ilo_udb/61-1PE.usfm

\id 1PE
\ide UTF-8
\h 1 Pedro
\toc1 1 Pedro
\toc2 1 Pedro
\toc3 1pe
\mt 1 Pedro

\s5
\c 1
\p
\v 1 Siak ni Pedro a pinagbalin ni Jesu-Cristo a maysa nga apostol, isursuratko daytoy kadakayo a mamati kenkuana, dakayo a pinili ti Dios a maibilang kenkuana. Agsursuratak kadakayo nga agnanaed kadagiti probinsia ti Ponto, Galacia, Capadocia, Asia ken Bitinia, adayo iti pudpudno a pagtaenganyo idiay langit.
\v 2 Pinilinakayo ti Dios nga Amatayo kas inkeddengna idi napalabas, ket inlasinnakayo iti Espirituna tapno agtulnogkayo kenni Jesu-Cristo, ken tapno aramidennakayo iti darana nga agbalin a makaay-ayo iti Dios. Agtignay koma ti Dios a siaasi kadakayo, ken ikkannakayo koma iti ad-adu a talna.

\s5
\v 3 Madaydayaw ti Dios, nga isu ti Ama ni Apotayo a Jesu-Cristo! Gapu ta naimbag isuna kadatayo a pinagbiagnatayo manen. Gapu ta pinagungarna ni Jesus kalpasan ti pannakatayna, ammotayo nga aramidennanto kadatayo iti inkarina.
\v 4 Inikkannatayo ti kabaelan a mangnamnama a makaawat kadagiti banbanag nga indulinna para kadatayo idiay langit, banbanag nga agpautto iti agnanayon.
\v 5 Ti Dios, babaen ti nabileg a pannakabalinna, ket salsaluadannakayo kas agtaltalekkayo kenni Jesus. Saluadannakayo tapno inton maudi a tiempo iti panagbiagtayo ita, ket naan-anay a maispalnakayo manipud iti pannakabalin ni Satanas.

\s5
\v 6 Agragsakkayo ngarud gapu ti mapasamakto, ngem agladingitkayo ita ti apagbiit a tiempo bayat nga agsagsagabakayo iti adu nga agduduma a kinarigat. Palubosan iti Dios a mapadaskayo, kas maysa a napateg a landok a mapadas tapno makita no nasin-aw dagitoy. Dagitoy a pannubok a mapadpadasanyo ket kasapulan.
\v 7 Mapasamak dagitoy a kinarigat tapno mapaneknekan a pudpudno nga agtaltalekkayo kenni Jesus. Napatpateg daytoy iti Dios ngem kadagiti amin a balitok ditoy lubong, a madadael ti apuy. Gapu ta agtalekkayo kenni Jesus, itan-oknakayonto unay ti Dios inton agsubli manen ni Jesu-Cristo.

\s5
\v 8 Ay-ayatenyo ni Jesus, no man pay saanyo isuna a nakita. No man pay saanyo isuna a nakita ita, agragsakkayo ti napalalo;
\v 9 gapu ta agtalekkayo kenkuana, isalakannakayo ti Dios manipud iti panangparigat dagiti basolyo.
\v 10 Iti nabayagen a panawen, insao dagiti profeta iti mensahe nga impakita iti Dios kadakuada ti maipanggep iti pananangisalakanna kadakayo iti maysanto nga aldaw. Napalalo ti annadda a nangsukimat kadagitoy a banbanag.

\s5
\v 11 Kayatda a maammoan ti dakdakamaten ti Espiritu ni Cristo nga adda kadakuada. Kayatda pay a maammoan ti tiempo a sarsaritaenna. Daytoy ket gapu ta ibagbaga ti Espiritu kadakuada idi damo a masapul nga agsagaba ken matay ti Cristo, ket mapasamakto dayta a nadayag a banag kenkuana kalpasanna.
\v 12 Imbaga ti Dios kadakuada a saan a gapu iti pagsayaatanda nga iparparangarangna kadakuada dagitoy a banbanag, ngem para iti pagsayaatanyo. Impablaakda dagitoy kadakayo gapu ta inikkan ida ti pannakabael ti Espiritu Santo nga imbaon ti Dios manipud langit nga aramiden dayta. Ken uray dagiti anghel ket kayatda a maammoan iti ad-adu pay maipanggep kadagitoy a kinapudno maipanggep iti panangisalakan ti Dios kadatayo.

