Karaja/25-LAM.usfm

\id LAM
\ide UTF-8
\rem dat 2016
\rem aut Larewana
\h Lamentations
\toc1 Lamentations
\toc2 Lamentations
\toc3 lam
\mt1 Lamentations
\c 1
\p
\v 1 Aõhewe Jerusale rarimy roimyhyre, juhu-u hãwãsoemy iny-di roimy raremyhy! butumy iny bdebde-my rityhynymy ryiramyhy, wiji tahe wytese wse-my ihyre, wedu-my raremyhy, wiji wetxu wsele ihyre.
\v 2 Ruu iyhyomy dobumyhyde, irube iosyny-di dytynymyhyde. Ibowa mahadu-o rariohyyre iibru ixawidyymy. Butumy ribonyrenyre wiji ioldu-my relemy ihyrenyre.
\v 3 Judeo mahãdu tasureny ribi irehe-o ridyrenyra tai tahe wetxu wsemy aõhykymy dutyynymyhyde, aõ utxieheky-di naaõmysydyymyhyde. Iwitxira hawa-ki nasynymyhydenyde, tahe tai iixielehydyyna ihoore. Iherenymy ijradu idireny rirurawonymy idireny nyimyhyde, tiu rahenyrenyotyhy.
\v 4 Rymahãdu siaõ-o iny-di roimyhyre ibderyrymyhydenyde, kiemy tiu iny-o idi naõhyymyhyde bde deysa ryimyhyre-o. Ijadoma mahãdu Deuxu  heto-ki rawiunymyhyrenyre brebumy ihydenyde, xaxedote mahãdu naõhitxinymyhydenyde. Hawahaky aõhykymy dutyynymyhyde iny tai ihoore ube-my rexibutunyke.
\v 5 Ioldu mahãdu tuu nahyynanymyhyde, tamyreny aõ awihyy namyhyde. Deoxo wedunihiky, Jerusalem aõhykymy disynymyhyde, tai sydu mahadu, oraruna nihiky oraru-ki. Ioldu mahãdu iriorereny rimyrenyra tahe iwitxira hawa-o ridyrenyra.
\v 6 Jesusalem ruxera heka juhu bdeuludu rare, iwedu mahãdu brore wese relera iruru ihoomy rama risareri oraru-ki, tariudyydu lau reareri iruru ihoomy.
\v 7 Wiji txumy tabderyry oraru-ki tawojeijei-di, Jerusalem tatyhynatxi tohoti reara, juhu bdeu iny-o iwiohedyymy naõhyyde-txi tohoti reare, taõldu mahãdu debowotxi resereu, urile idi rsinyrenyre iixenarenydi.
\v 8 Tatyhydyyna riodyynyra tademy ratxireri, butumy idi rsinyrenyreri. Raõhitxinyhyy ihyde, taõsny urile diwomyhyde, raixyrumy. Jerusalem isumy relemy ihyde, õorarunanihiky riwinyreki.
\v 9 Itnyhykylemy, oraruna tai rbynymy doimyhyde. Jerusalem aõhebo rutyynykre-di rohotinyohyyre. Inihikymy rariowymy ihyde moo riwoywinyke ihoore. Ioldureny irbi rotamy ihyrenyre tai tahe Deoxo dee rexitoenyrenyreri ixwiohedyymy.
\v 10 Iòldureny butumy iaõnareny riwyra, Deuxu heto-ò rirònyrenyre, Deuxu tamyròte ritòenymyhỹre-ò.
\v 11 Jerusale-ki hãwadu mahãdu, raõhitxinymy nariamyhỹde aõtxi tarsỹnamy reakemy, taõtyhynareny rsỹna-di riwiurònyra, irumy roirekremy. Kiamy hãwãmahãdu rarybera: “ waDeuxuwatxi ini bdeteheke, waaõhõkỹmy dỹỹnatxi!”
\v 12 Iny ramyhỹre-ò Jerusalẽ ryrymyhỹre: “Watxi ini bdeteheke! Waaõdesewse aõbohe ijõdire? WaDeuxu reburereu kawsemy aõhõkỹmy riwasnỹre.
