See in Reader
112 lines
10 KiB
Plaintext
112 lines
10 KiB
Plaintext
\id 2TI
|
|
\ide UTF-8
|
|
\h 2 Timoti
|
|
\toc1 2 Timoti
|
|
\toc2 2 Timoti
|
|
\toc3 2ti
|
|
\mt 2 Timoti
|
|
\c 1
|
|
\cl Kingutit 1
|
|
\p
|
|
\v 1 Nan Paul jayo lo Kristo Yesu to wahun lo Lobanga na longon to ciharu lo warun na longon iyo Kristo Yesu.
|
|
\p
|
|
\v 2 Diho Timoti kito nein a lamaru noo, Ingohi kisa ko kibaya ko kisiliban iyo Lobanga Apa ko Kristo Yesu Lahitok niyang kingon kosi.
|
|
\p
|
|
\v 3 akwama nan Lobanga na larwa nan to tau na inyu karwe ko far iya lafa lirwaare monyeri kunei manyu abuhunita isi iyo kilifa nei.
|
|
\v 4 Iya na labuhunitare nan kifi kulo konyeha kunino ageria nan deya isi ojir kwama nei ifut.
|
|
\v 5 Lohitiiu nan ene tenya kiruk nino na lara lo dede nafa longon iyo tata nino Lois ko iyo iyang nino Yunis na layen nan otoc jimitan ongon manyu iyo isi.
|
|
\v 6 Tona tenya ahirihohi nan isi ikunya kicwara lo Lobanga na longon warun nino lafa lofihahinore kac kwe nino.
|
|
\v 7 Tonyio ida Lobanga kicio ohoi okorif lo bangun ati okorif lo golun, lo kimaruno ko rica lo ken
|
|
\v 8 Dong keco riri kiniefa isi to kicwara Saden to Lahitok niyang kode to nan mabusoni nenge. Ati kingar ko nan rumuno kidak to layomit na ijir to golun lo Lobanga.
|
|
\v 9 na lohilwahu ohoi manyu kelolongu iyo warun na inyu ida ara to lobo tohi lohitii ohoi ati to wahun nenge ko kisa nenge ake. Kiciori ohoi ene kisa to Kristo Yesu many orihe lohiciahi lo kof.
|
|
\v 10 ati litibotuni jijia to lotuno lo kalwahani niyang Kristo Yesu na lokeru wei tmanyu iyauno warun ko rujon lo wei ara iyo layomit na inyu.
|
|
\v 11 Manyu tone layomit inyu kinyumu nan lo rahun ifak, jayo ko katiyenani.
|
|
\v 12 Inyi na tenya na licio nan arumu kidak iya ene larumunore, oto hati ida riri kinyia nan tonyio ayen nan inyi na laruk nan manyu ageno jimitan otum cia inyi rica tohi na lacio nan kana nenge to nu far.
|
|
\v 13 Tohi na lining isi to kutuk nei toricahi ara kikoi lo kitiyena na ibir to kiruk ko kimaruno iyo Kristo Yesu.
|
|
\v 14 Toric kicwara lofirat lafa lofihi kana nino, toric inyi to golun lo Okorif na Inyu na longon katwa niyang.
|
|
\p
|
|
\v 15 Iyen isi jimitan cio pili kulo kof lo Asia lohingohini nan kokileng Paigelus ko Emogines.
|
|
\v 16 Ingohi Lobanga itotorohi kibaya iyo kaji lo Onesiporas tonyio kilwahitita inyi nan manyu ida riri onyia inyi to tora nei.
|
|
\v 17 Ilany kuna fad lafar kolongon inyi ene Roma kitak orumu inyi nan to kigingi many kirumu nan.
|
|
\v 18 Ingohi Lahitok icio inyi kibaya iyo Lobanga tonu far. Iyen isi otoc kikohin beciek kuna lohilwahare inyi nan to Epeso.
|
|
\c 2
|
|
\cl Kingutit 2
|
|
\p
|
|
\v 1 Isi ha kito nei togol iyo kisa na longon Kristo Yesu.
