See in Reader
150 lines
14 KiB
Plaintext
150 lines
14 KiB
Plaintext
\id 1PE
|
|
\ide UTF-8
|
|
\h 1 Petero
|
|
\toc1 1 Petero
|
|
\toc2 1 Petero
|
|
\toc3 1pe
|
|
\mt 1 Petero
|
|
\c 1
|
|
\cl Kingutit 1
|
|
\p
|
|
\v 1 Nan Petero jayo lo Yesu Kristo. Diho cio kuna lonyumu Lobanga, welo kuna lisarihi kof lo Pontus, Galatia, Kapadokca, Asia ko Bisinia
|
|
\v 2 Kuna afa lonyumuni to yenun lo Lobanga Apa berien to tic lo kitinyujo na litii Okorif to ningo iyo Yesu Kristo ko kiruru to okoto nenge. Ingohi kisa ko kisiliban tara ningi rief.
|
|
\p
|
|
\v 3 Ingohi kwama tongon iyo Lobanga monye lo Lahitok niyang Yesu Kristo. To kisa nenge na hitok licio inyi ohoi otomone ngejuk iyo kigeno na iwar na lolotu ara iyo kibuhuno lo Yesu Kristo to kiji lo kaweyak
|
|
\v 4 Manyu iyo lunyo lo tohi na lida mute ori, kode lipalaru kode oru na likumahini kai tote
|
|
\v 5 Kuna lohitihuni to golun lo Lobanga to kiruk many lolotunore mute lo lwaha na likukumahini kitibotuno to faritin kulo lohicungi.
|
|
\v 6 Tona itokwamati bebe kileng many adi ngitoyo ite to faritin kude kuting to itemiti kuna lotemarihin ite.
|
|
\v 7 Ofwonu kuno ojir kiruk ningi na lilany dab na litinyuji to kima ojir itigoli iyaunore maja, deyo ko kwatun mute kalitibotuni Yesu Kristo.
|
|
\v 8 Kokileng ngida ite ideu inyi imaru ite inyi, manyu ko kileng ngida ite ideya inyi iruk ite inyi.
|
|
\v 9 manyu ifut ko kwama na lida otenyuno tonyio ingon ite rumuno konyek lo kiruk ningi ko lwahuno lo lwahita kuningi.
|
|
\v 10 To tenya lone lwaha, kamocak kulafa lotenya to kisa na orumu lolotuno iyo ite, lotahi to fiha lo taulo ko to kigingi nahitok,
|
|
\v 11 to tema rumuno tik ko tenyi tenyi kuna louta okorif lo Kristo nafa longon katwa neicieng lafar kalimoca icieng to kidak lo Kristo ko deyo na mute lijifita.
|
|
\v 12 Orumu afa litibotuni iyo icieng ojo ida ara kenite kuneicieng irwa icieng ati ite kolotenya icieng to kuno sangite litiihino na lerihohi cio kuna lititima layomit na ijir iyo cio to golun lo Okorif na Inyu na loculuni to kai. Kileng malaikahin okodomo afa deya kuno sangite.
|
|
\p
|
|
\v 13 Tona ikukumata kibuha ningi to tic: itoric kenite kuningi; itofik kigeno ningi bebe iyo kisa na liciorihinoti ite kalitibotuni Yesu Kristo.
|
|
\v 14 Iya tee kuna iningoho kerihe ifik taulo iyo wahita kuna irohori kulafa limanyare ite to lunya.
|
|
\v 15 Ati iya na lonyujore kalolongunoni ningi, itongoti ara kuna inyuji iyo sangite fad kuna litiyo ite,
|
|
\v 16 tonyio igero ojo, “Itinyu tonyio anyu nan”.
|
|
\v 17 Iya na lilolongore ite Apa na longoto tenya lo ticitici kulo cio oru kisisio, itomanyati manya ningi ene iya welo to bangun na inyu.
|
|
\v 18 Tonyio iyen ite jimitan ida afa kilwahuni ite to sangite kuna lorujoro iya dab ko rial iyo manya na ifara lone kof lafa liluny ite iyo fafaico kuningi
|
|
\v 19 ati to okoto lo Kristo na inyu kito lo kern a loru lofunya kode lohabohoi.
|
|
\v 20 Onyumuni afa inyi many orihe ida oduhi kof ati ofwonuni itibotuni to kuno faritin kulo lohicungi to ite.