\v 13 “ biurbi Deuxuheòty diteònyde tii wawo disõmyhỹde. Tii eresyna wade riwinyre tahe wadi sutxi rehure. Irahudi tahe aõhỹkỹmy dỹỹnanakytxi riwarire.
\v 14 Tii waòraru rimyre, ributunymy walòti-ò ritaare tahe iutxie waruru rihure. Wa Deuxu  waòldu-ò riwawahinyre tahe tuu rahỹỹnanyõre.
\v 15 WaDeuxuwaxodadu ibutewsele riwinyre, waòldu mahãdu diteònyde, wajyre mahãdu rihukremy tahe waijoi riwexyxynyre iwse uva rawesysymyhỹre wse.
\v 16 Tai sõemy riwahidỹỹnymyhỹre warube sõemy rejujumyhỹre. Iny-õ wahi riixawdike ihoõre, riwabdesanyke. Waòldu mahãdu wamy rahỹỹnanyre tahe waijoi hãwãdejuxu yki rỹireri.
\v 17 Uritre wadebò naditerenyyhỹde tahe wawiòhedỹỹdu ihoõre. WaDeuxutirbi tirbile waòldu mahãdu diteònymyhỹde tai tahe tii boho aõ ibina wsele wadireny ihỹenyde.
\v 18 WaDeuxuobiti rare aõhỹkỹmy riwasnyre, kiemy tohodỹỹna rbiòtile reare. Butumy hãwãhãwãbdoholabenyke, beteheini wadese dese! Waijadòma mahãdu, waweryrybò mahãdu, butumy wetxumy ridyrenyra bde irehetxi.
\v 19 Waijoi mahãdu-ò ixiwiòhedỹỹmy reare tahe tii boho riwabònyre, xaxerdòtxi mahãdu, wedu mahãdu ubelemy rururenyre, byremy rekoamyhỹrenydi.
\v 20 WaDeuxuwatxi ini bdeteheke waaõhỹkỹmy dỹỹnanatxi, sõemy aõhỹkỹmy ratỹỹnyreri! Aõdese watedesõ ritxynyreri, arybeõnamy rearetxi wanohõti reawna. Sõemy hure ubemy rỹireri, tule hetowodorimy rbu rỹireri.
\v 21 Wadeoxo, waõhitxi-ò boholake, iny-õ watxi reteheõra wawiòhedỹỹmy. Butumy waòldu mahãdu, waaõhỹkỹmy dỹỹnana-ò roholare tai tahe sõemy reysarenyre kiemy kai aõhỹkỹmy tiwasnyta. Tuu tabete txu-ò rehemnyke wylemy, waòldu mahãdu tule aõhỹkỹmy rutỹỹnykemy, wawsemy.
\v 22 Aõhỹkỹmy bisnyke iaõbina bina òraruki, iwse ratỹỹnyrewsemy, waòraru òraruki. Waòhitxi ixawiõhyy wahãde, watedesõ rawebinadunymy doimyhỹde.
\c 2
\p
\v 1 Tiubo waDeuxureburereu, bdeluru-di Jerusalẽ ritbònyre. Jerusalẽ hãwãheto dejuxu hãwalò-my rirahòrere, juhu-u biu wsemy roiramyhỹ, Israel mahãdu xiwedenamy roiramyhỹ. Deuxureburereu, hãwãririre, taheto dori ririre.
\v 2 Tamy ratòenymy aõkõ Deoxo, Juda hãwãrihure butumy hãwãninihikỹ rihure. Sulemy Juda hãwa-di rehure, tule iwedurenydi.
\v 3 Tebure tòtee-di Deuxuaõwsele Israel ruru rahure. Waòldu reny rehemnyreu tii riwawiòhenanyrenyõre, ihãre waòldu renymy ixidi rehure, heòty aõ butumy rahumyhỹre wsemy.
