ilo_udb/57-TIT.usfm

\id TIT
\ide UTF-8
\h Tito
\toc1 Tito
\toc2 Tito
\toc3 tit
\mt Tito

\s5
\c 1
\p
\v 1 Siak, ni Pablo, isuratko daytoy. Ni Pablo daytoy, nga adipen ti Dios ken apostol ni Jesu-Cristo. Agtrabahoak tapno matulongak dagiti tattao ti Dios nga ad-adda pay nga agtalek kenkuana. Pinilinatayo amin ti Dios nga agbalin a tattaona ket agtrabahoak tapno matulongak ida a maammoanda a pudno ti agbiag iti wagas a makaay-ayo iti Dios.
\v 2 Mabalin a maadal dagiti tattaona no kasano ti agbiag a kas iti daytoy, gapu ta natalgedda a pagbiagento ida ti Dios iti agnanayon. Awan ti inuulbod nga ibagbaga ti Dios. Uray idi sakbay a mangrugi ti lubong, inkarina nga agbiagtayo iti agnanayon.
\v 3 Kalpasanna, iti umno a tiempo, inaramidna ti saona a nalawag para iti amin tapno maawatanda gapu ta pinagtalkannak a mangikasaba iti daytoy a mensahe. Aramidek daytoy tapno agtulnogak iti bilin iti Dios, a mangisalakan kadatayo.

\s5
\v 4 Agsursuratak kenka, Tito, gapu ta kasla ka anak kaniak gapu ta agpadata a mamati kenni Jesu-Cristo. Agtultuloy koma ti Dios Ama koma ken Cristo Jesus a manangisalakantayo nga agbalin a naanus kadakayo ken mangted kadakayo iti kapia.
\v 5 Imbatika idiay Isla iti Creta gapu iti daytoy a rason; nga aramidem ti trabaho a saan pay a nalpas ken mangdutok pay kadagiti panglakayen para iti bunggoy dagiti namati iti tunggal siudad, kas iti imbagak kenka nga aramidem.

\s5
\v 6 Ita, ti tunggal panglakayen ket masapul nga awan iti siasinoman a makababalaw. Masapul nga addaan pay isuna iti may-maysa nga asawa a babai, masapul nga agtalek dagiti annakna iti Dios, ken masapul a saan nga ibilang dagiti tattao dagiti annakna a nadakes wenno nasukir.
\v 7 Ti tunggal maysa a mangidalan kadagiti tattao iti Dios ket maiyarig iti maysa a mangimatmaton iti balay ti Dios. Isu a kasapulan para iti daytoy a tao nga addaan isuna iti nasayaat a dayaw. Masapul a saan isuna a napasindayag, masapul a saan isuna a dagus a managpungtot, ken masapul a saan nga agtalinaed a managpungtot iti aniaman a rason. Masapul a saan isuna a mammartek, saan a kas iti mannakiapa ken mannakisinnuppiat, ken saan a naagum a tao.

\s5
\v 8 Malaksid iti dayta, masapul a managpasangbay isuna kadagiti gangannaet ken kaykayatna dagiti banbanag a nasayaat. Masapul a teppelanna a kankanayon ti bagina ken napudno isuna, ibagbagana a kankanayon ti kinapudno, ken tratoenna a nasayaat dagiti dadduma a tattao. Masapul a kankanayonna a panunoten ti maipanggep iti Dios no agpanunot wenno agaramid isuna iti aniaman a banag, ken masapul a liklikanna iti agbasol.
\v 9 Masapul a kankanayon isuna a mamati kadagiti pudno a banbanag nga insurotayo kenkuana, ken masapul nga agbiag isuna a maiyannurot kadagitoy. Masapul nga aramidenna daytoy tapno maallukoy dagiti tattao nga agbiag a kas met laeng iti daytoy, ken tapno iti maatur dagiti tattao no saanda a kayat ti agbiag kas iti daytoy.

