Thr_reg/67-REV.usfm

\id rev Regular
\ide usfm
\h यूहन्‍नाके भओ प्रकाश
\toc1 यूहन्‍नाके भओ प्रकाश
\toc2 यूहन्‍नाके भओ प्रकाश
\toc3 rev
\mt यूहन्‍नाके भओ प्रकाश
\c 1
\cl अध्याय १
\v 1 परमेश्‍वर अपन सेवकनके अब जल्दी होन बारी बात प्रकट करिभई जा येशू ख्रीष्‍टको प्रकाश हए। बा अपन स्वर्गदूत पठाएके जा बात अपन सेवक यूहन्‍नाके प्रकट करी।
\v 2 परमेश्‍वरको वचनके सम्बन्धमे अपन देखी भई सब बात और येशू ख्रीष्‍टके बारेमे यूहन्‍ना गवाही दई हए।
\v 3 अगमवाणीको जा वचन जौन उँचे स्वरमे पढत हए और सुनत हए और बामे लिखोभओ बात पालन करत् हए, बा आदमी धन्यको हए। काहेकी समय जौने हए।
\v 4 यूहन्‍नासे एशियामे भए सात मण्डलीनकेः जो हए, जो रहए और जो आबैगो, और बासे अनुग्रह और शान्ति, और बाको सिंहासनको अग्गु भए सात आत्मा,
\v 5 और येशू ख्रीष्‍टसे, जो विश्‍वासयोग्य गवाही हए, मरेनके बीच मैसे पहिले जिन्दा भओ, और पृथ्वीके राजानके शासक हए, बा जौन हमसे प्रेम करत हए और बाको रगतसे हमके हमर पापसे स्वतन्‍‍त्र करदई।
\v 6 बा हमके एक राज्य बनाई हए, और बाको पिता और परमेश्‍वरके ताहीं पुजारी, जौनके महिमा और शक्ति सदामान होबए। आमेन।
\v 7 देखओ, बा बादरमे आए रहोहए, और हरेक आँखी बाके दिखेहँए, बाके घोंचनबारे फिर। और पृथ्बीके सब कुल बाके कारन बिलाप करेहएँ। अइसी होबए, आमेन।
\v 8 "अल्फा और ओमेगा महिं हौं,” सर्वशक्तिमान् परमप्रभु परमेश्‍वर कहात हए, " बा जो हए, जो रहए और जो आनबारो हए।"
\v 9 मए तुमरो ददा यूहन्‍ना और जौन राज और कष्‍टनमे धैर्यसंग सहनशिलता जौन येशूमे रहए, तुमरसंग परमेश्‍वरको वचन और येशू ख्रीष्टको गवाहीके ताहीं मए पत्मोस कहन बारो टापूमे रहऔं।
\v 10 प्रभुको दिनमे मए आत्मामे रहऔं। और मय मिर पिच्छु तुरहीको जैसो एक जोड़को आवाज सुनो,
\v 11 बा कही, "तय जो देखत हए, सो एक किताबमे लिख और सातओं मण्डलीनके औ एफिसस, स्मुर्ना, पर्गामम, थिआटिरा, सार्डिस, फिलाडेल्फिया, और लाउडिकियाके पठा।”
\v 12 कौनको आवाज मिरसंग आयरहो हय कहिके मए पिछु घुमो और मय सात सोनेके सामदान देखो।
\v 13 और सामदानके बिचमे आदमीको पुत्र जैसो पओंतक लम्मो कपडा लगाओ भओ और छातीके आसपास सोनोको पेटी लगओ भओ एक जनी हुँवा रहए।
\v 14 बाको मुँड और बार ऊन और पालो जैसो सेतो, और बाको आँखी आगीको ज्वाला जैसी रहएँ।
\v 15 बाके पाओं आगीको भट्टी मे खारके चिल्कन बारो काँसो जैसो रहए, और बाको सोर त लणुरा आन बारो पानीको बाढ जैसो आवाज रहए।
\v 16 बाको दहिना हातमे सात तारा रहएँ, और बाको मुहुँसे एक धारबारो दोने पार धार भओ तरवार निकरो रहए। बाको मुहूँ दिनको तेज जैसो चमकत रहए।
\v 17 जब मए बाके देखो, तव मए अधमरा आदमी जईसो हुइके बाके पाओंमे पड़िगओ। तव बा अपन दहिना हात मिर उपर धरी और कहि, “ मत डराबए।" सुरु और अन्त महीं हऔं।
\v 18 मय जिन्दा हऔं। मए मरो रहौओं, पर देखओ, मए सदाके ताहिँ जिन्दा रहङ्गो, और मृत्यु और पतालके चाबी मिरसंग हएँ।
\v 19 जहेमारे, जो अभे हए, और जाके पिछु जो आबैगो तुम जो देखे हओ, सो लिखओ।
\v 20 मिर दहिना हातघेन तुमर देखी भई सात तारा और सात सामदानको बारेमे लुकी भई गुप्त बातको अर्थ सात तारा सात मण्डलीके स्वर्गदूत ओर सात सामदान सात मण्डली हएँ।”
\c 2
\cl अध्याय २
\v 1 एफिससके मण्डलीके दुतके लिखः 'जौन अपन दहिना हातमे सात तारा लेन बारो और जो सात सोनोको सामदानके बीचमे नेगन बारोको वचन जेही हएँ।
\v 2 तुमर करो भओ काम, तुमर कडो परिश्रम, तुमर धैर्य और सहनशिलता मोके पता हए।, और तुम खराब आदमीनके सहे न पात हओ। अपनयके प्रेरित कहिके दाबी करन बारेनके तुम जाँच डारे हओ, पर वास्तवमे बे न हएँ और तुम बिनके झुटे पाए हओ।
\v 3 मोके पता हए, कि तुममे धर्य सहनशिलता हय, और मिर नाउँके ताहीं तुम बहुत दुःख भोगे हओ तहुँ फिर तुम थके न हओ।
\v 4 पर तुमरे विरुद्धमे मिरसँग खास बात हएः तुम अपनपहीली प्रेमके त्याग दए हओ।
\v 5 जहेमारे, तुम कहाँसे गिरे हओ, सो सम्झओ। तुम पहिले करेभए काम करओ और पश्‍चाताप करओ। मय तुमरे ठिन आमङ्गो और तुम पश्‍चात्ताप न करेतक मय तुमरो समदानके बाको ठाउँसे हटाए देहऔं।
\v 6 पर तुमरमे जा बात ता हए, कि निकोलाइटसके करो कामके तुम घिड़ना करे हओ, जौनके मय भी घिड़ना करत हऔं।
\v 7 जौनको कान हए, बा सुनए, पवित्रआत्मा मण्डलीसे का कहत हए। जौन जितैगो, बाके मय जीवनको रुखासे खान अनुमति देहऔं जोन त परमेश्‍वरको स्वर्गलोक हए।"
\v 8 और स्मुर्नाको मण्डलीके दूतके जा लिख: जो आदि और अन्त्य हए जे वचन बहे के हएँ, जो मरिगव रहए, और जो फिर जिन्दा हुईगओ।
\v 9 मए तुमर कष्‍ट और तुमर गरीबी जानत हऔं, पर तुम त धनी हओ। मए बिनसे कहत हऔं तुमर निन्दा करनबारे जौन अपनएके यहूदी हऔं कहिके दाबी करत हएँ, पर वास्तवमे बे न हएँ। बे त शैतानके सभाघर हएँ।
\v 10 तुमर भोगन लागो कष्‍‍टसे मत डराबओ। देखओ शैतान तुम मैसे कित्तोनके तुमके जाँचके ताहिं कैदमे डारनके तयार हए, और दस दिनके ताहीं तुम कष्‍‍ट भोगैगे। मृत्यु तक विश्‍वासयोग्य हुइयो, और मए तुमके जीवनको मुकुट देमङ्गो।
\v 11 जौनको कान हए, बा सुनए, पवित्र आत्मा मण्डलीसे का कहत हए। जौन जितईगो, बाके दुसरो मृत्युसे कोइ हानि न हुइहए।
\v 12 और पर्गाममके मण्डलीके दुतके जा लिख: जा वचन दुईधारबारो पैनो तलवार संगमे होनबारो कहत हए,
\v 13 मोके पता हए, तुम कहाँ बैठत हऔ, हुवाँए जहाँ शैतानको सिंहासन हए। तहूँ फिर तुम मिर नाउँमे स्थिर बैठे हऔ। और शैतान बैठन बारो ठाऊँमे मरो भओ मिर विश्‍वासयोग्य साँची एन्टिपासको समयमे फिर तुम मिर उपरको अपन विश्‍वासके इन्कार न करे।
\v 14 पर तुमर विरुद्धमे मिरसंग कुछ बात हए, तुम मैसे कोइ-कोइ इस्राएलके लउँड़ा लउँड़ियानके मूर्तिनको बलिदान करो भओ खानु खामएँ और व्यभिचार करएँ कहिके बे लउँड़ा लउँड़ियानके अग्गु ठोकर लागनबारो पथरा फेंकन लगानबारो बालाकके सिकान बारो बालामको शिक्षाके कररे से पकडे हएँ।
\v 15 अइसी करके, तुमर बीचमे कोई कोई निकोलाइटसको शिक्षाके पक्के से पालन करन बारे फिर हएँ।
\v 16 जहेमारे, पश्‍चात्ताप करओ। यदि पश्‍चात्ताप न करैगे तव, मए तुमरे ठिन जल्दी आमङ्गो, और मिर मुखको तरवारसे तुमर विरुद्धमे लडाई करेहऔं।
\v 17 जौनको कान हए, बा सुनए, पवित्र आत्मा मण्डलीसे का कहत हए। जौन जितईगो, बाके मए गुप्त-मन्‍नको कुछ भाग देहऔं, और मए बाके नयाँ नाउँ लिखो एक सेतो पतरा देहऔं, पर बा नाउँ पान बारो बाहेक और कोइ न जानत हए।"
\v 18 और थिआटीराके मण्डलीके दुतके जा लिख: जा बात परमेश्‍वरको पुत्र कहत हए, जौनक आँखी ज्वाला जैसो और जौनक पाउ चिल्कन बारो काँसो जैसो हए।
\v 19 तुमर प्रेम, विश्‍वास, सेवा, और तुमर धिरज से सहन और तुमर करो भओ काम मोके पता हए। तुम जो अभे करे हऔ, बा पहिले करे भए काम से बहुत अच्छे हएँ।
\v 20 पर मिर सँग तुमर विरुद्धमे जा बात हए: तुम ईजेबेल कहन बारी बईयरके सहे हऔ। बा अपनएके अगमवादिनी कहत हए। और मिर सेवकनके व्यभिचार करन् और मुर्तिके चढओ खानु खान सिखात हए।
\v 21 मए बाके पश्‍चाताप करन के समय दओ, पर बा अपन व्यभिचारसे पश्‍चात्ताप करन् के इन्कार करी।
\v 22 देखओ ! मए बाके रोग-शय्यामे फेंक देहऔं, और बाकेसंग व्यभिचार करन् बारेनके बाको करो भओ कामके ताहीं पश्‍चात्ताप न करन तक बडो कष्‍‍ट देहऔं।
\v 23 मए बाके लउँड़ा लउँड़ियानके महामारीसे मारङ्गो, और मए बहे हओं जौन सबको मन और ह्रदय जाँच करत् हऔं कहिके सबय मण्डली जानङ्गे। मए हरेकके बाको काम अनुसारको इनाम देमङ्गो।
\v 24 पर तुम थिआटीरामे बाँकी रहेभए हरेक जौन जा शिक्षा न मानत् हएँ, और कित्तो ता शैतानके गहिरी बात न जानत् हएँ, मय तुमसे कहत हऔं, कि मए तुमर उपर और कोइ बोझ न बुकय हऔं।
\v 25 जैसो समयमे फिर मय न आनतक तुम पक्के से जाके थामे रहीओ।
\v 26 जौन जितईगो और अन्त तक मिर करो काम जौन करईगो, मए बाके जाति-जातिनके उपर अधिकार देहऔं,
\v 27 कुमणा मट्टीको भाँणानके बा खुद्रा-खुद्रा करके फोरे कता बा लोहेकि डन्डासे बिनके ऊपर शासन करेहए,
\v 28 मय मिर पिता से अधिकार पाओ जैसे बाके मय सुबेरेको तारा देहऔं।
\v 29 जौनको कान हए, बा सुनए, पवित्र आत्मा मण्डलीसे का कहत हए।"
\c 3
\cl अध्याय ३
\v 1 और सार्डिसके मण्डलीके दुतके जा लिख: 'सात तारा और परमेश्‍वरको सात आत्मा होनबारोको वचन जहे हए। तुमर करेभए काम मोके पता हए। तुम जिन्दा हओ करके नाउँ त हए, पर तुम मरे हओ।
\v 2 उठौ और जगे रहबओ और मरन् लागो बाँकी रही बातनके पक्को बनाओ, पर जा मरन लगो हए, काहेकी मए परमेश्‍वरको देखाइमे तुमर काम पुरा भओ न पाओ हऔं।
\v 3 जहेमारे, तुम जो बात पाए हओ और सुनेहौ, सो सम्झओ, बाके पालन करओ और पश्‍चाताप करओ। पर यदि तुम जागे न रएहओ, तव मए तुमर विरुद्धमे चुट्टा कता अए हऔं, और मए कौन बेरा अए हऔं, सो तुमके पता न हुइहए।
\v 4 पर सार्डिसके आदमीन मे कुछ नाउँ हएँ, जौन अपन लत्ताके घिनौनो न करी हएँ। बे सफेत कुर्ता लगाएके मिर संग नेगङ्गे, काहेकी बे योग्यके हएँ।
\v 5 जौन जितईगो, बाके सेतो कुर्ता पैंधाओ जायहए, और जीवनको पुस्तकसे मय बाको नाउँ कबहु न मिटएहऔं, और मए मिर पिता और बाके स्वर्गदूतनके अग्गु बाको नाउँ स्वीकार करेहऔं।
