ilo_udb/30-AMO.usfm

\id AMO
\ide UTF-8
\h Amos
\toc1 Amos
\toc2 Amos
\toc3 amo
\mt Amos

\s5
\c 1
\p
\v 1 Daytoy ti mensahe nga inted ni Yahweh kenni Amos, a maysa nga agpaspastor iti asideg ti ili ti Tekoa nga adda iti abagatan ti Jerusalem. Naawatna daytoy a mensahe maipapan iti Israel iti maysa a sirmata, dua a tawen sakbay ti napigsa a ginggined. Napasamak daytoy idi ni Uzzias ti ari ti Juda ken ni Jeroboam nga anak ni Ari Jehoas ti ari ti Israel.
\v 2 Kastoy ti kinuna ni Amos: "Agpukkawto iti nakapigpigsa ni Yahweh; inton agsao isuna manipud iti Bantay Sion idiay Jerusalem, aguninto a kas iti gurruod ti timekna. Inton mapasamak dayta, agtikagto dagiti pagaraban a pangiwaywaywayanyo nga agpaspastor kadagiti karneroyo, aglaylayto ti ruot iti tuktok ti Bantay Carmel gapu ta bilinento ni Yahweh ti tudo a saan nga agtinnag.

\s5
\v 3 Kastoy pay ti kinuna ni Yahweh kaniak: "Dusaekto dagiti tattao ti Damasco, ti kabisera ti Aram, gapu iti adu a nagbasbasolanda; saankonto nga ibabawi ti panangdusak kadakuada gapu kadagiti kinaranggas nga inaramidda kadagiti tattao iti rehion ti Galaad.
\v 4 Mangpataudakto iti apuy a mangpuor iti palasio nga imbangon ken pagnanaedan ni Ari Hazael, ti nasarikedkedan a pagnanaedan met ti anakna a ni Ari Ben hadad.

\s5
\v 5 Dadaelekto dagiti ruangan ti Damasco; pukawekto ti tao nga agnanaed idiay Biqat Aven ken ti tao nga agturturay idiay Beteden. Matiliwto dagiti tattao ti Aram ket maipandanto iti rehion ti Kir.”

\s5
\v 6 Kinuna pay ni Yahweh kaniak: "Dusaekto dagiti tattao kadagiti siudad ti Filistia; dusaekto dagiti tattao ti Gaza gapu iti adu a nagbasbasolanda; saankonto nga ibabawi ti panangdusak kadakuada, gapu ta adda dakkel a bunggoy ti tattao a tiniliwda ket inyapanda ida idiay Edom ken inlakoda ida tapno agbalin a tagabu dagiti tattao sadiay.
\v 7 Mangpataudakto iti apuy a mangpuor a maminpinsan kadagiti pader ti Gaza ken mangdadael pay kadagiti sarikedkedna.

\s5
\v 8 Pukawekto ti ari ti siudad ti Asdod ken ti ari nga agturturay iti siudad ti Askelon. Dusaekto pay dagiti tattao iti siudad ti Ekron ket matayto amin dagiti nabati a sibibiag a tattao iti Filistia.

\s5
\v 9 Kastoy pay ti kinuna ni Yahweh kaniak: "Dusaekto dagiti tattao iti siudad ti Tiro gapu iti adu a nagbasolan dagiti tattaoda; saankonto nga ibabawi ti panangdusak kadakuada gapu ta tiniliwda pay ti dakkel a bunggoy dagiti tattaomi ket inpanda ida idiay Edom, ket sinalungasingda ti tulag ti panaggayyem a nakitulaganda kadagiti agturturay kadakayo.
\v 10 Isu a mangpataudakto iti apuy a mangpuor a maminpinsan kadagiti pader ti Tiro ken mangdadael pay kadagiti sarikedkedna."

\s5
\v 11 Kastoy pay ti kinuna ni Yahweh kaniak: "Dusaekto dagiti tattao ti Edom gapu iti adu a nagbasolan dagiti tattaoda; saankonto nga ibabawi ti panangdusak kadakuada gapu ta kinamatda dagiti tattao ti Israel a nagtaud kenni Jacob a kabsat ni Esau ket pinatayda ida babaen kadagiti kampilan; saanda pulos a naasi kadakuada. Napalalo ti ungetda kadagiti tattao ti Israel ket agtultuloy ti ungetda kadakuada.
\v 12 Mangpataudakto iti apuy a mangpuor iti distrito ti Teman nga adda idiay Edom ken manguram a maminpinsan kadagiti sarikedked ti Bosra, a kadakkelan a siudad idiay Edom.

\s5
\v 13 "Kastoy pay ti kinuna ni Yahweh kaniak: "Dusaekto dagiti tattao ti Amon gapu iti adu a nagbasolanda; saankonto nga ibabawi ti panangdusak kadakuada, gapu ta binuttiakan dagiti soldadoda dagiti masikog a babbai idi rinaut ti armadada ti rehion ti Galaad tapno lumawa pay iti masakupanda.

\s5
\v 14 Mangpataudakto iti apuy a mangpuor a maminpinsan kadagiti pader ti siudad ti Raba ken tapno maminpinsan a mapuoran dagiti sarikedkedna. Kabayatan dayta a gubat, agpukkawto iti napigsa dagiti kabusorda ket agbalinto a kasla napigsa a bagyo ti gubat.
\v 15 Kalpasan ti gubat, maitalawto a kas balud ti ari ti Amon ken dagiti opisialna.”

\s5
\c 2
\p
\v 1 Kastoy pay ti kinuna ni Yahweh: "Dusaekto dagiti tattao ti Moab gapu iti adu a nagbasolanda; saankonto nga ibabawi ti panangdusak kadakuada, gapu ta kinalida dagiti tulang ti ari ti Edom ket pinuoranda dagitoy, ti nagbanaganna, pimmuraw dagiti dapu a kas iti apug.

