See in Reader
140 lines
13 KiB
Plaintext
140 lines
13 KiB
Plaintext
\id JAS
|
|
\ide UTF-8
|
|
\h Yakobo
|
|
\toc1 Yakobo
|
|
\toc2 Yakobo
|
|
\toc3 jas
|
|
\mt Yakobo
|
|
\c 1
|
|
\cl Kingutit 1
|
|
\p
|
|
\v 1 Nan Jems karwaani lo Lobanga ko lo Lahitok Yesu Kristo. Diho imaniti tomon ko are kuna lisarihi kofi kofi pili. Afonyo nan.
|
|
\v 2 Itofik ara tohi lo kwama nahitok recera kalideu ite kitemati to kikohin fad
|
|
\v 3 tonyio iyen ite jimitan iyauno tema lo kiruk ningi diha.
|
|
\v 4 Ojir diha okeru tic nenge ojir ite ifwonu igoli manyu iwar warun na ifut oru lobo tohi longor.
|
|
\v 5 Kolongon lobo loru ko genyun kiji ningi ingohi inyi itifi iyo Lobanga na licwara rief iyo cio fad ida igenya kipal, oto cia iciori inyi.
|
|
\v 6 Ati kalitifia inyi ojir iruk ida ikuya, tonyio tungani na likuya ori iya kifi kulo nam kuna libebelo kiyoma tinya cia iyauno iya ene tinya cia iyaru iya idi.
|
|
\v 7 Keco koditi lona tungani ibuha ojo arumu cia inyi lobo tohi iyo Lobanga.
|
|
\v 8 Ara inyi tungani na longangalita to tau na lida oriehi iyo tohi na litiyo inyi.
|
|
\v 9 Ojir rece na loru lobo tohi opufare na ngonun nenge kai.
|
|
\v 10 Ati na lobara ojir opufare ngonun nenge kof tonyio ori mute bara iya katurahak kulo nyiari.
|
|
\v 11 Tonyio otulu kolong ko nohun nenge ko kitinora nyiari oruruoro katurahak kunenge ko kipalaru dwarujon nenge. Tona kikoi bito, inore cia kabarani ko kileng ngotitilita iyo tic nenge.
|
|
\v 12 Ongon ko gum tungani na lodik tema tonyio kolowoitahino inyi na tema orumu mute inyi tahi lo warun na locik Lobanga kicwara diho cio kuna limaru inyi.
|
|
\v 13 Kolotemi lobo tungani keco ojo, “Kitema Lobanga nan”. Tonyio ida Lobanga otema to tohi na irohoi. Manyu ida inyi otema lobo tungani.
|
|
\v 14 ati ara wahun lo tungani Lobito Lobito lotema inyi manyu wahun nenge lorihoro inyi to kitinononga.
|
|
\v 15 Tinyia kalifonga wahun, otomonu kipal ojo langun lobolo kipal otomonu wei.
|
|
\v 16 Keco kitinonongi recera kunei.
|
|
\v 17 Sangite kulo kicwara fad kuna ijiri ko kuna idwaruha ofwonu to kai, ofwonu kof iyo Apa lo wangun lo kai na lida ibelo iya okorifi kulo sangite.
|
|
\v 18 Onyumu inyi tomonuno ohoi to tenya lo dede, ojir ohoi kirahare ngahi ketemok lo sangite fad kuna loduk inyi.
|
|
\v 19 Recera kunei itoyen ene; Ingohi tungani tolobito tolobito oruk ningo ati odidi kifoto manyu odidi kilongo
|
|
\v 20 tonyio ida kilongo lo tungani otum kiyauno warun lo biran na lowak Lobanga.
|
|
\v 21 Tona ingohiti ticitici kuna iboti ko rohojum na jijia longon manyu itiriejata kenite kuningi manyu ilifuti tenya na litibulahini katwa ningi na lotum lwahuno ite.
|
|
\v 22 Ketinononga kenite to ningo lo tenya keken. Itiyo tohi na lojo tenya.