\v 6 जौनके कान हए, बा सुनए, पवित्र आत्मा मण्डलीसे का कहत हए।"
\v 7 फिलाडेल्फियामे भओ मण्डलीके दुतके जा लिख: जो सत्य और पवित्र हए हए, जे वचन बहेके हएँ, बा दाऊदको कुंजीके लयहए, बा खोलैगो और कोइ फिर बन्द न करपए हए, बा बन्द करेहए और कोई फिर खोल न पयहए।
\v 8 मोके तुमर करोभओ काम पता हए। देखओ, मए तुमर अग्गु खुल्ला फाटक करदौ हऔं और बाके कोइ फिर बन्द न कर सकतहए। मोके पता हए, कि तुमरसंग थोरी शक्ति हए, तहुँ फिर तुम मिर वचन पालन करे हओ, और मिर नाउँके इन्कार न करे हओ।
\v 9 देखओ, जौन अपनयके यहूदी हऔं कहिके कहात हएँ पर बे न हएँ, बे शैतानको सभाघर हएँ, पर बे झुट बोल रहे हएँ। मए बिनके तुमर पाउँके अग्गु ढोकन लगामङ्गो, और मय तुमके प्रेम करत हऔं करके बे जानङ्गे।
\v 10 तुम मेरो वचन धैर्यसंग पालन करे हओ, बहेमारे पृथ्वीमे जीन बारेनके जाँच आतपेति पुरो संसारमे आनबारी विपत्तिको समयमे पडनसे मय फिर तोके बचामङ्गो।
\v 11 मए जल्दी आमङ्गो। तुमरे संग जो हए बाके कसके पकडे रहिओ ताकि तुमरो मुकुट कोइ लइजा ना सकए।
\v 12 जौन जितईगो, बाके मए मिर परमेश्‍वरको मन्दिरमे एक खम्मा बनामङ्गो, और बा बासे कबहु बाहिर ना निकरैगो। मए बामे मिर परमेश्‍वरको सहेरको नाउँ, मिर परमेश्‍वरको नाउँ, ( नयाँ यरुशलेम , जोन मिर परमेश्‍वरसे स्वर्गसे तरे आत हए ), और मेरो नयाँ नाउँ मए लिख देमङ्गो।
\v 13 जौनको कान हए, बा सुनए, पवित्र आत्मा मण्डलीसे का कहत हए।"
\v 14 और लाउडिकियाके मण्डलीके दूतके जा लिख: परमेश्‍वरको सृष्‍टि ऊपरको शासनकर्ता जो विश्‍वासयोग्य और सच्चो साँची, 'जे वचन आमेनके हएँ।
\v 15 मोके तुमर काम पता हए। कि तुम नत् तत्तो नत् जुड़े हऔ। तुम कि त तत्ते या जुड़े होनके मय चाँहत रहऔं।
\v 16 जहेमारे, तुम गुन्गुने हौ, नत् जुड़े नत् तत्ते हऔ। जहेमारे, मए तुमके मिर मुहुँसे ऊगलन डटो हऔं।
\v 17 "मए धनी हऔं, और मिरसंग धन-सम्पति हए, और मोके कोइ बात कि कमि न हए" कहिके तुम कहत हओ, पर तुमके पतए न हए कि तुम दु:खी, दयनीय, गरीब, अन्धरा और नङ्गे हओ।"
\v 18 मिर सल्लाहके ध्यान देओः आगीसे शुद्ध करो भओ सोनो मोसे खरदीओ ताकि तुम धनी होन सकौ, और तुमर नङ्गोपनको शर्म तोपन चम्किलो सेतो कुर्ता लगाबओ और तुमर नङ्गोपनको शर्म न होबए और अपन आँखीमे मलहम लगाबौ ताकि तुम देख सकौ।
\v 19 मिर प्रेम करनबारे हरेकके मय तालिम देत हऔं, और बे कइसे जीन पड़ईगो सो मय बिनके सिकामङ्गो। जहेमारे, पश्‍चात्ताप करओ और इमानदार होबओ।
\v 20 देखओ, मए फाटकमे ठाड़के ढकढकात हओं। यदि कोइ मिर सोर सुनके फाटक खोलगे तव, मए बाके घरभितर आमङ्गो और बाकेसंग खानु खाए हओं और बा मिरसंग खबईगो।
\v 21 जौन जितईगो, बाके मिर सिंहासनमे मिर संग बैठनके अधिकार देहऔं, जैसी मए फिर जितो और उइसिय मय फिर मिर पिताकेसंग बाको सिंहासनमे बैठो हओं।
\v 22 जौनके कान हए, बा सुनए, पवित्र आत्मा मण्डलीनसे का कहत हए।
\c 4
\cl अध्याय ४
\v 1 जे बातके पिछु मए देखो, और स्वर्गमे एक फाटक खुलो भओ रहए। मिर सुनो भओ तुरहीको जैसोपहीली आवाजमे मोसे कही- "यितए उपर आ, और जा बातपिछु का होनबारो हए मए तोके दिखामङ्गो।”
\v 2 एकय छिनमे मए आत्मा मे रहौं, और स्वर्गमे एक सिंहासन मय देखो, जौनके उपर कोइ विराजमान रहए।
\v 3 बाके उपर विराजमान होनबारो स्फटिक और लालमणि जैसो दिखात रहए। सिंहासनके आसपास धनकमान रहए। बा धनकमान मोती जैसो चम्किलो दिखात रहए।
\v 4 बा सिंहासनके आसपास चौबीस सिंहासन रहएँ, और चौबिस जनी एल्डर बिनके मुणमे सोनोको मुकुट लगाय और सेतो कुर्ता पैंधके बैठे रहएँ।
\v 5 सिंहासनसे बिजुलीको चमक और गर्जन निकरके आत रहए, और बिजुली संगय नष्‍ट हुइगए। सिंहासनके अग्गु सात बत्ती पजरत् रहएँ। बे बत्ती त परमेश्‍वरके सात आत्मा रहएँ।
\v 6 सिंहासनको अग्गु स्फटिक जैसो दिखानबारो काँचको समुन्द्र रहए। सिंहासनके बिचमे और सिंहासन आसपास, अग्गु और पिछु आँखी-आँखीसे भरी चार जिन्दा प्राणी रहएँ।
\v 7पहीली जिन्दा प्राणी बग्ठा जैसो रहए, दुसरो जिन्दा प्राणी बछ्रा जैसो रहए, तिसरी जिन्दा प्राणीको अनुहार आदमीको जैसो रहय और चौथो जिन्दा प्राणी उडरहो चिलहरिया जैसो रहए।
\v 8 चारौ जिन्दा प्राणीमैसे हरेकके छए-छए पखना रहएँ और तरे और उपर आँखीआँखी से भरि रहएँ। दिनरात बे “पवित्र, पवित्र, पवित्र सर्वशक्तिमान् परप्रभु परमेश्‍वर जो रहए, और जो हए, और जो आनबारो हए” कहात रहएँ।
\v 9 जब बे जिन्दा प्राणी सिंहासनमे विराजमान होनबारो, और सदामान जिन्दा रहनबारोके महिमा, आदर और धन्यवाद दईं,
\v 10 चौबीस जनी एल्डर झुक्के सिंहासनमे बिराजमान होनबारेके अग्गु दण्डवत् करीं। बे सदामान जिन्दा होनबारेके दण्डवत करीं, और सिंहासनके अग्गु अपन-अपन मुकुट धरके अइसे कहीं,
\v 11 "हमर परमप्रभु और परमेश्‍वर, तुम महिमा, आदर, और शक्ति ग्रहण करनके योग्य हओ। काहेकी तुम सबय चीज सृष्‍टि करेहौ, और तुमर इच्छाद्वारा बे अस्तित्वमे आए, और सृष्‍टि भए।”
\c 5
\cl अध्याय ५
\v 1 तव सिंहासनमे विराजमान होनबारेके दहिना हातघेन सात मोहर लगाएके बन्द करो भओके अग्गु और पिच्छु लिखो भओ एक चर्मपत्रको मुठा मय देखो।
\v 2 “जा मुठा खोलन और जाको मोहर तोणनको योग्यको कौन हए ?” कहिके एक जनी शक्तिशाली स्वर्गदूत बडो सोरमे घोषणा करत मय देखो।
\v 3 स्वर्गमे औ जा पृथ्‍वीमे और जा पृथ्‍वी तरे भए कोइ भी जा चर्मपत्रको मुठा खोलन औ जाके पढन न सिकीं।
\v 4 मय दुःखित हुएके रोओ, काहेकी जा चर्मपत्रको मुठाके खोलन और पढन योग्यको कोइ न मिलो।
\v 5 पर बे एल्डर मैसे एक जनी मोसे कही, “मत रोबय। देख ! यहूदाको कुलको बग्ठा, दाऊदको मूल विजय पाई हए। जा मुठा और जा सात मोहर खोलन बा योग्यको हए।"
\v 6 मय सिंहासन और चार जिन्दा प्राणी और एल्डरनके बीचमे मरो भओ जैसो दिखानबारो एक थुमाके ठाडो भओ देखो। बाके सात सिङ और सात आँखी रहएँ, बे सबय संसार भर पठाए भए परमेश्‍वरके सात आत्मा हएँ।
\v 7 बा गओ, और सिंहासनमे विराजमान होनबारेके दाहिना हातसे बा मुठाके लई।
\v 8 जब बा जा मुठाके लई, तव बे चारौ जिन्दा प्राणी और चौबीस एल्डर थुमाके अग्गु घुप्‍‍टा पड़े। बिनके हरेकसंग वीणा और धुपसे भरो सोनोके धुपौरा रहएँ, जौन विश्‍वासिनको प्रार्थना हएँ।
\v 9 बे एक नयाँ गीत गाइँ: "तुम जा खालको पत्रको मुठा लेन और बा मोहर तोणन योग्यके हओ काहेकि तुम मारेगए, और तुमर रगतसे हरेक जाति, भाषा, आदमी और राष्‍ट्रनके तुम परमेश्‍वरके ताहीं खरीदे हओ।
\v 10 परमेश्‍वरको सेवा करन तुम बिनके राज्य और पुजारी बनाए हओ, और बे पृथ्वीमे राज करङ्‍गे।”
\v 11 तव मए देखो, और सिंहासन, जिन्दा प्राणी और एल्डरनके आसपास गजम स्वर्गदूतको आवाजके सुनो। बिनको पुरा संख्या दशौं हजार और हजारौं हजार रहए।
\v 12 बे वडो आवाजमे अइसे कहीं, शक्ति, धन, बुद्धि, बल, आदर, महिमा,और प्रशँसा पानके योग्य मरो भओ थुमा हए।”
\v 13 स्वर्गमे, पृथ्‍वीमे, पृथ्‍वी तरे और समुन्दर तरे सृष्‍टि करे भए हरेक चीजनके अइसे कहत मए सुनो, " बा जो सिंहासनमे विराजमान होनबारो और थुमाके प्रशंसा, आदर, महिमा, और राज करन शक्ति सदामान होबए।”
\v 14 तव बे चारौ जिन्दा प्राणी कहिँ, “आमेन।” और एल्डर घुप्‍टा पणके सदामान रहनबारेके आराधना करीं।
\c 6
\cl अध्याय ६
\v 1 जब थुमाके सात मोहर मैसे एकके खोलत मए देखो, और बे चार जिन्दा प्राणी मैसे एक जनी गर्जनको आवाज जैसोमे अइसो कहत मए सुनो, “आओ।”
\v 2 और मए देखो और हुँवा एक सेतो घोड़ा रहए। बाके उपर बैठनबारो एक धनुस पकड़े रहए, और बाके एक मुकुट दगओ। और जीतन जैसो करके बा विजय होन निकरो।
\v 3 "जब थुमा दुसरो मोहर खोली, तव बा दुसरो जिन्दा प्राणीके "आओ, काहत मय सुनो। "
\v 4 और दुसरो अग्‍निमय लाल घोड़ा बाहिर निकरके आओ। बामे सवार करनबारेके पृथ्वीसे शान्ति लईके जान अनुमति दओ गओ रहए। बहेमारे, बे आदमी एक-दुसरेके मारङ्‍गे। जे घोडसवारके एक बड़ो तरवार फिर दओ गओ रहए।
\v 5 "जब थुमा तिसरो मोहर खोली, तव तिसरो जिन्दा प्राणीके "आओ, काहत मए सुनो। मए एक कारो घोड़ाके देखो, और घोडा सवार करन् बारोके हातमे एक जोर तखरी के पकड़े रहए।"
\v 6 मय चार जिन्दा प्राणीके बिचमे एक आवाज जैसो दिखानबारो अइसो काहत मए सुनो, "एक दिनको मजुरीमे ( ज्यालामे ) एक किलो गेहुँ और एक दिनको मजुरीमे तीन किलो जौ, पर तेल और दाखरसके नष्‍‍‍ट मत करिओ।”
\v 7 जब थुमा चौथो मोहर खोली, तव मय चौथो जीवित प्राणीके "आओ" काहत आवाजके सुनो।
\v 8 तव मए पेरो घोड़ाके देखो। बाको घोडासवार करन् बालोको नाउँ "मृत्यु" रहए, और "पताल" बाके पिछु पिछु लागो रहए। और बे पृथ्वीके एक-चौथाइ भाग ऊपर तरवारसे मारन, अनिकालऔर रोगन ऊपर, और पृथ्वीके जँगली जनावरनके मारनके अधिकार दओगओ रहए।
\v 9 जब थुमा पाँचौ मोहर खोली, तव वेदीके तरे परमेश्‍वरको वचन और बिनके गवाहीके कारन मरे भए आत्मनके मय देखो।
\v 10 बे ऊँचो सोरमे चिल्लाईं, “ सबयके ऊपरको शासक, पवित्र और सच्चो, कबतक तुम हमर रगतको बदला न लेहओ और पृथ्‍वीमे बचेभयनके न्याय न करहओ ?”