\s5
\v 2 Mangpataudakto iti apuy tapno maminpinsan a mapuoran dagiti sarikedked ti siudad a Keriot idiay Moab. Mangngegto dagiti tattao ti panagpukpukkaw dagiti soldado ken panangpagpagunida kadagiti trumpeta bayat iti panangdadaelko iti Moab
\v 3 ken bayat ti panangpapatayko ti ari ti Moab ken dagiti amin a mangidadaulo iti daytoy. Awan duadua a mapasamakto dayta gapu ta Siak a ni Yahweh ti nangibaga iti daytoy!"

\s5
\v 4 Kastoy pay ti kinuna ni Yahweh: "Dusaekto dagiti tattao ti Juda gapu iti adu a nagbasolanda; saankonto nga ibabawi ti panangdusak kadakuada, gapu ta linaksidda ti insurok kadakuada ken saanda a nagtulnog kadagiti bilinko. Naallilawda ken naallukoyda nga agdayaw kadagiti didiosen, dagiti didiosen a dinayaw met laeng dagiti kapuonanda.
\v 5 Isu a mangpataudakto iti apuy a maminpinsan a mangpuor iti amin nga adda iti Juda, agraman dagiti sarikedked idiay Jerusalem."

\s5
\v 6 Kastoy pay ti kinuna ni Yahweh: "Dusaekto dagiti tattao ti Israel gapu iti adu a nagbasolanda; saankonto nga ibabawi ti panangdusak kadakuada, gapu ta ilaklakoda dagiti nalinteg a tattao tapno makaalada iti bassit a gatad ti pirak; ilaklakoda dagiti marigrigat a tattao nga isu iti pakaigapuanna nga agbalinda a tagabu, ilaklakoda ida iti laeng gatad ti kuarta a maigatang iti sangapares a sandalias.

\s5
\v 7 Kasla ibadbaddekda dagiti marigrigat a tattao iti daga ken saan a patas ti panangtratoda kadagiti awan gawayna. Saandak a rinaem dagiti lallaki ken dagiti ammada gapu iti pannakikaiddada iti isu met laeng a tagabu a babai.
\v 8 No bumulod ti kuarta dagiti napanglaw a tattao, piliten dagiti agipabpabulod dagidiay a tattao a mangted kadakuada iti lupot tapno idulinda agingga a mabayadanda ti kuarta. Ngem iti kamaleman ti tunggal aldaw, imbes nga isublida daydiay a lupot a kas imbilin ni Yahweh nga aramidenda, pagiddaanda ketdi dayta a lupot kadagiti disso a pagdaydayawanda kadagiti diosda! Pagbaybayadenda dagiti tattao gapu iti nadumaduma a makagapu, ket kalpasanna, in-inumenda daytoy kadagiti templo dagiti diosda.

\s5
\v 9 Idi, tapno matulongan dagiti kapuonanyo, pinatayko ti bunggoy dagiti taga-Amor. Natayagda a kas iti kayo a sedro ken napigsada a kas iti kayo a lugo, ngem pinukawko amin ida a kas iti panangputed ti maysa a tao kadagiti sanga ken panangkalina iti amin a ramut ti maysa a kayo.
\v 10 Inruarko dagiti kapuonanyo manipud iti Egipto ket indalanko ida idiay let-ang iti uppat a pulo a tawen. Ken inikkak ida iti kabaelan a mangparmek ti Canaan a daga dagiti Amorreo.

\s5
\v 11 Pinilik ti sumagmamano kadakayo nga Israelita tapno agbalin a profeta ken pinilik dagiti dadduma tapno agbalin a Nazir a nailasin nga agserbi kaniak. Awan duadua nga ammoyo, dakayo a tattao ti Israel, a pudno ti imbagak!
\v 12 Ngem binilinyo dagiti profeta a saanda nga ibagbaga dagiti mensahe nga intedko kadakuada ken sinulisogyo dagiti Nazir nga uminum ti arak nga imbagak kadakuada a saanda pulos nga aramiden uray kaanoman.

\s5
\v 13 Isu a rumekenkayonto a kas iti pannakarumek iti aniaman a maatalan dagiti dalig ti kariton a napunno ti bukbukel.
\v 14 Uray no napardaskayo nga agtaray, saankayonto a makalibas; uray no napigsakayo, kaslakayto a nakapoy, ken saanto a maisalakan dagiti mannakigubat dagiti bagbagida.

\s5
\v 15 Uray no nalaingkayo a pumana, mapilitankayto nga agsanud; uray no napardas ti panagtarayyo wenno agsakaykayo iti kabalio nga umadayo, saanyonto a maisalakan ti bagiyo.
\v 16 Uray dagiti mannakigubat a natured ket ibbatandanto dagiti armasda inton padasenda nga aglibas iti aldaw a pukawek ida. Awan duadua a mapasamakto dayta gapu ta Siak a ni Yahweh ti nangibaga iti daytoy."

\s5
\c 3
\p
\v 1 “Dakayo a tattao ti Israel, inruarko dagiti amin a kapuonanyo manipud iti Egipto; isu a denggenyo ti ibagbagak maipapan kadakayo.
\v 2 Manipud iti amin a bunggoy ti tattao iti daga, dakayo laeng ti pinilik ken inaywanak. Dayta ti makagapu a dusaenkayto gapu kadagiti nagbasolanyo.”

\s5
\v 3 Pudno a saan nga agkuyog ti dua a tao no saanda pay a nagsaritaan no sadino iti pagrubuatanda.
\v 4 Pudno a saan nga agngernger ti maysa a leon iti bakir no saan a nakapatay ti sabali nga ayup. Saan nga agngernger ti leon iti rukibna no saanna a kankanen ti lasag ti ayup a natiliwna.

