Thr_reg/49-GAL.usfm

\id gal Regular
\ide usfm
\h गलातीनके पावलको चिट्ठी
\toc1 गलातीनके पावलको चिट्ठी
\toc2 गलातीनके पावलको चिट्ठी
\toc3 gal
\mt गलातीनके पावलको चिट्ठी
\c 1
\cl अध्याय १
\v 1 मय पावल ख्रीष्टको एक प्रेरित जो आदमीसे या कोइ आदमीक द्वारा  पठाओ न हऔं, बलुक येशू ख्रीष्‍ट और परमेश्‍वर पिता, जौन बाके मरे मैसे  जिन्दा करी, बाके द्वारा  पठाओ भओ हऔं ,
\v 2 मए और मिरसंग होनबारे सब भैयनके गलातियाके सबय मण्डलीनके जा चिट्ठी लिख रहो हऔं ।
\v 3 परमेश्‍वर पिता और हमर प्रभु येशू ख्रीष्‍टसे तुमके अनुग्रह और शान्ति ।
\v 4 परमेश्‍वर और पिता कि इच्छा अनुसार बा जा वर्तमान दुष्‍ट युगसे हमके छुट्कारा देनके हमर पापके ताहिं अपनएके अर्पण करी ।
\v 5 परमेश्‍वरके सदिमान महिमा होत रहबए । आमेन !
\v 6 मोके अचम्मो लागत हए, कि ख्रीष्‍टको अनुग्रहमे तुमके बुलानबारेके यित्तो जल्दी छोड़के तुम दुसरो सुसमाचार घेन लगरहे हऔ ।
\v 7 वास्तवमे दुसरो सुसमाचार न हए, बल्कि अइसे कोइ-कोइ हँए, जौन ख्रीष्‍टको सुसमाचारके भ्रष्‍ट पाड़नके ढुड़त् हएँ ।
\v 8 हमर प्रचार करो सुसमाचारके बिपरित हमके औ स्वर्गसे आनबारो स्‍वर्गदूत प्रचार करेहए तहुँ फिर बा आदमी श्रापित होबए ।
\v 9 हम अग्गुसे कहो जैसो मए फिर और हबए फिर कहत हऔं, तुम जौन सुसमाचार ग्रहण करे हओ, बाके उल्‍टा और कोइ तुमके प्रचार करत् हए तव, बा श्रापित होबए ।
\v 10 का मए आदमीनको निगह ढुड़त् हऔं, कि परमेश्‍वरको ? औ का मए आदमीनके खुशी करन ढुँड़त् हऔं ? अगर मए और आदमीनके खुशी करन कोसिस करो हऔं तव मए ख्रीष्‍टको दास न हुइतो ।
\v 11 भईया, तुम जा जानओ करके मए चाहत हऔं, कि मए प्रचार करो सुसमाचार आदमीको सुसमाचार न हए ।
\v 12 काहेकी मए जा कोइ आदमीसे पाओ न हऔं, न जा मोके कोइ सिखाइ रहए, बलुक येशू ख्रीष्‍टको प्रकाशसे मए जा पाओ हऔं ।
\v 13 यहूदी धर्म मे रहत अग्गुको मेरो जीवनके बारेमे तुम सुनेहौ, कैसे मए परमेश्‍वरकी मण्डलीके भयानक रुपसे सताओ, और बाके नाश करनके ढुँड़ो ।
\v 14 हमर जातिमे, मिर नातेदारमे बहुतनसे मए यहूदी धर्ममे अग्गु बढो रहऔं, और मिर पिता-पुर्खाको परम्परामे मए बहुत जोसिलो रहऔं ।
\v 15 पर, मिर आइयाको गर्वसे ही मोके चुननके ताहीं  परमेश्‍वर खुशी भओ ।
\v 16 अन्यजातिनके बीचमे बाको प्रचार करन् सिकओं कहिके अपन पुत्र मोए मे प्रकट करनके ताहीं बाको अनुग्रहद्वारा बा मोके बुलाई । मय तुरन्तय शरीर और रगतको  सल्लाह ना लओ ,
\v 17 और न त मोसे अग्गु प्रेरितनके ठिन मए यरुशलेममे गओ, पर मय अरब देशघेन गओ, और पिच्छु दमस्कसमे घुमके आओ ।
\v 18 तव तीन वर्ष पिच्छु केफाससँग भेट करन् मए यरुशलेम गओ, और उनके सँग पन्ध्र दिनतक बईठो ।
\v 19 तव प्रभुको भईया याकूबके बाहेक और कोइ प्रेरितनके मए न मिलो ।
