ach-ss-acholi_reg/42-MRK.usfm

\id MRK
\ide UTF-8
\h Marako
\toc1 Marako
\toc2 Marako
\toc3 mrk
\mt Marako
\c 1
\cl Chura 1
\p
\v 1 Acakki me lok me kwena maber i kom Yecu Kricito, Wod pa Lubaŋa,
\v 2 kit ma gicoyo kwede i buk pa lanebi Icaya ni, “Nen, acwalo lakwenana otelo nyimi, ma bigero yoni;
\v 3 dwan dano mo ma daŋŋe ki i tim ni, Wuger yo pa Rwot, wutir yone ocuŋ atir.”
\p
\v 4 Kit meno, Jon Labatija ocako nen i tim, kun tito lok ni, “Wuŋut wek wulim batija, wek Lubaŋa owek balwu.”
\v 5 Ci jo ma i lobo Judaya ducu ki jo ducu ma i gaŋ Jerucalem gucito bote. Gutuco balgi, ci en obatijagi i kulu Jordan.
\v 6 Jon yam ruko boŋo yer kinaga, ka tweyo pyere ki del, kun camo bonyo ki moo kic ma i tim.
\v 7 En obedo ka tito lok kun wacci, “Dano mo obebino kun lubo kora ma kato an ki dit, ma an pe aromo guŋo piny ka gonyo del war tyene.
\v 8 An abatijawu ki pii, ento en bibatijawu ki Cwiny Maleŋ.”
\p
\v 9 I kare meno Yecu oa ki i Najaret me Galilaya obino bot Jon, ci Jon obatija en i kulu Jordan.
\v 10 Ka Yecu obea woko ki i pii, otugi neno ka polo yabbe, ki Cwiny Maleŋ ma bino kun lyanne piny macalo akuri ci opye i kome.
\v 11 Ci dwan ocako winnye ma a ki i polo kun wacci, “In aye i Woda ma amaro, ma cwinya yom i komi.”
\v 12 Cutcut Cwiny Maleŋ otero Yecu woko wa i tim.
\v 13 Ci obedo i tim nino pyeraŋwen; Catan ocako bite, ma onoŋo en tye kacel ki lee tim, kun lumalaika gikonye.
\p
\v 14 I kare ma gitweyo Jon woko i mabuc, Yecu ocako bino i Galilaya kun tito lok me kwena maber ma a ki bot Lubaŋa;
\v 15 owacci, “Kare doŋ oromo, ker pa Lubaŋa onyiko cok; wuŋut, wuye lok me kwena maber.”
\p
\v 16 Ka Yecu onono woto rabo dog nam me Galilaya, ci oneno Cimon ki ominne Anderiya, ka gitye ka bolo obwo recgi i nam; pien gin lumak-rec.
\v 17 Yecu ocako lwoŋogi ni, “Wubin wulub kora, ci an abimiyowu wudoko lumak dano.”
\v 18 Ci cutcut gutugi weko obwogi, gulubo kore.
\v 19 Ka dok guwoto anyim manok, ci oneno Yakobo ki ominne Jon, gin awobe pa Jebedayo, ma onoŋo gitye i yeya ka lubo obwo recgi.
\v 20 En otugi lwoŋogi cut, ci giweko wongi Jebedayo odoŋ ki luticce i yeya, gucako lubo kore.
\p
\v 21 Gucako cito wa i Kapernaum, ci cutcut i ceŋ cabit Yecu odonyo i kacokke, ocako pwonyogi.
\v 22 Dano guuro kit pwonnye matek, pien owonyogi macalo won twero, pe macalo lipwony-cik.
\v 23 Ci cutcut dano mo ma tye ki cen marac onen i kacokke;
\v 24 ocako daŋŋe matek ni, “Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in i dano maleŋ pa Lubaŋa.”
\p
\v 25 Ento Yecu ojuke, kun wacce ni, “Liŋ mot, a woko ki i kome!”
\v 26 Cen marac oryeye ki koko matek, ka oa woko ki i kome.
\p
\v 27 Dano ducu guuro matek, kun gipenye kekengi ni, “Man gin aŋo? Man aye dok kit pwony manyen bo? Nen en ka ciko wa cen maraco-gu ki twero, ci gin bene giwinyo doge.”
\v 28 Ci pire oywek oromo kabedo ducu murumo lobo Galilaya.
\p
\v 29 Ci cutcut gua woko ki i kacokke, gudonyo i ot pa Petero ki Anderiya, gunywako wot ki Yakobo ki Jon.
\v 30 Maro Petero onoŋo tye ki two lyeto, obuto piny, ci cutcut gutito pire bot Yecu.
\v 31 Yecu ocito omako ciŋe otiŋe kwede malo, ci two lyeto ocaŋ woko ki i kome, ka ocako gwokogi.
\p
\v 32 Otyeno ma ceŋ opoto woko, gucako kelo bote lutwo ducu ma komgi lit, ki jo ma cen marac omakogi.
\v 33 Jo ducu ma i gaŋ gucokke i doggola.
\v 34 Ci en ocaŋo lutwo mapol ma onoŋo gitye ki kwa two mapatpat, kun ryemo ki lwak cen-gu mapol; pe oye cen mo oloko, pien onoŋo giŋeye.
\p
\v 35 Odiko con ma piny pud col, Yecu oa malo, ci opuk ocito woko wa i kabedo ma dano pe iye, ci obedo ka lego Lubaŋa kunnu.
\v 36 Cimon ki jo ma gitye kwede gucako lubo kore;
\v 37 ka gunoŋe ci guwacce ni, “Dano ducu gitye ka yenyi.”
\p
\v 38 En ogamo doggi ni, “Dok wakobu woko i gaŋ mukene ma tye cok ki kany, wek acitit lok kunnu bene; pien meno en aye gin mumiyo abino.”
\v 39 Ci Yecu ocako tiŋo wot orumo lobo Galilaya ducu, kun woto ki tito lok i kacokkegi ki ryemo cen-gu bene.
\p
\v 40 Ladobo mo obino bot Yecu, kun orumo coŋe piny obako doge bote, olege ni, “Ka imito, itwero lonyo koma.”
\p
\v 41 Ci kica omako Yecu i kome, ocako ryeyo ciŋe ogudo kome, kun wacce ni, “Amito; komi olony.”
\v 42 Ci cutcut dobo ocaŋ ki i kome, kome odoko leŋ.
\v 43 Yecu ocike matek, ka ocwale kwede ocito.
\v 44 Ocike ni, “Winy ba, pe icitit ki dano mo; ento ber icit ci icinyutte keni bot ajwaka pa Lubaŋa, wek imi gityer pi komi ma doŋ ocaŋ-ŋi, kit ma yam Moses ociko, wek obed lanyut botgi.”
\v 45 Ento en ocito, ocako tito lokke atyer bot lwak, ci lokke oywek. Pieno omiyo Yecu pe doŋ twero donyo i gaŋ mo ka maleŋ; ocako bedo i kabedo ma dano pe iye, ento lwak gumol gucito bote ma gua ki i kabedo ducu.
\c 2
\cl Chura 2
\p
\v 1 Ka nino okato manok, Yecu dok odwogo i Kapernaum, ci pire owinnye ni en tye paco.
\v 2 Ci lwak gucokke kacel, ma kabedo odoko diŋ, pe romogi, piny opoŋ wa i doggola-gu; en obedo ka tito lok botgi.
\v 3 Jo mogo gukelo bote dano ma twoyo two akweya kom, jo aŋwen aye gutiŋo en.
\v 4 Ka yo me tere i nyim Yecu oloyogi pi lwak, ci guyabo wi ot ki malo ka ma en tye iye. Ka gutyeko mukone ci gucwalo kitara ma latwo obuto iye piny i nyime.
\v 5 Yecu ka oneno niyegi, ci owaco bot latwo ni, “Latinna, balli doŋ giweko woko.”
\p
\v 6 Ka lupwony-cik mogo, ma onoŋo gibedo kunnu, gubedo ka pyem kekengi wa i cwinygi ni,
\v 7 “Dano man loko kuman piŋo? En oyeto Lubaŋa! Aŋa ma twero weko bal kono ŋat acel keken, en aye Lubaŋa?”
\p
\v 8 Oyotoyot Yecu ocako niaŋ ki i cwinye kene ni gitye ki pyem ma kit meno i cwinygi, ci openyogi ni, “Piŋo cwinywu tye ka pyem lok macalo man?
\v 9 Lok mayotte tye kwene ka awaco bot latwo ni, ‘Balli doŋ giweko woko’, kono nyo ni, ‘A malo wek itiŋ kabutoni, icit wa paco’?
\v 10 Ento kombeddi abinyuto botwu ni Wod pa dano tye ki twero me weko bal i wi lobo.” Ci cut owaco bot latwo akweya kom ni,
\v 11 “An awacci ni, a malo, itiŋ kabutoni, icit giri paco.”
\p
\v 12 En ocako a malo, otiŋo kabutone oyotoyot, ocito woko ki i nyimgi; omiyo gin ducu guuro twatwal, gucako pako Lubaŋa kun giwacci, “Ma naka yam peya waneno kit gin macalo man.”
\p
\v 13 Yecu dok ocito i dog nam Galilaya; ci lwak ducu gubino bote, ocako pwonyogi.
\v 14 Ka okato i yo, ci oneno Levi, wod pa Alipayo, ka obedo piny ka jogo mucoro, ci owacce ni, “Luba.” Ci oa malo, olubo kore.
\p
\v 15 Ka doŋ en obedo piny i ode, ci lujog-mucoro ducu ki lubalo gubino gubedo piny kacel ki lupwonnyene; pien ceŋ onoŋo tye jo mapol ma kit meno ma gubedo ka lube
\v 16 Lupwonycik ma i kin Luparicayo, ka guneno ni en ocamo kacel ki lubalo ki lujog-mucoro, gupenyo lupwonnyene ni, “Piŋo en camo kacel ki lujog-mucoro ki lubalo?”
\p
\v 17 Yecu owinyo ci ogamo ni, “Jo ma komgi yot pe gimito daktar, pe abino ka lwoŋo jo ma kitgi atir, ento lubalo.”
\p
\v 18 Lupwonnye pa Jon ki pa Luparicayo onoŋo gitye ka ri kec; jo mogo gubino gupenye ni, “Piŋo lupwonnye pa Jon ki pa Luparicayo giri kec, ento lupwonnyeni pe giri kec?”
\p
\v 19 Yecu odok iye botgi ni, “Lurem lanyom twero ri kec ma kun lanyom tye kwedgi? Pi kare ducu ma lanyom tye kwedgi pe gitwero ri kec.
\v 20 Ento kare bibino ma gibikwanyo lanyom woko ki botgi, ka doŋ gibiri i kare meno.
\p
\v 21 Pe tye ŋatti mo ma dabo boŋo manyen i kom ginaruka muti. Ka otimo kit meno, ci kiraka ma gidabo kwede-ni telo boŋo meno; en manyen-ni juŋ woko ki kom muti, ci waŋ boŋo yec medde.
\v 22 Pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, koŋo vino bio woko, ki kicaa bene biballe. Ento koŋo vino manyen myero gipik i kicaa manyen.”
\p
\v 23 Ka yam onoŋo Yecu woto kun ŋolo dye poto bel i nino me cabit, ka gitye ka wot, lupwonnyene gucako rito wit bel.
\v 24 Luparicayo gupenye ni, “Piŋo lupwonnyeni gitiyo gin ma cik okwero ni pe giti i ceŋ cabit?”
\p
\v 25 En odok iye botgi ni, “Wun pe wukwano gin ma Daudi otiyo ka en tye ma kec oneko marac, en ki jo ma tye kacel kwede?
\v 26 Kit ma en odonyo kwede i ot pa Lubaŋa i kare ma Abiatar aye ajwaka madit pa Lubaŋa? Ocamo mugati ma giketo i nyim Lubaŋa, ma yam cik okwero ni dano mo pe ocam, kono ajwagi pa Lubaŋa keken. Daudi ocamo, dok opoko ki jo ma tye bote.”
\v 27 Otittigi ni “Cabit giketo pi dano, pe dano aye giieto pi cabit.
\v 28 Kumeno Wod pa dano aye rwot me cabit.”
\c 3
\cl Chura 3
\p
\v 1 Yecu dok odonyo i kacokke, ma onoŋo tye iye dano mo ma bade otal.
\v 2 Gukiye ka nyo bicaŋe i ceŋ cabit, wek gikel kop i kome.
\v 3 Yecu owaco bot labade otal ni, “A malo icuŋ i dyere.”
\v 4 Openyogi ni, “I ceŋ cabit, cik ye ni gitim iye gin maber nyo gin marac, gilar iye kwo nyo ginek woko?” Ento gin guliŋ aliŋa.
\v 5 En olworo waŋe i komgi ki kiniga, cwinye ocwer pi nwaŋ cwinygi. Owaco bot dano-nu ni, “Rye badi.” En oryeyo bade ci bade ocaŋ.
\v 6 Luparicayo gukato woko, cutcut gucako poro lok kacel ki jo pa Kerode kit ma myero gineke kwede.
\p
\v 7 Yecu ki lupwonnyene gua gucito i dog nam. Lwak madwoŋ ma gua i Galilaya gulube ki jo ma gua i Judaya,
\v 8 ki i Jerucalem, ki Idumea ki loka Jordan, ki i lobo ma orumo Turo ki Cidon; lwak madwoŋ gucokke bote, pien guwinyo pi tic mapol ma en otiyo.
\v 9 En ociko lupwonnye ni guyub yeya matidi pire, wek pe lwak gubed ka diyo en.
\v 10 Pien onoŋo ocaŋo jo mapol, ma omiyo jo ducu ma komgi lit gidine i kome ka boŋe.
\v 11 Ka cen maraco gunene, ci guryebbe i nyime, gukok kun giwaco ni, “In giri Wod pa Lubaŋa.”
\v 12 Yecu ojukogi ni pe myero giwek dano oŋeye.
\p
\v 13 Yecu oito malo i wi got, ocako lwoŋo jo ma en mito bote; ci gucito bote.
