ilo_udb/52-COL.usfm

\id COL
\ide UTF-8
\h Taga-Colosas
\toc1 Taga-Colosas
\toc2 Taga-Colosas
\toc3 col
\mt Taga-Colosas

\s5
\c 1
\p
\v 1 Siak ni Pablo, isursuratko daytoy kadagiti patpatgek a pada a namati iti siudad ti Colosas. Naggapu daytoy kenni Pablo, a pinili ti Dios a mangipatulod kadakayo kas maysa nga adalan ni Cristo Jesus, ken naggapu pay daytoy a surat kenni Timoteo, ti padatayo a namati a naikadua kenni Cristo. Ipatulodmi daytoy a surat kadakayo amin.
\v 2 Ipatulodmi daytoy a surat kadagiti inlasin ti Dios para iti bagina-dagiti napudno a namati a kukua ni Cristo. Ikarkararagmi nga ited kadakayo ti Dios nga Amatayo ti kinaimbag ken talna a nagtaud kenkuana.
\v 3 Masansan nga agyamyamankami iti Dios, ti Ama ti Apotayo a Jesu-Cristo kabayatan nga ikarkararagandakayo,

\s5
\v 4 gapu ta nangngeganmi nga agtaltalekkayo kenni Cristo Jesus ken ay-ayatenyo dagiti amin nga inlasin ti Dios a maipaay kenkuana.
\v 5 Ay-ayatenyo dagiti padatayo a namati gapu ta sitatalgedkayo a mangur-uray kadagiti banbanag nga isagsagana ti Dios para kadakayo idiay langit. Immuna a nangegyo ti maipanggep kadagitoy a banbanag idi nangngegyo ti pudno a mensahe, ti naimbag a damag maipanggep kenni Cristo.
\v 6 Iwarwaragawag dagiti namati kadagiti amin a tattao iti lubong daytoy naimbag a damag a nangngeganyo idiay Colosas. Kas met iti panagtignayna kadakayo, manipud idi umuna nga aldaw a nangngegyo ken naawatanyo ti kinaimbag ti Dios. Ti naimbag a damag ket kas iti talon a namulaan a dumakdakkel ken mangted iti adu unay nga apit.

\s5
\v 7 Insuro kadakayo ni Epafras a mapasamak daytoy. Ay-ayatenmi isuna gapu ta kaduami isuna nga agserserbi kenni Cristo ken agtrabtrabaho isuna para kenni Cristo a sipupudno iti biangmi.
\v 8 Imbagana kadakami nga ay-ayatenyo dagiti amin a tattao ti Dios, gapu ta pinabilegnakayo iti Espiritu ti Dios a mangayat iti Dios ken kadagiti dadduma.

\s5
\v 9 Sipud nangngegmi ti maipanggep iti panagayatyo, inkarkararagandayon a kankanayon. Dawdawatenmi iti Dios nga ipakitana kadakayo dagiti amin a kayatna nga aramidenyo, ken pagbalinennakayo a nasirib tapno maawatanyo ti isursuro iti Espiritu ti Dios kadakayo.
\v 10 Ikarkararagmi nga agbiagkayo iti wagas a padayawan dagiti dadduma ti Apo, tapno annamungannakayo. Ikarkararagmi nga aramidenyo amin a nasayaat a banag nga ibagana nga aramidenyo.

\s5
\v 11 Ikarkararagmi a papigsaennakayo ti Dios iti amin a naindaklan a pannakabalinna, tapno maibturanyo a siaanus dagiti amin a pagrigatan.
\v 12 Ikarkararagmi nga agrag-okayo ken agyamankayo iti Dios nga Amatayo, gapu ta imbilangnakayon a maikari a makikadua kadagiti dadduma nga inlasinna para iti bagina; daytoy ket tapno maitedna kadakayo dagiti amin a banag a salsaluadanna a para kadakayo iti kaaddayo kenkuana iti lawag ti presensiana.