|
|
\v 23 Tungani na loning tenya ida hati itiyo tohi na lojo, ori iya tungani na lode komom nenge to kiyo
|
|
\v 24 langun lode inyi ken nenge, ko loro deu deu ko luluoro koditi na lorijore inyi.
|
|
\v 25 Ati tungani na lode cik na ijir na licwara laharu otoc oto hati osodoro kitiyo tohi na loteny ida oluluoro tohi na loning inyi ati itiyo inyi orumu cia inyi gum.
|
|
\v 26 Kaliio lobo tungani ojo inyi tungani lo dini ida hati oric ngadief nenge itinononga inyi ken nenge ake ake manyu oru faida iyo na dini nenge.
|
|
\v 27 Dini na liruk Lobanga Apa niyang ara na inyu manyu ocam inyi ene: rica lo tee okidahi ko nafuseritohin iyo kidak neicieng ko rica lo ken ida kof ipale.
|
|
\c 2
|
|
\cl Kingutit 2
|
|
\p
|
|
\v 1 Recera kunei, iya karuhok kulo kabu niyang lo deyo Yesu Kristo ketotoro kokora kiji lo cio.
|
|
\v 2 Adi ba ngolotu tungani na liciefita aggit lo dab ko kyelani kulo wel, olotu manyu lobo kakidahani na liciefita kyelani kuna iboti lotubare ningi.
|
|
\v 3 Idumu Hti ite ene monye lo agit ifik iyo seger ijio, “itongo ten lahitok”, ijio iyo na kakidahani ijo, “towoita todi” kode ijo “itongo kof ene kejuha kunei”
|
|
\v 4 ida ite liyauno kokora kiji lo cio manyu ira kangotok kulo tenya to taulo kuna iboti?
|
|
\v 5 Itoning recera kunei kuna lamaru; ida re Lobanga lonyumu kakidahak kulo ene kof ara kabarak iyo kiruk manyu lo fwonuno lunyo okabwe na locik inyi to cio kuna limaru inyi?
|
|
\v 6 Ati limo rite kakidahak. Ida re kabarak litimumuna ite? Ida icieng lipihorita ite ketemoni lo lokihohin?
|
|
\v 7 Ida icieng lomoro karana na ijir lo na lira ite kunenge?
|
|
\v 8 Kaliric ite cik lo okabwe dede na longon iyo igeriti na lojo, “Imaru loriehat nino iya ken nino,” irumu ite itiyo tohi na ibehi.
|
|
\v 9 Ati kalitotoro ite kokora ipal ite manyu kingotohini tenya ara kagilak kulo cik.
|
|
\v 10 Tonyio tungani na loric cihicihi fad oto hati ouroro iyo Lobito tohi, logil cik fad.
|
|
\v 11 Tonyio inyi na Lobanga bito lojo, “Keyau ngorwani lo tungani” inyi manyu lojo, “Kefade”. Kalida isi iyau ngorwani lo tungani ito hati ifade lira isi kagilani lo cik.
|
|
\v 12 Itotenyati manyu itiyo iya cio kuna mute longotohinoti tenya kweci to cik na licwara laharu.
|
|
\v 13 Tonyio ngoto lo tenya na loru kibaya itotorohini mute tungani na lida ibaya. Olanyu kibaya ngoto lo tenya.
|
|
\p
|
|
\v 14 Nyio jiran nenge recera kolojo tungani aruk inyi oru hati ticitici kuna litotoro? Otum koditi lona kiruk lwaha inyi?
|
|
\v 15 Adiba ngoru kyelani ko daha iyo lobo rece kode kanece.
|
|
\v 16 Kolojo lobo to kiji ningi iyo inyi ojo, “Ilo ara na ijir, ingohi ken tonok manyu itodahati otoc”, oto hati ida icio inyi tohi na loru iyo inyi, olwak inyi tonyio?
|
|
\v 17 Tona kikoi bito kiruk kalida ilihita ko tic, owei.
|
|
\v 18 Ati ojo cia lobo, “Itehita isi kiruk nan atehita ticitici”. Kitotorohi ba nan na kiruk nino oru tic ati atotor cia nan kiruk nei to tic na latiyo nan.
