ilo_udb/49-GAL.usfm

\id GAL
\ide UTF-8
\h Taga-Galacia
\toc1 Taga-Galacia
\toc2 Taga-Galacia
\toc3 gal
\mt Taga-Galacia

\s5
\c 1
\p
\v 1-2 Siak, ni Pablo, agsursuratak kadagiti ay-ayatek a kakabsat iti probinsia ti Galacia. Siak ni Pablo, nga apostol. Awan ti bunggoy ti tattao a nangaramid kaniak nga apostol, ken saan nga imbaga ti Dios iti siasinoman nga aramidendak a kasta. Ngem ketdi, maysaak nga apostol gapu ta imbaonnak ni Jesu-Cristo ken ti Dios Ama—wen, ti Dios Ama, a nangpagungar ken Cristo kalpasan a natay isuna! Siak ken amin dagiti kakaduak a namati a kimmuyog kaniak, kablaawandakayo amin nga iglesia iti probinsia ti Galacia.

\s5
\v 3 Kararagko a ti Dios, nga Amatayo, ken ni Apo a Jesu-Cristo a tulongandakayo a siaasi ken ikkandakayo iti kappia.
\v 4 Indaton ni Cristo ti bagina iti Dios maipaay kadagiti basbasoltayo, tapno iyadayonatayo manipud iti daytoy a lubong nga agtigtignay dagiti tattao iti dakes a wagas. Inaramidna daytoy gapu ta isu ti kayat iti Dios, nga Amatayo nga aramidenna.
\v 5 Gapu ta pudno dayta, dayawentayo ita ti Dios iti agnanayon.

\s5
\v 6 Kas ammoyo, gapu iti kinaimbag ni Cristo, inawagannakayo tapno agtalekkayo kenkuana. Ngem ita, masdaawak ta insardengyo ti agtaltalek kenkuana! Ita, mamatikayo iti naiduma a mensahe, nga ibagbaga dagiti sumagmamano a tattao a pudno a naimbag a damag maipapan iti Dios.
\v 7 Awan pulos ti imbaga ni Cristo a sabali a naimbag a damag kadatayo, ngem rirriribukendakayo dagiti dadduma a tattao. Kayatda a baliwan dagiti naimbag a damag maipapan kenni Cristo; kayatda a mamatikayo nga adda sabali a banag nga imbaga ni Cristo.

\s5
\v 8 Ngem uray no dakami nga apostol wenno maysa nga anghel manipud langit ti mangibaga kadakayo iti naimbag a damag a saan a kas iti imbagami kadakayo idi, rumbeng a dusaen ti Dios dayta a tao iti agnanayon.
\v 9 Kas imbagami idin kadakayo, isu nga ita ibagak manen kadakayo nga adda ti maysa a tao a mangibagbaga kadakayo iti naimbag a damag nga ibagbagana a naimbag, ngem saan a kapada daytoy ti kas iti pinatiyo. Isu a dawatek iti Dios nga ukomenna dayta a tao iti agnanayon.
\v 10 Saanko a masapul dagiti tattao a mangayat kaniak, gapu ta ti Dios ti uman-anamong kaniak. Saanko a padpadasen nga ay-aywen dagiti tattao. No padpadasek latta nga ay-aywen dagiti tattao, saan ngarud a pudno nga agserserbiak kenni Cristo.

\s5
\v 11 Kakaduak a namati, kayatko a maammoanyo a saan nga inaramid dagiti sumagmamano a tao ti mensahe nga iwaragawagko kadagiti tattao maipapan kenni Cristo.
\v 12 Saanko a nasursuro daytoy naimbag a damag manipud iti tao, ken awan ti uray ania a tao a nangisuro iti daytoy kaniak. Ngem ketdi, ni Jesu-Cristo mismo ti nangisuro kaniak.

\s5
\v 13 Imbaga dagiti tattao kadakayo ti maipapan iti inaramidko iti napalabas idi nagrukbabak iti Dios iti wagas dagiti Judio. Saanko a pulos a nagsardeng a nagar-aramid kadagiti kadadaksan a banbanag kadagiti bunggoy dagiti namati nga impasdek ti Dios. Pinadasko a dadaelen dagitoy a namati ken dagiti bunggoyda.
\v 14 Intan-okko ti Dios iti wagas dagiti Judio a nakarkaro pay ngem dagiti kapatadak a Judio. Makaungetak unay no makakitaak kadagiti sabali a Judio a liwliwayanda ti agtulnog kadagiti kaugalian a sinalimetmetan dagiti kapuonanmi.

\s5
\v 15 No pay kasta, addaak pay laeng iti tian ti inak idi pinilinak ti Dios tapno agserbi kenkuana, inaramidna daytoy gapu ta naay-ayo isuna a mangaramid iti dayta.
\v 16 Impakitana kaniak nga Anakna ni Jesus; inaramidna daytoy tapno ibagak kadagiti dadduma ti naimbag a damag maipapan iti Anakna kadagiti rehion a pagnanaedan dagiti saan a Judio. Ngem saanak a napan a dagus kadagiti tattao tapno maawatak a nasayaat dayta a mensahe.
\v 17 Ken saanak a pimmanaw a dagus iti Damasco ken napan iti Jerusalem a mangkita kadagiti apostol sadiay, dagiti tattao a nagbalin nga apostol sakbay a nagbalinak nga apostol. Ngem ketdi, napanak iti rehion ti Arabia, maysa a rehion iti let-ang. Kalpasannna, nagsubliak iti naminsan pay idiay siudad ti Damasco.

\s5
\v 18 Kinapudnona, tallo a tawen ti napalabas kalpasan nga impakita ti Dios kaniak ti naimbag a damag, simmang-atak idiay Jerusalem tapno sarakek ni Pedro. Nakipagnaedak kenkuana iti sangapulo ket lima nga aldaw.
\v 19 Nakitak met ni Santiago, ti kabsat ni Apotayo a Jesus, ken ti mangidadaulo kadagiti namati iti Jerusalem, ngem awan ti nakitak a sabali nga apostol.
\v 20 Ammo ti Dios a naan-anay a pudno ti isursuratko kadakayo!

