See in Reader
142 lines
12 KiB
Plaintext
142 lines
12 KiB
Plaintext
\id PHP
|
|
\ide UTF-8
|
|
\h Pilipi
|
|
\toc1 Pilipi
|
|
\toc2 Pilipi
|
|
\toc3 php
|
|
\mt Pilipi
|
|
\c 1
|
|
\cl Kingutit 1
|
|
\p
|
|
\v 1 Paul ko Timoti karwaani kulo Kristo Yesu: Diho cio kulo Lobanga iyo Kristo Yesu kuna longoni Pilipi ko kalwahak fad.
|
|
\p
|
|
\v 2 Kisa ko kisiliban iyo Lobanga Apa niyang ko Lahitok Yesu Kristo ongon diho ite fad.
|
|
\p
|
|
\v 3 Akwama nan Lobanga nei to tihi fad kala buha nan ite.
|
|
\v 4 Iyo kilifilifi kunei fad to ite alifitita nan to kwama.
|
|
\v 5 To ngara ningi iyo layomit na ijir many to far lo lohiciahi ko jijia
|
|
\v 6 ayen manyu jimitan inyi na liciak tic na ijir diho ite, itiring cia many okeru many far lo Kristo Yesu.
|
|
\v 7 Ocam diho nan kibuha jii to ite fad iya na laricare nan ite fad to tau nei tonyio kileng ngatora nan kode atingata layomit na inyu, ingar ite fad Kisa lo Lobanga ko nan ara Lobito
|
|
\v 8 Otum Lobanga kisaden koditi na lageriare nan ite fad to kimaruno lo Kristo Yesu.
|
|
\v 9 Ara enen kilifa nei jimitan ngosodoro kimaruno ningi ari ko ari iyo yenun ko kiluko lo genyun,
|
|
\v 10 ojir ite itum deunore tohi na lojir manyu ojir ite itongore ara inyu oru lobo rohojun many igorunore far lo Kristo.
|
|
\v 11 Ifut ko ngak lo biran na lolotu diho Yesu Kristo to deyo ko maja lo Lobanga.
|
|
\p
|
|
\v 12 Recera awak nan ite iyen jimitan lolwak tohi na litiihino iyo nan sodoro kititima lo layomit na Ijir.
|
|
\v 13 Tona loyen cio kuna longon kolo lahitok fad ko cio kuna kude pili jimitan atora nan to Kristo.
|
|
\v 14 To tora nei, logoli taulo recera beciek kuna longoni iyo Lobanga kititima lo layomit na Ijir oru bangun.
|
|
\v 15 Dede ititima cio kude Kristo to peha ko okaine ati ititima kude to taulo kuna ijiri.
|
|
\v 16 Itiyo kuno kulo kifwongi to kimaruno ko yenun jimitan angon nan ene to kitingata layomit na Ijir.
|
|
\v 17 Ititima kuna kude Kristo to kodomo lo taulo to sangite kulo kenite kuneicieng ida ara to taulo kulo dede, owahiti manyu ojo ojir kisodohi kidak nei iya ene langonore nan mabus.
|
|
\v 18 Ati nyio ha lorohoi? Tohi na igol inyi jimitan to kikohin fad kode lo talerun kode lo dede otuloti Kristo. Dong tona akwama nan. Ibo manyu orihe cia asodoro kwama,
|
|
\v 19 tonyio ayen nan jimitan to kilifa ningi ko lwaha na lohicio okorif lo Yesu Kristo ibelo cia ene kidak nei ara lo lahuno nan.
|
|
\v 20 Ageria nan manyu ayen jimitan ida cia riri kinyia nan ati angon cia nan ko golun lo tau nahitok jimitan jijia iya langun lo tik tik otingi cia Kristo kai to ken nei kode to warun kode to wei.
|
|
\v 21 Tonyio diho nan, warun inyi Kristo, manyu wei, ara faida.
|
|
\v 22 Kalasodoro nan warun to ken nei, ara ene tic na liyauno ngak to nan. Nganyumu hati nan nyio? Ida nan ayen tohi na nganyumu.
|
|
\v 23 Angangalita nan iyo kuno sangite are: Kidam nan loro kitongo ko Kristo, na lojir ilany.
|
|
\v 24 Ati ojir iyo ite kalangon nan iyo ken.
|
|
\v 25 To kigeno jii, ayen nan jimitan arihe cia nan angon manyu asodoro ko ite fad to bolorun ningi ko kwama iyo kiruk
|
|
\v 26 ojir to ngonun nei kote ari, itifut kwama ningi iyo Kristo Yesu to manya nei kiji ningi.
