See in Reader
151 lines
14 KiB
Plaintext
151 lines
14 KiB
Plaintext
\id 1TI
|
|
\ide UTF-8
|
|
\h 1 Timoti
|
|
\toc1 1 Timoti
|
|
\toc2 1 Timoti
|
|
\toc3 1ti
|
|
\mt 1 Timoti
|
|
\c 1
|
|
\cl Kingutit 1
|
|
\p
|
|
\v 1 Nan Paul jayo lo Kristo Yesu to cuha lo Lobanga kalwahani niyang ko Kristo Yesu kigeno niyang.
|
|
\p
|
|
\v 2 Diho Timoti kito nei lo dede iyo kiruk. Kisa, kibaya ko kisiliban iyo isi diho Lobanga Apa ko Kristo Yesu Lahitok niyang.
|
|
\p
|
|
\v 3 Iya lafar lahicihare nan isi lalorore nan Masedonia itongo inyia Epeso ojir irihohi kude cio ida itiyenati tenya lo talerun
|
|
\v 4 kode kicwara kenite foro odohohin ko loreunorehin kuna lida icung. Iyauno kuna peha ida itiboloro tic lo Lobanga na lara to kiruk.
|
|
\v 5 Ara tohi na lobolo tone tenya kimaruno na lolotu iyo tau na inyu ko kibuha na ijir ko kiruk na lara lo dede.
|
|
\v 6 Lisabe kude iyo kuno sangite lofwori foro tenyi tenyi kuna lida otumohino.
|
|
\v 7 Owahiti rahun katiyenak kunlo cik ati ida oyeniti tohi na lotenya icieng kode tohi na lotenya icieng to golun lo kweci.
|
|
\v 8 Kiyen ohoi jimitan ojir cik kalitiyore tungani otoc.
|
|
\v 9 Kiyen manyu ohoi kijo ida cik ara to cio kuna ijiri ati to kagilak kulo cik, katiremok, cio kuna lida owak Lobanga, kapalak, cio kuna lida onyuji, cio kuna loru ko dini, to cio kuna lifada monyeri ko ngotengeri, to kasasuok
|
|
\v 10 to cio kulo lomuna, kayiak, cio katilotok kulo cio kulakude ko katalerok ko cio kuna litiyo ticitici kuna lokoraru
|
|
\v 11 ko kitiyena na ibir na lara layomit na ijir lo Loabanga lo deyo na lohicio nan.
|
|
\p
|
|
\v 12 Akwama nan Kristo Yesu Lahitok niyang na lohicio nan golun, na lodeu kiruk nei manyu kinyumu nan kirwaa inyi.
|
|
\v 13 Kileng afa lara nan kamoroni lo Lobanga ko katigemani ko kasasuoni olotu kitotorohi nan kibaya tonyio atiyo afa nan to lunya ko rujon lo kiruk.
|
|
\v 14 Kijuhohini nan kisa lo Lahitok niyang rief ara Lobito ko kiruk ko kimaruno na longon iyo Kristo Yesu.
|
|
\v 15 Tenya ene na locam to ningo otoc ojo olotu Kristo Yesu kof lwaha kapalak na lara nan lalany fad.
|
|
\v 16 Ati tona tenya bito, kitotorohini nan kibaya ojir to nan kapalani na lalany fad, itotoru Kristo Yesu kidonyo lo tau nenge ara kitotorita iyo cio kuna liruk iyo inyi ojir orumu warun na losio tur.
|
|
\v 17 Jijia diho Kabu na losio na lida owei, na lida oboto, Lobanga Lobito hilong, ingohi rima, kwatun ko deyo tongon karihin ko karihin Amen.
|
|
\p
|
|
\v 18 Timoti kito nei ahicio nan isi ene kisinga ara na lilihita ko imociti kulafa lotenyi tosi ojir to kijifita icieng irem rem na ijir,
|
|
\v 19 iniefita kiruk ko kibuha na ijir. Lingohi kude ene oto itiworori kiruk neicieng.
|
|
\v 20 Kiji neicieng ongon Aimeneus ko Aleksanda kuna lacio nan iyo sitan ojir itiyeni rohojun lo moro Lobanga.
