Ino-x-okolie_reg/48-2CO.usfm

\id 2CO
\ide UTF-8
\h 2 Korinto
\toc1 2 Korinto
\toc2 2 Korinto
\toc3 2co
\mt 2 Korinto
\c 1
\cl Kingutit 1
\p
\v 1 Nan Paul jayo lo Kristo Yesu to wahun lo Lobanga ko rece niyang Timoti. Diho kanisa lo Lobanga na longon Korint ara lobito ko cio kulo Lobanga kuna longoni Akaaia fad.
\p
\v 2 Ingohi kisa ko kisiliban na lolotu diho Lobanga Apa ko Lahitok Yesu Kristo tongon diho ite fad.
\p
\v 3 Kwama diho Lobanga monye lo Lahitok niyang Yesu Kristo, Apa na ibaya ko Lobanga na litirobija taulo,
\v 4 Na litirobija taulo kuniyang iyo kidak niyang fad na lico ohoi manyu kitirobi taulo kulo cio kuna longon ko kidak to kitirobija lo taulo na lohirumu ohoi iyo Lobanga.
\v 5 Tonyio iya na lifutare kidak lo Kristo taulo kuniyang, tona kikoi bito ifut manyu kitirobija lo Kristo taulo kuniyang.
\v 6 Kolohirumu ohoi kidak ara lo kitirobia lo taulo ko lwahuno ningi, kalitirobi taulo kuniyang, ara lo kitirobija taulo kuningi na liyauno diho ite diha lo kidak iya ene lohidihare ohoi.
\v 7 Manyu ogol kigeno niyang to ite tonyio kiyen ohoi jimitan iya na lingarare ite kidak niyang, ingar manyu cia kitirobija lo taulo.
\v 8 Recera, ida ohoi kiwak ite ilunya golun lo manya na lohirumahi ohoi kof lo Asia. Kingon orumu ohoi iyo kidak na lida odihuno manyu orumu lohibalihi ko warun fad.
\v 9 Dede to taulo kuniyang lihibula ohoi wei. Ati itiihino kuno lo kicwara ohoi fiha taulo iyo Lobanga na litibuhunita kaweyak ida ara iyo kenite kuniyang.
\v 10 Lohilwahu inyi ohoi iyo koditi lona kidak hitok manyu orihe cia kilwahu ohoi. Lohifik ohoi kigeno niyang fad diho inyi jimitan osodoro cia inyi lwaha ohoi.
\v 11 Iya na lilwahare ite ohoi to kilifa. Oto cia cio kuna iborengi icio kwama to ohoi to jiran nahitok na lohiciori ohoi to kilifa lo cio pili.
\p
\v 12 Tohi na lohipufare ohoi inyi ene: kiyen ohoi jimitan kiwar ohoi ene kof ati bebe nenge kiwar ohoi ko ite to nyujon ko dede na lolotu iyo Lobanga. Ida ohoi kitii jii to genyun lone kof ati to kisa lo Lobanga.
\v 13 Tonyio ida ohoi kigero tohi na lida ite itum kikena iniang. Manyu ageno nan jimitan
\v 14 iya na liniangare ite ohoi gaa ifwonu cia iniang otoc jimitan ipufare mute ite ohoi iya na lohipufare ohoi ite to far lo Lahitok Yesu.
\p
\v 15 Orumu nan ayen ene otoc akukumare lo fira lo owele nei lo lotuno ara diho ite ojir ite irumu kitigolo kakeny are.
\v 16 Orumu nan akukum lo wajaru ite kalaloro Masedonia ko lotuno ari inyia diho ite manyu ojir ite kilwahare nan to owele nei lo loro Judea.
\v 17 Kalakukum nan jii atii nan to ngangalita? Kode akukuma nan iya cio kulo kof kuna tolobo lojo tolobo ida ojo manyu cia ojo ibo?
\v 18 Iya na ligenorore Lobanga ida ohoi kitenya tenya niyang ojo manyu cia kibel kiberu to kifwongi.
\v 19 Tonyio Yesu Kristo kito lo Lobanga lafa lohititim nan ko Sailas ko Timoti diho ite ida afa ara Ida ko Ibo ati iyo inyi iwasihi rahun Ibo.
\v 20 Tonyio ngoborengi many ciharu kulo Lobanga, ara icieng fad Ibo iyo Kristo. Manyu ara diho inyi kijo ohoi Amen to kicwara deyo diho Lobanga.
\v 21 Jijia ara Lobanga lohicio ohoi ko ite fad kiwoita ara kuna igoli iyo Kristo. Kitwe inyi ohoi
\v 22 lodwanyahi inyi kiterita nenge kenite kuniyang ofik manyu okorif nenge na Inyu taulo kuniyang ara kitigolita lo tohi na mute lolotuno.
\p
\v 23 Ara kileng Lobanga saden jimitan itongo ara lo kisisio ite licio nan ida alotu Korint.
\v 24 Ida ara lo jimitan kingoni ohoi ko lanyuno iyo kiruk ningi ati kitiyo ohoi ko ite to kwama ningi tonyio ara to kiruk iwoitare ite.
\c 2
\cl Kingutit 2
\p
\v 1 Dong aii nan jimitan ojir nan ida ahiwaj ite lo kiyauno kitoyo ko mejun lo taulo.
\v 2 Jijia kalahitimehi nan ite ngai manyu cia lotong na ngohitikwama nan ida icieng ite kuna lahitimehi nan?
\v 3 Ager nan iya na lagerore tonyio ojir itifurie na tenya to taulo kuningi ojir kalalotu nan, ojir manyu ida alotu kitoyo iyo cio kuna ngohitikwama nan. Angon nan ko kodomo jimitan ingar cia ite ko nan kwama nei.
\v 4 Tonyio ager nan nu waraga to mejun lo tau nahitok ko mehino ko kifi kulo konyeha ida ara lo kititoyo ite ati lo kitotoro kimaruno nahitok na langonore nan to ite.
\p
\v 5 Kaliyauno lobo tungani mehino, ida mehino nei ilany ningi fad, ojir manyu nan ida asod mehino ningi, obolo bebe.