|
|
\v 27 Kileng ngongoni kude sangite litiihino, itomanyati manya na locam to layomit na Ijir lo Kristo. Oto. Kode alotu nan waja ite kode aningo ara ningo kalaru, ayen cia nan ajo iwoita ite ara Lobito iyo Okorif, irem iya tungani Lobito to kiruk lo layomit na ijir.
|
|
\v 28 Ida kuna lohitipeha ite kitibang. Itongo ene ara kitotorita diho icieng jimitan okeruni mute icieng kilwahuni ite na lara Lobanga money litiyo.
|
|
\v 29 Tonyio kiciori ite to Kristo, ida ara kiruk inyi keken ati rumuno manyu kidak tonyi,
|
|
\v 30 Iya na lingonore ite ko longole rem bito lideu ite angonore manyu nan.
|
|
\c 2
|
|
\cl Kingutit 2
|
|
\p
|
|
\v 1 Kalirumu ite lobo kisinga iyo Kimora ko Kristo kode lobokitirobia lo taulo, iyo kimaruno nenge, kode lobo Kimora ko Okorif kode lobo riejun ko kibaya lo taulo,
|
|
\v 2 itifutata dong kwama nei to kitongo tau Lobito iyo ngonun ko kimaruno na iriworo itongo to Okorif ko koditi Lobito.
|
|
\v 3 Ketii lobo tohi to wahun lo tau nino ake kode pufa lo talerun ati to riejun itifik kuna kude cio mejo kigal isi.
|
|
\v 4 Ojir Lobito Lobito to kiji ningi ida iiyo to tohi na lowak inyi ati to tohi na lowak kaletoni.
|
|
\v 5 Ingohi kibuha nino tori iya lo Kristo Yesu.
|
|
\q
|
|
\v 6 Na kileng lara Lobanga ida odeya kisiran ko Lobanga ara tohi lo rujo.
|
|
\q
|
|
\v 7 ati itisidi ken nenge, otek koditi lo karwaani, odumu rijon ko tungani.
|
|
\q2
|
|
\v 8 Manyu itilulue ken nenge ara tungani olotu inyi itirie ken nenge olotu ara kaningoni many wei, kileng wei iyo kuruce!
|
|
\q
|
|
\v 9 Na licio Lobanga oting inyi kai noo, ko kicwara inyi karana na logal karanico fad.
|
|
\q
|
|
\v 10 ojir to karana lo Yesu kunga fad ogung to kai ko kof ko fotiri lo kof,
|
|
\q
|
|
\v 11 manyu ojir ngadiefo fad otulo jimitan Yesu Kristo inyi kabu iyo deyo lo Lobanga Apa.
|
|
\p
|
|
\v 12 Tona tenya morot kunei, iya langun liningitare ite tenya nei tona langonore nan kote, ojir dong iningo ogal jijia lalomare nan ko ite, itosodoroti kitiyo lwaharu ningi to bangun ko kihihirita
|
|
\v 13 Tonyio ara Lobanga litiyo iyo ite to wahun ko kitiyo jiran lo wahun nenge.
|
|
\v 14 Itiyoti sangite fad oru ngungunita ko risa
|
|
\v 15 ojir ite itongo oru lobo tenya lohimongarihin ojir ira tee kulo Lobanga kuna inyuji kuna litongo to manya lo biran ene kofiangiti irohoi ojir ite inwaha iya kangier, kuna longoni kai
|
|
\v 16 kaliric ite tenya lo warun ojir manyu apufare to far lo Kristo jimitan ida afa nan atohoro tic arus.
|
|
\v 17 Ati kileng ngohi juhoroti nan iya imatit na lijuhohini iyo kicwara na locurahini ciali lo Lobanga to tic ko kirwaa na latii nan to kiruk ningi, okwe tau nei manyu akwama kote fad.
|
|
\v 18 Ojir manyu ite okweri taulo kikwama manyu ko nan.
|
|
\p
|
|
\v 19 Ageno nan Lobanga to culuno Timoti diho ite to kuno faritin ojir manyu nan ikwaru tau kalaning layomit na liyauno inyi tijia iyo ite.
|
|
\v 20 Oru lobo libuha to ite iya inyi.
|
|
\v 21 Tonyio otahita cio fad wahun lo taulo kuneicieng ida ara kulo Yesu Kristo.
|
|
\v 22 Ati iyen ite ijo litibotu Timoti ken nenge iya ene lahitiyore ko nan to tic lo Lobanga iya kito ko money.
|
|
\v 23 Aculuno nan inyi deu kaladeu olot warun ara na ijir ten iyo nan.
|
|
\v 24 Manyu angon nan ko kigeno diho Lobanga jimitan alotu manyu cia nan token ijia diho ite.
|
|
\v 25 Ati abuha manyu nan to kinyiahuno rece nei, katiyoni ko nan ara Lobito ko asegeri kaletoni nei iyo tic lo Lobanga Epaproditus lafa lara ifahiti ningi lo kiyauno sangite kuna lohilwahare ite nan.