\s5
\v 5 Saan a makatiliw ti maysa a tao iti billit no saanna nga ikabil ti pangsilona iti daytoy. Saan nga agpangato ti maysa a silo no awan ayup a nasilloanna.
\v 6 Kasta met nga agbuteng amin a tattao iti maysa a siudad no mangngegda ti agpapauni iti trumpeta a mangipakaammo a dumardarup dagiti kabusor. Ken no adda dumteng a didigra iti maysa a siudad, ni Yahweh ti nangipalubos iti daytoy.

\s5
\v 7 Aniaman ti panggep ni Yahweh nga aramiden, ipakpakaammona ti maipapan iti daytoy kadagiti profetana.
\v 8 Agbuteng ti amin a tattao no mangngegda nga adda agung-ungor a leon; inted ni Yahweh nga Apo dagiti mensahe kadagiti profeta, masapul nga iwaragawagda dagidiay a mensahe, uray no butbutngenda dagiti tattao.

\s5
\v 9 Kinunak daytoy kadagiti mangidadaulo ti Samaria: Ipakaammoyo daytoy a mensahe kadagiti mangidadaulo idiay siudad ti Asdod ken idiay Egipto: "Mapankayo iti bantay ti Samaria ket kitaenyo no kasano a butbutngen dagiti mangidadaulo iti dayta a siudad dagiti tattao ken no kasanoda a parparigaten dagiti tattao.
\v 10 Imbaga ni Yahweh a dagiti tattao sadiay ket saanda nga ammo ti agaramid kadagiti banbanag a nasayaat. Napunno dagiti balayda kadagiti napateg a banbanag a tinakaw ken inagawda iti sabali a tao.

\s5
\v 11 Isu a kuna ni Yahweh a Diostayo nga iti mabiit, umayto dagiti kabusorda ket rebbaendanto dagiti salaknibda ken alaendanto dagidiay napateg a banbanag.
\v 12 Daytoy ti impakaammo ni Yahweh: "No tinukmaan ti maysa a leon ti maysa a karnero, maagaw ti agpaspastor manipud iti ngiwat ti leon ti dua laeng a saka wenno maysa a lapayag ti karnero. Kasta met a manmanonto laeng a tattao ti Samaria ti makalibas ken ti mabalinandanto laeng nga isalba ket sangkapaset ti sofa ken sangkapaset ti kama ti."

\s5
\v 13 Kuna ni Yahweh a mannakabalin amin: "Iwaragawagmo daytoy maipapan iti kaputotan ni Jacob:
\v 14 Inton, Siak a ni Yahweh ket dusaek dagiti tattao ti Israel gapu kadagiti nagbasolanda, dadaelekto dagiti altar nga adda iti ili ti Betel; maputedto pay ken matinnagto iti daga dagiti naisilpo kadagiti suli dagiti altar.

\s5
\v 15 Rebbaekto dagiti balay a pagnanaedanda iti panawen ti lam-ek. Madadaelto dagiti dadakkel ken napipintas a balay a naarkosan iti marfil. Sigurado a mapasamakto dayta gapu ta siak a ni Yahweh, ti nangibaga iti daytoy!"

\s5
\c 4
\p
\v 1 Dakayo a baknang a babbai ti Samaria a limmukmeg a kas kadagiti nalukmeg a baka iti rehion ti Basan. Idaddadanesyo dagiti marigrigat a tattao ken parparigatenyo dagiti agkasapulan. Ket ibagbagayo kadagiti assawayo, "Iyegandakami pay iti inumenmi nga arak!"
\v 2 Ngem daytoy ti kuna ni Yahweh a Diostayo: "Gapu ta maysaak a nasantoan, isapatak daytoy: Umadanin ti tiempo a maipankayo iti sabali a pagilian; alaendakayto dagiti kabusoryo babaen kadagiti natirad a kaw-it a mangguyod kadakayo.

\s5
\v 3 Iguyoddakayto nga irruar dagiti kabusoryo ket rumuarkayo kadagiti renggat dagiti pader iti siudadyo ken pilitendakayo a mapan iti Harmon. Sigurado a mapasamak dayta gapu ta Siak a ni Yahweh ti nangibaga iti daytoy!

\s5
\v 4 Inkayo ngarud: mapankayo kadagiti nasantoan a lugar idiay Betel ken Gilgal a pagdaydayawan dagiti adu a tattao kaniak; mapankayo ket agsukirkayo pay kaniak! Mangidatagkayo kadagiti daton apaman a sumangpetkayo iti agsapa ken iyegandak iti apagkapullo kadagiti mulayo iti sumaruno nga aldaw.
\v 5 Mangitugotkayo kadagiti tinapay a kas panagyamanyo kaniak ken dadduma pay a daton a saan a kasapulan ket ipasindayagyo dagitoy a daton nga inyegyo gapu ta dayta ti kaykayatyo nga aramiden; ngem araramidenyo daytoy tapno agpasindayaw iti dadduma, saan a tapno maay-ayoak. Pudno unay dayta gapu ta siak, ni Yahweh ti nangibaga iti daytoy.

\s5
\v 6 Siak ti nangiyeg iti panagbisin iti sadinoman kadagiti siudad ken iliyo ngem uray no kasta, linaksiddak.
\v 7 Idi adda pay tallo a bulan sakbay ti panagaapit kadagiti mula, iti tiempo nga agkasapulan unay iti tudo dagiti mulayo, saanko a pinagtudo. No dadduma, pagtudoek iti sabali nga ili ngem saanko a pagtudoen iti sabali nga ili. Nagtudo kadagiti dadduma a talon ngem saan a nagtudo kadagiti dadduma, gapu iti dayta, ti daga kadagiti talon a saan a natudoan ket nagtikag.