\s5
\v 10 Ibagak kadakayo dagitoy a banbanag, gapu ta adu dagiti tattao a saan a mangayat nga adda ti siasinoman a mangtengngel kadakuada, nangnangruna dagiti tattao a mangibagbaga kadagiti amin a pasurot ni Cristo nga agpakugitda. Awan pategna dagiti ibagbagada. Al-allilawen ken allukoyenda dagiti tattao a mamati kadagiti palso a banbanag.
\v 11 Sika ken dagiti mangidadaulo a dinutokam ket masapul a pawilanyo dagiti kasta a tattao a mangisuro kadagiti namati. Awan iti karbenganda nga mangisuro kadagiti a-aramidenda. Isursuroda dagitoy a banbanag tapno ikkan ida dagiti tattao iti kuarta. Nakababain unay daytoy! Ar-aramidenda pay ti entero a pamilia a mamati kadagiti palso a banbanag.

\s5
\v 12 Maysa a tao iti Creta, a ti pagarup ti maysa kadagiti tattaona ket maysa isuna a profeta, kinunana, "Kankanayon nga agul-ulbod dagiti taga Creta iti maysa ken maysa! Kaslada dagiti napeggad nga atap nga ay-ayup! Sadutda ken kankanayon a manganda iti adu unay a makan."
\v 13 Ti kinunana ket pudno, isu a pilitem nga aturen isuda tapno patienda ket agisuroda kadagiti husto a banbanag maipanggep iti Dios.

\s5
\v 14 Saan koma a sayangen dagitoy a tattao ti tiempoda kadagiti awan kaes-eskanna a pakasaritaan dagiti Judio ken bilbilin a naggapu kadagiti tattao, saan a manipud iti Dios. Timmallikod dagitoy a tattao iti kinapudno.

\s5
\v 15 No adda ti awanan iti managbasol a kapanunotan wenno tartarigagay, ket nasayaat ti panangkitana kadagiti a banbanag. Ngem no ti siasinoman ket dakes ken saan a mamati kenni Cristo Jesus, amin a banag ket isu iti mangparugit kekuana. Dagitoy a tattao ket agpanunot iti narugit a wagas, ken inkeddengda nga agtignay iti dakes a wagas.
\v 16 Uray no ibagbagada nga ammoda ti Dios, ipakpakita dagiti ar-aramidenda a saanda nga am-ammo isuna. Marurod dagiti sabali a tattao kadakuada. Saanda nga agtultulnog iti Dios ken awan ti maaramidda a nasayaat para kenkuana.

\s5
\c 2
\p
\v 1 Ngem sika, Tito, masapul nga isurom dagiti banbanag a makatulong kadagiti tattao a mamati iti kinapudno maipanggep iti Dios.
\v 2 Masapul a tenglen dagiti panglakayen a lallaki dagiti bagbagida iti amin a tiempo. Masapul nga agbiagda iti wagas a raemen ida iti sabali a tattao, ken masapul nga agsaoda a sisisirib. Masapul pay a patienda ti pudno a banbanag maipanggep iti Dios, ayaten a sipupudno dagiti dadduma, ken agtultuloy nga aramidenda dagitoy a banbanag.

\s5
\v 3 Dagiti natataengan a babbai, kas kadagiti lallaki, ket masapul nga agbiag tapno maammoan ti tunggal maysa a raraemenda ti Dios iti kasta unay. Masapul a saanda nga agsao iti dakes a banbanag maipanggep iti dadduma a tattao, ken masapul a saanda nga uminom iti adu unay nga arak. Ngem rumbeng nga isuroda kadagiti dadduma no ania iti nasayaat.
\v 4 Iti daytoy a wagas, masapul nga isuroda dagiti agtutubo a babbai nga agpanunot a sisisirib ken ayatenda dagiti bukodda nga assawa ken annak.
\v 5 Masapul nga isuro dagiti natataengan a babbai dagiti agtutubo a babbai nga agpanunot iti nasayaat, saan nga agtignay iti dakes a wagas iti siasinoman a tao, nga agtrabaho a nasayaat iti pagtaengan, ken aramidenda ti ibaga dagiti assawada a lalaki kadakuada. Rumbeng nga aramidenda amin dagitoy a banbanag tapno awanto iti siasinoman a manglais iti Sao ti Dios.