|
|
\v 26 Tonyio ligeria inyi deya ite fad manyu iudo tonyio lining afa ite layomit lo mwai nenge.
|
|
\v 27 Dede omwai afa inyi noo many ofuru wei. Ati ongon orumu Lobanga ko kisa, ida ara iyo inyi ake ati iyo nan manyu lo lwahuno nan to kidak iyo kidak.
|
|
\v 28 Tona angon nan kigeria noo culuno inyi ojir kalideu ite inyi ari ikwama nan manyu aticung kiudo.
|
|
\v 29 Ifotutu inyi to karana lo Lobanga, to kwama nahitok manyu itorimati cio kuna lori iya inyi,
|
|
\v 30 tonyio lofuru inyi wei to tic lo Kristo, olau inyi warun nenge lo kitiyo tic na lida orumu ite itum kitiyo to nan.
|
|
\c 3
|
|
\cl Kingutit 3
|
|
\p
|
|
\v 1 Lohicungi nenge recera, itikwamati iyo Kristo. Ida ipal diho nan kinyiahata kigero Lobito tohi diho ite manyu olwak kitirienya ite.
|
|
\v 2 Iririati kenite iyo kuna ikureho, kuna cio litiyo rohojun, kuna lowak ngoto kenite kulo cio.
|
|
\v 3 Tonyio ara ohoi lohiliraru, ohoi kuna lohiwora to Okorif lo Lobanga kuna lohitikwata Kristo Yesu manyu kuna lida kigeno kenite
|
|
\v 4 Kileng ngangonore nan kikoi iyo na kigeno. Kolojo lobo tungani angon inyi ko kigeno iyo tic lo ken angonore hati manyu nan ogal,
|
|
\v 5 Kiliri nan to kifongi lo faritin mietauni, nan Israelani lo imanit lo Benjamin, Iburuni lo Ibru, kalaite to ngati lo cik nan Parisini.
|
|
\v 6 Kalara to lairan lo dini, latigem nan kanisa, kalara to biran iyo cik tungani na loru ko kipal.
|
|
\v 7 Ati sangite fad kulafa lara kulo faida diho nan, tanyanya to lofere lo Kristo.
|
|
\v 8 Tohi na lilany fad, atifiak nan sangite fad to bolojun lo yenun Kristo Yesu Lahitok nei, na to lofere nenge lara sangite kuna kude fad tanyanya diho nan ojir arumunore manyu aricare Kristo keken,
|
|
\v 9 manyu ojir angon diho inyi, manyu ida angon ko biran nei ake ake na lolotu iyo cik ati na lolotu to kiruk iyo Kristo biran na lolotu iyo Lobanga na lara to kiruk.
|
|
\v 10 Awak nan yenun Kristo ko golun lo kibuhuno nenge ko Kimora lo ngara kidak nenge ko inyi lo rijon ko inyi iyo wei nenge
|
|
\v 11 ojir manyu ba orumunore kibuhuno to kiji lo kaweyak.
|
|
\v 12 Ida hati nan ajo larumu nan kuna fad kode lohitinyuji nan ati asodoro nan iya ketemoni kiniefa lafa tohi lohiriefare Yesu nan.
|
|
\v 13 Recera ida hati nan abuha jimitan laniefu nan. Ati Lobito tohi atiyo nan: Aluluhi nan tohi na lotong kifwongi arocoro nan iyo tohi na longon ketemoni.
|
|
\v 14 Afudaru nan iya lokerunore lo rumuno faida na lohilolongore Lobanga nan kai iyo Kristo Yesu.
|
|
\v 15 Ohoi fad kuna lohigoli ojir kingoni ko na kibuha iyo tenyi tenyi kuna lori jii. Ati kalake manyu kibuha ningi to lobo, kitiyen many ca Lobanga ite iyo kuna fad.
|
|
\v 16 Ati ngatiwar to tohi na lohikeru rumuno iyo tic niyang.
|
|
\p
|
|
\v 17 Imorahinoti ko kaletok iyo kijifita koditi nitole recera manyu itodeyati cio kuna lomanya to koditi lo warun lafa lohitotorohi ohoi ite.
|
|
\v 18 Tonyio iya na afa lahirihohinore nan ite kakeny beciek to kifi kulo konyeha ajo itongo kude cio ara merok kulo kuruce lo Kristo.
|
|
\v 19 Lohicungi neicieng wei, Lobanga neicieng koceheri kuneicieng, manyu itongo kwatun neicieng ara riri neicieng, ongon kibuha neicieng iyo sangite kulo kof.
