Ino-x-okolie_reg/50-EPH.usfm

\id EPH
\ide UTF-8
\h Epeso
\toc1 Epeso
\toc2 Epeso
\toc3 eph
\mt Epeso
\c 1
\cl Kingutit 1
\p
\v 1 Nan Paul jayo lo KristoYesu to wahun lo Lobanga. Diho cio kulo Lobanga kuna longoni Epesu, kuna ligenoro iyo Kristo Yesu.
\p
\v 2 Kisa ko kisiliban na lolotu diho Lobanga Apa niyang ko Lahitok niyang Yesu Kristo ongon diho ite.
\p
\v 3 Kimaja Lobanga Apa lo Lahitok niyang Yesu Kristo na lohicio ohoi gum to kai fad to gum lo Okorif iyo Kristo.
\v 4 Tonyio kinyumu ohoi iyo inyi orihe ko kof ida loduhi lo kitongo ara na inyu na loru ko lobo tohi irohoi to kenite kuniyang to komom nenge.
\v 5 To kimaruno kinyumu inyi ohoi ara tee kunenge ara iyo Yesu Kristo iya na lowahare inyi
\v 6 lo kiyauno maja iyo deyo lo kisa nenge na licio inyi arus ara iyo na limaru inyi.
\v 7 Iyo inyi kingon ohoi ko lahuno to okoto nenge, launo lo kipal na lolotu mara lo kisa lo Lobanga
\v 8 na libulahi inyi iyo ohoi ko genyun ko yenun fad.
\v 9 Manyu itibotu inyi iyo ohoi ilitit lo wahun nenge na licio to kwama nenge na likukumahi inyi iyo Kristo
\v 10 na mute lofihahini itiyo kologoru tumohino lo faritin lo kiyauno sangite pili to kai ko kof ojir otubuno iyo obolore lo Kristo.
\v 11 To katwa nenge kinyumuni manyu ohoi, orumu loterohi to kikukuma nenge lo na litiyo sangite pili ijifita wahun nenge
\v 12 Lo jimitan ojir ohoi kulafa lohitem kigeno Kristo kitongo ara kulo maja lo deyo nenge.
\v 13 Kisodunorehin manyu afa ite iyo Kristo lafar liningore ite tenya lo dede, layomit na Ijir lo lwaharu ningi. To kiruk ningi, kicwararihin ite Okorif na Inyu kitotorita lo kuna lara kunenge
\v 14 na lara kiterita na louta rahun niyang kalunyok many otubuno cio kuna lolwahu Lobanga fad- to maja lo deyo nenge.
\p
\v 15 Tona tenya many afa laningore nan kiruk ningi iyo Lahitok Yesu ko kimaruno ningi lo cio kulo Lobanga pili,
\v 16 Ida nan aticung kwama Lobanga to ite ko kiiunita iyo kilifi kunei.
\v 17 Atiringa nan kilifa jimitan ingohi Lobanga lo Lahitok niyang Yesu Kristo Apa lo deyo kicio ite Okorif lo genyun ko kitiboto ojir ite iyen inyi otoc.
\v 18 Alifa manyu nan jimitan icwara konyieha kulo taulo kuningi tongaja ojir ite iyen kigeno na lohilolongohi inyi ite, bara lo deyo lo lolunyot nenge iyo cio kunenge.
\v 19 Ko golun nenge na lilany fad iyo ohoi kuna lohiruk. Itongo na golun iya twero lo tic nenge,
\v 20 na lofik inyi ken lo Kristo na litibuhunore inyi to kiji lo kaweyak ko kititongohino inyi iteten nenge iyo okabwe lo kai,
\v 21 na loiha kai noo ilany obolorehin, kwatun ko golun fad ko karaneco pili ida ara to ene kof keken ati tona lolotuno.
\v 22 Manyu ofik Lobanga sangite fad katwa lo kejuha kunenge manyu onyumu inyi lo lanyuno sangite fad to kanisa.
\v 23 Na lara ken nenge na litifut inyi na litifuta sangite fad to kikohin fad.