\v 14 Oyero jo apar wiye aryo wek gubed kacel kwede, dok wek eorgi gubed lukwena me tito lok,
\v 15 dok gubed ki twero me ryemo cen.
\v 16 Mukwoŋo Cimon ma en ocako nyiŋe Petero;
\v 17 ki Yakobo wod pa Jebedayo, ki Jon omin Yakobo, ma en ocako nyiŋgi ni Boanergi, te lokke ni, jo ma gimor calo kot;
\v 18 ki Anderiya ki Pilipo ki Bartolomayo ki Matayo, ki Tomaci, ki Yakobo wod Alipayo, ki Tadayo, ki Cimon ma obedo i kin jo ma gimito locken,
\v 19 ki Juda me Keriot, ma yam odobe.
\p
\v 20 lwak dok gucokke, omiyo en ki lupwonnyene pe gitwero noŋo kare me cam.
\v 21 Ka jo tugi guwinyo, ci gubino ka make pien giwaco ni, “En opo woko.”
\p
\v 22 Lupwony-cik ma gua i Jerucalem guwaco ni, “En tye ki jok Beeljebul,” dok ni, “En ryemo cen pi twero pa ladit pa cen.”
\p
\v 23 Yecu olwoŋogi bote, oloko kwedgi i carolok ni, “Catan twero ryemo Catan niŋniŋ?
\v 24 Ker ka opokke aryo, ker meno pe twero cuŋ.
\v 25 Dok ot ka iye opokke aryo, ot meno pe twero cuŋ.
\v 26 Dok ka Catan ocako lweny i kome kekene ce opokke kene, ci pe twero cuŋ, kerre gik woko.
\v 27 Ento pe tye ŋatti mo ma twero donyo i ot pa dano ma kome tek ka yako jamine; ento koŋ kwoŋo tweyo dano ma kome tek-ki, ka doŋ biyako jamine ma i ode.
\v 28 Ada awaco botwu ni, bal ducu ma dano timo, ki lok ducu ma giyeto kwede Lubaŋa, gibiwekone woko,
\v 29 ento ŋat ma yeto Cwiny Maleŋ pe gibiweko balle matwal, pien noŋo otimo bal ma ri nakanaka,”
\v 30 pien onoŋo guwaco ni, “En tye ki cen marac.”
\p
\v 31 Minne ki omegine gubino, gucuŋ woko, gucwalo kwena me lwoŋe.
\v 32 Lwak onoŋo gubedo kun gurume dyere. Giwacce ni, “Nen, meni ki omegi gitye woko, giyenyi.”
\p
\v 33 En openyo ni, “Maa ki omega gin aŋagi?”
\v 34 Olworo waŋe i kom jo ma gurume ma gubedo piny, owaco ni, “Maa ki omega gin ene.
\v 35 Dano ma tiyo gin ma Lubaŋa mito, en aye omera, ki lamera, ki maa.”
\c 4
\cl Chura 4
\p
\v 1 Yecu dok ocako pwony i dog nam. Lwak madwoŋ twatwal gucokke bote; pi meno oito i yeya, obedo iye i dye nam, lwak ducu gubedo i witura.
\v 2 Opwonyogi ki lok mapol i carolok. I pwonnye owaco ni.
\v 3 “Wuwiny! Lacoc ocito ka coyo kodi.
\v 4 Ka kun coyo, kodi mogo okir i ŋet yo, winyo gubino, gucamo woko.
\v 5 Kodi mukene okir i kom pata ka ma ŋom tye iye manok. Cutcut gutwi, pien ŋom pe tut.
\v 6 Ka ceŋ oryeny, owaŋogi gutwo woko, pien lwitgi pe odonyo matut.
\v 7 Kodi mukene okir i kin okuto, okuto olot odiyogi woko, pe gunyako nyiggi.
\v 8 Kodi mukene okir i ŋom maber, gutwi, gujany, gunyako nyiggi, mukene pyeradek, mukene pyerabicel, mukene miya.”
\v 9 Lacen owaco ni, “ŋat ma tye ki it me winyone, owiny.”
\p
\v 10 Ka onoŋo Yecu odoŋ kene, ci jo murume dyere kacel ki jone apar wiye aryo, gubino gupenye lok i kom carolok meno.
\v 11 En ogonyo botgi tere ni, “Wun gimiyowu me ŋeyo muŋ me ker pa Lubaŋa, ento bot jo maca ma gitye woko giloko kwedgi i carolok,
\v 12 wek ka gineno, gunen, ento pe guniaŋ maber, dok ka giwinyo, guwiny, ento pe guniaŋ tere maber; wek pe gudwog cen, ci Lubaŋa owek balgi.”
\p
\v 13 Yecu openyogi ni, “Pe wuniaŋ te carolok man? Wubiniaŋ niŋniŋ carolok ducu?
\v 14 Lacoc coyo lok pa Lubaŋa.
\v 15 Magi gin aye jo ma i ŋet yo, ka ma lok gicoyo iye; ka guwinyo, cutcut Catan bino, kwanyo lok ma gicoyo i igi woko.
\v 16 Kit meno magi gin aye ma gicoyo i ŋom ma obedo pata; gin ka guwinyo, oyotoyot gimako lok ki yomcwiny;
\v 17 ento pe gitye ki lwitgi i igi, giri pi kare manok; ka can obino, nyo libo dano ocakke, pi lok meno, cutcut gipoto woko.
\v 18 Tye mukene ma gicoyo i kin okuto; gin aye jo ma giwinyo lok,
\v 19 ce paro lok me lobo man, ki maro lonyo, ki miti me jami mukene, ka odonyo i cwinygi ci diyo lok, pe nyak.
\v 20 Ento maca ma gicoyogi i ŋom maber-ri, gin aye jo ma giwinyo lok, ci gigamo, ginyako nyiggi, mukene pyeradek, mukene pyerabicel, mukene miya.”
\p
\v 21 Lacen openyogi ni, “Tara mono gikelo i ot me auma ki aduku, nyo me aketa i te kitanda? Pe gicibo i wi okar?
\v 22 Pien pe tye gin mo ma okanne ma pe biŋene, kadi gin ma giumo ma pe binen kamaleŋ.
\v 23 Ka ŋatti mo tye ki it me winyone, owiny.”
\p
\v 24 Owaco botgi ni, “Wugwokke i kom lok ma wuwinyo; kit gin mo ma wupimo kwede-ni, en aye gibipimo ki mewu bene, dok gibimedone botwu.
\v 25 Pien ŋat ma mere tye, gibimedde, ŋat ma mere pe gibikwanyo woko ki bote kadi wa gin ma en tye kwede ducu.”
\p
\v 26 Yecu owaco ni, “Ker pa Lubaŋa tye kit man, macalo dano ma coyo kodi i ŋom.
\v 27 En buto piny i dyewor, dok a i dyeceŋ, ci kodi cako twi, doŋo, kun en pe ŋeyo kit ma timme kwede.
\v 28 ŋom kene aye miyo kodi nyako nyige; mukwoŋo koŋ twi, lacen ŋok, ka nyig bel corre.
\v 29 Ento ka bel ocek, ci dano cako kayone cut, pien noŋo kare me kayo bel doŋ oromo.”
\p
\v 30 Dok owaco ni, “Wabiporo ker pa Lubaŋa ki kit gin aŋo? Nyo wabinyuto ki kit carolok aŋo?
\v 31 Ker pa Lubaŋa rom ki kodi dek karadali; ka gicoyo i ŋom, kadi bed en tidi twatwal makato kodi ducu ma i wi lobo-ni,
\v 32 ento ka gicoyo, ci doŋo, doko dit makato dek ducu, jaŋe jany madito, miyo winyol me polo twero gero odigi i te tipone.”
\p
\v 33 Otito botgi lok i carolok mapol calo meno, kit ma gitwero niaŋ kwede.
\v 34 Pe oloko kwedgi laboŋo carolok, ento ka en tye ki lupwonnyene, ci gonyo te lok ducu botgi.
\p
\v 35 I nino meno ka piny doŋ oyuto, Yecu owaco botgi ni, “Wakatu loka ca.”
\v 36 Guweko lwak, ci gukwaŋo en ki yeya ma onoŋo en tye iye-ni; ki yeya mukene bene onoŋo tye kacel kwedgi.
\v 37 Yamo madwoŋ ocako kodo, pii otwagge, ocorre i yeya, omiyo i yeya ocako poŋ woko.
\v 38 Ento en onoŋo tye i tik yeya, kun onino i kom laten-wic. Gucoye, guwacce ni, “Lapwony, in pe iparo? Nen, wato woko do.”
\p
\v 39 En ocako co woko ci ojuko yamo, owaco ki nam ni, “Liŋ, pye mot.” Yamo ocako kwe, nam oliŋ mot.
\v 40 Openyogi ni, “Piŋo wulwor kit man? Wun pe wutye ki niye?”
\p
\v 41 Gubedo ki lworo madwoŋ, ci gucako penye kekengi kun giwaco ni, “Man aŋa kaa, ma yamo ki nam giwinye-ni?”
\c 5
\cl Chura 5
\p
\v 1 Gubino i loka nam tuŋcel, i lobo pa Lugeraca.
\v 2 Ka Yecu okato woko ki i yeya, ci cutcut dano mo ma tye ki cen marac obino bote, ma oa ki i kabedo ka ma giyiko iye jo muto.
\v 3 En bedo i kin lyel, pe tye dano mo ma twero tweyo en kadi ki nyor;
\v 4 pien yam gitweye tyen mapol ki atego ki nyor, ento ocodo nyor, oturo atego woko, pe tye dano mo ma tye ki tek ma loye.
\v 5 Nino ducu, dyewor ki dyeceŋ, en bedo i kin lyel ki i wi cere kun kok, dok ŋolo kome kene ki kidi.
\v 6 Ka oneno Yecu ki ka mabor, ci oriŋo, oryebbe i nyime, owore.
\v 7 Ci odaŋŋe ki dwan maloŋo ni, “Ilaro aŋo kweda, Yecu Wod pa Lubaŋa Mamalo Twal? Alami ki nyiŋ Lubaŋa, pe iyela.”
\v 8 Pien onoŋo ocike ni, “A woko ki i kom dano man, in cen marac.”
\p
\v 9 Yecu openye ni, “Nyiŋi aŋa?” Ogamo ni, “Nyiŋa Legion, pien wapol.”
\v 10 En obako doge bote matek ni, pe myero ocwal cen maraco woko ki i lobo meno.
\v 11 Lwak opego mapol onoŋo gitye ka cam i kor got kunnu;
\v 12 gubako doggi bote kun giwaco ni, “Cwalwa i opego, wek wadony i igi.”
\v 13 Yecu oyegi. Cen maraco gua, gudonyo i opego, lwak opego ma gimito romo ka alip aryo, gutwarre ki ŋwec gucorre i loŋo got, gumwony woko i nam.
\p
\v 14 Lukwat guriŋo gutito lokke i gaŋ madit, ki i kin paco. Dano mapol gumol gubino ka neno gin ma otimme.
\v 15 Gubino bot Yecu, guneno dano ma yam tye ki cen maraco, obedo piny, oruko boŋo, odoko ryek, en ma yam onoŋo tye ki buca mony me cen maraco; lworo ocako makogi.
\v 16 Jo ma guneno gutito botgi lok ducu ma otimme i kom dano ma yam tye ki cen maraco, ki gin ma otimme i kom opego-gu.
\v 17 Gubako doggi bot Yecu ni myero oa woko ki i lobo tugi.
\p
\v 18 Ka en tye ka ito i yeya, ci dano ma yam tye ki cen maraco obako doge bot Yecu ni myero ebed bote.
\p
\v 19 Ento Yecu okwero woko, owacce ni, “Dok paco bot lutuwu, icitit gin madit ma Rwot otimo i komi, ki kit ma otimi kwede kica.”
\v 20 En ocito, ocako tito lok madit ma Yecu otimo i kome i Dekapoli, omiyo jo ducu guuro.
\p
\v 21 Ka Yecu doŋ okato loka nam tuŋ ca, lwak madwoŋ gucokke bote; en obedo i dog nam.
\v 22 ŋat acel ma i kin ludito me kacokke ma nyiŋe Yairo obino; ka onene, ci oryebbe piny ka tyene,
\v 23 obako doge bote matek ni, “Nyara matidi mito to woko. Bin iket ciŋi i kome wek ocaŋ, obed makwo.”
\v 24 Yecu ocito kacel kwede, kun lwak madwoŋ gilube, kun gidiye.
\p
\v 25 Onoŋo tye dako mo ma yam otwoyo two agobi mwaka apar wiye aryo.
\v 26 En olimo can madwoŋ ki bot ludaktar mapol; olanyo limme ducu pe okonye ento twone medde ameda.
\v 27 Ka owinyo lok i kom Yecu, obino ki i yo ŋeye ki i kin lwak, ci ogudo dog ginarukane.
\v 28 pien otamo ni, “Ka agudo kadi kom ginarukane keken, ci abicaŋ.”
\v 29 Oyotoyot two agobine ocaŋ woko, ci oŋeyo ki i kome kene ni doŋ ecaŋ woko ki i twone.
\p
\v 30 Ka Yecu oŋeyo ki i kome ni tek oa ki i kome, ci olokke i dye lwak cut, openyo ni, “Aŋa ma ogudo ginarukana?”
\p
\v 31 Lupwonnyene gugamo ni, “Ineno lwak tye ka diyo in, ka dok pud ipenyo ni, ‘Aŋa ma oguda?’”
\v 32 Ci olworo waŋe wek enen ŋat ma ogude-ni.
\p
\v 33 Ci dako meno, ka oŋeyo kit gin ma otimme i kome, obino bot Yecu ki lworo, kun kome myel, oryebbe i nyime, otitte lok ducu me ada.
\v 34 Yecu owacce ni, “Nyara, niyeni ocaŋi; wot ki kuc, twoni doŋ otyeko caŋ matwal.”
\p
\v 35 Ma kun en pud loko, jo mogo gubino ma gua ki i ot pa ladit me kacokke, guwaco ni, “Nyari doŋ oto woko, pud dok iyelo Lapwony piŋo?”
