Icaya yam oloko ni, “Rwot, aŋa ma yam oye lok ma wan watito?”
\v 17 Adada, niye bino pi winyo lok ma gitito, lok ma giwinyo a i lok ma gitito i kom Kricito.
\p
\v 18 Ento koŋ amito apeny ni, “Onoŋo yam pe guwinyo?” Guwinyo, kit macalo yam gicoyo i Jabuli ni, “Dwangi winnye teretere i wi lobo ducu, ki lok ma giloko oo wa i agikki piny.”
\p
\v 19 Dok apenyo ni, “Jo Icrael mono yam pe guniaŋ?” Moses aye ma okwoŋo waco ni, “Abimiyo nyeko makowu i kom jo ma pe gin rok kikome, abimiyo kiniga makowu i kom rok mamiŋ.”
\p
\v 20 Icaya doki cwinye obedo tek me waco ni, “Jo ma yam pe giyenya doŋ gunoŋa, doŋ bene atyeko nyutte woko ka maleŋ bot jo ma onoŋo pe gipenyo pira.”
\p
\v 21 Ento i kom jo Icrael owaco ni, “Yam abedo ka ryeyo ciŋa dyeceŋ jwi bot jo ma pe giwinyo doga, jo ma ŋipyem kweda.”
\c 11
\cl Chura 11
\p
\v 1 Apenyo ni, “Lubaŋa mono doŋ okwero jone woko?” Pe kumeno gire. An kikoma bene an Laicrael, lakwar Abraim, ma i kaka pa Benjamin.
\v 2 Lubaŋa pe okwero jone ma yam en oŋeyogi con. Pe wuŋeyo gin ma yam gicoyo i ginacoya ma oloko lok i kom Elia, kit ma en obako kwede doge bot Lubaŋa i kom jo Icrael ni,
\v 3 “Rwot, doŋ guneko lunebini woko, gumuko keno tyerri-gu woko ducu, an kena aye doŋ adoŋ, dok bene gimito neka woko.”
\v 4 Ento Lubaŋa yam odokke iye gin aŋo? Odok iye ni, “Pud aweko jo alip abiro gudoŋ bota, ma peya gurumo coŋgi i nyim Baal.”
\v 5 I kit yo acel-lu tye jo mogo i kare man ma gudoŋ, ma Lubaŋa oyerogi pi kicane.
\v 6 Ci ka giyerogi pi kica, man noŋo doŋ pe ocuŋ i kom tic ma gin gutiyo; ka nene ocuŋ i kom tic ma dano otiyo, kono kica doŋ pe gilwoŋo ni kica.
\p
\v 7 Gin aŋo doki? Jo Icrael pe gunoŋo gin ma gubedo ka yenyone. Jo ma giyerogi keken aye gunoŋo, ento jo mukene onoŋo cwinygi odoko nwaŋ,
\v 8 kit macalo yam gicoyo ni, “Lubaŋa doŋ omiyo botgi cwiny me diŋo, omiyo waŋgi pe neno, itgi bene pe winyo lok, kadi wa onyoo.”
\v 9 Daudi bene owaco ni, “Wek karamagi ma gicamo-ni otyekgi woko macalo owic ma makogi; wek obed gin ma miyo gipoto ibur pi culo waŋ balgi.
\q
\v 10 Mi waŋgi ocor woko, wek pe gunen piny; mi pyergi ogom woko matwal.”
\p
\v 11 Dok apenyo ni, “Jo Icrael yam guyokke gumito poto woko piny?” Pe kumeno! Pi balgi omiyo larre bene doŋ obino bot Lurok, wek omi nyeko omak jo Icrael.
\v 12 Ka balgi doŋ okelo lonyo bot lobo, dok bene ka potogi okelo lonyo bot Lurok, berre doŋ bibedo rom mene ka gin ducu gudwogo woko liweŋ?
\p
\v 13 Kombeddi atye ka lok kwedwu, wun Lurok. Doŋ kit macalo an lakwena kwede bot Lurok-ki, adworo ticca,
\v 14 wek gwok nyo ami nyeko omak jo me rokka, ka wek alar jo mogo ki i kingi.
\v 15 Pi bologi woko omiyo Lubaŋa odwoko lobo ducu bote; ka doŋ ogamogi, ci bikelo aŋo? Pe bibedo calo kwo ma oa ki i kin jo muto?