\s5
\v 13 Inispalnatayo ti Dios nga Amatayo manipud iti dakes a nangtengngel kadatayo; pinaiturayannatayo ita iti Anakna nga ipatpategna.
\v 14 Babaen iti Anakna, winayawayaannatayo manipud iti dayta a dakes, dayta ket, pinakawannatayo kadagiti basbasoltayo.

\s5
\v 15 No ammotayo ti Anak, ammotayo met ti kinasiasino ti Dios, uray no saantayo a makita isuna. Adda kenni Cristo ti umuuna a saad kadagiti amin a pinarsuana.
\v 16 Ta ti Anak ti nangparsua kadagiti amin a banag, a kas iti kayat ti Ama nga aramidenna: amin a banag iti tangatang ken amin a banag iti daga, amin a banag a makitatayo ken amin a banag a saantayo a makita, kas kadagiti anghel iti amin a kita ken pannakabalin ken turay. Adda ti amin a banag gapu ta pinarsua ida amin ti Anak gapu ta isu ti kayat ti Ama nga aramidenna. Ken addada maipaay kenkuana.
\v 17 Addan ti Anak sakbay ti amin a banbanag, ken isuna ti mangtengtengngel iti amin a sangsangkamaysa.

\s5
\v 18 Iturturayanna dagiti amin a namati-ti iglesia-kas iti ulo ti nga iturturayanna ti bagi. Iturturayanna ti entero nga Iglesia gapu ta isuna ti nangirugi iti daytoy. Isuna ti immuna a tao a nagungar nga addaan iti awan pagkuranganna a bagi. Isu a natantan-ok isuna ngem iti amin a banag.
\v 19 Naay-ayo ti Dios a nangikabil iti amin a kinasiasinona kenni Cristo.
\v 20 Makaay-ayo pay iti Dios nga ikapia iti amin a banag kenkuana babaen kenni Jesus. Nangidiaya ti Dios iti kapia kadagiti amin a tattao ken kadagiti amin a banag iti sadinoman iti daga ken iti langit. Inaramidna daytoy babaen iti panangitulokna iti Anakna a matay iti krus a kas sakripisyo, a nangibukbok iti darana idi natay isuna.

\s5
\v 21 Sakbay a namatikayo kenni Cristo, inbilangnakayo ti Dios a kabusorna, ken saankayo a nakigayyem iti Dios gapu ta dakes dagiti panpanunotyo ken dakes dagiti inar-aramidyo.
\v 22 Ngem ita, nangidiaya ti Dios iti pannakikapiana kadakayo ken inbilangnakayon a gagayyemna. Inaramidna daytoy idi inted ni Jesus ti bagina ken ti biagna para kadatayo babaen iti ipapatayna. Daytoy ti namagbalin kadatayo a maibilang a kukua ti Dios; awanen ti masapulanna a saan a nasayaat kadatayo, awanen ti maipabasolna kadatayo.
\v 23 Ngem masapul nga agtultuloykayo nga agtalek a naan-anay kenni Cristo; ket agbalinkayonto a kasla maysa a balay nga inpatakderda iti natibker a bato. Saankayo nga agsardeng iti aniaman a rason a mamati iti inkari ti Dios nga aramidenna kadakayo iti naimbag a damag a nangngeganyo ken dagiti amin a tatto iti entero a lubong. Daytoy met laeng a naimbag a damag a siak, ni Pablo ket agserserbiak iti Dios babaen iti panangiwaragawagko kadagiti tattao.

\s5
\v 24 Ita, agrag-oak ta agsagsagabaak para iti pagimbaganyo. Wen, tapno matulongan ti Iglesia, a kasla bagi ni Cristo, sagsagabaek dagiti banbanag a rumbeng pay laeng a mapasamak.
\v 25 Pinagbalinnak ti Dios nga adipenna ken inikkannak iti naisangsangayan a trabaho nga aramidek, a mangiwaragawag iti sibubukel a mensahe ti Dios kadagiti saan a Judio kas kadakayo.
\v 26 Manipud kadagiti nagkauna a tiempo, kadagiti henerasion, saan nga imbaga ti Dios daytoy a naimbag a damag, ngem ita ket inparangarangna daytoy a palimed kadagiti inlasinna para kenkuana.
\v 27 Kadagitoy a tattao-Judio ken saan a Judio kas iti bagbagiyo-a pinanggep ti Dios a panangibagana iti daytoy a palimed. Isu daytoy: Agnaedto ni Cristo kadakayo ken sitatalged nga ipanamnamana kadakayo a makibingaykayonto iti dayag ti Dios!

