forked from Tech_Advance/kpj_reg
115 lines
14 KiB
Plaintext
115 lines
14 KiB
Plaintext
|
\id EZK
|
||
|
\ide UTF-8
|
||
|
\rem cc6-48 (he was going to finish in the tribe and send to me in 2015??)
|
||
|
\rem aut Lariwana
|
||
|
\rem dat 2015
|
||
|
\h Ezekiel
|
||
|
\toc1 Ezekiel
|
||
|
\toc2 Ezekiel
|
||
|
\toc3 ezk
|
||
|
\mt1 Ezekiel
|
||
|
\c 1
|
||
|
\p
|
||
|
\v 1 Iruyre txu-my bde rỹireu, inaubiòwa ahãdu-u, wyra inataõnihikỹ bedeu, diarỹ, xaxedòte Ezekieò, Buzi riòre, Babilõnia-ki rahãwanymy raremyhỹ, keba bero ijà-ki, judeo mahãdu, wetxu-my rirahure simahãdu-wna. Biuwetyy rarayre, tahe Deuxu-my rabire rasiwsemy.
|
||
|
\v 2 Tuu rutỹỹnyre bedeu, (exilio) Iòlò Joaquim iruyre wyramy ròtena-kibde riwymy roimy raremyhỹ.
|
||
|
\v 3 Tai Babilõnia-ki, keba bero ijà-ki , diarỹ Deuxu wadee rybe-ò raholare tahe irurunihikỹ ixiki reeryre.
|
||
|
\v 4 Retehere, tahe yhydebure-my rabire iraru-rbi rarerimy. Biudelaa ròhònymyhỹ biuwetyynihikỹ-rbi. Biuwetyy werura, heòtyhykỹlemy roimyhỹ, heòty wotya-ki tahe aõbo, brõze wesemy tai ruxaranymyhỹ.
|
||
|
\v 5 Yhydeburekyki tahe, inaubiòwa iròdu wemy rabire. Iny wesemy idi retehere,
|
||
|
\v 6 uriletahe tahe sohoji sohoji rỹimyhỹ, inaubiòwa-my iòsny sõe tule iaubiòwa-my tereny.
|
||
|
\v 7 Itireny òbitire, iwareny tahe broreni wsemy idi retehere, tahe brõzi wsemy ruxaranymyhỹ.
|
||
|
\v 8 Iòsny, tee inaubiòrehãre, sohoji sohoji, inaubiòwa-my tebòreny sõe, iny debò wsemy, terawoki rỹire.
|
||
|
\v 9 Inatxi tereny iraymy idi rỹimyhỹreny, tenorareny widee rỹimy. Tahe inaubiòwa-my rexiwinyrenyre, tahe butumy rariamyhỹreny, rexirahòreõhyy.
|
||
|
\v 10 Iròdu sohoji sohoji, iòsnyreny wirbi iwitxira witxiralehekỹre: tako-ò iny òsny wsere, ruruwerbi-ò hãlòe òsny wsere, hywe werbi-ò broreni òsny wsere, ihowo-ò tahe nawiihikỹ òsny wsere.
|
||
|
\v 11 Inatxi iròdu de raraymyhỹ biu-ò, tahe sihoji sohoji de tabireldu-ò tee ritòròmyhỹ; ijõ tee inatxi tahe, taumy idi rihetynymyhỹ.
|
||
|
\v 12 Iròdu sohoji sohoji, inaubiòwa-my tiòtiò retehemyhỹ, tai tahe aõtxile tiò ròimyhỹrenyre, ixiwerydỹỹsiramy aõkõ.
|
||
|
\v 13 iròdu mahãdu yki hãte loosò wse aõbo rỹimyhỹ, tiòtiò reamy rỹimyhỹ, heòty ire ranihiỹmyhỹ, tahe heòty-rbi biudelaa ròhònymyhỹ.
|
||
|
\v 14 Tahe iròdu mahãdu tiòtiò raòrunymyhỹreny biudeelaa wsemy.