\v 16 Ka ginywaŋo moko manok ma gityero calo gin me wi mwaka, moko ducu noŋo doŋ leŋ; ka ce lwit yat leŋ, ci jaŋe ducu bene gibedo leŋ kit meno.
\p
\v 17 Ento ka ce jaŋe mogo gituro woko ki i kom yat jeituni maberrre, ka doŋ gijako jaŋ yat jeituni mo me tim, ci gicomo ka-kagi wek omok i tyen yat maber ca, ka doŋ cako nywako ywayo pige ma miyu ma a ki i lwite. Jaŋ yat ma gijako ki i tim ca en aye in;
\v 18 ento pe myero iwakke i kom jaŋe mukene ca. Kadi bed iwakke, pe in aye ma itiŋo lwite, ento lwite aye ma otiŋi.
\v 19 Ibiwaco ni, “Yam gituro jaŋe mogo ni wek gicoma i kom yat.”
\v 20 Adada, yam giturogi woko pien gin pe guye Lubaŋa, in pud icuŋ pien niyeni tye. Pe myero ibed ki tam me wakke, ento bed ki lworo.
\v 21 Ka Lubaŋa yam pe oweko jaŋ yat kikome, ci doŋ pe biweki.
\p
\v 22 Koŋ inen kica pa Lubaŋa ki gerone. En ger i kom jo ma gupoto, ento nyuto kicane boti, ka imedde kun icuŋ i kicane. Ka pe, gibitoŋi woko bene.
\v 23 Dok gin Lujudaya bene ka guweko bedo laboŋo niye, ci gibidwokogi i kom yat; pien Lubaŋa tye ki twero me dwokogi iye.
\v 24 Pien in Larok irom ki jaŋ yat jeituni me tim ma gitoŋo woko, gicomo i kom jeituni maberre, ma yam onoŋo pe olot i kom yat jeituni ma gipito apita. Pe bedo yot twatwal bot Lubaŋa me dwoko jaŋ yat mukene ca i kom yat kikome ma yam giturogi ki iye-ni?
\p
\v 25 Utmegina, tye muŋ mo ma amito wuŋe, wek omi pe wutam kekenwu ni wuryek; man en aye ni, jo Icrael cwinygi odoko nwaŋ pi kare mo manok, nio ka wel Lurok biromo.
\v 26 Lacen doŋ Lubaŋa bilaro jo Icrael ducu, kit macalo yam gicoyo ni, “Lalar bibino kun a ki i Cion, en bikwanyo kit me lworo Lubaŋa woko ki bot Yakobo”;
\v 27 “man aye gicikke ma abiketo kwedgi i kare ma abikwanyo balgi woko.”
\p
\v 28 Doŋ pi lok ma dok i kom lok me kwena maber, gin gudoko lukwor pa Lubaŋa piwu, ento pi lok ma kemo yer, Lubaŋa marogi pi kwarogi.
\v 29 Mot me kica pa Lubaŋa, ki lwoŋone, pe twero lokke.
\v 30 Yam pe wuwinyo dog Lubaŋa, ento kombeddi doŋ en otimo kica botwu, ma onoŋo doŋ gin gukwero bedo ki winy woko i kome.
\v 31 I kit acel-lu kombeddi doŋ gukwero winyo doge i kare ma en otimo botwu kica, wek omi gin bene gitim kica botgi kit meno.
\v 32 Pien Lubaŋa oketo dano ducu i mabuc me kwero winyo doge, wek etim kica bot jo ducu.
\p
\v 33 Lonyo pa Lubaŋa dwoŋ ma okato kare! Ryekone kacel ki ŋecce tut twatwal! Lok ma en ŋolo tere pe tatte, niaŋ i kite tek!
\v 34 “Aŋa ma ŋeyo tam pa Rwot? Aŋa ma yam miye tam?”
\v 35 “Aŋa mono ma yam koŋ omiye gin mo me mot, ka en bene odwoko cen bote?”
\p
\v 36 Pien en aye yam oketo jami ducu, jami ducu yam obedo tye pire, dok bene obedo mere. Deyo obed bote nakanaka. Amen.
\c 12
\cl Chura 12
\p
\v 1 Pi meno, utmegina, abako doga botwu pi kica pa Lubaŋa, wumine kenwu macalo gitum makwo ma gityero bot Lubaŋa, gin maleŋ ma yomo cwiny Lubaŋa; ma en aye woro me cwinywu.
