ilo_udb/39-MAL.usfm

\id MAL
\ide UTF-8
\h Malakias
\toc1 Malakias
\toc2 Malakias
\toc3 mal
\mt Malakias

\s5
\c 1
\p
\v 1 Daytoy ti mensahe nga imbaga ni Yahweh kenni Malakias para kadagiti Israelita.
\v 2-3 Kuna ni Yahweh, "Inayatkayo." Ngem ti sungbatyo a tattao, "Kasano nga impakitam kadakami nga ay-ayatennakami?" Simmungbat ni Yahweh, "Saan kadi nga agkabsat ni Esau ken ni Jacob? Ngem nangbuangayak iti katulagan kenni Jacob ken kadagiti kaputotanna, idinto nga awan iti katulagak kenni Esau ken kadagiti kaputotanna. Pinagbalinko a langalang ti daga ni Esau, maysa a lugar a pagnanaedan laengen dagiti atap nga aso."

\s5
\v 4 Mabalin a kunaen dagiti kaputotan ni Esau nga agnanaed idiay Edom, "Wen, binaybay-an ti Dios dagiti siudadmi, ngem ibangonmi manen dagiti babbalay idiay ayan dagiti nadadael. Ngem simmungbat ni Yahweh a Mannakabalin amin, "Mabalin nga ibangonda manen dagiti babbalay, ngem dadaelekto manen dagitoy. Managananto ti pagilianda a "Ti daga a pagnanaedan dagiti dakes a tattao,' ken managananto dagiti tattaoda a 'Dagiti tattao a ginura ni Yahweh iti agnanayon.'~"
\v 5 Inton maimatanganyo nga Israelita ti aramidek kadakuada, ibagayonto, "Napaneknekan a nabileg unay ni Yahweh uray iti ruar dagiti beddeng ti Israel!"

\s5
\v 6 Ngem kuna ni Yahweh a Mannakabalin amin kadagiti tattao, "Raraemen dagiti lallaki dagiti amada, ken raraemen dagiti adipen dagiti amoda. Ngarud, no ibilangdak a kas ama ken apoyo, apay a saankayo nga agdayaw kaniak?" Apay a saankayo nga agtulnog kaniak?" Ken kadakayo a papadi, adda ibagbaga ni Yahweh a Mannakabalin amin kadakayo: "Awan ti panagraemyo kaniak! Ngem salsaludsudenyo a papadi, 'Kasano a naipakita ti kinaawan panagraem kenka?'
\v 7 Insungbatko: Imbes a dayawendak, imbabaindak gapu iti panangisagutyo kadagiti daton iti rabaw ti altarko a saan a maikari para kaniak, dagiti daton a saanko a pulos nga awaten. Ket saludsudenyo, 'Ania dagiti insagutmi a daton a saan a maikari kenka?' Insungbatko: Impagarupyo nga awan aniamanna no saanyo a raemen ti altarko.

\s5
\v 8 Mangidatdatonkayo kadagiti bulsek nga ayup. Saan kadi a biddut dayta? Mangidatdatonkayo kadagiti masakit wenno pilay nga ayup. Ipagarupyo kadi nga awatek dagiti kasta a sagut? Saanyo maitured a mangted kadagiti kakasta a sagut iti gobernadoryo! Ammoyo a saanna nga alaen dagita. Ammoyo a saan isuna a maay -ayo kadakayo ken saannakayo nga awaten a siraragsak!" Dayta ti ibagbaga ni Yahweh a Mannakabalin amin!
\v 9 Kidkidawenyo a dagus ti tulong ti Dios. Ngem ibagbaga ni Yahweh a Mannakabalin amin, "No mangiyegkayo kadagiti daton a saan a maikari kaniak, apay koma a tulongankayo?"

\s5
\v 10 Ibagbaga pay ni Yahweh, "Maysa koma kadakayo ti mangirekep kadagiti ruangan iti paraangan ti templo, tapno awan ti uray maysa a mangisagut kadagiti awan serserbina a daton. Saanak a maay-ayo kadakayo, ken saankonto nga awaten dagiti sagut nga inyegyo kaniak." Daytoy ti ibagbaga ni Yahweh a Mannakabalin amin.
\v 11 Ibagbagana pay, "Agdayawto kaniak dagiti tattao kadagiti nadumaduma a nasion manipud iti daya agingga iti laud. Mangipuordanto iti insenso nga agdayaw kaniak, ken iyegdanto dagiti umno a daton, dagiti daton a maikari kaniak. Mapasamakto daytoy gapu ta agdayaw ken agraemto kaniak dagiti tattao iti amin a nasion.
\v 12 Ngem dakayo a papadi - agtigtignaykayo iti wagas a mangipakpakita iti kinaawan a pulos panagraemyo kaniak. Kunayo, 'Awan aniamanna no saan a raemen dagiti tattao ti altar gapu iti panangiyegda kadagiti daton a saan a maikari kenkuana.'

