Ino-x-okolie_reg/59-HEB.usfm

\id HEB
\ide UTF-8
\h Ibru
\toc1 Ibru
\toc2 Ibru
\toc3 heb
\mt Ibru
\c 1
\cl Kingutit 1
\p
\v 1 Afa berien, otenya Lobanga ko fafaico kuniyang ara iyo kamocak to kikohin beciek,
\v 2 ati to kuno faritin lohitenya kohoi to kito nenge na lonyumu inyi ara kalunyoni lo sangite pili na manyu afa likukum inyi kof fad tonyi.
\v 3 Ara kito kifarang lo deyo lo Lobanga na longon rijon lo Lobanga to ken ken nenge na lorica sangite fad to tenya nenge na igol. Langun lokeru inyi kitinyujo iyo kipalipali, olo itongohino ngati lo iteten lo obolore lo kai.
\v 4 Tona olotu inyi obolo ilany malaikahin iya na lilanyare karana na loluny inyi karaneco kuneicieng.
\v 5 Tonyio, iyo ani malaika afa ojo Lobanga, “Ira isi kito nei ene far lara nan Apa nino?” Kode ari, “Ara nan Apa nenge manyu inyi ara kito nei?”
\p
\v 6 Ari manyu kaliyauno Lobanga okang nenge ene kof ojo, “Ingohi malaikahin kulo Lobanga fad iwor inyi”.
\p
\v 7 Kolotenya Lobanga to malaikahin ojo afa, “Ofik inyi malaikahin kunenge ara kiyana karwaak kunenge lairani kulo kima”.
\p
\v 8 Ati to kito nenge ojo Lobanga, “Lobanga itongo mute seger lo okabwe nino karihin ko karihin, manyu biran mute lara iluk lo okabwe nino
\q
\v 9 Imaru isi biran iberu rohojun tona lohifik Kabu Lobanga nino ketemoni lo kalihitak kunino ko twa isi to ngoroni lo kwama.
\q
\v 10 Ojo manyu, “Many to lohiciahio Lahitok ifetahi afa isi guri kulo kof manyu ara kai tic lo kac kunino,
\q
\v 11 oru mute icieng ati iwasihi isi ongoroyon mute icieng fad iya kyela
\q
\v 12 ibibir mute isi icieng iya kimuhi ibelo mute icieng iya kyela ati iwasihi isi iri manyu ida mute karihin kunino icung”.
\p
\v 13 Iyo ani malaika afa ojo Lobanga, “Itongo ngati lo iteten nei manyu atirak cia nan merok kunino seger lo kejuha kunino?”
\p
\v 14 Ida re malaikahin fad ara okorifi karwaak? Kuna loculuni kirwa cio kuna mute iciori lwaharu?
\c 2
\cl Kingutit 2
\p
\v 1 Tona ojir ohoi kifik taulo bebe iyo tohi lafa lohining ojir ida kingade kifwongi.
\v 2 Kologol afa lofere lo tenya lafa liyauno malaikahin manyu tungani na lida ijif na tenya orumu kitigema na igol
\v 3 aja cia kifur ohoi kolohitiraban ene lwaha hitok? Ene lwaha afa item Lahitok otulu manyu ofwonu cio kulafa loning inyi kirihohi ohoi.
\v 4 Olotu manyu Lobanga kitisaden to kitotorita, kitirima ko tanguhin ko kicorita kulo Okorif na inyu kuna lokori iya na lowahare inyi.
\p
\v 5 Ida Lobanga icio nu kof lolotuno na lohitenya ohoi iyo kac kulo malaikahin.
\v 6 Ati ongon lobo faji lotenyare afa lobo tungani ojo, “Ara tungani nyio ibuhare isi tonyi ara kito lo tungani nyio iricare isi inyi?
\q
\v 7 Ifik isi inyi lobo gaa fotiri lo malaikahin iticief isi inyi kwatun ko rima
\q
\v 8 Manyu ifik sangite fad fotiri lo kejuha Kunenge”. To fiha sangite pili iyo lanyuno nenge, oru lobo tohi lida Lobanga icio inyi olanyu. Oto hati ida ohoi kideu tungani olanyu lobo tohi.
\v 9 Ati kideu ohoi Yesu na lofihi lobo gaa fotiri lo malaikahin na jijia liticiefi to kwatun ko rima tonyio lodik inyi wei ojir to kisa lo Lobanga imang wei to cio pili.
\v 10 To kiyauno tee beciek iyo deyo, orumu ocam jimitan Lobanga na lofik sangite pili na manyu longoni sangite pili tonyio ojir icio monye lo lwaharu neicieng nyujon to rumuno kidak.
\v 11 Ara katinyujoni ko kuna litinyujoti fad kulo Lobito faji, tona ida riri iniefa Yesu to kilolongo icieng ojo recera.
\v 12 Ojo afa inyi, “Atulu cia nan karana nino ketemoni lo recera kunei to ketemoni lo lotubare awol cia nan woleco kulo maja isi”.
\p
\v 13 Ari manyu ojo, “Afik cia nan kigeno nei diho inyi”. Manyu ojo ari, “Nan ene, ko tee kuna lohicio Lobanga nan”.
\p
\v 14 Tona longonore tee kenite ko okoto, olotu inyi ongar rahun tungani ko icieng, ojir to wei nenge alanyu katehitani lo golun lo wei na lara sitan.
\v 15 Ojir alahu kuna lorumu otorahini ara opihin kulo bangun lo wei.
\v 16 Tonyio iyo dede, ida ara malaikahin olotu inyi lwaha ati lotataha kulo Abram.
\v 17 Tone tenya ofwonu itiririhini inyi ko recera kunenge to kikohin fad, ojir inyi olotu ara kadwarani lahitok na ibaya ko na ligenoro iyo tic nenge iyo Lobanga, manyu ojir inyi odumarore kipal lo cio.
\v 18 Tonyio lorumu afa inyi token kidak iyo laba, otum manyu inyi lwahuno kuna lolabati.
\c 3
\cl Kingutit 3
\p
\v 1 Tona recera kuna inyuji kuna lohingar kilolongo lo kai, itofik kibuha ningi iyo Yesu Jayo ko kadwarani lahitok na lohitulo ohoi.
\v 2 Igenoro afa inyi iyo kanyumunoni nenge iya na afa ligenorore Moses to kaji lo Lobanga.
\v 3 Orumuni Yesu ocam to rima na lilany Moses iya na locamare kafahani lo kaji to rima na lilany lo kaji token.
\v 4 Tonyio kajihit fad ongon kafahak kuneicieng ati Lobanga lifak sangite fad.
\v 5 Igenoro afa Moses iya karwaani lo kaji lo Lobanga fad otenya manyu tohi na mute lolotuno to kifwongi.