\v 2 Pe wulub tam me lobo man, ento wuwek Lubaŋa olok tamwu odok nyen, wek omi wuniaŋ i gin ma Lubaŋa mito, gin maber, ma yomo cwinye, ma roc mo pe iye.
\p
\v 3 Pi mot me kica ma gimiyo bota atito botwu ducu ni, dano acel acel myero pe opar pi ditte mukato kare, ento wubed ki par ma tye atir, kun ŋat acel acel lubo kit pok me niye ma Lubaŋa doŋ opimo omiye.
\v 4 Watye ki dul komwa mapol i kom acel, dul kom magi bene pe gitiyo kit tic acel keken;
\v 5 kit meno, wan bene kadi bed wapol, wan kom acel i Kricito, ma dano acel acel bedo calo dul kom lawote.
\v 6 Watye ki mot mapatpat ma lubo gum ma Lubaŋa omiyo botwa; myero wati kwedgi. Ka ce gimiyo botwa mot me tito lok pa Lubaŋa, myero watit kit macalo niyewa tye kwede.
\v 7 Ka ce omiyowa mot me tic pi dano, myero wati tic botgi. ŋat ma lapwony myero opwony dano;
\v 8 ŋat ma cuko cwiny dano myero ocuk cwinygi; ŋat ma poko jamine, myero opok ki cwinye ducu; ŋat ma latel myero otel dano ki mitkom, ŋat ma konyo lucan, myero okonygi ki yomcwiny.
\p
\v 9 Wuwek mar ma wutye kwede obed mar me ada. Wukwer gin marac, wumok matek i kom gin maber.
\v 10 Wumarre kekenwu ki cwinywu ducu macalo omego, kun dano acel acel miyo deyo bot lawote.
\v 11 Komwu obed mit, laboŋo wackom, wubed lyet wa i cwinywu, kun wutiyo bot Rwot macalo luticce.
\v 12 Cwinywu obed yom pi gin ma wugeno; wudi cwinywu i can, kun wumine kenwu i lego Lubaŋa ki cwinywu ducu.
\v 13 Wupok jamiwu bot jo pa Lubaŋa ma gitye ki peko; wuket cwinywu bene ka gwoko welo.
\v 14 Wuleg gum i kom jo ma giunowu; wulam gum botgi, ento pe wucengi acena.
\v 15 Wubed ki yomcwiny kacel ki jo ma tye ki yomcwiny, wukok bene kacel ki jo ma kok.
\v 16 Wubed ki niaŋ ma atir i kinwu kekenwu; pe wuwakke, ento wuribbe ki dano ata ducu. Pe wukette kekenwu ni wuryek.
\v 17 Pe wucul waŋ gin marac ki gin marac i kom dano mo, ento wutam pi gin ducu ma dano ducu pwoyo ni ber.
\v 18 Ka ce twerre ki tuŋ botwu, myero wubed ki kuc ki dano ducu.
\p
\v 19 Luwota ma amaro, pe wucul kwor, ento wuwek kare ki kiniga pa Lubaŋa, pien yam gicoyo ni, “An aye ma abiculo kwor, abiculo waŋe lacen, man Rwot ma owaco.”
\v 20 Yam gicoyo bene ni, “Ka ce kec neko lakworri, miye kwon ocam; dok ka orwo pii neke, miye pii omati; pien ka itimo kumeno, ibibako miri mac i wiye.”
\v 21 Pe wuwek gin marac olowu, ento wun aye myero wulo gin marac ki timo gin maber.
\c 13
\cl Chura 13
\p
\v 1 Dano acel acel myero owiny luloc ma giloye; pien pe tye kit twero mo ma pe oa ki bot Lubaŋa; luloc ma gitye-ni Lubaŋa aye oketogi.
\v 2 Pi meno ŋat ma pyem ki luloc noŋo pyem ki ŋat ma Lubaŋa oyero; gibiŋolo kop i kom jo ma pyem kwedgi.
\v 3 Pien jo ma tiyo gin maber pe gibedo ki lworo mo i kom luloc, ento jo ma tiyo gin marac aye gibedo ki lworo. Imito ni pe ibed ki lworo i kom dano ma tye ka loc? Ti gin maber, ci en bipwoyi;
\v 4 pien en latic pa Lubaŋa ma tiyo ticce pi konyi. Ento ka itimo gin marac, ci myero ibed ki lworo i kome, pien twero me neko dano doŋ gimiye woko. En latic pa Lubaŋa ma kelo kiniga pa Lubaŋa i kom jo ma timo gin marac.