\v 4 Waòldurenywsemy, Deuxutawyhy wadeereny riterenyre tahe tarurudi iny derinamy rỹira mahãdu rirbunyre. Tebure, heòty wsemy, Jerusalẽ-ki sỹdu mahãdu tyre ritxiwire.
\v 5 Deoxohe waòldu wse rare. Israel butumy rahure, ihãwareny ninihikỹ rahure, iwedurenyheto ribinanyre, bderyrynihikỹ taiki diwyde tai tahe ionanaõmy nanahinymyhỹde Juda mahãdu-di.
\v 6 Deuxutaheto butumy ribinanyre, oworu rabinamyhỹre wsemy, tai tuu reàlàmyhỹrenyre butumy ribinanyre. Tamy deysa relemyhỹre-rbi wanohõtireny ritusanyre tule sabadu txu-rbi. Tebure tòtee-rbi Iòlò mahãdu-rbi tõhõti rusare tule xaxerdote mhãdu.
\v 7 WaDeuxutaxiwena deramy relere, taheto ririre, waòldureny ixinamy heto ritxiwire. Tai tii boho rabdesarenyre, iwse diarỹ boho woranabdehesi-u rabdesamyhỹrenyrewse.
\v 8 WaDeuxu Jerusalem òtity dejuxumy rõhõtinyre, bde rihukremy rõhõtinyre, rexielehynoõhyy, tuhyy rihure. Mna òtity ruare ihyy bde-ò resere.
\v 9 Hãwãijòtbòna resemy roireri heto dejuxu rawoki, iweryna raòrò òròra. Iòlò wedu mahãdu wna roberamy rỹira, iny witxira hãwa-my. Deuxubdeywidỹỹnamy dohodỹỹ ixãwira, profeta mahãdu Deuxubdedỹỹnanamy rasi ixawira.
\v 10 Jerusalẽ-ki hãwadu hetxina mahãdu, sutyreki runyrenyreri, rybeõmy. Bde riryrymy su-di tarati rijera, tky iyxeheỹ-di rexityynyra. Ijadòma mahãdu tatiòhumy rỹireri, tarati su-ò ridemy.
\v 11 Warue reesirara sõemy rahinyraki, wabdeòtkihikỹmy watxireri. Bderyry riwarbunyra, waijoi rexihura òraruki, tule uladu, tohouã rituereri rmamy, hãwãube-my.
\v 12 Uladu mahãdu kiamy rarybera: Nadi, rma riwasareri! Nadi, be momo riwasareri! Ubelemy nariòwymyhỹde, iny rawotmo wsemy, tahe ywimy durumyhỹde tadi axiòti-ki.
\v 13 Jerusalẽ waderina, aõmy wexe adee ararybekre? Timybohe ahi ariixawdinykre? Tiuhe kawsemy iny aõhỹỹmy rutỹỹnyõmyhỹre; aõhỹkỹmy dỹỹnanahe inihiỹỹre, beronihiỹ wsemy. Mobohe adee xiwowsena riõkre?
\v 14 Aprofeta mahãdu rasi, roi rare, bòdỹỹna. Aòraru renymy ibinamy raryberewna ini, iwitxiramy ini ròhònyre, awimy ini adeereny. Urile aprofetareny roidile arabònyrenyre.
\v 15 Iny-õ abirerenydi rawna, urile adireny rsinymyhỹre. Tara adireny riòhòwimyhỹre, akireny rutxuenymyhỹre kiamy rỹỹraximyhỹre: “kaawe hãwawenonamy raninimy raremyhỹ aõbo rare? Kaa bohe butu bde bde xiwedena rare?”
\v 16 Butumy aòldu mahãdu umy raybemyhỹre, adi rsinymyhỹre. Takyaradi rarybemyhỹrenyre: “ Iny boho Jerusalẽ rihurenyre! Txuu iny boho riraòmy roiremyhỹ-ò rehemnyre! Butumy aõbo rutỹỹnyremy iny boho robirenyre!”