\p
\v 36 Yecu pe oketo cwinye i kom lok ma guwaco, ento ociko ladit me kacokke ni, “Pe ilwor, in iye meri ayeya keken.”
\v 37 Pe oye dano mo olube, kono nyo Petero ki Yakobo ki Jon omin Yakobo keken.
\v 38 Gubino i ot pa ladit me kacokke, Yecu oneno lwak ma giwo, kun gikok ma gidaŋŋe matek.
\v 39 Ka odonyo i ot, openyogi ni, “Piŋo wuwo ki koko? Latin man peya oto, ento onino anina.”
\v 40 Gunyere matek, ci oryemogi ducu woko, ocako tero won latin ki minne ki jo ma onoŋo gitye kacel kwede, gudonyo ka ma latin tye iye.
\v 41 Omako ciŋe, owacce ni, “Talita kum”, te lokke ni, “Latin anyaka, awacci ni, a malo.”
\v 42 Oyotoyot nyako oa malo, owoto, pien onoŋo mwaka me ditte doŋ romo apar wiye aryo. Guuro matek twatwal.
\v 43 Yecu ocikogi matek ni ŋatti mo pe myero oŋe lok man; ocikogi ni gimi ki nyako-nu cam mo ocam.
\c 6
\cl Chura 6
\p
\v 1 Yecu oa woko ki kunnu, odok i lobo tugi, lupwonnyene gulube.
\v 2 Ocako pwonyogi i kacokke i ceŋ cabit. Jo mapol ma guwinye, guuro, kun giwaco ni, “Laco man onoŋo ryeko man ducu ki kwene? Kit ryeko aŋo ma gimiye-nu? Dok kit tic aŋo matek madito ma rom man ma en tiyogi-ni?
\v 3 Man pe lapac, wod pa Maliam, omin Yakobo, ki Yoce, ki Juda ki Cimon? Dok nyimegine pe gitye botwa kany?” Ci cwinygi ocako a woko i kome.
\p
\v 4 Yecu owaco ni, “Lanebi giketo deyo i kome, ento pe giketo deyo i kome ki i lobo tugi ki i kin jo tugi, ki i ode.”
\p
\v 5 Pe otwero tiyo tic matego kunnu, ento oketo ciŋe i kom lutwo mogo, ocaŋogi.
\v 6 Yecu ouro pien pe gitye ki niye. En obedo ka wirre i kin gaŋi kun pwonyo dano.
\p
\v 7 Yecu olwoŋo bote jone apar wiye aryo, ci oorogi ki aryo aryo, omiyogi twero i kom cen maraco.
\v 8 Ocikogi matek ni pe guwot ki gin mo, kono odoo keken, laboŋo cam mo, kadi kicaa, kadi lim mo i del pyergi;
\v 9 ento guwot kun giruko war tyengi, pe guwot ma gubamo kanyi aryo i komgi.
\v 10 Ocikogi ni, “Ka wudonyo i ot mo, wubed kenyo nio ka wubia ki i kabedo meno.
\v 11 Kabedo ducu ma pe bijolowu, ma pe biwinyowu, ka ce wubia woko ki kunnu, ci wuteŋ apwa woko ki i tyenwu wek obed caden botgi.”
\v 12 Kit meno gucako cito, gutito lok ni myero dano oŋuti.
\v 13 Guryemo lwak cen mapol, dok guwiro lutwo mapol ki moo kun gicaŋogi.
\p
\v 14 Kabaka Kerode owinyo pire, pien onoŋo nyiŋ Yecu doŋ oywek twatwal. Jo mogo guwaco ni, “Jon Labatija aye ocer woko ki i kin jo muto; en aye mumiyo lakit teko macalo meno tye ka tic i kome.”
\v 15 Ento jo mukene guwaco ni, “En Elia”, jo mukene ni, “En lanebi, cal ki ŋat mo i kin lunebi macon.”
\p
\v 16 Ka Kerode owinyo pire ci owacci, “Jon ma yam atoŋo wiye en aye ocer woko.”
\p
\v 17 Pien Kerode yam ooro dano, gumako Jon, gutweyo i mabuc, pi Kerodia ci-ominne, dako pa Pilipo, ma yam okwanyo me bedo dakone.
\v 18 Pien Jon owaco bot Kerode ni, “Cik pe oye ni ibed ki ci-omeru.”
\v 19 Kerodia obedo ki keccwiny i kome, omito neke woko, ento pe otwero,
\v 20 pien Kerode onoŋo lworo Jon, kun ŋeyo ni en dano ma kite atir, ki maleŋ, ci obedo ka gwoke maber. Ka owinyo lok ma en otito, lokke otwoyo doge woko, ento pire obedo mit bote ka winyo lokke.
\p
\v 21 Ento kare maber oromo i nino ma Kerode oyubo iye karama me po pi nywale, ci olwoŋo iye luditone ki lutel-wi-lweny ki ludoŋo me Galilaya.
\v 22 Nya pa Kerodia odonyo i ot omyelo, ci oyomo cwiny Kerode ki welone. Kabaka owaco bot nyako ni, “Legga gin ducu ma imito, abimiyi.”
\v 23 Okwoŋo akwoŋa kun wacce ni, “Gin ducu ma ibilegga abimiyi, kadi bed nucu kerra.”
\p
\v 24 Nyako okato woko, openyo minne ni, “Abilego gin aŋo?” Odok iye ni, “Leg wi Jon Labatija.”
\p
\v 25 Oyotoyot odwogo i ot bot kabaka ki mit kome, olege ni, “Amito imiya wi Jon Labatija i weer kombeddi.”
\v 26 Kabaka okumo matek, ento pi kwoŋŋe ki pi welone omiyo pe omito twonne.
\v 27 Oyotoyot kabaka ooro askari ma lakur, ocike ni okel wi Jon. Ocito oŋolo ŋute ki i ot mabuc,
\v 28 okelo wiye i weer, omiyo bot nyako; nyako omiyo bot minne.
\v 29 Ka lupwonnye pa Jon guwinyo pire, gucito gutiŋo kome, guyiko i lyel.
\p
\v 30 Lukwena gudwogo bot Yecu gutitte lok ducu ma gutiyo ki ma gupwonyo.
\v 31 En owaco botgi ni, “Wubin kenwu ka ma dano pe iye, wuywe manok.” Pien jo mapol onoŋo gibedo ka bino, gidok cen, kun gigwennye agwenya, omiyo pe gubedo ki kare mo me cam.
\v 32 Gucito kengi ki yeya i kabedo ma dano pe iye.
\v 33 Jo mapol gunenogi ka gicito, guŋeyogi, ci guriŋo kunnu ki tyengi kun gia ki i gaŋi ducu; gin aye gukwoŋo o kunnu wiati.
\v 34 Ka Yecu okato i wi tera, oneno lwak madwoŋ; kica ocako make i komgi, pien gitye macalo romi ma gipe ki lakwat; ci opwonyogi ki lok mapol.
\p
\v 35 Ka oo otyeno, lupwonnyene gubino bote guwacce ni, “Kabedo man tye i dye tim, cawa bene doŋ okato.
\v 36 Cwal lwak gucit i kin paco ki i gaŋi ma cokcok, guwil ginacama pigi kengi.”
\p
\v 37 Ento en odok iye ni, “Wun aye wumigi ginacama.” Gin gugamo ni, “Wacit wawil kwon me ciliŋ miya aryo, wami botgi wek gucam?”
\p
\v 38 Ento en openyogi ni, “Wutye ki mugati adi? Koŋ wucit wunen.” Ka guŋeyo guwacce ni, “Abic, ki rec aryo.”
\v 39 Yecu ociko jo ducu ni gubed piny i dul ki dul, i kom lum alita.
\v 40 Kit meno lwak gubedo piny i dul ki dul, miya miya, ki pyerabic pyerabic.
\v 41 Okwanyo mugati abic ki rec aryo, oneno malo i polo olego gum, obaro i mugati, omiyo ki lupwonnyene wek guket i nyim lwak; dok opoko rec aryo i kingi ducu.
\v 42 Gin ducu gucamo, guyeŋ
\v 43 Gicoko ŋide mugati ma obaro-nu mudoŋ, ki rec bene, opoŋo aduku apar wiye aryo.
\v 44 Jo ma gucamo mugati giromo co alip abic.
\p
\v 45 Oyotoyot Yecu ociko lupwonnyene ni gudony i yeya, gukwoŋ nyime me cito loka ca, wa i Betecaida, kun en pud ciko lwak.
\v 46 Ka doŋ ocikogi, ci ocito i wi got ka lega.
\v 47 Ka piny oyuto, yeya onoŋo doŋ tye wa i dye nam, en kene aye onoŋo tye i wi tura.
\v 48 En onenogi kun gicanne ki cero yeya, pien onoŋo yamo kodo bino ki i nyimgi. I kine me koko gweno, en ocako bino botgi kun woto i wi nam ki tyene. Omito katogi akata,
\v 49 ento ka gunene kun woto i wi nam ki tyene, gutamo ni gwok nyo tipo, ci gudaŋŋe matek;
\v 50 pien gin ducu gunene, ci tipo komgi oto woko. Ento oyotoyot oloko kwedgi kun waco ni, “Wudi cwinywu. An enni; gwok wulwor.”
\v 51 Odonyo botgi i yeya, ci yamo oliŋ mot. Gin guuro matek twatwal ki i cwinygi,
\v 52 pien nakanen pe guniaŋ lok ma i kom mugati, ento cwinygi pud obedo nwaŋ.
\p
\v 53 Ka doŋ gukato loka ca, ci gukato wi tura i lobo Genecaret, gutweyo yeya kunnu.
\v 54 Ka gutyeko a woko ki i yeya, ci lwak guŋeyo Yecu oyotoyot.
\v 55 Gucako riŋo gurumo kabedo ducu ma tye kunnu, kun gikelo lutwo ma gutiŋogi ki kitara, giterogi i kabedo ducu ma guwinyo ni en tye kunnu.
\v 56 I kabedo ducu ma yam en obino iye, i kin paco-gu, ki i gaŋi-gu, ki i kin caro, gipyelo lutwo wa i cuk-gu, kun gibako doggi bote ni oye wek gugud kadi dog ginarukane keken; ci lutwo ducu ma gugudo gucaŋ.
\c 7
\cl Chura 7
\p
\v 1 Luparicayo ki lupwony-cik mogo ma gua ki i Jerucalem gucokke bot Yecu.
\v 2 Guneno jo mogo ma i kin lupwonnyene ma pe gilubo kwer, ento gicamo ma pe gulogo ciŋgi.
\v 3 Pien Luparicayo ki Lujudaya ducu ka pe gulogo ciŋgi kakare pe gicamo, pien gumako kit pa ludoŋo
\v 4 Ka gudwogo ki i cuk pe gicamo, nio ka gulwokke. Dok gitye ki lwak kit kwer mapol ma gilubo, macalo kit me lwoko kikopo-gu ki agulu-gu ki jami mola-gu ducu.
\p
\v 5 Luparicayo ki lupwony-cik gupenyo Yecu ni, “Piŋo lupwonnyeni pe gilubo kit kwer pa ludoŋo? Piŋo gicamo ki ciŋgi ma pe gulogo ma lubo kwer?”
\p
\v 6 Yecu odok iye botgi ni, “Wun lugoba, Icaya con oloko i komwu kakare, macalo en ocoyo ni Lubaŋa owacci, ‘Rok man kara giwora ki doggi nono, ento cwinygi pe i koma wacel;
\v 7 giwora nono, pwony ma gipwonyo obedo pwony ma mako kit pa dano.’
\p
\v 8 Wuweko cik pa Lubaŋa, kun wuketo cwinywu ka lubo kit pa dano.”
\v 9 Yecu dok owaco botgi ni, “Wutimo ber pi kwero cik pa Lubaŋa, wek wulub giwu kit cikwu!
\v 10 Moses yam owacci, ‘Wor woru ki meni’; dok ni, ‘Ka ŋatti mo oceno wonne nyo minne, gibineke woko’;
\v 11 ento wun wuwaco ni, ‘Ka dano mo owaco ki wonne nyo minne ni, Gin ma kono akonyi kwede en lim me Korban’ (te lokke ni, gin ma gimiyo ki Lubaŋa),
\v 12 en pe dok omi lim mo me konyo wonne nyo minne,
\v 13 kun wumiyo lok pa Lubaŋa doko goro, pien wupwonyo dano ni gulub kit cikwu. Dok wutiyo bene gin mapol macalo meno.”
\p
\v 14 Yecu dok olwoŋo lwak bote, ci owaco botgi ni, “Wun ducu wuwiny lokka, ci wuniaŋ.
\v 15 Pe tye gin mo ma donyo i i dano ma oa ki woko ma twero balo en, ento gin ma a ki i dano en aye balo dano.
\v 16 Ma tye ki it me winyone, ci owiny.”
\p
\v 17 Ka oweko lwak woko, ci odonyo i ot, lupwonnyene gucako penye pi carolok meno ma obolo-ni.
\v 18 En ogamo ni, “Kara wun bene peya wuniaŋ tere bo? Pe wuŋeyo ni, gin ducu ma donyo i dano ma a ki woko pe twero balo en?
\v 19 Pien pe odonyo wa i cwinye, ento wok kato i cin iye, ci kato woko.” (Ka otyeko wacone ki meno, nyuto ni olonyo kwa cam ducu.)
\v 20 Yecu dok owaco ni, “Gin ma a ki i dano aye balo dano.
\v 21 Pien gin ma a ki i cwiny dano, en aye bedo tam maraco, cot, kwalo kwo, nek, abor,
\v 22 paro lim, bal maraco, bwolo dano, kwele, nyeko, yet, wakke ki miŋo.
\v 23 Tim magi maraco-ni ducu gia ki i cwiny dano, gin aye gibalo dano.”
\p
\v 24 Yecu ocako a ki kunnu, ocito wa i lobo ma tye cok ki Turo ki Cidon. Ci odonyo i ot mo kunnu; onoŋo en pe mito ni ŋatti mo oŋe ni etye kunnu, ento pe twero kanne.