\s5
\v 13 Isaganayo ngarud dagiti panunotyo nga agtulnog iti Dios. Ti kayatko a sawen ket masapul a sursuroanyo dagiti panunotyo. Mamatikayo a maawatyonto dagiti nasayaat a banag a naimbag nga aramidento ti Dios kadakayo inton agsubli ni Jesu-Cristo manipud langit.
\v 14 Ken gapu ta rumbeng nga agtulnogkayo iti nainlangitan nga Amayo, kas annak a masapul nga agtulnog kadagiti ammada ditoy daga, saanyo nga aramiden dagiti dakes nga ar-aramid a tarigagayanyo nga aramiden iti napalabas, idi saanyo nga ammo ti kinapudno maipanggep iti Dios.

\s5
\v 15 No diket, kasla iti Dios, ti nangpili kadakayo a maibilang kenkuana, ket nasantoan, masapul met a nasantoankayo iti amin nga aramidenyo.
\v 16 Agbalinkayo a nasantoan, gapu ta naisurat idiay Nasantoan a Surat a kinuna ti Dios, "Masapul nga agbalinkayo a nasantoan gapu ta Nasantoanak."
\v 17 Ti Dios ti mangukom iti inaramid ti tunggal maysa, ket aramidenna daytoy nga awan idumdumana. Gapu ta awaganyo isuna nga 'Ama,' agtignaykayo iti kusto a wagas bayat nga agbibiagkayo ditoy daga. Kaslakayo dagiti tattao a pinagtalaw dagiti sabali manipud iti pagtaenganda, gapu ta agbibiagkayo nga adayo iti langit, ti pudpudno a pagtaenganyo.

\s5
\v 18 Agbiagkayo a siraraem gapu ta ammoyo a saan a babaen ti banbanag a kasla iti balitok ken pirak—banbanag a saanto nga agpaut ti agnanayon—a ginatangnakayo ti Dios, isu a masapul nga isargdengyo ti minamaag a pinagtignay, kas nasursuroyo nga aramiden manipud kadagiti kapuonanyo.
\v 19 Ngem ketdi, ginatangnakayo ti Dios babaen iti napateg a dara ni Cristo a nagayos manipud iti bagina idi natay isuna. Maiyarig ni Cristo iti maysa a kordero nga indaton dagiti papadi a Judio: Perpekto, awan pakapilawanna wenno mulitna.

\s5
\v 20 Pinili isuna ti Dios a mangaramid iti daytoy sakbay a pinarsuana ti lubong. Ngem saan nga agingga ita, inton asidegton nga aggibus ti lubong, nga iparangarang ti Dios isuna kadakayo.
\v 21 Gapu iti inaramid ni Cristo, agtaltalekkayo iti Dios, a nangpagungar kenkuana kalpasan ti pannakatayna, ken dinayawyo iti kasta unay. Kas nagbanaganna, ti Dios ti pagtaltalkan ken namnamaenyo nga agaramidto kadagiti naindaklan a banbanag a maipaay kadakayo.

\s5
\v 22 Gapu ta nagtulnogkayo ti kinapudno maipanggep iti Dios ket pinalubosanyo isuna nga aramidennakayo a nasin-aw ken mangayat kadagiti padatayo a namati, itultuloyyo ti panagayatyo iti tunggal maysa nga addaan ti kinapasnek ken kinapudno.
\v 23 Kiddawek nga aramidenyo daytoy, gapu ta agbibiagkayon ita iti baro a biag. Saan a gapu iti maysa a banag a mapukawto a naawatyo daytoy a baro a biag. Ngem ketdi, babaen iti maysa a banag nga agpautto iti agnanayon; dayta ket babaen iti panamati iti kinuna ti Dios.

\s5
\v 24 Ammotayo a pudno daytoy gapu ta, kas insurat ni profeta Isaias, "Mapukawto amin a tattao a kas ti panagpukaw ti ruot. Ken amin a kinatan-ok nga adda kadagiti tattao ket saanto nga agpaut iti agnanayon, kasla iti sabong iti ayan ti ruot a saan nga agpaut iti nabayag. Malaylay ti ruot ken matay dagiti sabong,
\v 25 ngem ti mensahe ti Dios ket agtalinaed iti agnanayon. "Daytoy a mensahe a makaibtur ket isu ti mensahe maipanggep kenni Cristo nga ipabpablaakmi kadakayo.