|
|
\v 2 manyu sangite kuna lining isi nan atenya to ketemoni lo sadeni beciek iciorihi diho cio kuna ligenoro kuna lotum manyu kitiyena cio kuna kude.
|
|
\v 3 Kidik kohoi kidak iya asegereni lo Kristo Yesu na ijir.
|
|
\v 4 Oru lobo tungani litiyo ara asegereni olo manyu orutohita iyo tenyi tenyi kulo cio kulo kanghatwa, itiyo inyi lo kitikwama lahitok nenge na lobolorohi inyi.
|
|
\v 5 Tona kikoi bito kalorutohi tungani iyo angwala lo kitilanyahino ida inyi otum rumuno tahi lo lanyuno kalida ijifita cihicihi kulo kifeita.
|
|
\v 6 Karungani iyo remo inyi manyu locam daha lo ketemoni na lodoru tona mana.
|
|
\v 7 Igigilo kuno tenyi tenyi latenya nan tonyio kicio ca Lahitok isi kiniang iyo kuno tenyi tenyi pili.
|
|
\v 8 Ibuha Yesu na libuhu to kiji lo kaweyak, na lara lotata lo David. Layomit na Ijir nei ene,
|
|
\v 9 Na larumunore nan kidak many kitori mejo kasasuoni. Ati ida tenya lo Lobanga otora.
|
|
\v 10 Kuno fad adik nan to cio kulo Lobanga kuna lonyumuni ojir manyu icieng orumu lwahuno na longon iyo Kristo Yesu ko deyo na losio tur.
|
|
\v 11 Ara ene tenya na locam to kigeno: Kolohiwei ohoi konyi Kiwar manyu mute ohoi konyi.
|
|
\q
|
|
\v 12 kolohidik ohoi kilanyu manyu mute ohoi ara Lobito konyi kolohiberu ohoi inyi kiberu manyu mute inyi ohoi.
|
|
\q
|
|
\v 13 kalida ohoi kiruk Iwasihi inyi kiruk tonyio ida inyi otum beruno ken nenge.
|
|
\p
|
|
\v 14 Tosodoro kitibuhunita icieng kuno sangite. Tosony icieng to ketemoni lo Lobanga icwara ingohini ngolofa to tenyi tenyi, oru faida nenge manyu ongon kipalaru kaningok.
|
|
\v 15 Itiyo na ijir lo kicwara ken nino iyo Lobanga iya tungani na lokwamati, katiyoni na lida riri iniefa manyu na lotenu tehita tenya lo dede.
|
|
\v 16 Ingohi tenyi tenyi kulo kiyada kuna lida itikwata Lobanga, tonyio cio kuna limaru koditi lo kuna iyaditi ongoniti kingadaru faritin fad to ketemoni lo Lobanga.
|
|
\v 17 Ilienyaru kitiyena neicieng iya sur. Kude kulo kuna cio icieng oho Yimenaus ko Piletus.
|
|
\v 18 kuna logere oleng to kikoi lo dede. Itiyenati cio ojimi lokeru kibuhuno kitiihino ko kipalaroti kiruk lo cio kude.
|
|
\v 19 Oto hati, owoita guri lo Lobanga ogol ting, na limadi tone kigero jimitan, “oyen Lahitok kuna lara kunenge”. Manyu, “cio pili kuna lotulo karana lo Lahitok ojir ongerihini rohojun”.
|
|
\v 20 Katwa lo kaji nahitok ongon sangite ida ara kuna likukuma to dab ko rial keken ati ongon manyu kuna logatuni to kete kode oduhuni to lokulufi, ara kude kulo ticitici kuna hitoha kude ara kulo ticitici kuna sidiha.
|
|
\v 21 Kalitinyu tungani ken nenge iyo ticitici kuna irohori, olotu cia inyi ara lo ticitici kuna igoli, irumu inyi lonyu manyu longon ko faida diho Lahitok manyu ikukumahino kitiyo kuna ijiri.