\s5
\v 21 Kalpasan a pimmanawak iti Jerusalem, napanak kadagiti rehion ti Siria ken Cilicia.
\v 22 Kadagita a tiempo, saandak pay a nakitkita dagiti namati iti taripnong dagiti Kristiano nga adda iti probinsia ti Judea.
\v 23 Nangngegda laeng dagiti dadduma a mangibagbaga, "ni Pablo, ti nagar-aramid iti dakes a banbanag kadatayo iti napalabas, iwarwaragawagna itan ti naimbag a damag a pinatitayo ken padpadasenna a pasardengen idi!"
\v 24 Isu nga intultuloyda nga indaydayaw ti Dios gapu iti napasamak kaniak.

\s5
\c 2
\p
\v 1 Kalpasan a naglabas ti sangapulo ket uppat a tawen, simmang-atkami manen, Siak, ni Tito ken ni Bernabe iti Jerusalem.
\v 2 Inaramidmi daytoy gapu ta imbaga ti Dios kaniak a rumbeng a mapankami. Impalawagko a sililimed kadagiti kapapatgan a papanguloen dagiti namati ti linaon ti naimbag a damag nga iwarwaragawagko iti rehion dagiti saan a Judio. Inaramidko daytoy ta kayatko a siguradoen nga umanamongda kadagiti ikaskasabak. Kayatko a siguradoen nga adda serbi ti panagtrabtrabahok.

\s5
\v 3 Ngem uray dagitoy a papanguloen saanda nga impapilit a makugit ni Tito a kaduak ken saan a nakugit a Hentil.
\v 4 Saan a pudno a namati dagiti tattao a mangibagbaga a masapul a makugit isuna, ngem agpampammarangda a pada ida a namati. Pinaliiwdakami iti kasta unay tapno makitada ti panagtulnogmi iti Dios a saanmi a sursuroten dagiti amin a linteg ken seremonia dagiti Judio, agsipud ta ammomi a winayawayaannakami ni Cristo Jesus manipud kadagitoy a banbanag. Kayatdakami a pagbalinen nga adipen ti linteg dagitoy a palso a namati.
\v 5 Ngem uray iti apagbiit laeng saankami nga immannugot kadakuada maipapan iti pannakakugit. Sinuppiatmi ida tapno mabalin nga agtultuloy ti pudno a naimbag a damag maipapan ken Cristo maipaay iti pagimbaganyo.

\s5
\v 6 Ngem awan ti aniaman a banag a nainayon dagiti mangidadaulo iti Jerusalem iti iwaragawagko. Napateg a lallaki dagitoy a papanguloen, ngem awan aniamanda kaniak, gapu ta saan nga ad-adda a paboran ti Dios ti maysa a tao ngem dagiti sabali.
\v 7 Ngem ketdi, nawaatan dagiti papanguloen nga agtaltalek ti Dios kaniak tapno iwaragawagko ti naimbag a damag kadagiti saan a Judio, a kas iti panangiwarwaragawag ni Pedro iti naimbag a damag kadagiti Judio.
\v 8 Dayta ket kas iti panangted ti Dios iti pannakabalin kenni Pedro a mapan a kas apostol a mangipan ti naimbag a damag kadagiti Judio, innikkannak met iti pannakabalin a mapan a kas apostol tapno ipanko ti naimbag a damag kadagiti saan a Judio.

\s5
\v 9 Naawatan dagitoy a panguloen a sikakaasi ti Dios a nangited kaniak iti daytoy naisangsangayan a panggep. Inalamanodakami ni Santiago, Pedro ken Juan, a mangidadaulo kadagiti namati ken Cristo, nga am-ammo ken intan-ok dagiti adu a tattao gapu ta kakaduami ida a trabahador. Nag-aanamonganmi nga imbaonnakami iti Dios kadagiti saan a Judio, a saan a nakugit, ken imbaon ida ti Dios kadagiti Judio a nakugit.
\v 10 Ginuyugoydakami laeng a lagipenmi pay a tulongan dagiti nakurapay a pada a namati nga agnanaed iti Jerusalem. Dayta ti apag-isu a paggagarak unay nga aramiden.

\s5
\v 11 Ngem iti saan a nabayag kabayatan nga addaak iti siudad iti Antiokia, kalpasan nga immay ni Pedro sadiay, kinitak isuna kadagiti matana ken imbagak kenkuana a biddut ti ar-aramidenna.
\v 12 Daytoy ti napasamak. Napan ni Pedro idiay Antiokia ken rinugianna ti makipangpangan a kanayon kadagiti saan a Judio a namati sadiay. Kalpasanna, adda dagiti namati a Judio a napan iti Antiokia a nangibaga nga imbaon ida ni Santiago a mangidadaulo kadagiti namati idiay Jerusalem. Idi immay dagitoy a lallaki, insardeng ni Pedro ti makipangpangan kadagiti namati a saan a Judio ken saanen a makikadkadua kadakuada. Mabuteng isuna a dillawen dagiti namati a Judio manipud iti Jerusalem a makikadkadua isuna kadagiti saan a Judio.

\s5
\v 13 Kasta met, nakitipon kenni Pedro iti panaginsisingpet babaen ti panangisinada iti bagbagida manipud kadagiti saan a Judio a namati. Uray ni Bernabe impagarupna a masapul nga isardengna ti makikadkadua kadagiti saan a Judio!
\v 14 Ngem idi naamirisko a saanda a sursuroten ti kinapudno iti naimbag a damag maipapan ken Cristo, ken idi nagmaymaysa dagiti amin a kakadua a namati, imbagak kenni Pedro iti sangoananda amin, "Judioka, ngem agbibiagka a kasla saan a Judio a saan a mangsurot iti linteg. Kasanom ngarud a mapasurot dagiti saan a Judio nga agbiag a kasla kadagiti Judio?"

