ilo_udb/32-JON.usfm

\id JON
\ide UTF-8
\h Jonas
\toc1 Jonas
\toc2 Jonas
\toc3 jon
\mt Jonas

\s5
\c 1
\p
\v 1 Maysa nga aldaw, kinuna ni Yahweh kenni profeta Jonas a putot a lalaki ni Amittai.
\v 2 "Nakitak ti kinadakes dagiti tattao nga agnanaed iti dakkel a siudad ti Nineve. Ngarud, mapanka sadiay ket ballaagam dagiti tattao a pangpanggepek a dadaelen ti siudadda gapu kadagiti basolda."
\v 3 Ngem imbes a mapan idiay Nineve, napan ni Jonas iti siudad ti Tarsis, tapno makaadayo kenni Yahweh. Napan isuna iti siudad ti Joppe. Binayadanna sadiay ti gatad ti panagdaliasatna iti barko nga agturong iti siudad ti Tarsis, ket naglugan isuna.

\s5
\v 4 Kalpasanna, bimmaba isuna iti akinbaba a kadsaaran, nagidda ket naturog. Ngem pinarnuay ni Yahweh ti napigsa unay a pul-oy ti angin ket adda nadawel a bagyo a pagarupen dagiti tripulante a marakrak ti barko.
\v 5 Nagbuteng unay dagiti tripulante. Gapu iti dayta, rinugian ti tunggal maysa kadakuada ti agkararag iti bukodda a dios tapno agisalakan kadakuada. Kalpasanna, imbellengda dagiti karga iti baybay tapno mapalag-anan ti barko ket saan a nalaka a lumned.

\s5
\v 6 Ket bimmaba ti kapitan iti ayan ni Jonas nga agur-urok a matmaturog. Riniingna isuna ket kinunana kenkuana, "Kasanoka a makaturog kabayatan ti kastoy bagyo? Bumangonka ket agkararagka iti diosmo! Nalabit a kaasiannatayo ket isalakannatayo, tapno saantayo a malmes!"
\v 7 Ket kinuna dagiti tripulante iti tunggal maysa, "Masapul nga agbibinnunottayo, tapno maamoan no siasino ti nakaigapuan amin dagitoy a didigra!" Dayta ngarud ti inaramidda ket nabunot ti nagan ni Jonas.

\s5
\v 8 Isu nga adu kadakuada ti nagsaludsod kenkuana, "Siasino ti nangparnuay kadatayo amin daytoy a riribuk?" "Ania ti trabahom?" "Sadino ti naggapuam?" "Ania a pagilian ken ania a puli ti nakaibilangam?"
\v 9 Simmungbat ni Jonas, "Maysaak a Hebreo. Agdaydayawak kenni Yahweh a Dios, nga agnanaed iti langit. Isuna ti nangaramid ti baybay ken ti daga.
\v 10 Itartarayak ni Yahweh." Kalpasan a nangngeg dagiti tripulante dayta, nagbutengda. Isu nga imbagada kenkuana, "Maamirismo kadi ti riribuk nga inaramidmo?"

\s5
\v 11 Pumigpigsa ti bagyo ken dumakdakkel dagiti dalluyon. Isu a nagsaludsod ti maysa kadagiti tripulante kenni Jonas, "Ania ti rumbeng nga aramidenmi kenka tapno agkalma ti baybay kadatayo?"
\v 12 Simmungbat isuna, "Bagkatendak ket itappuakdak iti baybay. No aramidenyo dayta, agkalma ti baybay kadakayo. Ammok a napasamak daytoy nakabutbuteng a bagyo gapu ta saanko nga inaramid ti imbaga ni Yahweh nga aramidek."
\v 13 Ngem saan a kayat dagiti tripulante nga aramiden dayta. Ngem ketdi, inkarkarigatanda a gaudan ti barko nga isubli iti daga. Ngem saanda a kabaelan dayta, gapu ta nagtultuloy a pimmigsa ti bagyo.

\s5
\v 14 Ngarud, nagkararagda kenni Yahweh, ket maysa kadakuada ti nagkararag, "O Yahweh, pangngaasim ta saanmo nga ipabasol kadakami no ipalubosmi a matay daytoy a tao; pangngaasim ta saannakami a papatayen. O Yahweh, inaramidmo no ania ti kayatmo nga aramiden."
\v 15 Binagkatda ngarud ni Jonas ket intappuakda iti baybay. Ket nagkalma ti baybay.
\v 16 Idi napasamak dayta, nagsiddaaw iti kasta unay dagiti tripulante iti pannakabalin ni Yahweh. Isu a nangidatagda iti daton kenni Yahweh, ket nagsapatada nga aramidenda dagiti banbanag a makaay-ayo kenkuana.