\v 17 WaDeuxuaõbo riwinyre myna rutỹỹnyre; juhu-u tuu riuarere myna bde rytỹỹnyre. Timy wadeereny rotòenymy aõkõ riwahurenyre, waòldu reny warbireny ritrasadỹỹnyre, riteysadỹỹnyrenyre wahdunarenydi.
\v 18 Amna òtity, Jerusalẽ, Deoxo-ò rexitòenyke ixiwiòhedỹỹmy! Arube txuu, ruu iyhyõmy deamyhỹde bero wsehekỹle! Ixielehydỹỹõmy, tiiemy mahinyke!
\v 19 Rumy iyhyõmy myimyhỹke, Deoxo-ò bexitòenykemy, ixiwiòhedỹỹmy. Atedesõ bitxiwimy tamy, ariòre bohomy tamy bexitòenymy, rma nahumyhỹdenydemy ube-my wesi wesi-my.
\v 20 Bdeteheini waha Deoxo, idi mohõtinykre: Tiu txumy aõbohe kawsemy iny-õ aõhỹkỹmy tesnyte? Ixinamy aõbohe hãwyy mahãdu tariòe riròmyhỹrenykre, tariòre terinahãkỹ? Profeta mahãdu ta xaxerdote mahãdu aõbohe ixinamy ahetowoki rurumyhỹrenykre?
\v 21 Aõkõre rbu, jyre mahãdu, matuari mahãdu ubelemy irbu reny rỹireri; waweryryboreny, waijadòmareny, mayrehe-di rexihurenyre. Kai tebureteu Deoxo, tatòenymy aõkõ tiwahutenyte.
\v 22 Tirbi tirbi waòldureny tadidyte, adee deysa rewinymyhỹre-ò ròimyhỹre wsemy dirahude sõemy. wadeuxu tebureteu moõ rahenyõhyyre, moõ irumy rariõhyyre, waòldureny butumy wariòrereny rahure waderinamy reumydỹỹnyrbi.
\c 3
\p
\v 1 Diarỹ Kia rare, timybo iny Deuxudebure-ki aõhỹkỹmy iny rutỹỹnymyhỹre erysydu rare.
\v 2 Tii bdeluru-ò riwadyre, ryy toosònaõdi riwariradỹỹnyre.
\v 3 Tebòdi tiwse aõkõ riwahtenyre, txuu iyhykõmy.
\v 4 Deuxuwade, wadetyy, ritbydỹỹnyre, tule wati riòròre.
\v 5 Waweruradi, aõhỹkỹmy dỹỹnana, aõ jubrere òtity-di, riwaòtitynyre.
\v 6 Bdeluru-ki riwasỹdỹỹnyre, juhuhukỹle rarumy raimyhỹre wsemy.
\v 7 Deuxuwomati rerytihidi riwataare; ròtena-ki wahãde, timy arahenykemy aõkõ.
\v 8 Rarymyhỹre riwawiòhenanykemy tahe tii waixitòedỹỹna-ò roholaõhyymyhỹre.
\v 9 Timy takoò araõtyhy, kiemy mna ninihikỹdi wary ritbònymy doimyhỹde.
\v 10 Deuxuheka hãlòe wsemy wadee ihỹde, wary-ki diwaijemyhỹde, uxu wsemy wadee reakremy dexiywinymyhỹde.
\v 11 Tii ryrbi riwaòlòdỹỹnyre, tahe riwaòrò òròre, irahudi tahe riwarire.
\v 12 Tii tawaxiwahate riterenyre, tawyhy-di dohotiranamy riwawinyre.
\v 13 Deuxuwyhy-di rehumyhỹre wadey-txi sỹymy ralòmyhỹre.
\v 14 Txuu iyhyõmy iny mahãdu waki rutxuenymyhỹrenyre; wadi rsinymyhỹrenyre tawiunaki.
\v 15 Deuxursỹna hyre-di riwatỹxinyre.
\v 16 Tii waòsny su-my riòkaòkare, waju mna-ò riorore.
\v 17 Timybo iny ywimy rỹimyhỹrerbi wanohõti rusare, aõbo deysa rare, wanohõti rusare.
