Ino-x-okolie_reg/67-REV.usfm

\id REV
\ide UTF-8
\h Kitiboto Iyo
\toc1 Kitiboto Iyo
\toc2 Kitiboto Iyo
\toc3 rev
\mt Kitiboto Iyo
\c 1
\cl Kingutit 1
\p
\v 1 Ara ene kitiboto lo yesu kristo na licio Lobanga inyi ojir itotorohi karwaahi kunenge toki na mute litihino deu. Icio inyi oyeniti to culuno malaika iyo karwaani nenge Jon.
\v 2 na licio saden tosangite fad kuna lodeu inyi na lara tenya lo Lobanga ko saden lo Yesu Kristo.
\v 3 ongon gum iyo tungani na likena tenyi tenyi ene kimoca manyu ongon gum iyo cio kuna loning manyu ofihi taulo sangite kuna ligero katwa nenge tonyio lonyihati.
\p
\v 4 Nan Jon Iyo kanisahin mietare kuna longoni kof lo Asia Kisa ko kisiliban ongon iyo ite na lolotu iyo inyi lafa longon, na jija longon ko na mute lolotuno kon iyo okorifi mietare kuna longon ketemoni lo seger lo okabwe
\v 5 ko iyo Yesu Kristo na lara saden na ligenoro, okang lo kabuhunok to wei ko kalanyunoni lo kabuno kulo kof iyo inyi na limaru ohoi many kilahu ohoi kipalipali kuniyang to okoto nenge
\v 6 manyu kirak ohoi ara okabwe lo kadwarak lo kirwa Lobanga ko Apa nenge. Ingohi deyo ko golun to karihin ko karihin. Amen
\q
\v 7 Tode olotuno inyi ko idis Many ode mute konyeha fad inyi Many ityo mute cio kulo kof fad tonyi Ingohi tara jii. Amen.
\p
\v 8 Ojo Lahitok Lobanga “Nan lohicaki ko lohicungi na longon afa, jija ko na mute lolotuno kagoloni na lilany fad.
\p
\v 9 Nan Jon rece ko kaletoni ningi iyo kidak ko okabwe ko kidonyo lo taulo ko diha na lara niyang iyo Yesu, angon afa nan cula lo patmos to lofere lo tenya lo Lobanga ko sadden lo Yesu.
\v 10 To far lo Lobanga orumu nan angon iyo Okorif ato nan aning ogoro na ikwat iya ture kifwongi nei
\v 11 na lojo “igerohi iyo buk tohi na lideu isi iculahi iyo kanisahin mietare, kuna lara, Epeso, Simarna, Perganum, Sitra, Sardius, Piladelpia ko Laodikea".
\v 12 Ato nan abelo lo deya ene ogoro lotenya iyo nan. Ajo nan abelo adeu nan lomohin mietare kuna lara dab
\v 13 manyu kiji lo kuna lomohin ongon tobo na lori iya kito lo tungani na liciefita kanyi na licur many kejuha ko gas lo dab ibara locolo nenge.
\v 14 Kwe ko fofi kunenge okwe iya kyela lo fofi kulo ker na lokwe iya lofalanga ori
\v 15 konyeha kunenge mwala kuna lofejo many ori ogoro nenge mejo kigurita lo kifi kuna licuro.
\v 16 otehita inyi to kana iteten nenge kanger mietare olotu olotu ngalem latubol na iko ngatihin fad to kutuk nenge. Ori komom nenge iya kolong na ifarang ojal.
\v 17 Kaladeu nan inyi nan ko urohino kejuha kunenge ko rijon iya tungani na iwei. Oto inyi kofiha kana nenge iteten ken nei ko jimitan; “kebang lohiciahi ko lohicungi
\v 18 nan inyi na lowar awei afa nan ati jija awar karihin ko karihin many atehita nan muhuta lo wei ko kwecere.
\v 19 Igero dong tohi na lideu isi, tohi na longon jija ko tohi na mute lofihi to kifwongi
\v 20 Ilitit lo kuno kanger metare to kana nei iteten ko lo lomohin metare inyi ene: Ara kuno kanger metare malaikahin kulo kanisahin metare manyu kuno lomohin metare icing kanisahin metare.
\c 2
\cl Kingutit 2
\p
\v 1 Iyo malaika lo kanisa lo epeso igero tijo; Ara kuno tenyi tenyi kulo inyi na lo tehita kanger metare to kana iteten nenge ko inyi na lilorita kiji lo lomohin metare kulo dab.
\v 2 ayen nan ticitici kunino, kirunga nino ko diha lo kidak nino. Ayen nan jimitan ida isi isisio cio kuna irohori, manyu litem isi kuna lilolongoro ojo icing jayona ida hati ara manyu icieng katalerok.
\v 3 Lidony isi tau many idik kidak to karana nei many ida iniama
\v 4 Ati angon nan kone tenya bito ken nino lingohi isi lafa kimaruno nino lingonore isi ketemoni.
\v 5 tode re manyu ibuha lomajun lo lo lourunore nino to faji lafa litedore isi kai! Irwo manyu itiyo kulafa sangite litem isi kitiyo. Kalida isi irwo alotu cia nan iyosi alotu ademe lomo nino to faji nenge.
\v 6 Ati ingon isi ko tohi na lisisio isi: iberu isi tic to cio kulo Nikolotia na Laberu nan.
\v 7 Tungani na longon ko kiyoha, ingoi toning tohi na lotenya okorif na inyu iyo kanisahin. Iyo tungani na lolanyu, acio ca nan onyia cani lo warun na longon mana lo Lobanga.
\p
\v 8 Iyo malaika lo kanisa lo Simarina igero tijo: Ara kuno tenyi tenyi kulo na lara Lohiciahi ko Lohicungi, lafa lowei olotu owaru ari.
\v 9 Ayen nan kidak na lirumu isi ko kitigema ko okilwahaje nino ati ibaro isi. Ayen nan talerun lo kuna lojo icieng Judeahin ida hati ara ati ara lotubare lo sitan.
\v 10 Kebang kidak na lolotuno iyosi. Atirihohi, ofik cia sitan kude to kiji ningi mabus lo tema ite many kiticiani cia ite tofarihin tomon. Igenoroti many iwei ato cia nan ahicio ite tahii lo warun.
\v 11 Inyi na longon ko kiyoha ingoi toning tohi na latenya okorif na inyu iyo kanisahin. Inyi na lodik oweita ida mute wei lo are inief inyi.
\p
\v 12 Iyo malaika lo kanisa lo Pegamun Igero tijo: Ara kuno tenyi tenyi kolu inyi na lotehita ngalem Latubot na loko fajihit are fad.
\v 13 Ayen nan faji na litongo isi, ara faji na longon seger lo okabwe lo sitan ati iwoita isi iyo dede to karana nei. Ida isi lingerihi kiruk nino iyo nan kileng to faritin kulo antipas sadden nei na ligenoro na lifadahini katwa lo kang ningi lohitongore lo sitan.
\v 14 Oto hati ongon sangite kude kuting kuna longoni ken nino. Ongoni cio inyia kuna loric kitiyena lo Balam nafa lolabare Israel daha daha na likumarihin lopidingahin ko kitiyo ticitici kulo lomuna.
\v 15 Iya na longoni manyu cio iyo ite kuna linief kitiyena lo Nikolotia.
\v 16 Irwoti bo dong! Koloru alotu cia nan deudeu kitiremo icieng to ngalem lotubot na longon kutuk nei.
\v 17 Inyi na longon ko kiyoha ingohi toning tohi na lotenya okorif iyo kanisahin. Iyo inyi na lodik owoitahi icio cia nan mana na liduha. Acio manyu cia nan inyi moru na ikwe na ligero karana ngejuk ijia na lara inyi karumunoni ake loyen.
\p
\v 18 Iyo malaika lo kanisa lo Siatira igero tijo: Ara kuno tenyi tenyi kulo kito lo Lobanga na lori konyeha iya kima na iyarat manyu na lori kejuha iya molati na lirudi.
\v 19 Ayen nan ticitici kunino fad, kimaruno nino, kiruk ko kidonyio lo tau nino manyu ayen jimitan itiyo isi ilany lafa litiyore ketemoni.
\v 20 Oto hati angon nan ko tenya ken nino: iningo isi tenya lona ngorwani Jesebel na lilolongoro ojo inyi kamocani. To kitiyena nenge na irohoi litigere karwaak kunei iyo tic lo samun ko daha dahidahi kuna likumarihin lopidingahin.
\v 21 Lacio nan iyni faritin kulo kirwo to kipal nenge ati ida inyi owak.
\v 22 Tona abirohi cia nan inyi iyo lagere lo kidak acio manyu cia nan cio pili kuna litii lomuna konyi kidak na hitok mayak kalirwo icieng to kuna kikohin kuneicieng.
\v 23 Afade cia nan tee kunenge. Oto cia kanisahin fad oyen ojo nan layen taulo ko kibuhibuhi kulo cio pili manyu adum cia nan ite tolobito tolobito to sangite kuna litii ite.
\v 24 Jija ajo nan iyo ite kula kude cio kuna lingon Siatira ite kuna liberu kitiyena nenge kuna lida iwak na tohi lilolongo sitan ojo ilititi kuna ilukoho ida cia nan arihe ahiticun ite lobo ter;
\v 25 Iniefata tohi na litehita ite many alotu nan.
\v 26 Iyo inyi na lodik owoitahi, manyu itii wahun nei, many lohicungi acio cia nan inyi obolojohi kofi kofi.
\q
\v 27 Olanyu cia mute inyi icieng to iluk lo biliet obor cia mute inyi icieng ara belebele kulo toboha kulo motiong iya na afa larumunore nan obolore iyo Apa nei.
\v 28 Acio manyu cia mute inyi kangieriti lo kiwanyi.
\v 29 Inyi na longon ko kiyoha ingohi toning tohi na lotenya okorif iyo kanisahin.
\c 3
\cl Kingutit 3
\p
\v 1 Iyo malaika lo kanisa lo Sardis igero tojo; Ara kuno tenyi tenyi kulo tungani na longon ko Okorifi mietare ko kanger mietare. Ayen nan ticitici kunino; ifik isi ijo awar inyi ati isi iwei.
\v 2 Tokwenyu, itigolo tohi na lotong na loweyaru tonyio ida nan arumu ticitici kunino ifuti ketemoni lo Lobanga nei.
\v 3 Iiu bo tohi nafa lining isi ifotu manyu dong toning manyu irwo. Ati kalida isi ikwenyu, alotu cia nan iya kakokoni na lida isi iyen tik na lalotunore nan diho isi.
\v 4 Ati ingon isi ko cio kude kuting inyia Sardis kuna lida litibot kyelani kunicieng: kilihita cia mute icieng ko nan iciefitati kyelani kuna ikweri tonyio ocami icieng.