|
|
\c 2
|
|
\cl Kingutit 2
|
|
\p
|
|
\v 1 Aciha nan jimitan ojir item kitifia, kilifa, kilelia ko kicwara kwama ojir itiyoti to cio pili,
|
|
\v 2 to kabuno ko kalanyunok fad lo jimitan ojir ohoi kitongo to kisiliban ko riejun iyo bangun lo Lobanga ko nyujon.
|
|
\v 3 Ojir ene manyu itikwama Lobanga kalwahani niyang.
|
|
\v 4 na lowak ojo ojir cio fad oolwahuno manyu ofwonu iyo yenun to tenya lo dede.
|
|
\v 5 Tonyio ara Lobanga Lobito manyu ongon katiyomoni Lobito kiji lo Lobanga ko cio inyi Kristo Yesu.
|
|
\v 6 na licio ken nenge ara kitilahita lo cio fad saden na liciori to tik na ibehi.
|
|
\v 7 Manyu tone tenya kidumuni nan lo rahun ifak ko jayo. Atenya nan tenya lo dede, ida nan ataler manyu ara nan katiyenani lo tenya lo kiruk lo dede iyo misiok.
|
|
\p
|
|
\v 8 Awak nan cio to fajihit fad ojir otingi kac kuna inyuji iyo kilifa na loru kilongo ko risa.
|
|
\v 9 Awak manyu nan ngorwo iciefita otoc to rima ko rica lo kenite ida ara to kikada lo kweci kode to dab ko tongosi kuna imedehi ko kyelani kuna igoli wel,
|
|
\v 10 ati to ticitici kuna ijiri kuna locam to ngorwo kuna liwora Lobanga.
|
|
\v 11 Ojir ngorwo oningo lobubuhe to riejun.
|
|
\v 12 Ida nan aruk ngorwani itiyena kode lo bolorohino retoni, ojir inyi obuho
|
|
\v 13 Tonyio itemi afa oduhuni Adam ida ara Eva.
|
|
\v 14 Manyu ida afa ara Adam itinonongi ara afa ngorwani itinonongi olotu ara kapalani.
|
|
\v 15 Ati olwahuni mute ngorwo to tomonuno tee kolosodoro icieng ko kiruk, kimaruno ko biran.
|
|
\c 3
|
|
\cl Kingutit 3
|
|
\p
|
|
\v 1 Ara ene tenya na locam to kigeno, kolowak tungani rahun kaririani, owak inyi tic na ijir.
|
|
\v 2 Ojir ha kaririani ida ara tungani na longon lobo tenya ken, retoni lo ngorwani Lobito, tungani na irie, na loric ken nenge, na liworati, na lifotunita welo, manyu na lotum kitiyena.
|
|
\v 3 Na lida oruma na lida ingere ati orie ida ongolofa ida imaru robia
|
|
\v 4 Ojir manyu oric kalenge otoc manyu ojir tee kunenge oningo inyi to kiwora dot.
|
|
\v 5 Kalida tungani otum Rican kalenge aja ngoric inyi kanisa lo Lobanga?
|
|
\v 6 Onjir manyu ida ara tungani na lorihe ara ngejuk oto cia itidara ourohino iyo lafa ngoto lo tenya lourohinore sitan.
|
|
\v 7 Ojir manyu ongon ko karana na ijir iyo cio kulo kalele ojir ida ourohino iyo riri manyu iyo kume lo sitan.
|
|
\v 8 Kalwahak manyu ojir ara cio kuna locam to kiwora, cio kulo dede ida ara kamatak kulo mere bebe ida otahitati kitimumuna cio.
|
|
\v 9 Ojir oriciti tenya lo dede lo kiruk to taulo kuna inyuji.
|
|
\v 10 Ojir many re otemi icieng kolodeuni oru lobo tohi irohoi iyo warita kuneicieng ofihahinorihin icieng ara kalwahak.
|
|
\v 11 Iya na manyu ojir ngorwo kuneicieng ara ngorwo kuna locam lo kiwora ida ara kakutuhak manyu kamomodok ati orieji manyu igenoroti iyo sangite fad.
|
|
\v 12 Ojir kalwahani ara retoni lo ngorwani Lobito na manyu loric tee kunenge ko kalenge otoc.
|
|
\v 13 Cio kuna litii otoc orumu lowoitare na ijir manyu itigolo kiruk neicieng iyo Kristo Yesu.