\v 20 परमेश्‍वरके अग्गु मए तुमके विश्‍वास दिलान चाहत हऔं, कि मए जो लिखोहऔं बा झुठो न हए ।
\v 21 तव पिच्छु मए सिरिया और किलिकियाके इलाका घेन गओ ।
\v 22 बा बेरा यहूदीनके ख्रीष्‍टके मण्डलीके मिर मुहूँ न देखि रहएँ ।
\v 23 बे बा बेरा सुनी इकल्लो रहएँ, “अग्गु हमके सतान बारो आदमी जौन विश्‍वास नाश करन ढुड़न डटो रहए, और हबए बहे विश्‍वासको प्रचार करन डटो हए ।"
\v 24 बे मेरे कारन परमेश्‍वरकी महिमा दईं ।
\c 2
\cl अध्याय २
\v 1 चौध वर्षपिच्छु बारनाबाससंग तीतसके लैके मए फिर यरुशलेम गओ ।
\v 2 ईश्‍वरीय प्रकाश पाओ अनुसार मए गओ, और बिनके जौने बहे सुसमाचार धरो, जो मए अन्यजातिनके प्रचार करो हऔं । ( पर जो बहुत जरुरी अगुवा जैसे दिखात रहएँ बिनकेसँग मए व्यक्तिगत रुपमे बोलो )। मए व्यर्थमे न दौड़ रहो हऔं, या दौड़न कहिके पक्का करनके ताहीं मय जा करो ।
\v 3 पर मिर संग होनबारो तीतस ग्रीक हए तहुँ फिर खतना होन पड़ैगो करके कोइ कर न लगाई ।
\v 4 खतनाको जा बात उठो, काहेकी कित्तो झुठे भईया हमर दल भितर चुप्पएसे घुसके ख्रीष्‍टमे भओ हमर स्वतन्त्रताको जासुसी करके हमके बन्धनमे लान चाँहत रहएँ ।
\v 5 सुसमाचारको सत्यता तुमके ताहिं सुरक्षित होबए करके बिनके जौने हम एक घण्टाके ताहिं फिर न झुके ।
\v 6 इज्जतदार दिखान बारे आदमी जो रहएँ -और बे जैसो भए से फिर मोके त कोइ फरक पड़त् न हए, परमेश्‍वर आदमीनको पच्छेपात करत् न हए-बे मिर सन्देशमे कुछु न थपीं ।
\v 7 पर और उल्टा, बे देखके, कि बेखतनन्के सुसमाचार प्रचार करनको बोझ मोके दई रहएँ, जैसी खतनन्के सुसमाचार प्रचार करन् को बोझ दई रहएँ ।
\v 8 परमेश्‍वर, जौन पत्रुसको प्रेरितपनसे खतनान्के बीचमे काम करी रहए, मोसे फिर अन्यजातिनके बीचमे करी रहए ।
\v 9 याकूब, केफास और यूहन्‍ना, जो मण्डलीके खम्मा रहएँ, बिनके उपर भव अनुग्रह पता पाएके पिच्छु मोके और बारनाबासके संगतिको दाहिना हात दईं । हम अन्यजातिके ठिन जानके और बे त खतनन्के ठिन जानके पक्का करीं ।
\v 10 केबल उनकी जहे इच्छा रहए, कि गरीबनके उपर हमर सम्झना रहबए । बहे करनके मए फिर उत्सुक रहऔं ।
\v 11 तव जब केफास एन्टिओखियामे आओ, तव मए उनके खुल्लमखुल्ला बिरोध करो काहेकी बे दोषी रहएँ ।
\v 12 याकूब पठाए भए आदमी आनसे अग्गु बा अन्यजातिनके संग खात रहए । तव जब बे आए पुगे तव बे अन्यजातिनसे पिच्छु हटके अलग हुइगए, काहेकी बे खतनाके दल बारेनसे डराइगए रहएँ ।
\v 13 और बाँकि यहूदी फिर उइसी कपटसे काम करीं हियाँतक, कि बारनाबास फिर उनके कपटमे पड़ गओ ।
\v 14 तव जब सुसमाचारको सत्यता अनुसार न चलो मए देखो, तव बिनके सबके अग्गु मए केफाससे कहो, “तुम यहूदी हुइके यहूदी हानि नाय कि अन्यजाति जैसो चलत हओ तव, अन्यजातिनके यहूदी जैसो चलनके कैसे कर लगए हओ ?”