\v 11 तव बे हरेकके एक सेतो कपड़ा दईं, और बिनके सहकर्मी सेवकन और बिनके ददा भैयनके और दिदी-बहिनियानके बिनके जैसे जो मरे भयनके संख्यामे पुरो न भए तक बिनके ईन्तजार करन कहोगओ।
\v 12 जब थुमा छैटौं मोहर तोडी, तव हुँवा एक बणो हाला चाला गओ मय देखो। दिन भाङग्राको कपड़ा जैसो कारो हुइगओ, और जोनी पुरा रगत जैसो बनिगओ।
\v 13 जैसो अञ्‍जीरको रुखाके आँधी हलातपेति न पके फरा झरे जैसे बादरमे भए तारा पथ्‍वीमे गिरे।
\v 14 बादर खालको चिठ्ठीको मुठाजैसे बिटके लोप हुइगओ, जो बिटाओ गओ रहए। हरेक पहाड़ और टापु बाको ठाउँसे हटके चलेगए।
\v 15 तव पृथ्‍वीके राजा और खाश आदमी और सर्व सधारन, धनी, शक्तिशाली, और दास और स्वतन्त्र हरेक आदमी पहाडके चट्टानके बिचमे और गुफामे लुके।
\v 16 बे पहाड और चट्टानसे कहीं, “हमर उपर गिर्, और सिंहासनमे विराजमान होनबारेके मुहुँसे, और थुमाको क्रोधसे हमके लुकाबओ।
\v 17 काहेकी बाको क्रोधको महान दिन आएगओ हए, और हुँवा कौन ठाड़ सकत हए ?”
\c 7
\cl अध्याय ७
\v 1 बक पिच्छु पृथ्‍वीके चारौ कोनेमे चार जनी स्वर्गदूत ठाड़े भए मय देखो जौन पृथ्‍वीके चारौघेन आँधीके तगडेसे पकड़े रहएँ। जहेमारे कि, पृथ्वी, समुन्दर औ कोइ फिर रुखाके विरुद्धमे कोइ फिर आँधी न चलय।
\v 2 तव जिन्दा परमेश्‍वरको मोहर लैके दुसरो स्वर्गदूत अगारसे ऊपर आतय मय देखो, जौन पृथ्‍वी और समुन्द्रके नोकसान करन अनुमति पाए भए चार स्वर्गदूत बड़ो सोरसे चिल्लएके आइसो कही,
\v 3 हमर परमेश्‍वरके सेवकनके माथेंमे हमय मोहर ना लगानतक पृथ्‍वी समुन्द्र औ रुखनके कोइ खराबी मत करियो।”
\v 4 मए मोहर लगाए भए बारेनको संख्या सुनो। बे एक लाख चवालिस हजार रहएँ, जो इस्राएलके आदमिनको हरेक कुलसे छाप लगाए भए रहएँ।
\v 5 यहूदाको कुलसे बाह्र हजारके, रुबेनको कुलसे बाह्र हजारके, गादको कुलसे बाह्र हजारके मोहर लगाओ गओ रहए।
\v 6 अशेरको कुलसे बाह्र हजारके, नप्तालीको कुलसे बाह्र हजारके और मनश्‍शेको कुलसे बाह्र हजारके मोहर लगाओ गओ रहए।
\v 7 शिमियोनके कुलसे बाह्र हजारके, लेबीके कुलसे बाह्र हजारके, इस्साखारको कुलसे बाह्र हजारके,
\v 8 जबुलूनको कुलसे बाह्र हजारके, योसेफके कुलसे बाह्र हजारके और बेन्यामीनको कुलसे बाह्र हजारके मोहर लगाओ गओ रहए।
\v 9 जे बातनके पिच्छु मय देखो, हरेक जाति, कुल, आदमी और भाषाके कोइ फिर गिनन नसिकन बारो एक बहुत भारी भिड सेतो कुर्ता पैंधके और अपन अपन हातमे खजुरीक हाँगा लईके सिंहासन अग्गु और थुमाके जौने ठाड़े रहएँ।
\v 10 और बे बड़ो सोरसे बुलान ड़टे रहएँ “सिंहासनमे विराजमान होनबारो हमर परमेश्‍वर और थुमामे मुक्ति हए।”
\v 11 और सबय स्वर्गदूत चार जिन्दा प्राणी, एल्डरनके आसपास और सिंहासनके आसपास ठाडिगए और बे सिंहासनके अग्गु घुप्‍‍टा पणके अपन अनुहार झुकाईं। बे अइसे करके परमेश्‍वरके आराधना करीं,
\v 12 "आमेन ! हमर परमेश्‍वरको प्रशंसा, महिमा, बुद्धि, धन्यवाद, आदर, शक्ति, और सामर्थ्य सदामान होबए। आमेन।"
\v 13 बक पिच्छु एल्डरन मैसे एक जनी मोसे पुँछी, “जे सेतो कुर्ता लागन बारे कौन हएँ, और बे कहाँसे आए हएँ ?”
\v 14 और मए बासे कहो, “हजुर तुमही के पता हए,” और बा मोसे कहि, 'जे बेहिं हँए, जो महासंकटसे आए हएँ, और बे अपन कपड़ा थुमाके रगतसे धोएके सेतो बनाईं हएँ।
\v 15 जहेमारे, बे परमेश्‍वरको सिंहासनके अग्गु हएँ, और दिनरात बाको मन्दिरमे बाको आराधना करत् हएँ। सिंहासनमे बिराजमान होनबारो अपन उपस्थितिमे बिनके शरण देहए।
\v 16 बे फिर भुखे न हुइहएँ और न प्यासे हुइहएँ। दिनको राप बिनके उपर न पड़ेहए, न त कोइ ताप बिनके जलाए हए।
\v 17 काहेकी सिंहासनके बीचमे होनबारो थुमा बिनको बकरेह्रा होबईगो, और बा बिनके जिन्दा पानीको मुहान घेन डुरियाबैगो, और परमेश्‍वर बिनके आँखीसे सब आँसु पछोन देबईगो।”
\c 8
\cl अध्याय ८
\v 1 जब थुमा सातौं मोहर खोली, तव लगभग आधा घण्टा तक स्वर्गमे सन्‍नाटा छाइगओ।
\v 2 बक पिच्छु मय परमेश्‍वरके अग्गु ठाड़े भए सात स्वर्गदूतनके देखो, और बिनके सात तुरही दओगओ।
\v 3 दुसरो स्वर्गदूत आओ, और सोनोको धुपौरो लैके बेदीके जौने ठाड़ गओ। सिंहासनके अग्गु सबय विश्‍वासिनके प्रार्थनासंगय चढ़ानके ताहिँ बा स्वर्गदूतके बहुत धुप दओ गओ।
\v 4 विश्‍वासिनके प्राथानासंगय धूपको धुवाँ स्वर्गदूतके हातसे परमेश्‍वरको अग्गु पुगो।
\v 5 तव स्वर्गदूत धुपौरो लई और बेदीसे आगी बामे भरी, तव बा बाके पृथ्‍वीमे फेंक दई, और बिजुली, गडगडाहट, बिजुलीको चमक पैदा हुइगओ और हलाचाला आइगओ।
\v 6 तव सात तुरही होनबारे सात स्वर्गदूत तुरही फुकन तयारी भए।
\v 7पहीली स्वर्गदूत अपन तुरही फुँकी, और हुँवा पथरा और रगत मिलोभओ आगी आई, बाके तरे पृथ्‍वीमे फेंको गओ। जासे पृथ्‍वीको तीन भागको एक तिहाइ भागके जरायदई, तीन भागको एक-तिहाइ रुखानके जरायदई और सबय हरे घाँस फिर डुँगिगए।
\v 8 दुसरो स्वर्गदूत अपन तुरही फुँकी, और आगीसे जलरहो एक बडो पहाड़ जैसो समुन्दरमे गिरो और समुन्दरको एक-तिहाइ भाग रगत बनिगओ।
\v 9 बक पिच्छु समुन्दरमे भए जिन्दा प्राणी मैसे एक-तिहाई भाग मरिगए, और जहाजनके एक-तिहाइ भाग नष्‍‍ट हुइगए।
\v 10 तिसरो स्वर्गदूत अपन तुरही फुँकी, और बादरसे पजरत ऊँका कता एक बडो तारा नदियानको एक तिहाई भागमे और पानीके मोहानमे गिरो।
\v 11 "बा ताराको नाउँ "ऐरेलु" हए, एक-तिहाई भागको पानी तितो हुइगओ, और बा तितो भओ पानीके कारन बहुत आदमी मरिगए।
\v 12 चौथो स्वर्गदूत अपन तुरही फुँकी, और दिनको एक-तिहाइ भाग उपर संगसंगय जोनीको एक-तिहाइ भाग उपर और तारानको एक-तिहाइ भाग उपर प्रहार करोगओ और एक-तिहाइ भागनमे अन्धियारो हुइगओ, और दिनको एक-तिहाइ और रातको एक-तिहाइ भागमे उजियारो न भओ।
\v 13 और मए देखो, और बादरके बिचमे उड़रहो एक गरुड जोड़से अइसे कहिके चिल्लात सुनो, “बाँकी रहे तीन स्वर्गदूतके फुकनय लागे तुरहीके आवाजके कारन पृथ्‍वीमे बईठनबारे आदमिनके धिक्कार, धिक्कार, धिक्कार।”
\c 9
\cl अध्याय ९
\v 1 बक पिच्छु पाँचौ स्वर्गदूत अपन तुरही फुँकी, और मए स्वर्गसे पृथ्‍वीमे एक तारा गिरत देखो। बा ताराके अतलकुण्डको चाभी दओ गओ।
\v 2 बा अतलकुण्ड खोली, और बा कुण्डसे आगीको भठ्ठीसे निकरो धुवाँ जैसो उपर जान डटो रहय। और धुवाँ दिन और वायुमण्डलके अँध्यारो बनाएदई।
\v 3 बा धुवाँसे पृथ्‍वीमे तिड़ीदल निकरके आए। और पृथ्‍वीमे बिच्छीनको जैसो शक्ति बिनके दओ गओ।
\v 4 पृथ्‍वीमे भए घाँस औ कोइ फिर हरि बोट बिरुवा औ रुखानके नुकसान मत करीओ कहिके बिनके कहोगओ। पर बिनके माथे मे परमेश्‍वरको मोहर न भए आदमिनके इकल्लो नुकसान करियो कहिके कहोगऔ।
\v 5 बे आदमिनके मत मरीओ, पर पाँच महिना इकल्लो यातना दिओ, कहिके अनुमति दओ गओ। और बिनको पीडा एक जनी आदमीके बिच्छी डसो जैसो होबईगो।
\v 6 बे दिनमे आदमी मृत्यु ढुड़ङ्गे, पर न पामङ्गे। बे मरन बडो इच्छा करङ्गे, पर मृत्यु उन्से भाजएगी।
\v 7 तिड़ीदल लडाईके ताहिँ तयार करे घोड़ा जैसे दिखात रहएँ। बिनके मुड़मे सोनोको जैसो मुकुट रहएँ, और बिनके अनुहार आदमीनको अनुहार जैसे दिखात रहएँ।
\v 8 बिनको बार बैयरनको बार जैसो रहए और बिनको दाँत बाघटाको दाँत जैसो रहए।
\v 9 बिनको छाती-पाता, लोहेको छाती-पाता जैसो रहए और बिनको पखनाको आवाज लडाईमे दौरन बारे बहुत रथ और घोड़नके जैसे रहएँ।
\v 10 बिनके पुँछ और खिल बिच्छीके जैसे रहएँ, और बिनको पुँछमे पाँच महिनातक आदमीनके कष्‍ट देनबारो शक्ति रहए।
\v 11 गहिरो अतल कुण्डको स्वर्गदूत बिनके राजा जैसो रहए। हिब्रू भाषामे बाको नाउँ एबाड्डोन रहए और ग्रीक भाषामे बाको नाउँ अपोल्लियोन रहए।
\v 12पहीली विपत्ति बितगओ। देखओ, बक पिच्छु दुई विपत्ति आन बाँकीय हएँ।
\v 13 और छैठौं स्वर्गदूत अपन तुरही फुँकी। और मए परमेश्‍वरके अग्गु भओ सोनोको बेदीके सिङसे एक आवाज आत सुनो।
\v 14 तुरही लेन बारो छैठौं स्वर्गदूतको आवाज अइसो कही, “बडी नदिया यूफ्रेटिसमे बाँधे भए बे चार स्वर्गदूतनके छोडदेओ।”
\v 15 मानव-जातिको एक-तिहाइ भागके मारनके बहे घड़ी, बहे महिना और बहे सालके ताहिँ तयार करेभए चार स्वर्गदूत छोडेगए।
\v 16 बे घोडा सवार भए सिपायनको संख्या बिस करोड रहए। मय बिनको संख्या सुनो।
\v 17 अइसिय मिर दर्शनमे घोडा और घोड़ाके उपर सवार होनबारेनके देखो। बिनके छातीके कवज आगीको जैसो लाल, गाढा निलो और गन्धक जैसो पेरो रहए। बे घोडनके मुड़ बघटानको मुड़ जैसे रहएँ, और बिनको मुँहूसे आगी, धुवाँ और गन्धक निकरत रहए।
\v 18 बिनके मुँहुसे निकरो आगी, धुवाँ और गन्धकको जे विपत्तिद्वारा आदमीको एक-तिहाइ भाग मरे।
\v 19 काहेकी बे घोडनको शक्ति बिनके मुहूँ और पुँछमे रहए, काहेकी बिनके पुँछ साँप जैसे रहएँ, बिनको मुणके मारसे आदमीनके चोट पुगाइ रहएँ।