\s5
\v 8 Agakar-akar dagiti tattao manipud iti maysa nga ili a mapan iti sabali nga ili tapno agsapul iti danum ngem saanda makaala iti danum a makaanay nga inumenda, ngem uray no kasta, saankayo a nagsubli kaniak. Pudno unay dayta gapu ta siak a ni Yahweh ti nangibaga iti daytoy!
\v 9 Pinagtikagko dagiti talonyo, nagango ken nagbuot dagiti minuyongan ken kaubasanyo. Inyegko dagiti dudon a mangibus kadagiti bulbulong dagiti igos ken oliboyo, ngem uray no kasta, linaksiddak. Pudno unay dayta gapu ta siak a ni Yahweh ti nangibaga iti daytoy!

\s5
\v 10 Impalak-amko kadakayo dagiti didigra a kas kadagiti didigra nga impalak-amko kadagiti tattao ti Egipto. Intulokko a matay dagiti agtutuboyo a lallaki kadagiti gubat ken pinalubosak nga alaen dagiti kabusoryo dagiti kabalioyo. Adu kadagiti soldadoyo ti napapatay ket bimmangsit dagiti kampoyo gapu kadagiti bangkayda. Ngem kaskasdi a linaksiddak. Pudno unay dayta gapu ta siak a ni Yahweh ti nangibaga iti daytoy!
\v 11 Pinukawko ti adu kadakayo, a kas kadagiti tattao iti Sodoma ken Gomora. Dagiti saan a natay kadakayo ket kas iti sumsumged a bislak a naiyadayo iti apuy tapno saan a mauram amin. Ngem kaskasdi a linaksiddak. Pudno unay dayta gapu ta siak a ni Yahweh ti nangibaga iti daytoy!

\s5
\v 12 Isu nga ita, dakayo nga Israelita, dusaenkayo. Agsaganakayo a sumango kaniak a Diosyo inton ukomenkayo!
\v 13 Pinarsuak dagiti bantay ken ti angin. Impakaammok kadagiti tattao ti panggepko ken no dadduma pagbalbalinek a nasipnget ti aldaw a kasla iti rabii. Iturturayak ti amin a banbanag ken magmagna ak pay kadagiti kangatoan a bantay iti daga! Siak ni Yahweh a mannakabalin amin!"

\s5
\c 5
\p
\v 1 Dakayo a tattao ti Israel, denggenyo daytoy kantaek a pangnatay a kanta maipapan kadakayo:
\v 2 "Maiyarigkayo iti maysa a balasang, ngem uray no kasta, awan duadua a matumbakayonto ket saan kayonto a makatakder uray kaanoman! Agidakayonto a nabaybay-an iti daga ket awanto ti tumulong a mangibangon kadakayo."

\s5
\v 3 Kastoy ti kuna ni Yahweh nga Apo kadagiti tattao ti Israel: "Inton rautendakayo dagiti kabusoryo ken inton makigubat ti sangaribo kadagiti soldadoyo, sangagasutto laeng ti makalasat. Inton rummuar ti sangagasut a soldado manipud iti maysa a siudad tapno makigubat, sangapulonto laengen ti mabati a sibibiag."

\s5
\v 4 Kuna pay ni Yahweh kadagiti tattao ti Israel: "Dakayo nga Israelita, agsublikayo kaniak! No aramidenyo dayta, agbiagkayo.
\v 5 Saankayo a mapan iti Betel a dumawat iti tulongko; saankayo a mapan iti Gilgal nga agdayaw; saankayo a mapan iti Berseba gapu ta iguyodto dagiti kabusoryo dagiti tattao ti Gilgal iti sabali a pagilian ket dadaelenda ti Betel."

\s5
\v 6 Isu nga umasidegkayo kenni Yahweh; no aramidenyo dayta, agbiagkayo. No saanyo nga aramiden dayta, bumabanto ni Yahweh kadakayo a kaputotan ni Jose a kasla apuy; uramento dayta nga apuy ti amin nga adda idiay Betel ken awanto ti makaispal iti dayta nga ili.
\v 7 Dakayo a tattao, balbaliktadenyo ti kinalinteg tapno panunoten ti dadduma a nasaem unay daytoy a banag; ibilbilangyo a dakes dagiti naimbag a banag.

\s5
\v 8 Ammoyo kadi no siasino ti nangparsua kadagiti bunggoy dagiti bituen ken nangikabil kadagitoy kadagiti disso nga ayanda? Binigat a pagbalbalinenna a lawag ti sipnget ken iti tunggal rabii pagbalbalinenna a sipnget ti lawag. Mangal-ala isuna ti danum manipud kadagiti baybay tapno agbalin nga ulep ket ibuybuyatna ti danum manipud kadagiti ulep iti rabaw ti daga. Ni Yahweh ti mangar-aramid kadagidiay a banbanag.
\v 9 Ipalpalubosna a matay dagiti nabileg a soldado ken ipalpalubosna a marba dagiti nangangato a pader iti aglawlaw dagiti siudad.

\s5
\v 10 Isuna ti mangdusa kadakayo gapu ta kagugurayo dagiti mangkarkarit iti siasinoman nga agaramid kadagiti saan a nalinteg a keddeng; kagurgurayo dagiti mangibagbaga iti pudno kadagiti pangukomanyo.
\v 11 Idaddadanesyo dagiti tattao a marigrigat ken pilpilitenyo ida nga agbayad iti dakkel a gatad iti buis. Nagpatakderkayo iti dadakkel a balay a naaramid iti bato para kadagiti bagiyo ngem saankayonto a makapagnaed kadagidiay. Nagmulakayo kadagiti kaubasan ngem awanto maapityo nga ubas tapno aramidenyo nga arak.

