ilo_udb/66-JUD.usfm

\id JUD
\ide UTF-8
\h Judas
\toc1 Judas
\toc2 Judas
\toc3 jud
\mt Judas

\s5
\c 1
\p
\v 1 Siak ni Judas. Adipennak ni Jesu-Cristo ken kabsatnak ni Santiago. Agsursuratak kadakayo nga inayaban ti Dios kenkuana, kadakayo nga ay-ayaten ti Dios Ama, kadakayo nga ay-aywananna para kenni Jesu-Cristo.
\v 2 Sapay koma ta manayunan pay kadakayo ti asi ti Dios. Ikkannakayo koma iti naan-anay a talna, ken ipakitana koma ti kasta unay a panagayatna kadakayo.

\s5
\v 3 Dakayo nga ay-ayatek, inkarkarigatak nga agsurat kadakayo maipanggep iti panangisalakan ti Dios kadatayo amin. Kasapulan a nagsuratak tapno pabilgenkayo a mangaramid iti amin a kabaelanyo nga agsao maipapan kadagiti pudno a banbanag a patpatientayo. Dagitoy dagiti banbanag nga insuro ti Dios kadagiti amin nga agtaltalek kenni Cristo. Saanto pulos nga agbalbaliw dagitoy a banbanag.
\v 4 Adda dagiti lallaki a sumsumrek a di madmadlaw iti taripnongyo; kasla da kadagiti dakes a lallaki nga insurat dagiti profeta idi nabayagen a tiempo - agisursuroda kadagiti palso a banbanag ken baliwanda ti kaipapanan ti parabur ti Dios iti panangipalubosda iti panagaramid iti kinaderrep. Iti daytoy a wagas, salsalungasingenda ti kinapudno maipanggep kenni Jesu-Cristo nga Amotayo ken Apotayo.

\s5
\v 5 Uray no naammoanyo amin dagitoy a banbanag, adda dagiti pudno a banbanag a tarigagayak nga ipalagip kadakayo. Saanyo a lipatan nga uray no inispal ti Apo dagiti tattaona manipud idiay Egipto, iti saan a nagbayag ket dinadaelna iti kaadduan kadagidiay met laeng a tattao, dagiti tattao a saan a namati kenkuana.
\v 6 Kasta met, adda dagiti anghel nga inikkan ti Dios iti saad iti turay idiay langit. Ngem saanda nga intuloy ti nagturay kadagidiay a saad. Ngem ketdi, pinanawanda dagidiay a luglugar. Isu a ti Dios, kinawaranna iti agnanayon dagidiay nga anghel iti kasipngetan idiay impierno. Agtalinaedda sadiay agingga iti napateg nga aldaw a panangukom ken panangdusanto ti Dios kadakuada.

\s5
\v 7 Kasta met a dagiti tattao nga agnanaed kadagiti siudad ti Sodoma ken Gomorra ken kadagiti kabangibang a siudad, nakabasolda gapu iti panagaramidda kadagiti naderred nga aramid. Kinalikagumanda dagiti amin a kita ti kinaderrep; dagitoy ket maisalungasing iti impalubos ti Dios. Isu a dinadael ti Dios dagiti siudadda. Dagidiay a napasamak kadagidiay a tattao ken kadagidiay nga anghel idiay langit ket ipakpakitana a dusaento ti Dios dagiti tattao, kasta met dagiti tattao nga agisursuro iti palso a sursuro, iti agnanayon nga apuy idiay impierno.
\v 8 Kasta met a dagiti saan a nadiosan a tattao nga adda kadakayo ket tinulawanda met dagiti bagbagida babaen iti panagbibiagda iti basol. Ibagbagada nga inikkan ida ti Dios kadagiti sirmata a mangibagbaga kadakuada nga agbiagda iti kastoy a wagas. Ngem saanda nga agtultulnog kadagiti bilbilin ti Dios, ken lalaisenda dagiti nadayag nga anghelna.

\s5
\v 9 Uray idi nakisinuppiat ti arkanghel a ni Miguel kenni Satanas maipanggep iti agtagikua iti bagi ni Moises, liniklikanna a laisen ken akusaran isuna; kinunana laeng, "Dusaennaka koma ti Apo!"
\v 10 Ngem dagitoy a tattao a dakdakamatek iti suratko ket agsasaoda kadagiti dakes a sasao maipanggep iti amin a nasayaat a saanda a maawatan. Kasla da la kadagiti naatap nga ay-ayup a saan a makapanunot, gapu ta amin a banbanag a kadawyan a maawatanda ket pakadadaelanda.
\v 11 Dusaento ti Dios iti nakaro dagidiay agaramid kadagitoy a banbanag. Agtigtignayda a kas iti inaramid ni Cain. Nagbasolda a kas iti basol nga inaramid ni Balaam gapu iti kuarta, ket mataydanto a kas kenni Core, a nangsukir kenni Moises.