\s5
\v 28 Sisisirib a balballaagan ken isursuromi iti tunggal tao iti maipanggep kenni Cristo tapno maiyegmi iti imatang ti Dios ti tunggal maysa a kas am-ammoda a naan-anay ti Dios, a naitipon kenni Cristo.
\v 29 Ti panangar-aramid iti daytoy ti itrabtrabahoak iti kasta unay, gapu ta ik-ikkannak ni Cristo iti pigsa.

\s5
\c 2
\p
\v 1 Kayatko a maamirisyo nga ar-aramidek amin a kabaelak tapno matulongankayo ken dagiti adda idiay Laodicea, ken kasta met kadagiti namati a saan pay a pulos a nakakita kaniak.
\v 2 Ar-aramidek daytoy tapno mapakiredko ida ken dakayo tapno agiinnayatkayo ken agkaykaysakayo. Tartarigagayak a sitatalged a maawatanyo amin ken maawatanyo a naan-anay daytoy kinapudno a palimed maipanggep iti Dios ken daytoy a kinapudno ket ni Cristo!
\v 3 Babaen laeng kenni Cristo a maammoantayo ti panpanunoten ti Dios ken ti kinasiribna.

\s5
\v 4 Ibagbagak daytoy kadakayo tapno awan ti makaallilaw kadakayo.
\v 5 Uray no awanak a mismo kadakayo, maseknanak unay kadakayo, a kasla pudno nga addaak kadakayo. Ngem agragrag-oak gapu ta ammok a sursurotenyo ni Cristo iti wagas nga awan makapasardeng kadakayo, nga agtaltalekkayo kenni Cristo nga awan ti panagsarsardeng.

\s5
\v 6 Nangrugikayo a namati kenni Cristo Jesus nga Apo babaen iti panagtalekyo kenkuana, ngarud, agbiagkayo met a sitatalek kenkuana.
\v 7 Masapul nga agdependarkayo a naan-anay kenni Cristo Jesus nga Apo, kas iti panagramut ti kayo iti daga. Nasursuroyo ti agtalek kenni Cristo iti kasta unay iti kastoy a wagas, kas iti panangipatakder dagiti tattao iti maysa a balay nga addaan iti natibker a pundasyon. Ken kanayonkayo koma nga agyaman iti Dios.

\s5
\v 8 Saanyo a patpatien ti siasinoman na mangibagbaga a masapul nga agtulnogkayo iti insuro dagiti tattao maipanggep iti panagdayaw iti Dios wenno masapul nga agtulnogkayo kadagiti daydayawenda iti daytoy a lubong. Ngem ketdi, agtulnogkayo kenni Cristo,
\v 9 gapu ta ti tao a ni Jesu-Cristo ket pudno a Dios.

\s5
\v 10 Ita, inted ti Dios kadakayo dagiti amin a kasapulanyo gapu ta intiponnakayo kenni Cristo, ken agturturay isuna iti tunggal tao, espiritu, ken anghel.
\v 11 Dayta ket kasla kinugitnakayo met ti Dios. Ngem saannakayo nga inikkatan iti aniaman a lasag. Ngem ketdi, inikkat ni Jesus ti banag a nakaigapuan ti panagbasolyo.
\v 12 Gapu ta binautisarandakayo, ibilbilang ti Dios nga idi intabon dagiti tattao ni Cristo, intabonnakayo met a kaduana. Ibilbilangna nga idi pinagbiagna manen ni Cristo, pinagbiagnakayo met, gapu ta nagtalekkayo a kabaelannakayo a pabbiagen manen.