\s5
\v 15 Naiyanakkami a kas Judio, saan a kasla managbasol a saan a Judio nga awan pulos ammona maipapan iti linteg ti Dios.
\v 16 Ngem ammomi itan a saan a gapu ta agtultulnog ti tao nga inted ti Dios ti linteg ken Moises nga aramiden ti Dios ti tao a nasayaat iti imatangna. Aramiden laeng ti Dios dayta no agtaltalek dayta a tao ken Jesu-Cristo. Nagtalek ken Cristo Jesus uray pay dagiti sumagmamano kadakami a Judio. Inaramidmi dayta tapno ibilang ti Dios a nasayaatkami iti imatangna, gapu ta agtalekkami ken Cristo ken saan a gapu ta padpadasenmi ti agtulnog iti linteg nga inted ti Dios ken Moises. Imbaga ti Dios a saanna nga ibilang ti siasinoman a nasayaat iti imatangna gapu ta nagtulnogda iti linteg.

\s5
\v 17 Ngem idi dinawatmi iti Dios nga aramidennakami a nasayaat iti imatangna babaen iti panagtalekmi ken Cristo, insardengmi ti mangpadpadas nga agtulnog iti linteg, isu a pinaneknekan ti linteg a managbasolkami babaen iti panangar-aramid iti dayta. Ngem pudno a saan a kayat a sawen dayta a paboran ni Cristo ti basol. Pudno a saan!
\v 18 No mamatiak manen nga ibilangnak ti Dios a nasayaat iti imatangna gapu ta agtulnogak iti lintegna, kaslaak a maysa a tao a nangbangon manen iti daan a pasdek a dinadaelnan iti naminsan. Makita iti isu-amin a salsalungasingek ti linteg ti Dios.
\v 19 Kas padpadasek ti agtulnog iti linteg ti Dios, nagbalinak a kasla natay a tao; a kasla pinataynak ti linteg. Napasamak daytoy tapno mabalin nga agbiagak nga agrukbab iti Dios.

\s5
\v 20 Kasla nagpatingga ti daan a wagas ti panagbiagko idi natay ni Cristo idiay krus. Saanen a siak ti mangiturturong iti biagko. Ni Cristo nga agbibiag ditoy pusok iturturongna itan no kasanoak nga agbiag. Ken aniaman nga aramidek ita kabayatan nga agbibiagak, ar-aramidek daytoy nga agtaltalek iti Anak ti Dios. Isuna ti nangayat kaniak ken intedna ti bagina kas daton a mangipaay ti pammakawan ti Dios kaniak.
\v 21 Saanko nga iwaksi ti kinamanangaasi ti Dios, a kasla ti panangsalimetmet ti linteg ket mabalin nga aramidennatayo a nasayaat ti Dios. No saan, natay ni Cristo iti krus nga awan serserbina.

\s5
\c 3
\p
\v 1 Dakayo a padak a namati dita Galacia ket maag launay! Nalabit nga adda nangallilaw kadakayo babaen iti dakes a matada! Imbagak kadakayo no kasanoda nga inlansa iti krus ni Jesu-Cristo, saan kadi?
\v 2 Kayatko ngarud nga ibagayo kaniak ti maysa a banag: idi immay ti Espiritu Santo kadakayo, immay kadi isuna gapu ta agtultulnogkayo iti linteg ni Moises? Wenno immay kadi ti Espiritu kadakayo gapu ta nangngeganyo ti naimbag a damag ken nagtalekkayo kenni Cristo? Daytoy ti pudno a napasamak.
\v 3 Maagkayo unay! Immuna a nagbalinkayo a Kristiano gapu ta inikkannakayo ti Espiritu ti Dios iti kabaelan. Ngem pagarupenyo ita nga agtultuloykayo aginggana a mataykayo babaen iti panangikarkarigatanyo a mangpadas nga agtulnog iti linteg.

\s5
\v 4 Amin a banbanag a napadasanyo kalpasan a namatikayo kenni Cristo--naimbag man wenno dakes a banbanag--awan pategna amin dagitoy no saankayo a nagtaltalek kenkuana.
\v 5 No iteden ita ti Dios a siaayat ti Espirituna kadakayo ken agaramid iti agkakabileg a banbanag kadakayo, ipagarupyo kadi a daytoy ket gapu ta agtultulnogkayo iti linteg ti Dios? Sigurado nga ammoyo a gapu ta idi nangngegyo ti naimbag a damag maipanggep kenni Cristo, nagtalekkayo kenkuana!

\s5
\v 6 Ti kapadasanyo ket kas met laeng iti insurat ni Moises iti Nasantoan a Sursurat maipanggep kenni Abraham. Insuratna a nagtalek ni Abraham iti Dios, ken kas nagbanaganna, imbilang ti Dios ni Abraham a naimbag iti imatangna.
\v 7 Masapul ngarud nga amirisenyo a dagitoy agtaltalek kenni Cristo nga isalakanna ida ti pinagbalin ti Dios a kaputotan ni Abraham.
\v 8 Sakbay pay a pinagbalin ti Dios a nasayaat iti imatangna dagiti saan a Judio idi nagtalekda kenkuana, insurat dagiti tattao iti Nasantoan a Sursurat nga aramidennanto daytoy. Inwaragawag ti Dios daytoy a naimbag a damag kenni Abraham, kas mabasatayo iti Nasantoan a Sursurat, "Gapu iti inaramidyo, bendisionakto dagiti amin a bunggoy ti tattao iti lubong."
\v 9 Ngarud, ammotayo babaen iti daytoy a dagitoy amin nga agtaltalek kenni Cristo ti benbendisionan ti Dios a kadua ni Abraham a nagtalek met iti Dios.