|
||
|
\v 15 Inaubiòwa iròdu-di retehemyhỹu, ianaubiò tewe-my rabire, sohoji sohoji, iwareny bireki.
|
||
|
\v 16 Tewe inaubiòwa wiwselehekỹre, mna wihikỹ wsemy rasrỹnymyhỹ. Tewe mahãdu wo-ki, ixby tewe-õ roimyhỹ, werehedimy,
|
||
|
\v 17 tai tahe tewe, ixiwerydỹỹxiramy aõkõ tiò tiò rariamyhỹ.
|
||
|
\v 18 Tewe ti heka rue-di rỹximy roimyhỹ.
|
||
|
\v 19 Iròdu mahãdu rariamyhỹu, tewe mahãdu ibirerenydi rariamyhỹ; iròdu mahãdu su-rbi rexiukòmyhỹu, tewe mahãdu tule iherenyki su-rbi ruòmyhỹ.
|
||
|
\v 20 Iròdu mahãdu ixideewimy titxi ròimyhỹ tahe tewe mahãdu iròdu hekile titxi ròimyhỹ, kiemy iròdu boho riwedunymyhỹreny.
|
||
|
\v 21 Kiamy tahe, iròdu rariamyhỹreu da kõmy aõbo ruhumyhỹreu da biutxi ruòmyhỹreu, tewe boho iwserenyle riwinymyhỹre.
|
||
|
\v 22 Iròdu boho ratyaki tahe, aõbo waxiwahate wsemy rirahetynymy roimyhỹ, mnarultyrxỹ-di riwinymy.
|
||
|
\v 23 Irahety rawoki tahe, iròdu boho tereny inatxi inatxi-my riraynymyhỹ tahe tabireldu de-ò tereny riterenymyhỹ, ijõ inatxi-di tahe taumy rihetynymyhỹ.
|
||
|
\v 24 Diarỹ tewodỹỹ-ò raholamyhỹ, ruòmyhỹu. Beronihikỹ wodỹỹ wsemy rawodỹỹnymyhỹ, woudu mahãdu wodỹỹwse rawodỹỹnymyhỹ, Deuxururuterenihikỹ rybe wsemy rawodỹỹnymyhỹ. Tuòsò ixawimyhỹu tee rirasenymyhỹ.
|
||
|
\v 25 Tahe, ihãrele bde wodỹỹ-ò raholamyhỹ, irahety roimyhỹrbi bde wodỹỹ reamyhỹ.
|
||
|
\v 26 Heto wsemy irabumy roimyhỹ ratya-ki, aõbo rynana wsemy rỹimyhỹ, safira-di relemyhỹre wsemy. Tai tahe iny-õ runymyhỹ, hãbu wsemy,
|
||
|
\v 27 tahe tii roosòmyhỹ, brõzi heòty kyki roimyhỹre wsemy. Butumy tii roosòmyhỹ heòty juxara wsemy.
|
||
|
\v 28 Toosòna tahe uajina lỹre wse rare, biuwetyy-ki roimyhỹre wsemy. Kahe loosòna juxarahakỹ rare, Deuxururuterenihikỹ tuu riteòsinyre.
|
||
|
\c 2
|
||
|
\p
|
||
|
\v 1 Tuu rabireu, rariowyre tahe waò su-ò redere. Kia tahe rybe-ò raholare, kiamy rarybemyhỹ: — Hãburiòre, lmamy myike. Adee ararybekemyreri.
|
||
|
\v 2 Wadee rarybemyhỹ wnaletahe, Deuxutyytby wadee ralore tahe tii lmamy riwatmadỹỹnyre. Tahe rybe raholare, kiamy rarybemyhỹ.
|
||
|
\v 3 Hãburiòre, diarỹ arateònyreri Israel mahãdu-ò, warybe rbiòtu rekoare, waòldu-my relerenyre. Wiji dore warybe siradỹỹmy ihỹrenyre, iwse ilabiereny rybesiradỹỹ-my roiremyhỹ wsele.