\v 5 Iyo inyi na lodik owoitahi ori mute ko kuna liciefita kyelani kuna ikweri. Ida mute nan afufuse karana nenge to buk lo warun ati aletu mute nan karana nenge ketemoni lo Apa nei ko malaikahin kunenge.
\v 6 Inyi na longon kiyoha ingohi toning tohi na lotenya Okorif iyo Kanisahin.
\p
\v 7 Iyo malaika lo kanisa lo Piladelpia igero tojo; Ara kuno tenyi tenyi kulo tungani na inyu manyu ara dede, na lotehita kingajita lo David. Tohi na longa inyi ida tungani igenihi manyu tohi na ligenihi inyi ida tungani onga.
\p
\v 8 Ayen nan ticitici kunino. Tode lafik nan agwala na ingaja ketemoni nino na lida tungani otum kingenihino. Ayen nan jimitan isidi golun nino ati lyric isi tenya nei manyu ida iberu karana nei.
\v 9 Acio ca nan kuno cio kulo lotubare lo sitan, kuna lojo icieng Judeahin ida hati ara, itongoti ara katalerok. Acio cia nan icieng ofwonu ourohino lorubuhe iyo kejuha kunino manyu oyeniti jimitan ahimaru nan isi.
\v 10 Iya na liricare isi cik nei lo diha kidak to golun lo tau, ahiric manyu mute nan isi to far lo lokiho na lolotuno iyo kof fad lo tema cio pili kuna longoni ene kof.
\v 11 Alotuno nan deu. Toric tohi na litehita isi ojir lobo tubgani ida odume fahi nino.
\v 12 Inyi na lodik owoitahi, atirak cia nan ara wiriti lo kaji lo Lobanga nei. Ida mute inyi orihe orutu oleng. Agerihi cia nan karana lo Lobanga nei ko karana lo kang lo Lobanga nei ken nenge, Jerusalem ngejuk na lolotuno ene kof to kai iyo Lobanga nei, agerohi manyu cia nan karana nei ngejuk ken nenge.
\v 13 Inyi na longon kiyoha ingohi toning tohi na lotenya okorif iyo kanisahin.
\p
\v 14 Iyo malaika lo kanisa lo Laudicia igero tojo; Ara kuno tenyi tenyi kulo Amen sadden lo dede ko na ligenoro, kalanyunoni lo sangite kuna loduk Lobanga.
\v 15 Ayen nan ticitici kunino jimitan ida isi irobi kode inok. Ngara hati irobi isi kode inok!
\v 16 Tonyio ira isi na ibou, ida inok ida manyu irobi lolelek nan ahimitu isi to kutuk nei.
\v 17 Itenya isi ake ake ijo, ‘Abara nan, larumu nan bara loru lobo tohi lawak nan. Ati ida isi iyen jimitan ira isi tungani na lolanyu kof, na imehino, kilwahani, na ingodo na manyu lilot longature.
\v 18 Ahisinga nan isi ajo inyiangu dab na litinyuji to kima iyo nan ojir ibara, ko kyelani kuna ikweri iyo nan ojir imuk riri lo kingaturo nino, ko ciani lo konyeha iyo nan ojir itifurie ngodo nino.
\v 19 Cio kuna lamaru nan arienga nan asinga manyu, tona tofik golun manyu irwo.
\v 20 Tode nan ene lawoita agwala atotoho, koloning tungani ogoro nei, onga agwala, arute cia nan dihonyi, kidaha konyi inyi manyu ko nan.
\v 21 Iyo inyi na lodik owoitahi, acio cia nan inyi twero lo kitongo ko nan iyo seger lo okabwe nei, iya na afa ladihare nan atongohinore ko Apa nei iyo Seger lo Okabwe nenge.
\v 22 Inyi na longon ko kiyoha ingohi toning tohi na lotenya Okorif iyo kanisahin.
\c 4
\cl Kingutit 4
\p
\v 1 To kifwongi lone, ato nan adeya. Ketemoni nei adeu nan agwala na longaja owat idi kai. Oto ogoro na lorumu aning nan otenya iyo nan berien na lokwat iya ture ojo diho nan, “Ou ene kai ojir ahitotorohi tohi na cia litiihino to kifwongi”.
\v 2 Deu deu ato nan ko ngonun iyo Okorif, ko deuno Seger lo Okabwe na longon kai ko tungani na likangana kai nenge.
\v 3 Nu tungani likangana iyo na Seger lo Okabwe imedek iya moru lo wel na ikwe ko na ido. Ko okilok na lori mejo na moru lojimi emerald irit na seger lo okabwe.
\v 4 Irit manyu Segeri kulakude keek are kongon na seger lo okabwe ko lohitwaha keek are kongon itongoti kai lo kuna segeri, iciefita orumu icieng kyelani kuna ikweri ko talia kulo dab kweci.
\v 5 Olotu kimedek ko kitirita lo hila iyo na seger lo okabwe. Ketemoni lona seger lo okabwe orumu ongon lomohin mietare kuna lonok ara icieng Okorifi mietare kulo Lobanga.
\v 6 Manyu ketemoni lo na seger lo okabwe orumu ongon nam lo madara na inyu iya moru na imedek. Kiji inyia longonore na seger lo okabwe orumu ongoni tyangi kuna iwari ongon kuna lirit na seger lo okabwe manyu ongoni konyeha iyocieng ketemoni ko kifwongi.
\v 7 Ori tyang na iwar ketemoni iya ngatuny, ori lo are iya mongo, ori komom lo louni iya lo tungani, ori lo ongon iya lo logiga na lifirita kai.
\v 8 Ongoni kuno tyangi ko fuho toile, manyu irit konyeha kenite kuneicieng fad many ikudiha kulo fuho. Karwe ko far ida icieng iticung wolo ojo, “Onyu, Onyu manyu onyu Lobanga Lobanga na lilany. Na afa longon, ongon jijia ko karihin kuna lofwonuno fad”.
\p
\v 9 Kalicwara kuna tyangi iwari kwatun, rima ko kwama iyo inyi na likangana iyo seger lo okabwe manyu na lomanya tur ko tur,
\v 10 ouroro kuna lohitwaha keek are ko ongon logugunge ketemoni lo na likangana iyo seger lo okabwe, iworati inyi na lowar tur ko tur ofihahi icieng taha kuneicieng ketemoni lo seger lo okabwe ko jimitan,
\q
\v 11 “Icam isi Lahitok Lobanga niyang To rumuno deyo, kwatun, rima ko golun Tonyio iduk afa isi sangite fad Manyu to wahun nino oduhi icieng, Manyu ongonorehin.
\c 5
\cl Kingutit 5
\p
\v 1 Dong adeu nan iyo kana iteten nenge lona likangana iyo seger lo okabwe buk na litulo na ligero fajihit fad katwa ko korwong manyu odwanyi to kitihiti mietare.
\v 2 Manyu adeu nan malaika na litirima ifura to ogoro na ikwat ojo, “Ngai locam to wonyo kitihiti manyu onga buk na litulo?”
\v 3 Ati oru lobo tungani lorumuni tokai kode kof kode fotiri lo kof lotum wonyo buk na litulo kode deya katwa nenge.
\v 4 Ato nan acira bebe tonyio olobo tungani lorumuni na locam ngaja buk na litulo kode deya katwa nenge.
\v 5 Oto Lobito lohitwaha ko jimitan diho nan, “Kecira! Tode ngatuny lo imanit lo Juda, kerdeti lo David lo lanyu. Inyi litweru wonyo kuna kitihitihi mietare ko ngaja buk na litulo”.
\v 6 Ato nan adeu kito lo kern a lori mejo ifadari nyafa, owoita kiji lo Seger lo okabwe na lirit tyangi kuna iwari ongon ko lohitwaha ongon inyi ko muriaha mietare ko konyeha mietare kuna lara Okorifi kulo Lobanga mietare kuna loculari kof fad.
\v 7 Olotu inyi ko dumuno buk na litulo to kana iteten lona likangana iyo seger lo okabwe.
\v 8 Langun lodumu inyi buk oto kuna tyangi iwari ongon ko lohitwaha ko urohino logugunge ketemoni lo kito lo ker. Ongon orumu lobito lobito ko adungu manyu otehitati ilebuha kuna lara dab kuna lifut iheru katwa na lara kilifa lo cio kulo Lobanga.
\v 9 Oto icieng owol wole ngejuk na lojo, “Icam isi to dumuno buk na litulo ko wonyo kitihiti kunenge tonyio kifadari afa isi manyu to okoto nino linyiangu isi cio ara kulo Lobanga to kofikofi ko imaniti ko tenyi tenyi, ko cio ko kofikofi fad.
\q
\v 10 Lifik isi icieng ara cio kulo Okabwe ko kadwarak kuna lirwaa Lobanga niyang manyu olanyu mute icieng kof”.
\p
\v 11 Ato nana de ko ningo ogoro lo malaikahin kuna iborengi, kuna lara alifi ko alifi kuna lotum alifi tomon kakeny alifi tomon. Irit icieng seger lo okabwe, tyangi kuna iwari ko lohitwaha.
\v 12 To ogoro na ikwat owol icieng ojo, “Ocam kito lo ker lafa lifadari Lo rumuno golun, bara, Genyun, golun, rima, deyo Kwatun ko kwama”.
\p
\v 13 Tinyia, aning nan sangite kuna loduhi pili to kai ko kof ko fotiri lo kof ko katwa lo nam ko sangite pili kuna longoni katwa neicieng owolo ojo, “Iyo inyi na litongo iyo seger lo obolore Ko iyo kito lo ker, Ongon maja ko rima ko deyo Ko golun To karihin ko karihin”.
\p
\v 14 Kuna tyangi iwari ko jimitan, “Amen”. Oto lohitwaha ourohino kof logugunge ko kiwora.
\c 6
\cl Kingutit 6
\p
\v 1 Ato nan ariria kolowony kito lo ker Lobito iyo kuna kitihiti mietare lodwanyarihin buk na litulo. Ato nan aning Lobito iyo kuna tyangi iwari oteny to ogoro na ikwat lori iya kigurita lo hila ojo “Ou!”
\v 2 Ade nan lakweny na ikwe tungani na longon kai nenge otehita kawo oto iciori inyi tahi ko loro to lakweny iya kalanyunoni lo rem na loloro owak lanyuno.
\p
\v 3 Kolowony kito lo ker kitihi lo are, aning nan tyang na iwar lo are ojo, “Ou!”
\v 4 Oto lobo lakweny orutu na ido iya kima. Icori karwohitani nenge golun lo dumaru kisiliban to kof ko kicwara cio ifada kenite. Icori dihonyi latubot na hitok.