|
|
\p
|
|
\v 14 kileng lawak nan lotuno diho ite deu agero nan kuno tenyi tenyi ojir
|
|
\v 15 kileng ngarungo ba nan ojir ite iyen koditi na ngomanyare cio kaji hatwa lo Lobanga na lara kanisa lo Lobanga na iwar wiriti ko guri kulo dede.
|
|
\v 16 Na lilany kilifa fad obolo ilitit kitongo lo Lobanga. Oboto afa inyi to ken itisaden manyu okorif odeu malaikahin ititimi manyu inyi iyo kofi kofi iruk kof fad inyi ifotori kai iyo deyo.
|
|
\c 4
|
|
\cl Kingutit 4
|
|
\p
|
|
\v 1 Oteny igeriti tarany ojo to faritin kulo lohicungi ongerihi mute kude kiruk ijifi okorifi katinonongak ko sangite kuna litiyena lodonyohi.
|
|
\v 2 Ofwonu kuna kitiyenita iyo katinonongak kuna italeri kuna lori mejo ocuri taulo to biliet na inok.
|
|
\v 3 Itihoti cio yema manyu itihoti cio daha dahidahi kude kuna loduk Lobanga ojo ojir kifotu to kwama.
|
|
\v 4 Tonyio tohi fad na loduk Lobanga ojir manyu keco oberuni kalifotuni to kwama.
|
|
\v 5 tonyio litinyuji to tenya lo Lobanga ko kilifa.
|
|
\p
|
|
\v 6 Kalitotorohi ite recera kuno sangite ito cia ite ira katiyok kulo Kristo Yesu kuna ijiri kuna lohitiwojuni to tenya lo dede lo kiruk ko to kitiyena na ijir na lijifita ite.
|
|
\v 7 Ke papal tihi kunino ningo odohohin kuna lida itikwama Lobanga ko tenyi tenyi kuna loforo ngorwo ati itimohohi ken nino iyo sangite kulo Lobanga.
|
|
\v 8 Tonyio otehita ticitici kulo donga lo ken faida ati otehita ticitici kulo bangun Lobanga faida to kikohin fad na longon ko jiran iyo ene warun ko na mute lolotuno.
|
|
\v 9 Ara ene tenya lo dede na locam to kifotuno.
|
|
\v 10 (tonyio ene tenya kicunahino ohoi kitiyo) jimitan lohifik ohoi kigeno niyang iyo Lobanga na iwar na oara kalwahunoni lo cio pili ati bebe nenge lo kuna liruk.
|
|
\v 11 Tocik manyu itiyena kuno sangite.
|
|
\v 12 Kecio lobo tungani kitikaj isi tona lirahare kito na sidi ati icwara kitotoro lo warun na ijir iyo karuhok, to tenya, to manya, to kimaruno, to kiruk ko to nyujon.
|
|
\v 13 Many alotu nan, icwara ken nino iyo kikena igeriti, ketemoni lo cio, iyo kititima tenya lo Lobanga ko kitiyena.
|
|
\v 14 Ketibase kicwara nino lafa lohiciori isi to teya lo kimoca lafar lofihahinore kulahitoha kac kuneicieng kwe nino.
|
|
\v 15 Irungahino kuna tenyi tenyi icwara ken nino fad iyo icieng ojir cio fad odeu lotita nino iya ketemoni.
|
|
\v 16 Iriria manya ko kitiyena nino otoc todihahino iyo icieng tonyio kalitii isi jii ilwahu cia isi ken nino ko kaningok kunino.
|
|
\c 5
|
|
\cl Kingutit 5
|
|
\p
|
|
\v 1 Kerieng tungani ngoroyoni to kingere ati isinga inyi to riejun mejo ara inyi apa nino, manyu tofik tee kilahaji iya recera kunino,
|
|
\v 2 ngorwo ngoroyok iya ngotengeri kunino ko tee kariok iya kanecera kunino to nyujon.
|
|
\v 3 Torima ngorwo lafuseritohin kuna lonuk rei kuna lotong ake.
|
|
\v 4 Ati kolongon lafuserito ko tee kode lotataha ojir icieng re ketemoni ofik dini neicieng iyo tic to rica cio kulo kajihatwa neicieng ojir odumahini katomonok kode tataico kuneicieng to ticitici kuna ijiri tonyio itikwama ene Lobanga.
