ilo_udb/28-HOS.usfm

\id HOS
\ide UTF-8
\h Oseas
\toc1 Oseas
\toc2 Oseas
\toc3 hos
\mt Oseas

\s5
\c 1
\p
\v 1 Inted ni Yahweh dagitoy a mensahe kenni Oseas kabayatan dagiti tawen a panagari da Uzzias, Jotan, Ahaz, ken Hezekias ti Juda, ken idi ari iti Israel ni Jeroboam a putot ni Joas.
\v 2 Idi damo a nagsao ni Yahweh babaen kenni profeta Oseas, kinunana, "Mapanka ket mangasawaka iti maysa a balangkantis. Maaddaanto isuna kadagiti annak gapu ta impaayna ti bagina kadagiti dadduma a lallaki. Inton ikallaysam ti maysa a balangkantis, ipakitanto daytoy ti kinaawan bain ken kinasukir dagiti tattaok kaniak. Ipakitanto daytoy kadakuada ti panangpanawda kaniak, a Diosda."

\s5
\v 3 Isu nga inkallaysa ni Oseas ni Gomer, nga anak a babai ni Diblaim. Nagsikog isuna ket nangipasngay iti maysa a lalaki.
\v 4 Kinuna ni Yahweh kenni Oseas, "Panaganam ti putotmo iti Jezreel, gapu ta iti mabiit, dusaekto dagiti kameng ti pamilia ni Ari Jehu gapu iti panagpapatay nga inaramidna iti siudad ti Jezreel. Gibusakto pay ti pagarian ti Israel.
\v 5 Iti dayta nga aldaw, dadaelekto ti pigsa iti pannakigubat ti armada ti Isarael idiay Tanap ti Jezreel."

\s5
\v 6 Iti saan a nagbayag, nagsikog manen ni Gomer, ket iti daytoy a tiempo nangipasngay isuna iti maysa a babai. Ket nagsao ni Yahweh kenni Oseas, "Panaganam isuna iti Lo-ruhama, a ti kayatna a sawen ket 'awanan asi,' gapu ta awanton a pulos ti asik kadagiti Israelita, ken saankonto ida a pakawanen iti uray maysa a nagbasolanda.
\v 7 Ngem kaasiakto dagiti tattao ti Juda. Isalakankonto ida-- ngem saan a babaen kadagiti makapatay nga armas, ti ba-i, ti kampilan, wenno gubat. Saankonto ida nga isalakan babaen kadagiti armada wenno babaen kadagiti napipigsa a kabalio ken kadagiti agsaksakay kadagitoy. Ngem ketdi, Siak mismo a ni Yahweh, ti mangisalakanto kadakuada."

\s5
\v 8 Kalpasan a pinusot ni Gomer ni Lo-ruhama, nagsikog manen isuna ket nangipasngay iti maysa a lalaki.
\v 9 Kinuna ni Yahweh, "Panaganam isuna iti Lo-ammi, a ti kayatna a sawen ket 'saanko a tattao,' gapu ta sika, O Israel ket saanko a tattao,— ken saankayonton a pulos a salakniban a kas Diosyo.

\s5
\v 10 Maysanto nga aldaw, umadunto dagiti tattao ti Israel a kas iti kaadu dagiti darat iti igid ti baybay. Awanto ti makabilang kadakuada. Kinunak iti Israel, 'Saan a dakayo dagiti tattaok,' —ngem maysa nga aldaw, ibagakto kadakuada, 'Dakayo dagiti tattao a salakniban ken ayatekto.'
\v 11 Iti dayta nga aldaw, Siak a ni Yahweh ket ummongekto dagiti amin a tattao ti Juda ket pagmaymaysaekto ida a kadua dagiti amin nga Israelita. Mangpilidanto kadakuada iti maysa a pangulo, ket rummuardanto iti dayta a daga a nakaitalawanda a kas balud. Ibagadanto iti dayta nga aldaw, 'Naindaklan ti aldaw ti Jezreel!' (Ti kayat a sawen ti Jezreel, ket 'Inmula ti Dios dagiti tattaona iti dagana.')

\s5
\c 2
\p
\v 1 Ayabanyo dagiti padayo a lallaki nga Israelita, 'Tattaonakayo ni Yahweh,' ken ayabanyo dagiti padayo a babbai nga Israelita, 'Naasi ni Yahweh kadakayo."'