\s5
\v 12 Ammok amin dagiti basolyo ken dagiti nakaam-amak a krimen nga inaramidyo. Idaddadanesyo dagiti nalinteg a tattao ken umaw-awatkayo iti pasuksok. Saanyo a palpalubosan dagiti ukom nga agbalin a nalinteg kadagiti marigrigat a tattao.
\v 13 Daytoy ti tiempo a mangaramid iti kinadakes ti adu a tattao, isu a dagiti tattao a nanakman ket saanda pulos nga agsasao.

\s5
\v 14 Tapno agbiagkayo, masapul nga isardengyo ti agaramid iti biddut ket rugianyo nga aramiden ti umno. No aramidenyo dayta, addanto kadakayo ni Yahweh a mannakabalin amin a kas iti ibagbagayo nga adda isuna nga agnanayon kadakayo.
\v 15 Ayatenyo ti naimbag ket guraenyo ti dakes! Allukoyenyo dagiti ukom kadagiti pangukomanyo a mangikeddeng iti umno! No aramidenyo dagidiay a banbanag, nalabit a maasi ni Yahweh a mannakabalin amin kadakayo a kaputotan ni Jose a sibibiag.

\s5
\v 16 Gapu ta, siak a ni Yahweh, dusaenkayonto gapu kadagiti basbasolyo, daytoy ti siiinget a kinunak: Agdung-awto iti nakapigpigsa dagiti tattao iti tunggal kalsada ken agsiddaawto dagiti tattao iti tunggal plasa. Maayabanto dagiti mannalon nga umay ket kaduada nga agdung-aw dagiti dumudung-aw para kadagiti natay.
\v 17 Agdung-awto dagiti tattao kadagiti kaubasanyo gapu ta nakaronto ti panangdusak kadakayo. Sigurado a mapasamakto dayta gapu ta siak a ni Yahweh ti nangibaga iti daytoy!"

\s5
\v 18 Nakabutbuteng dagiti banag a mapasamakto kadakayo a mangtartarigagay a dusaen ni Yahweh dagiti kabusorna, gapu ta daytanto ti aldaw ti sipnget saan a lawag.
\v 19 Iti dayta a tiempo, inton itarayanyo ti maysa a leon, adda masabatyo nga oso. Inton mapankayo aglemmeng iti balayyo ket isadagyo ti imayo iti diding, tukkawanto dayta ti uleg.
\v 20 Pudno unay a nakabutbutengto dayta nga aldaw, inton dusaenna dagiti tattao, kas iti nasipnget a rabii nga awan pulos ti uray bassit laeng a lawag.

\s5
\v 21 Kuna ni Yahweh, "Kagurgurak dagiti nasantoan a panagrarambakyo ken dagiti panawen nga aguummongkayo tapno dayawendak; kagurak amin dagitoy.
\v 22 Uray no iyegandak kadagiti daton a maipuor iti rabaw iti altar ken kadagiti sagut a bukbukkel, saankon nga awaten dagitoy. Uray no iyegandak kadagiti daton tapno maisubli iti pannakilangenyo kaniak, saankonto nga awaten dagitoy.

\s5
\v 23 Isu nga isardengyon ti naariwawa a panagkankantayo! Saanko a denggen ti panagtukaryo kadagiti arpayo.
\v 24 Ipaayyo ketdi ti hustisia ken kinalinteg; masapul nga aramidenyo daytoy ket saankayo nga agsardeng a kas iti danum iti karayan a kankanayon nga agay-ayus.

\s5
\v 25 Dakayo nga Israelita, nagalla-alla dagiti kapuonanyo iti let-ang iti uneg ti uppat a pulo a tawen; ket bayat iti dayta a panawen, saanda pulos a nangiyeg kaniak iti aniaman a sakripisio ken daton!
\v 26 Ngem ita bagkatenyo ti dua a didiosen nga inaramidyo, ni Sakkut nga aw-awaganyo nga 'ari' ken ni Kaiwan a ladawan iti bituen a daydayawenyo. Bagkatenyo dagitoy inton maitalawkayo.

\s5
\v 27 Gapu ta ita, pilitenkayo a mapan iti adayo a pagilian iti labes iti Damasco! Awan duadua a mapasamakto dayta gapu ta siak a ni Yahweh a mannakabalin amin ti nangibaga iti daytoy!"

\s5
\c 6
\p
\v 1 Nakabutbutengto dagiti mapasamak kadakayo a tattao iti Jerusalem a saan a madandanagan iti aniaman a banag ken kadakayo met a mangidadaulo nga agnanaed iti katurturodan ti siudad ti Samaria, dakayo a mangipagpagarup a natalgedkayo. Aw-awaganyo dagiti bagbagiyo a kapapatgan a tattao iti lubong ken dakayo dagiti mangidadaulo a pagkidkiddawan dagiti Israelita iti tulong.
\v 2 Ibagbagayo kadakuada, "Mapanyo kitaen ti siudad ti Calne. Kalpasanna, mapanyo kitaen ti dakkel a siudad ti Hamat ken ti Gath nga adda iti Filistia. Narang-ayda amin. Ngem nasaysayaat pay dagiti dagayo ngem kadagidiay a lugar ken nalawlawa ti dua a pagillianyo a Juda ken Samaria. Isu a natalgedkayo."

\s5
\v 3 Nakabutbutengto dagiti mapasamak kadakayo a mangidadaulo! Saanyo kayat a panunoten ti maipapan iti dumteng a tiempo a lak-amenyo dagiti didigra, inton siraranggas a rautendakayo dagiti kabusoryo.
\v 4 Sursurotenyo ti kaugalian dagiti gangganaet, mangmangan nga agsadsadag kadagiti nalamuyot a sofa a naarkusan iti agkakangina a marfil. Sidsidaenyo ti karne dagiti urbon a karnero ken natataba a baka.