\s5
\v 17 Kabayatan nga ar-aramidenda dayta, nangibaon ni Yahweh iti dakkel unay nga ikan a nangalun-on kenni Jonas. Ket adda ni Jonas iti uneg ti tian ti ikan iti tallo nga aldaw ken tallo a rabii.

\s5
\c 2
\p
\v 1 Bayat ti kaaddana iti uneg ti dakkel unay nga ikan, nagkararag ni Jonas kenni Yahweh a Dios, a dinaydayawanna.
\v 2 Kinuna ni Jonas "O Yahweh, idi kasta unay ti pannakariribukko ditoy, nagkararagak kenka ket nangngegmo ti inkararagko. Idi dandaniakon a bumaba iti lugar a papanan dagiti tattao a natay, nangngegnak idi nagpatulongak kenka.

\s5
\v 3 Intappuaknak iti nauneg a danum, iti lansad ti baybay. Linikmotnak dagiti ayus ti danum nga inaramidmo iti baybay ken nagsabbuag dagiti dadakkel a dalluyon kaniak.
\v 4 Ket impagarupko, 'Pinapanawnak ket saanakton a pulos a makastrek manen iti imatangmo. Saankonton a pulos a makita manen ti nasantoan a templom idiay Jerusalem!'

\s5
\v 5 Napalawlawanak ti danum ket malmesakon. Naibalkot iti ulok ti ruot ti baybay.
\v 6 Limnedak iti nagpuonan dagiti bantay a mangrugi iti lansad ti baybay. Ipagarupko a kasla maibaludak nga agnanayon iti uneg ti daga nga adda iti babaek. Ngem sika, Yahweh a Dios, a daydayawek, inispalnak iti ipapanko iti lugar dagiti natay!

\s5
\v 7 Idi dandaniakon matay, O Yahweh, pinanunotka. Nangngegmo ti kararagko, dita ngato nga ayanmo, dita nasantoan a templom.
\v 8 Dagiti amin nga agdaydayaw kadagiti awan serserbina a didiosen ket ilaklaksiddaka, nga agtigtignay a sipupudno kadakuada.

\s5
\v 9 Ngem agkantaakto nga agyaman kenka ken mangidatonakto kenka. Siguradoek nga aramiden ti sipapasnek nga ingkarik nga aramiden. O Yahweh, sika ti makabael a mangisalakan kadakami."
\v 10 Ket binilin ni Yahweh ti dakkel nga ikan nga isarwana ni Jonas, insarwa ngarud ti ikan ni Jonas iti namaga a daga.

\s5
\c 3
\p
\v 1 Ket kinuna manen ni Yahweh kenni Jonas,
\v 2 "Mapanka iti dakkel a siudad ti Nineve ket ibagam kadakuada ti mensahe nga intedko kenka idi."
\v 3 Iti daytoy a gundaway, nagtulnog ngarud ni Jonas kenni Yahweh ket napan idiay Nineve. Nagdakkel unay ti siudad. Kasapulan ti tallo nga aldaw a pannagna ti maysa a tao tapno malawlawna amin daytoy.

\s5
\v 4 Idi nakasangpeten ni Jonas, rinugianna ti nagnagna iti siudad iti maysa nga aldaw. Ket rinugianna ti agiwaragawag kadagiti tattao, "Uppat a pulo nga aldaw manipud ita, madadaelto ti Nineve!"
\v 5 Namati dagiti tattao ti Nineve iti mensahe ti Dios. Inkeddengda amin a rumbeng a rugian ti tunggal maysa ti agayunar. Isu nga inaramidda amin dayta, agraman amin dagiti natan-ok ken dagiti nanumo a tattao. Nagkawesda pay iti nakersang a lupot, a mangipakita a nagbabawida gapu iti panagbasol.

\s5
\v 6 Nangngeg ti ari ti Nineve ti maipapan iti mensahe ni Jonas. Isu nga inussobna dagiti kagayna ket nagkawes met iti nakersang a lupot. Pinanawanna ti tronona ket nagtugaw iti ayan dagiti nalamiis a dapo, a mangipakita met iti panagbabawina gapu iti panagbasol.
\v 7 Kalpasanna, imbaonna dagiti mensahero tapno iwaragawag kadagiti tattao ti Nineve: "Imbilinko ken dagiti mammagbagak nga awan ti siasinoman a mangan wenno uminom iti aniaman a banag. Uray dagiti ayupyo ket saanyo nga ipalubos a mangan wenno uminom.