\s5
\v 2 Kinuna kaniak ni Yahweh, “Kayatko a pabasulem ti Israel, a kasla maysa nga ina kenka, iti panagbalinna a saan a napudno nga asawa kaniak. Daytoy a nasion ket saanen a kasla iti maysa nga asawa kaniak, ken saanakon a kasla asawa kenkuana. Ibagam iti Israel a masapul nga isardengdan ti agtignay a kas iti maysa a balangkantis; masapul nga isardengna ti agdaydayaw kadagiti didiosen. Masapul a sumardeng ti Israel nga agdaydayaw kadagiti didiosen. Masapul nga isardengna ti agtignay a kas iti babai a nangpanaw iti asawana ket simmurot kadagiti sabali a lallaki.
\v 3 No saan isuna a sumardeng, labusakto isuna ket pagbalinekto isuna a lamolamo a kas iti langana idi naipasngay isuna. Pagbalinekto isuna a kas iti maysa a let-ang nga awan agtubo a mula—namaga ken awanan iti biag; Pagbalinekto isuna a kas iti babai a matmatay gapu iti pannakawawna idiay disierto.

\s5
\v 4 Awanannakto iti asi kadagiti tattaona, kadagiti Israelita, gapu ta kasla iti maysa a balangkantis ti nasionda.
\v 5 Kasla maysa a balangkantis ti Israel, maiyarig isuna iti babai a nangipasngay kadagitoy nga annak babaen iti panagaramidna kadagiti nakababain a banbanag kadagiti sabali a lallaki. Inkeddeng ti Israel a surroten dagitoy a didiosen nga inayatna, a mangidayaw kadagiti dadduma a dios. Impagarupna a dagitoy dagiti dios a nangted kenkuana iti tinapay ken danum. Impagarupna a dagitoy a dios ti nangted kenkuana iti pagan-anayna a de lana, lino, ken lana nga olibo, kasta met ti arak a mainom.

\s5
\v 6 Isu a serraak ti kalsada ti Israel babaen kadagiti sisiitan a mula, ken paderakto ti aglawlawna, tapno saanna a masarakan ti dalan a pagturonganna.
\v 7 Kamatento ti Israel dagiti didiosenna ngem saanna ida a masarakan. Birrokennanto dagiti palso a diosna, ngem sannanto ida a masarakan. Kalpasanna, kas iti balangkantis a babai a kayatna nga agsubli iti asawana, ibagananto kaniak, ‘Agsubliakto kenka, nga immuna nga inayatko, gapu ta nasaysayaat ti biagko iti dennam ngem ita.'

\s5
\v 8 Ibaganto daytoy dagiti tattao, gapu ta saanda nga ammo a Siak a ni Yahweh ti nangipaay kadakuada kadagiti bukelda, baro nga arak, ken lana nga olibo. Siak ti nangted kadakuada kadagiti adu a pirak ken balitok tapno bumaknangda. Ngem ketdi, pinagbalinda amin dagiti balitok ken pirak a banbanag a mausar iti panagdaydayaw iti didiosen a ni Baal.
\v 9 Ngarud, alaekto met laeng kadagiti Israelita dagiti amin a bukel nga intedko kadakuada. Inton mabalinen a maapit dagiti trigo, paritakto a mangapit kadagitoy. Alaekto manipud kadakuada ti baro nga arak nga intedko kadakuada. Alaekto manipud kadakuada dagiti amin a pagan-anay a de lana ken linen nga intedko kadakuada tapno aramidenda a kawesda, dagiti kawes a mangabbong iti kinalamo-lamoda.

\s5
\v 10 Tratoekto ti Israel a kas iti panangtrato ti lalaki iti asawana no maduktalanna ti asawana iti denna dagiti sabali a lallaki. Labusakto isuna iti sangoanan dagiti kaayan-ayatna. Awanto ti makabael a mangispal kenkuana iti aramidek kenkuana.
\v 11 Pagsardengekto dagiti Israelita kadagiti panagrambakda; sumardengdanto iti panagrambakda iti tinawen. Saandanton a pulos a rambakan ti rugi ti tunggal bulan. Saandanton a pulos a rambakan dagiti Aldaw ti Panaginana. Saandanton a marambakan dagiti padaya a naituding iti uneg ti maysa a tawen.