\s5
\v 10 Ilunlunod ti Dios dagiti amin a mangipagarup a mabalinda a maay-ayo ti Dios babaen iti panagtulnogda iti lintegna. Dayta ket kas iti naisuratda iti Nasantoan a Sursurat iti nabayagen, "Dusaento ti Dios iti agnanayon ti tunggal maysa a saan nga agtultuloy ken naan-anay nga agtulnog ti amin a linteg nga insuratda iti Libro ti linteg."
\v 11 Ngem kinuna ti Dios a no adda man tattao nga ibilangna a naimbag iti imatangna, daytoy ket saanto a gapu ta nagtulnogda iti lintegna. Daytoy ket paneknek gapu ta insuratda iti Nasantoan a Sursurat, "Agbiagto ti tunggal tao nga ibilang ti Dios a naimbag gapu ta agtaltalek isuna iti Dios."
\v 12 Siasinoman a mangikagumaan nga agtulnog iti linteg ket saan nga agtaltalek kenni Cristo. Ngem ketdi, insuratda iti Nasantoan a Sursurat, "Siasinoman a mangrugi a mangaramid kadagiti banbanag iti linteg ket masapul a pagtulnoganna amin dagitoy."

\s5
\v 13 Pinasardeng ni Cristo ti Dios iti panangilunodna kadatayo kas insuratda iti linteg, a rumbeng nga aramidenna. Napasamak daytoy idi inlunod ti Dios ni Cristo imbes a datayo koma. Kas iti insuratda iti Nasantoan a Sursurat, "Ilunlunod ti Dios ti amin nga ibitinda iti kayo."
\v 14 Inlunod ti Dios ni Cristo tapno bendisionanna dagiti saan a Judio a mamati kenni Cristo a kas iti panangbendisionna kenni Abraham. Ken binendisionanna dagiti saan a Judio tapno maawattayo ti Espiritu nga inkarina kadagiti amin nga agtaltalek kenni Cristo.

\s5
\v 15 Padak a namati, ti kari ti Dios ket kas iti maysa a katulagan ti dua a tao. Kalpasan a pirmaanda, awan iti makawaswas iti dayta, wenno saanda mabalin a nayonan iti aniaman a banag dayta.
\v 16 Inkari ti Dios a bendisionanna ni Abraham ken dagiti naidumduma a kaputotanna. Saan nga ibagbaga ti Nasantoan a Sursurat, "dagiti kaputotam," dayta ket, adu a tattao, ngem ketdi, "ti kaputotam," kayatna a sawen ket maysa laeng a tao, ni Cristo.

\s5
\v 17 Daytoy ti ibagbagak. Nangaramid ti Dios ti tulaganda kenni Abraham a saan a mawaswas ti linteg nga intedna kenni Moises kalpasan iti 430 a tawen.
\v 18 Daytoy ket gapu ta umay ti it-ited ti Dios kadatayo iti agnanayon gapu ta tungtungpalentayo ti lintegna, saanna ngarud nga ited dayta gapu ta inkarina nga aramidenna daytoy. Nu pay kasta, iti kaagpaysoanna, inted ti Dios daytoy a sagut kenni Abraham gapu ta siwawaya nga inkarina nga itedna daytoy.

\s5
\v 19 Apay ngarud nga itedto ti Dios ti lintegna kadatayo a Judio? Inted ti Dios kadatayo ti lintegna a mangisuro kadatayo a saantayo a tungtungpalen amin daytoy. Naipaulog daytoy a linteg agingga a ti kaputotan a sarsaritaenna--ni Jesus mismo--ket immay kadatayo a Judio. Agingga iti dayta a tiempo, naipaulogen ti linteg nga inted ti anghel ti Dios kadatayo a Judio babaen iti ima ni Moises, ti tao a nagtakder iti nagbaetan ti Dios ken kadagiti tattao.
\v 20 No adda tao nga agserbi a mangibabaet iti nagbaetan dagiti dadduma, kanayon ngarud nga adda dua a tao a makuna nga agtigtignay: iti daytoy a sitwasyon, ti Dios ken dagiti Israelita. Ngem mismo ti Dios ti nagtignay nga awan mangibabaet idi inkarina a bendisionanna ni Abraham. Ngarud, dakdakkel ti naikari kenni Abraham ngem iti linteg gapu ta awan ti nangibaet.

\s5
\v 21 Ngarud, salsalungasingen kadi dagiti sasao ti linteg dagiti kari ti Dios? Pudno a saan. No kabaelantayo nga agtulnog iti linteg ken agbiag nga agnanayon a kadua ti Dios, sigurado ngarud nga imbilangnatayo a naimbag iti imatangna.
\v 22 Ngem saan a mabalin dayta. Ngem ketdi, gapu ta nagbasoltayo, tingtengngelennatayo ti linteg nga adda iti Nasantoan a Sursurat—ken amin a banbanag—a kasla addatayo iti pagbaludan. Isu nga idi inkari ti Dios a wayawayaannatayo manipud iti dayta a pagbaludan, dakdakamatenna iti siasinoman a mamati kenni Jesu-Cristo.

\s5
\v 23 Sakbay nga impakaammo ti Dios ti naimbag a damag maipanggep ti rumbeng a panagtalek dagiti tattao kenni Cristo, ti lintegna ket kasla suldado a nangpatalinaed kadatayo iti pagbaludan, saan a nawaya nga umakar.
\v 24 Kasla ama a mangsalsalaknib iti bassit nga ubingna babaen iti panangibagana iti tagabu nga aywananna ti anakna, banbantayannatayo ti Dios babaen iti lintegna aginggana a dimteng ni Cristo. Inaramidna daytoy tapno maibilangnatayo a naimbag iti imatangna, no agtalektayo kenni Cristo.
\v 25 Ngem ita ta mabalintayon nga agtalek kenni Cristo, saantayon a kasapulan ti linteg ti Dios a mangbantay kadatayo.
\v 26 Ibagbagak daytoy gapu ta aminkayo ket annak ti Dios gapu ta nagtalekkayo kenni Cristo Jesus.