\s5
\c 2
\p
\v 1 Ngarud, saankayo nga agtignay nga addaan iti dakes a panggep iti aniaman a wagas wenno mangallilaw kadagiti sabali. Saankayo nga agbalin a managinsisingpet, ken saanyo nga apalan dagiti dadduma. Saankayo nga agsasao ni kaanoman iti kinadakes maipanggep iti siasinoman nga awan kaagpaysoananna.
\v 2 Kas kadagiti kaipaspasngay a maladaga nga agtarigagay iti puro a gatas ti inada, masapul a tarigagayanyo a makaadal kadagiti pudno a banbanag manipud iti Dios, tapno babaen iti panangdalyo kadagitoy ket agbalinkayo a kas nataengan iti panagtaltalek kenkuana. Masapul nga aramidenyo daytoy aginggana iti tiempo nga ikeddeng ti Dios a wayawayaannakayo a naan-anay manipud iti amin a kinadakes iti daytoy a lubong.
\v 3 Kasta met, masapul nga aramidenyo daytoy gapu ta napadasanyo a naimbag unay ti Apo kadakayo.

\s5
\v 4 Umasidegkayo kenni Apo Jesus. Maiyarig isuna ti kapapatgan a bato iti pundasion iti maysa a pasdek, ngem sibibiag isuna, saan a kasla maysa a bato nga awan biagna. Adu a tattao ti nanglaksid kenkuana, ngem pinili isuna ti Dios ken imbilangna isuna a kasta unay ti pategna.
\v 5 Ken kasla iti tattao nga agipatakder kadagiti babbalay babaen kadagiti batbato, pagkikinnamangennakayo ti Dios a kasla maysa a pasdek a pagyanan ti Espirituna. Ar-aramidenna daytoy tapno dakayo— ket kasla kadagiti papadi nga agidaton idiay altar, ket makaaramid kadagiti banbanag a makaay-ayo iti Dios gapu ta natay ni Jesu-Cristo para kadakayo.

\s5
\v 6 Ti kinuna ti Nasantoan a Surat, ket ipakitana kadatayo a pudno daytoy: "Mangikabkabilak idiay Jerusalem iti maysa a tao a kasla maysa a nakapatpateg unay a bato, ti kapapatgan a bato iti pasdek, ket dagiti mamati kenkuana ket saandanto pulos a mabain."

\s5
\v 7 Padayawannakayonto ngarud ti Dios, dakayo a mamati kenni Jesus. Ngem dagiti agkedked a mamati kenkuana ket kasla dagiti agipatpatakder a sarsaritaen ti Nasantoan a Surat: "Ti bato a linaksid dagiti agipatpatakder ket nagbalin a kapapatgan a bato iti pasdek."
\v 8 Naisurat met idiay Nasantoan a Surat: "Kaslanto isuna maysa a bato a pakaitibkulan dagiti tattao, ken kaslanto isuna dakkel a bato a pakaitublakan dagiti tattao. Kasla met laeng iti pannakadunor dagiti tattao no maitublakda iti bato, dagiti tattao a saan nga agtulnog iti mensahe ti Dios ket dundunorenda dagiti bagbagida; dayta ti inkeddeng ti Dios a mapasamakto kadakuada."

\s5
\v 9 Ngem dakayo dagiti tattao a pinili ti Dios a maibilang kenkuana. Dakayo ti bunggoy nga agdaydayaw iti Dios a kasla dagiti papadi, ken makipagturaykayo a kadua ti Dios a kas dagiti ar-ari. Dakayo iti bunggoy dagiti tattao a kukua iti Dios, tapno ipablaakyo dagiti nakakaskasdaaw a banbanag nga inaramidna. Inawagannakayo manipud iti sigud a wagasyo, idi awan ti am-ammoyo iti kinapudnona, ket impakaawatna kadakayo dagiti nakakaskasdaaw a pudno a banbanag maipanggep kenkuana.
\v 10 Ti ibagbaga iti Nasantoan a Surat ket pudno maipanggep kadakayo: "Idi un-unana, awan pulos ti nakaibunggoyanyo a tattao, Ngem itattan dakayon dagiti bunggoy dagiti tattao iti Dios. Iti naminsan, saannakayo a kinaassian iti Dios. Ngem kakaassiannakayo itan."

\s5
\v 11 Dakayo a tattao nga ay-ayatek, guyugoyenkayo a mangpanunot iti maipanggep iti daytoy: kaiyariganyo dagiti ganggannaet nga iti pudpudno a pagtaenganda ket sadiay langit. Isu a saanyo nga aramiden dagiti banbanag a pakabasolan a nakairuamanyon nga ar-aramiden, gapu ta no aramidenyo dagitoy, saanyonto a kabaelan ti agbiag a nasayaat a kadua ti Dios.
\v 12 Agtultuloykayo nga agtignay iti nasayaat a wagas kadagiti saan a makaam-ammo iti Dios. No aramidenyo dayta, uray pay ibagada nga ar-aramidenyo iti dakes, makitadanto nga ar-aramidenyo dagiti banbanag, ket iti dayta a tiempo nga umay ti Dios a mangukom iti tunggal maysa, padayawandanto isuna.