\v 6 Ati igenoro Kristo iya kito iyo kaji lo Lobanga. Manyu ohoi kaji nenge kolohiric golun lo taulo kuniyang ko ene kigeno lohipufare.
\v 7 Dong iya na lotenyare okorif na Inyu ojo, “Jija kalining ite
\q
\v 8 ogoro lo Lobanga ketigol taulo kuningi iya lafa litiyore ite to peha ningi lafa lohitemarihin ite to kuny.
\q
\v 9 Idi afa lohitemare munyiri nan na to karihin keek ongon odeuni tohi na latii nan.
\q
\v 10 Inyi licio afa nan alongojitare diho na kofiangiti, manyu alotu ajo, “Itiring taulo kuneicieng gerarita manyu ida icieng loyen kikohin kunei”.
\q
\v 11 Nan ko tenya to kilongo ajo, “Ida cia icieng orute iyo kiyoma nei”.
\p
\v 12 Iririati recera jimitan ida lobo to kiji ningi ongon ko tau na lida iruk manyu ogere to kikoi lo Lobanga na iwar.
\v 13 Ati itigoloto taulo kuningi ake ake faritin fad kolorihe ilolongoti lobo tik ojo “Ene far” keco lobo to kiji ningi oning kitinononga lo kipal.
\v 14 Lohifwonu ohoi ngara iyo Kristo kalohiwasihi ohoi woita many lohicungi lafa golun lo taulo lohingonore ketemoni.
\v 15 Iya na lotenyarihin ojo, “Enr far kalining ite ogoro nenge, keco taulo kuningi ogoli. Ketigol taulo kuningi iya na afa litiyore ite to peha”.
\p
\v 16 Oho ngai afa icieng kunu loning oto hati opeha? Ida re icieng kulafa cio fad liyauno Moses to kof lo Ijipt?
\v 17 Manyu ko ngai afa ilongo Lobanga to karihin keek ongon? Ida ko icieng kulafa lipal kulafa lokeroro to katwa lo kuny?
\v 18 Manyu akuni afa ibutia Lobanga ojo ida mute orutori kiyoma nenge kalida ara icieng kunafa loberu kiruk tenya nenge?
\v 19 Dong, kideu jimitan ida afa icieng orute kiyoma lo Lobanga to beruno kiruk.
\c 4
\cl Kingutit 4
\p
\v 1 Dong iya na lorihe ciha lo rutoro kiyoma nenge ongon ngatigeny, keco lobo tungani many orihe itiraban rutoro.
\v 2 Tonyio lohining manyu ohoi layomit na ijir ititimi iyo ohoi iya na afa loningore icieng ati odumuni na tenya loning icieng itikaji mejo tohi na loru faida tonyio kuna afa loning, ida imorahi ningo neicieng ko kiruk.
\v 3 Jijia ohoi kuna lohiruk lohirute iyo na kiyoma iya na lotenyare Lobanga ojo, “Tona nan ko kibutia to kilongo ajo, Ida cia icieng orute iyo kiyoma nei”. Ati ene tic lokeruni many to duho lo kof.
\v 4 Tonyio oteny inyi to faritin lobo faji ojo, “Manyu to far lo mietare iyoma Lobanga iyo tic nenge fad”.
\v 5 Manyu iyo ladi kingutit ketemoni ojo. “Ida cia icieng orute iyo kiyoma nei”.
\p
\v 6 Orihe ene tenya owoita jimitan orute cio kude na kiyoma manyu kude kuna afa lititimahini layomit na ijir iyo icieng ida orutori to kingis neicieng.
\v 7 Tona ofik Lobanga lobo far ake na lilolong ojo “Ene far” afa langun lokeru karihin beciek oteny ara diho David iya lafa lotenyare ketemoni ojo, “Ene far kalining ite ogoro nenge ketigol taulo kuningi”.
\p
\v 8 Tonyio, ngara licio afa Josua icieng kiyoma, ngida afa Lobanga otenya ari to lobo far.
\v 9 Orihe Sabit lo kiyoma lo cio kulo Lobanga ongon,
\v 10 tonyio tungani na lorutohi iyo kiyoma lo Lobanga, iyoma manyu inyi to tic nenge iya na afa liyomare Lobanga iyo nenge.
\v 11 Lara bo nga gingahinoti rutoro iyo na kiyoma ojir lobo tungani ida ouroro to kijifita kire lo peha neicieng.
\v 12 Tonyio owar tenya lo Lobanga irunga manyu. Oko ilany ngalem latubot na loko fajihit fad, otulo many iyo kora okorif ko tau kode lo koi ko itula, ongoto tenyi tenyi kulo kibuha lo tau.
\v 13 Oru lobo tohi to kof fad liduha to konyieha kulo Lobanga. Ongaja sangite fad manyu obotoho diho inyi na lojir ohoi kicio tenyi tenyi ko ticitici kuniyang fad.
\p
\v 14 Iya na lohingonore ohoi kadwarani Lahitok na lilany fad na lolo many kai, Yesu kito lo Lobanga, nganiefata dong ene kiruk lohitulu ohoi iyo inyi otoc.
\v 15 Tonyio ida ohoi kingon ko kadwarani na hitok na lida odeu mehino niyang ati kingon ohoi ko kadwarani na lolabi to kikohin pili iya ohoi ati ida ipal.
\v 16 Ingafi bo dong ketemoni lo seger lo Kisa to golun lo taulo ojir kirumu kibaya ko kisa na lohilwak ohoi iyo tihi kuna lohingonore wahun.
\c 5
\cl Kingutit 5
\p
\v 1 Kadwarak kunahitohi fad onyumunitati to kiji lo cio ofihi lo woitahino icieng iyo tenyitenyi pili kuna loite ngati lo Lobanga lo kicwara kiciorita ko kikumihin to kipal.
\v 2 Itiyo inyi to riejun iyo cio kuna ilunyiaha kuna logerarita tonyio igoro manyu inyi.
\v 3 Inyi licio kalicwara inyi kicorita ko ikumihin to kipalipali item re to kulo kipalipali kunenge icwarare hati mangu to kipalipali kulo cio.
\v 4 Oru lobo tungani lonyumoro ake rahun kadwarani, ara Lobanga lilolongo inyi iya na afa lilolongunore Aaron.
\v 5 Tona kikoi bito, ida manyu afa Kristo odumu kwatun lo rahun kadwarani lahitok ake. Ati ojo Lobanga diho inyi, “Ira isi kito nei ene far lara nan Apa nino”
\p
\v 6 Ojo manyu to lobo faji, “Ira isi kadwarani tur Iyo osapane lo Melkisedek
\p
\v 7 To faritin kulafa longonore Yesu ene kof, ifotohi afa inyi kilifi ko kilelia ko kicira to ogoro na ikwat ko kifi kulo konyeha diho inyi lafa lotum lwahuno inyi iyo wei manyu oningi inyi to riejun ko ningoro nenge.