\v 5 En mumiyo myero wuwiny luloc, pe pi lworo kiniga pa Lubaŋa keken, ento me miyo wek wubed bene ma iwu leŋ.
\v 6 Man bene aye tyen lok mumiyo wuculo mucoro, pien luloc gin lutic pa Lubaŋa ma gitiyo tic meno kikome.
\v 7 Wucul gin ma myero bot ŋat acel acel, wucul mucoro bot wegi mucoro, ki ajog bot wegi ajog, wulwor jo ma myero me alwora, wuwor jo ma myero me awora.
\p
\v 8 Pe wubed ki banya pa ŋat mo i komwu. Ento wubed ki banya me marre kekenwu; pien jo ma maro luwotgi noŋo doŋ gucobo cik.
\v 9 Pien cik mogo ma waco ni, “Pe itim abor, pe ineki, pe ikwal, cwinyi pe opukke i kom jami pa ŋat mukene,” ki kwa cik mogo mukene-gu gucokke kacel ki lok man ni, “Mar lawoti macalo imarre keni.”
\v 10 ŋat ma maro dano, pe timo gin marac bot dano lawote; pi meno mar aye ma cobo cik.
\p
\v 11 Wuti man kun wuŋeyo kare ma wutye iye, ni, kare doŋ oromo myero wuco woko ki i waŋ nino. Pien larrewa doŋ onyiko cok twatwal, kato ma i kare ma yam wakwoŋo ye iye Rwot-ti.
\v 12 Dyewor doŋ cok tum, piny doŋ mito ru. Doŋ wabolu tic me piny macol woko, waruku jami lweny me dyeceŋ.
\v 13 Myero walubu kit ma myero me dyeceŋ, laboŋo maro tuko marac me yomcwiny marac, ki mero, laboŋo timo abor ki tim mogo me tarwaŋ, laboŋo daa ki nyeko.
\v 14 Wuruk Rwot Yecu Kricito calo wuruko boŋowu, dok bene pe wutam pi kwowu me kit pa dano ma ginywalowu kwede pi cobo mitte.
\c 14
\cl Chura 14
\p
\v 1 Wujol dano ma niyene goro, ento pe wupyem kwede i kom tam mogo ma en tamo.
\v 2 Dano mo twero bedo ki niye me camo gin mo keken, ento ŋat ma niyene goro camo pot dek keken.
\v 3 Dano ma camo gin ducu myero pe oca ŋat ma pe camo, ki dano ma pe camo gin ducu pe myero oŋol kop i kom ŋat ma camo gin ducu; pien Lubaŋa doŋ otyeko jole.
\v 4 In aŋa mono ma iŋolo kop i kom latic pa ŋat mukene-ni? Meno lok pa ŋat ma loye me ŋolo kop i kome, ka cuŋo nyo ka poto. Ento en bicuŋ gire, pien Rwot tye ki twero ma miyo en cuŋ.
\p
\v 5 Dano acel paro ni nino acel dit kato nino mukene, kun noŋo dano mukene paro ni nino ducu rom. Dano acel acel myero omok tamme pire kene.
\v 6 Dano ma paro pi nino mo, paro pi Rwot, ki ŋat ma camo bene camo pi Rwot, pien pwoyo Lubaŋa; dano ma kwero cam bene kwero pi Rwot, pwoyo Lubaŋa bene.
\v 7 Pien dano mo pe ki i kinwa ma kwo pire kene, dok bene dano mo pe ma to pire kene.
\v 8 Ka wakwo, wakwo pi Rwot; ka wato bene, wato pi Rwot. Mumiyo kadi wakwo, nyo wato, wan jo pa Rwot.
\v 9 Pien Kricito yam oto ka doki obedo kwo wek ebed Rwot pa jo muto ki jo makwo.
\p
\v 10 Piŋo iŋolo kop i kom omeru? Nyo in, piŋo icayo omeru? Wan ducu wabicuŋ i nyim komker me ŋolo kop pa Lubaŋa.
\v 11 Pien yam gicoyo ni, “Macalo atye kwo-ni man Rwot ma owaco. jo ducu gibirumo coŋgi i nyima, ki dano ducu gibipako Lubaŋa.”