\v 25 Cutcut dako mo ma nyare tye ki cen marac owinyo pire, ci obino oryebbe ka tyene.
\v 26 Dako-nu onoŋo Lagrik, ma rokke Curo-Poiniki. Ocako lego Yecu ni oryem cen woko ki i kom nyare.
\v 27 Yecu owacce ni, “Koŋ iwek litino gukwoŋ yeŋ, pe ber gikwany cam pa litino, gibol ki gwogi.”
\p
\v 28 Dako-nu odok iye ni, “Rwoda, meno iwaco kakare; kadi bed kumeno ci litino gwogi ma gitye i te meja gin bene gicamo ŋide cam pa litino do.”
\p
\v 29 Yecu owacce ni, “Pi lok ma iloko-ni, ber doŋ idok paco, cen doŋ otyeko a woko ki i kom nyari.”
\v 30 En odok paco, ci onoŋo latin tye obuto i wi kitanda, ma cen doŋ otyeko a woko ki i kome.
\p
\v 31 Yecu oa ki i lobo ma cokcok ki Turo, ci owok ki i cidon, ka okato ocito wa i nam Galilaya, ka otuc kwede wa i dye lobo Dekapoli.
\v 32 Ci gikelo bote dano ma ite odiŋ ma te lebe oto, gucako bako doggi bote ni oket ciŋe i kome.
\v 33 Yecu ocako mako en ki i kin lwak otere cen i muŋ, ci oketo ciŋe i it dano meno, ka oŋulo laa ci ogudo lebe;
\v 34 ocako neno malo i polo, ocur, kun waco ni, “Eppata”, te lokke ni, “Yabbe.”
\v 35 Ite oyabbe woko ki te lebe bene ogonnye, ocako lok atir.
\p
\v 36 Yecu ocikogi ni pe gutit ki ŋatti mo; ento kadi bed ocikogi kumeno, gin bene gumedde ameda ki tito pire.
\v 37 Gin gubedo ka urone makato ducu, ma kun giwacci, “En otimo gin ducu maber; pien omiyo jo ma itgi odiŋ giwinyo lok, ki jo ma te lebgi oto giloko.”
\c 8
\cl Chura 8
\p
\v 1 I kare meno, ka lwak dok gucokke mapol, kun pe gitye ki camgi, ci Yecu olwoŋo lupwonnyene bote, ocako waco botgi ni,
\v 2 “Kica maka i kom lwak man, pien gutyeko bedo kweda kany pi nino adek ma kun pe gitye ki camgi mo.
\v 3 Ka acwalogi ni gudok wa tugi ki kec, ci kec bibwoyogi woko i yo, pien jo mukene i kingi gua ki ka mabor.”
\p
\v 4 Lupwonnyene gudok iye ni, “Kara man, dano twero miyo mugati ma romo dano-ni i tim kany niŋniŋ?”
\p
\v 5 Yecu openyogi ni, “Wutye ki mugati adi?” Gugamo ni, “Abiro.”
\p
\v 6 Ociko lwak ni gubed piny i ŋom, ci omako mugati abiro-nu, opwoyo, ka obaro igi, ocako miyo bot lupwonnyene guket i nyimgi, ci guketo i nyim lwak.
\v 7 Onoŋo gitye ki rec matino manok bene; ka doŋ olego iye gum, ociko ni magi bene myero giket i nyimgi.
\v 8 Lwak gucamo nio ka guyeŋ; gucako coko ŋide cam ma oloyogi-ni, oromo adita abiro mupoŋ.
\v 9 Jo ma onoŋo gitye kunnu welgi romo jo alip aŋwen.
\v 10 Ka ociko lwak, ci odonyo i yeya cutcut kacel ki lupwonnyene, ocito wa i lobo Dalmanuta.
\p
\v 11 Luparicayo gubino bot Yecu ci gucako pyem kwede, kun gimito lanyut ma a ki bot Lubaŋa, me laom iye.
\v 12 Yecu ocur ki i cwinye matek kun wacci, “Piŋo yalwak me kare man gimito lanyut? Adada, awacciwu ni, pe gibimiyo lanyut mo bot yalwak me kare man.”
\v 13 Yecu oa woko ki botgi, ci odonyo i yeya, oŋolo nam okato wa loka ca.
\v 14 Lupwonnyene wigi onoŋo owil woko ka tero mugati, onoŋo gitye kimugati acel keken i yeya.
\v 15 Yecu ocikogi matek twatwal kun wacci, “Wugwokke i kom tobi pa Luparicayo ki tobi pa Luparicayo ki tobi pa Kerode.”
\p
\v 16 Lupwonnye gubedo ka laro lok kekengi kun giwacci, “Pe watye ki mugati.”
\p
\v 17 Ka Yecu oŋeyo ci openyogi ni, “Piŋo wubedo ka laro lok ni pe wutye ki mugati? Peya wuniaŋ ce? Pe wumako maber? Cwinywu pud nwaŋ?
\v 18 Wutye ki waŋwu, ci pe wuneno kwede? Wutye ki itwu, pe wuwinyo kwede? Wun pe wupo ce?
\v 19 Ka yam abaro i mugati abic pi jo alip abic-ci, ci wucoko ŋide aduku adi?” Gugamo ni, “Apar wiye aryo.”
\p
\v 20 “Ka yam abaro i mugati abiro pi jo alip aŋwen-ni, onoŋo wucoko ŋide opoŋo adita adi?” Dok gugamo ni, “Abiro.”
\v 21 En openyogi ni, “Peya wuniaŋ aye?”
\p
\v 22 Gin gucako bino i Betecaida, ci jo mogo gukelo bote dano ma waŋe oto woko, gubako doggi ni oboŋ kome.
\v 23 Yecu ocako mako ciŋ lawaŋe-oto, ci otere woko wa i ŋe gaŋ; ci oŋulo laa i waŋe, ka dok oketo ciŋe i kome, openye ni, “Ineno gin mo doŋ?”
\p
\v 24 Laco meno otiŋo waŋe malo, ocako waco ni, “Aneno kom dano; ento pud ginen macalo yadi ma woto.”
\v 25 Yecu dok onwoyo keto ciŋe i waŋ lawaŋe-oto; ci ociko waŋe matek, waŋe odok kakare ma neno piny maber.
\p
\v 26 Yecu ocwalo en wa i paco tugi, kun cike ni, “Pe idony i gaŋ kunnu.”
\p
\v 27 Yecu ki lupwonnyene gucito i kin gaŋi me Cecaria Pilipi. I kare ma gitye i yo, openyo lupwonnye mere ni, “Dano mono giwacci an aŋa kaa?”
\v 28 Guwacce ni, “Jon Lubatija; jo mogo giwacci, ‘Elia’, ki jo mukene ni in ŋat acel i kin lunebi.”
\p
\v 29 Dok openyogi ni, “Ento wun kono wulwoŋa mono ni an aŋa?” Petero ogamo ni, “In i Kricito ma Lubaŋa oyero.”
\p
\v 30 Yecu ociko matek ni pe gitit pire ki dano mo.
\p
\v 31 Yecu ocako pwonyo lupwonnye mere ni, “Wod pa dano myero olim can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento en cako cer woko i ŋe nino adek.”
\v 32 Yecu oloko lok meno atyer ka maleŋ. Petero otero en cen, ocako juke matek.
\v 33 En olokke bot lupwonnyene ci oloko ki Petero matek, kun wacci, “Dok cen i ŋeya, in Catan! Pien tammi pe lubo pa Lubaŋa, ento pa dano.”
\p
\v 34 Yecu olwoŋo lwak bote kacel ki lupwonnyene, ci otito botgi ni, “Ka ce dano mo mito lubo kora, myero okwoŋ kwerre kekene, ka ocak tiŋo yatariyane, olub ki kora.
\v 35 Pien dano ma mito laro kwone birwenyone arwenya, ento ka dano mo orwenyo kwone pira ki pi lok me kwena maber, en aye bilaro kwone.
\v 36 Konyo dano ma olimo lobo ducu ki gin aŋo mono, ka ce kwone gikwanyo woko?
\v 37 Dano dok bimiyo kit gin aŋo ma ka kwone?
\v 38 Ka ce dano mo lewic omake i koma ki i lokka i kare man me bal ki weko Lubaŋa, Wod pa dano bene lewic bimake i kome i kare ma en bidwogo ki deyo pa Wonne kacel ki lumalaika maleŋ.”
\c 9
\cl Chura 9
\p
\v 1 Dok oloko botgi, ni “Adada awacciwu ni, tye jo mogo ma gucuŋ i kinwu kany ma pe gibibilo to wacel, nio waŋ ma guneno ka ker pa Lubaŋa doŋ otyeko bino ki tek.”
\p
\v 2 Ka nino okato abicel, ci Yecu otero Petero ki Yakobo ki Jon, ocako yito kwedgi i wi got mabor i muŋ gin kengi. Kome ocako lokke i nyimgi,
\v 3 ginarukane odoko tar ma wil, matar dok twatwal; pe tye lalwok boŋo mo i wi lobo ma twero lwoko lony matar ma rom meno.
\v 4 Ci Elia ki Moses gucako nen botgi, gubedo ka lok ki Yecu.
\v 5 Petero ocako penyo Yecu ni, “Lapwony, bedo kany ber mada; wek doŋ wager aduc adek, acel meri, acel pa Moses, ki acel pa Elia.”
\v 6 Onoŋo Petero pe doŋ ŋeyo kit gin ma myero eloki, pien onoŋo lworo omakogi mada.
\p
\v 7 Pol ocako bino ci tipone oumo komgi woko lipuk, ci dwan owinnye ki i pol, ma wacci, “Man aye Woda ma amaro; wuwinye.”
\v 8 Lupwonnye gucako ŋiyo piny oyotoyot, ci waŋgi pe omedo ki neno dano mo, guneno kom Yecu ma tye kwedgi-ni keken.
\p
\v 9 I kare ma doŋ gitye ka lor piny ki i wi got, Yecu ocikogi ni pe gutit lokke bot dano mo i kom gin ma guneno, nio waŋ ma Wod pa dano ocer ki i kin jo muto.
\v 10 Lupwonnye gumako lok meno, gubedo ka penye kekengi ni, “Cer ki i kin jo muto kono te lokke aŋo?”
\p
\v 11 Gucako penyo Yecu ni, “Piŋo lupwony-cik guwacci, Elia aye koŋ kwoŋo bino?”
\p
\v 12 Yecu otito botgi ni, “Adada Elia aye myero okwoŋ bino, ka wek ocaka dwoko jami ducu obed kakare. Ento lok man dok gicoyo i kom Wod pa dano piŋo kaa, ni, myero en koŋ olim can madwoŋ, ka dok ni, gibicaye matek?
\v 13 Ento doŋ atito botwu atir ni Elia doŋ otyeko bino wa con, ci gutyeko timo gin ma gimito i kome, macalo yam gicoyo i kome.”
\p
\v 14 Ka gubino piny bot lupwonnye mukene, ci guneno lwak mapol gurumogi dyere, kun lupwony-cik gitye ka pyem kwedgi.
\v 15 Ka lwak guneno Yecu, guuro en mada, gutwarre oyotoyot guriŋo ka mote.
\v 16 Yecu openyogi ni, “Wubedo ka pyem kwedgi pi lok aŋo?”
\p
\v 17 Ci dano mo acel ki i kin lwak ogamo doge ni “Lapwony, wayi onoŋo akelo woda boti. En tye ki cen marac ma pe loko,
\v 18 ka tekke cen omako i kabedo mo, ci tugi retone woko piny likuŋ, ci bwoyo yenyo i doge, cako kayo lake-gu matek, kun poyo kome lirikrik. Apenyo lupwonnyeni ni guryem woko, ci ryemone oloyogi.”
\p
\v 19 Yecu ocako gamo ni, “Wun yalwak ma niyewu lam, abibedo kwedwu nio wa awene? Dok abidiyo cwinya i komwu nio wa awene ba? Wukel en bota kany.”
\v 20 Gukele bot Yecu. Ka cen marac-ci onene, ci oyeŋo kom awobi-nu, orete woko piny; ocako ŋenne i ŋom ma kun bwoyo yenyo i doge-gu.
\v 21 Yecu openyo wonne ni, “Two man obedo ka timme kit man pi lwak kare ma rom mene?” Wonne ogamo ni, “Nia wa ka tinone.
\v 22 Otemo neke woko tyen mapol; kine mogo rete i mac kadi wa i pii-gu. Ka ce itwero timo iye gin mo, ci tim ber, ikonywa do.”
\p
\v 23 Yecu ogamo doge ni, “Ka ce atwero? Gin ducu twerre ki bot dano ma ye Lubaŋa.”
\p
\v 24 Won latin ogamo doge oyotoyot kun daŋŋe matek ni, “Aye; kony niyena ma lam-mi.”
\p
\v 25 Ka Yecu oneno lwak giriŋo gibino bote, ogerre i wi cen marac, kun wacce ni, “In cen ma pe loko-ni, ma iti odiŋ-ŋi, aciki ni, a woko ki i kom awobi-nu, pe dok idwog i kome matwal.”
\p
\v 26 En okok, ci ocako ryene aryeya ki tek, ka oa woko i kome. Awobi-nu koŋ obedo macalo dano muto, omiyo jo mapol doggi ocer ni, “En doŋ oto woko ada.”
\v 27 Ento Yecu omako ciŋe, oile kwede malo, ci en ocuŋ.
\p
\v 28 Ka Yecu odonyo i ot, ka ma gubedo iye kengi, ci lupwonnyene gupenye ni, “Gin aŋo mugeŋowa ryemone?”
\p
\v 29 En owaco botgi ni, “Kit cen macalo man pe ryemme pi gin mo, ento ki lega keken.”
\p
\v 30 Gua woko ki kunnu, guŋolo ki i Galilaya. Yecu pe omito ni dano mo oŋe pire,
\v 31 pien onoŋo en tye ka pwonyo lupwonnyene kun waccigi ni, “Wod pa dano gibimiye i ciŋ dano; gibineke woko, ci en bicer woko i ŋe nino adek.”