\v 8 Kileng lara inyi kito lo Lobanga olotu inyi oyen ningoro to kidak na lorumahi inyi
\v 9 9 manyu langun litinyuji inyi olotu inyi ara kacwarani lo lwaha na isio iyo cio pili kuna loningo inyi
\v 10 manyu onyumu Lobanga inyi lo rahun kadwarani lahitok iyo osapane lo Melkisedek.
\p
\v 11 Oborengi tenyi tenyi kuna ngohitenya iyo kuno sangite ati ogol kititima nenge tonyio likaruha ite ningo tenyi tenyi kuniyang.
\v 12 Dede tonyio kileng orumu jii ite lira katiyenak orihe ite iwak jimitan kitiyeni ite to tenyi tenyi kulo lohiciahi lo tenya lo Lobanga ari. Orihe ite iwak lei ida ara daha na igol.
\v 13 Tungani na lowar to lei orihe ara kito na sidi orihe ida otum yenun kitiyena iyo kikoi lo biran.
\v 14 Ati itongo daha na igol ara lo cio kuna igoli kuna to kitiyena lo tik tik lotumit kora na ijir iyo na irohoi.
\c 6
\cl Kingutit 6
\p
\v 1 Tojijia dong lara ngangohiti kitiyenita kulo lohiciahi to ken lo Kristo kifwo ketemoni iyo obolore ida jirihe kifeta guri kulo kirwa lo kipal kuna liyaru cio iyo wei ko lo kiruk Lobanga,
\v 2 kitiyena to kibatisa, fiha lo kac kweci, kibuhuno lo kaweyak ko ngoto lo tenya lo lohicungi.
\v 3 Manyu kaliruk Lobanga kitii cia jii.
\v 4 Ida otanga iyo cio kulafa loyen kof, kuna limang kicwara lo kai, kuna longer iyo Okorif na Inyu,
\v 5 kuna limang jiran lo tenya lo Lobanga ko golun lo kof na mute lolotuno kolo uroroti lo kinyiahuno iyo kirwo tonyio inyiahahino icieng guro kito lo Lobanga iyo kuruce kicwara inyi riri ari kiji lo cio.
\v 6 Kof na lomata kifi kulo kuju kuna locaa na litidora daha diho cio kuna loremo inyi, orumu gum iyo Lobanga.
\v 7 Kof na lomata kifi kulo kuju kuna locaa na litidora daha diho cio kuna loremo inyi, orumu gum iyo Lobanga.
\v 8 Ati kof na litibuja kikwa ko turlele oru faida manyu otumiti kificoro, lohicungi nenge kima loremo inyi.
\p
\v 9 Kileng ngohitenya jii morot, kigeno ohoi sangite kuna ijiri tote, sangite kuna lilihita ko lwaharu.
\v 10 Ida Lobanga itibahasa ngoto lo tenya, ida cia inyi olulworo ticitici kuningi ko kimaruno na litotor ite iyo inyi iya na lilwahare ite cio kunenge manyu orihe isodoro lwaha icieng.
\v 11 Kiwak ohoi ite tolobito tolobito isodoro kitotoro ene kiringa many lohicungi lo kitigolo kigeno ningi.
\v 12 Ida ohoi kiwak ite ifwonu ikaruha ati lo kitetema kuna lorumu tohi lafa locik Lobanga to kiruk ko kidonyo lo taulo.
\p
\v 13 Afa kalico Lobanga ciharu nenge iyo Abram to rujon lo lobo tungani lobolo ogal inyi na ngibutiare inyi, ibutia inyi to ken nenge
\v 14 ojo, “Ahicio cia nan isi gum manyu ahicio lotataha kuna iborengi”.
\v 15 Dong langun litil Abram tek tek to kidonyo lo tau, lolotu orumu tohi na locik Lobanga.
\v 16 Ibutiita cio to tungani na lobolo ilany icieng oto na kibutia itigol tenya na lotenyi manyu iticung peha fad.
\v 17 Tonyio owak Lobanga kitotoruno kire nenge na lida ibelo otoc iyo kalunyok kulo na ciha olotu itigol na ciha to kibutia.
\v 18 Itii Lobanga jii ojir to sangite are kuna lida ibelo na lida Lobanga itweru talerun ojir ohoi kuna lohifeju diho inyi to kigeno kitigoli taulo.
\v 19 Kitehita ohoi ene kigeno ara kigingi lo taulo na igol na lida otutuk. Orute many kudule lo katwa korwong lo kyela kikorit.
\v 20 Faji na lorute Yesu lafa lolo ketemoni niyang tohoi. Lara inyi kadwarani lahitok tur to osapane lo dwarun loMelkisedek.
\c 7
\cl Kingutit 7
\p
\v 1 Ara afa ene Melkisedek kabu lo Salem manyu kadwarani lo Lobanga na longon kai tur. Iric inyi ko Abram loituno to lanyuno kunu kabuno ko kigatahino inyi gum
\v 2 manyu Abram ko kicwara inyi Lobito iyo tomon kulo sangite fad. Ketemoni ojo fotiri lo karana nenge “Kabu lo biran” manyu kabu lo Salem ara jimitan “Kabu lo kisiliban”.
\v 3 Na loru ko monye kode ngotenge, oru ko tifo lo loreunore, na loru ko lohiciahi lo karihin kunenge kode lohicungi lo warun nenge, iya kito lo Lobanga ara inyi kadwarani tur.
\p
\v 4 Ibuhata ba bolorun lo Melkisedek kileng lohitwok Abram licio dihonyi Lobito lo tomon kulo sangite kuna lobeluni fad.
\v 5 Naha ojo cik ojir lotataha kulo Levi kuna lara kadwarak itutuba Lobito lo tomon iyo cio kuna lara recera kuneicieng kileng lara recera kuneicieng lotataha kulo Abram.
\v 6 Otohati ene tungani ida otifori loreunore nenge iyo Levi oto hati odumu Lobito lo tomon nenge iyo Abram manyu igatahi gum diho inyi na liciori ciharu.
\v 7 Manyu iya na longonitare ara tungani na sidi igatahinoti gum.
\v 8 Iyo koditi na longon ara cio kuna loweyaru litutuba Lobito lo tomon ati tone tenya ara tungani na lowar tur inyi losofu Lobito lo tomon.
\v 9 Otum manyu tungani jimitan Levi na litisofo Lobito lo tomon, losofohui ara iyo Abram,
\v 10 tonyio lafar liricore Melkisedek ko Abram orumu Levi orihe ongon ken lo fafai nenge.