\s5
\v 13 Inbilangnakayo ti Dios a kas natay, gapu ta agbasbasolkayo kenkuana, ken gapu ta saankayo a Judio, isu a saanyo a daydayawen isuna. Ngem pinagbiagnakayo a kadua ni Cristo; pinakawannatayo kadagiti amin a basoltayo.
\v 14 Nagbasoltayo amin iti kasta unay, ngem pinakawan ti Dios dagiti basbasoltayo. A kasla iti maysa a tao a mangpakawan kadagiti nakabulod kenkuana iti kuarta, isu a pinigisna dagiti papel a pinirmaanda idi pinabulodanna ida iti kuarta. Ngem no maipanggep iti Dios, kasla inlansana iti krus a nakatayan ni Cristo dagiti papel a nangisuratanna kadagiti basbasoltayo ken dagiti amin a linteg a sinukirtayo.
\v 15 Maysa pay, pinarmek ti Dios dagiti dakes nga espiritu a mangiturturay kadagiti tattao iti daytoy a lubong, ken intulokna a maammoan ti amin a pinarmekna ida. Daytoy ket kasla inparadana ida kadagiti kalsada a kas balud!

\s5
\v 16 Isu a saanyo nga ikankano ti siasinoman nga agibagbaga a dusaennakayo ti Dios gapu ta adda dagiti makan a kankanenyo ken adda dagiti mainum nga in-inomenyo wenno gapu ta saankayo nga agramrambak kadagiti naisangsangayana fiesta a maramrambakan iti tinawen wenno no agparang ti baro a bulan wenno ti linawas nga Aldaw ti Panaginana.
\v 17 Ipakpakita laeng dagitoy a kita ti pagannurotan ken paspasamak ti pudno a dumtengto. Ti pudno nga umay ket ni Cristo a mismo!

\s5
\v 18 Saanyo nga itulok a lappedan dagiti tattao ti panangisalakan ti Dios kadakayo babaen iti panangallukoyda kadakayo a mamati iti ibagbagada a nasken nga agtulnogkayo a sipapakumbaba ken dayawenyo dagiti anghel. Kanayon a dakdakamaten dagitoy a tattao ti maipanggep kadagiti sirmata nga ibagbagada nga impakita ti Dios kadakuada. Ipalastogda ti maipapan kadagitoy a banbanag gapu ta agpanpanunotda a kas iti panagpanpanunot dagiti tattao iti sadinoman a saan nga agdaydayaw iti Dios.
\v 19 Dagiti kakasta a tattao ket saan a naitipon kenni Cristo. Ngem isuna ket kasla ulo ti bagi, ken dayta a bagi ket dagiti amin a mamati kenkuana. Agpaituray ti entero a bagi iti ulo. Pagtitimpuyogen dagiti tultulang ken ur-urat ti bagi, ngem ti Dios ti mangpadpadakkel iti daytoy, ken ti ulo ti mangmangted iti kasapulanna daytoy.

\s5
\v 20 Ibilbilang ti Dios a nataykayo a kadua ni Cristo idi natay isuna. Ita ngarud, dagiti espiritu ken dagiti paglintegan nga ar-aramiden dagiti tattao a mangay-ayo iti Dios: awanen kadagitoy a banbanag ti mangituray kadakayo. Isu nga apay nga agbibiagkayo pay laeng a kasla pudno dagitoy a banbanag? Apay nga agtultulnogkayo pay laeng kadagitoy a banbanag?
\v 21 Dagitoy a paglintegan ket kas iti: "Adda dagiti banbanag a masapul a saanmo nga iggaman. Adda dagiti banbanag a masapul a saanmo a ramanan. Adda dagiti banbanag a masapul a saanmo a sagiden." Saanyo a pagarupen a masapulyo pay laeng ti agtulnog kadagiti kasta a pagannurotan.
\v 22 Dagitoy a pagannurotan ket maipanggep amin kadagiti banbanag a mapukaw iti daytoy a lubong kas ar-aramaten ida dagiti tattao.
\v 23 Dagitoy a pagannurotan ket kasla nasayaat. Ngem inaramid dagitoy dagiti tattao gapu ta padpadasenda a padayawan ti Dios. Isu a masansan a kasla da la napakumbaba unay; isu a masansan a paspasakitanda dagiti bukodda a bagi. Ngem no agtulnogtayo kadagitoy a pagannurotan, saantayo a pudno a nagsardeng iti panagtarigagaytayo nga agbasol.