\s5
\v 13 Gapu ta tarigagayanyo a padayawan ni Apo Jesus, agtulnogkayo iti amin nga addaan ti umno a turay. Pakairamanan ti ari, nga addaan iti naindaklan a pannakabalin,
\v 14 ken dagiti gobernador, nga imbaonna a mangdusa kadagiti agar-aramid iti saan a nasayaat ken mangpadayaw kadagiti agar-aramid iti umno.
\v 15 Ti kayat ti Dios ket agaramidkayo iti nasayaat. No aramidenyo dayta, dakayo ti gapuna a saan a maibaga dagiti maag a tattao a nakaaramidkayo iti saan a nasayaat.
\v 16 Agsingsingpetkayo a kasla siwayawayakayo manipud iti panagtulnogyo iti siasinoman nga apo, ngem saanyo a panunoten a makaaramidkayo iti dakes gapu iti dayta. Ngem ketdi, agsingsingpetkayo a kas adipen iti Dios.
\v 17 Agtignayko a siraraem iti tunggal maysa. Ayatenyo dagiti amin a padayo a namati. Padayawanyo ti Dios, ken padayawanyo ti ari.

\s5
\v 18 Dakayo a tagabu a namati, agpaiturayankayo kadagiti amoyo ken raemenyo ida. Agpaiturayankayo saan laeng kadagiti agtigtignay iti nasayaat ken naanus a wagas kadakayo, ngem kasta met nga agpaiturayankayo kadagiti agtigtignay iti wagas a kinaranggas kadakayo.
\v 19 Masapul nga aramidenyo dayta gapu ta maay-ayo iti Dios kadagiti, makaammo nga ammona iti mapaspasamak kadakuada, ibturanyo iti ut-ot a sagabaenda gapu ta saan a nasaayat iti panangtrato dagiti amoda kadakuada.
\v 20 Siguradonto a saan a maay-ayo ti Dios kadakayo no agaramidkayo iti maysa a banag a saan a nasayaat ket kabilendakayo gapu iti dayta. Ngem no aramidenyo ti nasayaat ket agsagabakayo latta iti pannakadangran, agsagsagabakayo iti panagar-aramidyo iti nasayaat. No maibturanyo dayta, padayawannakayto ti Dios.

\s5
\v 21 Maysa kadagiti rason no apay a pinilinakayo ti Dios ket nasken nga agsagabakayo. Idi nagsagaba ni Cristo para kadakayo, nagbalin isuna a pagulidanan kadakayo, tapno tuladenyo ti inaramidna.
\v 22 Laglagipenyo no kasano iti inaramidna, saan a pulos a nagbasol isuna, ken saan isuna a nagsao iti aniaman a panangluko iti tao.
\v 23 Idi linais isuna dagiti tattao, saanna isuda a binales. Idi pinagsagaba isuna dagiti tattao, saan isuna a nangbutbuteng tapno agibales. Ngem ketdi, inkeddengna a bay-anna ti Dios, ti kankanayon a manguk-ukkom a sililinteg, ti mangpaneknek nga awan ti basolna.

\s5
\v 24 Inibturanna ti pannusa para kadagiti basbasoltayo idi natay isuna idiay krus, tapno agsardengtayo nga agbasbasol ken mangrugi nga agbiag a sililinteg. Gapu ta dinunorda isuna tapno agasannakayo iti Dios.
\v 25 Pudno a kaslakayo karnero a mapukpukaw, ngem nagsublikayo itan kenni Jesus, a mangay-aywan kadakayo a kas maysa a pastor a mangay-aywan iti karnerona.

\s5
\c 3
\p
\v 1 Dakayo a namati a babbai ket rumbeng a paiturayankayo kadagiti assawayo. Aramidenyo daytoy tapno no siasinoman kadakuada ti saan a mamati iti mensahe maipanggep kenni Cristo, mamatida uray pay awan ti aniaman a banag nga ibagbagayo kadakuada.
\v 2 Mamatidanto kenni Cristo no makitada a raraemenyo ida ken naan-anay a napudnokayo kadakuada.