|
|
\v 22 Tongerihi ticitici kulo kipal kulo okilahaje manyu totak biran, kiruk, kimaruno ko kisiliban ara Lobito ko cio kuna lilolongo Lobanga to taulo kuna inyuji.
|
|
\v 23 Keruk rutohino iyo pepeita ko risa lo dataru tonyio iyaunita ngolofa.
|
|
\v 24 Manyu ida ngolofa ocam to karwaani lo Lobanga, ati ojir inyi ara kariejani iyo cio fad, otum kitiyena ida ilongo deu deu,
|
|
\v 25 tungani na lisinga cio kuna litipeha inyi to riejun to kigeno jimitan ngicio Lobanga icieng kirwo lo kiyauno icieng yenun tenya lo dede.
|
|
\v 26 manyu jimitan ngofwonu icieng iyo yenun ojir ofuriti iyo owic lo sitan na lofik icieng ara mabusi kulo kitiyo wahun nenge.
|
|
\c 3
|
|
\cl Kingutit 3
|
|
\p
|
|
\v 1 Ati toyen ene: jimitan ofwonu faritin kuna irohori iyo lohicungi.
|
|
\v 2 Itongo mute cio ara kamarunok kulo kenite kuneicieng, kamarunok kulo robia, katidarak, katikajak kulo cio kuna kude, kamorok, oberuni ko ningo katomonok kuneicieng, ida okwamati lobo tohi keken, oberuni nyujon,
|
|
\v 3 oru kimaruno, ida olaati kaletok, kaguliak, ida oriciti kenite, ingereha ida imaruni jiran,
|
|
\v 4 kalabak, kanuritak, kapufak, kamarunok kulo kwama ida imaruni Lobanga
|
|
\v 5 ongon ko dini ati oberuni golun nenge. Tokoraru oleng iyo cio kuna lori iya kuna.
|
|
\v 6 Icieng cio kuna lolaba rutoro kajihit ofwo olanyuni taulo kulo ngorwo kuna igoroho kuna locuna kipalipali kuna litilangita wahita kuna irohori.
|
|
\v 7 kuna lotahita yenun ati ida otumiti kiniang tenya lo dede.
|
|
\v 8 Iya na afa litipehare Jannes ko Jambres Moses, itipeha manyu kuno cio tenya lo dede ara icieng cio kuna lobahasa kweci kuna loberuni kalara to tenya lo kiruk.
|
|
\v 9 Ati ida cia icieng osodoro tek tek tonyio oboto mute na dataru neicieng iya lo kunu afa cio are litipeha Moses.
|
|
\v 10 Ati iyen isi kitiyena nei fad, koditi lo warun nei, wahun nei, kiruk, kidonyo lo tau, kimaruno, diha,
|
|
\v 11 kitigema, kidak, iyen isi koditi lo sangite kuna litiihino diho nan to Antiok, Ikonium ko Listra, kidak na ladik nan. Ati kilwahu Lobanga nan iyo icieng fad.
|
|
\v 12 Dede tungani na lowak warun lo Lobanga iyo Kristo Yesu orumu kitigema,
|
|
\v 13 Osodoro mute cio karohojak ko kafudak iyo tic neicieng lo rohojun, kitinononga cio, ko cio manyu itinononga icieng.
|
|
\v 14 Ati tosi, tosodoro iyo tohi na liyen isi manyu iniang otoc tonyio iyen isi cio kuna lohitiyen isi kuna tenyi tenyi,
|
|
\v 15 Manyu koditi na liyenare isi kigeriti kuna inyuji many to okisidi kuna lohicio isi igeny to lwaharu na lolotu to kiruk iyo Kristo Yesu.
|
|
\v 16 Kigeriti fad igeri to golun lo Okorif lo Lobanga manyu itiyo ara lo kitiyena, kirienga, kitibira ko kisinga iyo warun lo biran.
|
|
\v 17 ojir tungani lo Lobanga ifut ko sangite fad kulo ticitici kuna ijiri.