\v 20 बाँकी रहे मानव-जाती जो जा विपत्तिनसे न मरे रहएँ, बे अपन करे कामसे पश्‍चात्ताप न करीं। बिनके सोनो, चाँदी, काँसो, पथरा और कट्ठा और देखन, सुनन औ नेगन न सिकनबारे चीजनके मुर्तिनके और भूतनके पुजन न छोडीं।
\v 21 न त बे अपन करेभए हत्या, जादुगरी, व्यभिचार और चोरी जैसे कामसे पश्‍चात्ताप करीं।
\c 10
\cl अध्याय १०
\v 1 बक पिच्छु मए स्वर्गसे दुसरो शक्तिशाली स्वर्गदूत उत्तरत देखो। बाके बादर घेरे रहए, और बाके मुड़मे धनकमान रहए। बाको मुहुँ दिन जैसो और बाके टाङ आगीके खम्मा जैसे रहएँ।
\v 2 बाके हातमे खुलो भओ एक छोटो चर्मपत्रको मुठा रहए, और बा अपन दहिना पाँव समुन्द्रमे और अपन दिबरा पाँव पृथ्वीमे धरे रहए।
\v 3 बक पिच्छु बा बघटा गर्जो हानी जोडसे चिल्लाई। जब बा चिल्लाई, तव सात गर्जनसे अपन आवाज निकारी।
\v 4 जब बा सात गर्जनसे आवाज निकारी, तव मए लिखन लागो रहओं, पर मय स्वर्गसे अइसो कहो भओ आवाज सुनो, "बे सात मेघ गर्जनको निकरे बात के गुप्त मे धर, जाके मत लिखए।"
\v 5 तव मय स्वर्गघेन अपन दहिना हात उठाए समुन्द्र और पृथ्वीमे ठाड़ो भओ स्वर्गदूतके देखो।
\v 6 बक पिच्छु सदामान जिन्दा रहनबारो, जौन स्वर्ग और बामे भए सबय चीज, पृथ्वी और बामे भए सबय चीज, समुन्द्र और बामे भए सबय चीज सृष्‍टि करनबारेके नाउँमे कसम खाएके स्वर्गदूत कही, "अब हुवाँ देर न हुइहए।
\v 7 पर बा दिन सातौं स्वर्गदूत अपन तुरही फुकन लागतए बा दिनमे बाके सेवक अगमवक्तानके घोषणा करो जैसो बा रहस्य परमेश्‍वर पुरा करईगो।"
\v 8 तव स्वर्गसे मए सुनो भओ आवाज मोसे फिर अइसे कही, "जा, समुन्द्र और जमीनमे ठाड़े स्वर्गदूतको हातमे भओ खुल्ला चर्मपत्रको मुठा ले।”
\v 9 जब मय स्वर्गदूत ठिन गओ और बा छोटो चर्मपत्रको मुठा माँगो, तब बा मोसे कहि, "चर्मपत्रको मुठा ले, और खा। जा तेरो पेट खट्टो बनाबईगो, पर तिर मुहुँमे जा सहत जैसो मिठो होबईगो।”
\v 10 मए स्वर्गदूतके हातसे बा छोटो चर्मपत्रको मुठा लईलओ, और बाके खाएलओ। मिर मुहूँमे बा सहत जैसो मिठो हुईगओ, पर मय जाके खाएके पिच्छु मिर पेट खट्टो हुइगओ।
\v 11 और मोके कोइ कहि, “बहुत आदमीनके, जातिनके, भाषानके और राजानके बारेमे फिर तोके अगमवाणी कहन पडईगो।”
\c 11
\cl अध्याय ११
\v 1 मोके नापन निगालोको एक टाँगो दओगओ और अइसो कहोगओ, “उठ और परमेश्‍वरको मन्दिर और वेदी, और जौन बामे आराधना करत हएँ बिनको नापले।
\v 2 पर मन्दिरसे बाहिर चोकको भागके मत नपिये, काहेकी बा गैरयहूदीनके दओगओ हए। बे बयालीस महिनातक पवित्र सहेरके कुलचङ्‍गे।
\v 3 मिर दुई साँचीनके मय एक हजार दुई हजार सय साठी ( १२६० ) दिनके ताहीं भाङ्ग्राको कपड़ा लगाएके अगमवाणी करन अधिकार देमङ्गो।”
\v 4 जे साँची जैतुनको दुई रुखा और दुई सामदान हएँ, जो पृथ्वीमे परमेश्‍वरके अग्गु ठाडे रहएँ।
\v 5 अगर कोइ बिनके नुक्सान करन चाहँत हएँ तओ, बिनके मुहूँसे निकरो आगी बिनके शत्रुनके नाश करेहए। कोइ बिनके नुक्सान करन चाहँत हएँ तओ, बिनके फिर अइसिय मरन पडहए।
\v 6 जे साँचीनसंग अगमवाणी करो समयमे पानी न पडए कहिके बादर बन्द करन अधिकार रहए। जे साँचीनके मेंह बर्सान सिकन तकको अधिकार बिनके अगमवाणीको समयमे पाइ रहएँ। और पानीके रगतमे बदलन सिकन और पृथ्‍वीके बहुत किसिमको विपत्तिनसे बिनके इच्छा लागो समयमे प्रहार करन शक्ति बिनकेसंग रहए।
\v 7 जब बे अपन गवाहीको काम खतम करङ्‍‍‍‍‍गे, तव अतल कुण्डसे निकरके आनबारो बा पशु बिनसे युद्ध करईगो। बा बिनके जितईगो और बिनके मारइगो।
\v 8 बिनको मरो शरीर बड़ो सहेरके बाहिर डगरघेन पड़े रहमङ्गे, (जौन सहेरके साँकेतिक रुपमे सदोम और मिश्र कहत हँए), जहाँ बिनको प्रभु क्रूसमे टँगो रहए।
\v 9 काहेकी साढे तीन दिनतक हरेक राष्‍ट्र, जाति, भाषा और आदमी बिनकी मरी शरीर देखङ्गे। और बे लाहसनके कब्रस्थानमे गाड़न अनुमति न देहएँ।
\v 10 पृथ्‍वीमे रहनबारे बिनको मृत्युमे आनन्द मनाए हएँ और उत्सव मनाय हएँ। बे आपसमे उपहार लेन देन फिर करेहएँ। काहेकी बे दुई अगमवक्ता पृथ्‍वीमे रहनबारेनके दुख दई रहएँ।
\v 11 पर साढे तीन दिन पिच्छु परमेश्‍वरसे आओ जीवनको सास बिनके भितर जाबईगो और बे अपन टाँगमे ठाड़ङ्गे और बिनके देखन बारेनके बहुत डर छाबईगो।
\v 12 तव बे स्वर्गसे एक बड़ो आवाज “यितए उपर आओ।” कहिके बे सुनङ्गे। और बिनके दुश्मन देखतै देखत बे बादर उपर स्वर्गघेन जामङ्गे।
\v 13 बहे समयमे हुवाँ बहुत भारी हालाचाला जाबईगो, और सहेरको दशौं भाग पूरा रीतिसे नाश होबईगो, बा हालाचालासे सात हजार आदमी मरङ्गे और बचेभए डराएके स्वर्गको परमेश्‍वरको महिमा देमङ्गे।
\v 14 दुसरो बिपत्ति बितगओ, “देखओ, तिसरी विपत्ति जल्दी आए रहो हए।
\v 15 तव सातौं स्वर्गदूत अपन तुरही फुँकी, और स्वर्गमे अइसे करके बडो आवाज गुन्जो, “ संसारको राज हमर प्रभु और बाको ख्रीष्‍टको राज भओ हए, और बा सदामान राज करईगो।”
\v 16 बक पिच्छु चौबिस जनी धर्म-गुरु जो बिनके सिंहासन अग्गु अपन-अपन आसनमे परमेश्‍वरके उपस्थितिमे घुप्‍‍टा हुइके अनुहार झुकाए बईठे रहएँ, बे परमेश्‍वरके आराधना करीं,
\v 17 बे कहान लागे, सर्वशक्तिमान परमप्रभु परमेश्‍वर हम तुमके धन्यवाद देत हएँ, जो हए, और जो रहए, काहेकी तुम महान शक्ति हातमे लएहओ और राज करन शुरु करदए हओ।
\v 18 संसारके राष्‍ट्र क्रोधित भए रहएँ, पर तुमरो क्रोध प्रकट भओ हए। मरेनको इन्साफ करन समय आएगओ हए, और तुमर दास अगमवक्ता, सन्तनके जो विश्‍वासी हएँ, और जो तुमर नाउँमे डरात हएँ, जरुरी न भएबारे और शक्तिशाली दोनोके इनाम देन समय और पृथ्‍वीके विनास करन बारेनके नाश करन समय आएगओ हए।”
\v 19 तव स्वर्गमे परमेश्‍वरको मन्दिर खोलोगओ और मन्दिर भितर बाको करारको सन्दुक दिखानो। हुवाँ ज्योतिके चमकन, गर्जन, बिजुलीको आवाज संगय हालाचाला आओ, और बड़े-बड़े पथरा पड़े रहएँ।
\c 12
\cl अध्याय १२
\v 1 स्वर्गमे एक बड़ो चिन्ह दिखानो: दिनके पईंधे और जोनीके अपन पाँव तरे कुचले एक बईयर बाह्र तारा भओ मुकुटके लगाए रहए।
\v 2 बा गर्भवती रहए, और बालका जन्मानके प्रसव-वेदनामे चिल्लान डटी रहए।
\v 3 बक पिच्छु स्वर्गमे दुसरो चिन्ह दिखानो: देखओ ! हुवाँ बडो लाल सात मुँड़, दस सिङ और बाके मुँडमे सात मुकुट लगाए एक बडो लाल अजिङ्गर रहए।
\v 4 बाको पुँछसे स्वर्गमे भए एक तिहाइ ताराके समेटके बिनके पृथ्वीमे फेंक दई। बालक जल्मान लागी बा बईयरके अग्गु बा डरौनो पशु ठाडो रहए ताकि बाको बालकाके जल्मात खिनक निल सकए।
\v 5 बा एक बालक जल्माई, जौन सबय जातिनके उपर लोहाको डन्डासे शासन कर हए। बाको बालकके छिनाएके परमेश्‍वर और बाको सिहासनघेन लैजाओ गओ।
\v 6 और बा बईयर उजाड-स्थान भितर भाजी, जहाँ परमेश्‍वर बाके ताहिं ठाउँ तयार करी रहए, ताकि एक हजार दुई सय साठी दिन तक बाके पालनपोषण करन सिकए।
\v 7 और स्वर्गमे लडाई भओ। मिखायल और बिनके दूत बा अजिंगरसे युद्ध करीं और अजिंगर और बाके दूत फिर युद्ध करीं।
\v 8 पर जीतनके ताहिं बा अजिङ्गरसंग बहुत बल न रहए। जहेमारे, स्वर्गमे बाको और बाके दूतनके ताहिं कोइ ठाउँ न भओ।
\v 9 बा बडो अजिंगर और पुरानो साँप जौनके दुष्‍ट या शैतान कहात रहएँ, जौन सबय संसारके छल करत हए, बाके पृथ्‍वीमे फेंको गओ और बाके दूत फिर बाके संगय फेंके गए।
\v 10 तव मए स्वर्गमे एक बडो आवाज सुनो, “अब हमर मुक्ति, शक्ति, हमर परमेश्‍वरको राज और ख्रीष्‍‍‍टको अधिकार आओ हए। काहेकी हमर भैयनके दोष लगान बारो फेंको गओ हए , जौन परमेश्‍वरके अग्गु बिनके दिनरात दोष लगात रहए।
\v 11 बे बाको थुमाको रगतद्वारा और अपन वचनको गवाहीद्वारा जीते हएँ, काहेकी बे मृत्यु तक फिर अपन जीवनके माया न रखीं।
\v 12 जहेमारे, हे स्वर्ग और बामे रहन बारे तुम सबय आनन्‍द मनाबओ। पर पृथ्वी और समुन्द्रके धिक्कार हए ! काहेकी शैतान तुमर ठिन तरे गओ हए। बा बहुत क्रोधसे भरो हए, काहेकी बाकेसंग थोरी इकल्लो समय हए कहिके बाके पता हए।
\v 13 जब बा अजिंगर अपनएके पृथ्बीमे फिको महसुस करी, तव बा बालक जन्मान बारी बैयरके सताई।
\v 14 और साँपको उपस्थिति बाहिर तयार करो भओ ठाउँ उजाड-स्थानमे उडके जानके ताहिं बा स्त्रीके एक बणो गरुड़को दुई पखना दओगओ। बा बहे ठाउँ रहए जहाँ एक समय, जद्धा समय और आधी समयके ताहीं वास्ता करन सिकते।
\v 15 बा बैयरके बाढ बहाएके दुर लैजाबए कहिके बा साँप अपन मुहूँसे नदिया जैसो पानी निकारी।
\v 16 पर पृथ्वी बा बईयरके सहायता करी, और अजिंगर अपन मुहूँसे निकारी नदियाके पृथ्वी मुँहुबाएके घिंचलई।
\v 17 बक पिछु बा अजिङ्गर बईयर से क्रोधित भओ और परमेश्‍वरको आज्ञा पालन करन और येशूको बारेमा गवाही देन बाके बाँकी रहे सन्तानसंग लडाई करन गओ।
\v 18 तव बा अजिङ्गर समुन्दर किनारेको रेता ऊपर ठाडगओ।
\c 13
\cl अध्याय १३