|
||
|
\v 4 Tõhõtiõrenyre tule riwatyhynyrenyõmyhỹre. Tahe tamyreny rybemy arateònykre, diarỹ Deoxo, timybo tamyreny ararubekredi marybekre tamyreny.
|
||
|
\v 5 Arybe-ò roholarenykre-wna, tule arybe-ò roholaõrenykre-wna, profeta taireny ratxiramy rieryrenykre.
|
||
|
\v 6 Kai tahe, hãburiòre, uritre ilaureny brebuõmykre, tule aõmybo adee raryberenykreki. Tii boho adee rexiurirenykre tule ibinamy adi ratxirenykre; iykyrenyki matxikrehe aõma wsemy matxikre, itytibòrò kyki matxike wsemy. Ihãrele tahe, brebuõmykre rybesiradỹỹdu mahãdu lau, aõmy adee raryberenykreki tule.
|
||
|
\v 7 butumy aõmybo adee ararybekre-my marybekre, rohorenymy aõbo da roholaõrenymy aõbo. Teery aõbo irybesiradỹỹrenyre.
|
||
|
\v 8 Hãburiòre, boholakre aõmybo rarybereri. Rybesidỹỹmy uritre noõmy iwsereny. Ary biraynykre tahe birsỹkre aõbo adee ariwahinykre.
|
||
|
\v 9 Tai tahe debò-my rabire, wadee riterenyreri-ò, tyyrti rase rase-di tebòki.
|
||
|
\v 10 Tii wadee rirawere, kia tahe rybe tai rirtinymy roimyhỹ, iwebrò-ki tule. Irtine tahe kia roimyhỹ, aõdese-my lorari tai roire, sỹbina ta ohitxi ijõra.
|
||
|
\c 3
|
||
|
\p
|
||
|
\v 1 Kiamy Deuxurarybere: — Hãburiòre, kaa tyyrti rase birsỹkre, irahudi tahe makre Israel mhãdu-ò rybemy.
|
||
|
\v 2 Tai tahe wary reraynyre tahe tii tyyrti rase wadee riwahinyre ariròkremy.
|
||
|
\v 3 kiamy rarybere: — Hãburiòre, kaa tyyrti rase adee rewahinyreri birokre; idi aweryri bitỹxinykre. Tahe reròre, bdiwsemy ibree.
|
||
|
\v 4 Tahe kiamy Deuxurarybere: — Hãburiòre, makre, tahe aõmybo ararybekremy Israel mahãdu-ò marybekre.
|
||
|
\v 5 Iwitxira mahãdu, irybesiramy rỹimyhỹre-ò aõkõ arateònyreri, Israel mahãdu-ò.
|
||
|
\v 6 Iwitxira hãwahãkỹ-ò, irybe isaramy rỹimyhỹre-ò arateònykeki, tule irybereny bierykõmy, my mahãdu-ò makeki, arybe-ò ywimy roholarenyke.
|
||
|
\v 7 Kiaõmy tahe Israel mahãdu tiu arybe-ò roholarenyõtyhy, kiemy warybe-ò ijohonaderarenyre. Butumy tiiboho tõhõtiõrenyre tule irybesiradỹỹrenyre.
|
||
|
\v 8 Wiji tahe kai iwsereny araijenykre, õhõtiõmy tule ateremy, iwserenyle.
|
||
|
\v 9 Ateremy arawinykre, mnatere wsemy tule jiamytxitere wsemy. Taiki tahe, uritre brebuõmy, ilaureny uritre brebuõkre.
|
||
|
\v 10 Deuxurarybemyhỹ: — Hãburiòre, boholawikre, itxi õhõti reakre warybetxi.
|
||
|
\v 11 Irahudi tahe aijoireny-ò rybemy makre, wetxu-my rirahuremahãdu-ò. Diarỹ DeuxuAõmybo rarybererimy tamyreny marybekre, roholarenykre-wna tule roholarenyõkre-wna, ihãrele tamyreny marybekre.
|
||
|
\v 12 Tahe Deuxutyytby biu-txi riwadyre, tahe wahewo-ò rybe-ò raholare, biu ramytxinymyhỹre wsemy. Kiamy irà-ò raholamyhỹ: — Biu rariemy, Deuxururumy beàlàke!