\v 6 Na kitigema lofik cio kuna iborengi ken nenge, lotum inyi.
\v 7 Jijia owak dong ite ilau inyi manyu itirobi tau nenge ojir kidak ida ocun tau nenge noo.
\v 8 Alelia nan jimitan itotorohiti inyi kimaruno ningi tonyi.
\v 9 Tohi na licio afa nan ager, lodeya kalitum ite ningo nan itii iya na lacihare nan.
\v 10 Kalilau ite tungani alau manyu nan inyi. Manyu tohi na lalau nan, kolongon kipal na ngolauni, alau nan to ketemoni lo Kristo to ite
\v 11 ojir sitan ida kilanyunore ohoi. Tonyio ida ohoi kilunyia kitibahasa nenge lo tenyi tenyi.
\p
\v 12 Lafar kalalo nan Traos kititima layomit na Ijir lo Kristo arumu jimitan longa Lobanga agwala to nan,
\v 13 oru orumu kisiliban to tau nei tonyio ida nan arumu rece nei Tito ijia. Acik dong nan icieng ko loro iya Masedonia.
\p
\v 14 Ati kikwama Lobanga na lohirihita ohoi iyo kidoro lo kitotoro obolore lo Kristo, manyu kitiyore ohoi fajihit fad lo kitisara uron nenge.
\v 15 Tonyio kira ohoi iyo Lobanga sirim lo Kristo iyo cio kuna lolwahunoti ko kuna lorijoro.
\v 16 Iyo kuna lorijoro kira ohoi to Kristo ngwojun lo wei, iyo kuna lolwahunoti, uron lo warun. Ngai lobo locam to tic na lori iya ene?
\v 17 Ida ohoi kiri iya kude kuna litiloto tenya lo Lobanga to robia. Ati iyo Kristo kitenya ohoi ketemoni lo Lobanga tenya lo dede iya cio kuna lara Lobanga monye loculu.
\c 3
\cl Kingutit 3
\p
\v 1 Kiciaha re ohoi majaru ake? Kode kiwak manyu ohoi waraga lo maja diho ite kode na liger ite to kenite kuniyang iya na lowahare cio kude?
\v 2 Ite to kenite kuningi lira waraga niyang na ligero taulo kuniyang ikena cio fad.
\v 3 Itotoro ite jimitan ira ite waraga na lolotu iyo Kristo, na lohiyauno ohoi, na lida igero to inki ati to Okorif lo Lobanga na iwar ida igero iyo tadati lo moru ati igero katwa lo taulo kulo cio.
\v 4 4 Itongo ene golun jii ara niyang to Kristo Lahitok niyang to ketemoni lo Lobanga.
\v 5 Ida ara jimitan kigenyi ohoi to kilolongo lobo tohi ojo niyang ati ara diho Lobanga odetore genyun niyang.
\v 6 Kicio inyi ohoi rahun kagenyak manyu ara cio kuna locam to rahun karwaak kulo cik Ngejuk ida ara to kigeriti ati to Okorif; tonyio ifada kigeriti ati icwara Okorif warun.
\v 7 Kaliyauno cik lo kigero na ligeri iyo tadati lo moru wei oto hati olotu to deyo itilanyu Israel ko deya komom lo Moses to deyo nenge kileng afa lohulietarita,
\v 8 Ida dong cia ene lo Okorif ilany deyo nenge?
\v 9 Kalolotu tic lo cik na liyauno ngoto lo wei to deyo ori dong deyo lo tic lo cik na liyauno warun aja to bolorun!
\v 10 Tonyio lafa cik lolotu to deyo afa berien ida otumiti kitiririo deyo nenge kone lo jija na logalita deyo nenge noo.
\v 11 Kololotu tohi na lohulietarita to deyo aja dong bolojun lona losio tur!
\p
\v 12 Dong tona lohingonore ohoi ene kigeno ogoli taulo kuniyang noo.
\v 13 Ida ohoi kiri iya Moses lafa limuhohita komom to kyela ojir Israel ida odeu hulietaru lo deyo to komom nenge.
\v 14 Ati itidatari afa taulo kuneicieng tonyio, kone far kalikenati cik lo Moses, iwasihi na kyela kimuho taulo kuneicieng ara iyo Kristo keken ongajarore na kyiela.
\v 15 Ko jijia kalikenati cik lo Moses, orihe kyela imuho taulo kueicieng.
\v 16 Ati kalibelo tungani iyo Kristo ongajaru na kyela.
\v 17 Jijia ara lahitok Okorif, faji na longon Okorif lo Lahitok ongon laharu.
\v 18 Manyu ohoi kuna longajaru komoma kitifaranga deyo lo Lahitok kingoni kibeloro iyo koditi nenge to deyo na losodoro na lolotu diho Lahitok na lara Okorif.
\c 4
\cl Kingutit 4
\p
\v 1 Tona iya na lohiculari ohoi kitiyo ene tic to kibaya lo Lobanga ojir taulo kuniyang ida ingangadita.
\v 2 Ati lohingohi ohoi ilititi kuna irohori ko ticitici kulo riri lida dong kitiyore kitinononga kode ida kitibahasa tenya lo Lobanga. Ati to tenya tenya lo dede to wangun, kitotoro ohoi kenite kuniyang iyo kibuha lo taulo kulo cio to ketemoni lo Lobanga.
\v 3 3 Kalimuho ba layomit na lohitenya ohoi imuho iyo cio kuna lorijoro.
\v 4 Limuk lobanga lone kof konyeha kulo cio kuna lida iruk icio icieng ida odeu wangun lo layomit lo deyo lo Kristo na lara kitiririt lo Lobanga.
\v 5 Tonyio ida ohoi kititima kenite kuniyang ati kititima ohoi Yesu Kristo ara Lahitok ko kenite kuniyang ara karwaak kuningi to Yesu Kristo.
\v 6 Tonyio Lobanga na lojo, “ingohi wangun inwaha katwa lo lokimuyuk” licio wangun nenge inwaha katwa lo taulo kuniyang lo kicwara ohoi wangun lo yenun lo deyo lo Lobanga to komom lo Kristo.