\s5
\v 13 Ibagbagayo pay, 'Nabannogkamin a mangpupuor kadagitoy amin a daton iti rabaw ti altar.' Agbang-eskayo pay a mangar-aramid iti daytoy. Nangiyegkayo iti karnero ken kadagiti kalding nga inanop dagiti atap nga ayup ken ginudwayo. Nangiyegkayo pay kadagiti ayup a masakit ken saan a makapagna. Saanyo a pinanpanunot no awatek ngata dagitoy manipud kadakayo, pinanunotyo kadi?" Dayta ti ibagbaga ni Yahweh a Mannakabalin amin.
\v 14 Ibagbaga pay ni Yahweh, "Ilunodkonto ti siasinoman a mangsaur kaniak gapu iti panagsapsapatana a mangiyeg iti awan pakapilawanna nga ayup manipud iti arbanna, kalpasanna ket mangiyeg kaniak iti adda depektona. Dusaekto ti siasinoman a mangaramid iti dayta, gapu ta siak ti naindaklan nga ari, ken daydayawendak dagiti tattao iti nadumaduma a nasion, ngem dakayo saan!" Daytoy ti ibagbaga ni Yahweh a Mannakabalin amin.

\s5
\c 2
\p
\v 1 Dakayo a papadi, ibagak ti maysa a banag a mangballaag kadakayo.
\v 2 Daytoy ti ibagbaga ni Yahweh a Mannakabalin amin: "Ipangagyo ti ibagbagak kadakayo, ket kalpasanna ikeddengyo ti agdayaw kaniak. Ta no saanyo nga aramiden dayta, ilunodkayonto, ilunodko dagiti banag nga inaramidko nga agpaay a tulong kadakayo. Ken inlunodkon dagitoy gapu ta saandak a pinadayawan.

\s5
\v 3 Dusaekto dagiti kaputotanyo, ket kaslanto la takki daytoy nga impuligadko kadagiti rupayo a naggapu kadagiti ayup nga indatonyo, ken umayto ti dadduma a mangibelleng kadakayo agraman iti dayta a takki.
\v 4 Inton mapasamak dayta, maamirisyonto a binallaagankayo a kas iti daytoy, tapno dakayo a kaputotan ni Levi ket agtulnog iti katulagak kadagiti papadi." Daytoy ti ibagbaga ni Yahweh a Mannakabalin amin kadakayo.

\s5
\v 5 Ibagbagana pay, "Inaramidko ti katulagak iti kapuonanyo a ni Levi gapu ta kayatko nga agbiag dagiti papadi a sibaballigi ken sikakapia. Ket dayta iti impaganetgetko nga aramidenda. Kiniddawko ti nainget a panagraem ken panagdayawda kaniak, ket inaramidda ngarud.
\v 6 Insuroda kadagiti tattao ti kinapudno ken kinalinteg; saanda a nagul-ulbod. Nagserbida kaniak a sikakapia ken sipupudno, ken tinulunganda ti adu a tattao tapno agsardengdan nga agbasbasol.
\v 7 Ti ibaga dagiti papadi ket mangallukoy koma kadagiti tattao nga agtultuloy a mangammo iti kinapudno agingga kadagiti sumarsaruno a kaputotan. Maamirisda koma a dagiti papadi ti mangisuro tapno mangilinteg kadakauada, gapu ta dagiti papadi ti pudno a mensaherok, Siak ni Yahweh a Mannakabalin amin.