\p
\v 5 Kolowony kito lo ker kitihi lo uni aning nan tyang na iwar lo uni ojo, “Ou!”. Adeu nan to ketemoni nei lakweny na irwok! Otehita karwohitani nenge kipimi lo sangite to kana.
\v 6 Ato nan aning lobo tohi lori mejo ogoro to kiji lo kuna tyangi iwari na lojo, “Lobito iyo ongon lo ilebu lo geme kidumi lo tic lo far Lobito, ko uni iyo ongon lo ilebu lo ngamang to tic lo far Lobito ati kepal ngoroni ko vino.
\p
\v 7 Kolowony kito lo ker kitihi lo ongon aning nan tyang na iwar lo ongon ojo, “Ou!”
\v 8 Adeu nan lakweny na ikworong to ketemoni nei! Obara karwohitani nenge Wei ijifita tai kifwongi nenge tang. Iciori icieng golun iyo Lobito lo ongon lo kof fad lo kifada cio to ngalem latubot, to kinga ko to johi johi ko to tyangi kuna ingereha kulo kof.
\p
\v 9 Ojo owony kitihi lo miet adeu nan Okorifi kulo cio kuna lifadari to tenya ko sadden na logolu icieng ongoni fotiri lo ciali lo fejo lo kikumihin.
\v 10 Ilolong icieng to ogoro na ikwat ojo, “kanu mute Lahitok na lilany fad na inyu ko lodede kanu mute ingotohi isi cio kulo kof tenya kweci ilenu okotohin kuniyang.
\v 11 Oto iciori icieng fad kyelani kuna ikweri ko rihohino icieng ojo ojir itiluni lobo sidi many kalifut wel lo karwaak kaletok ko recera kuneicieng kuna lojir ifadari iya icieng.
\p
\v 12 Ariria nan na lowonyore inyi kitihi lo ile oto olotu otira nahitok. Oto kolong ko kirwok iya tirika kode iya kyela lo kine, ibelo ofa odo iya okoto
\v 13 ododou manyu kangier kof iya na lododore bule kalokut kiyoma na igol.
\v 14 Obibiraru kai iya kuk na litulo ori dongecio ko culahin to fajihit kuneicieng.
\v 15 Oto kabuno kulo kof, kabolorok, kulahitoha kulo rem, kabarak ko kagolok ko cio opihin ko cio kuna lolanyu kenite ko fworoti kiduha kunomo ko boroha kulo morutok.
\v 16 Ilolong icieng dongeco ko lofiasi ojo, “Itiurohinoti kenite kuniyang ojir kiduhe ohoi to komom lo na licolongo iyo seger lo okabwe to kilongo lo kito lo ker”.
\v 17 Tonyio lolotu far lo kilongo neicieng. Ngai lotum woitahino?
\c 7
\cl Kingutit 7
\p
\v 1 To kifwongi lone, adeu nan malaikahin ongon owoita oguleha kulo kof ongon itihoti kiyomahin kulo kof ongon ojo ojir kiyoma ida okuta kof kode nam kode iyo ciani lobo keken.
\v 2 Ato nan adeu lobo malaika olotu to ngati lo okangere otehita kitihi lo Lobanga na iwar. Ilolong inyi kuna malaikahin ongon licori golun lo kitiyo kof ko nam;
\v 3 “ketii kof, ko nam, ko cianitok ara na irohoi many kolohifik ohoi kitihi iyo komoma kulo karwaak kulo Lobanga niyang”.
\v 4 Ato nan aning wel lo kuna cio lofihahini kitihi komoma ara icieng 144,000 to imaniti kulo Israel fad.
\q
\v 5 To imanit lo Juda 12,000, To imanit lo Ruben 12,000 to imanit lo Gad  12,000
\q
\v 6 to imanit lo Aser 12,000 to imanit lo Naptali 12,000 to imanit lo Manase 12, 000,
\q
\v 7 to imanit lo Simeon 12,000 to imanit lo Levi 12,000 to imanit lo Isacar 12,000
\q
\v 8 to imanit lo Zebulun 12,000 to imanit lo Josep 12,000 to imanit lo Benjamin 12,000.
\p
\v 9 Tokifwongi lone adeu nan ketemoni nei ilulung lo cio kuna iborengi kuna lida lobo tungani otum kikena kuna lofwonu to kofi kofi fad, ko to imaniti, cio to tenyi tenyi pili owoitati ketemoni lo seger lo okabwe ko ketemoni lo kito lo ker. Iciefita orumu icieng kyelani kuna ikweri fir fir manyu otehitati midila kulo otit to kac.
\v 10 Oto icieng owol to ogoro na ikwat ojo, “Ara lwaha lo Lobanga niyang Na likangana iyo seger lo okabwe Ko iyo kito lo ker”.
\p
\v 11 Owoita malaikahin fad irit seger lo okabwe, lohitwaha ko tyangi kuna iwari ongon. Ourohino icieng kof lorubuhe ketemoni lo seger lo okabwe ko kiworati Lobanga,
\v 12 ojimi, “Amen! Maja ko kwatun, Ko genyun ko kwama ko rima, Ko lanyuno ko golun, Ongon iyo Lobanga niyang karihin ko karihin Amen!”
\p
\v 13 Oto lohitwok Lobito kitifi nan ojo, “Oho ngani kuno cio ko kyelani kuna ikweri? Manyu ofwonu icieng taji?”
\v 14 Anyiahahi nan inyi ajo, “Lahitok iyen isi”. Oto ojo diho nan, “Ara kuno cio kuna lofwonu ara kiji lo kidak na hitok lilal icieng kyelani kuneicieng okweri to okoto lo kito lo ker”.
\q
\v 15 Tona, “ongon icieng ketemoni lo seger lo okabwe lo Lobanga irwaati inyi far ko karwe Iyo kaji nenge Manyu inyi na likangana iyo seger imuk Cia icieng to kema nenge
\q
\v 16 Ida cia icieng orihe oyen kinga Ida cia icieng orihe oyen kure Ida cia kolong orihe occur icieng Kode lobo nohun igol.
\q
\v 17 Tonyio ara cia kito lo kern a longon kiji lo seger lo obolore katibalani neicieng Iyaru cia inyi icieng iyo Itibi lo kifi kulo warun Manyu ofie cia Lobanga kifi kulo konyeha fad to konyeha kuneicieng”.
\c 8
\cl Kingutit 8
\p
\v 1 Langun lowony inyi kitihi lo mietare, kai fad ko buhoro na lotum nusu lo tik.
\v 2 Nan ko deuno malaikahin mietare kuna lorumu owoita ketemoni lo Lobanga, oto iciori icieng turena mietare.
\p
\v 3 Olotu lobo malaika na lotehita kitifurita lo iheru na lara dab owoita ketemoni lo ciali. Iciori inyi iheru na hitok ojo ojir itifuru ko kilifa lo cio kulo Lobanga iyo ciali lo dab na longon ketemoni lo seger lo okabwe lo Lobanga.
\v 4 Olo furo lo iheru ko kilifa lo cio kulo Lobanga kai to ketemoni lo Lobanga to kac kulo na malaika.
\v 5 Oto malaika odumu na kitifurita lo iheru itifutahi katalange to ciali ko kibirohino kof oto igur hila, ko kimedek lo hila ko kitijijiho lo otira.
\p
\v 6 Oto kuna malaikahin mietare kuna manyu lotehita turena mietare ikukumahino lo kuta icieng.
\p
\v 7 Okut malaika ketemoni ture nenge, oto lofalanga ko kima na likaruto ko okoto ko kibirunoti kof. Lobito iyo uni lo kof ko Lobito iyo uni lo cianitok ko curare, manyu ocuraru nyiari kuna inyoriha fad.
\p
\v 8 Okut malaika lo are ture nenge, oto lobo tohi na lori iya donge na hitok na longon cura ko kibiruno katwa lo nam. Oto Lobito iyo uni lo nam ko luluoro ara okoto
\v 9 Lobito iyo uni lo sangite kuna lowar katwa lo nam ko weyaru ko Lobito iyo uni kulo baburi ko kipalaru.
\p
\v 10 Okut malaika lo uni ture nenge, kangeriti na hitok na lifarang iya kima lo liti ko uruno to kai ourohino iyo Lobito iyo uni lo karecio ko itibiihin kulo kifi,
\v 11 obara na kangeriti “Ciani na idwar”. Lobito iyo uni lo kifi ko dwarun iya murenge manyu owei cio beciek to kuna kifi idwari.
\p
\v 12 Okut malaika lo ongon ture nenge, oto Lobito iyo uni lo kolong oboraru, Lobito iyo uni lo ofa ko Lobito iyo uni lo kangier icio Lobito iyo uni lo kuneicieng fad ko kirwok tir. Oto Lobito iyo uni lo far ko kitongo oru wangun, ko Lobito iyo uni lo karwe manyu.
\p
\v 13 Kolorihe nan ariria, aning nan malaika na lofuho kai iyo kiyoma ilolongo to ogoro na ikwat ojo, “Kidak, Kidak, Kidak diho kamanyak kulo kof to kuno turena kude lofworo kuno malaikahin uni kuta.
\c 9
\cl Kingutit 9
\p
\v 1 Okut malaika lo miet ture nenge ato nan adeu kangieriti na lorumu odou to kai kof. iciori kangeriti kingajit lo tula na iluko na loru fotiri.
\v 2 Ojo inyi onga tula na loru fotiri owoju furo to katwa nenge na lori ko furo lo furnuk na iyarat. Oto kolong ko kai ko mutohun to furo lo tula na loru fotiri.
\v 3 Ofwonu iterebuk iyo na furo ofwonu kof oto iciori icieng golun na lori ko lo lokidokorohin kulo kof.
\v 4 Orihohini icieng ojo kepapal nyiari, cianitok ko keyek ati cio kuna lida otehita kitihi lo Lobanga to komoma kuneicieng.
\v 5 Ida iciori icieng golun lo kifadaru icieng ati lo kitigema icieng to ofahin miet, mejun na lorumu icieng ori iya mejun lo kiyeri lo lokidokoro kalongor tungani.
\v 6 To kunu faritin otak mute cio wei ati ida orumahini, owak mute icieng weyaru ati ituguluny mute wei icieng.
\v 7 Ori kuna iterebuk mejo lakwenyi kuna likukumahini to rem. Iciefitati kude sangite lori iya taha kulo dab to kweci ori komoma ko komoma kulo cio.
\v 8 Oliti fofi kulo kweci iya kulo ngorwo ori kala iya kulo ngatunyo.
\v 9 Ori tadaha kulo locoloho iya buruno kulo bilieta, ori kwatun lo fuho kuneicieng iya kwatun lo kejuha kulo lakwenyi ko gadigadihin kuna iborengi kuna lorocoro rem.
\v 10 Otehitati kaliciha kuna longon ko ngonecio iya lokidokorohin manyu to kaliciha kuneicieng ongoniti ko golun lo kitigema cio to ofahin kuna lotum miet.