\s5
\v 12 Dadaelekto dagiti amin a kaubasan ken dagiti kayo nga igos dagiti Israelita. Daytoy ket gapu ta ti Israel ket kasla maysa a babai a nangibaga, 'Dagitoy dagiti banbanag a tangdanko nga inted kaniak dagiti kaayan-ayatko.' Siak, ni Yahweh ket pagbalinekto a kabakiran dagidiay a lugar, maysa a nasamek nga awan pagtuboan dagiti ubas, ken lugar a kanen dagiti atap nga ayup dagiti aniaman a prutas nga agtubo sadiay.'
\v 13 Dusaekto daytoy a babai nga agnagan iti Israel gapu kadagiti amin a tiempo a nagpuor isuna iti insenso a mangdayaw kadagiti didiosen a Baal. Inarkusanna ti bagina kadagiti singsing ken alahas, kas iti balangkantis a mangarkos iti bagina para kadagiti kaayan-ayatna. Nakairuaman a surot-suroten dagiti kaayan-ayatna—kas iti panangsurot ti Israel kadagiti Baal—dagidiay a palso a dios a daydayawenna. Ket nalipatanna ti maipanggep kaniak." Kastoy ti kuna ni Yahweh.

\s5
\v 14 "Iturongkonto isuna iti let-ang ket ibagakto kenkuana nga ay-ayatek isuna. Allukoyekto isuna nga ayatennak manen.
\v 15 Isublikto kenkuana ti kaubasanna iti maminsan pay, ken pangnamnamaek isuna iti maminsan pay idiay Tanap ti Akor. Sungbatannakto nga addaan iti ayat ken ragsak, a kaslanto idi panawen nga umuna a panaginnayan—ayatmi—idi winayawayaak isuna, ket rimmuar isuna iti Egipto.

\s5
\v 16 Iti dayta a tiempo, awagannakto ti Israel, 'Ti asawak,' kas iti ibaga ti maysa a babai iti asawana. Saanton a pulos nga umawag isuna iti dios, 'Ti Baalko,' ngem awaganakto iti 'Ti Asawak.'
\v 17 Saankonto a palubosan ti Israel a mangibalikas kadagiti nagan dagiti imahen ni Baal a sigud a pagdaydayawanna. Lipatento dagiti tattaok dagiti nagan dagidiay a Baal ken dagiti didiosenda, ket saanton a pulos a dayawen ida manen dagiti tattaok nga Israelita.

\s5
\v 18 Iti dayta a tiempo, makitulagakto kadakuada: daytoy ket pakairamanan dagiti atap nga ayup ken dagiti billit, ken dagiti amin a babassit nga ayup nga agkarkarayam iti daga. Saandanton a pulos a dangran manen dagiti tattaok. Ikarik nga ikkatekto dagiti amin nga armas a nausar kadagiti gubat, dagiti bai ken pana, ken dagiti kampilan, ken amin a gubat, ikkatek ken dadaelekto amin dagitoy. Ket paginanaekto iti kappia dagiti amin a tattaok; saandanton a pulos nga agbuteng.

\s5
\v 19 Agbalinkanto a kas asawak iti agnanayon, Israel. Ikarik ti bagik kenka, babaen iti panagaramid iti umno ken babaen iti panangayat iti nalinteg. Ikarik nga ayatenka ken ipakitak kenka ti kinaimbag uray no saanmo a kaikarian daytoy.
\v 20 Tungpalek ti karik kenka, Israel. Saanakto a pulos nga agulbod kenka; ket maam-amonakto—Yahweh ti naganko.

\s5
\v 21 Iti dayta a tiempo, tulongankanto," kuna ni Yahweh. “Bilinekto ti tangatang, ket agtudonto ti tangatang a mangsibog iti daga.
\v 22 Ket mangipaayto ti daga iti bukel, baro nga arak ken kadagiti kayo nga olibo, ket agtubodanto iti Tanap ti Jezreel.

\s5
\v 23 Iti dayta a tiempo, aywanakto dagiti Israelita a kas iti mannalon a mangmula iti bukodna a talon ket aywananna dagiti mulana. Ipakitakto ti ayatko kadagiti tattao nga inawagak iti 'Saanko a Tattao'. Ken kadagiti inawagak iti 'Saanko a Tattao', awagakon ita iti baro a nagan: 'Dakayo dagiti Tattaok'. Ibagadanto kaniak, 'Sika ti Diosmi."'

\s5
\c 3
\p
\v 1 Ket kinuna ni Yahweh kaniak, "Mapanka ket ayatem ti maysa a babai, uray no ay-ayaten isuna ti sabali a lalaki, ken saan met laeng isuna a napudno iti asawana. Agbalinkanto a kas kaniak, gapu ta ay-ayatek dagiti tattao ti Israel urayno agdaydayawda kadagiti dadduma a dios ken mangmanganda iti kankanen a pasas iti panagdayawda."
\v 2 Uray no maysa isuna a tagabu, a kukua ti sabali a tao, ginatangko isuna iti 170 a gramo ti pirak, ken 330 a litro ti sebada.
\v 3 Ket kinunak kenkuana, "Makipagbiagka kaniak manipud ita. Saankanton a balangkantis a makikakaida kadagiti agduduma a lallaki. Saankanto a kukua ti siasinoman a lalaki, siak laeng, ket napudnoakto kenka ken makipagbiagak kenka iti las-ud iti panagbiagko."