\p
\v 7 Ati kingon ohoi kone bara katwa lo motiong kulo lokulufi lo kitotoro jimitan ara ene golun hitok lo Lobanga ida ara lo kenite kuniyang.
\v 8 Kidonyi ohoi to ngatihin fad ati ida lohiriesari, lowoita kweci kuniyang ati ida kigeno niyang ipalaru.
\v 9 Kitigemi ati ida kingohini ake, kibirohini kof ati ida kiweiha.
\v 10 Kitingita ohoi wei lo Yesu to kenite kuniyang tiktik ojir manyu warun lo Yesu oboto to kenite kuniyang.
\v 11 Tonyio ohoi kuna lohiwari lohipotori iyo wei to lofere lo Yesu ojir warun nenge oboto to kuno kenite kuniyang kulo wei.
\v 12 Tona itiyo wei kenite kuniyang ati warun itiyo kenite kuningi.
\v 13 Tonyio igero ojo, “laruk nan tona latenya manyu nan”. Tona Okorif manyu bito lo kiruk, kiruk manyu ohoi kitenyare,
\v 14 tonyio kiyen jimitan Lobanga na litibuhu Lahitok Yesu to kiji lo kaweyak, kitibuhu manyu mute ohoi ko Yesu manyu kiyauno ohoi ko ite ketemoni nenge.
\v 15 Ara ene fad to ite ojir kisa lo Lobanga na longon goruno iyo cio fad to kofi kofi icio ca cio fad ifut ko kwama iyo deyo lo Lobanga.
\p
\v 16 Tona ida taulo kuniyang ogilaru kileng ngohibotoho ohoi to oleng ara cio kuna lipalaru kenite, ati to katwa kitingejuhoti ohoi tik tik.
\v 17 Tonyio ene kidak lo tanguno lohirumu ohoi ongon kicwara ohoi deyo na losio na lilany kidak fad lo kof.
\v 18 Tona kifik ohoi konyeha kuniyang ida ara iyo tohi na iboto jijia ati iyo tohi na lida oboto. Tonyio tohi na iboto ara lo tanguno ati tohi na lida oboto ara lo tur.
\c 5
\cl Kingutit 5
\p
\v 1 Jijia kiyen jimitan kalipalaru kuno kemahin lohimanyare ene kof, kingon ohoi ko kaji diho Lobanga, kaji lo tur na longon kai na lida ara kac kulo cio lifak.
\v 2 Inyi ene lohiboriare ohoi kidomo jimitan ngohiburahini kang niyang lo tur.
\v 3 Tonyio kolohiburahini ohoi ida cia kirihe kitongo lolihinye.
\v 4 Tonyio kolohingon ohoi iyo ene kema kiboria manyu kicunaha tonyio ida ohoi kiwak kipuci ati ojir kibiri to lomanyare niyang lo kai ojir tohi na lotum weyaru iburi to warun.
\v 5 Ara Lobanga lohidok ohoi tone tenya bito, manyu kicio ohoi Okorif ara kiterita lo kitinianga tohi na lolotuno.
\v 6 Tona kikodomo ohoi kiyen jimitan kolorihe kingoni iyo ene ken kilomaha ko Lobanga.
\v 7 Kimanya ohoi to kiruk ida ara to deya.
\v 8 kingon ko kigeno na lohiwak jimitan ngohiwoju tone ken kifwo kang diho Lobanga.
\v 9 Tona ojir kifik taulo kitikwama inyi kileng ngohingon iyo ene ken kode kifwo kirwat ken.
\v 10 Tonyio ojir ohoi fad kiwoita ketemoni lo seger lo ngoto lo tenya lo Kristo ojir tungani lobito lobito orumu tohi na locam tonyi to sangite kuna lohitii orihe kingon iyo kenite kode ojiri kode orohori.
\p
\v 11 Iya na lohiyenare rima Lobanga, kitema manyu rihuno cio. Olwa koditi niyang diho Lobanga ageno manyu jimitan ojir manyu olwa diho kiiyo lo taulo kuniyang.
\v 12 Ida ohoi kitema maja kenite kuniyang diho ite ari ati kicwara ohoi ite yenun na ngipufare ite tohoi ojir iyen kifotore tenya lo cio kuna lopufare tohi na iboto ilany icieng pufare tohi na longon tau.
\v 13 13 Kalobahasa kweci kuniyang, ara to Lobanga, kolobiri kweci kuniyang ara to ite.
\v 14 Tonyio olanyu kimaruno lo Kristo kenite kuniyang tonyio kiyen ohoi jimitan owei lobito tungani to cio fad inyi jimitan owei cio fad.
\v 15 Manyu owei inyi to cio fad ojir cio kuna lowari ida owari to kenite kuneicieng ati to inyi na lowei to icieng manyu ofwonuni itibuhuni ari.
\v 16 Dong kiciaha to jijia ida ohoi kideya cio to koditi lo ene kof. Kileng afa ngohideya Kristo tone kire lida ohoi kirihe kitiyo jii.
\v 17 Tona kalongon tungani iyo Kristo lara inyi tungani ngejuk loru ongore lolotu ngejuk.
\v 18 Ofwonu kuno fad iyo Lobanga na lohitiyomohi ohoi ko inyi ara iyo Kristo manyu kicio ohoi tic lo kitiyomo.
\v 19 Jimitan itiyomo afa Lobanga kof ko inyi iyo Kristo ida ikena kipal lo cio kweci kuneicieng. Olotu manyu kicio ohoi layomit lo kitiyomo.
\p
\v 20 Tona kira dong ohoi kawoitahinok kulo Kristo ori iya na adi ngilolongo Lobanga cio tohoi. Kilelia dong ohoi diho ite iya karwaak kulo Kristo. Itiyomoti ko Lobanga.
\v 21 Litirak afa Lobanga inyi na loru kipal ara kipal tohoi ojo ojir ara diho inyi kifwonu ohoi kingon ko biran lo Lobanga.