\v 11 Ongoni icieng ko kabu na lolanyu icieng na lara malaika lo tula na loru fotiri na lara karana nenge to Ibru Abdon manyu to Girik Apolion.
\p
\v 12 Loru kidak lo Lobito lotong kidahi are kuna lorihe ofwonuno.
\p
\v 13 Okut malaika lo ile ture nenge ato nan aning ogoro na lolotu iyo muriaha kulo ciali na lara dab na longon ketemoni lo Lobanga.
\v 14 Oto ojo iyo malaika lo ile, na orumu lotehita ture ojo, “Tolak kunu malaikahin lotora iyo kare nahitok Yuparets.
\v 15 Oto kuna malaikahin ongon kuna lorumu ikukumahini tona tik, tona far ko tona kari ko lahahinoti icieng ojo ojir ifade Lobito iyo uni lo cio fad.
\v 16 Wel lo asegere kareunok kuna likeni ara million mia are. Aning nan wel neicieng.
\v 17 Lakwenyi ko karwohitak kuneicieng kuna ladeu nan iyo kitirija ori jii: bilieta kuna litihore icieng locoloho kuneicieng odori iya katalange lo kima, manyu ara kude blu na irwok iya na moru lojimi Salfa ibuleho manyu. Ori kweci kulo lakwenyi iya kulo ngatunyo manyu to kutuhe kuneicieng ofwonu kima, furo ko salfa.
\v 18 lobito iyo uni lo cio fad ifade kuno sangite uni kima, furo ko salfa kuna lofwonu to kutuhe kuneicieng.
\v 19 Ongon orumu golun lo lakwenyi kutuhe kuneicieng ko iyo kaliciha kuneicieng tonyio ori kaliciha kuneicieng munuok kuna longon ko kweci itigemarihin cio.
\v 20 Cio kuna kude fad kuna lida mwaita ifade, ida irwooti to kipal lo kac kuneicieng; ida icieng iticung kiwora lodonyiok ko lopidingahin kulo dab, rial, mwala, morutok ko keek; lopidingahin kuna lida odeya, oningo kode olot.
\v 21 Ida manyu kileng icieng irwo to kifada, to kilalamita, koko ko ticitici kulo somun.
\c 10
\cl Kingutit 10
\p
\v 1 Ato nan ade lobo malaika manyu hitok olotuno to kai. Iciefita inyi idis, ko okilok ilurita kwe nenge. Ori komom nenge ko kolong manyu ori kejuha kunenge iya wiri kulo kima
\v 2 Orumu inyi otehita buk na litulo lobo sidi na lorumu ongaja to kana nenge owoita inyi onyonahi kejuha iteten nenge iyo nan keju ikajong onyonahi iyo kof.
\v 3 Oto inyi igore to ogoro na ikwat iya kitirita lo ngatuny. Ojo inyi igor, oto ogoroho kulo hilahin mietare otenya.
\v 4 Ojo hilahin mietare otenya, orumu nan lajo agero, ati aning nan ogoro to kai na lojo, “itiho tohi na loteny hilahin mietare, keger.
\v 5 Oto na malaika ladeu nan owoita nam ko kof ko tingo kana nenge iteten kai.
\v 6 Ko kibutia to inyi na lowar karihin ko karihin na loduk kai ko sangite pili kuna longoni ijia, kof ko sangite pili kuna longoni ko nam ko sangite pili kuna longoni katwa ko jimitan ojo, “Oru many dong cia lobo kirungo!
\v 7 Ati to faritin kuna lowahare malaika lo mietare kuta ture nenge, okeruno cia ilititi kulo Lobanga iya na afa lorihohinore inyi karwaak kunenge kamocak”.
\v 8 Oto ogoro na lorumu aning nan to kai otenya ari iyo nan ojo, “Ilo todumu buk na litulo to kana lo na malaika lowoita iyo nam ko kof”.
\v 9 Ato nan koloro kilifuno na buk litulo sidi to kana lona malaika. Ojo inyi diho nan, “Kai tonyia. Olo cia owawac to katwa lo kocehe nino ati to kutuk nino irumu oil iya otoro.
\v 10 Adumu nan na buk sidi to kana lona malaika ko daha. Amang nan oil iya otoro to kutuk nei ati langun lanyia nan olo ibelo owawac to kocehe nei.
\v 11 Oto kirihohini nan ojo, “Ojir isi imoca ari to cio kuna iborengi, kofi kofi, tenyi tenyi ko kabuno.
\c 11
\cl Kingutit 11
\p
\v 1 Oto kiciori nan gerecati iya morok kipimi oto kirihohini jimitan, “Ilo ipimo kaji lo Lobanga ko ciali lo kikumihin, manyu ikena kaworak kuna longoni ijia.
\v 2 Ati ingohi sita lo oleng, kepim tonyio iciori iyo misiok. Ipudie mute icieng nyona kang na inyu to ofahin keek ongon ko are.
\v 3 Manyu acio cia nan golun iyo sadeni kuna are, imoca cia icieng to faritin 1260 iciefitati kyelani kulo kitoyo.
\v 4 Icieng kuno are lare cianitok kuna longi ngoroni ko lomohin kuna linwaha are kuna lowoita ketemoni lo Lahitok lo kof.
\v 5 Kolotem tungani kitiyo icieng ara na irohoi, olotu kima to kutuhe kuneicieng ocure merok kuneicieng. Ara ene koditi na loweyare tungani na lotem kitiyo icieng ara na irohoi.
\v 6 Ongon kuno cio ko golun lo kigenihino kai ojir kuju ida ocia to faritin kuna limocare icieng manyu ongon icieng ko golun lo kibelo kifi ara okoto manyu lo culahino johi johi kof iya idi lowahare icieng.
\v 7 Dong langun lokeru icieng kicwara sadden neicieng, olotu tyang lafa lirwohu to tula na iru fotiri itirem manyu olanyu manyu ko kifadaru icieng.
\v 8 Oto kenite kuneicieng ibalo kiji lo kang na hitok na litigulunyi kilolongo ojo Sodom kode Ijipt idi afa logurohinorehin manyu lahitok neicieng.
\v 9 To faritin uni ko nusu odeya cio kulo, imaniti, tenyi tenyi, ko kofi kofi kenite kuneicieng manyu ongony icieng nuha
\v 10 Okwama cia cio kulo kofi kofi wei neicieng onyai karama lo wei neicieng ocularitati kicwara iyo kaletok to kwama tonyio litigem kuno kamocak are icieng cio kulo kof bebe.
\v 11 Ati to omot lo kuna faritin uni ko nusu, olotu wirita lo warun iyo Lobanga orutohi kenite kuneicieng icieng ko wojuno owoitati to kejuha kuneicieng oto bangun nahitok inief cio kuna lodeu icieng.
\v 12 Oto icieng oning ogoro na ikwat na lilolongo to kai ojo, “Ifwonu ene kai”. Oto icieng ko fworo kai to idis odeya merok kuneicieng.
\v 13 Tona tik token olotu otira nahitok noo oto Lobito iyo tomon lo kang ko uroro. Ifade na otira cio alif mietare oto otonge kulo cio obangi bebe iciori deyo iyo Lobanga na longon kai.
\p
\v 14 Loring kidak lo are, olotuno manyu kidak lo uni deu.
\p
\v 15 Okut malaika lo mietare ture nenge ofwonu igoriho to kai kuna lojo, “lara okabwe lo kof okabwe lo Lahitok niyang ko lo Kristo nenge olanyu mute inyi karihin ko karihin.
\p
\v 16 Oto lohitwaha keek are ko ongon kuna litongo iyo segeri kuneicieng ketemoni lo Lobanga ko urohinoti lorubuhe ketemoni lo Lobanga iworati inyi.
\v 17 Ojo, “Kicio ohoi kwama dihosi Lahitok Lobanga na lilany fad, Na lingon manyu na afa lingon Tonyio idumu isi golun nino nahitok, Manyu liciak lanyuno.
\q
\v 18 Itongo afa kofi kofi Ati lolotu kilongo nino. Lolotu tik lo ngoto lo tenya iyo Kaweyak Ko loduma karwaak kunino Kamocak Ko cio kunino ko kuna Lobang karana nino Kuna hitoha ko kuna sidiha Ko lokipalaru cio kulafa lipale kof.
\p
\v 19 Oto ongaji kaji lo Lobanga na longon kai manyu to katwa lona kaji nenge oboto sanduk lo ciharu nenge. Oto iciak hila kimedek ko kitirita lo hila ko otira ko lofalanga na licuruno bebe.
\c 12
\cl Kingutit 12
\p
\v 1 Oto kitotori na hitok ko na litirima oboto to kai; ngorwani na liburita kolong na longon ofa kejuha ko tahi na longon ko kangier tomon ko are kwe.
\v 2 Orumu inyi ifonga manyu icira mejun lo kiboria lo otomone tonyio orumu inyi lolelek otomon.
\v 3 Oto lobo kitotori oboto ari to kai; ngoto kare na hitok ido, na lara kweci mietare, ko muriaha tomon ko taha mietare to kweci kunenge.
\v 4 Oworu kalicik nenge Lobito iyo uni kulo kangier ko kibirohino kof. Owoita ene ngoto kare ketemoni lo ngorwani na lolelek tomonun ojir adile kito na lotomonunoti.
\v 5 Otomonu na ngorwani kito retoni na lolotuno lanyuno kof fad to iluk na lara biliet, ko kwararoti kito iyari iyo Lobanga manyu iyo seger lo okabwe nenge.
\v 6 Ngorwani ko kifejaru iya kuny faji na likukumahi Lobanga tonyi faji na loricarihin to faritin 1,260.
\p
\v 7 Oto rem ongon kai. Orem Maikol ko malaikahin kunenge ko ngoto kare ko malaikahin kunenge.
\v 8 Ati ida orumu ngoto kare ogol oto olanyuni icieng ko kifuharoti icieng to kai.
\v 9 Na ngoto kare hitok ko kibiroroti to kai inyi na munu ongore lobara sitan na litinononga manyu itigere kof fad rijoro. Ibiruni inyi kof ko malaikahin kunenge ara Lobito.
\v 10 Tinyia aning nan ogoro na ikwat to kai na lojo, “Jija lolotu lwaha ko golun ko Okabwe lo Lobanga niyang Ko twero lo Kristo nenge. Tonyio kadoroni lo recera kuniyang Langun lidoritita icieng ketemoni Lo Lobanga niyang far ko karwe Libiruni kof.
\q
\v 11 Lolanyu icieng inyi To okoto lo kito lo ker Ko to tenya lo sadden neicieng Ida orumu icieng imaru kenite kuneicieng Bebe many igerati wei.