\v 1 बक पिच्छु मय समुन्द्रसे एक पशु आत देखो। जौनक दश सिङ और सात मुँड रहएँ। बाके सिङ उपर दश मुकुट रहएँ, और बाके मुँड उपर ईश्‍वर-निन्दाको नाउँ रहए।
\v 2 मए देखो बा पशु चितुवा जैसो रहए। बाके टाँग भालुवाको जैसो रहए, और बाको मुहूँ बघटाको जैसो रहए। बाके शासन करनके ताहिं एक अजिंगर अपन शक्ति, अपन सिंहासन और अपन बडो अधिकार दई।
\v 3 बा पशुके मुँडमे गहिरो चोट रहए, जौन मृत्युतक लईजान सिक्तो, पर बाको घाव अच्छो हुइगओ। और सबय पृथ्‍‍वीके अचम्मित हुइगए और बे बा पशुके पिच्छुपिच्छु लागे।
\v 4 बे अजिंगरके फिर पूजा करत् रहएँ, काहेकी बा अपन अधिकार पशुके दई रहए। “जा पशु जैसो और कौन हए ?" और जाके विरुद्धमे कौन लडाई कर सकत हए ?” कहिके बे बा पशुके आराधना करीं।
\v 5 बाके मुहूँमे घमण्डके वचन बोलन और ईश्‍वर-निन्दा करनबारो वचन बोलन दओगओ। बाके बयालीस महिनाके ताहिं अधिकार चलानके अनुमति दओगओ रहए।
\v 6 बहेमारे, परमेश्‍वरको विरुद्धमे ईश्‍वर-निन्दा करन, बाको नाउँ और बाको वासस्थान, और स्वर्गमे बईठन बारेनके विरुद्धमे निन्दा करन बा पशु अपन मुहूँ खोली।
\v 7 विश्‍वासिनसंग लडाई करन और बिनके जीतन बा पशुके अनुमति दओगओ रहए। और हरेक जातिनके, आदमीनके, भाषानके और राष्‍ट्र उपर फिर अधिकार दौगओ रहए।
\v 8 पृथ्वीमे बईठनबारे सबय आदमी बा पशुको पूजा करेहएँ, जौनको नाउँ संसारको सृष्‍टिसे मरो भओ थुमाको जीवनको पुस्तकमे लिखो न हए।
\v 9 जौनको कान हए बा सुनए।
\v 10 कोइके कैदमे लैजान हए तव, बा कैदमे जयहए। यदि कोइ तरवारसे मरन हय कहेसे, बा तरवारैसे मरहए। धीरज, सहनशीलता, और विश्‍वासके ताहिं जो पवित्र हयँ जहेके ताहिं हियाँ बोलाहट हए।
\v 11 तव मय पृथ्वीसे आएरहो दुसरो पशु देखो। बाको थुमाको जैसो दुई सिङ रहएँ, और बा अजिंगर जैसो मस्की।
\v 12 बा पहिले पशुके उपस्थितिमे सबय शक्तिको अभ्यास करी, और पृथ्वी और हुवाँ बैठनबारे बासिन्दानके बा पहिले पशुको पुजा करन लगात रहए, जौनको गहिरो घाव अच्छो भओ रहए।
\v 13 बा शक्तिशाली अचम्मोको काम फिर दिखाई। बा आदमीनके अग्गु स्वर्गसे पृथ्वीमे आगी गिरानको काम समेत बा करी।
\v 14 शक्तिशाली चिन्हद्वारा जाके चमत्कार दिखानके अनुमति दओगओ। दुसरो पशु पृथ्वीके बासिन्दनके बहकाई। बापहीली पशुके आदर करनके ताहिं बिनके बाको एक मुर्ति बनान लगाई। बा पशुके तलवारसे चोट लगो रहए, तब भी बा जिन्दा हुइगओ।
\v 15 बाके बा पशुको मुर्तिके जिन्दा करन अनुमति दौगओ, ताकि बा मुर्ति मस्कन सिकए, और बा पशुको मुर्तिके पुजा करन इन्कार करन बारे मारे जामएँ।
\v 16 और बा शक्तिशाली और बिना जरुरीके, धनी और गरीब, स्वतन्त्र और कमैया हरेकके दहिना हात या माथेमे छाप लगान दबाब दओ गओ।
\v 17 बा पशुको छाप न भए बारेनके ताहिं किनन और बेचन असम्भव हुईतो। बा पशुको छाप बाको नाउँको संख्याके प्रतिनिधित्व करत हए।
\v 18 बा बुद्धिके बुलात हए। जौनको समझ हए, बा पशुको संख्या जोड़ए, काहेकी बा सङ्ख्या आदमीनकि ताहिं हए। जा संख्या छ सौ छ्यसट्ठी ( ६६६ ) हए।
\c 14
\cl अध्याय १४
\v 1 और मए सियोन डाँगामे थुमा ठाणो भओ देखो। बाके संगमे एक लाख चवालीस हजार रहएँ, जौनके माथेमे बाको नाउँ और बाको पिताको नाउँ लिखो रहए।
\v 2 और बहुत पानीको आवाज जैसो, और बडो गर्जनको आवाज जैसो स्वर्गसे एक सोर सुनो। मिर सुनो भओ बा आवाज बीणा बजानबारे अपन बीणानके बजाय रहे सोर जैसो रहए।
\v 3 सिंहासनके और बे चार जीवित प्राणीके और धर्म-गुरुके अग्गु बे एक नयाँ गीत गाईं। पृथ्‍वीके लाए भए एक लाख चवालीस हजार ( १,४४,००० ) बाहेक और कोइ भी बा गीत न सिख पात रहएँ।
\v 4 बे बैयरनसंग लसपस न करीं रहएँ, और अपनयके चोखो रखे रहएँ। थुमा जितए जात रहए बाके पिच्छुपिच्छु लागन बारे जेहिं हएँ। परमेश्‍वर और थुमाके ताहिँपहीली फलको रुपमे आदमीनके बीचसे लाई रहएँ।
\v 5 बिनके मुँहुमे कोइ झुट न पाओ गओ, बे निष्खोट रहएँ।
\v 6 तव मय दुसरो स्वर्गदूतके बादरके बिचमे उडत् देखो। पृथ्‍वीमे रहन बारे हरेक जाति, कुल, भाषा और आदमीके घोषणा करन अनन्त सुसमाचार बिनकेसंग रहए।
\v 7 बे जोडसे चिल्लाएके कहीं, “परमेश्‍वरसे डरओ, और बाके महिमा देओ। काहेकी बाको इन्साफको समय आइ गओ हए। बाके आराधना करओ, जौन स्वर्ग, पृथ्‍वी, समुन्द्र और पानीके सोतनके बनाई।”
\v 8 और एक दुसरो स्वर्गदूत अइसे कहत पिच्छुपिच्छु लागो, “नाश भओ जाति-जातिनके अपनो व्यभिचारको क्रोधको मद्य पिआन लगानबारो महान बेबिलोनको नाश भओ हए।”
\v 9 और तिसरो स्‍वर्गदूत बडो आवाजमे आइसो काहत बिनके पिच्छुआई, “अगर कोइ आदमी बा पशु और बाको मुर्तिनके पूजा कर हए, और माथे या बाके हातमे छाप लगय हए,
\v 10 बा फिर परमेश्‍वरको क्रोधको कटोरा मैसे कुछ मद्य पिहए, जौन बाको क्रोधको कटोरामे अखनाओ गओ हए, जौन जा पिहए बाके परमेश्‍वरको पवित्र स्वर्गदूतन और थुमाके अग्गु आगी और गन्धकमे बाके यातना दओ जाएहए।
\v 11 बिनको यातनाको धुवाँ सदामान उपर जात रहए. बे जेहि हएँ जौन बा पशु और बाको मुर्तिके पूजा करत हएँ, और बाको नाउँको छाप लेत हएँ। बे दिनरात कबहू आराम न पईंहएँ।”
\v 12 परमेश्‍वरको आज्ञा पालन करन बारे और येशू उपर विश्‍वास करन बारे सन्तके धीरज धरन जहेमे हए।
\v 13 और स्वर्गसे आओ अइसो आवाज मए सुनो, “जा लिख: अब से प्रभुमे मरन बारे धन्यके हएँ।” आत्मा कहत हए, “हँ, बे अपन परिश्रमसे आराम पाएहएँ, काहेकी बिनको काम बिनके पिच्छु लगेहए।”
\v 14 और मए देखो, और एक सेतो बादर और बाके उपर बैठो भओ आदमीको पुत्र जैसो एक जनी देखो, जौनको मुडमे सोनोको मुकुट रहए और हातमे एक पैनो हँसिया रहए।
\v 15 दुसरो एक स्वर्गदूत मन्दिरसे बाहिर आओ, और बादर उपर बैठन बारो जोडसे चिल्लाएके कहि, “तुमर हँसिया लेओ, और कटनी करओ, काहेकी कटनीको समय अएगओ हए, काहेकी पृथ्‍वीको फसल पुराए पकिगओ हए।”
\v 16 अइसे बादर उपर बैठन बारो अपन हँसिया पृथ्‍वी उपर चलाई, और पृथ्‍वीमे कटनी भओ।
\v 17 और स्वर्गमे भओ मन्दिरसे एक दुसरो स्वर्गदूत बाहिर आओ। बिनके संग फिर एक पैनो हँसिया रहए।
\v 18 और वेदीसे दुसरो स्वर्गदूत आओ, जौनके आगी उपर अधिकार रहए। पैनो हँसिया देनबारो जोणसे चिल्लाएके कही, “तुमरो पैनो हँसिया चलाओ, और पृथ्‍वीके अंगुरको झोंथा जम्मा करओ, काहेकी पृथ्‍वीको अंगुर पुराए पकिगओ हए।”
\v 19 बे स्वर्गदूत अपनो हँसिया पृथ्‍वीमे चलाईं, और पृथ्‍वीको अंगुरको फसल जम्मा करीं, और बाके परमेश्‍वरको क्रोधको बहुत बडो दाख-कुण्डमे फेक दई।
\v 20 सहेर बाहिरसे दाख-कुण्डसे रगत निकरके बहिगओ, काहेकी जा और एक हजार छय सौ किलोमिटर ( १,६०० ) तक फैलो रहए।
\c 15
\cl अध्याय १५
\v 1 मए स्वर्गमे बहुत बडो और अचम्मोको दुसरो एक चिन्ह देखो: सात स्वर्गदूत सात अन्तिम विपत्ति लाई रहएँ, काहेकी बिनमे परमेश्‍वरको क्रोध पुरा भओ रहए।
\v 2 आगीसे मिलो काँचको समुन्द्र जैसो कुछ मोके दिखाइ पडो। बाहुवाँ समुन्‍द्र को किनारेमे पशु, बाको मुर्ति और बाको नाउँको संख्या उपर प्रतिनिधित्व करतय विजय पानबारे ठाड़े रहएँ। अपन हातमे परमेश्‍वरको दओ भओ वीणाके बे पकड़े रहएँ।
\v 3 बे अइसे करके परमेश्‍वरको दास मोशाको और थुमाको भजन गात रहएँ, “हे परमप्रभु परमेश्‍वर सर्वशक्तिमान, तुमरो कार्य महान और अचम्मो हए, युग-युगको महाराजा, तुमरे डगर धार्मिक और सत्य हएँ।
\v 4 और परमप्रभु, तुमरो डर कौन न मान्त हए ? और तुमरो नाउँको महिमा कौन न करत हए ? काहेकी तुम इकल्ले पवित्र हओ। सब जाति आएके तुमके दण्डवत करत् हएँ, काहेकी तुमरो धार्मिक कार्य प्रकट भओ हए।”
\v 5 जे बात पिछु मए देखो, और स्वर्गमे गवाहीको मण्डपको मन्दिर उघरी गओ।
\v 6 सुतीको चमकनबालो कुरता लगाएके और सोनोको फिता छातीके आसपास बाँधे सात जनी स्वर्गदूत सात विपत्ति लईके महा-पवित्रस्थानसे बाहिर निकरे।
\v 7 बे चार जीवित प्राणी मैसे एक सदामान जीवित रहन बारे परमेश्‍वरके क्रोधसे भरे सोनोके सात कटोरा बे सात स्वर्गदूतनके दईं।
\v 8 परमेश्‍वरको महिमा और बाको शक्तिसे मन्दिर धुवाँसे भरिगओ रहए। बे सात स्वर्गदूतके सात विपत्ति खतम न होनतक कोइ फिर बा भितर घुस न पाइँ।
\c 16
\cl अध्याय १६
\v 1 तव मन्दिरसे आओ एक जोडसे चिल्लान बारो सात स्वर्गदूतसे अइसे कहत मए सुनो, “जाओ और परमेश्‍वरको क्रोधको सात कटोरा पृथ्‍वी उपर अखनाओ।”
\v 2 तवपहीली स्वर्गदूत गओ और अपन कटोरा पृथ्‍वीमे अखनाई। बा पशुको छाप होनबारे और बाको मुर्तिके पूजा करनबारे आदमीनके घिनौनो और पिरान बारे घाव निकरे।
\v 3 दुसरो स्वर्गदूत अपन कटोरा समुन्द्रमे अखनाई, और बा मरे भए आदमीको खुन जैसो हुइगओ, और समुन्द्रमे भए हरेक जिन्दा प्राणी मरिगए।
\v 4 और तिसरो स्वर्गदूत अपन कटोरा नदिया और पानीको मुहान भितर अखनाई, और बे खुन हुइगए।
\v 5 तव पानीको जिम्मा लेनबारो स्वर्गदूत अइसे कहत मए सुनो, “तुम धर्मी हओ, जो हओ, जो रहओ, और पवित्र जन हओ, काहेकी जे बातनके तुम इन्साफ करे हओ।