\p
\v 11 Ngara orumuno biran ara diho kadwarak kuna lara kulo imanit lo Levi, (tonyio ara ara diho icieng iciori cik) nyio hati manyu afa okodomorihin ojo ojir lobo kadwarani ake olotu na lara lo osapane lo Melkisedek ida ara lo agwala lo Aaron?
\v 12 Kolongon kibelo iyo dwarun inyi jimitan ojir manyu cik ibelo.
\v 13 Inyi na lotenyarihin kuno sangite ara lo lobo imanit ake manyu oru afa lobo tungani tona imanit afa litii iyo ciali lo ikumiti.
\v 14 Tonyio oboto jimitan oreu Lahitok niyang to imanit lo Juda manyu oru lobo tohi loteny Moses iyo na imanit to tenya lo dwarun.
\v 15 Manyu otia tenya na lohitenya ohoi koloboto lobo kadwarani lori ko Melkisedek
\v 16 na lolotu ara kadwarani ida ijifita cik lo loreunore nenge ati to golun lo warun na lida otumiti kipalaru.
\v 17 Tonyio otenyi ojo, “Ira isi kadwarani tur iyo osapane lo Melkisedek”.
\p
\v 18 Litingadari lafa cik tonyio oru faida.
\v 19 Tonyio ida cik itinyu lobo tohi manyu liyauni kigeno ngejuk na ngohinyihunore ohoi diho Lobanga.
\v 20 Manyu olotu ene to kibutia ida kulakude ibutia lo rahun kadwarak,
\v 21 ati olotu inyi ara kadwarani to kibutia tonyio ojo Lobanga diho inyi, “Libutia Lahitok manyu ida cia ibel kibuha nenge ira isi kadwarani tur”.
\p
\v 22 Tone kibutia lolotu Yesu ara kitiniefi lo ciharu ngejuk.
\v 23 Jijia orumu oboreng kuno kadwarak tona lida wei iruhore icieng osodoro ketemoni ko tic neicieng.
\v 24 ati tonyio owar Yesu tur ongonore inyi dwarun lo tur.
\v 25 Tona itweru inyi lwahuno cio kuna lofwonu iyo Lobanga ara diho inyi tur tonyio owar inyi ilelia to icieng.
\v 26 Otum bo kadwarani na lori jii keruno wahun niyang, kadwarani na inyu, na loru ko lobo tenya irohoi lo tenyati ken nenge, na lotumohino manyu igelari oleng to kiji lo kapalak, na lotingi kai bebe.
\v 27 Ida inyi ori iya kadwarak kuna kude kuna liyaunita kikumi ko kicorita tik tik item re icio to kipalipali kunenge odumunore hati to kulo cio. Odumu inyi kikumi nenge to cio kunenge kakeny Lobito hilong na licwarare inyi ken nenge.
\v 28 Tonyio oduma cik kadwarak kuna lara cio kuna igoroho ati kibutia na lolotu to kifwongi lo cik, odumu kito na litinyuji tur.
\c 8
\cl Kingutit 8
\p
\v 1 Tenya na longon inyi ene; Kingon ohoi ko kadwarani Lahitok na litongohino kana iteten lo seger lo obolore lo kai
\v 2 Manyu irwaa inyi kirwaa nenge lohitongore na inyu iyo kema lo dede na longon kai noon a likukum Lobanga ida ara na likukumi to kac kulo cio.
\v 3 Kadwarak fad onyumuni lo kicwara kicorita ko kikumita manyu ocam orumu iyo ene lo kicwara tohi.
\v 4 Ngara ongon inyi kof ngida ara kadwarani tonyio longoni cio kadwarak kuna litiyo na tic iya na ligerorihin iyo cik.
\v 5 Itiyo icieng iyo kema na litiririorihin na lara lo dede na longon kai. Na tenya afa lociharihin Moses inyi na langun lowak inyi kifaha kema ojo Lobanga diho inyi, “Naha itiyo sangite fad iya nu kitotorita lideu isi to kai lo donge”.
\v 6 Ati obolo tic na lorumu Yesu ilany neicieng iya na lilanyare cik na litiyomo inyi ilany lafa ongore, manyu owata iyo ciharu na lojir ilany.
\v 7 Ngara oru afa lobotohi irohoi iyo nu ciharu afa ongore, ngida manyu otahitati lobo ake.
\v 8 Ati orumu Lobanga kipal iyo cio inyi licio ojo, “Olotuno far, lahitok loteny Na lafihare cia nan ciharu ngejuk ko Kaji lo Israel ko Kaji lo Judea.
\q
\v 9 Ida cia ori ko lafa ciharu latii nan ko fafaicio kuneicieng lafar laniefare nan icieng to kana lo rihuno icieng oleng to Ijipt tonyio ida afa icieng oric ciharu nei nan ko kibeloro oleng iyo icieng Lahitok loteny
\q
\v 10 Ciharu na cia lafik nan ko kaji lo Israel langun loru na far. Lahitok loteny afik cia nan cik nei iyo kibuha neicieng manyu agerihi taulo kuneicieng ara mute nan Lobanga neicieng manyu ara mute icieng cio kunei.
\q
\v 11 Ida mute tungani orihe itiyen loriehat nenge kode tungani ojo iyo rece, toyen Lobanga tonyio kiyen mute icieng nan fad manyu iyo nasidi lo kiji neicieng many iyo lahitok na lilany.
\q
\v 12 Tonyio alau mute nan rohojun neicieng manyu ida mute nan arihe aiu kipal neicieng ari”.
\p
\v 13 To kilolongo ene ciharu “ngejuk” irumu dong inyi litirak lafa lo ketemoni ongore na loring faritin kunenge. Manyu tohi na lara ongore loring karihin kunenge, lorijoro.
\c 9
\cl Kingutit 9
\p
\v 1 Ongon afa lafa ciharu ko cihicihi kuna liworarihin Lobanga manyu ko faji na inyu na longon ene kof.
\v 2 Ongon afa kema na logurohini. Iyo faji ketemoni ongon afa lomo, meja ko mugati na lofihi ketemoni lo Lobanga ilolongoti afa na faji ojo faji na inyu.
\v 3 Kifwongi lo kyela kitihi ilolongoti ojo faji na inyu noo,
\v 4 na longon ko ciali lo iheru na likukumi to dab ko Sanduk lo ciharu na manyu likukumi to dab. Sangite kuna longoni katwa lone sanduk orumu ara abinu na longon mana katwa ko iluk lo Aaron lafa loturo katurahak ko morutok kuna itadaha afa ligero cik.
\v 5 Kai lona Sanduk orumu ongoni Kerubihin kulo deyo kuna limuho seger lo kisa to fuho kuneicieng. Ati ida ohoi kititima kuno sangite to omot fad.