\p
\v 12 Kit meno, ŋat acel acel i kinwa bidok i lok ma i kome pire kene bot Lubaŋa.
\p
\v 13 Myero doŋ wagiku ŋolo kop woko i kom luwotwa; ento gin ma myero wamoki en aye pe me tiyo gin mo ma bimiyo ominwa yokke nyo poto i bal.
\v 14 Aŋeyo dok aniaŋ maber i Rwot Yecu ni, pe tye gin mo ma obedo me kwer pire kene; ento bedo me kwer bot ŋat ma tamo ni obedo me kwer.
\v 15 Ka ce imiyo omeru bedo ki cwercwiny pi gin ma in icamo, noŋo doŋ pe itye ka lubo yo me mar. Pe iwek gin ma in icamo obal kwo pa dano ma Kricito oto pire.
\v 16 Pe wuwek dano gulok i kom gin maber ki tuŋ botwu ni obedo gin marac.
\v 17 Pien ker pa Lubaŋa pe te lokke cam ki mat, ento kit ma atir, kuc, ki yomcwiny ma Cwiny Maleŋ miyo.
\v 18 Dano ma tiyo tic pa Kricito kit meno aye yomo cwiny Lubaŋa, dok bene dano gipwoye.
\p
\v 19 Myero doŋ watamu pi gin ma kelo kuc ki gin ma doŋo niyewa i kinwa kekenwa.
\v 20 Pe wubal tic pa Lubaŋa pi lok me cam mamwa-ni. Jami ducu leŋ, ento bedo rac ka dano mo camo gin ma miyo lawote poto i bal.
\v 21 Bedo ber mada ka pe icamo riŋo, nyo kadi ki mato koŋo, nyo tiyo gin mo ma bimiyo omeru poto.
\v 22 Doŋ niye ma itye kwede myero ibed kwede i kin in ki Lubaŋa keken. Tye ki gum dano ma pe ki tyen lok ma ŋolo kop loye kekene i gin ma en pwoyo.
\v 23 Ento dano ma kalo akala i cwinye kop loye ka ce ocamo, pien gin ma en timo-ni noŋo pe oa i niye, pien gin ducu ma pe oa i niye meno bal.
\c 15
\cl Chura 15
\p
\v 1 Wan jo ma watek myero wakonyu jo magoro i gin ma loyogi, ento pe watamu pi yomo cwinywa kekenwa.
\v 2 ŋat acel acel i kinwa myero oyom cwiny dano lawote, me konye, wek odoŋ i niyene.
\v 3 Pien Kricito yam pe oyomo cwinye kekene, ento obedo kit macalo yam gicoyo ni, “Yet pa jo ma giyeti kwede doŋ opoto i koma.”
\v 4 Gin ducu ma yam gicoyo i kare macon ca onoŋo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.
\p
\v 5 Wucir can ki cuko cwiny ma a ki bot Lubaŋa; myero en omi wubed ki niaŋ maber i kinwu kekenwu, kun wulubo kit pa Kricito Yecu,
\v 6 wek wuribbe ka pako Lubaŋa Won Rwotwa Yecu Kricito ki dwan acel.
\p
\v 7 Wujolle kekenwu, kit macalo Kricito yam doŋ ojolowu kwede, pi deyo pa Lubaŋa.
\v 8 Atittiwu ni, Kricito yam olokke odoko latic ma okonyo Lujudaya, pi nyuto ni Lubaŋa loko lok ada, kun bene cobo gin ma yam Lubaŋa ocikke iye bot kwarowa macon,
\v 9 dok pi miyo Lurok gubed ka pako Lubaŋa pi kicane, kit macalo yam gicoyo ni, “Pi meno abikori i kin Lurok, dok abiwero wer me pako nyiŋi.”
\v 10 Dok yam bene owaco ni, “Wun Lurok, wubed ki yomcwiny kacel ki jone”;
\v 11 dok ni, “Wupak Rwot, wun Lurok ducu, wek lwak me rok ducu gupake.”
\v 12 Icaya bene yam owaco ni, “Lakwar Yece bibino, en bibino ka loyo Lurok; Lurok bene gibigeno en.”
\p
\v 13 Lubaŋa ma miyo dano ducu bedo ki gen myero omi yomcwiny ducu ki kuc opoŋ i iwu pi niyewu i kome, wek genwu obed ka medde ameda pi tek pa Cwiny Maleŋ.