|
|
\c 4
|
|
\cl Kingutit 4
|
|
\p
|
|
\v 1 To ketemoni lo Lobanga ko lo Kristo Yesu na mute longoto tenya lo kawarak ko kaweyak ko to kodomo lo boto nenge ko okabwe nenge, ahicio nan isi ene ciha.
|
|
\v 2 Ititima tenya lo Lobanga, towoita katwa otoc iyo faritin kuna ijiri ko faritin kuna irohori, icwara cio iniang otoc itibira, irienga manyu itigolo taulo to kidonyo to tau nahitok ko kisinga to genyun.
|
|
\v 3 Tonyio olotuno tik na mute lida cio odihare tenya na ibehi. Ati lo kitiyo iya na lowahare icieng, itubuni mute katiyenak irit icieng lo rihohino icieng tohi na loifa kiyoha kuneicieng ningo.
|
|
\v 4 Ibele mute icieng kiyoha kuneicieng iyo tenya lo dede ibeloroti ningo odohohin.
|
|
\v 5 Ati isi toting kwe nino kai iyo tenyi tenyi fad, todik kidak itiyo tic lo katitimani lo tenya lo Lobanga itiyo ticitici kunino fad.
|
|
\v 6 Tonyio lohifworoti nan kifadaru iya kicorita na lijuhohini kai lo ciali lo kicoriti. Logoru faritin kunei kulo ngerihino ene kof.
|
|
\v 7 Larem nan rem na ijir, lakeru nan angwala lo kitilanya, laric nan kiruk.
|
|
\v 8 Jija ongon tahi lo biran na likumahini to nan na lohicio cia lahitok kangotoni lo tenya na ibehi nan ake ati diho cio pili kuna ligeria lotuno nenge.
|
|
\p
|
|
\v 9 Totem to golun nino fad lotuno diho nan deu deu
|
|
\v 10 Tonyio Demas to kimaruno nenge ene kof lohingohi nan olo iya Tesolonika. Lolo manyu Kresens iya Galatia ko Tito lolo iya Dalmatia.
|
|
\v 11 Lotong Luka lohingon ko nan ene. Torumu Mark ilihu konyi tonyio obolo lwaha nenge iyo nan to tic nei.
|
|
\v 12 Lacule nan Tisikas iya Epeso.
|
|
\v 13 Kalilotuno, toyoruno kyela lafa langohi nan diho Karpus idi troas ko buhi kunei bebe nenge kuna lara kiyenehin.
|
|
\v 14 Alexanda kadongoni lo mwala kitii diho nan tic na irohoi, odum mute Lobanga inyi tona tic nenge.
|
|
\v 15 Ojir manyu isi iric ken diho inyi tonyio itipeha inyi tenya niyang bebe.
|
|
\v 16 Iyo kifura nei ketemoni oru afa lobo tungani lohiwoitahino nan ati kingerihi cio fad nan. Keco lahitok ikenahi ene tenya kweci kuneicieng.
|
|
\v 17 Ati owoita Lahitok ko nan manyu kicio nan golun ojir ara diho nan ititimi tenya ifut ojir Misiok fad oning. Manyu kilwahuni nan to kutuk lo ngatuny.
|
|
\v 18 Kilwahu cia Lahitok nan iyo jorena kuna irohori manyu kiyauno ci nan ara na ijir iyo okabwe nenge lo kai. Ingohi kwatun ko Deyo ongon diho inyi karihin ko karihin Amen.
|
|
\p
|
|
\v 19 Tofonyohi Priscila ko Akuila ko cio kulo kolo Onesiporas.
|
|
\v 20 Otong Erastus Korint manyu angohi nan Trapimos omwai Miletus.
|
|
\v 21 Totem goruno ene orihe furat. Kifonyo Eusbulus isi, ko Pudens, Lino, Kalaudia ko recera fad.
|
|
\p
|
|
\v 22 Ingohi Lahitok tongon ko Okorif nino. Kisa kingon kosi.
|