\v 32 Ento gin pe guniaŋ kit lokke-nu, dok gulworo penye.
\p
\v 33 Gibino i Kapernaum. Ka gitye i ot, Yecu ocako penyogi ni, “Wubedo ka laro lok aŋo i waŋayo kekenwu-ni?”
\v 34 Gin guliŋ aliŋa, pien gubedo ka laro lok kekengi i waŋayo ni, “Aŋa ma ladit i kingi?”
\v 35 Yecu ka obedo piny ci olwoŋo jone apar wiye aryo, ocako waccigi ni, “Ka dano mo mito bedo mukwoŋo, myero en aye odoŋ cen i ŋe luwote ducu, en aye obed latic megi ducu.”
\v 36 Okwanyo latin mo, ci omiyo ocuŋ i kingi, ka otiŋo i kore ci okwako, ocako waco botgi ni,
\v 37 “Dano mo ma ojolo latin acel macalo man pi nyiŋa, meno rom ki ma ojolo an; ka dok dano ma ojolo an, meno rom ki ma ojolo ŋat muora-ni.”
\p
\v 38 Jon owaco bot Yecu ni, “Lapwony, waneno ŋatti mo ka tye ka ryemo cen ki nyiŋi, ma en pe nywako wot kwedwa, ci wajuke woko.”
\p
\v 39 Ento Yecu ogamo ni, “Pe wujuke; pien pe tye dano mo ma tiyo tic matek ki nyiŋa, ma twero waco lok mo marac i koma oyot.
\v 40 Pien ŋat ma pe lakworwa, en aye lawotwa.
\v 41 Adada awacciwu ni, dano mo ma bimiyowu pii me amata i kikopo, pien wun jo pa Kricito, limo motte pe biloyo en kadi matidi mo.
\p
\v 42 “Ka dano mo miyo ŋat mo acel ma i kin jo magi matino ma guye an-ni gupoto i bal, ci bedo ber makato ducu ka gitweyo kidi rego madit i ŋute ci gibole kwede wa i nam.
\v 43 Ka ce ciŋi aye omiyo ipoto i bal, ci toŋ iŋun woko, twara ma idonyo i kwo ma ciŋi lakucel peke, ber makato ma giboli i Geena ma itye ki ciŋi aryo ducu, kun idonyo kwedgi i mac ma pe to,
\v 44 ka ma kwidi ma camogi pe to, ki macce bene pe to.
\v 45 Ka ce tyeni aye omiyo ipoto i bal, ci toŋ woko, twara idonyo i kwo ma tyeni lakucel peke, ber makato ma kono giboli ki tyeni aryo i Geena,
\v 46 ka ma kwidi ma camogi pe to, ki macce bene pe to.
\v 47 Ka ce waŋi aye omiyo ipoto i bal, ci kol woko; twara ma idonyo i ker pa Lubaŋa ma waŋi lakucel, kato ma kono giboli ki waŋi aryo ducu i Geena,
\v 48 ka ma kwidi ma camogi pe to, ki macce bene pe to.
\p
\v 49 Pien kado ma bilonyo kom dano acel acel en aye mac.
\v 50 Kado ber, ento kado ka odoko bot, ci dok gibiyubo niŋniŋ wek odok mamit? Wubed ki kado i iwu, dok wubed ki kuc kekenwu.”
\c 10
\cl Chura 10
\p
\v 1 Yecu oa woko ki kunnu, ci obino wa i lobo Judaya ma loka Jordan, ci lwak dok gucokke bote; ocako pwonyogi doki, macalo kit pwonnye tye kwede.
\v 2 Luparicayo mogo gubino bote, ci gucako omo cwinye kun gupenye ni, “Cik miyo twero ni laco oryem dakone woko?”
\p
\v 3 Yecu ocako gamo doggi ma kun penyogi ni, “Moses yam ocikowu niŋniŋ?”
\p
\v 4 Gugamo ni, “Moses yam oye miyo twero ki laco ni myero omi waraga me laryem dakone woko, nyomgi oket woko.”
\p
\v 5 Yecu owaco botgi ni, “Moses omiyowu cik meno pi cwinywu manwaŋ.
\v 6 Ento nia i acakki keto lobo ‘Lubaŋa oketo laco ki dako.’
\v 7 ‘Pienno dano twero weko wonne ki minne, moko i kom dakone matwal.
\v 8 Ci gin aryo-nu gicako doko kom acel.’ Gin pe dok gibedo kom aryo, doŋ gibedo kom acel keken.
\v 9 Gin ma Lubaŋa oribo kacel dano pe opok kingi.”
\p
\v 10 Ka onoŋo gitye i ot, ci lupwonnyene gupenye i kom lok meno.
\v 11 En owaco botgi ni, “Ka dano mo oryemo dakone woko, ce dok onyomo dako mukene, lanyom meno otimo abor, noŋo obalo i nyim dakone;
\v 12 ki dako bene kit meno, ka ce oa woko ki bot cware dok ogero laco mukene, ci dako-nu otimo abor.”
\p
\v 13 Ka lwak gukelo litinogi bot Yecu ni wek en oboŋ komgi, ci lupwonnyene gujukogi.
\v 14 Ka Yecu oneno ci cwinye ocwer matek, ocako wacogi ni, “Wuwek litino gubin bota, pe wugeŋgi; pien ker pa Lubaŋa tye pi jo macalo gin.
\v 15 Adada awacciwu ni, dano ma pe oye ker pa Lubaŋa macalo latin, pe bidonyo i kerre kadi matidi mo.”
\v 16 Ocako tiŋogi i kore omiyogi gum, kun keto ciŋe i komgi.
\p
\v 17 Ka Yecu oa obino wa i yo, ci dano mo ocako riŋo i kore, ci orumo coŋe i nyime kun penye ni, “Lapwony maber, atim aŋo wek alim kwo ma pe tum?”
\p
\v 18 Yecu owaco ni, “Piŋo ilwoŋa ni aber? Pe tye dano mo maber, Lubaŋa kene aye ber.
\v 19 In iŋeyo cik, ni, ‘Pe ineki, Pe itim abor, Pe ikwal gin mo, Pe ibed caden me goba, Pe ibed, Pe ibum dano mo, Wor woru ki meni.’
\p
\v 20 En ocako gamo ni, “Lapwony, atyeko mako cik magi ducu nia wa i ka tinona.”
\p
\v 21 Yecu ociko waŋe onene ci cwinye omare, owacce ni, “Gin mo acel aye pud orem boti. Koŋ icit icat jamini ducu ma itye kwede ci imi limme ki lucan, ci ibibedo ki lwak lonyo ma gikano piri i polo. Ka doŋ ibin icak lubo kora.”
\v 22 Awobinu ka owinyo Yecu oloko bote kit meno, ci waŋe oballe woko, ocako dok cen ki cwercwiny, pien onoŋo en tye ki lwak limme madwoŋ.
\v 23 Yecu olworo waŋe ci owaco bot lupwonnyene ni, “Bibedo tek mada bot jo ma lulonyo me donyo i ker pa Lubaŋa!”
\v 24 Lupwonnyene guuro lokkenu matek. Yecu dok ocako wacogi ni, “Litino, donyo i ker pa Lubaŋa tek marac!
\v 25 Kinaga twero donyo i waŋ libira oyot, makato lalonyo me donyo i ker pa Lubaŋa!”
\p
\v 26 Ci omiyo lwak guuro matek, ci gupenyo ni, “Ka kumeno, ci aŋa dok ma larre?”
\p
\v 27 Yecu ocako nenogi, ci owacci, “Ki bot dano pe twerre, ento ki bot Lubaŋa twerre, pien gin ducu twerre ki bot Lubaŋa.”
\p
\v 28 Petero ocako wacce ni, “Ce wan kono ma waweko jamiwa ducu, ci walubi-ni?”
\p
\v 29 Yecu owacce ni, “Adada awacciwu ni, pe tye ŋatti mo ma oweko ode, nyo omege, nyo nyimege, nyo minne, nyo wonne, nyo litino, nyo pottine, pira ki pi lok me kwena maber,
\v 30 ma en pe bilimo lwak jami makato meno tyen miya i kare man, gin aye odi, omego, lamego, mego, litino, ki potti, kacel ki libo; ka dok wa i kare me anyim en binoŋo kwo ma pe tum.
\v 31 Lwak jo mapol ma gubedo jo mukwoŋo yo gin aye gibidoŋ cen, ki jo ma gudoŋ cen, gin aye dok bitelo yo.”
\p
\v 32 I kare ma gicito i yo ma cito Jerucalem, ma kun Yecu aye tye ka telogi yo, guuro matek, dok lupwonnyene gubedo ki lworo. En dok ocako tero lupwonnyene apar wiye aryo, ci otito botgi kit ma bitimme i kome,
\v 33 kun wacci. “Nen ba, wan doŋ watye ka ito malo i yo Jerucalem. Wod pa dano doŋ gibimiye i ciŋ ajwagi madito pa Lubaŋa ki lupwony-cik, gibiŋolle kop me to, ci gibimiye i ciŋ Lurok;
\v 34 giŋale, giŋulo laa i kome dok gibipwode ki del, ci gibineke; ento en bicer woko i ŋe nino adek.”
\p
\v 35 Yakobo ki Jon gin litino pa Jebedayo, gubino i nyim Yecu, ci guwacce ni, “Lapwony, wamito in itim ki wan gin ma walegi pire-ni.”
\p
\v 36 En ocako penyogi ni, “Wun wumito ni atimmiwu kit gin aŋo?”
\p
\v 37 Gugamo, ni, “Ye wek ŋat acel obed i kom badi tuŋ lacuc ki acel bene obed i kom badi tuŋ lacam i kare me deyoni.”
\p
\v 38 Yecu owaco botgi ni, “Wun pe wuŋeyo gin ma wulego. Wun wutwero mato ki kikopo ma abimato kwede-ni; nyo wutwero limo batija kit ma gibatija kwede an-ni?”
\p
\v 39 Gugamo ni, “Watwero.” Yecu dok owaco botgi ni, “Kikopo ma an abimato kwede-ni, wun bene wubimato kwede, ki kit batija ma an abibatija kwede-ni, wun bene gibibatijawu kwede;
\v 40 ento lok me bedo i kom bada ma lacuc nyo me lacam pe an aye apoko. Meno bibedo pa jo ma yam doŋ giyubo pigi wa con.”
\p
\v 41 Ka jo mukene apar-ri guwinyo lokke, ci cwinygi ocako cwer i kom Yakobo ki Jon.
\v 42 Yecu ocako lwoŋogi bote, ci owaco botgi ni, “Wun wuŋeyo ni, jo ma gilwoŋogi ni gin lulo Lurok giloyo dano ki tek, dok luditogi bene gibedo ki twero i komgi.
\v 43 Pe myero wun wubed kit meno; ento ŋat ma mito bedo ladit i kinwu en aye myero obed laticwu,
\v 44 ki ŋati ma mito bedo mukwoŋo i kinwu, en aye myero obed opiiwu ducu.
\v 45 Kadi wa Wod pa dano bene pe obino ni gutine, ento en aye eti ki dano; en obino pi miyo kwone me lakok lwak dano mapol.”
\p
\v 46 Ka gubino i Jeriko, ci i kare ma en doŋ obea woko ki i Jeriko, kacel ki lupwonnyene ki lwak madwoŋ, ci latowaŋ ma nyiŋe Bartimayo, wod pa Timayo, onoŋo obedo piny i ŋet yo.
\v 47 Ka owinyo ni meno aye Yecu me Najaret, ocako daŋŋe ni, “Yecu Lakwar Daudi, timma kica ba!”
\v 48 Lwak gujuke matek ni oliŋ, ento en omedde ameda ki daŋŋe ni, “Lakwar Daudi, timma kica ba!”
\p
\v 49 Ka Yecu ocuŋ, ci owacci, “Wulwoŋe obin.” Gucako lwoŋo lawaŋe-oto ni, “Doŋ idi cwinyi, a malo, olwoŋi.”
\v 50 En otugi bolo ginarukane woko, ci oa malo, obino bot Yecu.
\p
\v 51 Yecu ocako penye ni, “Imito atimmi gin aŋo?” Ci latowaŋ ogamo ni, “Lapwony, amito waŋa onen piny do.”
\p
\v 52 Yecu ocako wacce ni “Doŋ iciti, niyeni ocaŋi.” Ocako neno piny cut, ci olubo kor Yecu kun woto kwede i yo.
\c 11
\cl Chura 11
\p
\v 1 I kare ma doŋ gicok o i Jerucalem, ki tuŋ Betepage ki Betania, i kor got Jeituni, ci Yecu ocako oro jo aryo ki i kin lupwonnyene,
\v 2 ocikogi ni, “Wucit i gaŋ ma tye i nyimwu. Ka ce wudonyo iye, ci wutugi noŋo latin kana ma gitweyo, ma ŋatti peya oito i wiye; ci wugony, wek wukel.
\v 3 Ka ce dano mo openyowu ni, ‘Wugonyo woko piŋo kaa?’ wudokke iye ni, ‘Rwot aye mito; ci bicwalo dwoko woko kany oyotoyot.’
\p
\v 4 Gucako cito, gunoŋo gitweyo latin kana i doggola woko ki i ŋet yo, ci gugonyo.
\v 5 Jo mogo ma gucuŋ kunnu gupenyogi ni, “Wubetimo gin aŋo, ma wugonyo ki latin kana-ni?”
\v 6 Gudok iye kit ma Yecu ocikogi kwede, ci guye ni gucit kwede.
\p
\v 7 Ci gukelo latin kana bot Yecu, gucako peto boŋŋigi i kome, ocako bedo i wiye.
\v 8 Jo mapol gupeto boŋŋigi i dye yo, ki jo mogo gupeto jaŋ yadi ma potgi oluk ma gu jako ki i potti.
\v 9 Ci jo ma gutelo yo ki jo ma gilubo kore gidaŋŋe ni, “Ojana! Lubaŋa omi gum i kom dano ma bino i nyiŋ Rwot!