\v 15 हम जन्मैके यहूदी हएँ, और अन्यजाति जैसे पापी न हएँ ,
\v 16 और फिर हम जन्त हएँ, व्यवस्थाको कामसे कोइ आदमी धर्मी न ठहिरैगो, पर येशू ख्रीष्‍ट के उपरको विश्‍वाससे धर्मी ठहिरैगो । जहेमारे हम फिर हमरो विश्‍वास ख्रीष्‍ट येशूमे धरेहएँ, ताकि हम व्यवस्थाको कामसे ना पर ख्रीष्‍टमे धरो भओ विश्‍वाससे धर्मी ठहिर सिकएँ, काहेकी व्यवस्थाको कामसे कोइ फिर धर्मी न ठहिरैगो ।
\v 17 हमजो ख्रीष्‍टमे धर्मी ठहरन चाहत हएँ, यदि अपनय पापी निकरे, तव का ख्रीष्ट पापको सेवक हए ? कबहु न हए ।
\v 18 काहेकी अपन उजाडो चीजके मए फिर बनायहऔं तव, अपना अपनएके मए अपराधी हऔं करके साबित करत् हऔं ।
\v 19 मय जो व्यवस्था के द्वारा व्यवस्थाके ताहिं मै मरिगओ ताकि परमेश्‍वर के ताहीं जिन सकऔं ।
\v 20 मए ख्रीष्‍ट संग क्रुसमे टँगो हऔं, अब से जिनबारो मए न हऔं, पर ख्रीष्‍ट मोए मे जित हए । जौन जीवन शरीरमे मए हबए जित हऔं, बा परमेश्‍वरको  पुत्रमे विश्‍वास करके जित हऔं, जौन मोके प्रेम करी हए, और मेरे ताहिं अपनएके अर्पण करी हए ।
\v 21 परमेश्‍वरके अनुग्रह के मए पन्छेयात न हऔं, काहेकी यदि व्यवस्थाके द्वारा धार्मिकता होती तव ख्रीष्‍ट के मरन व्यर्थएमे हुइतो ।
\c 3
\cl अध्याय ३
\v 1 हे मुर्ख गलाती तुमके कौन मोहनी लगएके वशमे करलओ ? तुमरी आँखीके जौने येशू ख्रीष्‍ट क्रूसमे टाँगि बात सफा रुपसे बर्णन करो गओ रहए ।
\v 2 यित्कए इकल्लो मए तुमसे पुछन चाहत् हऔं, तुम पवित्र आत्मा व्यवस्थाके कामसे पाए, कि सुनो भओ वचनमे विश्‍वास करके पाए हओ ?
\v 3 का तुम यित्तो मुर्ख हओ, कि आत्मामे सुरु करके शरीरकी रिति से अन्त करईगे ?
\v 4 यदि बा सचमुच बिना अर्थको रहए तव का तुम व्यर्थमे यितनो बातनके अनुभव करे ?
\v 5 जकमारे, जौन तुमके पवित्र आत्मा देतहए, और तुमरे बीचमे अचम्मोको काम करत हए. का बा जा व्यवस्था अनुसारको कामनके कारन करी हए कि विश्‍वास करके सुनन के कारनसे ?