\v 6 Kalikukumahino sangite fad iya na, orutorita kadwarak ene faji ketemoni tik tik kitiyo tic neicieng.
\v 7 Ati ara kawarani lahitok ake lorutorita kudule kakeny Lobito iyo kari irumu otehita okoto to ilebu na licwara inyi to ken nenge ko to kipali pali kulo cio kuna litii icieng kileng ngida oyeniti.
\v 8 Itotoro afa Okorif na Inyu tone jimitan orihe kikoi lo rutoro iyo faji na inyu noo ida longaja kolorihe ene kema longon ene kof owoita.
\v 9 Ara orumu ene kitotorita lo kuno faritin na litotoro jimitan kiciorita ko kikumihin kuna licwarati orumu ida itweru kilala tau lo kaworani.
\v 10 Ara afa icieng dahidahi ko imatiti keken ko kilalilali kulo itidwar cihi cihi kulo ken to oleng orumu itiyo many ofwonunore sangite ngejuho.
\p
\v 11 Kololotu Kristo ara Kadwarani lahitok lo kuno sangite jijia longoni, orute inyi ara iyo kema na inyu ilany na lida ara cio lifak jimitan na lida ara sangite kuna loduhi.
\v 12 Ida afa inyi orute to okoto kulo riri kode kulo kacau ati orute inyi faji na inyu noo kakeny Lobito keken rief, to okoto nenge to ken orumunore inyi lwaha lo tur to cio.
\v 13 Okoto lo kiriri ko mongi ko ingula lo kace botor na lirurwoti iyo cio kuna lida onyuji itinyujo cio to oleng keken.
\v 14 Aja hati cia okoto lo Kristo na licio to okorif na losio turn a licwarare inyi ken nenge ne loru ko kipal iyo Lobanga aja cia ilal taulo kuniyang iyo ticitici kuna lohiyaru ohoi iyo wei kibel ohoi ara cio kuna inyuji kuna lirwaa Lobanga na iwar.
\v 15 Tone tenya ara Kristo katiyomoni lo ciharu ngejuk ojir cio kuna lilolonguni orumu ciha lo ilunyiti kuna lida oru, iya na lowei inyi ara kitobita lo laha icieng iyo kipali pali kuna litii iyo ciharu ongore.
\v 16 Kolongon ciharu lo lunyo lo sangite owak re jimitan ojir kakukumani lona ciharu re owei
\v 17 tonyio itiyo ciharu lo lunyo kolowei tungani ida itiyo oru okoto.
\v 18 lunyo kolowei tungani ida itiyo oru okoto.
\v 19 Langun lorihohi Moses cio tenyi tenyi kulo cik fad, oto ko dumuno okoto lo kacau, ko kifi kyela lo fofi kulo kern a ido ko lohoyo ko rwaca buk ko cio fad.
\v 20 Ojo inyi iyo cio, ara ene okoto lo ciharu na locik Lobanga ojo ojir ite iric".
\v 21 Tona kikoi bito bito orwac inyi kema ko sangite pili kuna litiyorihin iyo kiwora.
\v 22 Owak cik jimitan ojir sangite pili itinyuji to okoto manyu kalida itiijuni okoto oru launo.
\p
\v 23 Orumu ocam to kitiririta lo sangite kulo kai to kitinyujo to okoto lo kuna kikumihin, ati sangite kulo kai to kenite ojir itinyuji to kikumi na lilany kuno.
\v 24 Tinyio ida afa Kristo orute iyo kema na likukum cio na orumu lara kitiririta lo na lara dede, orute afa inyi kai to ken lo loro to ohoi ketemoni lo Lobanga.
\v 25 Ida afa inyi orute kai kicwara ken nenge ari ko ari iya na inyu noo to karihin fad ko okoto na lida ara nenge token.
\v 26 Ji dong Kristo orumu kidak kakeny beciek many to loduhore lo kof. Ati jijia oboto inyi kakeny Lobito lo rief to lohicungi lo karihin lo dumaru kipalipali to kicwara lo ken nenge.
\v 27 Iya na lociharihin tungani wei kakeny Lobito to kifwongi olorore iyo ngoto lo tenya,
\v 28 jihaha icio manyu afa Kristo ken nenge kakeny Lobito lo dumaru kipalipali kulo cio kuna iborengi, manyu olotu mute inyi lo kiti are ida ara lotuno tingo kipal ari ati lo kiyauno lwaharu iyo cio kuna litila inyi.
\c 10
\cl Kingutit 10
\p
\v 1 Ara afa cik okorif lo sangite kuna ijiri kuna lofwonuno ida ara kenite. Tona tenya ida ara to kikumihin kuna lida icung kuna linyiahatati karihin ko karihin kuna lida otum kitinyujo kaworak kuna lofwonuno iyo Lobanga.
\v 2 Ngara otum kuna kikumihin kitinyujo ngida iticungi kicwara? Jii kaworak litinyuji kakeny Lobito rief ida orihe okodomoti kitinyujo iyo kipal.
\v 3 Ara afa kuna kikumita lo kitiiunita cio to kipal to karihin fad
\v 4 tonyio ida okoto lo mongi ko kiri itweru dumaru kipal.
\v 5 Tona kololotu afa Kristo ene kof, ojo, “Ida afa isi iwak kikumihin ko kicorita ati ikukumahi isi ken to nan.
\q
\v 6 Ida afa kikumihin ko kicorita kitikwama Isi.
\q
\v 7 Nan ko jimitan, nan ene-igero to nan iyo buk Lalotu nan kitiyo wahun nino O Lobanga”.
\p
\v 8 Ketemoni ojo inyi, “kikumihin ko kicorita, kicorita kuna locurati ko kicorita kulo kipal ida isi iwak manyu ida kitikwama isi Kileng lowak cik ojo ojir icori”
\v 9 Oto ko jimitan, “Nan ene alotu nan kitiyo wahun nino”. Itingade inyi ketemoni lo fihahino lo are.
\v 10 Manyu tona wahun lohitinyuji ohoi to kikuma lo ken lo Yesu Kristo na litii kakeny Lobito rief.
\v 11 Owoita kadwarani faritin fad kicwara inyi na kikumi bito tik tik na lida otum dumaru kipal.
\v 12 Ati kalicio ene kadwarani kikumi Lobito rief ko kitongohino ngati lo kana iteten lo Lobanga.
\v 13 Manyu tonu far itila inyi fiha lo merok kunenge ara kiteni lo kejuha kunenge,
\v 14 tonyio to kikumi Lobito litinyu inyi cio kuna lara kanyujok tur.