\v 10 Lubaŋa omi gum i kom ker pa kwarowa Daudi ma obebino-ni! Ojana malo i wi polo!”
\p
\v 11 Yecu ocako donyo i Jerucalem ki i ot pa Lubaŋa bene, oŋiyo kit jami-gu ducu, ka odok i Betania kacel ki jone apar wiye aryo, pien onoŋo piny doŋ oyuto woko.
\p
\v 12 Orwone dok gua ki i Betania, ma kun kec neke.
\v 13 Ka oneno yat oduro ki cen ma pote oluk, ci ocito ka nenone ni gwok nyo enoŋ iye mucekke. Ka oo i te yat, ci pe onoŋo iye gin mo, onoŋo pote keken, pien onoŋo peya kare me cekke.
\v 14 Lupwonnyene guwinyo ka en wacci, “ŋat mo pe ocam nyigi matwal.”
\p
\v 15 Ka gubino i Jerucalem, ci Yecu odonyo i ot pa Lubaŋa, ocako ryemo lucat-wil ki luwil jami i ot pa Lubaŋa. Ci oryebo meja pa lulok cente, ki kom pa lucat amam;
\v 16 pe onoŋo dok ye ni dano mo oŋol i ot pa Lubaŋa ki yec mo.
\v 17 Ka dok ocako pwonyogi kun loko ni, “Pe yam gicoyo ni, ‘Oda gibilwoŋo ni ot me lega pa rok ducu’? Ento wun wuloko odoko boro pa luyak.”
\v 18 Ajwagi madito pa Lubaŋa ki lupwony-cik gubedo ka winyo lokke, ci gucako yenyo kit yo mo me neke woko; pien gin gitye ka lworo en. Pien onoŋo lwak ducu gitye ka uro kit pwonnye.
\v 19 Ka piny oyuto, ci ocako a woko ki i Jerucalem.
\p
\v 20 Odiko ka gitye ka wot i yo meno, guneno oduro otal nia wa i lwite.
\v 21 Petero ocako po pire, ci owacci, “Lapwony, nen yat oduro ma iceno-ni otal woko.”
\p
\v 22 Yecu ogamo ni, “Wuye Lubaŋa.
\v 23 Adada awacciwu ni, dano ma biwaco ki got man ni, ‘Mukke wek itiŋŋe ipot wa i nam,’ ma kun pe kalo akala i cwinye, ento noŋo oye ni gin ducu ma elego-ni bitimme, ci bitimme ada.
\v 24 Pi lok man mumiyo awacciwu ni, gin ducu ma wupenyo ci wulego Lubaŋa pire, ber wuye ni doŋ wulimo ci wubinoŋone ada.
\v 25 Ka ce wutye ka lega i nyim Lubaŋa, ka onoŋo wutye ki kop mo i kom dano mo, ci wutimme kica, ka wek Wonwu ma tye i polo bene otimwu kica i kom balwu.
\v 26 Ento ka pe wutimo ki dano kica, ci Wonwu ma tye i polo pe bitimowu kica i kom bal mewu.”
\p
\v 27 Gin dok gudwogo i Jerucalem. Ka onoŋo en tye ka wot i ot pa Lubaŋa ci ajwagi madito pa Lubaŋa ki lupwonycik ki ludoŋo gubino bote.
\v 28 Gupenye ni, “Twer mene mumiyo itimo lok macalo man? Dok aŋa mumiyi twero meno?”
\p
\v 29 Yecu ogamo doggi ni, “An koŋ apenyowu ki peny mo acel; wek wun bene wudokka iye, ka an abititowu kit twero mumiyo atiyo lok man.
\v 30 Batija pa Jon twerone oa ki bot Lubaŋa nyo oa ki bot dano? Wun wudokka iye.”
\p
\v 31 Gucako bedo ki pyem i kingi kekengi, kun gipyem ni, “Ka koni wawacci, ‘Twerone oa ki bot Lubaŋa’, ci en dok bipenyowa ni, ‘Ci piŋo pe wuye lokke?’
\v 32 Ka dok wawacci twerone oa ki bot dano kono?” Ento gin gulworo lwak, pien lwak ducu giŋeyo maber ni, Jon aye lanebi atika.
\v 33 Guwaco bot Yecu ni, “Wan pe waŋeyo.” Yecu bene owacogi ni, “An bene pe abitito botwu kit twero mumiyo atiyo man.”
\c 12
\cl Chura 12
\p
\v 1 Yecu ocako lok kwedgi i carolok ni, “Yam tye dano mo ma opito olok i potone, ci orumo woko ducu ki cel, ka okwinyo bur me biyo pige, ci ogero iye lubele, oweko i ciŋ lupur, ci ocito woko wa i lobo mukene.
\v 2 Ka kare oromo, ci ocako cwalo laticce bot lupur ka omo nyige mucekke i potone.
\v 3 Lupur gumake, ci gupwode, ka guryeme kwede woko, omedo ki dok ki ciŋe nono.
\v 4 En dok ocwalo laticce mukene; gin gugoyo en bene, gugoyo wiye lero, gutime ki tim me lewic.
\v 5 Ka dok omedde oro dano mukene, ci guneko dano meno woko. Gubedo ka keto can i kom jo mapol; jo mukene gupwodogi apwoda, ki mukene gunekogi aneka.
\v 6 Pud onoŋo en odoŋ ki dano mo acel bote, en aye wode ma en maro-ni. Lacen en ocwalo wode kikome botgi, kun wacci, ‘Gibiworo woda.
\v 7 Lupur gucako lok kekengi ni, ‘Man aye doŋ lale lim; wubin waneke woko, wek lim ma en bileyo-nu obed mewa.’
\v 8 Ci gumake, guneke woko, gubole woko wa i ŋe poto olok.
\v 9 Ci won poto olok bitimogi niŋniŋ? En bibino, ci neko lupur woko ducu, ci miyo poto olok woko bot jo mukene.
\v 10 Yam pe wukwano lok ma gicoyo i ginacoya ni, ‘Got ma lugedo gukwero-ni en aye odoko got madit ma i twok ot;
\v 11 man Rwot aye ma otiyo, obedo botwa lok me aura’?”
\p
\v 12 Gutemo pi make, ento gulworo lwak, pien guniaŋ atir ni obolo carolok meno i komgi. Ci gua gucito gigi woko.
\p
\v 13 Gin gucako oro Luparicayo ki jo pa Kerode bene, wek gumak lok ma a i doge.
\v 14 Ka gin gubino bote, ci gucako wacce ni, “Lapwony, wan waŋeyo ni in i dano ma itye ki ada, dok pe ito i kom ŋatti mo, pien in pe ineno kom dano ki woko, in ipwonyo yo pa Lubaŋa ki ada. Ci myero gicul mucoro bot Cecar nyo pe?
\p
\v 15 Wacul nyo pe wacul?” Yecu oŋeyo bwolagi, ocako waco ni, “Wun mono wubwola piŋo kaa? Koŋ wucikella kom lim ma giculo kwede, anen.”
\v 16 Gin gucako kelone bote, ci en openyogi ni, “Cal ki coc ma gicoyo i kome-ni pa aŋa?” Ci gugamo ni, “Pa Cecar yo.”
\p
\v 17 Yecu ocako wacogi ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” Gin gucako urone matek.
\p
\v 18 Lucadukayo gucako bino bot Yecu; gin aye jo ma giwacci cer pa jo muto pe tye kulu. Gucako penyo peny ni,
\v 19 “Lapwony, Moses yam ocoyo ni, ka laco mo oto woko, ce oweko dakone, ma kun pe obwoto latin mo, ci myero ominne olak dakone, wek onywal kwede litino ka wi ominne.
\v 20 Ci yam onoŋo tye co abiro ma gin ducu omego. Ka laco mukwoŋo nyomo dako-nu oto woko ma pe obwoto latin mo,
\v 21 ci me aryo ocako lako dako-nu, en bene oto woko ma pe obwoto latin mo; ki dano me adekke bene kumeno;
\v 22 ci gin ducu abiro pe gubwoto latin mo. Lacenne en dako bene oto woko.
\v 23 I kare me cer ki i kin jo muto, dako-nu doŋ bibedo dako pa aŋa? Pien gin co abiro-ni ducu gubedo kwede.”
\p
\v 24 Yecu ocako wacogi ni, “Wun wurwenyo pi lok man, pien wukwiya ginacoya, wa tek pa Lubaŋa bene wukwiya.
\v 25 Ka ce dano gibicer woko ki i kin jo muto, ci doŋ pe gibinyomme, doŋ gibibedo macalo lumalaika ma i polo.
\v 26 Ento i kom lok man me cer ki i kin jo muto-ni, wun pe mukwano i buk pa Moses, ka ma ocoyo lok i kom caka, ki kit ma Lubaŋa yam oloko kwede ni, ‘An Lubaŋa pa Abraim, ki Lubaŋa pa Icaka, ki Lubaŋa pa Yakobo’?
\v 27 En pe Lubaŋa pa jo muto ento en Lubaŋa pa jo makwo; wun wuŋak wurwenyo woko marac.”
\p
\v 28 Ka lapwony-cik mo obino cok, ci obedo ka winyo ka gilaro lok. Ka oneno kit ma Yecu dok iye ki gin lok maber ma atir, ocako penyo Yecu ni, “Cik mene maditte mukwoŋo ki i kom lwak cik ducu?”
\p
\v 29 Yecu ogamo ni, “Cik mukwoŋo en ene, ‘Wuwiny wun jo Icrael, Rwot Lubaŋawa en Rwot acel.
\v 30 Ci mar Rwot Lubaŋani ki cwinyi ducu, ki tiponi ducu, ki tammi ducu ki tekki ducu.’
\v 31 Ki me aryone en ene ni, ‘Mar lawoti macalo imarre keni.’ Pe dok tye kit cik mo ma pire tek makato cik magi aryo-ni.”
\p
\v 32 Lapwony-cik ogamo ni, “Iloko kakare, Lapwony; iloko atir ni, Lubaŋa tye acel, pe dok tye Lubaŋa mo mukene, kono en kene.
\v 33 Dok ni gimare ki cwiny ducu, ki ryeko ducu, ki tek ducu, ki maro lawoti macalo imarre keni, cik magi aye pigi tek makato gitum ma giwaŋo ducu ki berre ki gitum mukene ducu.”
\p
\v 34 Ka Yecu oneno ni odok iye maber ki ryeko, ocako dok wacce ni, “In pe ibor ki ker pa Lubaŋa.” Lacen pe dok tye ŋat mo ma odiyo cwinye ka penye ki lok mo.
\p
\v 35 Ka Yecu onoŋo tye ka pwony i ot pa Lubaŋa, ci openyo ni, “Lupwony-cik mono giwacci Kricito lakwar Daudi piŋo?
\v 36 Ki tuŋ bot Daudi kikome en dok oloko i tek pa Cwiny Maleŋ ni, ‘Rwot owaco bot Rwoda ni, Bed i kom bada ma lacuc, i kabedo me deyo, nio ka abiketo lukworri piny i te tyeni.’
\v 37 Ka ce en Daudi aye yam olwoŋe ni Rwot, ci en dok bedo lakwarre niŋiŋ?” Lwak mapol guwinyo lokke ki yomcwiny madwoŋ mada.
\p
\v 38 I kare ma Yecu tye ka pwonyo dano, owacci, “Wugwokke i kom lupwony-cik ma gimaro wot ma guruko boŋŋi maboco-ni, dok gimito dano gubed ka motogi wa i cuk-gu,
\v 39 dok gimaro bedo i kom pa ludito ka gitye i kacokke, dok gimaro bedo i kabedo me deyo i karama.
\v 40 Gin gimayo odi pa mon-to, dok gibedo ka lego lega maboco me buta keken. Gibiŋologi kop madit makato ducu.”
\p
\v 41 Yecu obedo i ot pa Lubaŋa ka ma okemme ki canduk me coko lim, ci obedo ka neno kit ma lwak gibolo ki motgi i canduk lim; lwak lulonyo gubolo iye mapol.
\v 42 Ento dato ma lacan obino ci obolo iye cente aryo, ma rom ki cente abic me kare-ni.
\v 43 Ocako lwoŋo lupwonnyene bote, ci owacogi ni, “Adada awacciwu ni, dato man ma lacan-ni en aye dok obolo lim madwoŋ makato jo ducu;
\v 44 pien jo mapol gugito but limgi madwoŋ-ŋi aye gubolo, ento en i canne-ni, obolo limme ducu ma en tye kwede ma onoŋo konyo kwone.”
\c 13
\cl Chura 13
\p
\v 1 Ka Yecu okato woko ki i ot pa Lubaŋa; ci ŋat acel mo ki i kin lupwonnyene owacce ni, “Lapwony, nen kit ma godi magi dito kwede ki kit ma gedone beco kwede!”
\v 2 Yecu ogamo ni, “Wuneno gedo magi madito twatwal-li? Godi ducu gibimukogi gireto woko piny, pe gibiweko got acel mo kany ma ododde i wi wadi.”
\p
\v 3 Yecu ka obedo piny i wi got Jeituni, kun otikke ki ot pa Lubaŋa, ci Petero ki Yakobo ki Jon ki Anderiya gucako penye i muŋ ni,
\v 4 “Tit botwa, lok man bitimme wa awene, dok kit gin aŋo ma binyuto ni lok meno doŋ cok cobbe kakare?”
\p
\v 5 Yecu ocako wacogi ni, “Wugwokke, ŋatti mo owek rwenyowu.
\v 6 Pien jo mapol gibibino ki nyiŋa, ma giwacci, ‘An aye a en!’ ci gibimiyo jo mapol girwenyo woko.
\v 7 Dok ka wubiwinyo pi mony, ki lok ma yweko pi mony, pe tipo komwu oto woko lirut; myero koŋ meno otimme, ento noŋo nino me agik pud peke.
\v 8 Pien rok bilweny ki rok wadi, ki ker bene bilweny ki ker wadi, ki oyeŋyeŋ biyeŋo lobo i kabedo mapol, ki kec bene bipoto; meno gin aye acakki me te can ma bipoto i lobo.