\v 18 Waumy ixihdu iòhòlemy namyhỹde, Deuxureraòmyhỹrerbi wawo rexieryra.
\v 19 Wabderyry-txi wanohõti remyhỹre wasohojina-txi, waaõhỹkỹmy dỹỹnanatxi.
\v 20 Idi rahõtinyhyymyhỹre tai riwabderyydỹnymyhỹre.
\v 21 Tahe xiwowsena dòòsemyhỹde katxi wanohõti reawna:
\v 22 WaDeuxuderina tiú rexihuõmyhỹre, iinytyhyna ionana ihoõre.
\v 23 Kaa terina, iinytyhy itỹmyramy rexirahoremyhỹre rudi-u, WaDeuxuòbiti-my ratximyhỹre inihiỹre!
\v 24 Deuxuheka butu rare wadee; taiki retyhynymyhỹre.
\v 25 WaDeuxuheka awi rare, butumy mobo rityhynymyhỹre-ò.
\v 26 Iny ròraòmyhỹrehe awi rare, Deuxuwiòhedỹỹna rybeõmy riraòmyhỹre.
\v 27 Tahe awihe rare, iny aõhỹkỹmy rutyỹnymyhỹre, iwoõmy riijemyhỹre, uladutxile tuu iny rierymyhỹre.
\v 28 Deuxuiny aõhỹkỹmy risnywna, ixisohojimy rkatximyhỹreny, ywimy ta rybeõmy.
\v 29 Tamy tatiòhumy rkesemyhỹreny, ywimy kiemy rarsòna ijõdileke.
\v 30 iny-õ iny rilahi-wna uritre ixiòwydỹỹõmy, urile rkiemyhỹreny ixilahjina.
\v 31 Deuxutiu tiiehyy iny ririõmyhỹre.
\v 32 Tii iny aõhỹỹmy risnymyhỹre tasỹ tule iny-di rawotòemyhyre kiemy terina inihiỹre.
\v 33 Tamy awirerimy aõkõ iny aõhỹkỹmy risnymyhỹre, aõdese-my risnymyhỹre.
\v 34 Deuxubutumy rierymyhỹre, timybo kaa hãwa-ki wetxu mahãdu rituemyhỹre, tamy tòe õhyylemy rurumyhỹre.
\v 35 Deuxubiuldu nihikỹ, butumy rierymyhỹre, timybo irybe ratyhyõmyhỹre iny bdedỹỹnana-my rybena, tii iny deereny riwahinyre dohodỹỹna.
\v 36 Kohe, Deuxutiubo iny irybe rirahòremyhỹre rierymyhỹre.
\v 37 Iny tiu aõ riwinyõtyhy Deuxuteramy reaki.
\v 38 Aõtxile aõ awi aõ ibina, Deuxurube xiery relemyhỹre.
\v 39 Aõherekibo iny reburemyhỹre, taòraruna òraru-ki iny aõhe rutỹỹnywna?
\v 40 Delemy ixidi rketemyhỹreny aõbo iny riwinywna irahudi tahe Deoxo-ò rkiòksemyhỹreny.
\v 41 Deuxubiu-ki ratximyhỹre-ò, iny tedesõ reny rkiraynyrenymyhỹ, tahe kawsemy tamy rkexitòenymyhỹreny:
\v 42 Deuxudiarỹ boho òraruna-txi reserenyra, arybe resiranyrenyra tahe waòrarureny tehòõte.
\v 43 Wadeereny aky reara, waherenymy teate, wamyreny taòhòtete timy wadireny texiwobrunoõhyy.
\v 44 Kai biu wetyydi texiwote, waixitòedỹỹnareny adee rehemnykelau.
\v 45 Iwitxira hãwãmahãdu wadireny teitxeredỹỹnyte, hàtà hãwalò wsele wadireny retehere.
\v 46 Butumy waòldureny mahãdu aõbina binamy wamyreny narybemyhỹde.
\v 47 Brebu kyki watximyhỹrenyre, iòhãrumy, jeijeiyki, bdebinayki.