\v 6 आब्रहामके देखओ, “बा परमेश्‍वरमे विश्‍वास करत् रहए, और जा बाके ताहिं धर्मिकता गिनोहए ।"
\v 7 जहेमारे तुम जा जानओ, कि जौन जौन विश्‍वास करत् हएँ, बेहि अब्राहामके सन्तान हएँ ।
\v 8 "परमेश्‍वर अन्यजातिनके विश्‍वाससे धर्मी ठहिरात हएँ करके धर्मशास्त्र पहिले दिखाएके अब्राहामसे"तोए मे सब जाति आशिष पयँहएँ करके सुसमाचार अग्गुसे सुने ।"
\v 9 " जहेमारे विश्‍वास करन् बारे आदमी विश्‍वाससे अब्राहामसंग आशिषित होतहएँ ।
\v 10 व्यवस्था अनुसारको काममे भरोसा रखन बारे सब श्रापित होतहएँ । काहेकी अइसे लिखोहए, “व्यवस्थामे लिखी भई बातके पालन न करनबारे सबय श्रापित होतहएँ ।"
\v 11 अब जा सफा हए, कि "परमेश्‍वर कोइके फिर व्यवस्थाद्वारा धर्मी न ठहेरबाइगो, काहेकी "धर्मी आदमी विश्‍वासैद्वारा जिबईगो ।”
\v 12 व्यवस्था त विश्‍वाससे न अओ हए, पर जाके ठाउँमे, "जौन व्यवस्थामे भओ बात करत हए बा व्यवस्था अनुसार जिबईगो ।"
\v 13 हमर ताहीं स्रापित बनके ख्रीष्‍ट हमके व्यवस्थाको स्रापसे मोल तिरके छुटकारा करी, काहेकी कट्ठामे टाँगो हरेक श्रापित हए, करके लिखोहए ।
\v 14 बा हमके मोल तिरके छुटाई, ताकि अब्राहामके दओ आशिष ख्रीष्‍ट येशूसे अन्यजाति मे आबए, और हम विश्‍वाससे प्रतिज्ञाको पवित्र आत्मा प्राप्त कर सिकएँ ।
\v 15 भईया तुम, सबदिनको जीवनसे एक उदाहरण लेओ, एक चोटी पक्का हुइके पिच्छु आदमीनको इच्छा पत्र कोइ रद्द न कर पएहए, नत् बामे थाप पएहए ।
\v 16 "प्रतिज्ञा अब्राहाम और उनको सन्तानके दई हए । धर्मशास्त्र "सन्तानसे" न कहत हए, जत् बहुत आदमिनके संकेत् कर्त हए । पर धर्मशास्त्र "तुमर सन्तानसे" कहत हए, जा एक आदमीको इकल्लो संकेत देत हए, जो ख्रीष्‍ट हए । "
\v 17 मेरो कहाई को अर्थ जा हए, कि चार सय तीस (४३०) वर्षपिच्छु आओ व्यवस्था बासे अग्गु परमेश्‍वर पक्का करो भव करारके काटत् न हए, नत प्रतिज्ञा रद्द हुइ जातो ।
\v 18 काहेकी उत्तराधिकार व्यवस्थासे पईते तव प्रतिज्ञासे पानबारी बात न आती । पर परमेश्‍वर प्रतिज्ञासे अब्राहमके जा दईं ।
\v 19 तव व्यवस्थाको अवाश्यक्ता काहे पणो तओ ? जौन सन्तानके प्रतिज्ञा भओ रहए, बा न आन तक अपराधको कारनसे व्यवस्था थपिगओ । तव एक जनीके मध्यमसे स्वर्गदूतसे व्यवस्थाको स्थापना भओ ।
\v 20 अभे मध्यस्तकर्ता एकसे जाधा आदमिनके जनात हए, तब भी परमेश्‍वर एकय हए ।
\v 21 तव का व्यवस्था परमेश्‍वरको प्रतिज्ञाके विरुद हए का ? कबहु न हए । अगर जिन्दा करनके व्यवस्था दओ हुइतो तव धार्मिकता नेहत्य व्यवस्थासे आतो ।
\v 22 तव धर्मशास्त्र बतात् हए, कि सब चीज पापके कैदमे हए, ताकि जौन प्रतिज्ञा येशू ख्रीष्‍ट उपर विश्‍वाससे  दओ हए, बा विश्‍वास करन बारेनके दओ हए ।