\v 6 काहेकी बे विश्‍वासी और अगमवक्तानके रगत बहाइ हएँ, तुम बिनके रगत पिनके दए हओ, बे जाके योग्य हएँ।”
\v 7 तव बेदीके अइसे कहत मए सुनो, “हँ, सर्वशक्तिमान् परमप्रभु परमेश्‍वर, तुमरो इन्साफ सच्चे और धार्मिक हएँ।”
\v 8 तव पिच्छु चौथो स्वर्गदूत अपन कटोरा दिनमे अखनाई, और बाके आदमीनके आगीसे डुगन अनुमति दओ गओ रहए।
\v 9 बे प्रचण्ड तापसे डुँगे, और बे जा विपत्तिनके ऊपर शक्ति होनबारो परमेश्‍वरको नाउँको निन्दा करीं। पर बे पश्‍चात्ताप न करीं औ बाके महिमा देन इन्कार करीं।
\v 10 और पाँचौ स्वर्गदूत अपनो कटोरा बा पशुके सिंहासनमे अखनाई, और बाको राज्यमे अन्धियारो छाइगओ। बे कष्‍‍टमे अपनी अपनी जीब चबाईं।
\v 11 बिनके कष्‍‍ट और घावनके कारन बे स्वर्गको परमेश्‍वरको नाउँको निन्दा करीं, और अभओ फिर बे अपन करे भए कामसे पश्‍चात्ताप करन बे इन्कार करीं।
\v 12 तव छैटो स्वर्गदूत अपन कटोरा महानदी यूफ्रेटिसमे अखनाई। अगारसे आनबारो राजाके ताहिं डगर तयार करन बा नदीयाको पानी सुखिगओ।
\v 13 तव मए अजिंगरको मुँहूसे, पशुके मुँहूसे और झुठे अगमवक्ताको मुँहूसे मुड़का जैसे तीन अशुद्ध आत्मानके बाहिर निकरत् देखो।
\v 14 काहेकी बे दुष्‍टके आत्मा रहएँ जौन अचम्म चिन्हको प्रदर्शन करत हएँ। बे पुरे संसारके राजानके ठिन जाएके और सर्वशक्तिमान परमेश्‍वरको महान दिनमे युद्ध करनके ताहीं बे सँगयसंग इकट्ठा करत हएँ।
\v 15 "देखओ, मए चोर जैसो आमङ्गो, धन्य हए बा आदमी जो जगो रहात हए, जौन अपन कुरताको रक्षा करत् हए, ताकि बा नँगो बाहिर जान न पडए, और बे बाको शरमानो अवस्था देखन न पडए।"
\v 16 बे ऊनके एकय ठाउँमे लाईं जौनके हिब्रू भाषामे आर-मागेड्डोन कहत हएँ।
\v 17 और सातौं स्वर्गदूत अपनो कटोरा हावामे अखनाई। बक पिच्छु सिंहासन और मन्दिरसे अइसो कहत एक जोड़ से आवाज निकरो, "निफटगओ हए।”
\v 18 हुँवा बिजुली चमको, गर्जन और आवाज और डरौनो हालाचाला अओः इतनो डरौनो हालाचाला आओ कि पृथ्‍वीमे आदमीनको सृष्‍टि भओसे अभेतक यितनो बडो हालाचाला कबहू न आओ रहए।
\v 19 बा महानगरी तीन भागमे बँटिगओ, और जातिनके सहेर नष्‍ट हुइगए। और परमेश्‍वर बा महान बेबिलोन कहिके मनमे बुलाई, और बा अपन डरौनो क्रोधको मद्यसे भरो कटोरा सहेरके दई।
\v 20 और हरेक टापू लोप हुइके गए, और पहाडौ फिर न मिले।
\v 21 बादरसे बडे बडे पत्थर आदमीनके उपर बरसन लागे। पथराको विपत्तिके कारन बे परमेश्‍वरके सरापीं, काहेकी बा विपत्ति गजबय भयानक रहए।
\c 17
\cl अध्याय १७
\v 1 बे सात कटोरा लेनबारे सात स्वर्गदूत मैसे एक जनी मेरे ठिन आएके कहि, “इतए आओ, मए तुमके बहुत पानीमे बईठी बा महा वेश्याके दओ इन्साफ दिखमङ्गो।
\v 2 बाके संग पृथ्‍वीके राजा व्यभिचार करी हएँ और पृथ्‍वीके बासिन्दा बाके व्यभिचारको मद्यसे मते पडेहएँ।
\v 3 बक पिच्छु स्‍वर्गदूत मोके आत्मामे उठाएके एक उजाड-स्थान घेन लैगओ, और निन्दा करन पुरय नाउँसे भरी लाल रङ्गको पशु उपर बैठी एक बैयर मए देखो। बा जनावरको सात मुड़ और दश सिङ रहएँ।
\v 4 बा बैयर बेजनी और चम्कन बारो लाल कपड़ा लगाएके और सोनो, कीमती मणि और मोतीसे सिंगार करे रहए। घिनौनो बात और व्यभिचारको अशुद्ध चीजनसे भरो एक सोनोको कटोरा बा हातमे पकड़े रहए।
\v 5 एक गुप्‍तबातको अर्थ बाके माथेमे नाउँ लिखो रहए: "पृथ्‍वीमे भए घिनौनी बातन और व्यभिचार करन बारेनकी अईया महान् बेबिलोन।"
\v 6 और मए बा बैयरके विश्‍वासीनको रगत और येशूके ताहीं सहिद भयनके रगत पिके नशेमे देखो। जब मय बाके देखो, तव मए गजब अचम्मो मानो।
\v 7 पर स्वर्गदूत मोसे कहि, “तय काहे अचम्मो मानत हए ? मय तोके बा बैयरऔर बाके बोकन बारे सात मुड़ और दश सिङ भओ पशुको रहस्यको अर्थ बातमङ्गो।
\v 8 तुम देखे बा पशु एक समय रहए, पर अब न हय, पर अतल कुण्डसे उपर चढन लागो हए। तव बा विनाशघेन जाबैगो। पृथ्‍वीमे जिनबारे जौनको नाउँ संसारको उत्पत्तिसे जीवनको पुस्तकमे लिखो न हए, बे बा पशुके देखके अचम्मो मानङ्गे, काहेकी बा एक समय रहए, अब न हय, पर आन लागो हए।
\v 9 बा बुद्धि भओ मनके माग करत हए। बे सात मुण सात डँगा हएँ, जौन उपर बा बैयर बैठी हए।
\v 10 बे सात राजा फिर हएँ। पाँच जनी राजा नाश हुइगय हएँ, एक जनी अभे हए, और एक जनी अभेतक न आओ हए। जब बा आबैगो, तव कुछ समयके ताहिं रयहए।
\v 11 बा पशु, जो एक समय रहए, पर अब न हए, बा अपनय फिर आठौं राजा हए पर बे सात राजा मैसे बा एक हए, पर बा सर्वनाश होन जायरहोहए।
\v 12 "तुम देखे दश सिङ त दश राजा हएँ, जौन हबए तक राज पाई न हएँ, पर बा पशुसंगय बे एक घण्टाके ताहीं राजाको अधिकार पामङ्गे। "
\v 13 यिनको एकय विचार हए, और बे अपन शक्ति और अधिकार बा पशुके देतहएँ।
\v 14 बे थुमाके विरुद्धमे लडाईं करङ्गे। पर थुमा बिनके जितैगो, काहेकी बा प्रभुनको प्रभु और राजानको राजा हए, और बाके संगमे होनबारे बुलाएभए, चुनेभए और विश्‍वासयोग्य हएँ।”
\v 15 बे स्वर्गदूत मोसे कहीं, “तय देखो भओ पानीके ऊपर, जहाँ बा वेश्या बैठी हए, बा पानी आदमी, भिड़, जाति और भाषा हए।
\v 16 तय देखो भओ दश सिङ और बा पशु बा वेश्याके घिड़ना करङ्गे। बे बाके ईकल्लो और नङ्गो करके बाको मासु खामङ्गे, और बाके बे आगीमे पुरय भस्म करदेमङ्गे।
\v 17 काहेकी परमेश्‍वरको वचन पुरा न होनतक एकय मनके हुइके बे अपनो अधिकार बा पशुके राज करन देन बाको उद्देश्‍य पुरा होनके ताहीं परमेश्‍वर अइसो विचार डारिहए।
\v 18 तुम देखे भए बा बैयर पृथ्वीके राजानके ऊपर शासन करनबारी महानगरी हए।"
\c 18
\cl अध्याय १८
\v 1 जे बातन पिच्छु मय दुसरो स्वर्गदूत स्वर्गसे तरे आत मए देखो। बाकेसंग बडो शक्ति रहए, और बाको महिमाद्वारा पृथ्‍वी उजियारो भओ रहए।
\v 2 बा शक्तिशाली सोर निकारके अइसे करके चिल्लाई, “ पतन, महान बेबिलोनको पतन भओ हए, जा भुतनके ताहीं एक रहनबारो, हरेक अशुद्ध आत्माके ताहीं वासस्थान और हरेक अशुद्ध और घृणित चिरईंयाको एक अखणा भई हए।
\v 3 काहेकी सबय जाति बाको अनैतिक व्यभिचारको मद्य पिए हएँ। पृथ्‍वीके राजा बाकेसंग व्यभिचार करी हएँ। बाके विलासिताको शक्तिको जीवन यापनसे पृथ्‍वीनके व्यापारी बहुत धनी भए हएँ।
\v 4 बक पिच्छु मए स्वर्गसे अइसो कहत दुसरो आवाज सुनो, “मिर आदमी रेओ, बासे बाहिर आबओ, ताकि तुमके बाके पापन्मे सहाभागी बनन न पडए, और बाको कोई भी विपत्ति तुमय भोगन न पडए।
\v 5 काहेकी बाके पापन्को जमा स्वर्ग जैसो ऊँचो भओ हए, और परमेश्‍वर बाको दुष्‍ट कामन्को सम्झना करी हए।
\v 6 जैसी बा औरनके दईरहए, उइसिय बाके लौटायदेओ और जो बा करी हए फिर्ता कर देओ। बा कटोरामे जो मिलाई रहए, बाके दुगुना होनतक बाके देओ।
\v 7 जैसी बा अपनयके महिमित करी और सुख विलासमे जिवन बिताई रहए, उइसिय बाके यातना और शोक देओ। काहेकी बा अपन मनमे कही हए, 'मय महारानी जैसो बैठो हऔं, मए एक बिधुवा न हऔं, और मोके कबहू शोक न करन पड़ईगो।'
\v 8 जहेमारे, बाके उपर एकए दिनमे मृत्यु, शोक और अनिकालके विपत्ति आए पडङ्गे। बाके आगीद्वारा भसम करदओ जाएहए, काहेकी परमप्रभु परमेश्‍वर शक्तिशाली हए, और बा बाको न्‍यायकर्ता हए।”
\v 9 पृथ्‍वीके राजा बाके संग अनैतिक काम करीं और बा नियन्त्रणसे बाहिर जाएके पजरो धुवाँ देखके बाकेसंगय रोमंगे और बिलौना करेहएँ।
\v 10 बे बाको यातनाको डरके देखके दुरय ठाणके अइसे कयहएँ, “धिक्कार, धिक्कार बा महान सहेरके, शक्तिशाली सहेर बेबिलोन ! काहेकि एकए छिनमे तेरो न्याय आओ हए।”
\v 11 पृथ्‍वीके व्यापारी बाके ताहिं रोमङ्गे और बिलौना करङ्गे, काहेकी बा समयसे कोइ फिर बाको समान न किनेहएँ।
\v 12 सोनो, चाँदी, महेंगो पथरा, मोती, मलमलके कपडा, बैजनी, रेशम और चम्किलो रंग सबय किसिमको सुगन्ध देनबारो कट्ठा, हरेक किसिमके हस्ति-हड्डा के भाँडा, हरेक किमती कठ्ठासे बने भाँडा, काँसो, लोहो और सिंगमरमर,
\v 13 तेजपत्ता, मसला, धूप, मुर्र, सुगन्धित धूप, दाखमद्य तेल, महिन चुन, गेहुँ, गईयाँ, भेडा, घोड़ा और रथ, और दास और मानव आत्मा।
\v 14 तिर सबय शक्तिसे तेरो मन चाहो फल तोसे गईभओ हए। तिर सबय सुखविलास और वैभव गुमाए डारे, और बे फिर कबहू न मिलङ्गे।”
\v 15 जा सामनके व्यापारी जौन व्यापार करके धन कमाई रहएँ, बे बामे आनबारो यातनाके डरसे दुरए ठाड़े बड़ो सोरसे रुइहएँ, और विलाप करेहएँ।
\v 16 बे कहङ्गे, "धिक्कार महान शहर, तोके धिक्कार, बा जो मलमल बैजनी और लाल रङको कपड़ा लगाएके सोनो, मोती और कीमती गहेनासे सिंगारी रहए।
\v 17 एकय घड़ीमे सबय सम्पत्ति नष्‍ट भओ हए।” हरेक जहाजको कप्तान, हरेक यात्रा करनबारे आदमी, नौवाँ और समुदरमे व्यापार करनबारे दुरय ठाड़गए।
\v 18 और बा जरो धुवाँ देखके बे चिल्लाई। बे कहीं, 'जा जैसो महान सहर और कौन हए ?”