\s5
\v 8 Ngem dakayo a papadi, saanyo a pulos nga ar-aramidenen dagitoy. Ngem ketdi, iti insuroyo kadagiti tattao ket nangisungsong iti kaaduan kadakuada nga agbasol. Linaksidyo ti katulagak nga impatungpalko kadagiti kaputotan ni Levi idi nabayagen a panawen.
\v 9 Ngarud, bay-ak dagiti tattao a manglais ken mangpabain kadakayo, gapu ta saankayo a nagtulnog kaniak. Ngem ketdi, sinuroanyo dagiti tattao kadagiti makanniwas a banbanag, sigun iti kinapategda."

\s5
\v 10 Ita ballaagankayo maipapan iti sumagmamano a banag. Pudno a datayo nga Israelita ket maymaysa laeng a bunggoy gapu ta pinarsuanatayo ti Dios kas maymaysa a bunggoy iti tattao. Ngem aggiinnulbodtayo ken agririnnanggas ti tunggal maysa kadatayo; gapu iti daytoy, tultulawantayo ti katulagan nga impatungpal ni Yahweh kadagiti kapuonantayo.
\v 11 Dakayo a tattao ti Juda ket saan a nagbalin a napudno kenni Yahweh. Inaramidyo dagiti nakaal-alliaw a banbanag idiay Jerusalem ken iti dadduma pay a disso iti Israel. Tinulawanyo, dakayo nga Israelita ti templo nga ipatpateg ni Yahweh. Inaramidyo dayta babaen iti panangasawayo kadagiti ganggannaet a babbai, dagiti babbai nga agdaydayaw kadagiti didiosen.
\v 12 Pagtalawen koma ni Yahweh manipud Israel ti tunggal tao a nagaramid iti dayta, agraman dagiti kaputotanna - uray no nangiy-iyyegda kadagiti daton kenni Yahweh a Mannakabalin amin.

\s5
\v 13 Daytoy pay ti maysa nga ar-aramidenyo: Um-umaykayo ket agsangsangit iti sangngoanan ti altar ni Yahweh, laplapunusenyo daytoy kadagiti luluayo. Agsinnaaykayo gapu ta saanan a pulos a pagan-ano dagiti datonyo.

\s5
\v 14 Agpakpakaasikayo a kunayo, "Apay a saan a kayat ni Yahweh dagiti datontayo?" Ti sungbatna, gapu ta nangngeg ni Yahweh a tunggal maysa kadakayo a lallaki ket siiinget a nagkari nga agtulnog kadagiti assawayo sipud pay kinaubingyo. Ngem dakayo a lallaki ket saanyo a tinungpal ti inkariyo; linipatyon daytoy, ti tao a nangikarianyo, tapno laeng makaasawakayo kadagiti ganggannaet a babbai.
\v 15 Kinapudnona, pinagmaymaysanakayo ni Yahweh iti asawam, ken adda kadakayo ti espirituna. Inaramidna daytoy gapu ta kayatna a maaddaankayo kadagiti annak nga agdayawto kenkuana. Isu nga agannadkayo a saankayo a masulisog kadagiti dadduma a babbai. Agbalinkayo koma a napudno iti babai nga inasawayo sipud pay kinaubingyo.
\v 16 Ibagbaga ni Yahweh a Diostayo nga Israelita, "Kagurak ti panagsina ti agassawa!" Isu a no isinayo a lallaki ti assawayo, daddadaelenyo ida iti kinaulpityo kadakuada. Isu a siguradoenyo a napudnokayo kadagiti assawayo. Dayta iti ibagbaga ni Yahweh a Mannakabalin amin.

\s5
\v 17 Iti panangibagayo kadagiti nakaal-alliaw a banbanag, pinagpungtotyo ni Yahweh. Ngem maituredyo a saludsoden, "Kasanomi koma a pinagpungtot isuna?" Ti sungbatna ket gapu ta imbagayo a maay-ayo ni Yahweh kadagiti agar-aramid iti dakes, nga ibilbilangna dagitoy a nasayaat. Ken pinagpungtotyo isuna gapu iti masansan a panangibagbagayo iti, "Apay a saan a nalinteg nga aguk-okom ti Dios kadatayo?"