\s5
\v 5 Agar-aramidkayo kadagiti barbaro a kanta a kasla awan ti nasaysayaat nga aramidenyo ket kas kenni David, tuktukarenyo dagitoy kadagiti arpayo.
\v 6 In-inumenyo ti sangamalukong nga arak ken sapsapoanyo dagiti bagbagiyo kadagiti agkakangina a lana ngem saankayo nga agladladingit iti umadanin a pannakadadael ti pagiliantayo nga Israel.

\s5
\v 7 Umadanin nga aggibus ti panagrarambak ken panagul-uldagyo kadagiti nalamuyot a sofa, ket maysakayonto kadagiti umuna a piliten nga italaw a kas balud dagiti kabusoryo.
\v 8 Siiinget a kinuna ni Yahweh daytoy: "Kagurak dagiti tattao ti Israel gapu ta natangsitda unay; kagurak dagiti sarikedkedda. Ikkakto iti kabaelan dagiti kabusorda a mangsakop iti kabiserada ken ti amin nga adda iti daytoy.”

\s5
\v 9 Inton mapasamak dayta, no adda sangapulo a tao iti maysa a balay, mataydanto amin.
\v 10 No ti maysa a kabagian nga addaan takem a mangpuor kadagiti bangkay ket umay iti balay, saludsodenna ti siasinoman nga aglemlemeng pay iti balay, "Adda kadi kaduam?" ket sumungbat dayta a tao, "Awan," ibaganto ti tao a nagsaludsod, "Agulimekka! Saanmo a balbaliksen ti nagan ni Yahweh ta amangan no patayennata met!"

\s5
\v 11 Mapasamakto dagiti nakabutbuteng a banbanag a kas iti dayta gapu ta imbilin ni Yahweh a nasken a marebba dagiti dadakkel a babbalay iti Israel agingga a maburak dagitoy kasta met dagiti babassit a babbalay.

\s5
\v 12 Pudno a saan nga agtaray dagiti kabalio kadagiti dadakkel a batbato, ken pudno a saan a mabalin nga aradoen dagiti tattao dagiti batbato babaen iti baka. Ngem inaramidyo dagiti banbanag a saan a rumbeng nga aramiden iti siasinoman: Pinagbalinyo a killo ti nalinteg; sinukatanyo ti nalinteg ken imbilangyo daytoy a kas kadagiti banbanag a napait.
\v 13 Napalangguadkayo gapu ta nasakupyo ti ili ti Lo Debar ket kinunayo, "Sinakupmi ti Karnaim babaen iti bukodmi a pigsa!"

\s5
\v 14 Ngem kuna ni Yahweh a mannakabalin amin, "Palubosakto ti maysa a nasion a mangraut kadakayo a tattao ti Israel; parigatendakayonto manipud iti Hamat nga adda iti amianan a laud agingga iti waig iti Araba.

\s5
\c 7
\p
\v 1 Impakita kaniak ni Yahweh a Diostayo ti maysa a sirmata nga ibaonnanto dagiti dudon a mangdadael kadagiti mulatayo. Mapasamakto daytoy kalpasan a naapit ti bingay ti ari ken sakbay a maapit dagiti nabati pay nga apit.
\v 2 Iti sirmata, nakitak nga immay dagidiay a dudon ket inibusda ti amin a sibibiag a mula. Ket nagpukkawak, "Yahweh nga Apomi, pangaasim ta pakawanennakami! Dakami nga Israelita ket awan a pulos gawaymi; kasanokaminto a makalasat?"
\v 3 Binaliwan ngarud ni Yahweh ti pangngeddengna ket kinunana, "Saanto a mapasamak dayta."

\s5
\v 4 Kalpasanna, daytoy ti impakita kaniak ni Yahweh nga Apotayo iti maysa pay a sirmata: Aw-awaganna ti apuy nga umay tapno mangdusa kadagiti tattaona. Iti sirmata, nakitak a pinatianan ti apuy ti danum nga adda iti uneg ti entero a daga ket napuoran pay amin nga adda iti rabaw ti daga.
\v 5 Ket nagpukkawak manen, "Yahweh nga Apomi, agpakpakaasiak kenka, saanmo nga aramiden daytoy! Dakami nga Israelita ket awan gawaymi; kasano kaminto a makalasat?"
\v 6 Isu a binaliwan manen ni Yahweh ti pangngeddengna ket kinunana, "Uray dayta ket saanto a mapasamak."

\s5
\v 7 Kalpasanna, impakita kaniak ni Yahweh ti maysa pay a sirmata. Nakitak isuna nga agtaktakder iti abay ti maysa a pader. Nalinteg unay daytoy gapu ta naibangon daytoy a nausar ti maysa a tinnag. Ig-igaman ni Yahweh ti tinnag.
\v 8 Sinaludsod ni Yahweh kaniak, "Amos ania ti makitkitam? Insungbatko, "Maysa a tinnag." Ket kinuna ni Yahweh, "Kitaem, agusarakto iti maysa a tinnag kadagiti tattaok nga Israelita tapno ipakitak a kaiyariganda ti saan a nalinteg a pader. Saankon a baliwan ti pangngeddengko maipapan iti panangdusak kadakuada.

\s5
\v 9 Madadaelto dagiti disso a pagdaydayawan dagiti kaputotan ni Isaac kadagiti didiosen. Ken madadaelto met dagiti dadduma a napateg a disso a pagdaydayawan ti Israel. Ken ikkakto iti kabaelan dagiti kabusoryo a mangraut kadagiti tattaoyo babaen iti kampilan ket pukawendanto ni Ari Jeroboam ken amin a kaputotanna."