\s5
\v 3 Saanyo a padasen nga aramiden daytoy babaen iti panangar-arkos iti akinruar a bagiyo, kas iti napintas a panangay-ayus iti buok wenno panangisuot iti balitok nga alahas ken agkakapintas a kawes.
\v 4 Ngem ketdi, papintasenyo ti akin-uneg a kinataoyo iti wagas a saan nga agkupas. Kayatko a sawen, addaan iti napakumbaba ken natalna a kababalin, a maysa a banag nga ibilbilang ti Dios a napateg unay.

\s5
\v 5 Dagiti babbai a nagraem iti Dios, a nagbiag idi nabayagen a panawen, pinapintasda dagiti bagbagida iti kastoy a wagas. Nagtalekda iti Dios ken nagtulnogda kadagiti assawada.
\v 6 Kas koma kenni Sara, nagtulnog isuna kenni Abraham nga asawana ken inawaganna nga apona. Ibilangnakayo ti Dios nga nga annakna no aramidenyo ti umno ken saankayo a kabuteng ti mabalin nga aramiden dagiti assawayo wenno siasinoman gapu ta namatikayo.

\s5
\v 7 Dakayo a lallaki a namati, kas iti rumbeng a panagraem kadakayo dagiti assawayo, rumbeng nga idalanyo dagiti bibiagyo iti maitutop a wagas kadakuada. Tratoenyo ida a siraraem, bigbigenyo a gagangay a nakapkapuyda ngem kadakayo. Ngem bigbigenyo met a pagbiagen ida iti Dios iti agnanayon, a kasla kadakayo. Aramidenyo daytoy tapno awanto ti manglapped kadakayo iti panagkararagyo.

\s5
\v 8 Iti panangleppasko iti daytoy a paset ti suratko, ibagak kadakayo amin, makianamongkayo iti tunggal maysa iti panpanunotenyo. Makipagriknakayo koma iti tunggal maysa. Ayatenyo ti tunggal maysa kas kameng iti isu met laeng a pamilia. Agtignaykayo a siaasi iti tunggal maysa. Agpakumbabakayo.
\v 9 No pagaramidandakayo dagiti tattao iti dakes a banbanag wenno laisen dakayo, saanyo a balsen ida. Ngem ketdi, kiddawenyo iti Dios a tulonganna ida, aramidenyo gapu ta dayta ti gapuna a pinilinakayo iti Dios, tapno matulongannakayo.

\s5
\v 10 Utobenyo ti insurat dagiti Salmista maipapan it umno a wagas a panagbibiagtayo: "Kas kadagiti mangayat a mangragsak iti biagna ken mapasamak dagiti nasayaat a banbanag kadakuada, masapul a saanda nga agsao iti dakes ken agibaga kadagiti sasao a makaallilaw kadagiti sabali.
\v 11 Masapul nga itultuloyda nga isardeng iti panagar-aramid iti dakes, aramidenda ketdi ti nasayaat. Masapul a padasenda a tulongan dagiti tattao nga agtignay a sitatalna iti tunggal maysa; masapul a sireregtada a mangguyugoy kadagiti tattao nga agtignay iti natalna a wagas,
\v 12 gapu ta aw-awaten ti Apo ti aramid dagiti nalinteg a tattao. Dengdenggenna dagiti nalinteg a tattao no agkararagda, ken sungbatanna ida. Ngem laksidenna dagiti agar-aramid iti dakes."

\s5
\v 13 No magagarankayo nga agaramid iti nasayaat, ad-adu a tattao ti saanto a mangdangran kadakayo.
\v 14 Ngem uray no agsagabakayo gapu iti panagar-aramidyo iti umno, bendisionannakayto ti Dios. Aramidenyo ti kas iti insurat ni Isaias, 'Saankayo nga agbuteng kadagiti tattao a mangbutbuteng kadakayo, ken saanyo a pagdanagan ti mabalin nga aramidenda kadakayo.'

\s5
\v 15 Ngem ketdi, bigbigenyo iti kaungganyo a ni Cristo ti apoyo, nga ay-ayatenyo. Nakasaganakayo koma a kankanayon a mangsungbat kadagiti agkiddaw kadakayo nga ibagayo kadakuada maipanggep ti sitatalek a namnamaenyo nga aramiden ti Dios para kadakayo. Ngem sungbatanyo ida a sipapakumbaba ken siraraem,
\v 16 ken siguradoenyo nga awan ti aramidenyo a biddut tapno maibabain dagiti agsasao iti dakes kadakayo, no makitada ti nasayaat a wagas a panagbibiagyo gapu ta naitiponkayo kenni Cristo.
\v 17 Nalabit a kayat ti Dios nga agsagabakayo. No kasta, nasaysayaat nga agaramid iti nasayaat, uray no agsagsagabakayo iti panagar-aramid kadagitoy, ngem iti panagaramid iti dakes.