\s5
\c 3
\p
\v 1 Ibilbilang ti Dios a pinabbiagnakayo manen idi pinabbiagna ni Cristo kalpasan a natay isuna. Ken adda ni Cristo idiay langit ken nakatugaw iti makannawan ti Dios, ti lugar para iti tao nga addaan iti kangatoan a pammadayaw ken pannakabalin. Masapul met nga ikagumaanyo ti agbiag ditoy a kasla addakayon idiay.
\v 2 Tarigagayanyo dagiti salsalimetmetan ni Jesus idiay langit nga itednanto kadakayo; saanyo a tarigagayan dagiti banbanag nga adda ditoy daga.
\v 3 Ta ibilbilangnakayon ti Dios a natay ken saankayon a maibilang iti daytoy a lubong. Ibilbilangna nga inlemmengnakayo a kadua ni Cristo tapno maannadannakayo.
\v 4 Inton iparangarang ti Dios ni Cristo iti tunggal maysa ditoy daga iti agranraniag a lawagna, ket iparangarangnakayonto met iti dayta met laeng a lawag, gapu ta ni Cristo ti mangpabiag kadakayo!

\s5
\v 5 Ngarud, panunotenyo dagiti amin a dakes a banbanag a kayatyo nga aramiden iti daytoy a lubong a kasla dagiti kabusor a masapul a matay. Masapul a papatayenyo ida: Saanyo a padasen nga agaramid kadagiti kinaderrep wenno narugit nga aramid. Saankayo nga agpanunot iti nagartem wenno kadagiti dakes a wagas. Ken saankayo nga agbalin a naagum, gapu ta dayta ket kas met laeng iti panagdaydayaw kadagiti didiosen.
\v 6 Gapu ta ar-aramiden dagiti tattao ti kas kadagitoy a banbanag isu a kaunget ida ti Dios, ta saanda nga agtultulnog kenkuana.
\v 7 Dakayo ket nagbiag met idi iti kas iti dayta idi nakipagpaspasetkayo kadagidiay nagtignay a kas iti dayta.
\v 8 Ngem ita, masapul nga isardengyon ti agaramid kadagitoy a banbanag. Saankayo a makaunget iti tunggal maysa; saankayo nga agaramid iti pakariribukan ti maysa ken maysa. Saanyo a laisen ti maysa ken maysa wenno agsao kadagiti nakababain ken makarurod a wagas.

\s5
\v 9 Ken saankayo nga aggiinnulbud. Saanyo nga aramiden ti aniaman kadagitoy a banbanag, gapu ta nagbalinkayon ita a baro a tao, tao a saanen a pulos nga agaramid kadagitoy a dakes a banbanag.
\v 10 Barokayon a tattao, ken kankanayonnakayo a pabpabaroen ti Dios tapno ad-adda pay a maam-ammoyo isuna, ti nangaramid kadakayo a baro a tao a kas kenkuana.
\v 11 Pinagbalinnatayo ti Dios a baro a tattao a naitipon kenni Cristo, ken kanayonnatayo a pabpabaroen. Isu a saanen a napateg no Hentil man ti dadduma wenno Judio, wenno nakugit man wenno saan ti siasinoman, wenno gangannaet man ti siasinoman, wenno uray naranggas, wenno tagabu man wenno saan. Ngem ketdi, ti napateg ket ni Cristo, nga isu ti amin a banbanag kadakayo amin.