\s5
\c 3
\p
\v 1 Kastoy ti kuna ni Yahweh a Mannakabalin amin: "Denggenyo, iti mabiit mangibaonakto iti mensahero kadakayo, ti mangisagana kadakayo a mangpasangbay kaniak. Ket Siak, ti Apo nga ibagbagayo a tartarigagayanyo nga umay, ket kellaatto nga agparang iti templok - Siak ni Yahweh, a nakitulaganyo nga ibagbagayo a pakaay-aywanyo - Siak a mismo ti umay.
\v 2 Ngem awanto ti uray maysa kadakayo ti sipupudno nga agtalinaed a nalinteg inton umay isuna. Ta awan ti siasinoman nga ibilang ni Yahweh a nalinteg inton umay isuna. Agtignayto isuna a kasla apuy a kasta unay a pudot ti gil-ayabna ket kabaelanna a dalusan ti gambang; agtignayto isuna a kas iti naingel a sabon nga ar-aramaten dagiti aglablaba a mangdalus kadagiti pagan-anay.
\v 3 Ukomennakayto ni Yahweh; maiyarigto isuna iti platero a pagbalinenna ti pirakna a puro, a madalusan manipud iti amin a kinarugit. Pagbalinennakayto amin ni Yahweh a kas iti puro a balitok wenno pirak. Kalpasanna, awatento ni Yahweh dagiti iyegyo a datonyo kenkuana, gapu ta nalintegkayonto."

\s5
\v 4 Inton mapasamak dayta, awatento manen ni Yahweh dagiti daton nga iyeg kenkuana dagiti tattao ti Jerusalem ken Juda, kas inaramidna iti napalabas.
\v 5 Kastoy ti kuna ni Yahweh a Mannakabalin amin: "Iti dayta a tiempo, umayakto kadakayo tapno ukomenkayo. Siaalibtakakto a mangpaneknek maibusor kagidiay amin nga aggamgamod, maibusor kadagiti mananggundaway kadagiti nakapsut a balo ken kadagiti naulila, maibusor kadagidiay nangiduma kadagiti ganggannaet a kakaduayo, ken maibusor kadagidiay nagkedked nga agdayaw kaniak."

\s5
\v 6 Siak ni Yahweh, ket saanak pulos nga agbaliw. Dayta ti gapuna a saankayo pay a dinusa, uray no inallilawyo dagiti tattao a kas iti inaramid ti kapuonanyo a ni Jacob.
\v 7 Sipud pay iti tiempo idi sibibiag pay dagiti kapuonanyo, linaksidyon dagiti bilinko ken saanyo nga inkankano dagitoy. Ita, agsublikayo kaniak; no aramidenyo dayta, agsubliak kadakayo. Dayta ti kunak, Siak a ni Yahweh a Mannakabalin amin. Ngem salsaludsodenyo, 'Saankami met pulos nga immadayo kenka, kasano ngarud nga agsublikami kenka?'

\s5
\v 8 Insungbatko: Saan a rumbeng a takawan dagiti tattao ti Dios; ngem tinakawandak dakayo a tattao! Salsaludsodenyo, 'Iti ania a wagas a tinakawandaka?' Insungbatko: Tinakawandak iti saanyo a panangiyeg kaniak kadagiti tinawen nga apagkapullo ken kadagiti daton a kiniddawko kadakayo nga itedyo kaniak.
\v 9 Inlunodko ti amin a banag nga ar-aramidenyo, gapu ta taktakawandak, dakayo amin a tattao iti daytoy a pagilian.

\s5
\v 10 Ita, iyegyo amin dagiti apagkapullo kadagiti pagiduldulinan a siled iti templo, tapno adda koma iti aglaplapusanan a taraon para kadagiti tattao nga agserserbi kaniak sadiay. No aramidenyo dayta, Siak ni Yahweh a Mannakabalin amin, ikarik nga ilukatkonto dagiti tawa ti langit ket manipud kadagitoy ibukbokko kadakayo dagiti bendision. No iyegyo dagiti apagkapulloyo iti templo, aglaplapusananto ti bendision, ket saanto nga umanay ti pagidulinan iti kinaadu amin dagitoy. Ngarud, padasendak no pudno ti ibagbagak.
\v 11 Umadonto dagiti apitenyo a mula gapu ta aywanakto dagitoy tapno saan a dadaelen dagiti dudon. Saanto nga agregreg dagiti bunga ti ubasyo manipud kadagiti lanutna sakbay nga agluom dagitoy.
\v 12 Inton mapasamak dayta, ibaganto dagiti tattao kadagiti amin a nasion a pudno a tinulungankayo, gapu ta makaay-ayonto ti pagilianyo. Dayta ti imbagak, Siak a ni Yahweh a Mannakabalin amin."