\s5
\v 18 Imbagak dayta gapu ta namisan a natay ni Cristo para kadagiti tattao a nagbasol. Nalinteg isuna a tao a natay para kadagiti saan a nalinteg. Natay isuna tapno mairagpatnatayo iti Dios. Kabayatan iti tiempo nga adda isuna iti kadawyan a bagi, napapatay isuna, ngem pinagungar iti Espiritu ti Dios.
\v 19 Tinulongan pay isuna ti Espiritu kas napan nangiwaragawag ti balligi ti Dios kadagiti dakes nga espiritu nga imbalud iti Dios.
\v 20 Idi nabayag a panawen, kabayatan ti tiempo nga ar-aramiden ni Noe ti dakkel a bangka, saan a nagtulnog iti Dios dagitoy a dakes nga espiritu idi siaanus isuna a nagur-uray tapno kitaenna no tallikudan dagiti tattao dagiti dakes a kababalinda. Sumagmamano laeng a tattao ti naisalakan iti dayta a bangka. Kangrunaanna, inyeg laeng ti Dios ti walo a tao a sikakaradkad manipud iti danum ti layus, kabayatan a nalmes dagiti dadduma.

\s5
\v 21 Ibagbagi dayta a danum ti danum a nakabautisarantayo, a nangisalakanan ti Dios kadatayo. Daytoy a danum, awan ti maikkatna a rugit manipud kadagiti bagitayo. Ngem ketdi, ipakpakitana nga agkidkiddawtayo iti Dios nga ipanamnamana nga inikkatnan kadatayo ti biddut iti panagbasol—nga innikatna ti bidduttayo gapu ta pinagungarna ni Jesu-Cristo manipud iti patay.
\v 22 Nagpangato ni Cristo sadi langit ken agturturay idiay lugar ti kangatoan a dayaw a sumaruno iti Dios, kalpasan a pinagtulnog ti Dios kenkuana amin a dakes ken mannakabalin nga espiritu.

\s5
\c 4
\p
\v 1 Ngarud, gapu ta nagsagaba ni Cristo iti bagina, sipapaluboskayo koma met nga agsagaba. Dagiti agsagaba kadagiti bagbagida gapu ta naibilangda kenni Cristo ket nagsardengen nga agbasbasol iti wagas idi a panagbasbasolda.
\v 2 Kas pagbanaganna, bayat dagiti nabatbati pay a tiempoda ditoy daga, saanda nga ar-aramiden dagiti banbanag a tartarigagayan nga aramiden dagiti managbasol a tattao, ngem ar-aramidenda ketdi dagiti banbanag a kayat ti Dios nga aramidenda.

\s5
\v 3 Ibagak dayta kadakayo gapu ta binusbosyon iti adu unay a tiempoyo ditoy daga iti panagar-aramid kadagiti pagaayat nga aramiden dagiti tattao a saan a makaam-ammo iti Dios. Iti napalabas, nakaaramidkayo iti amin a kita iti kinaderrep nga ar-aramid, nagbarbartekkayo ken nakiramankayo iti nalabes ken nakaro a panagragragsak ken pannakiin-inom ken nagrukbabkayo kadagiti didiosen, a makarimon iti Dios.
\v 4 Ita, nasdaaw dagiti gagayyemyo a saankayon a makitiptipon kadakuada no aramidenda dagitoy a banbanag. Kas pagbanaganna, agsasaoda kadagiti dakes a banbanag kadakayo.
\v 5 Ngem maysa nga aldaw, akoendanto iti Dios ti amin a banbanag a naaramidanda. Isunanto ti mangukom kadakuada.
\v 6 Dayta ti gapuna no apay nga inkasaba ni Cristo ti naimbag a damag kadagiti natay. Inaramidna dayta tapno, uray no inukom ida ti Dios idi nabiagda pay, makapagbiagda iti agnanayon babaen iti pannakabalin ti Espiritu.

\s5
\v 7 Aggibusto iti kabiitan a panawen iti amin a banbanag ditoy daga. Ngarud, agtalinaedkayo nga agpanunot a nasayaat, ken teppelanyo ti panpanunotenyo tapno makapagkararagkayo a naimbag.
\v 8 Ti kapapatgan iti isu-amin, ayatenyo a sipupudno iti tunggal maysa, gapu ta no ayatentayo dagiti dadduma ket saantayo a padasen a biroken ti naaramidda a biddut.
\v 9 Ipaayyo ti taraon ken lugar a pagturogan dagiti Kristiano nga agdaldaliasat nga umay kadakayo, ken aramidenyo daytoy nga awan panagtantanabutob.

