See in Reader
69 lines
6.4 KiB
Plaintext
69 lines
6.4 KiB
Plaintext
\id TIT
|
|
\ide UTF-8
|
|
\h Tito
|
|
\toc1 Tito
|
|
\toc2 Tito
|
|
\toc3 tit
|
|
\mt Tito
|
|
\c 1
|
|
\cl Kingutit 1
|
|
\p
|
|
\v 1 Nan Paul Karwaani lo Lobanga ko jayo lo Yesu Kristo to kiruk lo cio kuna lonyumu Lobanga ko yenun lo tenya lo dede na liyaru cio iyo warun lo Lobanga,
|
|
\v 2 kiruk na lohiyen na lowotia iyo kigeno lo warun na losio tur na locik Kobanga na lida otaler manyu orihe lohiciahi lo tik
|
|
\v 3 manyu to tik na lonyumu inyi iyauno tenya nenge iyo wangun to kititima lo tenya nenge na lohiciori nan to tenya nenge lo Lobanga kalwahani niyang.
|
|
\p
|
|
\v 4 Diho Tito kito nei iyo kiruk na lohingar. Kisa ko kisiliban ongon diho isi na licwara Lobanga Apa niyang ko Kristo Yesu kalwahunoni niyang.
|
|
\p
|
|
\v 5 Tohi na licio nan ahingohi isi Kret inyi lo kitibira tohi na lorumu orihe ida oru ko nyumuno lohitwaha to kangite fad iya na lahirihohinore nan isi.
|
|
\v 6 Ojir lohitwok ara tungani na loru kolobo tenya irohoi to ken, manyu ara retoni lo ngorwani Lobito, tungani na lara tee kunenge karuhok ida ara kasilak ko kaberunok kisinga.
|
|
\v 7 Iya na licwararihin kaririani tic lo Lobanga ojir oru lobo tenya irohoi to ken nenge manyu ida itidara kode ida imaru kilongo deu deu, ida ara karumani, ida ingere, ida ara tungani katimumunani.
|
|
\v 8 Ilany, ojir inyi ara tungani na lifotunita cio kalenge, tungani na limaru tohi na ijir, na loric ken, na ibir, onyu manyu na lisinguno.
|
|
\v 9 Ojir ara tungani na linief tenya na ligenuno iya na litiyenarihin ojir itigolore taulo kulo cio kuna kude to kitiyena na igol manyu otum kitibuho kuna lopeha kitiyena lo tenya lo Lobanga.
|
|
\p
|
|
\v 10 Tonyio loborengi cio kuna loberu tenya lo dede, kuna lara katenyak keken ko katinonongak bebe nenge kulo ilulung lo kiliraru.
|
|
\v 11 Ojir itibuhi icieng tonyio ongoniti kipapala cio kulo kajihit kuna iborengi to kitiyena sangite kuna lida ocam to kitiyena ara lo rumunore robia kulo arus.
|
|
\v 12 Kileng lobo kamocani neicieng afa lojo, “Ara cio kulo Kret tik tik katalerok, kasasuok, kadilok kuna ikaruha”.
|
|
\v 13 Ara ene tenya dede. Tona irienga icieng firit ojir ofwonuni ogoli iyo kiruk.
|
|
\v 14 Oto cia ida oningoti odohohin kulo Judeahin kode cihi cihi kulo cio kuna loberu tenya lo dede.
|
|
\v 15 Diho kanyujok, onyuji sangite fad ati iyo cio kuna lipalaru manyu ida iruk, oru lobo tohi inyu. Iyo tenya lo dede kibuha neicieng ko taulo kuneicieng fad lipalaru.
|
|
\v 16 Otenyati ojo kiyen icieng Lobanga ati oberuni inyi to ticitici kuneicieng. Ara icieng cio kuna iboti, kuna loberu ningo tenya ko cio kuna lida ocam to lobotohi ijir.
|
|
\c 2
|
|
\cl Kingutit 2
|
|
\p
|
|
\v 1 Ojir isi itiyen tohi na liruhohino ko tenya na ibehi.
|
|
\v 2 Itiyena cio kuna loboroho ojir ara cio kuna loricaru ake, cio kuna locam to rima, kuna lolanyu taulo kuneicieng, kuna logoli iyo kiruk, iyo kimaruno ko iyo diha lo kidak.
|
|
\v 3 Tona kikoi bito itiyena ngorwo kuna hitoha ojir ongoniti ko rima iyo manya neicieng ida ara kaguliak, ida ara cio kuna lolulworoti ara opihin kulo mere ati ingohi tara katiyenak kulo tohi na ijir.
|
|
\v 4 Oto cia icieng itiyen ngorwo kuna sidiha kimaruno rei ko tee kuneicieng,
|
|
\v 5 lo rica kenite kuneicieng ko nyujon, ko kitiyo kangite kuneicieng, ojir ara kabayak, ojir manyu oningoti rei kuneicieng, ojir lobo tungani ida itikaj tenya lo Lobanga
|
|
\v 6 Iya na many ce torihohi rei kuna sidiha ojir orici kenite.