\s5
\v 27 Aminkayo nga agtaltalek kenni Cristo ken nabautisaran tapno mabalinkayo a makitipon kenkuana ita ket nagbalinen a tattao kas kenkuana.
\v 28 No namatikayo, saan a napateg iti Dios no Judiokayo wenno saan, tagabu wenno nawaya a tattao, lallaki wenno babbai, gapu ta naitiponkayo amin kenni Cristo Jesus.
\v 29 Maysa pay, agsipud ta kukuanakayo ni Cristo, pagbalinennakayo a kaputotan ni Abraham, ken maawatyo dagiti amin nga inkari ti Dios kenkuana ken kadatayo.

\s5
\c 4
\p
\v 1 Ita, ilawlawag ko pay ti maipapan iti annak ken dagiti agtawid. Ti agtawid ket ti anak a lalaki a mangtagikkuanto amin a sanikua ti amana. Ngem aginga nga ubing pay laeng ti agtawid, kasla tagabo isuna a tengtenglen dagiti sabali.
\v 2 Agingga iti aldaw nga intuding ti ama, imatonan pay laeng ti sabali a tao ti ubing agraman dagiti sanikuana.

\s5
\v 3 Kasta met nga idi kaslatayo ub-ubbing, addatayo iti panangituray dagiti dakes a paglintegan a pagbibiagan ti amin a tattao iti daytoy a lubong. Tinengngeldatayo dagitoy a paglintegan a kas iti panangtengngel dagiti amo kadagiti tagabuda.
\v 4 Ngem idi dimtengen ti panawen nga intuding ti Dios, imbaonna ti Anakna a ni Jesus ditoy lubong. Naipasngay ni Jesus iti maysa nga ina, ken masapul nga agtulnog isuna iti linteg.
\v 5 Imbaon ti Dios ni Jesus tapno ispalennatayo manipud iti linteg a mangtengtengngel kadatayo. Inaramidna daytoy tapno amponennatayo a kas bukodna nga annak.

\s5
\v 6 Gapu ta annaknakayo itan ti Dios, imbaonna ti Espiritu ti Anakna nga agnaed iti tunggal maysa kadatayo. Ti Espirituna ti makaigapu isu a mababaelantayo ti umawag iti Dios iti, "Ama, ay-ayatenmi nga Ama!" Ipakpakita daytoy nga annaknatayo ti Dios.
\v 7 Gapu ngarud iti inaramid ti Dios, saanen a kasla tagabu ti tunggal maysa kadakayo. Ngem ketdi, anak ti Dios ti tunggal maysa kadakayo. Agsipud ta anak itan iti Dios ti tungal maysa kadakayo, itedto met iti Dios kadakayo ti amin nga inkarina. Aramiden mismo ti Dios daytoy!

\s5
\v 8 Idi saanyo pay nga am-ammo ti Dios, nagrukbabkayo kadagiti didiosen a saan a nabiag. Dakayo dagiti tagabuda.
\v 9 Ngem ita am-ammoyon ti Dios a kas Diosyo. No pay kasta, nalabit a nasaysayaat nga ibaga nga ita am-ammon ti Dios ti tunggal maysa kadakayo. Isu nga apay nga agsubsublikayo manen a sumurot iti nakapsut ken awan pategna a dakes a paglintegan iti daytoy a lubong? Awan duadua a saanyo a kayaten ti agbalin manen a tagabuda, kayatyo kadi?

\s5
\v 10 Ti kinapudnona, kasla kayatyo met! Agtultulnogkayo manen kadagiti ipappapilit ti dadduma a masapul nga aramidenyo no kasta a dumteng dagiti naisangsangayan nga aldaw ken naisangsangayan a tiempo kadagiti bulan a nakaitudinganna, panawen ken tawtawen.
\v 11 Madanaganak maipapan kadakayo! Nagtrabahoak iti kasta unay maipaay kadakayo, ngem kasla awan serserbina amin dagitoy.

\s5
\v 12 Padak a namati, sipipingetak a mangguyugoy kadakayo nga agbalinkayo koma a kas kaniak, gapu ta saanko a kayat a tenglennak ti linteg. Nagbalinak a kas kadakayo a saan a Judio idi nagbalinak a nawaya manipud iti linteg, isu a masapul a wayawayaanyo met dagiti bagbagiyo manipud kadagiti didiosen. Saandak pulos a dinangran idi immuna nga immayak kadakayo, ngem ita pagdandanagendak iti kasta unay.
\v 13 Malagipyo idi immuna nga imbagak kadakayo ti naimbag a damag, inaramidko daytoy gapu ta nagsakitak.
\v 14 Uray man no maumsidak koma gapu ta nagsakitak, saandak a linaksid. Ngem ketdi, pinasangbaydak kas iti panangpasangbayyo koma iti anghel a naggapu iti Dios. Pinasangbaydak kas iti panangpasangbayyo koma kenni Cristo Jesus!

\s5
\v 15 Ngem saankayon a naragsak ita! Ammok a pudno a mabalin nga aramidenyo amin a banag tapno matulongandak. Mabalin koma a sinukelyo dagiti matayo ken intedyo ida kaniak, no isu dayta ti mabalin a nakatulong kaniak!
\v 16 Dayta ti gapuna a malidayanak unay ita. Kasla panpanunotenyo a nagbalinak a kabusoryo gapu ta intuloyko nga imbaga kadakayo ti kinapudno maipapan kenni Cristo.

\s5
\v 17 Kadagiti mangipappapilit nga agtulnogkayo kadagiti linlinteg dagiti Judio ket padpadasendakayo a pasuroten kadakuada, ngem saanda nga ar-aramiden daytoy a maipaay iti pagimbaganyo. Kayat dakayo nga iyadayo kaniak, gapu ta kayatda a surotenyo ida, saan a siak.
\v 18 Nasayaat nga ipapilit ti panagar-aramid kadagiti umno a banbanag; masapul a kankanayonyo koma nga aramiden daytoy, ken saan laeng koma a no kaduadak. Ngem siguradoenyo nga umno a tattao ti mangisursuro iti aramidenyo!