\s5
\v 10 Rumbeng nga usaren amin dagiti namati dagiti sagsagut nga inted ti Dios kadakuada tapno agserbi kadagiti dadduma. Masapul nga imatonanda a naimbag dagiti nadumaduma a sagut a siaayat nga inted ti Dios kadakuada.
\v 11 Rumbeng nga aramiden dagiti agsasao iti taripnong dagiti namati dayta a kaslada agsasao kadagiti sasao ti Dios. Rumbeng nga aramidenda daytoy dagiti agar-aramid kadagiti nasayaat para kadagiti dadduma babaen iti pigsa nga inted ti Dios kadakuada, tapno mapadayawanyo ti Dios kas inikkannatayo ni Jesu-Cristo iti kabaelan nga aramiden dagitoy. Idaydayawtayo koma amin ti Dios gapu ta adda kenkuana amin a pannakabalin tapno iturayanna amin a banbanag iti agnanayon. Maaramid koma daytoy!

\s5
\v 12 Dakayo nga ay-ayatek, saankayo koma a masmasdaaw maipanggep kadagiti naut-ot a banbanag a sagsagabaenyo gapu ta naibilangkayo kenni Cristo. Padpadasennakayo dagitoy a banbanag a kas iti panangpadas ti tattao iti landok babaen iti panangikabilda idiay apuy. Saanyo a panpanunoten nga adda maysa a banag a nakakaskasdaaw a mapaspasamak kadakayo.
\v 13 Ngem ketdi, agragsakkayo ta agsagsagabakayo kadagiti isu met laeng a kita ti banbanag nga inibturan ni Cristo. Agragsakkayo no agsagabakayo, tapno mabalinanyo met ti agrag-o unay inton agsubli ni Cristo ken ipakitana iti tunggal maysa iti kinadayagna.
\v 14 No laisendakayo dagiti dadduma gapu ta namatikayo kenni Cristo, maay-ayo ti Dios kadakayo, gapu ta ipakitana a ti Espiritu ti Dios, ti Espiritu a mangiparangarang iti kinadakkel ti Dios, ket agtataeng kadakayo.

\s5
\v 15 No agsagabakayo, saan koma a gapu ta nakapataykayo iti siasinoman, wenno nagtakaw iti aniaman wenno nakaaramid iti sumagmamano a kita iti dakes a banag, wenno gapu ta nakibiangkayo iti apa iti siasinoman.
\v 16 Ngem no agsagabakayo gapu ta Kristianokayo, saanyo nga ibain dayta. Ngem ketdi, idaydayawyo ti Dios nga agsagsagabayo gapu ta kukuanakayo ni Cristo.

\s5
\v 17 Ibagak daytoy, gapu ta tiempon ita ti panangrugi ti Dios a mangukom kadagiti tattao, ken umunanto nga ukomen dagiti kukuana. Agsipud ta datayo a namati ti umuna nga ukomenna, panunotenyo ti nakaal-alinggaget a banbanag a mapasamakto kadagiti saan nga agtulnog kadagiti naimbag a damag a naggapu kenkuana!
\v 18 Mapasamakto dayta kas naisurat iti Nasantoan a Sursurat: "Adu a nalinteg a tattao ti agsagabanto iti adu a naririgat a pannubok sakbay a mapan idiay langit. Isu a dagiti saan a nadiosan ken managbasol a tattao ket siguradonto nga agsagaba iti kasta unay a pannusa manipud iti Dios!"
\v 19 Ngarud, dagiti agsagaba gapu ta pagayatan ti Dios ket rumbeng nga agtalekda iti Dios tapno pagtalinaedenna ida, ti Dios, ti nangparsua kadakuada ken ti kankanayon a mangar-aramid dagiti inkarina nga aramiden. Ket rumbeng nga itultuloyda nga aramiden ti umno.