\p
\v 14 Aŋeyo atir ni wun jo mabeco twatwal, wutye ki ŋec muromo, dok bene wutwero pwonnye giwu kekenwu.
\v 15 Ento doŋ atyeko coyo botwu lok mogo ki tekcwiny madit, kombeddi amito apo wiwu iye. Atimo meno pi mot ma Lubaŋa omiya,
\v 16 me bedo latic pa Kricito Yecu bot Lurok. Atye ka tic macalo ajwaka pa Lubaŋa kun bene atito lok me kwena maber ma oa ki bot Lubaŋa, wek omi Lurok gubed calo gitum ma gityero ma Lubaŋa pwoyo, ma Cwiny Maleŋ doŋ olonyo woko odoko maleŋ.
\p
\v 17 Atye ki tyen lok ma miyo awakke i Kricito Yecu pi ticca ma atye ka tiyone pi Lubaŋa.
\v 18 Pe abiette ka loko lok mo mukene, ento kono pi gin ma Kricito otiyo pi kelo lurok i te locce keken, kun tiyo kacel kweda i lok ki i tic,
\v 19 pi teko ma onen i kom lanyut mogo ki taŋo mogo, pi tek pa Cwiny Maleŋ. Meno omiyo doŋ atyeko tito lok me kwena maber i kom Kricito atika, cakke ki i Jerucalem, wok kwede wa i Illiriko.
\v 20 pien onoŋo aketo cwinya me tito lok me kwena maber ka ma yam dano peya guwinyo nyiŋ Kricito, wek omi pe aket gedo i wi guti ma yam doŋ ŋat mukene ocako gero iye mere,
\v 21 ento wek obed kit macalo gicoyo ni “Jo ma yam peya gitito botgi lok i kome doŋ gibinene, jo ma yam peya guwinyo pire gibiniaŋ i kome.”
\p
\v 22 Man aye gin ma obedo ka geŋa tyen mapol me bino botwu.
\v 23 Ento kombeddi doŋ pe atye ki ka tic mo kany, dok bene onoŋo doŋ abedo ka mito pi mwaka mapol ni abin botwu.
\v 24 Ageno ni abinenowu ka awok ki kunnu ma noŋo akato acito i Cipein, ageno bene ni wubikonya i wotta me cito kunnu lacen, ma noŋo koŋ ari botwu pi kare manoknok.
\v 25 Ento kombeddi pud koŋ acito i Jerucalem pi tero jami me kony bot jo pa Lubaŋa.
\v 26 Pien jo pa Lubaŋa ma gitye i Makedonia ki Akaya doŋ gumoko tamgi me jogo lim me konyo jo pa Lubaŋa ma gitye i Jerucalem ma can omakogi.
\v 27 Gumoko tamgi kit meno, ento gitye bene ki banya bot jo Jerucalem, pien ka Lurok ginywako gamo mot me Cwiny kacel ki Lujudaya, myero gin bene gukony Lujudaya ki jami ma mitte me gwoko kom.
\v 28 Ka doŋ meno otum, ma noŋo doŋ atyeko miyo botgi gin ma gijogo pigi, ci abiwok ki botwu ka doŋ akato acito i Cipein.
\v 29 Aŋeyo ni ka ao botwu noŋo abino ki gum madit ma oa ki bot Kricito.
\p
\v 30 Abako doga botwu utmegina, pi Rwotwa Yecu Kricito ki pi mar pa Cwiny Maleŋ, wuket tek wuribbe kacel i legawu pira bot Lubaŋa,
\v 31 wek abwot woko ki bot jo ma pe guye Kricito ma gitye i Judaya, dok bene wek omi jo pa Lubaŋa ma gitye i Jerucalem gupwo tic ma acito ka tiyone kunnu.
\v 32 Pi meno ka Lubaŋa oye wek abin botwu ki yomcwiny madwoŋ, ci koŋ aywe bene kacel kwedwu.
\v 33 Lubaŋa won kuc obed kwedwu ducu. Amen.
\c 16
\cl Chura 16
\p
\v 1 Anyuto botwu laminwa Foibe, ma en latic pa lwak jo ma guye Kricito ma tye i Kenkeria.
\v 2 Wujole i Rwot kit macalo jo pa Lubaŋa myero gujol kwede dano, dok bene myero wukonye i gin ducu ma en bimito ki botwu; pien yam okonyo jo mapol, okonya bene.