\s5
\v 12 Gapu ta pinilinakayo ti Dios ken inlasinnakayo a kas tattaona, ken gapu ta ay-ayatennakayo, pagserbianyo dagiti dadduma a siaanus ken siaasi ken addaan ti kinasingpet. Ipategyo a sipapakumbaba ken siaalumanay ti maysa ken maysa nga addaan ti anus
\v 13 ken agiinnanuskayo. No agriri ti siasinoman maibusor iti sabali a tao, pakawanenyo ti maysa ken maysa. Kas pinakawannakayo ni Apo Jesus, kasta met a masapul a pakawanenyo ti maysa ken maysa.
\v 14 Ken ti kangrunaan ket ayatenyo ti maysa ken maysa, gapu ta babaen iti panangaramidyo iti dayta, ket pagmaymaysaenyo dagiti bagbagiyo a naan-anay.

\s5
\v 15 Ni Cristo ti mangar-aramid tapno agbiagkayo nga addaan iti kapia iti Dios ken iti maysa ken maysa, isu nga agsingsingpetkayo a kankanayon tapno agtalinaedkayo iti kapia. Daytoy ti gapuna nga inawagannakayo tapno agmaymaysakayo. Ken kanayonkayo nga agyaman iti Dios para iti amin a banag.
\v 16 Kas agbibiag ken agserserbikayo iti Dios, agmaymaysakayo nga agtulnog a kankanayon kadagiti insuro ni Cristo kadakayo. Suroan ken bilinenyo ti maysa ken maysa nga addaan iti kinasirib; agdayaw ken agyamankayo a sipupudno iti Dios iti panagkantayo kadagiti salmo, himno, ken kankansion a mangpadayaw kenkuana.
\v 17 Aniaman nga ibagayo, ken aniaman nga aramidenyo, aramidenyo amin dagitoy a pangdayaw kenni Apo a Jesus, ken aramidenyo daytoy kabayatan nga agyamyamankayo iti Dios maipanggep iti inaramid ni Cristo para kadakayo.

\s5
\v 18 Assawa a babbai, agtulnogkayo kadagiti assawayo; daytoy iti umno ken maiyannurot iti imbilin ni Apo a Jesus.
\v 19 Assawa a lallaki, ayatenyo dagiti assawayo ken saanyo ida a ranggasan.
\v 20 Annak, agtulnogkayo kadagiti nagannakyo iti amin a wagas, gapu ta maay-ayo ni Apo Dios no aramidenyo dayta.
\v 21 Amma, saanyo a paungeten dagiti annakyo, tapno saanda a maupay.

\s5
\v 22 Dakayo a tagabu, agtulnogkayo kadagiti amoyo iti daytoy a lubong iti amin a wagas. Saankayo laeng nga agtulnog kadagiti amoyo no banbantayandakayo, kasla kadagiti mangayat laeng a pagarupen dagiti amongda a kankanayonda nga agtultulnog. Ngem ketdi, agtulnogkayo a sipupudno kadagiti amoyo gapu ta padpadayawanyo ni Apo Jesus.
\v 23 Aniaman nga aramidenyo, agtrabahokayo a naimpusoan para kenni Apo Jesus, saan a kadagiti tattao. Saankayo nga agtrabaho a kasla kadagiti agtrabaho laeng para kadagiti tao nga amoda,
\v 24 gapu ta ammoyo a subadannakayonto ti Apo; awatenyonto ti bingayyo kadagiti inkari ti Apo kadakayo. Ni Jesu-Cristo ti pudno nga amo a pagserserbianyo.
\v 25 Ngem ukomento ti Dios ti tunggal maysa iti isu met laeng a wagas; dusaennanto dagiti agar-aramid iti biddut a maikari kadakuada.

\s5
\c 4
\p
\v 1 Dakayo nga Amo, tratoenyo dagiti tagabuyo a sililinteg ken ipaayyo nga awan panangidumdumana ti aniaman a kasapulanda, gapu ta ammoyo nga adda met amoyo nga adda idiay langit.