\s5
\v 10 Kalpasanna, nangipatulod iti mensahe ni Amasias a padi ti Betel kenni Jeroboam nga ari ti Israel. Kinunana iti dayta a mensahe, "Agpangpanggep iti dakes ni Amos maibusor kenka kadagiti Israelita. Madanaganak a saan a maammoan dagiti tattao iti daytoy a pagilian a mangal-allilaw isuna.
\v 11 Kastoy ti ibagbagana: 'Addanto mangpatay kenni Jeroboam babaen iti kampilan, ken maitalawto a kas balud dagiti tattao ti Israel.'~"

\s5
\v 12 Ket immay kaniak ni Amasias ket kinunana, "Sika a profeta, pumanaw ka ditoy! Agsublika iti pagilian ti Juda! Idiay ka nga agipadto no kayatmo a maaddaan iti kuarta!
\v 13 Saankan nga agipadto ditoy Betel gapu ta ditoy ti ayan ti templo ti nasion, ti ayan ti templo ti Ari!"

\s5
\v 14 Insungbatko kenni Amasias, "Saanak a sigud a profeta ken saan a profeta ti amak; maysaak nga agpaspastor. Agay-aywanak pay kadagiti kayo a sikamoro.
\v 15 Ngem innalanak ni Yahweh manipud iti panagpastor ket kinunana kaniak, 'Mapanka iti Israel ket agipadtoka kadagiti tattaok sadiay!'

\s5
\v 16 Imbagam kaniak, 'Saanka nga agipadto ken agibaga a mapasamakto dagiti nakabutbuteng a banbanag kadagiti tattao ti Israel; saanmon nga ibagbaga dagidiay a banbanag!'
\v 17 Isu a denggem ti ibagbaga ni Yahweh maipapan kenka: 'Agbalinto a balangkantis ti asawam iti daytoy mismo a siudad; matayto dagiti putotmo gapu ta patayento ida dagiti kabusormo. Rukodento ti dadduma ti dagam ken pagbibinningayanda daytoy; ket mataykanto iti sabali a pagilian. Ket awan duadua a panawanto dagiti tattao ti Israel ti pagilianda ket maitalawdanto a kas balud.’”

\s5
\c 8
\p
\v 1 Iti maysa a sirmata, impakita kaniak ni Yahweh iti maysa a basket a napunpunno iti naluom a prutas.
\v 2 Sinaludsodnak, "Amos, ania ti makitkitam?" Insungbatko "Sangabasket a naluom unayen a prutas." Kinunana, "Ipakpakaamo dayta a ngannganin ti panungpalan dagiti tattaok nga Israelita. Saanen nga agbaliw ti panunotko maipapan iti panangdusak kadakuada.
\v 3 Iti mabiit, agdung-awto dagiti tattao imbes nga agkantada iti templo. Agkaiwaranto dagiti bangkay iti uray sadino man a disso ken siuulimekto dagiti tattao bayat iti panangikkatda kadagitoy. Sigurado a mapasamakto dagitoy a banbanag gapu ta siak a ni Yahweh ti nangibaga iti daytoy!"

\s5
\v 4 Dakayo a tattao, kaslayo la ibaddebaddek dagiti tattao nga agkasapulan ken daddadaelenyo dagiti tattao a marigrigat.
\v 5 Kanayonyo nga ibagbaga, "Sapay koma ta malpasen ti luttuad tapno mapalubosankami a mangilako kadagiti bukbukelmi. Sapay koma ta malpasen ti Aldaw a Panaginana tapno mapalubosankami a mangilako iti trigomi. Inton ilakomi dagitoy, nanginanto ti panangilakomi ken saorenminto dagiti tattao babaen ti panagusar iti sinasaor a timbangan.
\v 6 Ilakominto dagiti awan serserbina a trigo. Dagiti tattao nga agkasapulan ken marigrigat ken awanan iti kuarta nga igatangda kadagiti banbanag, pagbalinenminto ida a tagabumi babaen iti pananggatangmi kadakuada iti bassit a gatad iti pirak a makagatang iti sangapares a sandalias!"

\s5
\v 7 Kinuna ni Yahweh, "Isapatak iti naganko siak nga adda iti agnanayon a rumbeng a pagrukbabanyo: Saankonto lipaten dagiti dakes a banbanag nga inaramidyo.
\v 8 Gapu kadagidiay a dakes a banbanag, iti mabiit, awan duadua nga agkintayegto ti pagilianyo ket agladingitkayonto amin. Daytoy ket kaslanto umadalem ken umababaw a kas iti Karayan Nilo a no umado ti danum ket aglayus kadagiti igidna ket kalpasanna agsublinto manen iti karayan.

\s5
\v 9 Iti tiempo a dusaek dagiti tattaok, palinnekekto ti init iti tengnga ti aldaw ket sumipngetto ti entero a lubong.
\v 10 Pagbalinekto nga aldaw a panagdudung-aw dagiti panagrarambakyo; imbes a panagkakanta, agsasangitto ti amin a tao. Gapu iti aramidek, agkaweskayonto amin iti nakersang a lupot ken kuskusanyonto dagiti uloyo tapno ipakita nga agladladingitkayo. Pagbalinekto dayta a tiempo a kas iti panagdung-aw dagiti tattao kalpasan a natay ti kakaisuna nga anak a lalaki. Amin kayo ket napalalonto ti lidayyo iti dayta a tiempo."

\s5
\v 11 Kastoy ti kuna ni Yahweh a Diostayo: "Umadanin ti tiempo a mangiyegak iti nalaus a panagkasapulan iti entero a pagilian. Ngem saan a tiempo iti kaawan ti makan wenno danum; no di ket tiempo nga awan iti mensahe a mangngeg ti siasinoman manipud kaniak.
\v 12 Agakar-akarto dagiti tattao manipud iti Natay a Baybay agingga iti Baybay Mediterranean ken agalla-alladanto manipud iti amianan agingga iti daya a mangbirbiruk iti mensahe manipud kaniak ngem awanto iti masarakanda.