\v 15 Oteny manyu Okorif na Inyu saden iyo ohoi tone tenya. Ketemoni ojo,
\q
\v 16 “Ara ene ciharu na cia latii nan ko icieng, lo kifongi lo kuna faritin, Lahitok loteny. Afik cia nan cik nei taulo kuneicieng, manyu agerohi cia nan icieng iyo kibuha neicieng”.
\p
\v 17 Osodohi manyu ojo, “ida cia nan arihe abuhu kipalipali ko rohojun neicieng”.
\p
\v 18 Manyu faji na lolaunorihin kuno lida dong orihe owahiti lobo kikumita.
\p
\v 19 Tona recera iya na dong lohingon ko golun lo taulo lo rutoro faji na inyu noo to okoto lo Yesu,
\v 20 to kikoi ngejuk na iwar na longaja iyo ohoi ara kyela kikorit na lara ken nenge,
\v 21 manyu iya na lohingon ohoi ko kadwarani na hitok na lolanyu kaji lo Lobanga,
\v 22 ngaswolutu tang iyo Lobanga to taulo kulo dede manyu ko golun lo kiruk, ko taulo kuna lirurui lo kitinyujo ohoi iyo taulo kuna iboti ko kitinyujo kenite kuniyang to kilala to kifi kuna inyuji.
\v 23 Nganiefata kigeno na lohitehita ohoi otoc oru kikukuya tonyio igenoro inyi na locik ene tenya iyo ohoi.
\v 24 Manyu ngabuhati koditi na ngohisusuare kenite kuniyang iyo kimaruno ko ticitici kuna ijiri.
\v 25 Keco kingohi koditi to tubitita ara Lobito iya na larahare koditi lo kude ati ngatigoloti taulo kuniyang ake ake kisodorore iya ketemoni iya na lonyihunore far.
\p
\v 26 Kolorihe ohoi kipala ara lati ati lohirumu Yenun to tenya lo dede loru lobo kikumi lo kipal lorihe otong
\v 27 ati bangun lo ngoto lo tenya ko kima na iyarat na mute lokeru merok kulo Lobanga.
\v 28 Tungani afa na loberu kijifita cik lo Moses ifadari na loru ko kibaya to sadden lo cio are kode uni.
\v 29 Ori cia aja kidak lo cio kuna lonyonahi kito lo Lobanga kof to kejuha na litikaj okoto lo ciharu na litinyujo inyi na lomoro Okorif lo Kisa?
\v 30 Tonyio kiyen ohoi inyi lafa lojo, “Ara ilennei, adumahi cia nan”, ojo manyu, “Ongot mute Lahitok tenya lo cio kunenge.
\v 31 Ara tohi na irohoi noourohino iyo kac kulo Lobanga na iwar.
\p
\v 32 Ibuhata kulafa faritin ketemok langun lifotu ite wangun, lafa liwoitahinore ite idihare kidak.
\v 33 Tolobo kimori manyu kitigemi, tolobo iwoita ara Lobito ko cio kuna litigemati.
\v 34 Tonyio kinief afa kisa ite iyo cio kuna longoni mabus, manyu ifut ko kwama kileng lobelari sangite kuningi tonyio iyen ite tokenite kuningi ijo ingoni ite ko sangite kuna losio tur.
\v 35 Dong kebire golun lo taulo kuningi tonyio odumi mute rief.
\v 36 Owak ite idik kidak ojir langun litii ite wahun lo Lobanga ifwonu mute irumu tohi na locik inyi.
\q
\v 37 Tonyio to faritin kude kuting keken, “Inyi nu lolotuno, olotu cia, manyu ida irungo,
\q
\v 38 Ati owar cia kanyujoni nei to kiruk manyu kalingade inyi iya kifwongi, ida cia nan akwama inyi”.
\p
\v 39 Ati ida ohoi kira kangaditak kuna lokerunoti ati kuna liruk manyu olwahuni.
\c 11
\cl Kingutit 11
\p
\v 1 Ara kiruk liniefa tohi na lohigeno ohoi ko yenun jimitan kirumu cia tohi na lida kideya.
\v 2 Na tohi afa licio okwamarihin lohitwaha.
\v 3 To kiruk miyenare jimitan oduhohino afa kof to kirienga lo Lobanga ojir tohi na lohideya olotu iyo tohi na iru.
\p
\v 4 To kiruk lico Abel icio kicorita na ijir ilany lo Kain, to kiruk okwamati inyi ara tungani lo dini kalokwama Lobanga inyi to kicwara nenge. Manyu to kiruk otenya afa inyi kileng lowei.
\p
\v 5 To kiruk otingori afa Enok ara na iwar tone kof ida imang wei. Ida otumiti rumuno inyi tonyio orumu Lobanga lotinge inyi. Tonyio orihe ida lotingori inyi, orumu omajati inyi ara na litikwama Lobanga.
\v 6 Manyu koloru kiruk ida tungani otum kitikwama Lobanga, tonyio tungani na lolotuno iyo inyi ojir iruk jimitan ongon inyi manyu oduma cio kuna lotahita inyi to tau fad.
\p
\v 7 To kiruk licio Noa lafar kolosonyi inyi to tohi na lida oboto to bangun na inyu ifak tigol olwahunore cio kulo kaji nenge. To kiruk ongotohi inyi kof tenya manyu olotu ara kalunyoni lo biran na lolotu to kiruk.
\p
\v 8 To kiruk licio Abram na lilolongore Lobanga lo loro kof na mute loluny inyi, aning inyi olo kileng lida oyen faji na loloro inyi.
\v 9 To kiruk olotu inyi ofik kalenge iyo kof na locihi iya misiohoni iyo kof na lara ake omanya inyi katwa lo kema iya na lomanyare Aisak ko Jakob kuna lara kalunyok kulo na ciharu ara Lobito konyi.
\v 10 Tonyio orumu inyi odeya ketemoni iyo kang na loguro gurihin kunenge ogoli na lara Lobanga Kaduhoni nenge.
\v 11 To kiruk licio Abram kileng afa longoroyon bebe manyu ngorwani nenge Sara ikorif olotu ara monye tonyio igeno inyi tenya lo kacihani.
\v 12 Ati tone tungani bito na manyu lori mejo lowei ofwonu lotataha kuna iborengi iya kanger manyu kuna lida ikenuno iya singeti lo kutuk lo nam.
\p
\v 13 Orihe orumu kuno cio fad owari to kiruk kileng loweiha. Ida afa icieng ifotu sangite kuna locihi odeu icieng lolomaje ifotuni. Iruk many icieng jimitan kira icieng misiok tone kof.
\v 14 Cio kuna litotoro na koditi ara cio kuna lotahita kofa na lara neicieng.
\v 15 Ngara orihe icieng ibuha to kof na longerihi cieng jii orumuni tik lo itoro.