\p
\v 3 Wumot Pricika ki Akwila, ma gitiyo kacel kweda i Kricito Yecu.
\v 4 Gin yam gudyero kwogi pi laro kwona; pe an kena aye ma apwoyogi, ento kadi wa Lurok ducu ma guye Kricito bene gipwoyogi.
\v 5 Wumot bene jo muye Kricito ma gicokke i otgi. Wumot larema Epaenato; en aye obedo ŋat mukwoŋo ye Kricito i Acia.
\v 6 Wumot Maliam ma yam otiyo tic matek i kinwu-ni.
\v 7 Wumot Anduroniko ki Yunia, ma gin wadina ma yam gitweyogi kacel kweda i mabuc. Gin jo ma giŋene mada i kin lukwena, gin bene aye ma gukwoŋo bedo i Kricito kweda.
\v 8 Wumot Ampuliato, ma en larema ma amaro i Rwot.
\v 9 Wumot Urbano latic wadwa i Rwot, ki Citakic larema ma amaro.
\v 10 Wumot Apelle, ma en dano ma genne i Kricito. Wumot jo me ot pa Aricitobulo.
\v 11 Wumot Kerodion ma en watta, ki jo me ot pa Narocico ma gitye i Rwot.
\v 12 Ma gin aye Terapaina ki Terpoca, ki larema Perici bene ma otiyo tic matek i Rwot.
\v 13 Ma Wumot Rupo, dano ma ŋene i Rwot, gin ki minne ma alwoŋo ni maa bene.
\v 14 Wumot bene Acinkerito, Pelegon, Keremec, Patroba, Keremac ki utmego ma gitye kacel kwedgi.
\v 15 Wumot bene Pilologo ki Julia, Nerea gin ki laminne, ki Olimpa, ki jo pa Lubaŋa ducu ma gitye kacel kwedgi.
\v 16 Wumotte kekenwu ki mot maleŋ me mar. Lwak jo ma guye Kricito i kabedo mapatpat ducu gumotowu.
\p
\v 17 Abako doga botwu, utmegina, wunen jo ma gikelo apokapoka i lok ma miyo dano poto i bal, ma pe rwatte ki pwony ma yam gipwonyowu kwede. Pe wuribbe ki jo macalo meno.
\v 18 Jo macalo meno pe gin lutic pa Rwotwa Kricito; rwotgi ma gimaro aye igi. Gibwolo tam pa dano ma gipe ki tam marac, ma kun noŋo giloko lok maber ma winyone mit adada.
\v 19 Kit winy ma wubedo kwede bot Lubaŋa doŋ owinnye bot jo ducu, meno aye gin mumiyo wuyomo cwinya. Doŋ amito wubed luryeko i gin maber, ento myero wubed maleŋ laboŋo bal;
\v 20 ci Lubaŋa won kuc binyoto Catan woko oyotoyot piny i te tyenwu. Kica pa Rwotwa Yecu Kricito obed kwedwu.
\p
\v 21 Temceo ma tiyo kacel kweda i Rwot omotowu; ki Lukio, ki Jacon, ki Cocipater, ma gin giwadina.
\v 22 An Tertio aye ma acoyo waraga man amotowu i Rwot.
\v 23 Gayo ma en ŋat ma abuto i ode bene omotowu, en aye ma gwoko lwak ducu muye Kricito. Eracto ma en lakan-lim me gaŋ man, ki ominwa Kwarto bene gumotowu.
\v 24 [Kica pa Rwotwa Yecu Kricito obed kwedwu wun ducu. Amen.]
\p
\v 25 Myero wami deyo bot Lubaŋa ma twero miyo wucuŋ matek, macalo apwonyo kwede i lok me kwena maber ma abedo ka titone-ni, ki lok ma gitito i kom Yecu Kricito. Muŋ man yam Lubaŋa okano oliŋ woko litik pi lwak mwaka mapol, ka lacen doŋ oyabo ka maleŋ.
\v 26 Kombeddi doŋ ginyuto woko ka maleŋ i lok ma lunebi yam gucoyo ma omiyo lurok ducu guŋeyo kit macalo Lubaŋa ma pe to yam ociko, wek omi gulub niye.
\v 27 Deyo obed bot Lubaŋa nakanaka, ma en keken aye won ryeko, pi Yecu Kricito. Amen.