\q
\v 12 Tona tokwama isi kai Ko ite kuna litongo ijia! Ati kidak iyo kof ko nam Tonyio lolotu sitan iyo ite Ifut inyi ko kilongo beb Tonyio oyen inyi ojo osuhi faritin kunenge”.
\p
\v 13 Kolodeu ngoto kare jimitan lohibiruni inyi kof, ko loro kitirwanga na ngorwani lotomonu kito retoni.
\v 14 Iciori ngorwani fuho kulo logiga ojir ofuhorore iya nufaji likukumahini tonyi, katwa lo kuny faji na cia loricarehin inyi to karihin uni ko nusu faji na lida ngoto kare ogoru.
\v 15 Oto ngoto kare ko sieuno kifi to kutuk nenge kuna lori mejo kare na litihita ojir owore ngorwani.
\v 16 Ati olwahu kof ngorwani onga kutuk nenge odile na kare losieu ngoto kare to kutuk nenge.
\v 17 Oto ngoto kare ilongo iyo ngorwani nook o loro kitiremo tee kunenge kuna kude kuna loningo cik lo Lobanga ko rica sadden lo Yesu.
\v 18 Oto ngoto kare ko loro woita tode lo nam.
\c 13
\cl Kingutit 13
\p
\v 1 Ato nan adeu tyang na lorutuno to katwa lo nam. Ongon inyi ko muriaha tomon ko kweci mietare ko taha tomon iyo muriaha kunenge manyu iyo kuna kweci kunenge fad ongoni karaneco kuna lomoro Lobanga.
\v 2 Ori na tyang ladeu nan iya koka ati ori kejuha iya kulo ngaral ko kutuk na lori iya lo ngatuny. Icio ngoto kare na tyang golun nenge, seger lo okabwe nenge ko obolore nenge na hitok.
\v 3 Ori kwe Lobito lona tyang mejo iriafuni nyafa noo, ati lofurie korongani lona lohiriafe nenge. Oto kof fad ipany ko kijifita na tyang.
\v 4 Iwora cio ngoto kare tonyio icio inyi obolore iyo na tyang iwora manyu icieng tyang ojo, “Ngai lori ko tyang? Ngai lotum kitiremo inyi?”
\v 5 Iciori tyang kutuk na lotenyare tenyi tenyi kulo kitidara ko kulo moro Lobanga manyu itiyore golun nenge to ofahin keek ongon kare.
\v 6 Onga inyi kutuk nenge omoro Lobanga manyu lo kingala karana nenge ko lohitongore nenge ko cio kuna longoni kai fad.
\v 7 Iciori inyi golun lo kitiremo cio kulo Lobanga ko lanyuno icieng. Iciori inyi golun lo lanyuno imaniti fad, cio, tenyi tenyi ko kofi kofi pili.
\v 8 Iwora mute cio kulo kof fad na tyang, cio fad kuna lida karanecio igero iyo buk lo warun lo kito lo ker lafa lifadari manyu to lohiciahi lo duho lo kof.
\v 9 Inyi na longon kiyoha ingohi toning.
\q
\v 10 Kolongon afa ojo iniefari cia tungani olo rahun opi, olo cia ara opi kolojo ifadari cia lobo to ngalem latubot ifadari cia to ngalem latubot. Owak ene kitila to diha ko kidonyo lo taulo iyo cio kulo Lobanga.
\p
\v 11 Manyu adeu nan lobo tyang manyu olotuno to katwa lo kof. Ongon inyi ko muriaha are kuna lori ko kulo kito lo ker ati otenya inyi iya ngoto kare.
\v 12 Itiyore inyi golun lo nu tyang lo ketemoni fad tonyi icio kof ko cio kunenge fad iwora nu tyang ketemoni na lofurie lafa korongani nenge irohoi.
\v 13 Itii inyi ticitici kulo kitotoro ko tanguhin kuna hitoha icwara ko kima odou to kai na lodeya cio fad.
\v 14 Tona golun liciori inyi lo kitiyo kuna tanguhin ara faji lo nu tyang ketemoni, itinonong inyi cio kulo kof fad. Ocik inyi ojo ojir oduhi lopidinga lo nu tyang ketemoni na liriafuni to ngalem latubot ati owar.
\v 15 Iciori inyi golun lo kicwara wirita iyo lopidinga lonu tyang ketemoni ojir otenya icio cio fad kuna lida iwora lopidinga lonu tyang ketemoni ifadari.
\v 16 Ifudahi manyu inyi cio pili kuna sidiha ko kuna hitoha, kabarak ko kilwaha, kuna lolanyuno ake ko opihin lo rumuno kimacari iyo kana nenge iteten kode komom
\v 17 ojir lobo tungani ida inyianga kode itiloto kolida ingon ko na macari lo tyang kode nama lo karana nenge.
\v 18 Owak ene genyun. Kolongon lobo tungani ko yenun ingohi inyi ingingiju nama lo tyang tonyio ara nama lo tungani. Ara na nama nenge 666.
\c 14
\cl Kingutit 14
\p
\v 1 Ato nan adeu to ketemoni nei kito lo ker owoita kai lo donge lo Zion ko cio 144,000 kuna longoni ko karana nenge ko lo Apa nenge igero komoma kuneicieng.
\v 2 Manyu aningu nan kwatun na lori mejo kigurita lo kifi olotu to kai na lori ko kwatun lo kitirita lo hila. Ori nu kwatun laning nan iya dingo lo adunguhin kuna iborengi.
\v 3 Oto icieng owol wole ngejuk to ketemoni lo Seger lo Okabwe, ketemoni lo tyangi kuna iwari ongon ko ketemoni lo lohitwaha keek are ko ongon. Oru lobo tungani lotum wolo na wole, ara icieng kuna cio 144,000 kuna lo lwahuni to kof.
\v 4 Ara kuno kuna lida ipal kenite to ngorwo tonyio oric icieng nyujon lo kenite kuneicieng. Ijifita icieng kito lo ker fajihit kuna loloro inyi fad. Inyianguni afa icieng to kiji lo cio manyu iciori icieng iya ngak ketemok diho Lobanga ko diho kito lo ker.
\v 5 Oru talerun afa lorumuni tokutuhe kuneicieng, onyuji icieng na loru ko lobo tohi irohoi to kenite.
\p
\v 6 Ato nan adeu lobo malaika ofuho kai lo kiyoma, manyu ongon orumu inyi ko layomit na ijir na losio turn a lowak inyi rihohino cio kulo kof iyo kofi kofi, imaniti, tenyi tenyi ko cio.
\v 7 Ojo inyi to ogoro na ikwat, “Tobang Lobanga manyu icwarata inyi deyo tonyio lolotu tik lo ngoto lo tenya nenge. Iworati inyi na loduk kai, kof, nam ko ipulahi kulo kifi”.
\p
\v 8 Oto malaika lo are ijifu ko jimitan, “Louroro, Louroro Babilon na hitok na licio kofi kofi fad orumaha to mere vino lo lomuna nenge”.
\p
\v 9 Ijifu manika lo uni icieng ojo to ogoro na ikwat, “Kaliwor tungani tyang ko lopidinga nenge manyu orumu kimacaita nenge komom kode kana nenge
\v 10 oto manyu cia inyi omat vino lo kilongo lo Lobanga na lijuhohini lir kubaya lo kilongo nenge. Itigemi cia inyi to kima lo liti na inok to ketemoni lo malaikahin kuna inyuji ko kito lo ker.
\v 11 Manyu olo furo lo cura neicieng kai karihin ko karihin. Oru kiyoma far ko karwe iyo cio kuna liwor tyang ko lopidinga nenge kode kuna lorumu kimacari lo karana nenge.
\v 12 Owak ene kidonyo lo taulo ko dihan tongati lo cio kulo Lobanga kuna loningo cik lo Lobanga manyu itongoti to kigenoro iyo Yesu.
\p
\v 13 Tinyia aning nan ogoro na lolotu to kai ojo, “Igero: ongon ko gum kaweyak kuna lowei iyo Lobanga kiciaha to jijia olorore iya ketemoni”. Ojo Okorif, “Ibo iyoma cia icieng iyo ticitici kuneicieng, tonyio ijif cia ticitici kuneicieng omot neicieng”.
\p
\v 14 Ari nan ko deuno idis na ikwe to ketemoni nei, itongo hati lobo lori ko kito lo tungani kai lona idis ko tahi lo dab to kwe otehita hati lajolo na iko noo to kana nenge.
\v 15 Lobo malika manyu ko rutuno to kaji lo Lobanga ko kilolongo to ogoro na ikwat ojo, iyo inyi na litongo kai lo idis, “Todumu lajolo nino ilo todeng tonyio logoru faritin kulo dengo tonyio lodo dengo lo kof”.
\v 16 Oto inyi na litongo kai lo idis ko kiwata lajolo nenge kwe lo kof kof ko denguno.
\p
\v 17 Olotu manyu lobo malaika to kaji lo Lobanga na longon kai otehita manyu inyi lajolo na iko.
\v 18 Lobo malaika manyu lolanyu kima ko lotuno to ciali lo kikumihin ko tenya to ogoro na ikwat iyo na bito lotehita lajolo na iko ojo, “Todumu na lajolo nino iko ilo tongutu tutu kulo ngak kulo vino kulo kof tonyio lodori ngak kulo vino.
\v 19 Iwat na malaika lajolo nenge ko kijaluno ngak kulo vino kulo kof ko kijuhohino lonyonare lo vino lo kilongo lo Lobanga.
\v 20 Onyoni icieng to lonyonare lo vino na longon oleng lo kang manyu itik okoto to lonyonare lo vino na likor iya jangir lo lakweny manyu otum goruno futi miet.
\c 15
\cl Kingutit 15
\p
\v 1 Adeu nan to kai lo kitotorita hitok na litirima: malaikahin mietare ko johi johi mietare kulo lohicungi, kulo lohicungi tonyio icieng dong limumud kilongo lo Lobanga.
\p
\v 2 Ato manyu nan adeu lobo tohi lori iya nam lo madara na likaruto ko kima manyu kuna lowoita onyiha ko nam ara cio kulafa lolanyu tyang ko lopidinga nenge ko kimacari ko nama lo karana nenge. Otehitati adunguhin kuna licio Lobanga icieng
\v 3 oto icieng owol wole lo Moses karwaani lo Lobanga ko wole lo kito lo Ker, na lojo, “Oboroho manyu itirima ticitici kunino, Lahitok Lobangana lolanyu fad obiri kikohin kunino manyu ara dede, kabu lo karihin fad.
\q
\v 4 Ngai mute lida kibang isi Lahitok manyu iyauno deyo iyo karana nino tonyio isi ake linyu. Ofwonu mute kofi kofi fad kiwora ketemoni nino tonyio litibotuno ticitici kunino kuna ibiri”.