\v 16 Ati orumu icieng ibuha to kof lilany na lara kai. Tona ida riri inief Lobanga kalilolongo ojo Lobanga neicieng, tonyio likukumahi inyi kang to icieng.
\p
\v 17 To kiruk licio Abram lafar kolotemi inyi icio inyi Aisak ara kikumi. Inyi na lorumu ciha owak kipotoro kito nenge Lobito hilong
\v 18 Kileng loteny Lobanga ojo ara to Aisak ikeni lotataha kunenge.
\v 19 Ibuk Abram jimitan otum Lobanga kitibuhuno kaweyak manyu kolohitenya to oteb, lifotu inyi Aisak to kiji lo kaweyak.
\v 20 To kiruk igat Aisak Jakob ko Isau to warita kuneicieng to ketemoni.
\v 21 To kiruk licio Jakob langun loweyaru igatahi tee kulo Josep gum, iwor inyi Lobanga kologanga kai lo iluk nenge.
\v 22 To kiruk lico Josep oteny to johoro lo cio kulo Israel to kof lo Ijipt manyu ico icieng ciha to koi kunenge.
\p
\v 23 To kiruk iduk katomonok kulo Moses inyi to ofahin uni langun lotomonuni inyi tonyio odeu icieng jimitan ida inyi ara kito lobo arus ida icieng oningo ko tenya lo kabu lo Ijipt.
\v 24 To kiruk licio Moses langun lobolo oberu kilolongoro ojo kito lo kito lo Parao.
\v 25 Onyumu inyi jimitan ojir kitigemi ko cio kulo Lobanga ara Lobito ilany manya lo kitongo ko kwama katwa lo kipal to karihin kude kuting.
\v 26 Odumu inyi rumuno riri to lofere lo Kristo ara na lilany wel nenge bara lo kof lo Ijipt fad tonyio odeya afa inyi ketemoni iyo bahacic nenge.
\v 27 To kiruk owoju inyi to Ijipt ida kileng obang kilongo lo kabu odik inyi tonyio lodeu inyi na lida oboto.
\v 28 To kiruk oric inyi Paska ko kiruruo lo okoto ojir kafadani lo okangi ida otir tee okangi kulo Israel.
\p
\v 29 To kiruk orang cio nam na ido mejo olotitati to kof na itou ojo cio kulo Ijipt otem kitiyo jii odile nam icieng.
\v 30 To kiruk licio kiwata lo Jeriko ouroro langun lilor cio to faritin mietare.
\v 31 To kiruk licio mulayani Raab ba lifotu kasifak kulo Israel ida owei ko kuna kude cio kuna lida oningoho.
\p
\v 32 Nyio haba lobo tenya ngateny nan? Oru tik iyo nan lo tenya to Gidion, Barak, Samson, Jepta, David, Samuel ko kamocak
\v 33 kulafa lolanyu okabwehin, itii tenya lo ngoto lo tenya na ibir, manyu orumuni nu lohi afa locihi kuna ligienohi kutuhe kulo ngatunyo,
\v 34 itidunyi kiyarat lo kima manyu olanyuni ngalemo latuboti, kuna libelo kigoro neicieng ara golun manyu kuna lofwonu ogoli to rem olanyuni karemok kulo misiok.
\v 35 Lorumu ngorwo kaweyak kuneicieng itibuhuni ari to kiji lo kaweyak. Ofwonuni kude itigemi oberuni laharu ojir kirumunore kibuhuno na ijir ilany.
\v 36 Odik kude kijuita, ko lumo, orihe manyu kude otori to nyororohin ofihi mabus.
\v 37 Ocahi icieng to morutok, ogwahi kude are, ifadari kude to ngalemo latuboti, opararu kude iciefitati kyelani kulo kera ko kyelani kulo kiri, oparitati itigemati manyu isongarihin.
\v 38 Ida orumu kof ocam to icieng opararoti kunyi ko dongecio ko kunomo ko tulahin katwa lo kof.
\p
\v 39 Icieng fad lomaji to kiruk neicieng ati oru lobo to kiji neicieng lorumu lafa tohi locihi.
\v 40 LIkukumahi Lobanga lobo tohi ijir tohoi ojir icieng ara Lobito kohoi inyiha kitinyuji ko icieng ara Lobito.
\c 12
\cl Kingutit 12
\p
\v 1 Dong iya na liritare sadeni beciek ohoi, lara ngabirete sangite fad kuna litiguso ohoi ko kipal na litigogolunita ohoi deu deu ojir kife angwala lo kitilanya na longon ketemoni niyang.
\v 2 Ngatifik konyeha kuniyang ken lo Yesu kafirani ko katinyujoni lo kiruk niyang na afa lodik kuruce to kwama na longon ketemoni nenge itikaj ko riri nenge ko kitongohino ngati lo kana iteten lo Lobanga.
\v 3 Ibuhati tinyi na lodik omerohoje na hitok iyo cio kapalak ojir ite ida iniamaha manyu ida itidou taulo.
\p
\v 4 Iyo rem nenge ko kipal orihe ite ida ligoru many iyo kitiija lo okoto kuningi.
\v 5 Manyu liluluhi ite lafa tenya lo kitigolo lo taulo na lohisingarihin ite iya tee na lojo, “Kito nei ketitawak kisinga na lisingare Lahitol manyu ketime tau kalirienga inyi isi
\q
\v 6 tonyio isinga Lahitok cio kuna limaru inyi manyuitigema inyi kuna lonyumu inyi ara tee”.
\p
\v 7 Itodik kidak ara kisinga ongon Lobanga kitiraha ite ara tee. Tonyio, ani kito ida monye isinga?
\v 8 Kalida kisingati ite manyu isingati cio fad inyi jimitan ira ite tee kulo apila ida ara tee dede.
\v 9 Naha manyu kingoni ohoi fad ko monyeri kuniyang kuna lotomonu ohoi kuna lisinga ohoi manyu kirima ohoi icieng tona kisinga. Ojir dong kirima Apa lo Okorifi ko warita kuniyang aja!
\v 10 Kisinga monyeri kuniyang ohoi lobo gaa iya na lodeyare icieng ojir ati kisinga Lobanga ohoi ara lo jiran niyang ojir kingar nyujon nenge.
\v 11 Oru lobo kisinga lolem tona tik ome, ati to kifwongi olotu iyauno biran ko kisiliban iyo kuna litiyen inyi na kisinga.
\v 12 Tona itogoloto kac ko kunga kuningi kuna itutuhi.
\v 13 Itifetaiti kikoi lo kejuha kuningi ojir kangwalak ida itilanyuno ati orumuni furioro.
\p
\v 14 Itolem to golun ningi fad lo kitongo to kisiliban ko cio fad, manyu lo nyujon tonyio koloru nyujon oru tungani mute lodeu Lahitok.