\c 2
\cl Kingutit 2
\p
\v 1 Afa berien iweiha afa ite to gila lo cik ko kipal
\v 2 lafa limanyare ite ijifita warun lone kof ko lo kalanyunoni lo okabwe lo kiyoma na lara okorif na longon kitiyo iyo cio kuna loberu ningo tenya lo Lobanga.
\v 3 Kiri manyu afa ohoi fad jii berien kijifita koditi lafa lohitomonunorehin ohoi kijifita wahun ko kibuha lo kenite kuniyang na lohiyaru ohoi iyo kipal. Iya cio kuna kude kira afa ohoi kuna lohingoni iyo kilongo lo Lobanga.
\v 4 Ati to kimaruno nenge nahitok na longonore inyi kenite kuniyang, Lobanga na lobara kibaya
\v 5 Kicio ohoi warun iyo Kristo kileng lohira afa ohoi kaweyak to kipali pali kuniyang ara to kisa kilwahunorihin ite.
\v 6 Oto Lobanga kitibuhu ohoi ara Lobito ko Kristo ko kititongohino ohoi konyi iyo okabwe lo kai iyo Kristo Yesu,
\v 7 ojir iyo warun na lolotuno kitotorohi bara nenge na lida otumiti kitiririo ko lobo tohi na litibotu inyi diho ohoi to ken lo Kristo Yesu.
\v 8 Tonyio kilwahuni ite to kisa lo Lobanga na lolotu to kiruk ida olotu to kenite kuningi, ara kicwara lo Lobanga
\v 9 ida ara to tic ojir lobo tungani ida opufare.
\v 10 Tonyio kira ohoi cio kuna lohiduk Lobanga kuna lohifihi iyo Kristo Yesu lo kitiyo ticitici kuna ijiri kulafa likukumahi inyi many berien ojo ojir ohoi kitii.
\p
\v 11 Tona, ibuhati jimitan afa, ite kuna lira misiok to otomone ningi kuna lilolongo Judeahin ojo cio kuna lida iliraru, ofihi kenite ojo kiliraru icieng kilira na litii to kac kulo cio iyo tyang lo ken
\v 12 ibuhati jimitan kuna faritin ingoni afa ite oleng to ken lo Kristo, kigelari oleng to Israel ira cio kulo kalele iyo ciharu lo ciha, iru ko kigeno, iru ko Lobanga ten to kof.
\v 13 Ati jija iyo Kristo Yesu, ite kulafa lilomaha lohiyauni inyiha to okoto lo Kristo.
\v 14 Tonyio inyi to ken nenge lara kisiliban niyang na limorihi kuno are ofwonu ara Lobito kogilaru kiwata lo lohikori lo liwa
\v 15 to kifufusoro cik ko itidwari fad to ken ko okoto nenge. Ara wahun nenge lo kimoruno kuna are ojir ofwonu ara Lobito tungani ngejuk to ken nenge na lara tic nenge lo kitiyomo,
\v 16 manyu iyo ene ken bito lo kitiyomohino icieng ara fad ko Lobanga to kuruce na litiyore inyi lo kifadarore liwa to kiji neicieng.
\v 17 Olotu inyi lititim tenya lo kisiliban diho ite kuna ilomaha ko kisiliban diho kuna lonyihaha.
\v 18 Tonyio ara diho inyi kitum ohoi fad goruno diho Apa to okorif Lobito.
\v 19 Iya na lida ite irihe ira misiok kode cio katimanyak ati cio kulo kof ara Lobito ko cio kulo Lobanga manyu tee kulo kolo Lobanga
\v 20 kuna lohiduhohini iyo guri kulo jayona ko kamocak na lara Kristo Yesu to ken nenge moru lo rukun.
\v 21 Iyo inyi imora kaji owoju kaji ara Lobito lo rahun kaji na inyu lo Lobanga.
\v 22 Manyu iyo inyi iduhohino kileng ite ara Lobito ara faji na litongore Lobanga to Okorif nenge.
\c 3
\cl Kingutit 3
\p
\v 1 Tone tenya alifa nan Lobanga to ite nan Paul na lara mabusoni lo Kristo Yesu to ite misiok.