\p
\v 9 “Ento wun aye myero wugwokke kenwu; pien gibiterowu i lukiko, dok gibigoyowu i kacokke-gu. Wubicuŋ i nyim luloc ki luker-gu pira, wubitito lok ma bedo caden botgi.
\v 10 Myero koŋ gikwoŋ tito lok me kwena maber bot rok ducu.
\v 11 Ento ka giterowu i lukiko wek giŋol kop i komwu, pe wubed ka tamo kit lok aŋo ma wubilokone, ento wulok ma gibimiyowu i cawa meno; pien pe wun aye wubilok, ento Cwiny Maleŋ aye bilok.
\v 12 Omego en aye bimiyo omegine i to, ki wego bimiyo litinogi i to, litino bitubbe i kom lunyodogi, miyo gineko lunyodogi woko.
\v 13 Jo ducu gibikwerowu pi nyiŋa; ento ŋat ma diyo cwinye nio wa i agik, en aye bilarre.
\p
\v 14 “Ka wuneno gikelo gin mo me kwer, malik, giketo i kabedo ma myero pe giket iye (wek dano ma kwano oniaŋ) ci jo ma i Judaya myero guriŋ woko wa i godi;
\v 15 dano ma onoŋo tye i wi ot pe dok olor piny, pe bene odony i ot ka kwanyo iye gin mo,
\v 16 ki dano ma tye wa i poto pe odok cen paco ka omo ginarukane.
\v 17 Dok mon ma giyac gibineno can i kare meno, ki mon ma gidoto litino bene!
\v 18 Wuleg wek pe obin otimme i cwir.
\v 19 Pien i kare meno bibedo iye twon can madit atika ma yam peya onen i lobo, nia wa i acakki lobo ma Lubaŋa oketo-ni, nio kwede wa onyoo, dok bene pe binen.
\v 20 Kono nene Rwot pe ojwiko nino-nu obedo manok mo, kono dano mo pe obwot; ento pi jo ma giyero, ma en oyerogi, omiyo en ojwiko wel nino obedo manok.
\v 21 “I kare meno ka ce dano mo owacciwu ni, ‘Nen, Kricito ma Lubaŋa oyero tye kany’, nyo ni, ‘Nen en tye kuca’, pe wuye.
\v 22 Kricito ma lugoba kacel ki lunebi-gu ma lugoba gibibino, gibinyutowu lanyut ki tiyo jami taŋo, wek girweny jo mapol ka gitwero, wek girweny wa ki jo ma giyero bene.
\v 23 Ento wun aye wugwokke, doŋ atyeko titowu gin ma bibedo i anyim con.
\p
\v 24 “Ento i kare meno ki i ŋe can madit-ti, bibedo kit macalo yam gicoyo ni. ‘Ceŋ bicido woko macol licuc, ki dwe bene pe biryeny;
\v 25 lakalatwe bia ki i polo, gipoto piny ki twer ducu ma i polo bene biyeŋŋe.’
\v 26 Ka doŋ gibineno Wod pa dano ka bino ki pol, ki twero madwoŋ, ki deyo.
\v 27 Ci en bioro lumalaikane ka coko jone ma en oyero, kun gicokogi ki i twok piny aŋwen ducu, nia kwede wa i agikki lobo nio kwede wa i agikki polo.
\p
\v 28 “Wupwony carolok i kom yat oduro. Ka ce jaŋe doŋ olot, ci pote luk, ci doŋ wuŋeyo ni oro doŋ cok.
\v 29 Ki wun bene ka ce wuneno gin magi gutimme, ci wuŋe ni en doŋ cok, tye wa i doggola.
\v 30 Adada awacciwu ni, yalwak me kare man pe gibitum, nio waŋ ma lok magi ducu bitimme.
\v 31 Polo ki lobo gibitum ento lokka pe bitum.
\v 32 “Ento nino meno ki cawa meno pe tye ŋat mo ma ŋeyo, kadi wa lumalaika ma i polo, kadi wa Wod, ento Lubaŋa Won kene aye ŋeyo gire.
\v 33 Wugwokke, waŋwu obed twolo ma nen, pien wun pe wuŋeyo nino ma kare biromo iye.
\v 34 Bedo rom ki dano ma ocito welo. Ka yam a weko gaŋŋe, ci omiyo twero bot luticce, kun miyo ŋat acel acel ki ticce, kun ociko lagwok doggola ni obed ka kiyo piny.
\v 35 Mumiyo wun wubed ka kiyo piny, pien pe wuŋeyo kare ma won ot bidwogo kwede; gwok dwog wi otyeno, nyo cwiny dyewor, nyo okogweno, nyo odiko.
\v 36 Wugwokke, ka ce obino oyotoyot pe onoŋwu wunino woko.
\v 37 Lok ma awaco botwu-ni, awaco bot dano ducu ni, Wuki piny.”
\c 14
\cl Chura 14
\p
\v 1 Nino madito me Kato (Paska) ki me Mugati ma Tobi Pe Iye onoŋo odoŋ nino aryo, ajwagi madito pa Lubaŋa ki lupwony-cik guporo lok me mako Yecu ki ryeko ka wek gineke.
\v 2 Pien onoŋo guloko ni, “Pe gimak i nino madito, miyo lwak bitugge.”
\p
\v 3 I kare ma Yecu tye i ot pa Cimon ladobo, i kare ma obedo ka cam, dako mo obino ma kun tye ki adomo moo nard kikome ma welle dwoŋ-ŋi; ocako turo dog adomo moone, ci oonyo i wiye.
\v 4 Ento cwiny jo mogo ocwer, ci gucako lok kekengi ni, “Piŋo moo man gibalo abala?
\v 5 Pien moo man kono nene gicato woko, kono nene okelo lim ma romo ciliŋ miya adek kulu ki makato bene, ka wek gimi ki lucan.” Ci gucako tugge i kom dako-nu matek.
\p
\v 6 Yecu ocako waco ni, “Wuweke obed mot, wuyelo piŋo? En otiyo gin maber twatwal i koma.
\v 7 Pien wun wutye kacel ki lucan kare ducu, dok wutwero konyogi i kare ducu ma wumito; ento an pe abibedo kwedwu kare ducu.
\v 8 En otiyo gin ma en twero; dok en aye okwoŋo onyo moo i koma me yika.
\v 9 Adada awacciwu ni, i kabedo ducu ma i wi lobo ma gibitito iye lok me kwena maber, gin ma dako-ni otiyo bene gibitito pire, wek obed me po en.”
\p
\v 10 Juda Lakeriot, ma en dano acel ma i kin jo apar wiye aryo-ni, ocito bot ajwagi madito pa Lubaŋa pi miyo Yecu i ciŋgi.
\v 11 Ka guwinyo lokke oyomo cwinygi, gucako cikke me miye lim; ki en bene ocako yenyo kare maber ma eromo miyo ki Yecu i ciŋgi.
\p
\v 12 I kom nino mukwoŋo me nino madito me Mugati ma Tobi Pe iye, ma gitumo iye latin romo me Kato, lupwonnye gupenye ni, “Imito waciyubbi kabedo mene wek icam iye Kato?”
\p
\v 13 En ooro lupwonnyene aryo ki i kingi kun cikogi ni, “Wucit wa i Jerucalem; ci wubirwatte iye ki laco mo ma oyeyo agulu pii, en aye wulub kore.
\v 14 Ka ma en odonyo iye-ni, en aye wupeny iye won ot ni, ‘Lapwony owacci, ot welo ma atiro iye tye kwene, ka ma abicamo iye cam me Kato, kacel ki lupwonnyena?’
\v 15 Ci en binyuto botwu kicika ot ma malone, ma gipeto, giyubo maber, wuyubwa kabedo kunnu.”
\v 16 Lupwonnye gucito, ci gudonyo i Jerucalem, gunoŋo kit macalo en owaco botgi-ni, gucako yubo cam me Kato kunnu.
\v 17 Ka piny doŋ oyuto ci obino ki jone apar wiye aryo.
\p
\v 18 Ka gubedo piny ci gucako camo cam, ci Yecu owacogi ni, “Adada awacciwu ni, ŋat acel i kinwu bidoba, en aye dano ma camo kacel kweda.”
\p
\v 19 Gin gucako kumo cut, kun dano acel acel penye ni, “An bo?”
\p
\v 20 Yecu owacogi ni, “Tye ŋat acel i kinwu wun jo apar wiye aryo-ni, en aye dano ma tye ka gweyo i atabo acel kweda-ni.
\v 21 Pien Wod pa dano tye ka wot kit man pi cobo kit ma gicoyo i kome-ni; ento dano ma odobo Wod pa dano-ni bineno can! Kono nene obedo ber ka dano-nu pe ginywalo.”
\p
\v 22 Ka gitye ka camo cam, Yecu omako mugati; ci olego gum i kome, ocako baro iye, omiyo bot lupwonnye, kun wacci, “Wugam man, man aye koma.”
\v 23 Dok otiŋo kikopo, ci opwoyo, ocako miyone botgi, gin gumato.
\v 24 Yecu owaco botgi ni, “Man aye remona me gicikke ma ocwer pi jo mapol.
\v 25 Adada awacciwu ni, pe dok abimato pig olok, nio wa i kare ma abicako dok matone manyen wa i ker pa Lubaŋa.”
\v 26 Ka doŋ gutyeko wero wer, ci gucito i wi got Jeituni
\v 27 Yecu owaco botgi ni, “Wun ducu wubitenya woko kena, pien yam gicoyo ni, ‘Abigoyo lakwat, ci romi gibiket woko ata.’
\v 28 Ento lacen ka doŋ acer woko ci abitelo nyimwu me cito i Galilaya.”
\p
\v 29 Petero ogamo ni, “Kadi ka jo mukene ducu gibitenyi woko, ento an pe abitenyi ata.”
\p
\v 30 Yecu owacce ni, “Adada awacci ni, tin ki i dyewor, ma noŋo twon gweno peya onwoyo koko kiryo, noŋo in doŋ ityeko kwera woko tyen adek kulu.”
\p
\v 31 Ento Petero dok ogamo matek twatwal ni, “Twara ma ato kacel kwedi, pe abikweri.” Gin ducu gucako loko kit meno bene.
\p
\v 32 Gucito i kabedo ma nyiŋe Gececemane, ci ociko lupwonnyene ni, “Wun koŋ wubed kany, an koŋ acileg Lubaŋa.”
\v 33 En otero Petero ki Yakobo ki jon, ci cwinye ocako poto matek ki kumo bene madwoŋ.
\v 34 Ocako wacogi ni, “An cwinya tye ka waŋ matek, mito neka woko. Wubed ka kiyo piny kany.”
\v 35 Ocito anyim manok, ci oguŋo oryebbe piny olego ni, “Ka ce twerre, lakit cawa-ni doŋ oa woko i koma.”
\v 36 Ci olego ni, “Abba, Wora, jami ducu twerre ki boti; kwany kikopo man woko ki i koma; ento pe obed kit ma an amito, obed kit ma in imito.”
\v 37 Ka odwogo botgi onoŋo gunino woko, ci owaco bot Petero ni, “Cimon, inino woko ce? Pe itwero kiyo piny pi cawa acel mo?
\v 38 Wuki, wuleg Lubaŋa, wek pe wudony i abita mo; cwiny kikome mito loyo abita pa Catan, ento kom aye nyap.”
\v 39 Dok odok ka lego Lubaŋa, kun nwoyo lego lega acel-lu.
\v 40 Ka dok odwogo onoŋo gunino woko, pien onoŋo nino doŋ omako waŋgi twatwal; pe doŋ giŋeyo gin ma myero gidokke iye.
\v 41 Ka dok odwogo botgi tyen me adekke, openyogi ni, “Wun pud wunino ce? Pud wutye ka yweyo bo? Doŋ otum, ki cawa bene doŋ oromo; wod pa dano doŋ gimiyo woko i ciŋ lubalo.
\v 42 Doŋ wua malo, orya wunu wacitu; nen dano ma odoba doŋ tye cok.”
\p
\v 43 Cutcut ma Yecu pud tye ka lok-ki, Juda otugi tuc; en yam ŋat acel ma i kin jo apar wiye aryo-ni. En obino ki lwak ma gua bot ajwagi madito pa Lubaŋa ki lupwony-cik ki ludoŋo, ma gitye ki pala lucwan ki odoo-gu.
\v 44 Juda ma odobe-ni yam omiyogi lanyut. En owacci, “Dano ma abimoto kun anoto leme, meno aye en kikome; wutugi make woko, wutere kun wugwoke maber.”
\v 45 Ka Juda obino ci okemo bot Yecu atir, ocako mote ni, “Lapwony,” ci onoto leme.
\v 46 Gin bene gutugi poto i kome, gumake woko cut.
\v 47 Dano mo acel ma onoŋo ocuŋ ka ŋete ocako woto pala lucwanne, otoŋo ki opii pa ajwaka madit pa Lubaŋa, oŋuno ite woko.
\p
\v 48 Yecu owaco botgi ni, “Wubino bota ki pala lucwan ki odoo-gu me maka, macalo wubino i kom layak mo?
\v 49 Abedo ka pwony i ot pa Lubaŋa jwijwi, ma kun abedo iye kwedwu, ci pe yam wumaka do. Doŋ wumaka, wek ginacoya ocobbe kakare.”
\p
\v 50 Gin ducu guriŋo woko, guweke odoŋ kene.
\v 51 Awobi mo odwalo cuka boŋo camanini keken i kome, ci olubo ki kor Yecu; gin gumake bene,
\v 52 ento en oweko cukane odoŋ, ci oriŋo woko nono laboŋo mo.
\p
\v 53 Gutero Yecu bot ajwaka madit pa Lubaŋa, kun onoŋo ajwagi madito ki ludoŋo-gu ki lupwony-cik gucokke kacel.
\v 54 Petero obedo ka lubo kor Yecu ki cencen nio kwede wa i dyekal pa ajwaka madit; obedo ka oyo mac kacel ki lutic.