\v 15 Iririati jimitan ojir lobo tungani ida ongotohi kisa lo Lobanga, manyu ojir kerda kuna idwari ida obu iyauno kidak manyu ipale cio beciek.
\v 16 Iririati jimitan ida lobo tungani ara kasomoni kode ida obang Lobanga iya Esau na litilote obolore nenge to daha Lobito keken lo rahun lahitok.
\v 17 Adi afa to kifwongi kalotahita inyi na gum lofwonuni oberuni inyi. Ida afa inyi otum kiyauno kibelo lo kibuha kileng afa lowak inyi gum to kifi kulo konyeha.
\p
\v 18 Ida ite ifwonu iyo donge na lotumiti tiro, na locura kima, iyo mutohun, lokimuyuk ko kiyoma nahitok,
\v 19 iyo kwatun lo ture kode iyo ogoro na lotenya tenyi tenyi kuna lojo kaningok keco kude tenyi tenyi orihe otenyati iyo icieng,
\v 20 tonyio ida icieng otum dihan tohi na locihi. Kileng ngara tyang lotir donge ojir ociahi to morutok,
\v 21 orumu deya nenge itibanga many ojo Moses, “Ahihirita nan to bangun”.
\v 22 Ati ifwonu ite donge lo Zaion, iyo Jerusalem lo kai, kang lo Lobanga na iwar. Ifwonu ite iyo malaikahin alifi ko alifi iyo tuba lo kwama.
\v 23 Iyo kanisa lo okang kuna ligero karaneco kai. Ifwonu ite iyo Lobanga kangotoni lo tenyi tenyi kulo cio fad, iyo okorif lo cio kuna ibiri kuna litinyuji.
\v 24 Iyo Yesu katiyomoni lo ciharu ngejuk ko iyo okoto na lirurui na lotenya tenya na ijir ilany okoto lo Abel.
\v 25 Itodeyati ha keco iberu inyi na lotenya. Kalida afa icieng kulafa losonyi to kof ofur, aja hati ciao hoi kuna lesonyi to kai kifuri?
\v 26 Tonu far afa itijijik ogoro nenge kof ati jijia ocik inyi ojo, “Ari atijijik cia nan ida ara kof keken ati ko kai”.
\v 27 Ene tenya lojo ‘ari’ itotoro dumaru lo tohi na lotum kitijijiho sangite kuna loduhi ojir sangite kuna lida otum kitijijiho iwasihi.
\v 28 Dong iya na lerumunore ohoi okabwe na lida itijijiho, lara ngatikwamati ko kiwora Lobanga to bangun ko rima
\v 29 tonyio ara Lobanga niyang kima na lokerunita.
\c 13
\cl Kingutit 13
\p
\v 1 Itosodoroti kimaruno kenite iya recera.
\v 2 Keluluhi kifotuno cio kuna lida iyen tonyio to kitiyo jii ifotu afa cio kude malaikahin ida oyeniti.
\v 3 Ibuhati to mabusi mejo itora ite ara Lobito ko icieng ko cio kuna litigemati mejo irumu ite kidak ara Lobito ko icieng.
\v 4 Ojir cio fad orima yema ko lagere lo kiyemi ojir orici onyu tonyio ongot mute Lobanga tenya lo cio kulo lomuna ko kasomok fad.
\v 5 Itoric kenite kuningi iyo kimaruno lo robia manyu imoriti to sangite kuna litehita ite tonyio ojo Lobanga, “Ida cia nan angerihi isi tur ida cia nan angohi isi”.
\p
\v 6 Dong kijo ohoi to golun lo taulo, “Lahitok kalwahani nei ida cia nan abang, itii cia tungani nyio iyo nan?”
\p
\v 7 Ibuhati kunahitoha kuningi kulafa lititima tenya lo Lobanga iyo ite, itode koditi lo manya neicieng manyu itetemati kiruk neicieng.
\v 8 Oriworo Yesu Kristo ngole ko jijia ko tik tik.
\v 9 Kecio kitibunyari to kitiyenita beciek. Ojir iyo taulo kuningi rumuno kitigolo to kisa ida ara to dahi dahi kulo itidwar, kuna lida ongon ko faida iyo kadahak kuneicieng.
\v 10 Kingon ohoi ko ciali na lida cio kuna litiyo faji na inyu ocam daha tijia.
\v 11 Iyarita kadwarani lahitok okoto kulo tyangi faji na inyu noo ara kikumita lo kipal ati ocuraritati kenite to oleng lo kema.
\v 12 Orumu manyu afa Yesu kidak to oleng lo kang hatwa lo kitinyujo cio to okoto nenge token.
\v 13 Ingafi bo dong iyo inyi oleng to katwa lo kang kiyuk riri lafa liyuk inyi.
\v 14 Dong ene ida ohoi kingon ko kang lo dihan ati kitahita ohoi kang na lolotuno.
\v 15 Ara iyo Yesu lara ngatiringati kicwara Lobanga kikumi lo maja ngak lo kutuhe kuna lotulo karana nenge.
\v 16 Manyu kelulworo kitiyo na ijir ko ngara sangite ko cio kulakude tonyio okwama Lobanga koditi lo kuna kicorita.
\v 17 Itoningoti kunahitoha kuningi manyu icwarata kenite iyo obolore neicieng. Kiriria icieng ite iya cio kuna mute licwara kingingija. Itoningoti icieng ojir tic neicieng ara kwama ida ara cuna tonyio ida cia na ara lo lobo faida iyo ite.
\p
\v 18 Ilifati tohoi, kiyen ohoi kijo owangi taulo kuniyang manyu kigeria manya manya na icam to kikohin fad.
\v 19 Alelia nan iyo ite to ken nei jimitan ilifati ojir kinyiahuni nan iyo ite deu.
\p
\v 20 Ingohi Lobanga lo kisiliban na to okoto lo ciharu na losio inyiahu Lahitok niyang Yesu na katibalani hitok to wei,
\v 21 kicio ite sangite fad kuna ijiri itiyore wahun nenge, manyu ingohi inyi itiyo iyo ohoi tohi na lojir diho inyi ara iyo Yesu Kristo na locam to deyo karihin ko karihin Amen.
\p
\v 22 Recera alelia nan jimitan itodik ene tenya lo kisinga nei tonyio ageru nan waraga na isuk iyo ite.
\v 23 Awak nan ite iyen jimitan lolahi rece niyang Timoti. Kololotu inyi deu kilihu cia nan konyi waja ite.
\p
\v 24 Itofonyohiti kulahitoha kuningi fad ko cio kulo Lobanga fad. Oculu cio kulo Itali fonyo neicieng iyo ite.
\p
\v 25 Kisa kingon ko ite pili.