|
|
\v 21 Ara iyo inyiiruk ite Lobanga na litibuhu inyi to kiji lo kaweyak manyu itikwat inyi inyi licio kiruk ko kigeno ningi ongon iyo Lobanga.
|
|
\v 22 Jijia iya na litinyu ite kenite kuningi to ningo tenya lo dede imarunore ite recera kuningi, imaruti kenite tona igol to taulo fad.
|
|
\v 23 Tonyoo lotomonuni ite ari ida ara to kinyiemo kuna imuraha ati to kuna ijiri ara iyo tenya lo Lobanga na losio.
|
|
\v 24 Tonyio igero ojo, “Ori cio fad iya nyiari manyu deyo neicieng fad ori iya lo katurahak kulo mwang; inore nyiari manyu oruruoro katurahak
|
|
\q2
|
|
\v 25 ati tenya lo Lahitok owoita Tur”. Manyu inyi ene tenya ene afa lititimahini ite.
|
|
\c 2
|
|
\cl Kingutit 2
|
|
\p
|
|
\v 1 Tona itoric kenite iyo rohojun lo taulo ko kitinononga fad, talerun, okaine ko gulia tenyi tenyi to koditi fad.
|
|
\v 2 Iya tee idoleha itikodomoti kuna inyuji iyo Okorif ojir ibolore iyo lwahuno ningi
|
|
\v 3 iya ene limanyare ite jimitan ojir Lobanga.
|
|
\v 4 Iya na lifwonunore ite iyo inyi moru na iwar na loberu cio ati na lonyumu Lobanga manyu na lodwaru iyo inyi
|
|
\v 5 ite manyu iya morutok kuna iwari kingoniti duhohino iyo kaji lo Okorif lo rahun kadwarak kuna inyuji kuna licwara kikumihin kuna inyuji kuna liruk Lobanga ara iyo Yesu Kristo.
|
|
\v 6 Tonyio ojo igeriti, “Tode afiha nan moru Zaion moru na lonyumuni na inyu lo ogule lo kaji manyu tungani na lofik kigeno iyo inyi ida mute riri inief”.
|
|
\p
|
|
\v 7 Jijia iyo isi na liruk ara ene moru lo wel. Ati iyo cio kuna lida iruk, “Moru na loberu kaduhok Lolotu ara moru lo ogule lo kaji”.
|
|
\p
|
|
\v 8 Mantu, “Moru na licio cio oruruhita Manyu moru na liturorita icieng”. Oruruhita icieng tonyio ida icieng iruk ifak iya na likukumahinorehin to icieng berien.
|
|
\v 9 Ati ira ite cio kuna lonyumuni, kadwarak kulo okabwe, cio kulo kof na inyu, cio kuna lara kulo Lobanga, ojir ititim imajiti kulo Lobanga na lilolongu ite to katwa lo lokimuyuk iyo wangun nenge na idwaru.
|
|
\v 10 Ida afa ite ira cio berien, ati jijia lira ite cio kulo Lobanga, ida afa ite irumu kibaya, ati jijia lirumu ite kibaya.
|
|
\p
|
|
\v 11 Morot kuna lamaru, alelia nan iyo ite kuna lira welo ten to kof lo ngerihino wahita kuna iboti kuna litiremo warita kuningi.
|
|
\v 12 Itiwar warun na ijir kiji lo cio kuna lida iruk na kileng ngidoro icieng ite ojo ipali, ojir odeuni ticitici kuningi kuna ijiri itikwati Lobanga far na mute lolotunore inyi ngoto lokiho.
|
|
\p
|
|
\v 13 To Lahitok, icwarata kenite kuningi iyo kalanyunok kuna lofihi kiji lo cio, kode iyo kabu na lara lahitok na lolanyu
|
|
\v 14 kode iyo gavunahin kuna loculu inyi lo kitigema kapalak, manyu lo maja kuna litiyo ara na ijir.
|
|
\v 15 Tonyio itongo ara wahun lo Lobanga jimitan to kitiyo ara na ijir, ojir ite itibuk tenyi tenyi kulo lunya kuna lotenya kadatarok.
|
|
\v 16 Itongoti iya cio kuna lolanyu kenite ati kitiyore na lanyuno lo kenite kuneicieng ara kimuhi lo sangite kuna irohori, itongoti iya karwaak kulo Lobanga.