\c 6
\cl Kingutit 6
\p
\v 1 Iya katiyok ko Lobanga ara lobito kilelia ohoi diho ite kijo kefotu kisa lo Lobanga itiraban.
\v 2 Tonyio ojo inyi, “To faritin kulo kisisio nei lahining nan isi manyu Faritin kulo lwaha lahilwahu nan isi”. Ahirihohi ite ajo jijia inyi far lo kisisio lo Lobanga, ene far inyi far lo lwaha.
\v 3 Ida ohoi kifik kigingi ketemoni lo lobo tungani, ojir ida itifiak tic nenge.
\v 4 Ati iya karwaak kulo Lobanga kitotoro ohoi jiran lo manya niyang to kikohin fad, to kidonyo lo taulo, iyo kidak, iyo golun lo manya ko iyo kiudo
\v 5 iyo lumo, tora ko kituborita; iyo kitiyo to golun, ngonyo lo jioo ko kinga;
\v 6 iyo nyujon, kiniang, kidonyo lo taulo ko jiran iyo Okorif na Inyu ko kimaruno na lara lo dede.
\v 7 Iyo tenya lo dede ko iyo golun lo Lobanga, ko sangite kulo rem lo biran to iteten ko ikajong.
\v 8 Ara iyo deyo ko riri, tenyi tenyi kuna irohori ko kuna ijiri, kifihi mejo katalerok ati kira cio kulo dede,
\v 9 kiyeniti ati kifihi mejo kilunyati, kiweyaru ati orihe kisodoro warun, kilumi ati ida kifadari,
\v 10 Kitoyio ati kikwama to faritin fad, kikidahi ati kitibara cio beciek, mejo oru lobo tohi ati kitehita sangite fad.
\p
\v 11 Kitenya ohoi diho ite to taulo kuna iwati cio kulo Korint.
\v 12 Ida ohoi kingony ite kimaruno niyang ati irwojore ite kimaruno ningi iyo ohoi.
\v 13 Atenya diho ite iya tee kunei ngatitoboti kimaruno kiji niyang ara na ijir, itinga manyu taulo kuningi owati diho ohoi.
\v 14 Kengara manya ko cio kuna lida ara karuhok. Tonyio nyio ongar jiran ko kipal? Kode nyio ngimorihi wangun ko mutohun?
\v 15 Nyio ngotum kitilihita Kristo ko Belial? Nyio ngitiririhi tungani na lida iruk ko karuhoni?
\v 16 Nyio kiruk na longon kiji lo kaji lo Lobanga ko tifine lo lopidinga. Tonyio kira ohoi kaji lo Lobanga na iwar. Iya na lotenyare Lobanga ojo, “atongo cia nan ko icieng manyu alot kiji neicieng manyu ara cia nan Lobanga neicieng ko icieng manyu ara cio kunei”.
\p
\v 17 “Tona ifwonu to kiji neicieng” Manyu itokorati, Lobanga lojo Ketir lobo tohi ibot Ato hati cia nan ahifotu ite
\q
\v 18 Ara cia nan Apa ningi manyu ira cia ite tee kilahaji Ko kariok kunei Lobanga na litweru fad loteny.
\c 7
\cl Kingutit 7
\p
\v 1 Iya na lohitehitare kuna kicihihin morot, ngatinyujoto kenite iyo sangite fad kuna ngitibota kenite ko Okorifi kitingejuho nyujon to kitongo lo rima iyo Lobanga.
\p
\v 2 Kicwarata ohoi lohitongore taulo kuningi ida ohoi kitii kipal diho lobo tungani, ida ohoi kitimumun lobo tungani kode kitinonong lobo.
\v 3 Ida nan atenya jii lo ngoto tenya kweci kuningi lahirihohinore afa nan ite jimitan kikumahi ohoi ite taulo kuniyang na ngohitum ohoi kiwari kode kiweiha kote.
\v 4 Angon nan ko kigeno nahitok kenite kuningi; obolo pufa nei tote omolo kirobi lo tau nei kileng iyo kidak fad na lohirumu ohoi, obolo kwama nei noo.
\p
\v 5 Tonyio lafar kolohifwonu ohoi Masedonia ida afa kuno kenite kuniyang iyoma ati kitigemi ohoi to kikohin fad, kijoria na lolotu to oleng ko bangun na longon taulo.
\v 6 Ati Lobanga na litirobia taulo kulo cio kuna lonieuno kof, ko kitirobia taulo kuniyang to lotuno lo Tito
\v 7 ida manyu ara to lotuno nenge keken ati to kitigolo lo taulo na liculu ite ara diho inyi. Kirihohi inyi ohoi kigeria ningi lo deuno nan, kitoyo ningi ko kibuha ningi to nan, oto kwama nei ko bolojun ilany fad.
\v 8 Kileng afa ngiyauno waraga nei kitoyo, diho ite ida manyu nan ajo nyio afa ager nan na waraga. Adeu nan jimitan igunye waraga nei taulo kuningi ati to kude faritin kuting,
\v 9 ati jija akwama nan ida ara to kitoyo ningi ati tonyio iyauno kitoyo ningi kirwo, tonyio itoyo ite iya na lowahare Lobanga ico ite ida iriafaru ro lobo kikoi to ngati niyang.
\v 10 Iyauno kitoyo lo rima Lobanga kirwo na liyaru cio iyo lwaharu ida ongerihi kiudo taulo ati kitoyo lo kof iyauno wei.
\v 11 Itode tohi na liyauno ene kitoyo lo rima lo Lobanga diho ite, itide ba fiha lo taulo kuningi, ko fiha golun lo kitotoro jinmitan iru ite ko kipal, ko kilongo ningi, ko bangun ningi, ko wahun ningi lo deya nan, ko rija ningi lo tenya, ko kileno ningi! Likeru ite kitotororo ake to kikohin fad jimitan iru ite ko kipal.
\v 12 Inyi na kileng lagero nan diho ite ida ara to tenya lona tungani litii kipal kode tona lipali diho inyi, ati ojir to ketemoni lo Lobanga ideyare kileng ite to kenite kuningi koditi na liningore ite ohoi.