|
|
\v 5 Ngorwani na lowei retoni nenge na lara nafuserito na lotong ake ofik kigeno nenge fad diho Lobanga manyu osodoro kilifa karwe ko far ko kilifa lwaha iyo Lobanga.
|
|
\v 6 Ati nafuserito na lowar to kwama lo ken, lokeru weyaru kileng lowar.
|
|
\v 7 Icwara cio ene kisinga ojir ida omongarihin kude.
|
|
\v 8 Kalida tungani ifita cio kuna lara kunenge bebe nenge kulo kajihatwa neicieng lingohi inyi kiruk manyu lorohoi inyi ilany cio kuna lida iruk.
|
|
\v 9 Kegerihi ngorwani nafuserito iyo kiji lo nafuseritohin kolorihe karihin kunenge ida logoru keek ile, ojir manyu ara ngorwani na afa loningo retoni nenge.
|
|
\v 10 na manyu loyeniti to jiran nenge ko ticitici kuna locam iya kisinga tee, kifotunita welo kode ilal kejuha kulo karwaak kulo Lobanga, kololwaha afa cio kuna likidahi, kode kalara tungani lafa licio ken nenge kitiyo ticitici kuna ijiri to kikohin fad.
|
|
\v 11 Ojo to nafuseritohin kuna sidiha, kegerihi iyo kiji lo nafuseritohin tonyio kolodeto cia wahun lo kenite kuneicieng, owahiti cia jungo oluluhini kicwara lo kenite kuneicieng, iyo Kristo.
|
|
\v 12 Oto iyauni ngoto lo tenya kweci kuneicieng tonyio irumu loluluhini ciharu neicieng lo ketemoni (iyo Lobanga)
|
|
\v 13 lo sodo ko na oto korahun kakarwak iloritati to kajihit, ida manyu ara kakarwak keken ara manyu kamomongitak ko tetenyita tenyi tenyi kuna lida ocam to fwonuno to kutuhe kuneicieng.
|
|
\v 14 Tona asinga nan nafuseritohin kuna sidiha jimitan ojir oyemaroti otomoniti tee ojir iniefi kangite kuneicieng ida icio meroni kikoi na ngomongare.
|
|
\v 15 Logere kude lofwori kijifita sitan.
|
|
\v 16 Kolongon lobo ngorwani karuhoni ko nafuseritohin kalenge ojir inyi oric icieng ida iticuna kanisa tocieng ojir kanisa oyen ricare nafuseritohin kuna ikidahi.
|
|
\p
|
|
\v 17 Kabolorok kuna lolanyu kanisa ara na ijir ocam to rima na hitok bebe nenge kuna lara tic neicieng kititima tenya lo Lobanga ko kitiyena.
|
|
\v 18 Tonyio ojo igeriti, “Kepud kutuk lo mongo na lonyona ngamang”. Manyu ojo, “Ocam katiyoni to bahacic nenge”.
|
|
\v 19 Kening kidoro na liyauni ken lo lobo lahitok many kalitigol saden are kode uni.
|
|
\v 20 Ojir iriengi kapalak tarany to kiji lo ilulung ojir kulakude obangare.
|
|
\v 21 Ahicik nan isi to ketemoni lo Lobanga ko Kristo Yesu ko malaikahin kuna inyuji lo rican kuno kisingiti oru yongo manyu ketii lobo tohi to kisisio.
|
|
\v 22 Keruk fiha kana kwe lo tungani manyu kengar ko tungani kipal nenge. Toric nyujon lo ken nino.
|
|
\v 23 Kerihe imata kifi keken ati to matunita vino lobo sidi to kocehe nino tona mwai lohitigema isi to faritin.
|
|
\v 24 Obotoho kipalipali kulo cio kude itemita iyo ngoto lo tenya ati obotoho kulo kude cio to kifwongi.
|
|
\v 25 Tona kikoi bito obotoho manyu ticitici kuna ijiri kileng kuna lori mejo isidiha ida otum kiduha.
|
|
\c 6
|
|
\cl Kingutit 6
|
|
\p
|
|
\v 1 Cio pili kuna lara opihin ojir obangiti kunahitoha kuneicieng to rima nahitok ojir karana lo Lobanga ko kitiyena niyang ida itikaji.