\s5
\v 13 Iti dayta a tiempo, uray dagiti napipintas a babbalasang ken nabibileg a babbaro ket matalimudawto gapu ta nakaronto ti pannakawawda.
\v 14 Dagiti agsapsapata iti nagan dagiti nakababain a didiosen ti Samaria ken dagiti sipapasnek nga agkarkari nga agaramid iti maysa a banag babaen iti nagan ti dios ti Dan ken iti nagan ti dios ti Beerseba— mataydanto amin; saandanton a makabangon."

\s5
\c 9
\p
\v 1 Nangipakita kaniak ni Yahweh iti maysa pay a sirmata. Iti sirmata, nakitak isuna a nakatakder iti abay ti altar. Kinunana, "Masoem ti tuktok dagiti adigi ti templo, agingga a maburak ken marba dagitoy tapno aggunggon ti pundasion. Ket maitupak ti naburak a templo kadagiti tattao nga adda iti uneg. Patayekto babaen iti kampilan ti siasinoman a pumanaw ket awanto ti makalibas.
\v 2 No agkalida iti abot kadagiti daga, uray no dumanon iti lugar dagiti natay, wenno padasenda nga umuli agingga iti langit tapno makalibasda, gaw-atek ida ket ibabakto ida.

\s5
\v 3 No umulida iti tuktok iti Bantay Carmel tapno aglibas, birukekto ida ket tiliwek ida. No ipadasda ti aglemmeng kaniak iti lansad ti baybay, bilinekto ti dakkel unay a nakabutbuteng nga ayup a mangkagat kadakuada.
\v 4 No tiliwen ida dagiti kabusorda ket pilitenda ida nga ipan iti sabali a pagilian, ipapataykonto ida sadiay babaen iti kampilan. Inkeddengkon a patayen ida, saan ket a tulongan.

\s5
\v 5 No sagiden ni Yahweh a mannakabalin amin ti daga, malunag daytoy ket adu a tao ti matay iti entero a daga ket dung-awan ida dagiti dadduma. Daytoy ket kaslanto ages-es nga agpangato ken agpababa a kas iti panagadalem ken panagababaw ti karayan Nile.
\v 6 Impatakderna ti napintas a palasiona idiay langit ket inkabilna ti tangatang iti ngatoen ti daga. Ur-urnongenna ti danum manipud iti baybay ket ikabkabilna kadagiti ulep, kalpasanna, pagtudoenna iti daga. Yahweh ti naganna.

\s5
\v 7 Kuna ni Yahweh, "Dakayo a tattao ti Israel, pudno a saankayon a napatpateg kaniak ita ngem kadagiti tattao ti Etiopia. Inruarko dagiti kapuonanyo manipud iti Egipto, ngem inruarko met laeng dagiti Filisteo manipud iti Isla ti Creta ken inruarko dagiti tattao ti Aram manipud iti Kir.
\v 8 Siak, ti Apo a ni Yahweh, naimatangak a managbasolkayo unay, dakayo a tattao iti pagarian ti Israel, isu a dadaelenkayonto. Ngem saankayonto a pukawen amin, dakayo a kaputotan ni Jacob. Awan duadua a mapasamakto dayta gapu ta siak a ni Yahweh ti nangibaga iti daytoy.

\s5
\v 9 Inton ibilinko daytoy, kayarigannanto daytoy a yakayakenkayo nga Israelita nga agnanaed iti nadumaduma a nasion, kas iti panangyakayak ti mannalon tapno maisina dagiti bato kadagiti bukbukel tapno saan a maregreg dagitoy iti daga a kadua dagiti bukbukel.
\v 10 Manipud kadagiti tattaok, aminkayo a managbasol a tattao a mangibagbaga, "Saankaminto nga aglak-am kadagiti didigra; awan iti dakes a mapasamak kadakami,' patayendakayonto dagiti kabusoryo babaen kadagiti kampilanda."

\s5
\v 11 Nadadaelen ti pagarian a nagturayan ni Ari David a kas iti balay a narba ket nagbalin nga awan serserbina. Ngem addanto ti aldaw a pagbalinekto manen daytoy a maysa a pagarian. Pagbalinekto manen daytoy a narang-ay a kas idi naglabas.
\v 12 Inton mapasamak dayta, sakupento dagiti soldadoyo ti nabati a paset ti rehion ti Edom ken tagikuaendanto pay dagiti dadduma a nasion a kukuak idi. Siak a ni Yahweh, imbagak nga aramidek dagitoy a banbanag ket awan duadua a mapasamakto dagitoy.

\s5
\v 13 Addanto iti tiempo a nalangto ti panagtubo dagiti mulayo; kalpasan a naapit dagiti mulayo, dagus nga aradoento dagiti agmulmula ti daga tapno mulaanda manen, ket apaman a namulaan dagiti kaubasan, dagus nga apitenda dagiti ubas ket ibaddebaddekda tapno mangaramidda iti arak. Ket gapu ta adunto unay ti arak, kaslanto la agay-ayus ti arak manipud kadagiti turod.

\s5
\v 14 Dakayo a tattaok nga Israelita, parang-ayenkayonto manen. Ibangonyonto manen dagiti iliyo ket agnaedkayonto kadagitoy. Agmulakayonto kadagiti kaubasan ket inumenyonto ti arak a naaramid manipud kadagiti ubas a nagtubo kadagitoy.
\v 15 Pagnaedenkayonto manen iti dagayo, ti daga nga intedko kadagiti kapuonanyo; saandakayonton a mapapanaw iti daytoy. Awan duadua a dayta ti mapasamak gapu ta siak a ni Yahweh ti nangibaga iti daytoy."