\s5
\v 19 Dakayo a kas annakko, madanaganak manen unay maipapan kadakayo, ket itultuloykonto ti agdanag inggana agbalinkayo a kas ken Cristo.
\v 20 Ngem tarigagayak nga addaak koma kadakayo ita ken mabalinko ti ad-adda pay a makisarita a naal-alumanay kadakayo, gapu ta saanko nga ammo ti aramidek ita maipapan kadakayo.

\s5
\v 21 Palubosandak a mangipalawag manen iti daytoy. Tarigagayan ti dadduma kadakayo ti agtulnog kadagiti amin a linteg ti Dios, ngem pudno kadi nga impangagyo ti ibagbaga iti linteg?
\v 22 Nabasatayo iti linteg a nagbalin nga ama ti dua a lallaki ni Abraham. Naganak iti maysa a lalaki ti tagabuna a babai a ni Agar, ken inyanak ti asawana a ni Sara a saan a tagabu ti maysa.
\v 23 Naisikug iti kadawyan a wagas ni Ismael nga anak ti tagabu a ni Agar. Ngem naisikug ni Isaac nga anak ni Sara a saan a tagabu, gapu iti milagro, gapu ta inkari ti Dios a maaddaan isuna iti anak a lalaki.

\s5
\v 24 Iladladawan ita dagitoy a dua a babbai dagiti dua a tulag. Inaramid iti Dios ti umuna a tulag kadagiti Israelita idiay Bantay Sinai. Sapsapulen dayta a tulag a masapul nga agbiag dagiti Israelita a kas tagabu iti linteg. Isu nga iladladawan ti tagabu a babai a ni Agar daytoy a tulag.
\v 25 Iladladawan ngarud ni Agar ti Bantay Sinai iti daga iti Arabia. Ngem iladladawan met laeng ni Agar ti siudad ti Jerusalem a kasta met ita. Daytoy ket gapu ta ti Jerusalem ket kasla maysa a tagabu nga ina; isuna ken amin nga annakna, dayta ket, dagiti tattaona, ket kasla tagabu, gapu ta masapul nga agtulnogda amin iti linteg nga inted iti Dios iti Israel idiay Bantay Sinai.

\s5
\v 26 Ngem adda baro a Jerusalem idiay langit, ket kasla ina dagiti amin a namati ken Cristo dayta a siudad, ken siwayawaya dayta a siudad!
\v 27 Maaddaanto iti ad-adu a tattao dayta a baro a Jerusalem ngem ti daan a Jerusalem. Daytoy ket gapu ta insurat ni Profeta Isaias, "Dakayo nga agnanaed iti Jerusalem, masapul nga agrag-okayo! Awan ita ti anakyo, kas iti babai a saan pulos nga aganak! Ngem itinto maysa nga aldaw, agpukkawkayonto nga adaan iti rag-o uray no awan ti anakmo ita. Kas iti babai a saan pulos nga aganak, ken mariknam a nabaybay-anka. Maaddankanto iti ad-adu nga annak ngem iti mabalin nga inyanank ti siasinioman a babai nga addaan asawa."

\s5
\v 28 Ita, padak a namati, nagbalinkayon nga annak ti Dios gapu ta namatikayo iti inkari ti Dios nga itedna kadatayo. Kaslakayo ken Isaac, a naiyanak gapu ta namati ni Abraham iti inkari iti Dios nga itedna kenkuana.
\v 29 Ngem idi un-unana, ti anak a lalaki ni Abraham a ni Ismael a naiyanak iti gagangay a wagas, ket nangparnuay iti riribuk iti anak ni Abraham a lalaki a ni Isaac, a naipasngay babaen iti aramid ti Nasantoan nga Espiritu. Isu met laeng ita, dagiti tattao a tagabu iti linteg iti Dios, idaddadanesdatayo nga agtaltalek kadagiti inkari ni Cristo nga itedna kadatayo.

\s5
\v 30 Ngem dagitoy dagiti sasao nga adda iti Nasantoan a Sursurat: "Tawiden ti anak ti babai a saan a tagabu ti amin a kukua ti amana. Awan pulos ti tawiden ti tagabu a lalaki. Isu a papanawenyo ti tagabu a babai ken ti anakna manipud iti daytoy a lugar!
\v 31 Padak a namati, saan a tagabu a babai ti kapuonantayo; ngem ketdi, ti siwayawaya a babai ti kapuonantayo!

\s5
\c 5
\p
\v 1 Winayawayaannatayo ni Cristo manipud iti linteg tapno saannatayon a matengngel daytoy. Isu a pasardengenyo ti siasinoman a mangibagbaga a tagabonakayo pay laeng iti linteg ken saanyo a palubosan a tengngelennakayo manen iti linteg a kas tagabo.
\v 2 Siak, ni Pablo, maysa nga apostol, imutektekanyo a siaannad ti ibagak ita kadakayo. No palubosanyo ti siasinoman a kugitendakayo, saannakayo pulos a matulongan ti aniaman nga inaramid ni Cristo a maipaay kadakayo.

\s5
\v 3 Maminsan pay, iwaragawagko a sipapasnek kadagiti lalaki a kinugitda, a masapul nga agtulnogda a siaanay iti linteg tapno iwaragawag ida ti Dios a nasayaat iti imatangna.
\v 4 No namnamaenyo nga iwaragawag ti Dios a nasayaatkayo iti imatangna gapu ta padpadasenyo a salimetmetan ti linteg, insinayo dagiti bagbagiyo kenni Cristo, saanton a pulos a maasi ti Dios kadakayo.