|
||
|
\v 13 Iròdu mahãdu dewodỹỹ-ò raholamyhỹ tee rihtenymyhỹ-ò, tule tewe wodỹỹ-ò raholamyhỹ, iwodỹỹnihikỹmy raholamyhỹ, biumytxi wsemy.
|
||
|
\v 14 Tai tahe Deuxururu wamy rahỹỹnanyre, ityytby irbi riwadyre; tai tahe diarỹ reburere sõemy wawo-ki reburere.
|
||
|
\v 15 Tahe Teò-Abibe-ò rare, Keba bero ijàti-ki roimyhỹre, tai judeo mahãdu rasỹnymy rỹiramyhỹ, wetxumy ridyrenyreu. Debò inatxi txu-my tai bde reijere, raberumy, aõmybo rabireki tule tamy raholareki.
|
||
|
\v 16 Debò inatxi txu sỹtbymy, Deuxukiamy wadee rarybere:
|
||
|
\v 17 — Hãburiòre, diarỹ Israel mahãdu-di itxeredu arasnyra. Kai biteòarinybenykre, timybo deòrxina adee ariwahinykremy.
|
||
|
\v 18 Kaa diarỹ hãbu bina rurukremy adee ararybekreki, tahe kai biteòarinyõkreki, aõbina bina widỹỹ ixãwikemy, taumy rihedỹỹnykemy, tai tahe òrarunaki tii rurukre, taiki kaile irbu bdeòrarukre.
|
||
|
\v 19 Kai hãbu bina biteòarinykreki, tahe tii aõbina bina ririõkreki, tiiemy òraruna-ki rurukre, kai tahe taiki buruõkre.
|
||
|
\v 20 -- Hãbu òbiti-õ aõbina bina riwinykreki, tahe diarỹ aõ iòhãtxi ariijranykre, tai rurukre, kai biteòarinyõkreki. Tahe diarỹ aõwiwi riwinyretxi wanohõti reaõtyhy. Tahe kai irbu bdeòrarukre.
|
||
|
\v 21 Kai hãbu òbitimy nodu biteòarinykre-wna, òraruna widỹỹõmykremy, tahe tii arybe-ò roholakre-wna, òraruna widỹỹ-rbi ixawikre, taiki tahe tii ruruõkre, kai tule buruõkre.
|
||
|
\v 22 WaDeuxururuterenihikỹ, wabireki ratximyhỹ, tahe kiamy wadee rarybere-ò raholare: -- Myike, hãwalò bde-ò makre, tai tahe adee ararybekre.
|
||
|
\v 23 Tai tahe hãwalò bde-ò rare, tai Deuxururuterenihikỹmy rabire, keba bero ijà-ki tuu rabire wsemy. Suu-txi waò-my resere,
|
||
|
\v 24 tahe Deuxutyytby wawo-txi ralòre, tii riwatmadỹỹnyre. Deuxuwadee rarybere: --Make aheto-ò tai tahe ijo ixidi biwerynykre.
|
||
|
\v 25 Kai hãburiòre, reruti-di mataataakre, bohonyke ihoõre.
|
||
|
\v 26 Adòrtò ariteredỹỹnykre, tai tahe iny mahãdu rybesidỹỹ biteòarinyõkre.
|
||
|
\v 27 Irahudi, ixby adee ararybekreu, ararybedỹỹnykre, iu tahe tamyreny marybekre, diarỹ Deuxutuu raryberamy. Ijõ iny-õ arybe-ò roholakre, ijõ taxe aõkõre, kiemyhe tii boho irybesiradỹỹrenyre.
|
||
|
\c 4
|
||
|
\p
|
||
|
\v 1 Deuxukiamy rarybere: — Hãburiòre, txijolu-õ bimyke, irahudi tahe akotxi bitdikre, ityreki tahe Jerusalẽ bidexeãnkre.