\s5
\v 8 Ngem ketdi, masapul nga agkawes iti nakersang a lupot ti amin a tao. Kabilanyo met iti nakersang a lupot dagiti ayupyo. Kalpasanna, masapul a sipapasnek nga agkararag ti tunggal maysa iti Dios. Ket masapul nga agsardeng ti tunggal maysa iti panagar-aramid ti kinadakes ken agsardeng iti panagar-aramid ti kinaranggas kadagiti dadduma.
\v 9 No aramiden ti tunggal maysa dayta, nalabit a baliwan ti Dios ti pangngeddengna, kaasiannatayo, saannatayonto a kapungtot, ket saantayonto a matay."

\s5
\v 10 Idi inaramidda amin dayta, nakita ti Dios ti ar-aramidenda, ket nakitana ti panangisardengda iti panagaramid kadagiti kinadakes. Isu a kinaasianna ida, ken saanna a dinadael ida a kas iti impangtana nga aramidenna.

\s5
\c 4
\p
\v 1 Ngem nakarikna ni Jonas iti pannakaupay iti saan a panangdadael ni Yahweh iti Ninive. Kasta unay ti ungetna.
\v 2 Nagkararag isuna kenni Yahweh, "O, Yahweh, ti inaramidmo ket kas ti pinanunotko nga aramidem sakbay pay a pimmanawak iti pagtaengak. Ti gapuna nga immadayoak a napan idiay Tarsis ket tapno saan a mapasamak daytoy a banag, gapu ta ammok nga agtignayka a siaanus ken siaasi kadagiti amin a tattao. Saanka a nalaka a makaunget kadagiti tattao nga agar-aramid ti dakes. Ay-ayatem unay dagiti tattao ket ibabawim ti panggeddengmo a mangdusa kadagiti tattao nga agbasbasol.
\v 3 Isu nga ita, O Yahweh, agsipud ta saanmon a dadaelen ti Nineve a kas iti imbagam, pangngaasim ta palubosannak a matay, gapu ta nasaysayaat pay a matayak ngem ti agtultuloy nga agbiag."

\s5
\v 4 Insungbat ni Yahweh, "Rumbeng kadi a makaungetka ta saanko a dinadael ti siudad?"
\v 5 Saan a simmungbat ni Jonas. Rimmuar isuna iti dayaen a paset ti siudad. Nangaramid isuna iti bassit a paglinongan tapno makatugaw iti sirok daytoy ket saan a mainitan. Nagtugaw iti sirok ti paglinongan ket naguray tapno makitana no ania ti mapasamak iti siudad.

\s5
\v 6 Ket ni Yahweh a Dios, pinagtubona a dagus ti lanut a manglinong iti ulo ni Jonas manipud iti init ken tapno mabang-aran manipud iti pakarigatanna. Naragsakan unay ni Jonas iti kaadda ti lanut a nanglinong iti ulona.
\v 7 Ngem sakbay nga aglawag iti sumaruno nga aldaw, nangibaon ti Dios iti igges a nangkibkib iti lanut, isu a nalaylay.

\s5
\v 8 Ket idi nangaton ti init, nangiyeg ti Dios iti nakapudpudot nga angin manipud iti daya ket makasinit ti pudot ti init a naisarang iti ulo ni Jonas nga isu ti kimmapsutanna. Kayatnan ti matay ket kinunana, "Nasaysayaat pay a matayak ngem ti agtultuloy nga agbiag!"
\v 9 Ngem sinaludsod ti Dios ni Jonas, "Rumbeng kadi a makaungetka maipapan iti napasamak iti lanut?" Simmungbat ni Jonas, "Wen, rumbeng! Ita, makaungetak unay ket umanayen a pakatayak!"

\s5
\v 10 Ngem kinuna ni Yahweh kenkuana, "Maseknanka maipapan iti pananglaylayko iti dayta a lanut, uray no saanmo nga inaywanan ken saanmo a pinadakkel daytoy. Dimmakkel laeng iti maysa a rabii ket nalaylay iti sumaruno a rabii.
\v 11 Ngem nasurok a 120,000 a tattao a saan a makaaammo iti nasayaat ken dakes ti adda idiay Nineve, ti dakkel a siudad, ket adda pay adu a taraken. Isu a saan kadi a dagidiay a tattao ti rumbeng a pakaseknak ket saanko a kayat ida a dadaelen?"