\v 2 Dede, ayen nan jimitan lining ite tic lo kisa lo Lobanga na lohiciori nan to ite.
\v 3 Na lara ilitit na lohiciori nan to kitibotuno iya na afa lagerore nan lobo gaa.
\v 4 To kikena ene, itum cia ite iniang kwenyun nei iyo ilitit lo Kristo
\v 5 Na afa lida itotorohini cio kofiang kuna kude iya na litibotunorehin jijia iyo jayona ko kamocak kulo Lobanga kuna inyuji.
\v 6 Ara ene ilitit na lojo, to layomit na ijir ara Misiok ko Israel fajihit kulo ken Lobito, kangarak ara Lobito ciha na longon iyo Kristo Yesu.
\p
\v 7 Alotu nan ara karwaani lo layomit na ijir to kicwara lo kisa lo Lobanga na lohicori nan to tic lo golun nenge.
\v 8 Kokileng lara nan nasidi noo to kiji lo cio kulo Lobanga fad, kiciori nan ene kisa lo kititima diho misiok bara na lida itiririuno na longon iyo Kristo
\v 9 manyu lo kitiyena cio fad tic lone ilitit afa liduha to karihin fad iyo Lobanga na loduk sangite pili.
\v 10 Owak afa inyi ojo ojir atibotu jija to kanisa itotoro lo genyun lo Lobanga iyo kabolorok ko kalanyunok kuna longoni kai,
\v 11 Ijifita wahun nenge na losio na lokeru inyi kitiyo to Kristo Yesu Lahitok niyang.
\v 12 To inyi ko to kiruk iyo inyi kitum ohoi kifwonu diho Lobanga to laharu ko golun lo taulo.
\v 13 Alelia dong nan diho ite jimitan kebuha to kidak na larumu nan tote, ara deyo ningi.
\p
\v 14 Tone tenya agung nan ketemoni lo Lobanga Apa
\v 15 na licio karana nenge iyo tee kunenge fad kuna longoni kai ko kuna longoni kof.
\v 16 Alifa nan jimitan iyo bara lo deyo nenge ingohi kitigol ite to golun lo okorif nenge iyo taulo kuningi.
\v 17 ojir Kristo omanya taulo kuningi to kiruk. Manyu alifa jimitan itigoli kerda kuningi manyu kigurohini iyo kimaruno
\v 18 irumunore golun, ara Lobito ko cio kulo Lobanga fad iyenare lalatun, karitan, lomajun ko kiluko lo kimaruno lo Kristo
\v 19 ko yenun ene kimaruno logal genyun ojir kitifuti ite iyo kipimo lo kifut lo Lobanga.
\p
\v 20 Dong diho inyi na litweru kitiyo ogal na lohitifia ohoi kode kibuha, iya na longonore golun nenge na litiyo to kenite kuniyang,
\v 21 ingohi kwatun tongon diho inyi iyo kanisa ko iyo Kristo Yesu iyo kofiang fad karihin ko karihin! Amen.
\c 4
\cl Kingutit 4
\p
\v 1 Iya mabusoni to Lahitok, alelia nan diho ite jimitan itiwar warun na locam to kilolongo lafa lohilolongorihin ite.
\v 2 Itira cio kariejak kuna ibayaha; itodik manyu idonyoto taulo iyo kaletok imanya ko kulakude ara Lobito to kimaruno.
\v 3 Ititem bebe rica kimora lo Okorif to kimora lo kisiliban.
\v 4 Ara ken Lobito ko Okorif Lobito iya ba afa lohilolongunorehin ite,
\v 5 ara lahitok Lobito, kiruk Lobito, batisa Lobito,
\v 6 Lobanga Lobito na lara Apa lo cio fad, na lolanyu cio fad, ara iyo cio fad ko iyo cio fad.
\v 7 Iyo ohoi tolobito tolobito kiciori kisa iya na lokorare Kristo.
\v 8 Inyi licio igero ojo; “Kalirwohe inyi kai noo, orihoro inyi mabusi omot nenge manyu icio kicioriti diho cio”.