\v 48 Waruerbi warube bero wsemy reamyhỹre, waijoi mahãdu rexihure òraru-ki.
\v 49 Warube rihyõhyy warue-rbi rejujukre.
\v 50 Tiubohe WaDeuxubiu-rbi kdetehekre tahe wamyreny robikre.
\v 51 Watedesõ sõemy aõhỹkỹmy dutỹỹnymyhỹde, hãwyy mahãdu-di rahõtiny-wna aõhebo rutỹỹnyrekredi, wahã ldurenydi.
\v 52 Waòldu mahãdu aõki wamy radònyrenyke ihoõre, tahe nawii iny riijemyhỹre wsemy, diwaijemyhỹdenyde.
\v 53 Hãluu-txi wadi rehurenyre, irahudi tahe mna-di hãluu ijo ritbònyre.
\v 54 Bee tai wadi rỹxire, wasỹ rituhedỹỹnyre, tahe rahõtinyre, “rarurahe!”
\v 55 Hãluuwo-rbi raryre, Deoxo-ò ixiwiòhedỹỹmy.
\v 56 Tamy rexitòenyre wairà-ò roholakemy, tahe kai wairà-ò taholate.
\v 57 Adee raryreu, wabire-ò tehemnyte, kiamy trybete: “uritre brebuõmy!”
\v 58 Wadeoxo, kai wahedỹỹmy tanate, tahe waumy tehedỹỹnyte.
\v 59 Wawerbi marybekre, Wadeoxo, kiemy teeryteri aõhỹkỹmy ratỹỹnyre aõ iòkõmy.
\v 60 Kai teeryte, waòldu mahãduhe ixiòmy nohõtire, tule timybo rõhõtinymyhỹrenyre butumy teerymhỹte.
\v 61 WaDeuxukai taholate, timybo umy ibinamy rarybemhỹrenyre, butumy ibdedỹỹnanareny teerymyhỹte.
\v 62 Kai teerymyhỹte, txuu iyhyõmy wamy aõbina binahãkỹmy, wamy rarybemyhỹrenyre, waaõhỹkỹdỹỹmy wamy rarybemyhỹrenyre.
\v 63 Kai tetehemyhỹte, bde iyhyõmy wadi rsinymyhỹrenyre.
\v 64 WaDeuxutuu reamyhỹrenyreinihe tamyreny biõke, aõhỹkỹmyinihe bisnybenyke.
\v 65 Biaõhỹkỹmydỹỹnybenyke, brebuytxi idireny behuke.
\v 66 Ebure-di iherenymy beake, WaDeuxubihubenyke kabderbi!
\c 4
\p
\v 1 Orohe turumy rexirahòrera, timykibo orotyhy, tarxỹna riõdỹỹnyra! Deuxuheto mna, ubelemy roberamy rỹireri.
\v 2 Jerusalẽ weryrybò mahãdu heka, oro wihikỹ wse wadeerenyrare, wiji tahe su bòti wsele, iny mahãdu idireny detehemyhỹde.
\v 3 Ahula dori tariòre-ò tahùỹ riwahinymyhỹre, ritònykremy, waijoireny tahe usehewehekỹ wse rare, tariòre aõhỹkỹlemy risnymyhỹre.
\v 4 Jerusalẽ mahãdu tohouã, be momo nahumyhỹde, uladu mahãdu rsỹnamy dexitòenymyhỹde tahe iny-õ aõ tamyreny diõõhyymyhỹde.
\v 5 Juhuu aõwiwihikỹ rirsỹmy roiremyhỹ, wiji tahe rmale ubemy nahumyhỹdenyde, tyy iòwyhykỹ-di rexityynymy roiremyhỹ, wiji tahe hàtà hãwalò tyrekile ihỹrenyde.
\v 6 Waijoihe aõnityhymy aõhỹkỹmy dutỹỹnymyhỹde, Sodoma-ki hãwãdu mahãdu-rbi, Deuxurahure bdeu, tebò-di.