\s5
\v 5 Datayo nga inaramid iti Espiritu ti Dios a makabael nga agtalek kenni Cristo ket agur-uray a sitatalged a maipaay iti tiempo inton iwaragawagto ti Dios a nasayaattayo iti imatangna.
\v 6 Saan a pakaseknan ti Dios no nakugittayo wenno saan. Ngem ketdi, pakaseknan ti Dios no agtalektayo kenni Cristo, nga addaan iti pagbanagan nga ay-ayatentayo dagiti dadduma gapu ta agtaltalektayo kenkuana.
\v 7 Sinursurotyo a nasayaat ni Cristo! Siasino ti nangpasardeng kadakayo nga agtulnog iti pudno a mensahena?
\v 8 Saan a ti Dios a nangpili kadakayo ti mangal-allukoy kadakayo nga agpanunot iti kas iti daytoy!

\s5
\v 9 Daytoy a palso a sursuro nga isursuro iti maysa a tao kadakayo ket adda ti peggad iti panangiwarwarasna kadakayo amin, kasla iti bassit a lebadura a mangpaalsa iti tinapay.
\v 10 Mamatiak nga iyadayonakayonto ni Apo Jesus a mamati kadagiti aniaman a banbanag malaksid iti pudno a naimbag a damagna. Pudno a dusaento ti Dios ti siasinoman a mangrirriribok kadakayo babaen iti panangisursurona iti daytoy a palso a mensahe, siasinoman isuna.

\s5
\v 11 Ngem, padak a namati mabalin nga adda mangibagbaga nga isursurok pay laeng a masapul a bay-anyo a kugitendakayo. Pudno nga insurok dayta idi sakbay a simmurotak kenni Cristo, ngem saankon a pulos nga isursuro dayta. Ngem saan a mabalin a pudno dagiti ibagbagada, ta no saan, awan koman iti siasinoman a mangidaddadanes kaniak ita. Saan, ibagak kadakayo a no panpanunoten dagiti tattao a masapul a makugitda no surotenda ni Cristo, ngarud ti kinapudnona a natay ni Cristo iti krus ket awan nagdumaanna kadakuada.
\v 12 Tarigagayak nga agtultuloy dagitoy a mangrirriribok kadakayo ken kaponenda ti bagbagida.

\s5
\v 13 Padak a namati, inayabannakayo ti Dios tapno wayawayaannakayo. Ngem saanyo koma a panunoten a winayawayaannakayo tapno agbasolkayo. Ngem ketdi, ayaten ken pagserbianyo ti tunggal maysa, gapu ta nawayakayon ita a mangaramid iti dayta!
\v 14 Laglagipenyo ti maysa a banag nga imbaga ni Jesus. Kinunana a daytoy ti kaipapanan iti amin a linteg: "Ayatem ti amin a tao a kasla iti panagayatmo iti bagim."
\v 15 Isu a no rauten ken dangranyo ti tunggal maysa a kasla kadagiti naatap nga ay-ayup, mabalin a naan-anay a madadaelyo ti tunggal maysa.

\s5
\v 16 Isu nga ibagak daytoy kadakayo: Palubosanyo a kanayon nga idalannakayo iti Espiritu ti Dios. No aramidenyo dayta, saankayonton nga agbasol, a kas iti kayat nga aramiden dagiti gagangay a tattao.
\v 17 No kayatyo ti agbasol, salsalungasingenyo ti Espiritu ti Dios. Ken kabusor iti Espiritu ti Dios dagiti pagayatan dagiti gagangay a tattao. Kanayon nga aglablaban dagitoy a dua. Ti pagbanaganna ket kanayon a saanyo nga aramiden dagiti nasayaat a banbanag a pudno a tartarigagayanyo nga aramiden.
\v 18 Ngem no idaldalannakayo ti Espiritu ti Dios, saannakayo a tengngel iti linteg.

\s5
\v 19 Ita, nalaka a makita dagiti kayat nga aramiden dagiti gagangay a tattao. Agaramidda kadagiti dakes a kinaderrep a tigtignay, kinaderrep a tigtignay nga urayla maisalungasing iti gagangay ken tarigagayanda dagiti banbanag a maibusor kadagiti nasayaat a linlinteg.
\v 20 Agrukbabda pay kadagiti palso a didiosen ken kadagiti banbanag a mangibagbagi kadagitoy a didiosen. Padpadasenda nga alaen dagiti dakes nga espiritu nga isu ti agtignay maipaay kadakuada. Kabusor dagiti tattao dagiti dadduma. Agaapa dagiti tattao. Managimon dagiti tattao. Agtignay a siuunget dagiti tattao. Padasen dagiti tattao a pagpanunoten dagiti dadduma iti nangato maipapan kadakuada ken saanda nga ibilang dagiti aniaman a pagayatan dagiti dadduma. Saan a makikadkaddua dagiti tattao kadagiti dadduma. Makikadkaddua laeng dagiti tattao kadagiti uman-anamong kadakuada.
\v 21 Kayat dagiti tattao dagiti aniaman nga adda kadagiti dadduma. Agbarbartek dagiti tattao. Agbartek ken manggulo dagiti tattao. Ken agaramidda pay iti dadduma a banbanag a kas kadagitoy. Ballaagankayo ita, a kasla iti panangballaagko kadakayo iti napalabas, a dagiti kankanayon nga agtigtignay ken agpanpanunot a kasla iti daytoy ket saanto a makaawat iti aniaman nga adda iti Dios para kadagiti bukodna a tattao inton iparangnan ti bagina iti tunggal maysa a kas ari.

\s5
\v 22 Ngem kas dumakkeltayo iti panagtalek kenni Cristo, rugian ti Espiritu ti Dios ti agtrabaho a makagapu nga ayatentayo dagiti dadduma. Naragsaktayo. Natalnatayo. Naanustayo. Naasitayo. Naimbagtayo. Datayo dagiti mabalin a pagtalkan dagiti dadduma.
\v 23 Naalumanaytayo. Tenglentayo dagiti kagagaladtayo. Awan ti linteg a mangibagbaga a rumbeng a saan nga agpanunot wenno agtignay dagiti tattao iti kasta a wagas.
\v 24 Maysa pay, datayo a maibilang kenni Cristo Jesus ket insardengtayon ti agtarigagay kadagiti dakes a banbanag a kayattayo nga aramiden. Kasla inlansatayon ida iti krus ken pinataytayon dagitoy a dakes a banbanag!