\v 23 पर विश्‍वास आनेसे अग्गु हम व्यवस्थाके वशमे रहएँ, और विश्‍वास प्रकट न होन तक हम थुने रहएँ ।
\v 24 विश्‍वाससे हम धर्मी ठहिर सकएँ करके व्यवस्था हमर संरक्षक हुइके हमके ख्रीष्‍ट तक डोरयनके जिम्मा दई ।
\v 25 पर अब विश्‍वास आओ हए तव अब हम संरक्षकके अधिनमे न हएँ ।
\v 26 काहेकी विश्‍वासे तुम सब ख्रीष्‍ट येशूमे परमेश्‍वरके सन्तान हओ ।
\v 27 काहेकी तुम मैसे जितनोनके ख्रीष्‍टमे बप्तिस्मा भओ हए, तुम सब ख्रीष्‍टके धारण करे हओ ।
\v 28 अब नत् यहूदी हएँ नत् ग्रीक, नत् कमैया हएँ नत् फुकुवा, नत् पुरुष न स्त्री हएँ, काहेकी ख्रीष्‍ट येशूमे तुम सब एक हओ ।
\v 29 अगर तुम ख्रीष्‍टके हओ तव तुम अब्राहामके सन्तान हओ, और प्रतिज्ञा अनुसार उत्तरअधिकारी हओ ।
\c 4
\cl अध्याय ४
\v 1 मेरो कहाईको अर्थ जा हए, उत्तरधिकारी जब तक बालक हए, बा सब चीजको मालिक हुइहए ताहुँ फिर कमैयनसे फरक न हए ,
\v 2 पर पिताके ठहराओ समयतक बा अभिभावक और संरक्षकके अधीनमे होतहए ।
\v 3 हम फिर अइसी बालक रहएँ तव संसारको आधारभूत सिद्धान्तके बन्धनमे रहएँ ,
\v 4 पर जब ठीक समय आओ, तव परमेश्‍वर अपन पुत्र पठाई । बा एक बैयरसे जन्मो, पर व्यवस्था अनुसार जन्मो रहए ।
\v 5 व्यवस्थाके अधीनमे रहान बारेनके मोल तिरके छुट्यानके बा आओ, ताकि हम पुत्रको पुरा हक पाए सिकएँ ।
\v 6 "तुम पुत्र हुइके मारे परमेश्‍वर अपन पुत्रको आत्मा हमर ह्रदयमे पठाए दईं, जौन के "हे अब्बा, पिता !” कहिके पुकारत् हएँ ।"
\v 7 जहेमारे, परमेश्‍वरके तुम अब कमैया नहऔ, पर पुत्र हऔ, और पुत्र हौ तव एक उत्तरधिकारी फिर हओ ।
\v 8 अग्गु अग्गु जब तुम परमेश्‍वरके चिने न रहओ, तुम बिनके दास रहओ, जो स्वभावैसे ईश्‍वर न हएँ ।
\v 9 पर अब तुम परमेश्‍वरके चिनतहओ, औ पक्कय तुम परमेश्‍वरद्वारा चिनेहौ तव, और फिर काहे तुम बे कमजोर और सुरु-सुरुके खराब सिद्धान्त घेन घुमत हओ ? का तुम और फिर बिनको दास बनन चाँहत हऔ ?
\v 10 तुम तिथि, महिननके, ॠतु और वर्ष मान्त हओ ।
\v 11 मोके त् अइसो लागत हए, कि तुमरे ताहिं करो मेरो परिश्रम व्यर्थ भओ ।
\v 12 भईया तुम, मिर जैसे होबओ करके मए बिन्ती करत् हऔं, काहेकी मए फिर तुमरी जैसो हऔं । तुम मिर कोइ खराबी करे न हओ ।
\v 13 तुमके पता हए, कि शरीरके कारन मए पहिले सुसमाचार सुनात रहऔं ।
\v 14 अगर मिर बिमारी अवस्था तुमरे ताहिं एक परीक्षा रहए, और तुम मोके तिरस्कार न करे, न घिड़ना करे, परमेश्‍वरको स्वर्गदूतके रुपमे ख्रीष्ट येशू कता मोके स्वीकार करे ।
\v 15 तुमरो अनुभव करो आनन्द कितए गओ ? काहेकी मए गवाही दए सक्तहऔं, कि अगर सम्भव होतो तव तुम अपन आँखी तक निकारके फिर मोके दएदित्ते ।
\v 16 तव तुमसे सच्चो कहानके कारनसे क मए तुमर शत्रु हुइगओ हऔं का ?