\v 19 बे अपन मुड़मे भुवा डारके रोतय और चिल्लाएके बिलौना करी, “ धिक्‍कार, महान् सहरके धिक्‍कार, जहाँ समुन्द्रमे बिनको जहाज होनबारे बाको सम्पत्तिसे धनी भए रहएँ। काहेकी एकय छिनमे बा नष्‍ट हुइगई हए।”
\v 20 "स्वर्ग, बाके ऊपर आनन्द कर, विश्‍वासी, प्रेरित और अगमवक्ता, काहेकी परमेश्‍वर तुमर ऊपरको इन्साफ बाके ऊपर लाईहए।”
\v 21 तव एक जनी शक्तिशाली स्वर्गदूत बड़ो चकिया जैसो एक पथरा उठाई और अइसे कहिके बाके समुन्द्रमे फेंकी, “जा किसिमसे बेबिलोन, महान सहेर हिंसात्मक तरिकासे तरे फेंकदओ जयहए और बाके फिर कबहू न देख पायहएँ।
\v 22 वीणाको स्वर, सङ्गीतकार, बाँसुरी बजान बारे, और तुरही फुकनबारेनको धुन तोएमे फिर कबहू न सुनहएँ। और कोइ फिर कारीगर तोए मे न मिलहएँ। कोई फिर चकियाको आवाज तोए मे न सुनेहएँ।
\v 23 बत्तीको उजियारो तोए मे कबहू न चम्काईगो। दुलहा और दुल्हिन को आवाज तोए मे कबहू न सुनेहएँ, काहेकी तिर व्यापारी पृथ्‍वीके राजकुमार रहएँ, और तिर मन्त्रतन्त्र द्वारा जाति छने रहएँ।
\v 24 बामे अगमवक्ता और विश्‍वासीनको रगत और पृथ्‍वीमे मरे भयनके सबयको रगत मिलो रहए।”
\c 19
\cl अध्याय १९
\v 1 जा बात पिच्छु मए बडो सङ्ख्यामे भए आदमी बड़ो जोड़से चिल्लात स्वर्गमे अइसे कहत जैसो सुनो, “हल्लेलूयाह ! मुक्ति, महिमा और शक्ति हमर परमेश्‍वरके हएँ।
\v 2 काहेकी बाको इन्साफ सच्चो और न्यायसगंत् हए। काहेकी बा महान व्यभिचारीणीके न्याय करी हए, जौन पृथ्‍वीके बाके अनैतिक सम्बन्धसे भ्रष्‍‍ट करी हए। बा अपन दासनको रगतके ताहीं बदला लई हए, जो बा अपनय बहाई रहए।”
\v 3 बे फिर दुसरो चोटी कहीं, “हल्लेलूयाह ! बासे सदामानके ताहीं धुवाँ निकरत रहात् हए।”
\v 4 चौबिसौं जनी एल्डर और चार जीन्दा प्राणी अपनय जमीनतक घुप्‍टा पड़के सिंहासनमे विराजमान होनबारो परमेश्‍वरके दण्डवत् करके आराधना करीं। बे “आमेन। हल्लेलूयाह !” कहात रहएँ।
\v 5 तव सिंहासनसे अइसो कहात एक अवाज आओ, “ तुम सबय बाके दास हओ जौन बाको भए मानत् हएँ, हमर परमेश्‍वरको प्रशँसा करओ।"
\v 6 और एक बड़ो भिडको आवाज जैसो सोर, गजब पानीको आवाज और गर्जन जैसो आवाजमे "हल्लेलूयाह" कहत मए सुनो, काहेकी हमर परमप्रभु सर्वशक्‍तिमान् परमेश्‍वर राज करत हए।
\v 7 हम रमामएँ और खुसी होमएँ, और बाके महिमा देमएँ ! काहेकी थुमाको बेहाको उत्सब मनानको दिन आओ हए, और बाकी दुलहीन अपनयके तयार करी हए।"
\v 8 बाके चमकिलो और सफा मलमल को कपडा पैंधन बाके दओगओ, ( चमकिलो मलमलको कपडा बाके पवित्र आदमिनके धार्मिक काम हएँ )।
\v 9 स्वर्गदूत मोसे कही, “जा लिखः थुमाको बेहाको भोजमे निमन्त्रणा करे भए धन्‍यके हएँ।” बा फिर मोसे कहि, “परमेश्‍वरके सच्चो वचन जेहीं हएँ।”
\v 10 तव बिनके दण्डवत् करन मए बिनके टांगमें घुप्‍टा पड़ो, पर बा मोसे “अइसे मत करय कही, काहेकि मय येशूको बारेमे गवाहीके बतान बारो तुमर भैया और तुमर संगी दास इकल्लो हऔं। परमेश्‍वरको आराधना करओ, काहेकी येशूको बारेमे भओ गवाही अगमवाणीको आत्मा हए।"
\v 11 तव मए स्वर्ग खुलो देखो, और मय देखो हुवाँ एक सेतो घोड़ा रहए। बाके उपर सवार होनबारोके सत्य और विश्‍वासयोग्‍य कहात रहएँ। बा न्यायके साथ इन्साफ और युद्ध करतहए।
\v 12 बाके आँखी आगीके ज्वाला जैसो और बाके मुणमे गजब मुकुट रहएँ। बाके ऊपर लिखो नाउँ बाके बाहेक और कोइके पता न रहए।
\v 13 "बा खुनमे डुबाओ भओ लत्ता पईंधे रहए, और बाको नाउँके परमेश्‍वरको वचन कहिके बुलात रहएँ।"
\v 14 मलमलको सफा कपडा पईंधे स्वर्गके सेना सेतो घोडामे चढे बाके पच्छु पच्छु लागे रहए।
\v 15 जाति-जातिनके प्रहार करन बाको मुहुँसे धारिलो तरवार निकरत् हए, और बा लोहेको डण्डा से बिनके उपर शासन करैगो। सर्वशक्तिमान् परमेश्‍वर क्रोधसे दाख-कुण्डके कुल्चहए।
\v 16 बाको लत्ता और जाँघमे "राजानके राजा और प्रभुनके प्रभु" कहिके एक नाउँ लिखो हए। "
\v 17 तओ मए एक स्वर्गदूत दिनमे ठाणो भओ देखो। बा उपर बादरमे उड़नबारे सबय चिरैयांनके बडो सोरसे बुलाई, “आओ, सबय परमेश्‍वरको बडे भोजके ताहीं इकठ्ठा होबओ।
\v 18 तुम राजा, कप्तान, शक्तिशाली आदमी, घोड़ा और बिनके उपर सवार होनबारे, सबय आदमी, दास और फुकुवा दोनो, कमजोर और शक्तिशाली सबयके मासु खाबईगे।”
\v 19 मय पशु और पृथ्वी के राजानके और बिनके सेननके संगमे देखो। बे घोड़ा उपर सवार होनबारे और बिनके सेननसंग युद्ध करन इकट्ठा भए रहएँ।
\v 20 बाको उपस्थितिमे अचम्मो काम दिखानबारो झुठो अगमवक्ता संगय बा पशु दोनो पकड़िगए। जे चिन्हद्वारा बा झुटो अगमवक्ता बा पशुको छाप लगान और बाको प्रतिरुपको आराधना करनबारेनके बहकाई। बिनमैसे दुई जनीके पजरो भओ गन्धकको अग्‍नि-कुण्डमे जिन्दय फेंकदई।
\v 21 बिनमैसे बाँकी बचे भयनके घोड़ा उपर सवारके मुहुँसे निकरो भओ तरवारसे मारेगए। बिनकी मरी शरीरके सबय चिरैयाँ खाईं।
\c 20
\cl अध्याय २०
\v 1 तव मय स्वर्गसे तरे उतर रहो एक स्वर्गदूतके देखो। बाके संग अतल कुण्डको चाभी और एक बड़ो साँकर बाके हातमे रहए।
\v 2 बा अजिङ्गर या बा पुरानो साँपके पकड़ी, जो दुष्‍ट या शैतान हए, बा बाके एक हजार बर्षके ताहीं बाँधी।
\v 3 बा बाके अतल कुण्डमे फेक्दई और बाके बन्द करदई और बाके उपर मोहोर लगाय दई। एक हजार बर्ष पुरा न भएतक बा जातिजातीनके बहेकान न पाबए कहिके अइसो करो गओ रहए। बक पिच्छु बाके कुछ समयके ताहीं छोड़न पड़हए।
\v 4 और मए सिंहासन देखो। बाके उपर बैठन बारोके इन्साफ करन अधिकार दओ गओ रहए। मय परमेश्‍वरको वचन और येशूको गवाहीके ताहीं मड़ कटेभए आत्मनके फिर देखो। बे पशु या मुर्तिनको आराधना न करीं, और बे अपन माथोमे औ हातमे छाप लगानके इन्कार करीं। बे जिन्दा भए, और येशू संगय एक हजार बर्षतक राज्य करीं।
\v 5 बाँकी रहे मरेभए हजार बर्ष खतम न होनतक जिन्दा न भए। जा सुरुको पुनरुत्थान हए।
\v 6 सुरुको पुनरुत्थानमे सहभागी होनबारे जो कोइ फिर पवित्र और धन्य हएँ। बिनके उपर दुसरो मृत्युको कछु शक्ति न हुइहए। बे परमेश्‍वर और ख्रीष्‍टके पुजारी हुइके एक हजार वर्षतक बाके सँग राज करङ्गे।
\v 7 जब एक हजार वर्षको खतम हुइहए, तव शैतानके बाको कैद से छोडो जयहए।
\v 8 और पृथ्‍वीके चारौ कोनोमे भए देश-देशके आदमीनके बहेकान बा बाहिर जाबैगो, गोग और मागोग बिनके लडाईके ताहिँ संगय लामङ्गे। बिनको संख्या समुन्द्रके रेता हानी अनगिन्ती होबईगो।
\v 9 बे पृथ्‍वीके चारौघेन जाएके विश्‍‍वासिनके मड़ैयाके आसपास और प्यारो सहेरके घेरीं। पर स्वर्गसे आगी तरे बर्सके बिनके भस्म करी।
\v 10 बिनके बहाकन बारो बा दुष्‍टके गन्धकको जल रहो कुण्डमे फेंको गओ, जहाँ पशु और झुटे अगमवक्ता फिंके गय रहँए। हुवाँ बे दिनरात सदामान यातना भोगङ्गे।
\v 11 तव मए एक महान् सेतो सिंहासन और बाके उपर विराजमान होनबारेके देखो। बाके उपस्थितिसे स्वर्ग और पृथ्‍वी भाजके दुर गए, पर बिनके जान ताहिं हुवाँ कोइ ठाउँ न रहए।
\v 12 मए शक्‍तिशाली और कमजोर मरे भएनके सिंहासनके अग्गु ठाड़ो देखो और किताब खोलो गओ। तव दुसरो किताब या जीवनको पुस्तक फिर खुलो गओ रहए। बा पुस्तकमे लिखो विबरण अनुसार, बिनको कामको आधारमे मरेन भयनको इन्साफ भओ।
\v 13 समुन्द्रमे मरे भएनके बा फिर्ता करदई। मृत्यु और पाताल बिनमे भए मरे भएनके दईं, और बिनको करो भओ काम अनुसार मरे भएनको इन्साफ भओ।
\v 14 मृत्यु और पाताल अग्‍नि-कुण्डमे फिंके गए। जा अग्‍नि-कुण्ड दुसरो मृत्यु हए।