|
|
\v 2 Kuna lara kulahitoha kuneicieng karuhok ojir ida itirabani rima icieng to rahun recera. Ati ojir irwaati icieng ogal tonyio ara cio kulo Lobanga lorumu faida lo kirwaa neicieng ojir irwaati to kimaruno na logal. Sangite kuna lojir isi itiyenahi icieng kuna.
|
|
\p
|
|
\v 3 Kalitiyena tungani tenya lo talerun ida iruk kisinga lo Lahitok niyang Yesu Kristo na ibehi ko kitiyena lo warun lo Lobanga
|
|
\v 4 ara inyi tungani ka pufani na lida iniang lobo tohi. Ara inyi tungani na ligeria peha ko ngolofa to tenyi tenyi kuna liyauno okaine, risa, ko tenyi tenyi kulo ngolofa ko ikobiti kuna irohori
|
|
\v 5 ko swa na lidiho kiji lo cio kuna lotehita kibuha na igere kuna libuha ojo ara tic lo Lobanga kikoi lo rumuno bara lo robia.
|
|
\v 6 Ati kitongo iyo Lobanga to kimono ara faida nahitok.
|
|
\v 7 Tonyio oru afa lobo tohi lohiyauno ohoi kof manyu oru mute lobo tohi lohiyaru to kof.
|
|
\v 8 Ati kolohingon ko daha ko kyelani ojir ohoi kimono to kuna.
|
|
\v 9 Cio kuna lowak bara ourorita iyo laba ko kume manyu iyo wahita becek kulo dataru kuna liyaru icieng iyo uroro ko muyuhino.
|
|
\v 10 Tonyio ara kimaruno lo robia kerdeti lo rohojita fad. Cio kude logere iya kiruk neicieng oleng to wahun lo robia ko cuhoroti ake ake to kidak nahitk.
|
|
\p
|
|
\v 11 Ati isi tungani lo Lobanga igera kuna sangite lori ko kuna tofik tau tahita biran, bangun lo Lobanga, kiruk, kimaruno, kidonyo lo tau ko riejun.
|
|
\v 12 Torem rem na ijir lo kiruk iniefa warun na isio lafa lohilolongunorehin isi lafar litulunore isi kiruk nino ketemoni lo sadeni kuna iborengi.
|
|
\v 13 To ketemoni lo Lobanga na licwara warun iyo sangite fad ko lo Kristo Yesu lafa lifura ketemoni lo Pontios Pilato otul saden na ijir, acik nan isi
|
|
\v 14 lo rica ene ciha oru ko lobo kipal kode lobo tohi irohoi to ketemoni lo cio many far na lolotunore Lahitok niyang Yesu Kristo,
|
|
\v 15 Na mute liyauno Lobanga to far nenge ake. Lobanga na lara kalanyunoni Lobito, na lara Kabu lo kabuno ko Lahitok lo kulahitoha,
|
|
\v 16 Na lara inyi ake lida otum wei na litongo iyo wangun na lida ogoruno na loru tungani lodeu kode otum deuno. Ingohi rima ko kwatun tongon diho inyi karihin ko karihin Amen.
|
|
\p
|
|
\v 17 Tocik kabarak kulone kof, keco itidarati kode ofik kigeno neicieng iyo bara na lida igenuno ati ingohi tofihi kigeno neicieng iyo Lobanga na lohicwara ohoi sangite fad kuna lohiwak.
|
|
\v 18 Tocik icieng ingohi itiyoti ara na ijir, obarati iyo ticitici kuna ijiri manyu imoroti, iruhiti ngara.
|
|
\v 19 Tona kikoi oto cia icieng itiyore bara ara na lofihahinore icieng guri kulo warun lo dede.
|
|
\p
|
|
\v 20 Timoti, toric tohi na lofihahini iyo kana nino. Tongerihi kiromita na lida ojir to cio kulo Lobanga ko tenyi tenyi kulo peha kuna lilolongoti to talerun ojo genyun.
|
|
\v 21 Na lodumu kude ara neicieng, manyu tona tenya ko kibunyaroti to kikoi lo kiruk. Kisa kingon kosi.
|