|
|
\v 19 Iruk isi jimitan ongon Lobanga Lobito. Ojir! Kileng lodonyiok iruhiti jii manyu ihihiritati.
|
|
\v 20 Isi kadataroni, iwak isi kitotorohini isi jimitan kiruk na lida ilihita ko tic oru faida nenge?
|
|
\v 21 Ida afa fafai niyang Abram ikeni jimitan obir to kicwara kito nenge Aisak iyo ciali lo kicorita?
|
|
\v 22 Todeu jimitan kiruk nenge ko tic ilihita ara Lobito. Manyu ifut afa kiruk nenge to tohi na litii inyi.
|
|
\v 23 Manyu itifut igerit na lojo, “Iruk Abram Lobanga ko kikenahinoti iyo inyi ara biran manyu ilolongi inyi ojo, morte lo Lobanga”.
|
|
\v 24 Ideu ite jimitan itibiri tungani to tohi na litii inyi ida ara to kiruk jia.
|
|
\v 25 Tona kikoi bito, ida re afa ikeni Raab mulayani ojimi obir to kiduhahino kasifak kulo Israel icio icieng logetore manyu itotorohi icieng lobo kikoi ake?
|
|
\v 26 Iya na loweyare ken na loru okorif, owei manyu kiruk na lida ilihita ko tic.
|
|
\c 3
|
|
\cl Kingutit 3
|
|
\p
|
|
\v 1 Kecio becek kuningi ofik kenite ara katiyenak recera, tonyio obolo ngoto lo tenya iyo ohoi katiyenak ilany cio kuna kude fad.
|
|
\v 2 Kiurorita ohoi cio fad to kikohin beciek. Kolongon tungani na loru ko kipal to tohi na lotenya inyi ara na tungani tungani na inyu na lotum rica ken nenge fad.
|
|
\v 3 Kolohifik ohoi biliet kutuk lo lakweny kijo ojir inyi kiningo ohoi, kibelu ohoi na liang fad. Itii wahun niyang.
|
|
\v 4 Kode ngatifik baburi ara kitotorita. Kileng ngoboroho icieng na lara kiyomahin kuna ilotiri locula inirati icieng to kiniri lobo sidi faji na lowak kanirani olo.
|
|
\v 5 Iya na, ara manyu ngadief faji lo ken lobo sidi bebe ati otenya inyi tenyi tenyi kuna hitoha. Itiririo ba ko tim na hitok na lotumiti curare fad to kima lobo sidi doong.
|
|
\v 6 Ara manyu ngadief kima. Iyo fajihit kulo ken, ori ngadief iya kof na lida itiyo tohi na ibehi. Otum kipalaru tungani fad. Occur koditi lo warun nenge dot manyu inyi token ocure kima lo geena.
|
|
\v 7 Otum tungani lanyuno tiangi, kwenyi, muniok ko sangite kuna lowar katwa lo nam ongon tungani lanyuno manyu lolanyu afa tungani icieng
|
|
\v 8 ati oru tungani lolanyu ngadief. Ara tohi na irohoi na lifut ko kiyeri.
|
|
\v 9 To ngadief kimaja ohoi Lahitok ko Apa niyang manyu to ngadief kifico ohoi cio kuna kude kuna loduk Lobanga oriworo ko inyi.
|
|
\v 10 To kutuk Lobito ofwonu maja ko kifico. Recera ida ene ocam.
|
|
\v 11 Otum itibi lo kifi Lobito ituno kifi kuna ilemi ko kuna itatangi?
|
|
\v 12 Recera kunei otum bule ngijan mehek kode otum kumi ngijan camididi? Ida manyu itibi lo kifi kuna itatangi otum iituno kifi kuna ilemi.
|
|
\p
|
|
\v 13 Ngai logeny manyu iniang to kiji ningi? Ingohi inyi itotoru to manya nenge na ijir, to ticitici kuna litiyo to riejun na lolotu to genyun.