\s5
\v 25 Gapu ta pinagbalin iti Espiritu ti Dios a mabaelantayo iti agbiag iti baro a wagas, agtignaytayo koma a kas iti panangidalan ti Espiritu ti Dios kadatayo.
\v 26 Saantayo koma nga ipannakkel dagiti bagbagitayo. Saantayo koma a pagungeten ti tunggal maysa. Saantayo koma nga apalan ti tunggal maysa.

\s5
\c 6
\p
\v 1 Padak a namati, no matakuatanyo nga agar-aramid iti biddut ti kabsatyo, siaalumanay koma a tubngarenyo dayta a tao dakayo nga idaldalan iti Espiritu ti Dios. Maysa pay, masapul nga agannadkayo no tubngarenyo ti sabali a tao tapno saankayo met nga agbasol.
\v 2 No adda dagiti kakabsat nga addaan iti parikut, masapul a tulonganyo ti tunggal maysa. Babaen iti panangaramidyo iti dayta, aramidenyonto dagiti bilbilin ni Cristo.

\s5
\v 3 Ibagak daytoy gapu ta luklukkoen laeng dagiti tattao dagiti bagbagida nga agpanunot a nangatoda unay.
\v 4 Ngem ketdi, masapul a kankanayon a padasen ken ikeddeng ti tunggal maysa kadakayo no maanamonganyo dagiti ar-aramiden ken panpanunotenyo. No kabaelam, mabalinmo ngarud nga ipannakkel ti naaramidam, ken saan a gapu ta nasaysayaat ti inaramidmo ngem ti inaramid iti sabali.
\v 5 Ibagak daytoy gapu ta masapul nga aramiden iti tunggal maysa kadakayo ti bukodyo a trabaho.

\s5
\v 6 No isuro kadakayo dagiti pada a namati ti kinapudno maipapan iti Dios, masapul ngarud nga ibingayyo dagiti sanikuayo kadakuada.
\v 7 Saanyo koma nga allilawen dagiti bagbagiyo. Laglagipenyo nga awan ti makaallilaw iti Dios. Kas iti mannalon a mangapit ti apag-isu a kita manipud kadagiti immulana, subadanto ti Dios dagiti tattao segun iti naaramidanda.
\v 8 Agnanayonto a dusaen ti Dios dagiti agaramid kadagiti basol a tinarigagayanda nga aramiden. Ngem agnanayonto a makipagtaeng iti Dios dagiti mangay-ayo iti Espiritu ti Dios gapu iti inaramid iti Espiritu ti Dios kadakuada.

\s5
\v 9 Ngem saantayo koma a mabanbannog nga agar-aramid iti makaay-ayo ti Dios, gapu ta iti dayta a panawen nga intuding iti Dios, awatentayonto ti gun-gona, no saantayo nga agsardeng nga agaramid kadagiti nasasayaat a banbanag nga ar-aramidentayo.
\v 10 Isu a tunggal maaddaantayo kadagiti gundaway, aramidentayo koma ti nasayaat kadagiti amin a tattao. Ngem nangnangruna nga aramidentayo koma ti nasayaat kadagiti amin a padatayo a namati.

\s5
\v 11 Isursuratko itan ti maudi a paset iti suratko kadakayo iti bukodko a panagsursurat. Lasinenyo dagiti dadakkel a letra nga isursuratko ita.
\v 12 Kayatdakayo a kugiten dagiti dadduma a namati a Judio tapno panunoten dagiti dadduma a Judio a nalalaingda gapu ta napagbaliwda dagiti tattao iti kina-Judaismo. Ngem ar-aramidenda laeng dayta tapno saan ida nga idadanes dagiti dadduma gapu iti panamatida a natay ni Cristo idiay krus tapno isalakannatayo.
\v 13 Isu nga ibagbagak daytoy ta uray dagitoy a tattao ket saanda a salsalimetmetan ti linteg iti Dios; ngem ketdi, kayatdakayo a kugiten tapno maipasindayagda nga adu ti napagbaliwda iti pammati dagiti Judio.

\s5
\v 14 Siak, nupay kasta, tarigagayak unay a saanko pulos nga ipannakkel ti kasta a banag. Ti laeng banag nga ipannakkelko ket ni Apotayo a Jesu-Cristo ken ti ipapatayna idiay krus. Idi natay isuna idiay krus, pinagbalinna nga awan serbina iti imatangko dagiti amin a tartarigagayan dagiti saan a namati, ken pinagbalinna nga awan serbina dagiti tartarigagayak iti imatangda.
\v 15 Ipannakkelkonto unay ti maipapan iti dayta, gapu ta saan a napateg iti Dios no nakugit dagiti tattao wenno saan. Ngem ketdi, ipatpategna laeng a mabalbaliwanna ida tapno agbalinda a baro a tattao.
\v 16 Sapay koma ta iyeg ti Dios ti kapia ken agtignay koma isuna a siaasi kadagiti amin nga agbibiag a kas iti daytoy. Pudno a nasion iti Israel dagitoy a namati a kukua iti Dios!

\s5
\v 17 Ibagak nga indadanesdak dagiti tattao gapu iti panangiwaragawagko iti kinapudno maipapan kenni Jesus, ken kas nagbanaganna adda dagiti piglat ti bagik, saan a kas kadagiti baro a mangisursuro kadakayo. Isu nga awan koman ti siasinoman a mangriribok manen kaniak maipapan kadagitoy a banbanag!
\v 18 Padak a namati, sapay koma ta naasi ken naimbag ni Jesu-Cristo kadakayo amin. Amen!