|
|
\v 7 Tara isi kitotorita lo sangite fad to kitiyo ticitici kuna ijiri. Iyo kitiyena nino itotoro golun ko kirunga
|
|
\v 8 ko koditi lo tenya na lida cio itikaj ojir cio kuna lohitipeha isi odahahi riri tonyio irumu oru lobo tohi irohoi na ngoteny icieng to ngati niyang.
|
|
\v 9 Itiyena opihin bangun kalanyunok kuneicieng iyo sangite fad, ojir otemi kitikwama icieng ida itirisati icieng
|
|
\v 10 manyu ida okokolunitati iyo icieng ati ojir itotori jimitan otumiti kigeno icieng tur ojir to kikohin fad icio kitiyena niyang to Lobanga kalwahani niyang ara tohi na lodamiti.
|
|
\v 11 Tonyio kisa lo Lobanga na liyauno lwaharu loboto iyo cio fad.
|
|
\v 12 Itiyena ohoi jimitan “Ida”iyo warun na loru Lobanga ko wahita kulo kof ko warun warun lo rica lo kenite, lo biran ko lo rima Lobanga iyo ene kof lohimanyare
|
|
\v 13 iya na lohitilare kigeno lo gum lotuno lo deyo lo Lobanga niyang ko kalwahani niyang Yesu Kristo
|
|
\v 14 na licio ken nenge tohoi lo lahuno ohoi iyo rohojun fad ko kitinyujo to ken nenge cio kuna lara kunenge, kuna lodam kitiyo tohi na ijir.
|
|
\p
|
|
\v 15 Sangite kuno kuna lojir isi itiyen. Isinga manyu irieng to twero fad.
|
|
\c 3
|
|
\cl Kingutit 3
|
|
\p
|
|
\v 1 Itiiunita cio jimitan ojir iciori kenite iyo obolore lo kalanyunok ojir oningoho manyu ojir ikukumahinoti kitiyo ticitici kuna ijiri
|
|
\v 2 ida oguli lobo tungani ida ongolofati, itongoti to kibaya, katotorok kulo rima diho cio fad faritin fad.
|
|
\v 3 Kidataruha many afa ohoi, cio kuna lida oningoho, kuna litinonongi manyu kira opihin kulo wahita fad ko ikwamiti kuna irohori. Kiwar afa ohoi to jiujon lo taulo ko liwa, kiberu cio manyu kiberu kenite kuniyang ake ake.
|
|
\v 4 Ati ojo jiran ko kimaruno lo Lobanga kalwahani niyang oboto,
|
|
\v 5 kilwahu inyi ohoi, ida ara to sangite kuna ibiri kuna lohitii ohoi ati ara to kibaya nenge. Kilwahu inyi ohoi to kilala lo otomone lo are ko kitingejuho to Okorif na Inyu,
|
|
\v 6 na lijuhohi inyi iyo ohoi to kimorot ara iyo Yesu Kristo kalwahani niyang
|
|
\v 7 ojir iya na lohitibiri ohoi to kisa nenge ojir kira kalanyok kuna lohingon ko kigeno lo warun na losio tur.
|
|
\v 8 Ara ene tenya na locam to kigeno. Manyu awak nan ite itif kuno sangite ojir kuna lofik kigeno iyo Lobanga orici kicwara kenite kitiyo tohi na ijir. Ara kuno sangite kuna ijiri noo manyu ongon ko faida iyo cio pili.
|
|
\v 9 Ati ingohiti risa lo dataru ko loreunorehin ko pepehita ko ngolofa to tenya lo cik tonyio ara kuno sangite kuna lida olwak lobo tungani manyu oru faida.
|
|
\v 10 Tosony tungani kakokorani lo cio kakeny Lobito manyu tosony inyi lo kitiare. To kifwongi lona kerihe itongo konyi.
|
|
\v 11 Ojir iyen jimitan logere koditi lona tungani manyu ipal manyu longotohi tenya kwe nenge ake ake.
|
|
\p
|
|
\v 12 Kalideu isi nan aculu Artemas kode Ticikas dihosi, ojir item to golun nino fad lotuno diho nan Nikopolis tonyio lafik nan tau nei lo kitongo ene furat ijia.
|
|
\v 13 Itiyo sangite pili kuna litum isi lo lwaha Zenas tungani lo cik ko Apolos iyo owele neicieng manyu tode jimitan ongon icieng ko sangite fad kuna lowak icieng.
|
|
\v 14 Ojir cio kuniyang oyen kicwara kenite kuneicieng kitiyo sangite kuna locam manyu kuna ijiri ojir icieng icio sangite kuna lowahiti tik tik ida omanyati manya na loru lobo tohi itiyoti.
|
|
\p
|
|
\v 15 Ofonyo cio kuna lohingon ko nan fad. Tofonyohi cio pili kuna lohimaru ohoi iyo kiruk Ingohi kisa kingon kosi.
|