\s5
\v 2 Kanayonkayo nga agkararag nga awan panagsardengna. Saankayo nga agsadsadut, ngem ketdi ituloyyo ti agkarkararag ken agyamyaman iti Dios.
\v 3 Agkay-kaysakayo met a mangikararag kadakami, tapno pagbalinen ti Dios a siwayawayami a maipalawag ti naimbag a damag, ti palimed maipanggep kenni Cristo nga ipakpakaammon ita ti Dios iti sadinoman. Gapu iti pangiwaragawagmi iti daytoy naimbag a damag nga addaak ita iti pagbaludan.
\v 4 Ikararagyo a mabaelak koma nga ipalawag a naan-anay ti naimbag a damag.

\s5
\v 5 Agbiagkayo a sisisirib iti aglawlaw dagiti saan a namati, ken ipategyo ti tunggal kanito babaen iti sisirib a panangar-aramatyo iti daytoy.
\v 6 Kankanayonkayo nga agsao a sipaparabur ken iti makaay-ayo ken makaguyugoy a wagas kadagiti saan a mamati kenni Apo Jesus. Ket maamoanyonto no kasano ti agsao iti tunggal tao maipanggep ti Apo.

\s5
\v 7 Ibaganto ni Tikiko kadakayo ti amin a mapaspasamak kaniak. Pada a namati isuna nga ay-ayatek, a sipupudno a mangtultulong kaniak, ken kaduak nga agserserbi kenni Apo Jesus.
\v 8 Ti makagapu nga ibabaonko ni Tikiko kadakayo ken daytoy impaw-itko a surat ket tapno maammoanyo ti maipanggep kadakami ken tapno mapakirednakayo.
\v 9 Ibaonko isuna kadakayo a kaduana ni Onesimo, a maysa pada a napudno a namati, nga ay-ayatek ken kailianyo. Ibagadanto kadakayo dagiti amin a napaspasamak ditoy.

\s5
\v 10 Pakumustaan dakayo da Aristarko, a kaduak a nakabalud, ken ni Macos, a kasinsin ni Bernabe. Binilinkayon maipanggep kenni Marcos, isu a no umay isuna kadakayo, pasangbayenyo isuna.
\v 11 Pakumustaannakayo met ni Jesus a managan pay iti Justos. Dagitoy tallo a lallaki ket dagiti kakaisuna a namati a Judio a kaduak nga agtrabtrabaho a mangiwarwaragawag iti Dios a kas ari babaen kenni Cristo Jesus. Natulongandak iti kasta unay ken napakireddak.

\s5
\v 12 Pakumustaannakayo ni Epafras, nga kailianyo ken adipen ni Jesu-Cristo. Kankankayon a sipipinget nga agkarkararag isuna para kadakayo, a mapapigsa ken mamatikayo koma iti amin nga isursuro ken kadagiti ikarkari ti Dios kadatayo.
\v 13 Maibagak nga ingkagumaanna iti nagtraho iti kasta unay para kadakayo, para kadagiti agnanaed iti siudad iti Laodicea, ken kasta met kadagiti agnanaed iti siudad ti Hikapolis.
\v 14 Pakumustaannakayo da Lucas a mangngagas nga ay-ayatek ken ni Demas.

\s5
\v 15 Kablaawanyo dagiti pada a namati nga agnanaed idiay Laodicea, kasta met ni Nimfas ken ti bunggoy dagiti namati nga agsasarak idiay balayna.
\v 16 Kalpasan nga adda mangibasa iti daytoy a surat kadakayo, ipabasayo met daytoy a surat iti taripnong dagiti namati idiay Laodicea. Ken basaenyo met ti surat a naggapu idiay Laodicea.
\v 17 Ibagayo kenni Arkipo a siguraduenna a malpasna ti trabaho nga ipapaaramid ti Dios kenkuana.

\s5
\v 18 Siak ni Pablo, pakumustaankayo ita iti bukodko a panagsurat. Laglagipen ken ikarkararagandak nga adda ditoy pagbaludan. Ikararagko nga itultuloy ni Apotayo a Jesu-Cristo ti agtignay a sipaparabur kadatayo amin.