\s5
\v 13 Siak a ni Yahweh, adda pay ibagak kadakayo. Saan a nasayaat dagiti banbanag nga imbagayo maipanggep kaniak.
\v 14 Ngem insungbatyo, 'Ania dagiti saan a nasayaat a banbanag nga imbagami maipanggep kenka?' Insungbatko: Imbagayo nga awan mamaayna ti panagserbiyo kaniak. Ibagbagayo nga awan nagunggunayo iti panagtulnogyo kadagiti bilbilinko. Ibagbagayo nga awan nagunggunayo iti panagbabawiyo kadagiti basbasolyo.
\v 15 Inkeddengyo pay a manipud ita, ibagayo a kaykayatko a tulungan dagiti natangsit a tattao. Ipagpagarupyo a dagiti agar-aramid iti dakes ti bumakbaknang. Ipagpagarupyo a saanko a dusdusaen dagiti tattao a kaykayatda nga ammoen no kasano kadakes ti kabaelanda nga itarayan."

\s5
\v 16 Kalpasan a nangngegan dagiti tattao dagitoy a mensahe a naggapu kenni Yahweh nga indanonko kadakuada, dagiti tattao a nangraem kenni Yahweh ket nagiindalanda dagitoy a banbanag. Ket dinengngeg ni Yahweh ti panagsasaritada. Kabayatan nga agbuybuya isuna, insuratda iti maysa a nalukot a pagbasaan dagiti banbanag a mangpalagip kadakuada maipapan kadagiti inkarida, ket insuratda iti nalukot a pagbasaan ti nagnagan dagiti nangraem kenni Yahweh.

\s5
\v 17 Daytoy ti ibagbaga ni Yahweh a Mannakabalin amin maipanggep kadagidiay a tattao: "Isudanto dagiti tattaok. Iti tiempo nga ukomek dagiti tattao, saankonto ida a dusaen, a kas iti ama a saanna a dusdusaen ti anakna nga agtultulnog kenkuana.
\v 18 Inton mapasamak dayta, maimutektekanyonto manen nga agduma ti panangtratok kadagiti nalinteg a tattao ken kadagiti dakes a tattao. Maimutektekanyonto nga agduma ti panangtratok kadagiti agdaydayaw kaniak ken kadagiti saan nga agdaydayaw kaniak."

\s5
\c 4
\p
\v 1 Daytoy pay ti ibagbaga ni Yahweh a Mannakablin amin: "Addanto tiempo iti panangukom ken panangdusak kadagiti amin a tattao. Inton mapasamak dayta, kaslanto daytoy iti aldaw a panangpuorda ti garami iti kataltalunan. Mapuoranto a naan-anay dagidiay a tattao - a kas kadagiti ramut ken sangsanga ken amin nga adda iti kayo a mapuoran amin iti gumilgil-ayab nga apuy.
\v 2 Ngem dakayo a nagdayaw kaniak, Siak, nga agnanayon a sililinteg nga agtigtignay, umayto ket agasankayo, a kas iti agsingsingising nga init iti agsapa. Agraksakkayto a kasla kadagiti bumaro a baka nga agragragsak no makaruarda kadagiti kulunganda nga agkikinnamat idiay kataltalonan.
\v 3 Iti aldaw nga ukomek dagiti tattao, maparmekyonto a naan-anay dagiti dakes a tattao. Kaslanto imbaddebaddekyo amin ida." Daytoy dagiti inkari ni Yahweh a Mannakabalin amin.

\s5
\v 4 Agtulnogkayo a sipupudno kadagiti linteg nga imbilinko kenni Moises, a nainget a nagserbi kaniak. Agtulnogkayo kadagiti amin nga imbilinko kenni Moises idiay Bantay Sinai, ta nasken nga agtulnogkayo dakayo nga Israelita.
\v 5 Denggenyo daytoy, iti maysa nga aldaw ibaonkonto kadakayo ti propeta a ni Elias. Summangpetto isuna sakbay iti naindaklan ken nakaam-amak nga aldaw inton Siak a ni Yahweh ket mangukom ken mangdusanto kadagiti tattao.
\v 6 Gapu iti iwaragawagna, maisublinto ti napintas a langen-langen dagiti ama kadagiti annakda, ket agkaduadanto nga agpinnateg manen. No saan a mapasamak dayta, umayakto ket dadaelek ti pagilianyo."