\s5
\v 12 Dagitoy a tattao ket maiyarig kadagiti batbato iti uneg ti danum a pakaidungparan dagiti barko. No kasta a makipasetda iti panangrambakyo iti ayat, awan babainda, gapu ta mangmanganda laeng a mangpennek kadagiti bagbagida. Kasla da la kadagiti ulep nga awan maitedna a tudo, dagiti ulep nga iduron ti angin. Awan ti naaramidda a nasayaat, ta kasla da la dagiti kaykayo a saan nga agbunga iti panawen ti panagbubunga. Kasla da la dagiti tattao a namindua a natay; kasla da la dagiti kaykayo a naparut.
\v 13 Saanda a matengngel dagiti bagbagida. Maiyarigda kadagiti nadawel a dalluyon iti baybay no kasta nga agbagbagyo, ken rugitanda dagiti dadduma babaen iti pakaibabainanda, kas iti labutab nga agparang kadagiti dalluyon ken rugit kadagiti igid ti baybay. Kasla da la dagiti bitbituen a saan nga agtalinaed iti rumbeng nga ayanda idiay tangatang. Ikabilto ida ti Dios iti nakasipsipnget iti agnanayon.

\s5
\v 14 Ni Enoc a maikapito a tao iti linya dagiti tattao a kaputotan ni Adan, imbagana daytoy maipanggep kadagidiay mangisursuro iti palso a sursuro: "Denggenyo a naimbag daytoy. Pudno unay nga umayto ti Dios a kaduana dagiti saan a mabilang a nasantoan nga anghelna.
\v 15 Ukomendanto ti tunggal maysa ken dusaendanto amin a dakes a tattao, ken amin a saan nga agraem iti Dios. Aramidento dagiti anghel dagitoy, gapu kadagiti amin a nagubsang a banbanag a sinao dagitoy a tattao maibusor iti Dios."
\v 16 Agtanabutob dagitoy a mangisursuro iti palso a sursuso maipanggep kadagiti banbanag nga inaramid ti Dios. Agreklamoda maipanggep iti mapasamak kadakuada. Agaramidda kadagiti dakes a banbanag gapu ta tarigagayanda nga aramiden dagitoy. Napasindayag unay ti panagsasaoda. Padpadayawanda dagiti tattao tapno iti kasta ket makaalada kadagiti banbanag manipud kadakuada.

\s5
\v 17 Ngem dakayo nga ay-ayatek a tattao, laglagipenyo ti imbaga dagiti apostol ti Apotayo a ni Jesu-Cristo iti nabayagen a panawen.
\v 18 Imbagada kadakayo, "Kasakbayan ti maudi nga aldaw, katawaanto dagiti dadduma a tattao dagiti pudno a banbanag nga imbaga ti Dios kadatayo. Aramidendanto a mismo dagiti basbasol a tartarigagayanda nga aramiden gapu ta saanda a raraemen ti Dios."
\v 19 Dagitoy dagiti tattao a mangparnuay iti panagbibinnusor dagiti namati. Aramidenda dagiti amin a dakes a banbanag a kayatda nga aramiden. Saan nga agbibiag ti Espiritu ti Dios kadakuada.

\s5
\v 20 Ngem dakayo nga ay-ayatek a tattao, agpipinnabilegkayo babaen iti panangaramatyo iti kinapudno a patpatienyo maipanggep iti Dios. Agpaidalankayo koma iti Espiritu Santo iti panagkararagyo.
\v 21 Kanayonkayo nga agbiag iti wagas a maiparbeng kadagiti ay-ayaten ti Dios. Itultuloyyo ti kanayon a mangnamnama a kaasiannakayo ti Apotayo a ni Jesu-Cristo. Itultuloyyo a mangnamnama agingga iti tiempo a ruggiantayo nga agbiag iti agnanayon a kaduana.

\s5
\v 22 Kaasianyo dagiti agdua-dua maipanggep kadagiti sursuro a rumbeng a patienda, ken tulunganyo ida.
\v 23 Iyadayoyo dagiti dadduma manipud iti apuy iti agnanayon a pannakadusa. Maasikayo kadagiti tattao nga agbasbasol, ngem agbutengkayo a maitipon kadakuada kadagidiay a basbasol. Ngem ketdi, guraenyo uray pay dagiti kawesda, gapu ta narugitan daytoy gapu kadagiti basbasolda.

\s5
\v 24 Ti Dios, kabaelannakayo a pagtalinaeden nga agtaltalek kenkuana. Alaennakayonto met iti sidongna, nga ayan ti naraniag a silaw. Agrag-okayonto iti kasta unay ken mawayawayaankayo manipud iti basol.
\v 25 Isuna laeng ti pudno a Dios. Insalakannatayo, a kas nagbanagan ti inaramid ni Jesu-Cristo nga Apotayo para kadatayo. Nadayag ti Dios, naindaklan ken nabileg ken naindaklan iti panagturayna sakbay a nangrugi ti tiempo. Kasta latta isuna nga uray ita, ken agtalinaedto a kasta isuna iti agnanayon! Amen!