\s5
\c 5
\p
\v 1 Ita ibagak daytoy kadagiti panglakayen nga adda kadakayo, dakayo a mangidadaulo kadagiti taripnong dagiti namati: Maysaak met a panglakayen. Maysaak kadagiti nakakita iti panagsagaba ni Cristo, ken mangisuroak pay iti sumagmamano a dayag nga adda kenni Cristo sadi langit.
\v 2 Agpakpakaasiak kadakayo a panglakayen nga aywananyo dagiti tattao nga adda kadagiti taripnongyo. Aramidenyo daytoy a kasla dakayo dagiti pastor a mangay-aywan kadagiti arban ti karneroda. Aramidenyo daytoy, saan a gapu ta masapul nga aramidenyo daytoy, ngem aramidenyo ketdi daytoy a siaayat, a kas tarigagay ti Dios. Saankayo nga agagum nga agala iti kuarta iti panangaramidyo iti daytoy, ngem aramidenyo ketdi daytoy a sireregta.
\v 3 Saankayo nga agtignay a kasla kadagiti nangangato nga amo kadagiti tattao a nangsaadan ti Dios kadakayo, ngem agbalinkayo ketdi a pagulidanan kadakuada babaen iti wagas a panagbibiagyo.
\v 4 No aramidenyo dayta, inton agparang ni Jesus, a maiyarig iti kangatoan a pastortayo, itedannanto ti tunggal maysa kadakayo iti naglorian a gunggona. Dayta a gunggona ket kaslanto kadagiti balangat a maited kadagiti atleta a mangabak kadagiti lumba, ngem ti gunggonayo ket saanto a pulos a malaylay saan a kasla kadagiti a balangat a malaylay.

\s5
\v 5 Ita, ibagak daytoy kadakayo nga agtutubo a lallaki. Masapul nga agtulnogkayo kadagiti natataeng a lallaki ngem kadakayo nga adda iti taripnong. Amin kayo a namati ket rumbeng nga agtignay a sipapakumbaba iti tunggal maysa, gapu ta pudno a busoren ti Dios dagiti natangsit, ngem agtignay isuna a siaasi kadagiti napakumbaba.
\v 6 Ngarud, maam-amirisyo nga addaan ti Dios iti naindaklan a pannakabalin a mangdusa kadagiti natangsit a tattao, ipakumbabayo dagiti bagbagiyo tapno padayawannakayonto iti tiempo nga inkeddengna.
\v 7 Gapu ta ipatpategnakayo, palubosanyo nga aywananna dagiti amin a banbanag a pagdandanaganyo.

\s5
\v 8 Kanayonkayo koma a nakasagana ken manangipangag, gapu ta ti diablo, a kabusoryo, ket manglawlawlaw, agbirbirok kadagiti tattao a dadaelenna. Maiyarig isuna iti leon nga agngerngernger nga umar-arubayan iti aglawlaw, nga agbirbirok iti patayen ken alun-onenna.
\v 9 Masapul a sarangtenyo isuna babaen iti panagtultuloy a sititibker a panagtalek kenni Cristo ken iti mensahena, laglagipenyo nga agsagsagaba met kadagiti kasta a kinarigat dagiti padayo a namati iti entero a lubong.

\s5
\v 10 Ti Dios ti siaanus a tumultulong kadatayo iti tunggal kasasaad, ken isuna ti nangpili kadatayo a mangibingay iti agnanayon a dayagna sadi langit gapu ta naitipontayo kenni Cristo. Ket kalpasan a nagsagabakayo iti apagbiit gapu kadagiti banbanag nga ar-aramiden dagiti tattao tapno dangrandakayo, ikkatennanto dagiti naespirituan a pakapilawanyo, papigsaennakayonto nga agtalek pay kenkuana, ken saranayennakayonto iti tunggal wagas.
\v 11 Ikararagko nga agturayto isuna a mannakabalin iti agnanayon. Sapay koma ta kasta!

\s5
\v 12 Insurat ni Silvano daytoy a surat para kaniak kas panangibagbagak daytoy kenkuana. Ibilangko isuna a maysa a napudno a pada a namati. Insuratko daytoy ababa a surat kadakayo tapno pabilgenkayo, ken kayatko nga ipanamnama kadakayo a ti insuratko ket pudno a mensahe maipanggep kadagiti banbanag a siaanus nga ar-aramiden ti Dios para kadatayo, banbanag a saantayo a pakaikarian. Itultuloyyo a sititibker a patien daytoy a mensahe.
\v 13 Iti daytoy a siudad nga aw-awagantayo no maminsan iti 'Babilonia,' dagiti namati, a pinili ti Dios a maibilang kenkuana a kasla iti panangpilina kadakayo, kablaawandakayo. Ni Marcos, a kasla nga anakko, ket kablaawannakayo met.
\v 14 Kablaawanyo iti tunggal maysa a mabuyogan iti agek iti pingping a mangipakita nga ay-ayatenyo iti tunggal maysa. Ikararagko nga itedto ti Dios ti talna kadakayo amin a naitipon kenni Cristo.