|
|
\v 17 Itotorti bangun na ibehi iyo cio pili; imarutu orecera lo karuhok, itibang Lobanga itorimati Kabu.
|
|
\p
|
|
\v 18 Opihin, icwarata kenite iyo kalanyunok kuningi to rima fad, ida ara iyo kuna ijiri libuha to ite keken ati manyu iyo kuna ingereha.
|
|
\v 19 Tonyio ojir kalodik tungani kidak na lida ocam tonyi tonyio ibuhunita inyi Lobanga.
|
|
\v 20 Ati nyio litongo ara lo kwama kalidik isi kidak na licori isi to kipal? Ati kalirumu isi kidak to kitiyo ara naijir, idik hati, ara lo kwama diho Lobanga.
|
|
\v 21 Kilolonguni ite iyo koditi lona warun tonyio orumu afa Kristo kidak tote, lo kicwara ite kitotorita lo jimitan ojir ite ijit omot nenge.
|
|
\q
|
|
\v 22 “Ida inyi itii lobo kipal manyu oru lobo kitinononga lolotu to kutuk nenge”.
|
|
\p
|
|
\v 23 Kalomor icieng inyi to mori mori beciek ida inyi ilenu: Kileng lorumu inyi kidak ida inyi litibang cio; ilany icio inyi ken nenge iyo inyi na longoto tenya ara na ibehi.
|
|
\v 24 Loting inyi to ken nenge kipali pali kuniyang iyo kete lo jimitan ojir ohoi kiwei iyo kipal manyu kiwari iyo biran, to korongan kunenge kitifuriori ite.
|
|
\v 25 Tonyio liri afa ite iya kera ati jijia liitu ite iyo katibalani ko kaririani lo warita kuningi.
|
|
\c 3
|
|
\cl Kingutit 3
|
|
\p
|
|
\v 1 Ngorwo tona kikoi bito icwarata kenite kuningi iyo rei kuningi ojir kileng ngida lobo iruk tenya to manya na ijir lo ngorwani nenge
|
|
\v 2 kolodeu nyujon ko rima lo ngorwani nenge
|
|
\v 3 kecio dwarujon ningi ara lo ngota lo oleng iya kikada lo kweci kode kiciefita sangite kulo dab iya tongosi, aboli ko kyelani kuna igoli wel.
|
|
\v 4 Ilany kuna, ingohi tara lo katwa, dwarujon na lida ohuliete lo Okorif na irie obuho manyu na lara lo wel to ketemoni lo Lobanga.
|
|
\v 5 Tonyio inyi, ene kikoi ene lofihare ngorwo kuna inyuji afa berien kigeno neicieng iyo Lobanga odwarujore icieng. Icio afa icieng kenite kuneicieng iyo rei kuneicieng.
|
|
\v 6 Iya Sara lafa loningo Abram many ilolongo inyi ojo lahitok. Ira ite tee kunenge kalitiyo ite tohi na ijir ida icio kikoi iyo bangun.
|
|
\p
|
|
\v 7 Iya na manyu ojir ite rei itongo to ningoro ko ngorwo kuningi itehita icieng to rima iyen jimitan ara icieng kaletok kuna lida ogoli manyu iya kalunyok ara Lobito ko ite lo kicwara lo warun lo kisa ojir lobo tohi ida itik kilifa ningi.
|
|
\p
|
|
\v 8 Lo lohicungi ojir ite fad itongo to yomo ara Lobito kiji ningi, itira cio kabayak to taulo ko kimaruno iya recera itongoti ilwaha kenite ko riejun.
|
|
\v 9 Kedum rohojun to rohojun kode moro to moro ati to kigatati kuna ijiri tonyio kilolonguni ite iyo ene manya ojir irumu kigata lo Lobanga.
|
|
\q
|
|
\v 10 Tonyio igero ojo, “Tungani na limaru warun, na lowak deuno faritin kuna ijiri, ojir oric ngadief nenge iyo tenyi tenyi kuna irohori ko kutuk nenge iyo tenyi tenyi kulo kitinononga.
|
|
\q
|
|
\v 11 Ingohi ibelo to rohojun itii jiran ingohi totak kisiliban okodomo inyi
|
|
\q
|
|
\v 12 Tonyio ongon konyeha kulo Lahitok iyo kabirak manyu oloha kiyoha kunenge iyo kilifa neicieng ati omutok komom lo Lahitok iyo cio kuna litiyo rohojun”.