\v 13 Kuno fad itigolo taulo kuniyang lo sodohino iyo kitigolo lo taulo kuniyang kifut ngole afa ohoi ko kwama nahitok tija diho ite tonyio lorumu okorif nenge kitigolo tija diho ite fad.
\v 14 Orumu afa nan ahipufare ite diho inyi ida manyu ite kitidahahi nan riri. Ati iya na larahare sangite fad kuna lohirihohi ohoi ite dede ara manyu pufa niyang to ite iyo Tito dede.
\v 15 Mnyu kimaruno nenge ite obolo bebe kalibuha jimitan iningoho ite fad, manyu ifotu inyi to kihihirita.
\v 16 Akwama nan jimitan atum nan ngonun ko kigeno na ifut kenite kuningi.
\c 8
\cl Kingutit 8
\p
\v 1 Manyu recera kiwak ohoi ite iyen kisa na licio Lobanga kanisa lo Masedonia.
\v 2 Iyo tema na igol bebe, kwama neicieng kileng likilwahati bebe lolotu ara bara lo kimorot na lida otenyuno.
\v 3 Tonyio acio nan sadden jimitan icio icieng iya na litwerunore icieng manyu ogal na litweru icieng. Na lara icieng to kenite ake licio,
\v 4 manyu ileliati diho ohoi ojo ojir manyu icieng kicio lo lwaha cio kulo Lobanga.
\v 5 Manyu ida orumu ohoi kiyen jimitan otum cia icieng kitiyo jii ati icio icieng kenite kuneicieng diho Lobanga ketemoni oto hati iciorihinorihin kenite diho ohoi to wahun lo Lobanga.
\v 6 Kito ohoi kirihohi Tito iya na orumu liciahare inyi ojir olo okeru ene tic lo kisa to ngati ningi.
\v 7 Dong iya na lilanyare ite cio iyo sangite fad iyo kiruk, iyo tenya, iyo yenun, iyo fiha lo taulo ko iyo kimaruno na lingonore ite tohoi, ojir manyu ilanyu cio tone tic lo kimorot.
\v 8 Ida nan ahifudahino ite ati awak nan tema golun lo kimaruno ningi to kitiririo ko kwama to taulo lo kuna kude cio.
\v 9 Tonyio iyen ite kisa lo Lahitok niyang Yesu Kristo na kileng afa lobara inyi iruk okilwahaje to ite ojir to okilwahaje nenge, ite irumu bara.
\v 10 Jijia kisinga nei diho ite tone tenya inyi ene: langole kari ite afa litem ida ara kicwara keken ati wahun to kicwara.
\v 11 Ja itokeru na tic ojir wahun ningi ori ko keruno ningi to kikoi na litwerunore ite.
\v 12 Tonyio kolongon wahun, iruhi kicwara iya na longonore iyo kacwarani, ida ara to tohi na lida inyi otehita.
\v 13 Ida manyu ohoi kiwak ojo ojir kude iyoma kifudati ite ati kiwak ohoi cio itiyo ara na loriworo.
\v 14 To kuno faritin icio cia samun ningi icieng tohi na loru diho icieng manyu to kifwongi mute kicio manyu samun neicieng ite tohi na loru diho ite. Oto cia mute itii cio ara na iriri.
\v 15 iya na ligerorihin ojo, “na linumu obolo ida manyu otek na hitok bebe, na linumu isidi ida many otek na sidi bebe”.
\p
\v 16 Akwama nan Lobanga na lofik tau lo Tito kibuha na lori ko nei to ite.
\v 17 Tonyio ida Tito iruk kitifaha niyang keken ati olotuno inyi to kwama na hitok manyu to wahun nenge ake ake.
\v 18 Manyu kitilihu ohoi ko inyi lobo rece niyang na lokwamati to kanisahin fad to kirwaa nenge kititima layomit na ijir.
\v 19 Manyu na lobolo ilany, onyumu kanisa inyi lo kilihita kohoi lo kiyaru kicwara na lohitiyo ohoi lo rima Lobanga to ken lo kitotoro wahun niyang lo lwaha.
\v 20 Kiwak ohoi rica ida kimongi kolohitiyo ene tic lo tehita kuno sangite kulo lwaha tonyio oborengi.
\v 21 Tonyio kingon ohoi rica kitiyo tic na ijir ida ara to ketemoni lo Lobanga ake ati to ketemoni manyu lo cio.
\v 22 Ilihuno icieng ko lobo rece niyang lohiculu ohoi na litotor diho ohoi wahun nenge lo kitiyo tic bebe nenge kigeno nenge ite.
\v 23 Ojo to Tito ara inyi kaletoni nei lo kitiyo ko nan kiji ningi; ojo to kuna recera ara icieng kawoitahinok kulo kanisahin manyu kulo rima iyo Kristo.
\v 24 Tona itotorohiti kuna cio kitibotita lo kimaruno ningi ko tohi na licio ohoi kipufare ite ojir kanisahin odeu.
\c 9
\cl Kingutit 9
\p
\v 1 Jijia ida nan orumu awak kigero diho ite to ne tenya lo lwaha cio kulo Lobanga.
\v 2 Tonyio ayen nan wahun ningi lo lwaha olotunore many afa apufare ite iyo cio kulo Masedonia ajo many to langole kari iwak ite cio kulo Akaia kicwara manyu lisusu na wahun ningi icieng kitiyo to kwama.
\v 3 Ati aculuno nan kuno recera ojir pufa langun lohingonore ohoi kenite kuningi tone tenya ida iyauno riri ati ojir ite ikukumahino iya lafa lahirihohinore nan ite.
\v 4 Tonyio kolohilihu ohoi ko lobo Masedoniani kifwonu kirumu ite ida ikukumahino kito ciao hoi ingohi re ite monyeri kirumu riri nahitok to kigeno jimitan itii cia ite ilany.
\v 5 Tona adeu nan ajo ojir aculu kuno recera ofwonu kiwaj ite ojir okeruni kikukumahino to kuna kicorita afa licik ite ojir oboto ara tohi na licio ite to kimorot ida ara to taulo kulo rwojun.