\p
\v 9 “Irwohe kai” jimitan nyio? Jimitan iculuno manyu afa kof faji na iluko.
\v 10 Inyi lafa liculuno inyi inyi manyu lirwohe kai ogal ko lomajun fad ojir ifutare kof fad.
\v 11 Ara inyi licio kude ara jayona, kude ara kamocak, kude ara katitimak kulo layomit na ijir, kude ara katibalak ko kude ara katiyenak
\v 12 lo kikukuma cio kulo Lobanga iyo tic lo kirwaa ojir ken lo Kristo oduhoro
\v 13 manyu kigorunore ohoi fad iyo Kimora lokiruk ko iyo yenun lo kito lo Lobanga ko fwonuno kira cio kuna igoli many kigorunore kifut iyo Kristo.
\v 14 Ito cia ida kirihe kira tee kuna lohibebelo kiyoma lo kitiyenita ene ko idi ko tenyi tenyi kulo cio katinonongak.
\v 15 Ara faji lo na, ngatitenyati tenya lo dede to kimaruno kito ciao hoi fad kibolojohi iyo sangite fad iyo inyi na lara kwe inyi Kristo
\v 16 Iyo inyi iniefahino ken fad ogorohi to fuihin manyu oduhoro to kimaruno iya na litiyore fajihit Lobito Lobito tic nenge.
\p
\v 17 Dong ahirihohi nan ite kuno manyu asodoro tenya diho ite to karana lo Lahitok ajo kerihe imanya iya misiok iyo rohojun lo kibuha neicieng.
\v 18 Itimutohi kiniang neicieng manyu okoraroti to ngati lo warun lo Lobanga to dataru na longon iyo icieng na lolotu to kitigolo lo taulo kuneicieng.
\v 19 Litiri icieng kibuha na ibehi iciori kenite iyo ticitici kulo kwerun lo konyeha na licio icieng orutohi iyo ticitici kuna iboti fad na losodoroti iya ketemoni.
\v 20 Ida hati afa ite ifwonu iyo yenun Kristo tona kikoi.
\v 21 Dede lining afa ite to inyi kitiyeni iyo inyi na lilihita ko tenya lo dede na longon iyo Yesu.
\v 22 Kitiyeni afa ite iyo koditi lo warun ningi lafa loring, lopucaru lafa ken nino ongore na lipalaru to wahun lo kitinononga nenge.
\v 23 Ojir itingejuk kibuha lo taulo kuningi
\v 24 ito icief kenite ngejuho kuna loduhi ori iya Lobanga iyo biran ko nyujon lo dede.
\p
\v 25 Tona ojir ite tolobito tolobito ipuce warun lo kitinononga otenya tenya lodede iyo loriehat nenge tonyio kira ohoi fad fajihit kulo ken Lobito.
\v 26 Iyo kilongo nino, kepal! Keco kolong odoi orihe isi ilongo
\v 27 manyu kecio sitan lonyonare lo keju.
\v 28 Tungani langun lokokoita keco orihe okoko, oti ojir itiyo tohi na ijir to kac kunenge ojir orumunore tohi na ngongar inyi ko cio kuna ikidahi.
\v 29 Keco lobo tenya lida ocam olotu to kutuhe kuningi ati tenyi tenyi kuna lolwak kitigolo kula kude cio kuna lijifita tohi na lowak icieng ojir olwak kaningok.
\v 30 Manyu ketitoyo okorif na Inyu lo Lobanga na lohiterorihin isi to far lo lwaharu.
\v 31 Ingohiti kilongo fad ko dwarun lo taulo ngolofa ko momorita ko rohojun lo taulo fad.
\v 32 Itongoti to kibaya ko jiran lo taulo iyo kaletok ila manyu kaletok iya na lohilaunore Lobanga ite iyo Kristo.
\c 5
\cl Kingutit 5
\p
\v 1 Itira katetemak kulo Lobanga iya tee kuna limaru inyi
\v 2 manyu itimanyati manya lo kimaruno iya na lohimarunore Kristo ohoi ko kicwara ken nenge tohoi ara kicwara na iur ko na icam diho Lobanga.