\s5
\v 6 Ken maipapan kadagiti agtutubo a lallaki, suroam met isuda. Ibagam kadakuada a teppelanda a nalaing ti bagbagida.
\v 7 Para kenka, Tito, anakko, kanayonmo nga ipakita kadagiti sabali a tattao no kasano iti agaramid iti nasayaat nga ar-aramid; ipakitam kadakuada a sursuroam dagiti namati a sipupudno no ania iti pudno ken nasayaat ken maipanggep ti Dios.
\v 8 Suroam dagiti tattao iti wagas nga awan ti makadillaw, tapno no adda ti siasinoman a mangpasardeng kenka, pabainanto isuna dagiti dadduma a tattao gapu ta awan iti maibagana a dakes maipanggep kadatayo.

\s5
\v 9 Maipanggep kadagiti kakabsattayo ken kadagiti pamilia a tagabu: rumbeng a kanayon a paiturayanda kadagiti amoda. No mabalbalin, masapul nga agbiagda a makaay-ayo kadagiti amoda iti amin a wagas, ken masapul a saanda a makisuppiat kadakuada.
\v 10 Masapul a saanda nga agtakaw uray kadagiti babassit a banbanag manipud kadagiti amoda; ngem ketdi, napudnoda koma kadakuada, ken aramidenda koma ti tunggal banag iti wagas a mangiturong kadagiti tattao a dayawenda amin nga isursurotayo maipanggep iti Dios, a mangisalakan kadatayo.

\s5
\v 11 Tito, daytoy ti kayat a sawen dagiti amin nga insuratko: mabalinen a maammoan ti tunggal maysa ita a tartarigagayan ti Dios nga isalakan ida; daytoy ket sagutna kadakuada.
\v 12 Isursuronatayo daytoy mangisalsalakan a parabur manipud iti Dios, a kasla datayo ket ubbing, nga agmadi kadagiti tarigagay a mabirukan iti daytoy a lubong. Tulongannatayo daytoy nga agpanunot maipanggep kadagiti banbanag iti umno a wagas, nga agbalin a napudno, napno iti kinapudno, ken patas kadagiti dadduma a tattao ken tapno kankanayon nga adda ti Dios kadagiti panpanunottayo ken kadagiti tignaytayo kabayatan nga agtataengtayo iti daytoy a lubong.
\v 13 Iti isu met laeng a tiempo, isursuronatayo ti Dios nga aguray iti aramidennanto iti masakbayan, a mangparagsakto iti kasta unay kadatayo: Dayta ket, ni Jesus a Mesias, ti Manangisalakantayo ken mannakabalin a Dios, ket agsublinto kadatayo iti naindaklan a dayag.

\s5
\v 14 Intedna ti bagina a matay kas bayad tapno mawayawayaantayo manipud iti awanan linteg a kababalin, tapno aramidennatayo a napateg a kukuana, napateg a tattao a dinalusanna, dagiti tattao a kangrunaan a rag-oda ket ti agaramid iti nasayaat.

\s5
\v 15 Tito, agsaoka maipanggep kadagitoy a banbanag. Guyo-guyem dagiti makangngeg kenka nga agbiag a kas iti inladawak. Ken usarem amin a turaymo iti bilin a mangilinteg kadagiti kakabsattayo a lallaki ken babbai no kasapulan. Awan koma ti mangiyaleng-aleng iti ibagam.

\s5
\c 3
\p
\v 1 Tito, siguradoem a palagipan dagiti tattaotayo a, no mabalbalin, agtungpaltayo koma kadagiti annuroten ken linlinteg a mangiturturay iti timpuyogtayo. Kasapulantayo nga agbalin a natulnog ken sisasagana nga agaramid iti nasayaat iti tunggal gundaway.
\v 2 Saantayo koma nga agibaga iti saan a nakararaem a banbanag maipanggep iti siasinoman wenno makisuppiat kadagiti tattao. Nasayaat a bay-an dagiti dadduma a tattao nga aramidenda ti kayatda imbes a pilitem ida nga aramidenda iti bukodtayo a wagas, ken tratoenda koma ti tunggal maysa iti kinaalumamay.