\v 17 तुमके अपने घेन ताननके बे खुब जोस दिखात हएँ पर अच्छे इच्छासे ना । तुमके जद्धा उत्साहसे स्वीकार करएँ करके बे हमसे तुमके अलग करन् ढुड़त् हएँ ।
\v 18 अच्छो इच्छाके ताहिं जोसिलो होन अच्छो हए, पर मए तुमरे बीचमे होत इकल्लो जोस दिखानो अच्छो न हए ।
\v 19 मिर छोटे बालक तुम, ख्रीष्‍ट तुमरमे न बनन तक मए फिर प्रसवपिडामे हऔं ।
\v 20 हबए मए तुमरे सँग हुइके मेरो बोलनको तरीका बदलन सिक्तो तव कित्तो अच्छो हुइतो, काहेकी तुमर बारेमे मए अन्योलमे पड़ो हऔं ।
\v 21 तुम व्यवस्थाके अधीनमे रहन चाहन बारेनसे मए कहान चाहत् हऔं कि, व्यवस्था का कहत हए का तुमके पता न हए ?
\v 22 काहेकी लिखो हए, अब्राहमके दुई लउँड़ा रहएँ, टाहलुनिया घेनसे एक, दुसरो त स्वतन्त्र बैयरसे ।
\v 23 टाहलुनियाको लउँडा त शारीर अनुसार जन्मो रहए, पर स्वतन्त्र बैयरसे जन्मो लउँड़ा प्रतिज्ञासे ।
\v 24 जा बातके कहानीके रुपमे लए सक्त हएँ । बे बैयर दुई किसिमके करार हएँ । एक त सीनै पर्वतसे दासत्वके ताहिं सन्तान जन्मान बारी हागार हए ।
\v 25 हागार अरब देशको सीनै पर्वत हए, और वर्तमान यरुशलेमसँग बाको तुलना कर सिक्त हएँ । काहेकी बा अपन बालकनके सँग दासत्वमे हए ।
\v 26 पर उपरको यरुशलेम स्वतन्त्र हए, जो हमरी अईया हए ।
\v 27 काहेकी लिखो हए, “हे न जन्मान बारी बाँझी आनन्दसे चिल्ला, हे प्रसवपिडा पता न पान बारी, मन खोलके चिल्ला, काहेकी पति भै बैयरसे त्यागी भई बैयरके लउँड़ा-लउँड़िया बहुत हएँ ।”
\v 28 अब हे भैयओ, इसहाक जैसो हम फिर प्रतिज्ञाके सन्तान हएँ ।
\v 29 पर बा बेरा जैसी शरीर अनुसार जन्मेनके आत्मा अनुसार जन्मेनके सतात रहएँ, और हबए फिर अइसी हएँ ।
\v 30 पर धर्मशास्त्र कहात हए ? “टाहलुनियके और बाके लौड़नके निकार देओ, काहेकी दासीको पुत्र स्वतन्त्र बैयरको लउँड़ासंग उत्तरअधिकारी न हुइहए ।"
\v 31 जहेमारे भैयाओ, हम टाहलुनियाके न हएँ, पर स्वतन्त्र बैयरके सन्तान हएँ ।
\c 5
\cl अध्याय ५
\v 1 स्वतन्त्रताके ताहिं ख्रीष्‍ट हमके स्वतन्त्र करी हए । जहेमारे तगड़े हुइके ठाड़ओ और फिर दासत्वके जुवा तरे मत पड़ओ ।
\v 2 मए पावल तुमसे कहत हऔं, तुम खतना लेहओ तव ख्रीष्‍टके तुमके कोइ फाइदा न हुइ हए ।
\v 3 खतना होनबारेनके मए फिरके चेताउनी देत हऔं, कि पुरो व्यवस्था पालन करन् बा बाध्य होतहए ।
\v 4 तुम जो व्यवस्थासे धर्मी ठहिरन चाँहत हओ, तव तुम ख्रीष्‍ट अलग भए हओ । और तुम अनुग्रहसे तरे गिरेहओ ।
\v 5 काहेकि हम पबित्र आत्मा के द्वारा बिश्‍वाससे धार्मिकताको आशाको प्रतिक्षा करत हएँ ।
\v 6 ख्रीष्‍ट येशूमे न त खतना कोइ मुल्यको हए, न बेखतना कोइ मुल्यको हए, और बा हए- प्रेमसे काम करन् बारो विश्‍वास ।
\v 7 तुम अच्छे दौड़त् रहओ । तव कौन तुमके सत्यता पालन करनके बाधा दओ ?