\p
\v 3 Ati to kiji ningi keco oninguno kileng lobo tenya lo tic lo somun kode lobo tic lo kibot kode lo ngatun tonyio ida kuna ocam to cio kulo Lobanga kuna inyuji.
\v 4 Ojir kileng lobo tenya lo riri, tenyi tenyi kulo dataru kode kiyada na lida ocam ida oninguno to kiji ningi ati ilany icwarata kwama diho Lobanga.
\v 5 Tonyio iyo kuno fad ojir iyen: oru kasomoni, karohojani kode kangatani ara ngatun kiwora lo lopidinga lorumu lorumu lobo lunyio iyo okabwe lo Kristo ko lo Lobanga.
\v 6 Keco lobo tungani kitinonong ite to tenyi tenyi kuna iwati tonyio to kuna ticitici olotuno kilongo lo Lobanga iyo cio kuna loberu ningo.
\v 7 Tona ketongoti ira kangarak kocieng.
\v 8 Tonyio ira afa ite lokimuyuk ati jijia lira ite tee kulo wangun iyo Lahitok. Itongoti ira tee kulo wangun.
\v 9 Tonyio ongi ngak kulo wangun iyo jiran, nyujon ko tenya lo dede.
\v 10 Manyu ititak tohi na litikwama Lobanga.
\v 11 Ketiyore sangite kuna irohori kulo lokimuyuk ati itilwehi icieng oleng
\v 12 tonyio itongo ara riri kileto tohi na litiyo cio kuna loberu ningo lolit.
\v 13 Ati tohi na litibotu wangun fad olotu oboto
\v 14 tonyio ara wangun litibotu sangite fad. Inyi licio ojimi, “Tokwenyu O kagetoni ibuhu to kiji lo kaweyak oto cia Kristo kinwak isi”.
\p
\v 15 Itigeny bo iyo koditi na liwarare ite- ida ara iya kadatarok ati iya kagenyak
\v 16 lo rican kitiyore tihi fad tonyio orohori kuno faritin.
\v 17 Tona kedataru ati iningata wahun lo Lobanga.
\v 18 Keruma to mere na lotum kipalaru ken nino. Ilany ifuta to Okorif.
\v 19 Ititenyati kiji ningi to zabur ko woleco kulo maja Lobanga. Itowoloti igugumo woleco kulo Lobanga to taulo.
\v 20 Icwara kwama diho Lobanga Apa tik tik to karana lo Lahitok niyang Yesu Kristo.
\v 21 Icwarata kenite kimaruno kaletok to rima lo karana lo Kristo.
\p
\v 22 Ngorwo icwarata kenite kuningi iyo twero lo rei kuningi iya na licwarare iyo Lahitok.
\v 23 Tonyio ara retoni kwe lo ngorwani iya na larahare Kristo kwe lo kanisa na lara ken nenge na lara inyi kalwahani.
\v 24 Iya na licwarare kanisa ken diho Kristo, ojir manyu ngorwo icio kenite iyo rei kuneicieng iyo tenyi tenyi pili.
\v 25 Rei imaruti ngorwo kuningi iya na limarunore Kristo kanisa many icio ken nenge tonyi,
\v 26 lo kitiraha inyi ara na inyu, itinyu inyi to kilala to kifi ko tenya
\v 27 ko lokifotuno kanisa diho inyi ara kanidsa na ifarang na loru ko kaforoti kode lobo nyuri kode lobo rohojun ati ara na inyu oru rohojun.
\v 28 Tona kikoi bito ojir rei imaru ngorwo kuneicieng iya na limarunore icieng kenite kuneicieng. tungani na limaru ngorwani nenge imaru ken nenge.
\v 29 To kifwongi lo kuna fad oru lobo tungani loberu ken nenge ati ifita inyi orica manyu ken nenge iya na loricare Kristo Kanisa
\v 30 tonyio kira ohoi fajihit kulo ken nenge.
\v 31 Tone tenya ongerihi retoni monye ko ngotenge ofwonu imoraroti ko ngorwani nenge ofwonu kuna are ara ken Lobito.