\v 55 Ajwagi madito ki jo ma i Lukiko ducu guyenyo lok me caden ma mako kom Yecu ma miyo gineke; guyenyo kwe pe gunoŋo mo.
\v 56 Lwak lucaden mapol gubedo ka kelo lok goba i kome, ma lokgi ducu pe rwatte.
\v 57 Jo mukene gua malo, ci gukelo lok goba i kome ni,
\v 58 “Wan wawinyo ka en loko ni, ‘An amuko ot pa Lubaŋa-ni woko, ma yam gigero ki ciŋ-ŋi, ci dok agero mukene-ne nino adek keken, ma pe gitiyo ki ciŋ.’”
\v 59 Kadi bed gukelo lok goba kit meno, ento lok ma gukelo pe rwatte.
\p
\v 60 Ajwaka madit otirre malo ci ocuŋ i dyere, ocako penyo Yecu ni, “Lwak adot ma lucaden gudoti kwede-ni in igamo niŋniŋ?”
\v 61 Yecu pe ogamo, oliŋ gire aliŋa. Ajwaka madit dok openye ni, “In aye Kricito ma Lubaŋa oyero, Wod pa Lubaŋa ma gipwoyo-ni bo?”
\p
\v 62 Yecu ogamo ni, “An aye a en; dok bene wubineno ka Wod pa dano obedo ki Won Twer atena i wi kom me deyo ka ŋete, tuŋ acucce; ka dok bino ki pol me polo-gu.”
\p
\v 63 Ajwaka madit ocako yeco ginarukane woko kekene, kun wacci, “Pud dok wumito kit caden aŋo kaa?
\v 64 Doŋ wutyeko winyo kit ma en yeto kwede Lubaŋa. Wutamo iye lok aŋo doŋ?” Gin ducu guŋolo lokke ni, balle romme to.
\p
\v 65 Jo mukene gucako ŋulo laa i kome, kun giumo waŋe woko, ka gidoŋe kwede, ma kun giwacci, “In ma lanebi-ni, tuc ba,” ki lutic-gu gupoto i kome kun gipale ki ciŋgi.
\p
\v 66 I kare ma onoŋo Petero tye piny i dyekal, ci aŋeca pa ajwaka madit acel mo obino kenyo.
\v 67 Ka oneno Petero ka oyo mac, ka obolo waŋe i kome ci owacce ni, “In bene onoŋo itye ki dano meno mua ki i Najaret, en Yecu.”
\p
\v 68 Petero ocako kwero woko, ma kun wacci, “An pe aŋeyo, pe bene aniaŋ gin ma ibeloko.” Ka Petero okato woko i doggaŋ, ci twon gweno otugi kok cut.
\p
\v 69 Aŋeca meno dok onene, ci dok ocako tito bot jo ma gucuŋ kunnu ni, “Dano man en bene ŋat acel ma i kingi.”
\p
\v 70 Petero dok ocako kwerone woko aye. Kare dok okato manok mo, jo ma onoŋo gucuŋ kenyo dok guwaco ki Petero ni, “Ada in i ŋat acel ma i kingi, pien in Lagalilaya.”
\p
\v 71 En ocako kwoŋŋe kun lamme kekene ni, “An pe aŋeyo dano man ma wun wuloko pireni.”
\p
\v 72 Dok cutcut twon gweno okok tyen me aryone. Petero ocako po lok ma nene Yecu owacce ni, “Ma noŋo twon gweno peya onwoyo koko kiryo, noŋo in doŋ ityeko kwera woko tyen adek kulu.” Ci ocako koko matek cut.
\c 15
\cl Chura 15
\p
\v 1 Ka piny doŋ oru, oyotoyot ajwagi madito ki ludoŋo ki lupwony-cik ki jo ma i Lukiko ducu, gupiro lok kacel. Ci gutweyo Yecu woko gutere kwede gumiye bot Pilato.
\v 2 Pilato ocako penye ni, “In i kabaka pa Lujadaya bo?” Yecu ogamo ni, “Iwaco kakare gire.”
\v 3 Ajwagi madito gucako dote ki lwak adot mapol.
\v 4 Pilato dok openye ni, “Pe koŋ idok iye ce? Pe ineno kit lwak lok mapol ma gidoti kwede-ni?”
\v 5 Yecu dok pe omedo ki dok iye lok mo, omiyo Pilato ouro matek.
\p
\v 6 Ka i kare me nino madito onoŋo Pilato gonyo lamabuc mo woko ma dano gulege pire.
\v 7 I kare-nu onoŋo tye laco mo ma nyiŋe Baraba, ma yam gitweyo i mabuc i kin jo mujemo ma guneko dano i kare me jemogi-nu.
\v 8 Lwak gucako cito bot Pilato, gupenye wek otim kit ma yam tiyo-ni.
\v 9 Pilato openyogi ni, “Wumito mono ni agonnyiwu kabaka pa Lujudaya?”
\v 10 Onoŋo Pilato oŋeyo ni ajwagi madito gumiyo Yecu bote pi nyeko.
\v 11 Ajwagi madito gupiyo lwak ni twara gigonnyigi Baraba.
\v 12 Pilato dok openyo lwak ni, “Dano ma wulwoŋo ni kabaka pa Lujudaya-ni doŋ abitimo niŋniŋ?”
\p
\v 13 Lwak gucako wo ni, “Gure woko i kom yatariya.”
\p
\v 14 Pilato dok openyogi ni, “Piŋo kaa, otimo kit gin aŋo marac?” Ento lwak gumedde ki wo ni, “Gure woko i kom yatariya.”
\v 15 Pi mito kweyo cwiny lwak, omiyo Pilato oye gonnyigi Baraba, ocako pwodo Yecu ki del, ka omiye wek gigure woko i kom yatariya.
\p
\v 16 Askari gutero Yecu wa i ot pa kabaka, ma gilwoŋo Praitorion, ci gulwoŋo buca monygi ducu gucokke kacel.
\v 17 Ka gucako ruko Yecu ki boŋo makwar, ka gucweyo lulakana okuto, gurwako i wiye,
\v 18 kun gimote ni, “Itye ba, kabaka pa Lujudaya!”
\v 19 Gucako goyo wiye ki gayi, ka guŋulo laa i kome-gu, kun girumo coŋgi me miye woro.
\v 20 Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya.
\p
\v 21 Gucako mako dano mo ma onoŋo obekato mua ki i kin gaŋ ci gudiye ka tiŋo yatariya pa Yecu, nyiŋe Cimon dano me Cirene, ma won Alegijanda ki Rupo.
\v 22 Gutero Yecu i kabedo ma gilwoŋo ni Golgota, ma te lokke ni kabedo me cogo wic.
\v 23 Gucako miye koŋo vino ma girubo iye yat murra; ento en okwero matone woko.
\v 24 Ka doŋ gugure i kom yatariya, ci gupoko boŋŋine woko i kingi, kun gibolo kwir wek ginen boŋŋi ma ŋat acel acel bitero.
\p
\v 25 Giguro Yecu i kom yatariya i cawa adek me odiko.
\v 26 Gicoyo i waraga gin ma nyuto lok ma gidote iye ni, “Kabaka pa Lujudaya.”
\v 27 Gigure kacel ki luyak mogo aryo, dano acel tuŋ lacuc ki acel tuŋ lacam.
\v 28 Omiyo ginacoya ocobbe kakare ni, “Gikwane i kin lubalo.”
\v 29 Jo ma yam gimol gikato ki ka ŋete gubedo ka yete, kun giyeŋo wigi, ma giwacci, “Nye, in ma imuko ot pa Lubaŋa woko, ci igero pi nino adek-ki,
\v 30 doŋ ilarre keni, a woko ki i kom yatariya!”
\p
\v 31 Ki ajwagi madito bene guŋale, ma giloko ki luwotgi kacel ki lupwony-cik-gu, kun giwacci, “Yam bedo ka laro jo mukene, pe twero larre kene.
\v 32 Wek tin Kricito, ma kabaka me Icrael, olor piny ki i kom yatariya, wek wanen ka wacak ye.” Wa jo ma gigurogi kacel kwede bene gucaye.
\p
\v 33 Ka cawa oromo abicel, piny ocido woko macol i lobo ducu, nio kwede wa i cawa aboŋwen.
\v 34 I kom cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?”
\p
\v 35 Ka jo ma onoŋo gucuŋ kunnu guwinyo lokke, ci guwacci, “Winyu ka en lwoŋo Elia ca.”
\p
\v 36 Ci dano acel oriŋo, okwanyo amor, oluto i koŋo vino mawacce, orwako i wi tal gayi, omiyo ki Yecu ni omati, kun wacci, “Weku mono koŋ wanen ka Elia bino ka kwanye woko ki i kom yatariya.”
\v 37 Yecu dok odaŋŋe ki dwan maloŋo, ka oto.
\v 38 Ci boŋo kicika ma i ot pa Lubaŋa ocako yec woko opokke dul aryo, oyec ki malo, nio kwede wa i tere piny.
\p
\v 39 Ladit ma loyo askari, ma onoŋo ocuŋ cok i nyime, ka oneno kit ma Yecu oto kwede, owacci, “Adada, dano man onoŋo Wod pa Lubaŋa!”
\v 40 Dok onoŋo tye mon mogo ma gucuŋ ki cen ka nenone; onoŋo tye Maliam Lamagdala, ki Maliam min Yucepu matidine ki Yoce, ki Calume.
\v 41 Gubedo ka lubo kor Yecu ki i Galilaya, gubedo ka konye bene, dok onoŋo tye lwak mon mapol ma gubino kwede wa i Jerucalem.
\p
\v 42 I kom nino me Yubbe, en nino ma i nyim cabit, ka piny doŋ oyuto,
\v 43 Yucepu me Arimataya obino; en yam dano madit ma lamemba me Lukiko ma gipwoyo bene, en kikome obedo ka kuro ker pa Lubaŋa. En odiyo cwinye, ci odonyo wa bot Pilato, olego kom Yecu.
\v 44 Pilato ouro ka doŋ otyeko to woko oyot kumeno; ci olwoŋo ladit ma loyo askari, openye ka ce doŋ oto woko.
\v 45 Ka ladit ma loyo askari otyeko niaŋo en, ci omiyo kom Yecu bot Yucepu.
\v 46 Yucepu owilo boŋo camanini, ci okwanyo kom Yecu woko ki i kom yatariya, oboyo ki boŋo camanini, otero kome opyelo i lyel ma en okwinyo oroko i got, ci ocego wiye woko ki got ma oloro ki dog lyel.
\v 47 Maliam Lamagdala ki min Yoce guneno ka ma giyiko iye kome.
\c 16
\cl Chura 16
\p
\v 1 Ka cabit doŋ okato, ci Maliam Lamagdala ki Maliam min Yakobo, ki Calume guwilo aŋwece pi wot kwede ka wiro kom Yecu.
\v 2 I kom nino mukwoŋo me cabit mon gupuk odiko con ma ceŋ otuc, ci gucito i wi lyel.
\v 3 Gucako pennye kekengi ni, “Aŋa mono ma bidirowa got woko cen ki i dog lyel?”
\v 4 Ka gutiŋo waŋgi ci guneno got meno doŋ gidiro woko cen; onoŋo gotte dit twatwal.
\p
\v 5 Ka gudonyo i lyel, ci guneno latin orobo mo ma oruko boŋo matar, obedo kwede yo tuŋ acuc; gucako urone mada.
\v 6 En owaco botgi ni, “Pe wubed ka urone; wun wubeyenyo Yecu me Najaret ma giguro i kom yatariya-ni. En doŋ ocer woko, pe doŋ tye kany. Koŋ wunen ka ma gipyelo iye kome.
\v 7 Ento wucit wutit ki lupwonnyene, ki bot Petero bene ni, en doŋ tye ka wot me telo nyimwu wa i Galilaya kuca; wubineno kome kunnu, kit ma yam en otito botwu-ni.”
\v 8 Ci mon gukatti woko ki i lyel, gucako ŋwec ki myelkom pi lworo ma omakogi matek twatwal; lworo ogeŋogi tito lokke ki ŋatti mo.
\p
\v 9 Ka en doŋ ocer odiko con i nino mukwoŋo me cabit, okwoŋo nyutte bot Maliam Lamagdala, ma yam en oryemo cen abiro i kome-ni.
\v 10 En otugi tero lok bot jo ma yam gibedo kwede, i kare ma gitye ki cola ki kumu-gu.
\v 11 Ka guwinyo ni en tye gire makwo, dok ni otyeko nyutte, kome onen bot Maliam, pe guye lokke.
\v 12 Lacen Yecu dok onyutte onen bot jo mukene i kit mapatte; onen bot lupwonnye ma onoŋo gicito ka wot i kin gaŋ.
\v 13 Gin dok gucito gutito bot jo mudoŋ-ŋi, gin bene dok pe guye lokgi.
\v 14 Ka lacen dok onyutte onen bot jone apar wiye acel ma onoŋo gitye i dog cam. Ocako da i komgi pi kwero ye lok, ki pi tekcwinygi, pien gukwero ye lok pa jo ma doŋ guneno kome i kare ma ocer-ri.
\p
\v 15 Ka doŋ owaco botgi ni, “Wucit i lobo ducu, wucitit iye lok me kwena maber bot ginaketa ducu.
\v 16 Dano ma oye, ce gibatija en, ci bilarre; ento dano ma okwero ye aye kop biloyo en.
\v 17 Lanyut magi binen ki bot jo ma giye: gibiryemo cen pi lwoŋo nyiŋa, gibiloko ki leb manyen,
\v 18 gibimako wa twol-gu, dok ka gibimato gin ma neko dano, ci pe bitimogi marac; gin bene gibiketo ciŋgi i kom lutwo ci gibicaŋ”
\v 19 Ka Rwot Yecu doŋ otyeko lok kwedgi, ci gitiŋe gitere woko malo i polo, ci ocako bedo piny ka ŋet Lubaŋa atena i kabedo me deyo yo tuŋ acucce.
\v 20 Ci lupwonnye gucito ka tito lok i kabedo ducu, kun Rwot kikome bene tye ka tic kwedgi, kun moko lok ma gitito ki lanyutte.