\s5
\v 4 Inton aramidek dagitoy a banbanag, daytoy ti mangipakita nga agbiagto dagiti tattao ti Israel iti mabayag a tiempo ken awananda iti ari a mangituray kadakuada. Awanto ti prinsipeda, awanto dagiti sakripisyo wenno nasagradoan nga adigi a maipasdek para iti panagdayaw, efod wenno didiosen kadagiti balayda.
\v 5 Kalpasan ti sumagmamano a tiempo, agsublinto kenni Yahweh dagiti tattao ti Israel; namnamaenda nga awatennanto manen ida. Mangnamnamada a maaddaanda iti kaputotan ni David nga agbalin manen nga arida. Iti maudi a tiempo, umaydanto kenni Yahweh tapno dayawen ken agbutengda iti sangoananna gapu iti kinaimbagna kadakuada.

\s5
\c 4
\p
\v 1 Dumngegkayo iti mensahe ni Yahweh kadakayo. "Dakayo nga Israelita, pabpabasulennakayo ni Yahweh, dakayo nga agnanaed iti daytoy a lugar." Kinunana, "Awan ti masarakak nga uray siasino ditoy a mangibagbaga ti pudno. Awan ti uray siasino a makitak a mangay-ayat kaniak. Awan kadakayo ti sipupudno a mangibaga nga am-ammonak.
\v 2 Agilunod ken agulbodkayo, pumatay ken agtakawkayo, ken makikamkamalalakayo. Sinalungasingyo ti amin a linteg, ken agsasaruno dagiti panangpapatayyo.

\s5
\v 3 Gapu kadagiti ar-aramiden dagiti tattao, ti daga ita ket maysan a let-ang. Matmatayen dagiti amin a parsua nga agnanaed ditoy, manipud kadagiti ayup nga agnanaed kadagiti tay-ak, kadagiti billit nga agtaytayab iti tangatang; uray dagiti ikan iti baybay ket matmatayda metten.

\s5
\v 4 Ngem masapul a saanyo a pabasulen ti siasinoman iti daytoy a riribuk. Masapul a saanyo a palubosan ti siasinoman a mangilinteg iti sabali a tao; awan ti karbengan ti siasinoman, gapu ta nagbasol ti amin. Ken pabpabasulek met dagiti padi.
\v 5 Nagbasolkayo a papadi bayat iti aldaw ken nagbasol dagiti kakaduayo a profeta iti rabii. Ikarik kadakayo, dadaelekto ti Israel, a kasla maysa nga ina kadakayo.

\s5
\v 6 Matmatay dagiti tattaok gapu ta nagkedkedkayo a papadi a mangawat kaniak. Ken apay a nagbassit ti pannakaawatyo kaniak? Gapu ta linaksidyo dagiti banbanag nga inbilinko nga aramidenyo. Isu a laklaksidekon ti kinapadiyo kaniak. Kitaenyo dagiti linipatyo: Linipatyo dagiti bilbilin a siak a Diosyo ti nangted kadakayo. Gapu ta linipatdak, lipatekto dagiti annakyo.
\v 7 Kas umad-adukayo a papadi, ad-adda met ti panangaramidyo kadagiti banbanag nga imparitko. Raraemendakayo itan iti amin, ngem saankonto idan a pagraemen kadakayo.

\s5
\v 8 No agbasol dagiti dadduma a tattao, mangiyegda kaniak iti daton a mabalinyo a kanen dagiti dadduma. Isu a kaykayatyo ti ad-adda a panagbasol dagiti tattao.
\v 9 Dusaenkayo a papadi a kas iti panangdusak kadagiti tattao. Dusaenkayo amin gapu iti kagagaladyo; pagsagabaenkayo amin gapu kadagiti amin a kinadangkes nga inaramidyo.

\s5
\v 10 Mangankayonto amin, ngem saankayonto a mapnek. Kanayonkayonto a mabisin. Itultuloydanto ti makikaidda kadagiti sabali a babbai, ngem saanto nga agsikog dagiti babbai, gapu ta aminkayo ket tinallikudandak, nga agnagan iti Yahweh.