\p
\v 6 Itoyen jimitan: tungani na loihi kinyemo kude kuting, odengu manyu cia inyi kuna kuting, na loihi kuna iborengi odengu manyu cia inyi oborengi.
\v 7 Ingohi tungani tolobito tolobito icio tohi na liruk inyi kicwara to tau nenge ida icio tokifudahino ida manyu icio lorwooje tonyio imaru Lobanga tungani na licwara to kwama.
\v 8 Manyu itweru Lobanga kicwara sangite fad ifut diho ite to kisa nenge ojir iyo sangite fad, to tihi fad, tehita sangite fad kuna liwak ite itii cia ite ticiticikuna ijiri fad.
\v 9 Iya na ligerorihin ojo, “Litisarihi inyi kiciorita kunenge diho kakidahak To kofi kofi fad itongo biran Nenge osio tur”.
\p
\v 10 Dong inyi na licwara kinyiemo diho kayaani ko tafa lo daha otum manyu ca kicio ite itifut derona kuningi kulo kinyemo manyu itilalat dengo lo biran ningi
\v 11 Kiciori cia ite bara ko samata to kikohin fad ojir ite isodorore kimorot faritin fad manyu ara diho ohoi ibelo cia kimorot ningi ara lokicwara kwama diho Lobanga.
\v 12 Ida ene tic litiyo ite ara lo kicwara diho cio kulo Lobanga keken ti ifut ko kicwara kwama diho Lobanga to kikohin fad.
\v 13 Tonyio tona tic litotorore ite kenite kuningi, omaj mute cio Lobanga to ningo na lilihita ko tulo ningi lo layomit na ijir lo Kristo, ko kimorot ningi na lingarare ite sangite ko icieng ko cio kuna kude fad.
\v 14 Manyu iyo kilifa neicieng tote ifut cia taulo kuneicieng ko kwama tote to galita lo kisa lo Lobanga na lohicio ite.
\v 15 Ingohi kwama nahitok noo tongon diho Lobanga to kicwara nenge na lida otenyuno.
\c 10
\cl Kingutit 10
\p
\v 1 To riejun lo Kristo nan Paul na lojimi arie manyu abang kalahingon kote ati angere kalaloma.
\v 2 Alelia nan diho ite jimitan kalalotu nan, keco ha manyu angere iya ene lavitare nan diho cio kude kuna libuha ojo kiwar ba ohoi to koditi lo warun lone kof.
\v 3 Tonyio kileng ngohimanya ohoi ene kof, ida ohoi kirem to koditi lo remun lone kof.
\v 4 Sangite kuna lohiremore ohoi ida ara sangite kulo kof. To angati ongon icieng ko golun lo Lobanga na lohigilare ohoi kiwatahin kulo golun lo sitan.
\v 5 Kigila ohoi peha ko tenyi tenyi kulo talerun fad kuna loting kenite ara lo kitijoria genyun lo Lobanga manyu kinief ohoi kibuhibuhi ojir oningo Kristo.
\v 6 Manyu kitigem cia ohoi cio pili kuna logere langun lohiyen jimitan likeru ite ningo.
\v 7 Ideya ite buru lo sangite to oleng. Kolojo tungani ayen inyi otoc jimitan ara inyi lo Kristo ojir manyu inyi oyen ojo kingoni manyu ohoi iyo Kristo iya na longonore inyi.
\v 8 Tonyio kileng ngapufare nan twero na lohicio Lobanga ohoi lo kitiboloro ite ida ara kinyiaharu ite kifwongi, ida riri kinief nan tona.
\v 9 Ida nan ari mejo ahitibanga nan ite to waragahin kunei.
\v 10 Tonyio ongon kude lojo, “iriociho waragahin kunenge manyu orosoho ati to ken nenge kolongon, ida tenya nenge ara lobo tohi”.
\v 11 Ingohi koditi lo kuna cio toyen ojo, tohi na lohitenya ohoi to waragahin kuniyang kolohiru, kifik manyu cia ohoi iyo tic kolohingoni.
\v 12 Ida ohoi kiwak kitiririo kenite kuniyang ko cio kude kuna lomaja kenite kuneicieng. Kalotema icieng kenite kuneicieng to kenite kuneicieng kode itiririoti kenite kuneicieng to kenite kuneicieng ida icieng ogenyi.
\v 13 Ati ida cia ohoi kipufa ogal lohikori na ibehi. Ati kipufa cia ohoi to faji na lohingotohi Lobanga ohoi, faji na logoru many diho ite.
\v 14 Ida cia ohoi kiyaru pufa niyang oloma mejo ida afa ohoi lohifwoni diho ite tonyio lohifwonu afa ohoi many diho ite ko layomit na ijir lo Kristo.
\v 15 Ida manyu ohoi iyo pufa niyang kifwo many iyo tic na litii kaletok. Kigeno niyang inyi jimitan kolosodoro kiruk ningi litan, osodoro manyu cia ticitici kuniyang kiji ningi
\v 16 ojir manyu kititim layomit na ijir many kofi kofi kuna longoni korwonga kuningi. Tonyio ida ohoi kiwak pufare tic na litii faji lo tungani lobo ake.
\q
\v 17 Ati ingohi tungani na lopu to pufa iyo Lobanga.
\v 18 Tonyio ida ara tungani na lomaja ken nenge iruhiti ati tungani na lomaja Lobanga token inyi iruhiti.
\c 11
\cl Kingutit 11
\p
\v 1 Ageno nan jimitan iruk cia ite dataru nei lobo sidi, ati litiyo manyu ite na.
\v 2 Akaino nan to ite okaine lo Lobanga. Ahijayohino afa nan ite iyo retoni lobito inyi Kristo ajo ojir nan ahifotohi ite iya karioni na inyu diho inyi.
\v 3 Ati abang nan tonyio iya lafa litinonongare munu Eva otumiti kitigeraru taulo kuningi to kikoi lo Kristo.