|
||
|
\v 2 Kaa dexeã-ki iòldu riyrawonymy biwinykre, iòtursòna, iòwòna ijõdimy, itỹhinareny ijõdimy tule imakinareny ijõdimy, mnaòtity dejuxuna.
|
||
|
\v 3 Myjina wotimy ije bimykre, irahudi òtity wsemy bitdikre, kai, hãwa-wna awotyarenytxi. Hãwãwerbitxi betehekre. eresyna robymy roireri, kai tahe teyrawonymy idi atxiteri, kaa heka Israel mahãdu deòrxinakre.
|
||
|
\v 4-5 Hywe werbitxi boike, atyre Israel mahãdu òraru ariutxienykre. Kai kuaki herimy boibekre, iòrarureny utxiedi betyymy, trezento noventa txu-my, kiemy diarỹ tiiemy retxuhòrenyra aõbina bina-my rutỹỹnyrenykremy, sohoji txu-my wyra-di.
|
||
|
\v 6 Kaa tiubo mahukreu, ruruwerbi-ò bexirahorekre, tai tahe Juda òraruna utxiedi betyykre, kuarenta txu-my, kia wsemy, sohoji txu-my, wyra-di aõhõkỹmy rutỹỹnymyhỹrenykre.
|
||
|
\v 7 -- Òbitimy betehekre Jerusalẽ-di iòldureny riyrawonymy idireny rỹireri. Tahe õredera birasenymy hãwahãkỹ-my marybekre timybo rutỹỹnykremy.
|
||
|
\v 8 Arataataakre, taki tahe timy aixirahoreseõna, tuhyy tahe iòldureny hãwahãkỹ riyrawonykre.
|
||
|
\v 9 -- Katahe trigo bimykre, xevada, ervila, letxila, trigo smo ta aveia ijõra. Butumy wimy biurinykre idi pão biwinykre. Tii heka birsỹmy mabekre, trezento noventa txu bdeu, ruru werbi-ò bexirahorekreu bdeu.
|
||
|
\v 10 Kai inaubiòwalemy pão smo biymyhỹkre txu sohoji-di, ywimy biymyhỹkre.
|
||
|
\v 11 Bee biõmyhỹkre, tule iurihixina ijõdikre: inatxi bedeò-my biõmyhỹkre txu sohoji-di, tule ywimy biõmyhỹkre.
|
||
|
\v 12 Iny ijny werbu wetby-di heòty, biworonymyhỹkre, paõ iburesò-di bisõmyhỹkre tahe pão biymyhỹkre, butu iny mahãdu ruki.
|
||
|
\v 13 Deuxutule rarybere: — Tiubo Israel mahãdu bdebde-my ariubtỹnykreu, kawsemy rabyremy roirkre, rsỹna ibinamy ratòemyhỹre rirsỹrenykre.
|
||
|
\v 14 Kiamy rerawyònyre: — Wadeoxo, wawedu, kiahe aõkõre! Diarỹhe tiú rsỹna ibinamy rỹiradi tiú rexisunyõmyhỹre. Uladu tuhyy raumynyre, tiu iròdu xinamy rurumyhỹre reròõhyymyhỹre da kõmy aõbo iròdu debure riròmyhỹre uhe.
|
||
|
\v 15 Tai tahe WaDeuxu rarybere: — Heboxe. Broreni ijnylebohe ixinamy biuhekre, idi heòty biworonykremy; ityre-ò apaõ bisõbekre.
|
||
|
\v 16 Ixby rarybere: — Hãburiòre, paõ aritòenykre, Jerusalẽ hãwa-ò rehemnyke. Tai tahe iny mahãdu, rsỹna ta bee riwòrenykre.
|
||
|
\v 17 Tii boho irsỹnareny ihoõmy rekoakre tule bee ihoõmy rekoakre. Sõemy rõhõtiweryweryrenykre, ihyy tahe rituerenykre, taòrarureny òraru-ki.