\s5
\v 11 Indiayayo dagiti bagbagiyo iti panangaramid kadagiti maiparit a pannakinaig, ken iti panaginom iti arak ken baro nga arak. Amin dagitoy a banbanag ti nangpukaw iti pannakailasinyo iti umno manipud iti dakes.
\v 12 Agkarkararag dagiti tattaok iti didiosen a naaramid iti kayo. Saludsodenda kadagiti sarukodda no ania ti rumbeng a dalan a turonganda! Napnoanda iti espiritu iti kinaderrep a nangiyadayo kadakuada manipud kaniak, ti Dios a rumbeng a dayawenda.

\s5
\v 13 Kamkamatenda dagiti dadduma a dios, kadagiti lugar nga ayan dagiti daydayawenda a didiosen a naisaad kadagiti tapaw dagiti bantay. Agpupuorda kadagiti daton kadagiti didiosen iti tapaw dagidiay a turturod— iti amin a lugar a pagdaydayawanda kadagidiay a didiosen— iti sirok dagiti kayo a lugo, alamo ken terebinto— gapu ta mangmangted iti nasayaat a linong dagitoy a kayo. Ti panangtulad kadagiti ar-aramidenyo, inkeddeng dagiti annakyo a babbai nga agbalinda a balangkantis, ken nakikamalala dagiti manugangyo a babbai.
\v 14 Ngem saanko a dusaen dagiti babbai iti panagbalinda a balangkantis, wenno dagiti manugangyo a babbai no makikamalalada. Dagiti lallaki ti mangar-aramid iti isu met laeng a banag! Makikakaiddada kadagiti balangkantis, ken agidatagda kadagiti daton kadagiti balay dagiti didiosen nga ayan dagiti balangkantis iti disso a pagdaydayawan para kadagiti lallaki nga um-umay agdayaw kadagiti didiosen. Dadaelek dagitoy a tattao gapu ta saanyo a maawatan dagiti ar-aramidenyo!

\s5
\v 15 Pinanawannak O Israel, ket simmurotka kadagiti didiosen. Ngem namnamaek a saanto nga aramiden ti Juda ti isu met laeng a banag. Dakayo a tattao ti Juda, saankayo a mapan idiay Gilgal. Saankayo a sumang-at idiay Bethaven tapno agdayaw kadagiti didiosen sadiay. Saankayo nga agkari a sipapasnek, nga umawag kaniak tapno agaramid iti nasayaat kadagiti kariyo, nga inaynayonyo kadagiti sapatayo dagiti sao a, 'Iti nagan ni Yahweh nga adda iti agnanayon!"
\v 16 Ti Israel ket nasukir a kas iti urbon a baka. Mabalinko kadi a pakanen ida ita a kasda la babassit nga urbon ti karnero iti pagpastoran?

\s5
\v 17 Pimmanaw ti Efraim tapno makitipon kadagiti didiosen. Panawanyo dagidiay a tattao nga is-isuda!
\v 18 Inton maibusda nga inumen dagiti amin a naingel nga arakda ket ad-addanto pay ti panagaramidda kadagiti kinaderrep. Kaykayat dagiti panguloda nga ar-aramiden dagitoy a nakababain a banbanag.
\v 19 Addanto maysa a tao a mangraut kadakuada; kaiyarigannanto ti alipugpog a mangiyakar kadakuada iti sabali a lugar. Iti daytanto laeng nga agbainda gapu ta nagidatonda kadagiti didiosen.”

\s5
\c 5
\p
\v 1 "Dumngegkayo, dakayo a papadi! Ipangagyo a nalaing, dakayo nga Israelita! Ken dakayo a kameng ti pamilya ti ari, masapul met a dumngegkayo! Gapu ta dusaenkayonto amin. Dagiti banbanag nga inaramidyo ket kasla maysa a palab-og kadagiti tattao idiay Mizpa. Dagiti banbanag nga inaramidyo ket kasla maysa a silo a naiwayat a mangtiliw kadagiti tattao nga agnanaed idiay Bantay Tabor.
\v 2 Adun ti napapatay dagiti nagrebelde a maibusor kaniak ket nailumlomdan kadagiti darada. Ibagak kadakayo a dusaekto amin ida.