\v 8 तुमके बुलान बारेसे जा फकानो-फुल्सानोको काम न भओ हए ।
\v 9 थोरी सोडा जम्मए ढुक्लाके सोणा बनात हए ।
\v 10 मए प्रभुमे तुमके भरोसा करत् हऔं, कि तुम दुसरो तरीकासे बिचार न करत हऔं ।  तुमके भ्रममे पारन बारो जोनफिर हिए से फिर बा अपन दण्ड पयहए ।
\v 11 पर भईया, अगर मए और खतनाको प्रचार करत् हऔं तव मिर उपर जा सब सतावट काहे आओ ? फिर त क्रूससे आन बारो ठोकर चलेगओ हए ।
\v 12 तुमके बहकान बारे त बलुक अपन अँग काटेसे फिर हुइहए ।
\v 13 भईया रेओ, तुम त स्वतन्त्रताके ताहिँ बुलाए गए हऔ । केवल बा स्वतन्त्रता पापमय स्वभावके ताहिँ प्रयोग मत करओ पर प्रेममे तुम एक-दुसरेके सेवक बनओ ।
\v 14 काहेकी सबय व्यवस्था एकए वचनमे पुरा भव हए, “तए अपन परोसिनके अपनए कता प्रेम कर ।"
\v 15 पर तुम एक दुसरेके काटन और निलन करत् हओ तव होसियार होबओ, तुम अपनय एक दुसरेसे खतम होन न पणए ।
\v 16 पर मए कहात हऔं, पवित्र आत्मासे नेगओ, और पापमय स्वभावके लालच पुरा मत करओ ।
\v 17 काहेकी पापमय स्वभावके लालच पवित्र आत्माके विरुद्ध होतहए, और पवित्र आत्माको इच्छा पापमय स्वभावके विरुद्धमे । तुम जो करन् चाहत हओ बासे तुमके रोकन जा त एक दुसरेके विरुद्धमे होतहए ।
\v 18 पर यदि पवित्र आत्मा तुमके अगुवाइ करईगो तव तुम व्यवस्थाके अधीनमे न हुइहओ ।
\v 19 पापमय स्वभावके काम प्रत्यक्ष हएँ जो जेही हएँ- व्यभिचार, अपवित्रता, लम्पटपना ,
\v 20 मूर्तिपुजा, मन्त्रतन्त्र, दुश्मनी, झैंझगडा, ईर्ष्या, क्रोध, स्वार्थीपन, फूट, गुटबन्दी ,
\v 21 रीस, पियक्कडपन, अशलील मोजमज्जा, और अइसी जौनके बारेम मए तुमके चेताउनी देतहऔं, और अग्गु फिर दओ हऔं । जौन-जौन अइसो काम करत् हएँ, बे परमेश्‍वरको राज्यके हकदार न बनेहएँ ।
\v 22 पर पवित्र आत्माके फल त प्रेम, आनन्द, शान्ति, धैर्य, दया. भलाइ, विश्‍वास ,
\v 23 नम्रता और संयम हएँ । जे बातनके विरुध्दमे कोइ व्यवस्था न हए ।
\v 24 पर बे जो ख्रीष्‍ट येशूके हएँ, बे अपन शरीरके बाके लालसा और खराब अभिलाषा समेत  क्रुसमे टाँगे होतहएँ ।
\v 25 यदि  हम पवित्र आत्माद्वारा जीत हएँ तव, हम आत्माद्वारा ही चलएँ ।
\v 26 हम अहँकारी न बनएँ, एक दुसरेके रीस न उठामै, और एक दुसरेके ईर्ष्या न करएँ ।