|
||
|
\c 5
|
||
|
\p
|
||
|
\v 1 Deuxu rarybere: — Hãburiòre, mayrehe jureeõ bimyke, idi tahe aòsiri ta arade biòròkre. Irahudi tahe arade biutxienykre, aòsiri tule, utxiena ersyna-di, irahudi inataõmy biwirareakre.
|
||
|
\v 2 Tiubo iòldureny hãwahãkỹ weryràdỹỹ ririkreu, hãwãtya-ò makre, tai tahe arade sohoji inataõ urihixinarbi bisõkre tule aòsiri.irahudi tahe hãwahãkỹ werura-di mariakre tai tahe mayrehe-di arade uhe biruxmonykre, ijõ uhe tahe biu-txi idi behukre, tahe yhy ridykre. Tai tahe diarỹ wamayrehe-di tamy areakre.
|
||
|
\v 3 Radeti-õ birarenykre tahe atyy ijeti-ò bitdikre.
|
||
|
\v 4 Irahudi tahe radeti-õ bitakre, idi heòty-ò behukre ixinamy tai rookre. Heòty irbi ròhònykre, butumy Israel hãwãhãwa-my roberakre.
|
||
|
\v 5 WaDeuxu rarybere: — Jerusalẽ hãwa-di ini beteheke. Butu bde bde tyamy resnyre tule iwitxira hãwãhãwãiweruramy reteòtenyre.
|
||
|
\v 6 Kia tahe Jerusalẽ warybederamy rekoare, tai tahe hãwãhãwãwitxira rỹira ratyrehe, irybe siradỹỹmy relere, iny mahãdu iwerurarenymy rỹira ratyre warybesiradỹỹmy relenyre. Jerusalẽ warybe deramy rekoare, wabdeywidỹỹna rarsedỹỹderamy rekoare.
|
||
|
\v 7 Wiji tahe Jerusalẽ mahãdu, boholawibenykre warybe-ò, diarỹ Deuxu rarybereri-ò. Wabededỹỹnana-ò teòbytenyõte tule aõmybo adeereny rarybere terarenytenyõte, taiki heka sõemy jei jei ixideereny tewahinyte, hãwãhãwãwitxira witxira ryira ratyre aweryrarenymy. Iwitxira iny rỹira bdedỹỹnana hakỹle tewinytenyte.
|
||
|
\v 8 Taikita heka diarỹ Deuxu, umyreny rahitxireri. Diarỹ butu iny ruki aõbina bina renymy adeereny ararybekre.
|
||
|
\v 9 Aõbina binahãkỹ tewinytenyte òraruki, Jerusalẽ, aõhỹkỹmy arasnyrenykre, tiu tuu rewinyõre tule tiu ixby tuu tamy ariwinyõtyhy.
|
||
|
\v 10 Iiòrari-ki, Jerusalẽ-ki tby mahãdu tariòle riròrenykre, iriòre mahãdu tbyle riròrenykre. Diarỹ tuu aõhỹkỹmy arasnyrenykre, mobo irumy rarikre tahe bde bde-my ariubtỹnykre.
|
||
|
\v 11 Taiki tahe, kaahe Deuxurybere: kaiboho waheto tebinanytenyte, aõbina binahãkỹ-di tule aõxuxu-di texunytenyte, taiki tahe kiamy rexirybenyre, arahurerekre adeereny aratòenymy aõkõ, adireny arawobruke ihoõre.
|
||
|
\v 12 Inataõ butuna rbi, sohoji butuna rituekre, rbuna-di ta rmadesemy ijõra, hãwãwokile, ijõ sohoji butuna urihixina tasỹ, mayrehe-di rituekre, ahãwareny webròmy, ijõ inataõ urihixina tasỹ, yhyòle ariuberanykre tai tahe mayrehe-di iherenymy areakre.
|
||
|
\v 13 -- Kai boho waruru ixiki bierybenykre, wadebure waehehe bierybenykre, wawo rihykrexiery ixãwikre. Kaa butumy rutỹỹnykreu, kaiboho biwatyhynybenykre, diarỹ kamy butumy adeereny raryberemy, kiemy sõemy tiwateburenytenyte, arybesiradỹỹrenydi.
|