\v 32 Ara ene ilitit na igol noo ati atenya nan to Kristo ko Kanisa.
\v 33 Ati ojir ite tolobito tungsni imaru ngorwani nenge iya na limarunore inyi ken nenge manyu ojir ngorwani orima retoni nenge.
\c 6
\cl Kingutit 6
\p
\v 1 Tee itiningoti katomonok kuningi iyo Lahitok tonyio tohi na ibehi na
\v 2 “Torima Apa ko Iyang nino” inyi lara cik na losodohini ciha kai nenge ojo,
\v 3 “Ojir sangite fad olot ara kuna ijiri dihosi manyu ojir isi imang manya na ikarit to kof”.
\v 4 Apaico, ketilongojita tee kuningi ati itiyenati icieng lo kitiboloruno icieng iyo tenya lo Lobanga.
\p
\v 5 Opihin itiningoti kalanyunok kuningi to rima ko bangun ko to taulo fad iya na nginingore Kristo.
\v 6 Itiningoti icieng ida ara to kitikwama icieng kolodeya icieng ite ati iya opihin kulo Kristo kitiyo wahun lo Lobanga to taulo kuningi fad.
\v 7 Irwaati to taulo fad mejo irwaa Lobanga ida ara tungani
\v 8 tonyio iyen ite ijo odum mute Lobanga tungani Lobito Lobito to tic na ijir na litii inyi kode opi kode na ilaha.
\p
\v 9 Kalanyunok itiyoti manyu ite opihin kuningi tona kikoi bito. Ketibanga icieng tonyio iyen ite jimitan inyi na lara kalanyunoni ningi fad ongon kai, manyu oru kisisio diho inyi.
\p
\v 10 Lohicungi, itigol iyo Lahitok ko iyo golun nenge nahitok.
\v 11 Iciefo kiremita kulo Lobanga fad ojir irumunore lowoitare nino ilanyunore kitigulunya lo sitan.
\v 12 Tonyio ida ohoi kirem ko ken ko okoto ati ko kalanyunok ko kabolorok ko golun lone kof imutok ko golun lo okorifi kuna longon kiyomare kai.
\v 13 Tona iciefo sangite kulo rem kulo Lobanga fad ojir kolofwonu faritin kulo karohojani ojir itwerunore nyona lowoitare nino manyu langun litii isi sangite fad kulo woita.
\v 14 Towoita bo otoc ko gas lo tenya lo dede otora komoc nino, ko kitihita lo locolo na lara biran ongon otoc.
\v 15 Ko kamuha kulo tenya lo layomit lo kisiliban
\v 16 tosodohi iyo kuna fad buhu lo kiruk na litidunyare isi ngoneco kulo kima kuna longoro sitan.
\v 17 Ibura turubuc lo lwaharu ko ngalem latubot lo okorif na lara inyi tenya lo Lobanga.
\v 18 Manyu ilifati to Okorif to tihi fad to kilifilifi fad. Kaliricahi kuna kwe, iririati manyu ilifati to cio kulo Lobanga fad.
\v 19 Ilifati manyu to nan ojir kalanga nan kutuk, kiciori tenyi tenyi kulo genyun ojir atulo ida abang ilititi kulo layomit na ijir
\v 20 Na larahare nan kawoitahinoni na latora to nyororo. Ilifati jimitan ojir nan atenya to golun lo tau iya na lowaharihin.
\p
\v 21 Tisikas rece liyang na lohimaru ara manyu karwaani lo lahitok na loningoro kirihohi cia ite sangite fad, ojir manyu ite iyenare kitongo nei ko tohi na latiyo nan.
\v 22 Aculuno nan inyi diho ite tone tenya ojir ite iyenare aja kingoni ohoi ojir manyu inyi itigol taulo kuningi.
\p
\v 23 Kisiliban diho receera ko kimaruno ko kiruk diho Lobanga Apa ko Lahitok Yesu Kristo.
\v 24 Kisa diho cio pili kuna limaru Lahitok niyang Yesu Kristo to kimaruno na lida odunye.