\v 7 Wa-wedureny riòre mahãdu heka broreni hùỹ sy wse tyra rare, aõ ilbyna tai ihoõre, (neve) wsemy; iruruteremy roiremyhỹ teyrewemy, iruereny itnymy roiremyhỹ, tule idewirenymy.
\v 8 Wiji tahe helòtyra wsemy iòsnyreny doimyhỹde, ube-di rariareny-wna iny mahãdu rieryõhyymyhỹre. Idee tyyreny òwòrù wsemy rarbura itireny-ò rahãltenyra.
\v 9 Mobo wou-ki rurure mahãdu teysamy rituerenyre wiji mahãdu-rbi, kiemy ywimy rituemy roire, kiemy aõ risrỹrenyke ihoõre.
\v 10 Jerusalẽ rexihureu, hãwyy mahãdu tariòre-my rerinanymy roiremyhỹ, irahudi tariòrerenyle riheranymy, riròrenyre.
\v 11 Deuxutawoxibru tai rahure, tebure ritxiwire, Jerusalẽ tyre heòty ritxiwire bde-ò butumy ritxiwire.
\v 12 Moo kabdeki rityhynyõhyyre, iòlò mahãdu dori, tiu txumybo Jerusalẽ òldu-õ ijòdi tamy ralòke.
\v 13 Òraruna òraruki tuu kawse rutỹỹnyrenyre, tule profeta mahãdu xaxedòte mahãdu sõemy aõbinabina riwinyrenyre, aõ iòkõmy iny rihumy roiremyhỹ.
\v 14 Xaxedòte ta profeta mahãdu iruety wsemy rariamy roiremyhỹ ube-di, ityy reny hãlbu rỹximy, moõ ityyreny-ò reriõmyhỹre.
\v 15 Kiamy iny mahãdu ryrymyhỹre: “biòlònyke karbi! Kai boho axutenyteri! Uritre wadeereny derexiõmykre!” Tiubo rihenyrenyreu hãwãhãwa-di rariamy roiremyhỹu, ityhydỹỹduõ mahãdu dorile kiamy rayberenyre: “kaa hãbu mahãdu kaki rasỹnyõrenykre.”
\v 16 WaDeuxutõtxireny ixby ririõhyyre, Deuxuòbiti, riuberanyrenyre, tii iny xaxedòtereny mahãdu rityhynyõhyyre, iny wedureny-di rexiwobrunyke tule ihoõre.
\v 17 Irehemy retemy raimyhỹreny tuhyy reywserenyre, wiòhedỹỹ kdehemnykesna tahe rehemnyõhyyre. Iwitxira hãwãldu wiòhedỹỹ reraòrenyre, timy rowiòhedỹỹke ihoõre.
\v 18 Waòldureny wadireny retemyhỹ, tai òraru-ki timy ube-my ararirenyke ihoõre, watxureny ixihdu iòhò namyhỹde, arexihurenykre iòhòmy rare.
\v 19 Waherenymmy ijradu, nawiihikỹ biu-my rỹira ratyre raijraterere, hãwalò-di waherenymy rekoarenyre tule bderahy-ki itỹỹeresylemy wadeereny raaõbinanyrenyre.
\v 20 Tii boho waumyreny wedu rimyrenyre, waiòlòreny rimyrenyre, Deuxuwadeereny ritare wawedurenymy, idihe rahõtinymyhỹrenyre, waòldureny-ò riwaijerenykremy.
\v 21 Kai boho Edõ mahãdu tule Uu mahãdu, ixinamy butxueny benyke; bexideysanybenyke bde ijõdirerisamy adeereny, kiemy aõhỹkỹmydỹỹnanareny tule dehemnymy namyhỹde. Kai boho maòdewàribenykre tule aderu-my bekoabenykre.
\v 22 Jerusalẽ taaõhỹkỹmydỹỹnana rimymy ihỹde, òraruna òraru-ki. WaDeuxu tiu taijoi ubtỹmy hãwãhãwa-my ririõtyhy. Kai boho tahe Edõ mahãdu, Deuxu aõhỹkỹmy arasnyrenykre, butumy aòrarurenymy araerynanyrenykre.