\s5
\v 3 Ta adda idi iti tiempo nga awanantayo amin iti kapanunotan ken saan a naallukoy maipanggep kadagitoy a banbanag. Naiyaw-awantayo ken nagpaituraytayo kadagiti nadumaduma a kayat ti rikna ken ragragsak a kasla tagabudatayo dagitoy. Nagbibiagtayo nga umap-apal iti tunggal maysa ken agar-aramid iti dakes. Nagaramidtayo iti pakaigapuan a guraendatayo dagiti tattao ken ginuratayo iti maysa ken maysa.

\s5
\v 4 Ngem idi impakita ti Dios nga agtigtignay isuna a mangisalakan kadagiti amin a tattao gapu ta ay-ayatenna isuda,
\v 5 insalakannatayo babaen iti panangdalusna iti kaunggantayo, kasla naiyanaktayo manen, ken napabarotayo babaen it Espiritu Santo. Saannatayo nga insalakan gapu ta nagaramidtayo kadagiti nasayaat a banbanag, ngem insalakannatayo gapu ta manangngaasi isuna.

\s5
\v 6 Inted a sibubuslon ti Dios ti Espiritu Santona kadatayo idi insalakannatayo ni Jesus a Mesias.
\v 7 Babaen iti daytoy a sagut, impakaammo ti Dios a tunggal banag ket naaramid a nasayaat kenkuana ken kadatayo. Ken ad-adda pay ngem iti dayta, agbibingaytayonto iti tunggal banag nga ited ti Apo Jesus kadatayo, nangnangruna iti agnanayon a biag kenkuana.

\s5
\v 8 Daytoy ket salaysay a mapagtalkan. Kayatko nga itultuloymo nga ipaganetget dagitoy a banbanag tapno dagiti namati iti Dios ket kanayonda nga ipaay ti bagida nga agaramid kadagiti nasayaat ken makatulong a banbanag nga insagana ti Dios nga aramidenda. Nasayaat ken makaited iti pagimbagan dagitoy a banbanag para iti tunggal maysa.

\s5
\v 9 Ngem umadayokayo kadagiti awan kaes-eskanna a panagsusuppiat, pannakairamraman maipanggep kadagiti kapuonan ti puli dagiti Judio, panagsusuppiat ken panagririri maipanggep kadagiti linteg iti relihion. Awan kaes-eskanna dagita a pakabusbosan iti tiempo ken pigsayo.
\v 10 No itutuloy dagiti tattao nga ar-aramiden dagitoy a mamagsina nga ar-aramid kalpasan a binallaagam isuda iti maysa wenno dua a daras, ket baybay-amon isuda,
\v 11 gapu ta dagiti tattao a kas kadagita ket timmallikod manipud iti kinapudno; agbibiagda iti basol ken ukomenda ti bagbagida.

\s5
\v 12 Apaman a maibaonko ni Artemas wenno Tikico kenka, aramidem ti amin a kabaelam a makaumay kaniak idiay ili iti Nicopolis, gapu ta ingkeddengko a palabasen ti panawen ti lammiis idiay.
\v 13 Aramidem ti amin a kabaelam a mangibaon kenni Zenas, ti nalaing iti linteg, ken ni Apolos iti panagdalliasatda, ipatugotyo amin a kasapulanda.

\s5
\v 14 Siguradoem a maadal dagiti tattaotayo nga ikabil dagiti bagbagida iti nasayaat nga ar-aramid a makasabet kadagiti kasapulan dagiti dadduma a tattao. No aramidenda daytoy makapatauddanto iti bunga para iti Dios.

\s5
\v 15 Tito, pakumustaandaka dagiti amin a kakaduak! Ken pangngaasim ta pakumustaam dagiti gagayyemtayo dita a mangay-ayat kadatayo a kas pada a namati. Parabur ti makikaadda kadakayo amin.