\c 6
\cl अध्याय ६
\v 1 भईया, अगर कोइ आदमी अपराधमे पक्राउ पड़िगओ तव तुम जो आत्मिक हओ, तुम नम्रताको आत्मामे बा आदमीके सुधार करिओ । अपनएके फिर बिचार करिओ, नत तुम फिर परीक्षामे पड़ेहओ ।
\v 2 एक दुसरेको भार उठाबओ, और अइसीय तुम ख्रीष्‍टके व्यवस्थाके पुरा करईगे ।
\v 3 काहेकी कोइ मुल्य न भओ आदमी अपनएके कोइ हौं करके मान्त हए तव बा अपनएके धोखा देत हए ।
\v 4 हरेक अपनिय कामको जाँच करन हए, तव इकल्लो बा और संग तुलना न करके अपनएके गर्व करन कुछ कारन होतहए ।
\v 5 काहेकी हरेकके अपनो भार अपनाएके उठान पड़ैगो ।
\v 6 वचनको शिक्षा पानबारो अपन सब अच्छो चीज वचन सिखान बारेन संग बाँटन हए ।
\v 7 धोखामे मत पडओ, परमेश्‍वरको ठट्ठा होत न हए, काहेकी आदमी जो लगात हए, बहेको कटनी फिर करत् हए ।
\v 8 जौन अपनो पापमय स्वभावके ताहिं लगात हए, बा अपनो पापमय स्वभावसे सर्वनाशको कटनी करईगो, पर जौन आत्माके ताहिं लगात हए, बा आत्मासे अनन्त जीवनको कटनी करईगो ।
\v 9 भलाइ करन् को काममे हम न थकएँ, काहेकी अगर हम हिम्मत न हरेहएँ तव ठीक समयमे हम कटनी करङ्गे ।
\v 10 जेहेमारे मौका पाए अनुसार हम सब आदमीनके भलाइ करत जामएँ, विशेष करके बिनके, जो हमर विश्‍बासके परिवारके हएँ ।
\v 11 देखओ, मए कित्तो बड़े-बड़े अक्षरसे अपने हातसे तुमरे ताहिं लिखो हऔं ।
\v 12 ख्रीष्‍टको क्रूसके कारण सतावटमे न पणएँ करके बाहिरसे सब ठीक दिखन चाहन बारे तुमके खतना करन् कर लगात हएँ ।
\v 13 काहेकी खतना करन् बारे अपनए व्यवस्था पालन न करत् हएँ, पर तुमरे शरीरमे घमण्ड करन् के ताहिं तुमरो खतना करो बे चाहत हएँ ।
\v 14 हमर प्रभु येशू ख्रीष्टको क्रूस बाहेक और कोइ फिर चीज उपर घमण्ड करन् बारी बात मोसे दूर रहबए, जौनसे मए त संसारके ताहीं, और संसार मिर ताहीं क्रूसमे टलंगो हए ।
\v 15 न त खतनाको कोइ महत्व हए, न बेखतनाको, पर नयाँ सृष्‍टि सब चीज हए ।
\v 16 अब जो जित्तो जा नियममे चल्त हएँ, बिनके उपर और परमेश्‍वरको इस्राएलमे  शान्ति और कृपा रहबए ।
\v 17 अबसे उइसो कोइ मोके कष्‍ट न देबए, काहेकी मए अपन शरीरमे येशूको दाग धारण करत् हऔं ।
\v 18 भईया रेओ, हमर प्रभु येशू ख्रीष्‍टको अनुग्रह तुमरे आत्मासँग रहाबए । आमेन ।