\p
\v 5 To kifwongi ade nan manyu to kai kaji na lara lohitongore lo cik ko ngaja.
\v 6 To kaji lo Lobanga, orutu malaikahin mietare ko johi johi manyu mietare, iciefita icieng kyelani iribi kuna inyuji ibarahi gasi kulo dab locoloho kuneicieng.
\v 7 Oto tyang na iwar Lobito icio kuna malaikahin mietare ilebuha mietare kulo kilongo lo Lobanga na longon karihin ko karihin.
\v 8 Ifut orumu kaji lo Lobanga ko furo na lodeto iyo deyo lo Lobanga ko iyo golun nenge ida tungani orumu otum rutoro kaji lo Lobanga many oru kuna johi johi mietare kulo kuna malaikahin mietare.
\c 16
\cl Kingutit 16
\p
\v 1 Ato nan aning ogoro na ikwat to kaji lo Lobnanga na lojo, iyo kuna malaikahin mietare, “Ifwo ijuhohiti kuna ilebuha mietare kulo kilongo lo Lobanga kof.
\p
\v 2 Olo malaika lo ketemoni ijuhohi ilebu nenge kof, oto korongan kuna irohori, kuna imeji nook o kiniefa cio kuna longon ko kimacari lo tyang ko kuna liwora lopidinga nenge
\p
\v 3 Ijuhohi malaika lo are ilebu nenge nam oto nam ko kibeloro ara okoto na lori iya lo tungani na iwei, oto sangite kuna lowar katwa lo nam fad owei.
\p
\v 4 Ijuhohi malaika lo uni ilebu nenge kareco ko ipulahin kulo kifi oluluoroti ara okoto.
\v 5 Ato nan aning malaika na lo lanyu kifi ojo, “Ibehi isi noo to ngoto lo tenyi tenyi isi na lingon ko lafa lingon isi na Inyu tonyio lingot isi
\q
\v 6 Tenya ara na ibehi tonyio lijuhe icieng okoto kulo cio kunino ko kamocak, manyu licio isi icieng omat okoto iya na locamare to icieng”.
\p
\v 7 Ato nan aning ciali ifotu ojo, “Ibo Lahitok Lobanga na lilanyu ara ngoto lo tenya nino dede ko na ibir”.
\p
\v 8 Ijuhohi malaika lo ongon ilebu nenge iyo kolong, oto iciori kolong golun lo cura cio to kima.
\v 9 Oto nohun occur icieng bebe icio icieng ific karana lo Lobanga na lolanyu kuno johi johi fad oberu icieng kirwo ko kicwara Lobanga deyo.
\p
\v 10 Ijuhohi malaika lo miet ilebu nenge iyo seger lo okabwe lo tyang oto mutohun ipude kof lo okabwe nenge. Onyahal cio ngadiefo to mejun lo kenite kuneicieng
\v 11 Manyu ificoti Lobanga lo kai to kidak ko mejun lo kenite ko korongan kuneicieng ati oberu icieng kirwo to ticitici kuneicieng.
\p
\v 12 Ijuhohi malaika lo ile ilebu nenge iyo kare nahitok lo Yuparets oto kifi kunenge ko toworo lo kikukuma kikoi to kabuno kulo ngati lo okanger.
\v 13 Ato nan adeu okorifi kuna irohori uni kuna lori mejo ikordohi ofwonu to kutuk lo ngoto kare, to kutuk lo tyang ko to kutuk lo kamocani na italer.
\v 14 Itongo icieng ara okorifi kulo lodonyiok kuna litiyo tanguhin manyu ofwo icing iyo kabuno kulo kof fad lo kilolonguno icieng fwonuno rem far na hitok lo Lobanga na lolanyu fad.
\v 15 Tode alotuno nan iya kakokoni! Ongon gum iyo tungani na liwasihi okweny otehita kyelani kunenge onyihaha ko inyi. Ojir ida ife longature odahahi riri to kitiboto kingature nenge.
\p
\v 16 Oto otubuni kabuno ara Lobito lobo faji na lilolongoti to Ibru ojo Amagedon.
\p
\v 17 Ijuhohi malaika lo mietare ilebu nenge iyo kiyoma oto ogoro na ikwat olotu to kaji lo Lobanga to Seger lo Okabwe na lojo, “Litiihino”.
\v 18 Oto imedek hila itirita manyu ko otira na igol. Oru lobo otira na lori kone many tolohiciahi lo cio manya kof, orumu otira nenge ogol noo.
\v 19 Okora kang na hitok fajihit uni, manyu ouroro kangite kulo kofi kofi iiu Lobanga Babilon na hitok oto icio inyi kubaya na lifut vino lo kilongo ko ngere nenge.
\v 20 Ori culahin kulo katwa lo nam fad ida ko dongeco orumuno.
\v 21 To kai ododou lofalanga kuna hitoha kuna lotum kirioci lo Lobito ratil mia Lobito, ododou kweci kulo cio. Oto icieng ific Lobanga tona jiok lo lofalanga tonyio orumu jiok nenge orohoi nalida otenyuno kileng.
\c 17
\cl Kingutit 17
\p
\v 1 Lobito iyo kuna malaikahin mietare adi lotehita ilebuha ko lotuno iyo nan ojo, “Ou ahitotorohi kitigema lo mulayani na lilany na litongo kai lo kifi kuna iborengi.
\v 2 Itii inyi lomuna ko kabuno kulo kof manyu oruma cio kuna iborengi vino lo lomuna nenge.
\v 3 Oto malaika kiting nan to okorif many katwa lo kuny. Ato nan adeu ngorwani na litongo kai lo tyang na ifurang na ligero karaneco kuna lomoro Lobanga ken nenge fad manyu ongon ko kweci mietare ko muriaha tomon.
\v 4 Iciefita orumu nu ngorwani kyelani kuna idori ko kuna ifurangi manyu ongota pang gilihin kulo dab ko morutok kulo wel. Otehita inyi kubaya lo dab kana na lifut ko sangite kuna irohori ko kibot lo lomuna nenge.
\v 5 Igero orumu ene karana komom nenge."
\p
\v 6 Adeu nan jimitan oruma na ngorwani okoto kulo cio kulo Lobanga, okoto lo cio kuna loric sadden lo Yesu. Ojo nan adeu inyi ato nan apany noo.
\v 7 Oto malaika ojo diho nan, “Nyio ipany isi? Atitimahi cia nan isi ilitit lo na ngorwani ko lona tyang lirwohita inyi na longon ko kweci mietare ko muriaha tomon.
\v 8 Na tyang lideya isi ongon afa ati loru jijia, olotu mute to katwa lo tula na loru fotiri oringita iya lohicungi nenge. Cio kulo kof kuna lida karaneco igero iyo buk lo warun, many to loduhore lo kof ipanyiti cia bebe kolodeuni tyang tonyio ongon afa inyi, jijia loru ati ongon mute.
\v 9 Otahita ene kwe na longon ko genyun kuna kweci mietare ara dongeco mietare kuna litongore na ngorwani.
\v 10 Ara manyu icieng kabuno mietare. Loru afa miet Lobito ene longon jija orihe Lobito ida lolotu; ati kololotu mute inyi, ojir re inyi itongohi lobo gaa.
\v 11 Ene tyang afa longon, lida jijia ongon ara inyi kabu lo mietauni ongon inyi iyo kuna mietare ongon inyi loro lohicungi nenge.
\v 12 Kuna muriaha tomon lideu isi ara kuna kabuno kuna lorihe ida orumu okabwe ati kuna lofwonu mute to tik orumu okabwe ara Lobito ko tyang.
\v 13 Ongon icieng ko kibuha Lobito icio mute icieng obolore neicieng iyo tyang.
\v 14 Itiremo mute icieng kito lo Ker ati olanyu mute Kito lo Ker icieng tonyio ara inyi Kabu lo kabuno ko Lahitok lo kulahitoha manyu ilihita mute cio kunenge kuna lilolonguni, onyumuni manyu karwaak kunenge kuna loningoro konyi.
\v 15 Oto malaika ojo diho nan, “Kifi kuna lideu isi na mulayani itongore ara cio, ilulung, kofi kofi ko tenyi tenyi.
\v 16 Oberu mute na tyang ko kuna muriaha tomon na mulayani. Iyauno mute icieng inyi lohicungi ongerihini inyi longature. Okony mute icieng inyi manyu ocurari to kima.
\v 17 Tonyio ofik Lobanga ene tenya taulo kuneicieng lo kitiyo wahun nenge lo kiruk kicwara tyang obolore ko twero neicieng ojir olanyu many itifuta tenya lo Lobanga.
\v 18 Na ngorwani lideu isi ara kang nahitok a lolanyu kabuno kulo kof.
\c 18
\cl Kingutit 18
\p
\v 1 To kifwongi lo na adeu nan lobo malaika olotuno to kai kof. Ongon inyi ko golun nahitok manyu inwak wangun lo ken nenge kof.
\v 2 Igore inyi to ogoro na hitok ojo, “Louroro! Louroro Babilon nahitok Lara inyi kang lo lodonyok ko lohiduhare lo okorifi kuna irohori fad kang lo kweny kuna irohori kuna loberu koceheri kulo cio.
\q
\v 3 Tonyio limang kof fad ruma lo vino lo lomuna nenge Itii kabuno kulo kof lomuna ko inyi manyu lobaraha katujarak kulo kof to fajiaru nenge ko manya lo kimulaya”.
\q
\v 4 Ato nan aning lobo ogoro ari lotenya to kai na lojo, “Ifwonu to katwa nenge cio kunei ojir ida ingar konyi kipal nenge ojir ida irumu lobo jiok nenge
\q
\v 5 tonyio licana kipal nenge logoru many kai manyu liiu Lobanga kipalipali kunenge
\q
\v 6 Icorihi, inyiahahi inyi iya na afa licwarare inyi todum inyi kakeny are to tohi na litii inyi. Ikaruto kubaya nenge irwat otum tonyi.
\q
\v 7 Icwara inyi kitigema ko kidak na ibolo noo oriri ko deyo ko kwatun nafa licio inyi ken nenge otenya afa inyi to pufa to tau nenge ojo, ‘atongo nan iya kabu lo ngorwo: ida nan ara lafuserito, manyu ida nan atoyio’
\q
\v 8 Tona ofwonu cia mwaita kunenge to Lobito far; wei, kitoyo ko kinga okeru mute kima inyi, tonyio Lobanga na longoto tenya nenge, obolo noo”.
\b
\v 9 Kolodeu kabuno kulo kof kulafa litii lomuna konyi manyu ongar bara nenge, furo lo curaru nenge, icirati mute manyu itoyioti tonyi.
\v 10 To bangun kidak nenge owoita mute icieng lolomaje oto icirati ojo, “Kidak! Kidak isi kang nahitok; Oi Babilon kang lo golun! Lolotu kidak nino to tik Lobito!”