\v 4 Tonyio kololotu lobo tungani ititima Yesu lobo ake ko Yesu na lohititima ohoi kode kaliyauni diho ite layomit na lara ake ko layomit na inyu lafa liruk ite kode kalirumu ite okorif lobo ake ko okorif lafa lifotu ite inyi jimitan geraru na.
\v 5 Ati ida nan aside kalara to kitiririo ko kuna jayona lojimi
\v 6 kileng ngida kitiyeni nan kifura ati angon nan ko genyun, lohitotoru manyu ohoi ene otoc diho ite, to kikohin fad.
\v 7 Ara afa kipal kalatisidi nan ken nei ojir ahiting ite kai to kititima layomit lo Lobanga diho ite?
\v 8 Abel nan kanisahin kuna kude lo rumunore lwaha ojir arwaare ite.
\v 9 Manyu lafa langonore nan ko ite kalawak lobo tohi, ida afa nan aticuna lobo tungani, tonyio recera kuna lofwonu to Masedonia afa lohilwaha nan to sangite kuna lawak nan. Aric afa nan ken nei ojir ida ara ter diho ite manyu orihe cia asodoro kitiyo jii.
\v 10 Iya na longonore tenya lo dede lo Kristo iyo nan, oru lobo tungani to kof lo Akaia na ngitik ene pufa nei.
\v 11 Tonyio? Ida nan ahimaru ite? Oyen Lobanga jimitan ahimaru nan ite.
\v 12 Manyu arihe asodoro kitiyo tohi na latiyo nan lo kitidahahino kuna longon kitiririo kenite ko ohoi riri.
\v 13 Tonyio ara kuna cio jayona kuna italeri, cio katinonongak kuna litetema rahun jayona kulo Kristo.
\v 14 Manyu ida tungani ipany na tonyio kileng sitan to ken itetemita malaika lo wangun.
\v 15 Ida ara tenya lo kipany kalitetema manyu karwaak kulo biran. Lohicungi neicieng mute tohi na locam to ticitici kuneicieng.
\p
\v 16 Anyiahata nan jimitan keco lobo tungani kifik nan ara kadataroni. Ati kalifik ite, kifotutu nan iya na ngifotunore kadataroni ojir manyu nan apufare lobo sidi.
\v 17 Iyo ene pufa lo kitiboloro lo kenite, ida nan atenya iya na ngotenyare Lahitok ati iya kadataroni.
\v 18 Tona lopufare cio beciek iya na lopufare kof, apufa manyu cia nan.
\v 19 Imohorita ite ko kadatarok to kwama tona ligenyare ite.
\v 20 Dede itum ite mohoro kileng ko tungani na lohitiraha ite ara opihin, kode na lohitimumuna ite kode na lohittinononga ite kode na lorosohino ken diho ite kode na ngohinang ite komoma.
\v 21 To riri nei aruk nan jimitan kibangiha afa ohoi kitiyo jii. Atenya dong nan iya kadataroni ajo, tohi na lopufare lobo tungani, apufare manyu nan.
\v 22 Ara icieng Ibru? Ara manyu nan. Ara icieng Israel? Ara manyu nan. Ara icieng lotataha kulo Abraham? Ara manyu nan.
\v 23 Ara icieng karwaak kulo Kristo? (Ingohi dong atenya mejo tungani na lodaha mining) Ara hati bo nan karwaani lo Kristo na logal fad. Latii nan tic na igol ogal, kitori mabus kakeny beciek, kilumi bebe, kitifuruni kifadaru kakeny beciek,
\v 24 arumu kario keek ongon kakeny miet iyo Judeahin.
\v 25 kilumi to iluhi kakeny uni, kicahi to morutok kakeny lobito, kijuhe babur to nam kakeny uni, aget katwa lo nam karwe ko far.
\v 26 Alot nan ara lotita keken oru kiyoma. Afuru nan to kareco, afuru iyo kabelak, afuru iyo cio kulo kof nei, afuru iyo misiok, afuru to kangite, afuru to mwang, afuru to nam, manyu afuru iyo recera kuna italeri.
\v 27 Lagingahino nan kitiyo na lida agetorita tolobo, ladik nan kinga ko kure na latongo oru daha, latong nan oru kyelani ko kirobi.
\v 28 Iyo kuna fad acuna tenya lo kanisahin fad.
\v 29 Ngai ligoro ida nan angar ko inyi kigoro nenge? Ngai lourohino iyo kipal lida nan audo tonyi?
\v 30 Kalapufa nan, apufa nan to sangite kuna litotoro kigoro nei.
\v 31 Lobanga monye lo Lahitok niyang Yesu Kristo na locam omajati karihin ko karihin oyen jimitan ida nan ataler.
\p
\v 32 To Damaskas ocik gavuna na litiyo iyo kabu Aretas ojo ojir iririati kang lo Damaskas ojir kiniefuni nan.
\v 33 Ati kiticuluni nan to aduhu ara lotupulec na longon iyo lohitir lo kiwata, afurunore nan to kac kunenge.
\c 12
\cl Kingutit 12
\p
\v 1 Asodoro nan pufa, kileng ngoru lobo tohi larumu nan, alo dong nan iyo tenyi tenyi kuna lohitotorohi Lobanga nan iyo kitirija.
\v 2 Ayen nan tungani to kiji lo cio kalafa longon iyo Kristo na lotingori many kai lo uni liyaru jijia karihin tomon kongon. Kode iyaru Lobanga inyi ko ken nenge fad, ida nana yen, Lobanga loyen.
\v 3 Manyu ayen nan jimitan ene tungani, kode to ken kode ida ara token ida nana yen Lobanga ake loyen
\v 4 lotingori inyi many Paradis. Olo inyi oning tenyi tenyi kuna igoli, tenyi tenyi kuna lida ocam cio to tenya.
\v 5 Apufare nan koditi lona tungani ati ida nan apufa to ken nei mayak kalara to goro nei.
\v 6 Kileng many adi ngapufa nan, ida nan ara kadataroni tonyio irumu atenya tenya lo dedeati ida nan apufa ojir lobo tungani ida iiyo to nan ogal tic na latiyo nan ko tenya na latenya nan.