|
|
\v 20 20 Ati kira ohoi cio kulo kai manyu kingon kitila kalwahani na lolotuno tijia to taulo kuniyang fad inyi Lahitok Yesu Kristo
|
|
\v 21 Na litweru to golun nenge kiyauno sangite fad iyolanyuno nenge, ibel cia kuno kenite kulo kof lohitehita ohoi ofwonu ori ko ken nenge lo deyo.
|
|
\c 4
|
|
\cl Kingutit 4
|
|
\p
|
|
\v 1 Inyi na recera kunei kuna lohimaru, kwama ko tahi nitole ara na kikoi na ngiwoitare ite to golun iyo Lobanga morot kunei.
|
|
\p
|
|
\v 2 Alelia nan iyo Eudia manyu alelia iyo Sintike ingohi iruhiti manya ara Lobito iyo Lobanga.
|
|
\v 3 Ibo, manyu ahirihohi nan isi loryehat nei na lageno, kilwak nan itiyomohi kuna ngorwo afa lohilwak nan to woitahino iyo tic lo kitirurumo layomit na Ijir ara Lobito ko Kelement ko kuna kude katiyok kaletok kunei. Kuna longoni karaneco iyo buk lo warun.
|
|
\p
|
|
\v 4 Itikwamati iyo lahitok faritin fad. Atenya nan ari ajo itikwamati.
|
|
\v 5 Ingohi riejun ningi toboto diho cio fad. Lonyiha Lahitok.
|
|
\v 6 Keudo to lobo tohi ati iyo sangite fad to kilifa ko kilelia ara Lobito ko kwama ifotohi kilifa nino iyo Lobanga.
|
|
\v 7 Oto cia kisiliban lo Lobanga na logal genyun lo cio fad oric taulo ko kibuha ningi iyo Kristo Yesu.
|
|
\p
|
|
\v 8 Lohicungi recera, kalara lobo tohi na ibir, kalara lobo tohi na inyu, kalara lobo tohi na idwaru, kalara lobo tohi na lokwama cio ko tohi na lilany na lokwamati kolongoni sangite kuna lo kwama cio, ibuha to kuna sangite.
|
|
\v 9 Sangite fad kuna litiyenu ite kode ining, kode irumu kode ideu iyo nan itifik iyo tic iyo warita kuningi. Oto cia Lobanga lo kisiliban kingon kote.
|
|
\p
|
|
\v 10 Akwama nan bebe iyo Lobanga tonyio litingejuk ite kiiyo ningi to nan iya lafa liiyore berien. To tenya lo dede iiyo ite to nan ati oru diho ite tik lo kitotoruno.
|
|
\v 11 Ida hati nan atenya jii to jimitan aratita nan tonyio layen nan kitongo to kimono iyo kikohin fad.
|
|
\v 12 Ayen nan faritin kulo kiratita ayen many faritin kulo kiraban. Layen nan ilitit lo manya to kikohin fad kode kinga kode kimono kode manya to kiraban kode to kiratita.
|
|
\v 13 Atum nan kitiyo sangite fad to Kristo na lohicio nan golun.
|
|
\v 14 Ati itii ite ara na ijir lo ngara ko nan kidak na lorumu nan angonore.
|
|
\v 15 Oto hati iya na liyenare ite cio kulo Pilipi, afa to kunu faritin kulo ketemoni orihe ite imohuno ko layomit na Ijir lafar kalaloro nan iya Masedonia, oru afa lobo kanisa lohingar ko nan iyo tenya lo kicwara ko kifotuno ite afa ake
|
|
\v 16 tonyio kileng afa langonore nan Tesolonika iculu afa ite lwaha diho nan kakeny ko kakeny kalaratita nan.
|
|
\v 17 Ida ara jimitan atahita nan kicwara ningi ati atahita nan tohi na ngoricahini to faida ningi.
|
|
\v 18 Larumu nan tohi na liculu ite diho nan ogal manyu langon nan ko sangite rief iya na lafotunore nan tohi na liculu ite diho nan to kac kulo Epaproditus. Ori iya iheru na iur na locurahini iyo Lobanga.
|
|
\v 19 Manyu kicio cia Lobanga nei ite sangite fad kuna litahita ite to bara nenge na lilany na longon iyo Kristo Yesu.
|
|
\v 20 Ingohi kwatun tongon diho Lobanga Apa niyang karihin ko karihin. Amen.
|
|
\p
|
|
\v 21 Tofonyohi cio kulo Lobanga fad iyo Kristo Yesu. Ofonyo recera kuna longon ko nan ene.
|
|
\v 22 Ofonyo cio kulo Lobanga fad bebe nenge kulo faji lo Cesar.
|
|
\p
|
|
\v 23 Kisa lo Kabu niyang Yesu Kristo ongon iyo Okorifi kuningi fad, Amen.
|