\p
\v 11 Icira cia katujarak kulo kof itoyio manyu tonyio loru cia tungani kanyiangani lo sangite kuneicieng,
\v 12 sangite kulo dab, rial, morutok kuna igoli ko morutok kuna imedehi kulo wel, kyelani iribi, kuna ifurangi ko kuna idori ko kyelani kuna idwaruha kulo wel, koditi lo keek kuna igoli fad ko sangite gele gele kuna likukumi to kala kulo tomie, keek kulo wel, mwala biliet ko morutok kulo wel;
\v 13 Sangite iya oho cinnamon ko kikukumi kulo jationg, sangite iya ngoronicio kuna iuri ko kulo kitifurio ko iheru, sangite iya oho vino, ko ngoroni lo oliv, iya kofwo kuna itinyaha ko geme, iya kicu ko kera, iya lakwenyi ko gadigadihin, ko kenite ko taulo kulo cio.
\v 14 Ojo cia icieng, “Ngak lafa likodomo isi lolo kana nino. Bara ko kwatun nino fad lori lida mute orihe otum kinyiahuno”.
\v 15 Katujarak kulafa litiloto kuno sangite dihonyi kuna lorumu bara neicieng dihonyi owoitati mute to lolomaje obangiti tohi na litiihino iyonyi. Icirati mute itoyioti
\v 16 icirati ojimi, “Kidak! Kidak O kang nahitok na liciefita kyelani iribi kuna ifurangi ko kuna idori na limedek ara dab ko morutok kuna igoli wel.
\q
\v 17 To tik Lobito lara na bara hitok fad mura”. Kanirak kulo baburi fad ko cio kuna lolot ara katwa lo nam, katiyok kulo baburi ko cio pili kuna lorumunita bara neicieng to katwa lo nam, owoitati mute lolomaje.
\v 18 Kolodeuni furo lo cura nenge, otenyati mute ojo, “Ongon afa lobo kang lori bolorun nenge kone kang?”
\v 19 Okurahini mute fur kweci ko kitoyo icirati mute ojimi, “Kidak! Kidak Oi kang nahitok na lorumu cio fad kuna lolot katwa lo nam bara neicieng ara dihonyi. To tik Lobito loluluoro inyi ara mura
\q
\v 20 Tokwama rujoronenge O kai Itokwamati cio kulo Lobanga Jayona ko kamocak Longotohi Lobanga tenya kwe nenge to koditi na litiyore inyi iyote.
\p
\v 21 Oto lobo malaika hitok odumu terei na lori bolojun nenge iya kirie ko kibirohino katwa lo nam ojo, “To tic lo kisasuo iya na, ibirohini cia na kang hitok lo Babilon kof na mute lida orumuno ari.
\q
\v 22 Kwatun lo adunguhin ko wole, omilerehin ko ojaahin ida cia mute orihe oninguni to katwa nino ari. Oru lobo tungani ko lobo tic lorumuno mute katwa nino ari. Kigur lo kirieco kuna liriare ngorwo ida cia orihe oninguno to katwa nino
\q
\v 23 Wangun lo lomo ida cia mute orihe inwaha katwa nino ari. Ogoroho kulo rei ko ngorwo kayemarok Ida mute orihe oningi to katwa nino ari. Ara afa katujarak kunino cio kuna loyen kof To tic lo kilama nino litiri afa isi kofi kofi kuna iborengi
\q
\v 24 Orumuni okoto kulo cio kulo Lobanga ko kamocak katwa nenge ko cio pili kulafa lifadari ten to kof”.
\c 19
\cl Kingutit 19
\p
\v 1 To omot lone, aning nan lobo tohi lori mejo kigorita lo ilulung na hitok idi kai na ligoritati ojimi, Aleluya! Lwaha ko deyo ko kwatun ko golun, ara lo Lobanga niyang,
\q2
\v 2 tonyio obir ngoto lo tenya nenge ara manyu dede. Longotohi inyi tenya kwe lo na mulayani hitok na lipale kof to lomuna nenge lilenohi inyi kwe nenge okoto kulo karwaak kunenge”.
\p
\v 3 Igore icieng ari ojo, Aleluya Lolo furo nenge kai tur ko tur.
\p
\v 4 Oto kunu lohitwaha keek are ko ongon ko kuna tyangi iwari ongon, ourohino kof lorubuhe iwori Lobanga na likangana iyo seger lo Okabwe. Ko kigorita ojimi, “Amen Aleluya!
\p
\v 5 Oto ogoro olotu to seger lo okabwe na lojo, “Itomaj Lobanga niyang ite karwaak kunenge fad, ite kuna libang inyi. Kuna sidiha ko kuna hitoha fad!
\p
\v 6 Ato nan aning lobo tohi lokwat mejo ilulung na hitok, na lokwat iya kitihita lo kifi kuna iborengi manyu ori iya kwatun lo hila na ligor ojo, “Aleluya! Tonyio lolanyu Lahitok Lobanga niyang
\q
\v 7 Ngatinya karama to kwama manyu ngacwarata inyi deyo! Tonyio lolotu karama lo kiyemi Lo kito lo ker likukumahino manyu lateran nenge.
\q
\v 8 Kyela iribi na imedek onyu liticiefihini inyi, (Owoita kyela iribi to ticitici kuna inyuji Kulo cio kulo Lobanga).”
\p
\v 9 Oto malaika ojo diho nan, “Igero tijo, Obolo gum lo cio kuna lilolongi daha karama lo kiyemi lo kito lo Ker! Osodohi manyu ojo, Ara kuno tenyi tenyi kulo dede kulo Lobanga”.
\v 10 Ojo ojo jii aurohino nan logugunge kejuha kunenge lo kiwora inyi. Ati ojo inyi diho nan, “Ketii jii! Ara nan karwaani kaletoni nino ko recera kunino kuna loric saden lo Yesu. Iwora Lobanga! Tonyio ara saden lo Yesu Okorif lo kimoca”.
\p
\v 11 Adeu na kai ongaja ato nan adeu lakweny na ikwe owoita ketemoni nein na lilolongoti karwohitani nenge ojo, “Igenoro manyu Dede”. To tenya na ibehi ongoto inyi tenya manyu orem.
\v 12 Ori konyeha kunenge iya kima na iyarat manyu iciefita taha kuna to kwe. Ongon inyi ko karana na ligero ken nenge na lida lobo tungani oyen inyi monye ake loyen.
\v 13 Iciefita inyi kyela na locaf okoto manyu obara karana nenge, Tenya lo Lobanga.
\v 14 Ijifita orumu karemok kulo kai inyi, irwohitati lakwenyi kuna ikweri manyu iciefitati kyelani iribi kuna ikweri onyuji,
\v 15 olotu ngalem latubot na iko to kutuk nenge na lijalare inyi kofi kofi, “Olanyu mute inyi icieng to iluk na lara biliet”. Onyona inyi lonyonare lo vino lo kingere ko kilongo lo Lahitok Lobanga na lolanyu fad.
\v 16 Iyo bong bong ko locolo lo kyela nenge, igero ene karana ojo: "Kabu lo kabuno ko lahitok lo kulahitoha."
\p
\v 17 Ato nan adeu malaika owoita iyo kolong na lilolongo to ogoro na ikwat iyo kweny fad kuna lofuho iyo kiyoma ojo, “Ifwonu ifurohinoti ara Lobito daha daha lo kurou na likukumahi Lobanga.
\v 18 Ojir inyia tyan to kenite kulo kabuno, kulahitoha kulo karemok ko cio kuna igoli, kulo lakwenyi ko karwohitak kuneicieng ko tyangi kulo kenite cio fad, kuna lolanyu kenite ake ko opihin kuna sidiha ko kuna hitoha”.
\p
\v 19 Aro nan adeu tyang ko kabuno kulo kof ko karemok kuneicieng otubunoti ara Lobito kitiremo karwohitani lo lakweny ko karemok kunenge.
\v 20 Ati iniefuni tyang ara Lobito ko kamocani na italer na orumu litiyo kitotorihin kulo tangu to karana nenge. To kuno kitotorihin litinonong inyi cio kuna lorumu kimacari lo tyang ko kiwora lopidinga nenge. Icieng kuna are ibirohini lowaraje katwa lo nam lo kima na locura to terek lo salfa.
\v 21 Kuna kude fad ifadari to ngalem latubot na lolotu to kutuk lo karwohitani lo lakweny, oto kweny fad imoneho to tyang lo kenite kuneicieng.
\c 20
\cl Kingutit 20
\p
\v 1 Ato nan adeu malaika iculuno to kai otehita kingajit lo tula na loru fotiri manyu otehita to kana nenge nyiororo nahitok.
\v 2 Oto inyi iniefu Ngoto kare na munu ongore na lara sitan ko tora inyi to karihin alif Lobito.
\v 3 Ibirohi inyi katwa lo tula na loru fotiri ko kigienihino inyi ko dwanya kutuk lo tula lo kitiho inyi kitinononga kofi kofi manyu okeruno karihin alif Lobito. To kifwongi ofwonuni mute olahahini inyi to karihin kude kuting.
\p
\v 4 Adeu nan Segeri kulo obolore kuna litongore cio kuna liciori twero lo ngoto lo tenya. Ato nan adeu taulo kulo cio kuna longutori kweci to rica neicieng sadden lo Yesu ko to tenya lo Lobanga. Ida icieng liwor tyang kode lopidinga nenge kode ida manyu orumuni kimacarita nenge komoma lode kac iteteni kuneicieng. Ofwonu icieng owari manyu olanyuni kof ko Kristo to karihin alif Lobito.
\v 5 Kuna kude kaweyak ida owaruni many koloru karihin alif Lobito. Ara ene kibuhuno ketemoni.
\v 6 Obolo gum manyu onyuji cio kuna mute longoni iyo kibuhuno ketemoni. Oru wei lo are ko golun iyo kenite kuneicieng ati ara mute icieng kadwarak kulo Lobanga ko kulo Kristo manyu olanyuni mute kof konyi to karihin alif Lobito.
\p
\v 7 Langun licung karihin alif Lobito, olahahini mute sitan to mabus nenge
\v 8 olo kitinononga kofi kofi iyo oguleha ongon kulo kog Gog ko Magog to tubuno icieng iyo rem. Ori borengun neicieng iya singeti lo kutuk lo nam.
\v 9 Idororo icieng onguti kof to kiji lo fworo kirita lohitongore lo cio kulo Lobanga, kang na limaru inyi. Ati olotu kima to kai okeru icieng.
\v 10 Manyu Sitan na litinonong icieng ibirohini katwa lo nam na locura terek Salfa ko kima faji lafa libirohini tyang ko kamocani na italer. Itigemi mute icieng karwe ko far to tur ko tur.