\v 7 Lo kitiho nan ojir ida ating ken nei bebe to kuno sangite hitoha lohitotorohini nan, kicori nan kikwai katwa lo ken nei, ifak lo sitan lo kitigema nan.
\v 8 Alelia nan kakeny uni jimitan ojir Lobanga odume inyi to ken nei.
\v 9 Ati ojo inyi diho nan, “kitum kisa nei isi, tonyio oboto golun nei otoc iyo goro”. Tona apufare cia nan goro nei bebe ojir golun lo Kristo itongo ken nei.
\v 10 Inyi licio nan akwama goro nei to Kristo, adihare goro, moro, kidak, kitigema ko golun lo manya. Tonyio kalagoro nan inyi jimitan agol nan iyo Kristo.
\p
\v 11 Latirak nan ken nei ara kadataroni ati ite lohirosohi nan. Ngara ite lohitikwama nan tonyio ida nan aside alany kuna jayona lojimi kileng many adi ngida nan ara lobo tohi.
\v 12 Sangite kuna litiboto kijayo iya kitotorita, sangite kuna litirima litihino kiji ningi to diha na hitok.
\v 13 Isidiha ite igal kanisahin kuna kude to nyio? Kalida ara to lahahino ohoi ida kira ter diho ite? Kilautu ohoi tone kipal.
\p
\v 14 Jijia alotuno nan waja ite lo kakeny uni manyu ida cia nan aluticuna ite tonyio ida ara tee lifita katomonok kuneicieng ara katomonok lifita tee.
\v 15 Tona akwama cia nan kitiyore sangite fad kuna langonore nan tote atum kipotoro kileng ken nitole. Kalahimaru nan ite bebe iya ene lahimarunore, ocam to ite kitingora kimaruno ningi to nan?
\v 16 Kileng ngarahare many adi jii ida ngole afa nan ara ter diho ite. Oto hati ake kilefere nitole, lahiniefu nan ite to kitigulunya.
\v 17 Lahitimumun afa nan ite to kuno cio laculu nan diho ite?
\v 18 Aculu afa nan Tito diho ite ko lobo rece niyang, kode lohitumumun ha nyafa Tito ite? Ida afa ohoi kitiyo to okorif lobito manyu kijifita kikoi lobito?
\p
\v 19 Iiyo ite to faritin fad jimitan itongo kuno tenyi tenyi lohititima ohoi ara kifura to kenite kuniyang? Kitenyitita ngun ohoi ketemoni lo Lobanga iya cio kuna longoni iyo Kristo manyu sangite fad kuna lohitiyo ohoi morot, ara kulo kitigolo ite.
\v 20 Tonyio abang nan ori mejo kalalotu nan, ida cia nan ahirumu ite iri iya nan manyu ida cia ite irumu nan ari iya na liwahare ite. Amang nan mejo ongon cia mute ngolofa, okaine, kilongojita, kokora, kitinononga, monga, kitidara ko rujon lo ningoro.
\v 21 Amang nan mejo kalalotu cia nan, kicio cia Lobanga nein an kinyia riri to ketemoni ningi, manyu mejo acira cia nan to cio kuna iborengi kuna afa lipal ketemoni ida hati irwooti to ticitici kuna iboti kuna litii icieng. Kipalipali kulo ticitici kulo somun ko kulo lomuna.
\c 13
\cl Kingutit 13
\p
\v 1 Waja nitole ite cia lo uni inyi ene. Ojir tenyi tenyi fad itisadeni to cio are kode uni.
\v 2 Lahicik afa nan ite iyo kiti are lo kitongo nei ko ite. Awak manyu kinyiahata ciha ite jijia larujore nan to kiji ningi, kalaitu nan ida cia nan angohi cio kulafa lipal ketemoni ko kude kuna longoni.
\v 3 Iya na liwahare ite deuno kitotori jimitan otenya Kristo to katwa nei. Ida inyi igoro iyo kitiyo ko ite ati ogol inyi to kiji ningi.
\v 4 Tonyio ngatiyen fad jimitan ogurohini afa inyi to kigoro ati owar inyi jijia to golun lo Lobanga. Iya na kigoroho ohoi iyo inyi ati to golun lo Lobanga kiwar ciao hoi ko inyi kirwaare ite.
\v 5 Ingingijata kenite kuningi otoc lo deya kalingoni ite iyo kiruk, ititem kenite kuningi. Ida ite. Ida ite iheru jimitan ongon Kristo Yesu katwa ningi- mayak ba kaliuroro na tenya?
\v 6 Manyu ageno nan jimitan irumu cia ite ojo ida ohoi lohiuroro tema.
\v 7 Jijia kilifa ohoi Lobanga jimitan ojir ite ida itii lobo tohi irohoi. Ida ara to jimitan ojir cio odeunore ojo lohirang ohoi tema ati lo jimitan itii cia ite tohi na ijir kileng many adi ngori mejo lohiuroro ohoi.
\v 8 Tonyio ida ohoi kitum kitiyo tohi na lida ara dede ati kitiyo ohoi tohi lo dede.
\v 9 Kikwama ohoi kileng ngohigoroha ohoi ati ite igoli, manyu ara kilifa niyang diho Lobanga na lohijo ngohitigol inyi ite.
\v 10 Inyi ene tenya licio nan agero kuno sangite kileng ngaru, ojir kalalotu nan ida alotu to kingere to kitiyore lo twero nei, twero na lohicio Lobanga nan lokisinga ite ko kitiboloruno ite iyo kiruk ningi ida ara lo gila kiruk ningi.
\p
\v 11 Lohicungi recera, itongoti ara na ijir. Igeriati nyujon, itoning kilelia nei, imorihiti taulo, itongoti to kisiliban. Oto cia Lobanga lo kimaruno ko kisiliban kingon ko ite.
\v 12 Itifonyohinoti to fonyo lo nyujon.
\p
\v 13 Kifonyo cio kulo Lobanga fad ite.
\v 14 Ingohi kisa lo Kabu niyang Yesu Kristo ko kimaruno lo Lobanga ko kimora lo Okorif na Inyu kingon ko ite fad.