|
|
\p
|
|
\v 13 Ngai lotahita jore ko isi kaligeria isi kitiyo na ijir?
|
|
\v 14 Kileng ngirumu isi kidak to kitiyo na ijir ingon isi ko gum. Kebang tohi na lobang cio kerienya.
|
|
\v 15 Ati to taulo kuningi, itingadahiti Kristo ara kabu. Tik tik ikukumahino lo kinyahahino tenya cio pili kuna litifia lofere lo kigeno na lingonore ite. Ati inyiahahiti to riejun ko rima
|
|
\v 16 iric nyujon lo taulo ojir kuna lotenya kuna irohori to ite, ko to manya ningi na ijir iyo Kristo, odahahi riri to na gulia neicieng.
|
|
\v 17 Ojir ilany kalara wahun lo Lobanga jimitan ojir irumu kidak to kitiyo ara na ijir ilany kitiyo na irohoi.
|
|
\v 18 Tonyio owei afa Kristo kakeny Lobito rief, kabirani to kapalak ojir iyaunore ite iyo Lobanga. Ifadari inyi iyo ken ati itiwaruni inyi iyo Okorif
|
|
\v 19 to na okorif manyu olo inyi ititim tenya lo Lobanga iyo okorifi kuna longoni mabus.
|
|
\v 20 Kulafa loberu ningo berien kalitila Lobanga to dihan to faritin kulo Noa na likukumarihin tigol. To katwa nenge cio kude kuting ara mietauni keken olwahuni to kifi.
|
|
\v 21 Manyu itotoro kuno kifi kibatisa na manyu lohilwahu ite jijia na lida ara kilala lo cora to kenite ati kitisadeni lo taulo kuna inyuji to ngati lo Lobanga. Kilwahu ite to kibuhuno lo Yesu Kristo,
|
|
\v 22 na lirwok kai manyu ongon kana iteten lo Lobanga na longon malaikahin, kalanyunok ko kagolok fad iyo lanyuno ko obolore nenge.
|
|
\c 4
|
|
\cl Kingutit 4
|
|
\p
|
|
\v 1 Iya na lorumunore Kristo kidak to ken, itotek manyu ite na koditi bito tonyio tungani na lorumu kidak to ken lokeru kifadaru kipal.
|
|
\v 2 Tona ida inyi orihe owar warun nenge ene kof lo kitiyo wahun lo ken na irohoi ati wahun lo Lobanga owar inyi.
|
|
\v 3 Tonyio likeru afa ite karihin kitiyo ticitici kuna litiyo cio kulo kof iya kwerun lo konyeha, wahun na irohoi, ruma, karamahin kulo ticitici kuna lida ocam ko kiwora lopidingahin.
|
|
\v 4 Ipany cio jijia kolodeuni jimitan ida ite irihe imora ko icieng iyo kuno ticitici inyi licio icieng kitikaja ko moro ite.
|
|
\v 5 Ati ititim mute ite icieng kuna ticitici kuneicieng to ketemoni lo Lobanga na mute lolotu ngoto tenya iyo cio pili kawarak ko kaweyak.
|
|
\v 6 Inyi na tenya licio ititimi layomit na ijir kileng iyo kaweyak ojir ongotohini tenya iyo cio to koditi lo ken ati itiwar to koditi lo Lobanga iyo Okorif.
|
|
\p
|
|
\v 7 Lonyiha lohicungi lo sangite fad. Tona itongoti owati kweci manyu irica kenite ojir ilifare.
|
|
\v 8 Bebe nenge imararoti bebe tonyio imuk kimaruno kipali pali beciek.
|
|
\v 9 Ifotunitati kenite kangite kuningi oru ngungunita.
|
|
\v 10 Ojir Lobito Lobito itiyore kicwara na licio Lobanga inyi lo kirwaa kaletok itiyore kisa na licio Lobanga iyo kikohin fad.
|
|
\v 11 Kolotenya lobo ojir itiyo mejo otenya tenya lo Lobanga token. Kalirwaa lobo ojir irwaa to golun na licio Lobanga ojir iyo sangite fad omaji Lobanga ara iyo Yesu Kristo. Ingohi deyo ko golun tongon iyo inyi karihin ko karihin. Amen.