|
|
\v 14 Ati kalitehita isi tau na lodwar ara okaine ko kibuha to ken nino ake ake, kepufare kode ketikaj tenya lo dede.
|
|
\v 15 Ida koditi lona genyun olotu to kai ati ara lo kof, manyu ida ara lo okorif ati lo sitan.
|
|
\v 16 Tonyio faji na longon okaine ko kibuha to kenite kulo cio ake ake, inyia irumu isi swaswaita ko ticitici kuna irohori.
|
|
\v 17 Ati genyun na lolotu to kai, ketemoni re onyu, manyu imaru kisiliban orie, oning tenyi tenyi kuna ijiri, ifut ko kibaya ko ngak kuna ijiri, ida isisio manyu ara dede.
|
|
\v 18 Katiyomok kuna loya kisiliban odengu cia icieng warun lo biran.
|
|
\c 4
|
|
\cl Kingutit 4
|
|
\p
|
|
\v 1 Nyio liyauno banga ko ngolofa kiji ningi? Ida re ofwonu iyo wahita kuningi kuna longoni rem katwa ningi?
|
|
\v 2 Iwak isi lobo tohi ati ida irumu. Ifada ite cio manyu idam sangite kulo cio kunakude ati ida ite itum tehita tohi na liwak ite. Ingolofa ite ibaha. Ida ite itehita tonyio ida ite itifia iyo Lobanga.
|
|
\v 3 Kalitifia ite ida ite irumu tonyio itifia ite to taulo kuna irohori lo jimitan ojir itiyore lo kitimone wahun ningi.
|
|
\v 4 Ite cio kuna litikaja omorte, idaite iyen jimitan ara morte ko kof omerohoje ko Lobanga? Tungani na lonyumu omorte ko kof olotu ara meroni lo Lobanga.
|
|
\v 5 Kode ifik ite jimitan ene igerit afa ligeri ida ara dede na lojo, “Okorif na licio inyi ongon katwa niyang ikaino bebe tohoi?”
|
|
\v 6 Ati kicio inyi ohoi kisa na ibolo. Inyi licio igeri ojo, “Itiremo Lobanga kapufak ati icio kisa diho kariejak”.
|
|
\p
|
|
\v 7 Icwarata bo dong kenite kuningi iyo Lobanga. Itorem ko Sitan bebe oto cia inyi ife to ketemoni ningi.
|
|
\v 8 Isioluti iyo Lobanga oto manyu cia inyi isiolu iyo ite. Ilalata kac, ite kapalak manyu itinyujoto taulo ite cio kuna lingangalita iyo kibuha ningi.
|
|
\v 9 Ingohi taulo kuningi to meji, itoyoti icirati manyu. Ibeloto kwenita ningi ara kitoyo manyu kwama ningi ingohi ibelo ara kidak.
|
|
\v 10 Itiriejata kenite ketemoni lo Lobanga oto cia inyi kiting ite kai.
|
|
\p
|
|
\v 11 Recera ketenya tenyi tenyi kuna irohori kenite kuningi ake ake. Tungani na lotenya ara na irohoi ken lo rece nenge kode ongot tenya ken lo rece nenge, otenya inyi ara na litiremo cik manyu ongoto tenya iyo cik.
|
|
\v 12 Ara kacwarani lo cik ko kangotoni lo tenya Lobito hilong na manyu lotum lwahuno kode kifadaru. Ati isi, isi ngai lingoto tenya lo loriehat nino?
|
|
\p
|
|
\v 13 Jijia itoning, ite kuna litenya ijo, “Ene far kode kiwanyi kifwo cia ene kode nu kang kitong ijia kari kitiloto ijia kirumu robia”.
|
|
\v 14 Tonyio ida kileng isi iyen tohi na cia litiihino kiwanyi. Ara warun nino nyio? Ira isi lokidihisa na loboto to tik lobo sidi jia ko rijoro.
|
|
\v 15 Ilany, ojir ite ijo, “Kaliruk lahitok kiwari ciao hoi kitii ene kode nu”.