\s5
\v 3 Dakayo a tatao ti Efraim, ti sentro ti Israel— am-ammokayo. Ammok a nalaing ti kagagaladyo, dakayo nga Israelita. Dakayo a tattao ti Efraim, nagtignaykayo a kas kadagiti balangkantis. Wen, narugitankayon nga Israelita.
\v 4 Saan a nabaelan ti Israel ken Efraim a dawaten kaniak a pakawanek ida, gapu iti inaramidda. Pinilida ti agbalin a saan a napudno ken dakes, ken saandak nga am-ammo, a ni Yahweh."

\s5
\v 5 Natangsit ti Israel; gapu iti daytoy ammo dagiti dadduma ti panagbiddutna. Dagiti basol nga inaramid dagiti Israelita ti namagbalin kadakuada tapno maawanan iti pammati kenni Yahweh. Mapukpukaw met ti pammati ti Juda.
\v 6 Mangnamnamada a maallukoyda ni Yahweh a maasi kadakuada. Um-umayda a mangidaton kenkuana iti karnero ken baka manipud kadagiti arban ken tarakenda. Ngem maduktalandanto a saan ida a kaasian ni Yahweh gapu ta insardengnan ti panangtultulongna kadakuada; baybay-anna idan.
\v 7 Saanda a tinungpal dagiti karida kenni Yahweh. Ken naaddaanda kadagiti annak kadagiti ganggannaet a babbai. Isu nga iti tiempo ti fiesta ti baro a bulan, mapukawdanto, agraman dagiti taltalonda."

\s5
\v 8 Kuna ni Yahweh, "Puyotanyo ti sara ti karnero iti siudad ti Gabaa! Puyotanyo ti trumpeta iti siudad ti Rama! Ipukkawyo ti ikkis ti gubat iti siudad ti Bethaven! Idauloandakami iti gubat, dakayo a tattao iti tribu ti Benjamin!
\v 9 Dusaekto dagiti tattao ti Efraim ket pagbalinek ti siudadda a gabsuon ti nadrilio. Daytoy ti karik kadagiti tribu ti Israel—ikarik kadakayo amin nga aramidekto daytoy.

\s5
\v 10 Dagiti mangidadaulo ti Juda ket kas iti kinadakes dagiti tattao a mangtakaw iti pagmulaan babaen iti panangiyakar kadagiti mohon iti nagbeddengan; agtaktakawda iti daga a saanda a kukua. Dusaekto ida iti wagas a mapukawda.
\v 11 Agsagabanto iti nakaro ti Efraim; matayto dagiti tattao inton dusaek ida, gapu ta disididoda nga agdaydayaw kadagiti didiosen.

\s5
\v 12 Dadaelekto ti Efraim kas iti panangdadael ti buot iti bado; dadaelekto ti Juda kas iti panangdadael ti bukbok iti kayo.
\v 13 Inton maamiris dagiti tattao ti Efraim ti kinakapuyda, ket agpatulongdanto kadagiti tattao ti Asiria. Inton maamiris dagiti tattao ti Juda ti kinakapuyda, mangibaonda kadagiti mensahero iti mabigbigbig nga ari ti Asiria. Ngem saannakayo a matulongan a tattao; saannakayonto a mapapigsa manen a tattao.

\s5
\v 14 Agbalinakto a kasla leon kadagiti tattao ti Efraim idiay Israel; agbalinakto a kasla urbon a leon kadagiti tattao ti Juda. Dadaelek ken panawakto ida; ipankonto ida iti adayo, ket awanto iti uray maysa a makaispal kadakuada.
\v 15 Ket agsubliakto iti nagappuak; manipud sadiay urayekto ti pannakabigbigda a nagbasolda; urayekto ida nga umay ket agpatulongda kaniak.”

\s5
\c 6
\p
\v 1 Kuna dagiti tattao, "Umaykayo, agsublitayo kenni Yahweh. Rinangrangkayna ti lasagtayo a kas iti panangrangrangkay ti leon iti biktimana. Inaramidna daytoy, ngem paimbagennanto dagiti sugattayo. Dinangran ken intumbanatayo, ngem agasannanto dagiti sugattayo ken bedbedenna dagitoy tapno umimbagda.
\v 2 Kalpasan ti maikaddua nga aldaw papigsaennatayo; ken pagungarennatayonto iti maikatlo nga aldaw tapno agbiagtayo a nasinged kenkuana.
\v 3 Am-ammoentayo ni Yahweh; aramidenyo ti amin a kabaelanyo tapno maam-ammoyo isuna. Umayto isuna kadatayo a kas iti kasigurado iti panagsingising ti init iti kabigatanna; umayto isuna kadatayo a kas iti tudo, a kas iti iyuumay ti tudo iti tiempo ti panagrurusing kadagiti talontayo."