|
|
\p
|
|
\v 12 Recera kepany to temi temi kuna imeji kuna lirumunore ite kidak ori mejo lobotohi lilunya ite longon kitiihino iyo ite.
|
|
\v 13 Itokwamati jimitan ingon ite ngara kidak ko Kristo ojir mute kwama ningi ifut kalitibotuni inyi.
|
|
\v 14 Kolomoroti ite to karana lo Kristo ingoni ite ko gum noo tonyio kingon okorif lo gum ko Lobanga ko ite.
|
|
\v 15 Kalirumu kidak keco ara to kifada lo tungani kode to koko kode iya lobo koditi lo kapalani kode iya karutohitani iyo tenyi tenyi kuna lida ara kuningi.
|
|
\v 16 Ojo hony kalirumu isi kidak to rahun Kristoni keco riri kinief ati tomaja Lobanga jimitan libur isi karana lo Yesu Kristo.
|
|
\v 17 Tonyio logoru tik lo ngoto lo tenya manyu iciaha to katwa lo kaji lo Lobanga manyu kaliciak tohoi ori hati mute aja to cio kuna loberu kiruk layomit na ijir lo Lobanga?
|
|
\p
|
|
\v 18 Manyu, “Kologol iyo cio kuna ibiri lwahuno, nyio dong litiihino iyo cio kuna lida iruk Lobanga ko kapalak?”
|
|
\p
|
|
\v 19 Dong kuna lorumu kidak to wahun lo Lobanga, ingohi iciori kenite kuneicieng kac kulo kaduhoni neicieng manyu osodoroti kitiyo ticitici kuna ijiri.
|
|
\c 5
|
|
\cl Kingutit 5
|
|
\p
|
|
\v 1 Iyo lohitwaha to kiji ningi alelia nan iya lohitwok kaletoni ningi sadden lo kidak lo Kristo manyu iya Lobito manyu na mute longara iyo deyo na mute litibotuni.
|
|
\v 2 Itira katibalak kulo kera kulo Lobanga kuna longon kac kuningi itiyo iya kaririak ida ara jimitan kifudahini isi ati ara to kiruk nino iya na lowahare Lobanga iyo isi, ida ara to ngatun lo robia ati kigeria kirwaa kaji lo Lobanga
|
|
\v 3 ida manyu itikangana ken iyo cio kuna longon iyo obolore nino ati ojir ira kitotori iyo twol lo Lobanga.
|
|
\v 4 Manyu kololotu mute katibalani irumu mute ite tahi lo deyo na lida mute ipalaru.
|
|
\v 5 Ite kilahaji tona kikoi bito itorimati ngoroyok. Ite fad iburata riejun tonyio, “Itiremo Lobanga kapufak ati icio kisa iyo cio kuna irieji”.
|
|
\p
|
|
\v 6 Tona itiriejata kenite kuningi iyo kana lo Lobanga na igol oto cia inyi kiting ite kai mute far nenge.
|
|
\v 7 Ingohiti kiudo ningi fad iyo inyi tonyio kirica inyi ite. 8 Itoric kenite manyu iririati.
|
|
\v 8 Ingalita meroni ningi sitan ilorita iya ngatuny na liromita otahita tungani na ngokony.
|
|
\v 9 Itowoitati otoc to golun iyo kiruk ningi manyu iyen jimitan odiha recera kuningi to kofi kofi fad inyi na kidak bito.
|
|
\v 10 Kalikeru ite rumuno kidak to kude faritin kuting oto cia Lobanga monye kacwarani lo kisa fad na lilolongu ite iyo Kristo lo ngara deyo nenge na losio tur inyi cia to ken linyahu manyu kitigol ite many iwoita igoli ting to ngere lo taulo.
|
|
\v 11 Ingohi golun tongon iyo inyi karihin ko karihin. Amen.
|
|
\p
|
|
\v 12 To lwaha lo Sailas na lafik nan ara rece na ligenoro noo ager nan ene waraga isuk iyo ite lo kitigolo taulo kuningi manyu atisadeno jimitan ara ene kisa lo Lobanga lo dede itowoitati igoli ijia.
|
|
\v 13 Cio pili kuna liruk Kristo kuna longoni Babilon kifonyoti ite ko rece niyang Mark.
|
|
\v 14 Itofony kenite to fonyo lo kimaruno. Kisiliban kingon ko ite fad kuna lingoni iyo Kristo.
|