|
|
\v 16 Ojo jijia ipufa ite itidara, ara na pufa fad na irohoi.
|
|
\v 17 Tungani na loyen tohi na ijir na ngitii inyi ida hati itii, ipal.
|
|
\c 5
|
|
\cl Kingutit 5
|
|
\p
|
|
\v 1 Itoning bo, ite kabarak icirati manyu igoreiti noo to kidak na lolotuno kenite kuningi.
|
|
\v 2 Lomuraru bara ningi manyu lokeru ingenyuk kyelani kuningi.
|
|
\v 3 Lokeru nyal dab ko rial ningi. Nyal neicieng cia litongo ara sadden kenite kuningi manyu onyia cia kenite kuningi iya kima. Litub ite bara to faritin kulo lohicungi
|
|
\v 4 Tode icira robia kuna lida ite idumare cio kuna litii manatak kuningi iyo Lobanga tote. Logoru kicira lo kadengok kiyoha kulo Lobanga na lilany fad.
|
|
\v 5 Limany ite kof to kwama ko pufa lifit ite kenite kuningi lifiri to faritin kulo ngotoro.
|
|
\v 6 Likeru ite ngoto lo tenya ko kifada cio kuna loru ko kipal ida manyu kitipeha ite.
|
|
\p
|
|
\v 7 Idonyoto taulo recera many lolotunore lo Lahitok. Itode re koditi na litilare karemoni dorun lo mana nenge, itide ba kidonyo lo tau nenge itilare kuju lo lebelebe ko lo furat.
|
|
\v 8 Ite manyu idonyoto taulo manyu itowoitati igoli tonyio lonyiha lotuno lo Lahitok.
|
|
\v 9 Kengungunita iyo kenite kuningi ake ake recera icio ca ngotohino tenya kweci kuningi. Lowoita kangotoni lo tenya agwala.
|
|
\v 10 Recera ara kitotorita lo kidonyo lo taulo ko diha lo kidak itode iyo kamocak kulafa limoca to karana lo Lahitok.
|
|
\v 11 Iyen ite jimitan kifik ohoi kijo ongoni ko gum kuna afa lodik. Lining ite diha na lodihare Job ko tohi na afa litii Lobanga tonyio lohicungi. Ifut Lobanga ko jiran ko kibaya.
|
|
\p
|
|
\v 12 Iyo sangite fad recera kunei, kebutia kode to kai, kode to kof kode to lobotohi keken. Ingohi Ibo nino tara Ibo kde Ida ara Ida kecio ongoti tenya kilanyu isi.
|
|
\p
|
|
\v 13 Ongon lobo to kiji ningi ko kidak? Ingohi inyi ilifa. Okwama lobo to kiji ningi? Ingohi towolo woleco kulo maja Lobanga.
|
|
\v 14 Ongon lobo lomwai to kiji ningi? Ingohi inyi ilolongu lohitwaha kulo kanisa ofwonu ilifa kwe nenge otwei inyi to ngoroni to karana lo Lahitok.
|
|
\v 15 Ko kilifa na lilifi to kiruk itifurie cia na kamwayani; itiwoju cia Lahitok inyi. Kalipal inyi olauni cia.
|
|
\v 16 Tona itotul kipalipali kuningi to kiji ningi manyu ilifati to kaletok kiji ningi ake ake ojir itifuriori ite. Ogol kilifa lo tungani na ibir manyu itiyo.
|
|
\v 17 Ara afa Elia tungani iya ohoi. Ilif inyi to tau fad ojo ojir kuju ida oca, many ida kuju oca to karihin uni ko nusu.
|
|
\v 18 Olotu ilif ari olahahi kai kuju many odo manatak.
|
|
\p
|
|
\v 19 Recera kologere lobo to kiji ningi oleng to tenya lo dede, na lowak tungani inyahu inyi
|
|
\v 20 iiutu ene: tungani na linyiahu kapalani to kipal lo kikoi nenge, olwahu cia inyi to wei manyu imuhe kipalipali kunenge kuna iborengi.
|