\s5
\v 4 Ngem kuna ni Yahweh, "Ania ti mabalinko nga aramiden kadakayo, dakayo a tattao ti Efraim? Ania ti mabalinko nga aramiden kadakayo, dakayo a tattao iti tribu ti Juda? Ay-ayatendak laeng agingga nga adda dagiti angep iti agsapa sakbay nga agpukawda manen. Ay-ayatendak laeng agingga nga agtaltalinaed ti linnaaw sakbay a mainitan daytoy.
\v 5 Imbaonko dagiti profetak kadakayo ket kaskayo la tinupek idi insaoda dagiti mensahe nga intedko kadakuada. Nadadaelkayo babaen iti imbagada kadakayo. Kasla pinataykayo babaen kadagiti sasao a sinaok kadakayo. Nagsaritaak maipanggep iti panangdusak kadakayo. Imbagak babaen kadagiti profeta a makaungetak kadakayo ket imbagada kadakayo daytoy." "Yahweh, dusaemto ida babaen iti panangibilinmo a mapasamak daytoy; dagiti sasaom ket kasla kimat."

\s5
\v 6 Kuna ni Yahweh, "Kayatko nga agbalinkayo a napudno kaniak iti agnanayon. Kaykayatko dayta ngem iti panangidatagyo kadagiti daton kaniak. Kayatko a maam-ammodak— napatpateg dayta kaniak ngem iti panangitedyo iti daton kaniak a puoran dagiti papadi iti rabaw ti altar.
\v 7 Ngem kas kenni Adan, ti immuna a tao, sinalungasingda—ti katulaganmi, a siak a ni Yahweh a nakitulag kadakuada. Idi inaramidda dayta, saanda a napudno kaniak.

\s5
\v 8 Ti Galaad ket siudad dagiti tattao nga agar-aramid kadagiti nadangkes a banbanag; adda dagiti tugot dagiti mammapatay kadagiti kalsada iti dayta a siudad.
\v 9 Kas kadagiti agtatakaw nga aglemlemmeng ken kalpasanna takawanda ti tao a lumabas kadakuada, kasta met dagiti papadi— agkakaduada nga agar-agaramid iti panggepda, a kas kadagiti agtatakaw, ket agpapatayda iti dalan nga agturong iti Sikem. Agaramidda kadagiti nakabutbuteng a krimen.

\s5
\v 10 Kadagiti tattao ti Israel, nakitak ti makarimon a banag— agdaydayaw dagiti tattao ti Efraim kadagiti didiosen iti amin a disso. Nagbalin a narugit dagiti tattao ti Israel gapu iti inaramidda.
\v 11 Ken kadakayo met, dakayo a tattao ti Juda, nangitudingakon iti tiempo para kadakayo inton ilasinko dagiti naimbag manipud kadagiti dakes a tattaoyo. A kas iti tiempo ti panagani inton urnongenyo amin dagiti naapit, idulinyo dagiti nasayaat ket ibellengyo dagiti naperdi, dayta ti dumtengto kadakayo a tattao ti Juda. Daytanto ti aldaw nga isublik manen dagiti bendision ken kinabaknang dagiti tattaok.”

\s5
\c 7
\p
\v 1 Tunggal panggepko nga agasan dagiti tattao ti Israel, ket kasta met ti panangipakita dagti tattao nga agbasbasolda, ken kasta met ti ipakpakita dagiti tattao iti siudad ti Samaria. Agulbod ken agkusitda iti panaggatang ken panaglakoda; maiyarigda kadagiti managdakdakes a mangdarup kadagiti tattao a magmagna kadagiti kalsada.
\v 2 Ngem saanda man laeng nga agpanunot a Siak, a ni Yahweh, ket makitkitak ti amin nga ar-aramidenda. Sadinoman a papananda, agaramidda ti dakes ket makitkitak amin dagitoy.

\s5
\v 3 Mangparagsak iti arida dagiti nadangkes a banbanag nga ar-aramidenda, ken maragsakan dagiti opisial ti ari no agulbodda.
\v 4 Mannakikamalalada amin; naderrepda unay a kasla pugon a nakapudpudot; apaman a mapasgedanna daytoy, saannan a masapul a sungrudan daytoy agingga a nakasagana isuna a mangluto ti tinapay.
\v 5 Kadagiti pasken ti ari, agaramid dagiti opisial kadagiti dinudursok a banbanag gapu ta nabartekda, ken makikaddua ti ari kadakuada a manglais kaniak.