\p
\v 11 Tinyia adeu nan seger lo Okabwe nahitok ikwe ko inyi na likangana kai nenge. Ife kof ko kai ketemoni nenge, oru faji na ngofwo icieng.
\v 12 Ato nan adeu lakwenyak kuna iboroho ko kuna sidiha owoitati ketemoni lona seger lo Okabwe oto ongaji buhi. Ongaji manyu lobo buk na lara buk lo warun. Ongotohini kaweyak tenya ijifita ticitici kuneicieng iya na ligerorihin iyo buhi.
\v 13 Omitu nam kaweyak kuna longoni katwa nenge, manyu icio wei ko kwecere kaweyak kuna longoni katwa neicieng oto ongotohini tungani Lobito Lobito tenya ijifita tici tici kunenge.
\v 14 Oto odumuni wei ko kwecere ibirohini katwa lo kima. Nam lo kima inyi lara wei lo are.
\v 15 Kalida orumahini karana lo tungani iyo buk lo warun, ibirohini inyi nam lo kima.
\c 21
\cl Kingutit 21
\p
\v 1 Tinyia adeu nan kai ngejuk ko kof ngejuk tonyio loru kai ongore ko kof ongore, manyu oru dong lobo nam.
\v 2 Adeu nan kang na inyu, Jerusalem ngejuk iculuno to kai iyo Lobanga na likukumi iya karioni lateran na lotingoti otoc lo loro kitirico retoni nenge.
\v 3 Ato nan aning ogoro na ikwat na lolotu to seger lo Okabwe na lojo, “Jija longon lohitongore lo Lobanga ko cio manyu itongo cia inyi ko icieng. Ara cia icieng cio kunenge manyu itongo cia Lobanga to ken nenge ko icieng ara Lobanga neicieng.
\v 4 Ofie cia inyi kifi kulo konyeha fad to konyeha kuneicieng. Loru mute wei kode kitoyo kode kicira kode mejun lo kenite, tonyio loringe sangite ongoro.
\v 5 Inyi na likangana kai lo seger lo okabwe ko jimitan, “Afiha nan sangite fad ara ngejuho!” Oto ko jimitan, “Igerihi kuno kof tonyio ara kuno tenyi tenyi kuna ligenoro manyu ara dede”.
\v 6 Ojo inyi iyo nan, “Litiihino”. Ara nan Alfa ko Omega, Lohiciahi ko lohicungi. Iyo Inyi na loura cio nan omat na loru ko wel to ipulak lo kifi kulo warun.
\v 7 Inyi na lodik owoitahi oluny cia kuno fad manyu ara cia nan Lobanga nenge inyi manyu ara kito nei.
\v 8 Ati kabangak, kuna lida iruk, kangolofak, kafadak, kasomok, kalalamitak, kaworak kulo lopidingahin ko katalerok fad, faji neicieng inyi nam lo kima na locura terek salfa. Ara ene wei lo are.
\p
\v 9 Olotu Lobito lo kunu malaikahin mietare kuna lorumu otehita ilebuha mietare kulo johi johi kulo lohicungi olotu diho nan ojo, “Ou ahitotorohi cia nan isi lateran, ngorwani lo kito lo Ker”.
\v 10 Oto inyi kitinge nan iyo okorif kai lo donge na hitok na ikarit ko kitotorohino nan Kang na Inyu, Jerusalem iculuno to kai iyo Lobanga.
\v 11 Inwaha inyi to deyo lo Lobanga, ori kimedek nenge iya lo moru lo wel na lilany fad, iya Jaspa na inyu iya moru na imimil.
\v 12 Ongon ko kiwata lohitir na ikarit ko lokoliho tomon ko are ko malaikahin tomon ko are lokoliho. Iyo lokoliho orumu igero karaneco kulo imaniti tomon ko are kulo Israel.
\v 13 Ongon orumu lokoliho uni ngati lo okangere, uni ngati lo kai, uni ngati lo orof ko uni ngati lo lodoyore lo kolong.
\v 14 Ongon orumu lohitir lo kang ko nguri tomon ko are kuna ligerohini karaneco kulo jayona kulo kito lo Ker.
\v 15 Na malaika lohitenya ko nan orumu otehita kipimi na likukumi to dab na lipimore kang, lokoliho kunenge ko lohitir. Ongon orumu lohitir lo kang ko nguri tomon ko are kuna ligerohini karaneco kulo jayona kulo kito lo Ker.
\v 16 Ara afa oguleha kulo na kang ongon na loririworo lalatun nenge ko karitan. Ipim inyi lalatun lo kang orumu ojo ara maili alif Lobito ko mia miet oriri karitan nenge ko lalatun ko karitan iya kai fad.
\v 17 Ipim manyu inyi sisihon lo kiwata orumu ara futi mia are ko tomon koi le tona kipimi lo cio lotehita malaika.
\v 18 Oduho orumu kiwata to Jaspa ojo kang oduho to dab na inyu na ifarang iya madara.
\v 19 Itibibili guri kulo lohitir lo kang to morutok kulo wel kuna longoni gele gele. Guri lo Lobito ara Jaspa, lo are Sapiar, lo uni Kalkedoni, lo ongon Emerald,
\v 20 lo miet Sodonik, lo ile Karnelian, lo mietare Kristolet, lo mietauni Beril, lo mietangon Topaz, lo tomon Krisopras, lo tomon ko Lobito Jasint, lo tomon ko are Amasiast.
\v 21 Ara kuna lokolihin tomon ko are morutok kulo wel manyu tomon ko are lokoli Lobito ara moru Lobito. Kikoi na hitok lo katwa lo kang ikukumi to dab na inyu ifarang iya madara.
\v 22 Ida afa nan adeu kaji lohiworare katwa lo kang tonyio Lahitok Lobanga na lilany fad ko kito lo Ker icieng lara lohiworare.
\v 23 Ida nu kang owak kolong kode ofa inwak inyi tonyio deyo lo Lobanga licwara inyi wangun manyu kito lo Ker lara lomo nenge.
\v 24 Olot mute kofi kofi to wangun nenge manyu uyauno mute kabuno kulo kof nyujon neicieng ijia.
\v 25 Oru mute far na ligienore lokoliho kunenge, tonyio oru mute karwe tijia.
\v 26 Iyauni mute deyo ko kwatun lo kofi kofi ijia.
\v 27 Oru mute lobo tohi ibot lorute ijia, ida manyu ko tungani na litiyo ticitici kulo riri kode kitinononga ati icieng kuna ligero karanecio iyo buk lo warun lo kito lo Ker.
\c 22
\cl Kingutit 22
\p
\v 1 Tinyia kitotorohi malaika nan kare lo kifi kulo warun kuna ilibi onyuji iya madara itihita to Seger lo Okabwe lo Lobanga ko lo kito lo Ker,
\v 2 itihu to kiji lo Kang na hitok. Todehin kulo na kare ongon ciani lo warun na longi ngak kunenge kakeny tomon ko are iyo kari inyi jimitan ongi to ofahin fad. Manyu bene kulo na ciani ara kulo kitifuriorita mwaita to kofi kofi.
\v 3 Oru dong mute lobo kifico kode lobo kiciena. Ongon mute Seger lo Okabwe lo Lobanga ko lo kito lo Ker katwa lo kang, manyu irwaa mute karwaak kunenge inyi.
\v 4 Odeya mute icieng komom nenge manyu igero mute karana nenge komoma kuneicieng.
\v 5 Loru dong mute karwe. Ida mute icieng owak wangun lo lomo kode wangun lo kolong tonyio icio mute Lahitok Lobanga icieng wangun. Manyu olanyu mute icieng tur ko tur.
\p
\v 6 Ojo malaika diho nan, igenoro kuno tenyi tenyi manyu ara dede. Lahitok Lobanga lo Okorifi kulo kamocak loculu malaika lo rihohino karwaak kunenge tohi na mute litiihino tang. Olotuno Yesu.
\v 7 Tode alotuno nan deu! Ongon gum iyo tungani na loric tenyi tenyi kulo kimoca kuna longoni katwa lone buk.
\p
\v 8 Nan Jon laning manyu adeu kuno sangite, manyu ojo nan laning adeu manyu, auroro nan lorubuhe kejuha kulo na malaika lohitotoro icieng diho nan.
\v 9 Ati ojo inyi diho nan, “Ketii jii! Ara nan karwaani kaletoni nino ko recera kunino kamocak ko cio pili kuna loric tenyi tenyi kulo ene buk. Iwora Lobanga.
\p
\v 10 Oto kirihohi nan ojo, “Kedwany tenyi tenyi kulo kimoca kulo ene buk tonyio lonyiha faritin.
\v 11 Ingohi inyi na litiyo kuna irohori, osodoro kitiyo kuna irohori, ingohi manyu inyi na lisasuo tosodoro kisasuo, ingohi manyu inyi na litiyo kuna ijiri tosodoro kitiyo kuna ijiri, ingohi manyu inyi na inyu tosodoro ko nyujon”.
\p
\v 12 Tode alotuno nan deu! Ongon bahacic nei diho nan, manyu acio mute nan iyo tungani tolobito tolobito iya na litiyore inyi.
\v 13 Nan Alfa ko Omega, Ketemoni ko Kifwongi, Lohiciahi ko Lohicungi.
\v 14 Ongon ko gum cio kuna lilal kyelani kuneicieng, ojo ojir ongoniti ko twero iyo ciani lo warun manyu orutori to lokoli katwa lo kang.
\v 15 Oleng ongoni ikureho, cio kuna lilalamita, kasomok, kafadak, kaworak kulo lopidingahin ko cio pili kuna litiyo ticitici kulo talerun.
\p
\v 16 Nan Yesu lacule malaika nei kicwara isi ene sadden to kanisahin. Nan kerdeti ko lotata lo David ko kangeriti Lotefo lo kiwanyi na iwang.
\p
\v 17 Ojo okorif lo lateran “Ou!” Manyu ingohi inyi na loning tojo “Ou!” Na loura ingohi tolotu manyu na lowak ingohi torumu kicwara kifi kulo warun arus.
\p
\v 18 Asonya nan cio pili kuna loning tenyi tenyi kulo kimoca kulone buk: kolosodohi lobo tungani lobo tohi ijia, Osodohi mute Lobanga dihonyi johi johi kuna lititimi iyo ene buk.
\v 19 Manyu kolodume lobo tungani lobo tenya to katwa lone buk lo imociti, odume many mute Lobanga kikorit nenge lo ciani lo warun ko kang na inyu na lititimi iyo ene buk.
\p
\v 20 Inyi na licio saden iyo kuno sangite lojo, “Ibo alotuno nan deu”. Amen Ou Lahitok Yesu.
\p
\v 21 Kisa lo Lahitok Yesu ongon ko cio kulo Lobanga fad, Amen.