\c 5
\p
\v 1 Wadeuxu, aõhebo ratỹỹnyrenyretxi õhõti reakre, watxireny bdetehekre tahe tuu bobikre, waaõhỹkỹmydỹỹnanareny.
\v 2 Wasureny inywitxira debòwo-ki doimyhỹde tule iny witxira wahetoreny-ki nasỹnymyhỹde.
\v 3 Wytemy wahãdenyde, wahareny ihoõmy, nadireny wytesemy ihỹdenyde.
\v 4 Õbra-my waberenyhỹkỹle rewymyhỹrenyre wamonarenymy; wahereny dorile õbramy ixideereny rewymyhỹrenyre.
\v 5 Waòldureny ibinamy wadireny ratximyhỹre; reywsemy wahãrenyre tahe ixielehydỹỹ-ò riwaijemyhỹrenyre.
\v 6 byremy rekoawna, ixitòedỹỹmy rekoamyhỹrenyre, wadebòreny reterenymyhỹrenyre, exitu mahãdu-ò tahe axiriu mahãdu-ò ijõra.
\v 7 Wàlabienareny òraruna-txi reserenyre tahe ratxiõmyhỹrenyre, diarỹ boho tahe iiòrarurenyki aõhỹkỹna dutỹỹnymyhỹdenyde.
\v 8 Wetxu mahãduhukỹle wiji diwawedunymyhỹdenyde, tahe moõ tebòrenyrbi riwatarenyke ihoõre.
\v 9 Iòhãrumy rsỹna-txi rekoamyhỹrenyre, kiemy wasidu mahãdu iwotòemy aõkõ, bderahy-ki wadeereny rekoamyhỹrenyre.
\v 10 Rma dese rbumy riwarbunymyhỹrenyre, wadereny heòty wsemy ratòteenymyhỹre.
\v 11 Jerusalẽ-ki ta juda-ki, hãwyy mahãdu, ijadòma mahãdu sõemy raaõhỹkỹmydỹỹnananyrenyre.
\v 12 Waòldureny mahãdu, wawedureny mahãdu, btòtaamy rirbunyrenyre, tule matuari mahãdu rityhynyrenyõhyyre.
\v 13 Waweryrybòreny hỹỹnahakỹlemy aõutxie utxiedi diaõmysỹdỹỹnymyhỹdi, weryry mahãdu heutxiedi nariòwymyhỹde.
\v 14 Matuari mahãdu iwse rexibutunymyhỹre wsemy deibutunyõmyhỹde ube tyamy, weryrybò iwiureny ixawimy ihỹdenyde.
\v 15 Deysa waworenyrbi rahenymy ihỹre; wixereny deròwymy, bderyryle rarimy ihỹde.
\v 16 Aõ rariõhyyre waxiwedenare ulduõ, òraruna-txi rejujurenyre tai tahe tiuõnamy18 arexihurenykremy wahãdenyde.
\v 17 Watedesõreny iwebinadureri, tahe warubereny, waruereny riturunyreri.
\v 18 Kiemy xiaõ hãwalò raatymy doimyhỹde, ijòròle tuu nariamy nyimyhỹde bde dejuxumy ykymy.
\v 19 Kai tahe Wadeoxo, tiiemy bde tewedumyhỹte, butumy iny mahãdu tewedumyhỹte, iwitxira bdeu ldu mahãdu.
\v 20 Aõherekibo irehemy tiwatenymy tamyhỹte? Watxireny aõbohe õhõti ixby reakremy ihỹre.
\v 21 Wadeoxo, ixidee biwaòksedỹỹnybenyke, kohe, ixby ixidee biwadybenyke! Juhuu roiremyhỹ wsemy ixby biwarahòrebenyke.
\v 22 Daa kõmy aõbo tiiemy tiwaatytenymy ahãte? Tiiemy aõbohe wadeereny ayky remy rarekre?