\v 15 जीवनको पुस्तकमे कोइको नाउँ लिखो न मिलो बाके अग्‍नि-कुण्डमे फेंको गओ।
\c 21
\cl अध्याय २१
\v 1 और मए नयाँ स्‍वर्ग और नयाँ पृथ्‍वी देखो, काहेकीपहीली स्‍वर्ग औरपहीली पृथ्‍वी खतम हुइगओ रहए. समुन्द्र त अब रहियाँ नाए।
\v 2 तव परमेश्‍वरसे दुलहाके ताहिं दुलहीन जैसी सिङ्‍गारके तयार पारो भओ पवित्र सहेर, नयाँ यरुशलेम स्वर्गसे तरे गिरत् मए देखो।
\v 3 मय सिहासनसे जोड़से अइसो करके चिल्लातय सुनो, “देखओ, परमेश्‍वरको वासस्‍थान आदमीनके संग हए, और बा बिनके संग बास करैगो, और बे बाके आदमी हुइहएँ, और परमेश्‍वर अपनए बिनके संग होबैगो और बा बिनको परमेश्‍वर हुइहए।
\v 4 बा बिनकी आँखीको हरेक आँशुके बुन्दाके पोंछ देहए, और हुवाँ कोइ फिर मृत्यु न हुइहए, औ शोक औ विलौना औ कष्‍ट फिर न हुइहए। काहेकी पहिले कि बात बित गइहएँ।
\v 5 सिहासनमे विराजमान होनबारो मोसे कही, “देख, मए सबय बात नयाँ बनामङ्गो।” बा अइसो कहि, “जा लिख काहेकि जे वचन भरोसा करन लायक और  सत्य हएँ।”
\v 6 बा मोसे कहि, “जे बात खतम हुइगए हएँ। महीं अल्फा और ओमेगा, शुरु और अन्त्य हऔं। जोनके प्यास लगत हय बाके मय सेंतयमे जीवनको पानीको मुहानसे पिन देहऔं।
\v 7 जौन जितैगो बा जे बातन उपर उत्तरअधिकार करैगो, और मए बाको परमेश्‍वर होमङ्गो, और बा मेरो लौंडा होबैगो।
\v 8 पर डरपोंक, अविश्‍वासी, घिनौने भए, हत्यारे, व्यभिचारी, जादुगर, मुर्तिपूजक और झुठ बोलन बारेनको भाग पजर रही आगी और गन्धकको कुण्डमे होमङ्गे। बा दुसरो मृत्यु हए।
\v 9 सात अन्तिम विपत्तिसे भरे भए सात कटोरा होनबारे सात स्वर्गदूत मैसे एक जनी मिर ठिन आओ, और बा कहि, “ यिताय आ। मए तोके थुमाकी बैयर, बाकी दुल्हीन दिखामङ्गो।”
\v 10 और बा मोके आत्मामे बोकके एक बड़ो और ऊँचो पहाड़मे लैगओ और परमेश्‍वरसे स्वर्गसे तरे झर रहो पवित्र सहेर यरुशलेम मोके दिखाई।
\v 11 यरूशलेममे परमेश्‍वरको महिमा रहए, और बाको चमक कीमती रतना जैसो और मणिक स्फटिक पथराको जैसो रहए।
\v 12 बाके बाह्र फाटक संगय एक बडो उँचो दिवार रहए, फाटकन मे बाह्र स्वर्गदूत रहएँ। बे फाटकनमे इस्राएलको सन्ताननके बाह्रै कुलको नाउँ लिखे रहएँ।
\v 13 अगारमे तीन फाटक, सिरेमे तीन फाटक, दक्खिनमे तीन फाटक और पछारमे तीन फाटक रहएँ।
\v 14 सहेरको दिवारके बाह्र जग रहएँ, और बिनके ऊपर थुमाके बाह्रै प्रेरितनको बाह्र नाउँ लिखो रहए।
\v 15 मोसे मसकन बारो संग सहेर और बाके दिवार नापन ताहीं एक सोनोको नापन बारी लट्ठी रहए।
\v 16 बा सहेर वर्गाकार रहएः बाको लम्माइ और चौडाइ बराबर रहए। बा लट्ठीसे सहेर नापत बा लगभग बाह्र हजार लम्माइको रहए (बाको लम्माई, चौडाई और उचाई बराबर रहए )।
\v 17 बा बाको दिवारके फिर नापी, और आदमीको नाप अनुसार बा पैंसठ्ठी मिटरको रहए। ( जौनके स्वर्गदूत फिर नापी रहएँ )।
\v 18 बा दिवार बिल्लौर और सहेर निखुर सोनोसे सफा काँच जैसो बनो रहए।
\v 19 दिवारके जग अनेक किसिमके किमती पथरासे बने रहएँ।पहीली बिल्लौर रहए, दुसरो निलमणि रहए, तीसरो हरित रहए, चौथो पन्‍ना रहए।
\v 20 पाँचौ आनिक्स रहए, छैठौं लालमणि रहए, सातौ पीतमणि रहए, आठौं बेरूज रहए, नवौं पुष्पराज रहए, दसौं लसुने रतना रहए। एघारौं नीलमणि रहए, और बाह्रौं कटेला रहए।
\v 21 बे बाह्र फाटक बाह्र मोतीके रहएँ। प्रत्येक फाटक मोतीसे बने रहएँ। बा सहेरके डगर निखुर सोनोको रहएँ, शिशा जैसो सफा दिखात रहएँ।
\v 22 मए बा सहेरमे कोइ मन्दिर न देखो, काहेकी सर्वशक्‍तिमान् परमप्रभु परमेश्‍वर और थुमा जाको मन्दिर हएँ।
\v 23 बा सहेरके उजियारो करन दिन औ जोनीको जरुरत न रहए, काहेकी परमेश्‍वरको महिमा बाके उपर चमक रहए, बाको दिया थुमा अपनाए हए।
\v 24 बा सहेरमे जाति-जाति ज्योतिद्वारा नेगङ्गे। पृथ्‍वीके राजा अपन वैभव बामे लाएहएँ।
\v 25 बाके फाटक दिनको समयमे बन्द न हुइहएँ, और हुवाँ रात न हुइहए।
\v 26 जाति-जातिके अपन गौरव और आदर बा भितर लामङ्गे।
\v 27 और कोइ अशुद्ध चीज कबहु बा भितर न घुस पयहए, न त शर्म या छलकपट काम करनबारे हुवाँ जान पयहएँ, पर थुमाको जीवनको पुस्तकमे नाउँ लिखे भए इकल्लो हुवाँ घुसन पयहएँ।
\c 22
\cl अध्याय २२
\v 1 बक पिछु स्वर्गदूत मोके स्फटिक जैसो सफा जीवनको पानीको नदिया दिखाई। बा नदिया परमेश्‍वर और थुमाको सिंहासनसे बहन डटो रहए।
\v 2 बा सहेरको डगरके बीचसे बहत रहए। बा नदियके हरेक किनारे जीवनको रुखा रहए, जौन बाह्रै किसिमके फरा फरात और बा हरेक महिना फरा फरात हए। रुखाके पत्ता जाति-जातिनके ताहीं अच्छो करन ताहिँ रहएँ।
\v 3 हुवाँ कोइ सराप न हुइहए। परमेश्‍वर और थुमाको सिंहासन सहेरमे हुइहए, और बाके दास बाको सेवा करङ्गे।
\v 4 बे बाको मुँहु देखङ्गे, और बाको नाउँ बिनके माथे मे हुइहए।
\v 5 हुवाँ फिर रात न हुइहए, बिनके ज्योतिके ताहीं दियाको जरुरत न पड़हए न त घामुको उजियारो चाहैगो, काहेकी परमप्रभु परमेश्‍वर बिनको ज्योति होबैगो। और बे सदामान राज करङ्गे।
\v 6 स्वर्गदूत मोसे कहि, “जे वचन विस्वासयोग्य और सत्य हएँ। अगमवक्‍तानके आत्माको परमप्रभु परमेश्‍वर जल्दी का होन पड़हए कहिके बाके दासनके दिखान बा अपन स्वर्गदूतनके पठाई।”
\v 7 "देखओ, मए जल्दी आमङ्गो। जा पुस्तकको अगमवाणीको वचन जौन पालन करत हए, बा धन्यको हए।”
\v 8 मए यूहन्‍ना हऔं, जौन जा बातनके सुनो और देखो। जब मए सुनो और बाके देखो, तव स्वर्गदूत जौन मोके जे बात दिखाई, मय बाके अग्गु दण्डवत् करन स्वर्गदूतके पाँवमे घुप्‍टा पड़ो।
\v 9 तव बा मोसे कही, “आइसे मत करए। तिर ददा भईया अगमवक्तन और जा पुस्तकको वचन पालन करनबारेनके मए संगी-दास इकल्लो हऔं। परमेश्‍वरको आराधना कर।"
\v 10 बा मोसे कहि, “जा पुस्तकको अगमवाणीको वचनमे मोहर न लगाबओ, काहेकी समय ढिंगई हए।
\v 11 जो अधर्मी हए, बा लगातार अधर्म करत रहए। जो अनैतिक काम करनबारो हए बा अनैतिक काम करत् रहए। जो धर्मी हए, बा धर्मी काम करत् रहए। जो पवित्र हए, बा लगातार पवित्र रहए।”
\v 12 "देखओ, मए जल्दी अमङ्गो। हरेकके करो भओ काम अनुसारको इनाम मिरसंग हए।"
\v 13 अल्फा और ओमेगा, अग्गु और पिच्छु, सुरु और अन्त महीं हऔं।
\v 14 अपन कुरता धोनबारे धन्यके हएँ ताकि बे जीवनको रुखासे खान और फाटकनसे सहेरके भितर घुसन अधिकार पान सिकएँ।
\v 15 कुत्ता, मन्त्रतन्त्र करनबारे, अश्‍लील काम करनबारे, हत्यारे, मुर्तिपुजनबारे और झुटे बातनके अभ्यास करन बारे और प्रेम करन मन परानबारे हरेक बाहिर हुइहएँ।
\v 16 "मए येशू मिर स्वर्गदूतनके मण्डलीनके जे बातनके गवाही देन पठाओ हऔं। मय दाऊदको वंश और मुल, सुबेरेको चमकनबारो तारा हऔं।”
\v 17 "पवित्र आत्मा और दुलहीन कहत हए, "आबओ।” जौन सुनत हए बा अइसे कहाबए, “आबओ।” जो पियासो हए, बाके आन देओ, और जौन जाको इच्छा करत् हए, बा जीवनको पानी सेतएँ मे पिबए।"
\v 18 जा पुस्तकको अगमवाणीको वचन सुननबारे हरेकके मए चिताउनी देत हऔं। अगर कोइ बिनमे थपैगो तव, जा पुस्तकमे लिखो विपत्ति परमेश्‍वर बाके उपर थपदेहए।
\v 19 यदि कोइ जा अगमवाणीको पुस्तकको वचननसे कुछ निकारैगो तव, परमेश्‍वर जा पुस्तकमे लिखो जीवनको रुखा और पवित्र सहेरको हिस्सासे बाके निकार देहए।
\v 20 "जा बातको गवाही देनबारो कहत हए, "हाँ, मए जल्दी अमङ्गो।” आमेन ! अबओ, हे प्रभु येशू।
\v 21 प्रभु येशूको अनुग्रह हरेकके संग रहाबए। आमेन।