\s5
\v 6 Ngem dagitoy met laeng nga opisial ti nagpanggep a mangpapatay iti ari. Agpatpatnag a makaung-ungetda, agingga iti agsapa.
\v 7 Makaung-unget unay dagiti amin nga opisial iti ari ket pinapatayda dagiti amin a mangiturturay kadakuada. Iti kamaudianan, napapatay dagiti amin nga arida; awan uray maysa kadakuada ti nagpatulong kaniak, a ni Yahweh."

\s5
\v 8 Nakikaddua ti Israel kadagiti dadduma a bunggoy dagiti tattao— maiyarig dagiti tattao iti naingpis a bibingka a naluto laeng ti bangirna--awan serserbida, nadadaelda.
\v 9 Inagaw dagiti tattao a naggapu iti adayo ti kinapigsa ti Israel. Lumaklakayen isuna ken agub-ubanen, ngem saanna nga ammo daytoy.

\s5
\v 10 Napalangguad unay ti Israel a makitkita daytoy dagiti amin a tattao. Uray no kasta, saandanto nga agsubli kaniak— a ni Yahweh a Diosda. Saandanto a padasen ti mangallukoy kaniak a kaasiak ida, aniaman ti mapaspasamak kadakuada.
\v 11 Maiyarig ti Israel iti maag a billit, maysa a kalapati a nalaka nga allilawen ti siasinoman. Awaganna nga umuna ti Egipto, ket kas iti billit, agtayab daytoy nga agturong idiay Asiria.

\s5
\v 12 Ngem inton addada iti dalan nga agturong sadiay, isarwagkonto ti iketko kadakuada, ibabakto ida a kas iti panangipababa ti mangnganop kadagiti billit manipud iti tangatang babaen iti iket. Dusaekto ida amin.
\v 13 Anian a nakabutbutengto daytoy kadagiti tattaok, gapu ta tinallikoddandak! Mataydanto gapu ta nagsukirda kaniak. Kayatko nga ispalaen ida, ngem itultuloyda ti agibagbaga kadagiti inuulbod a maibusor kaniak.

\s5
\v 14 Saanda nga umasug kaniak; saanda nga umawag kaniak manipud iti pusoda; agiddada laeng kadagiti pagiddaanda nga agas-asug ken agsangsangit. Sugatenda dagiti bagida tapno ipangag ida dagiti didiosenda, tapno makaawatda iti trigo ken baro nga arak manipud kadagiti diosda. Nagsukirda kaniak.
\v 15 Uray no sinursuruak ida ken tinulongak ida nga agbalin a napigsa, uray agingga ita ket agpangpanggepda nga agaramid iti dakes maibusor kaniak.

\s5
\v 16 Agturongda iti daytoy ken iti dayta a dalan, ngem saanda a pulos nga umay kaniak a Dios a Kangatoan. Maiyarigda iti bai ti pana a matukkol no maibiat daytoy. Mapapatayto dagiti opisialda babaen kadagiti kampilan dagiti kabusorda; mataydanto gapu ta pinabainandak. Daytoy ti gapuna a pabainanto ida dagiti tattao ti Egipto.”

\s5
\c 8
\p
\v 1 Kuna ni Yahweh, "Mangalakayo iti trumpeta ket puyotanyo daytoy. Adda dagiti kabusor a mangsipsippayot kadagiti tattaok kas iti agila a mangsipsippayot iti biktimana. Daytoy ket gapu ta tinallikudan dagiti tattaok ti katulagak kadakuada ket linabsingda ti linteg nga intedko kadakuada.
\v 2 Umaw-awag kaniak dagiti tataok nga Israelita a kunada, 'O Diosmi, napudno kami kenka!'
\v 3 Ngem linaksid dagiti tattao ti Israel ti naimbag, isu a kmatento ida dagiti kabusorda.

\s5
\v 4 Nangdutok ti Israel kadagiti arida, ngem saanda nga inyuman kaniak ti maipapan iti daytoy. Nangpilida kadagiti bukodda nga ari nga awan ti pammalubosko kadakuada. Innalada dagiti pirak ken balitokda ket inaramidda dagitoy a didiosen a pagdaydayawanda, ngem gapu iti daytoy matayto dagiti tattao."
\v 5 Kuna dagiti profeta, "Wen, linaksid ni Yahweh ti didiosenyo, dakayo a tattao ti Samaria-- maysa a didiosen a naaramid a sinan-baka!" Kuna ni Yahweh, “Nalabit a saanen a pulos a makaaramid dagitoy a tattao kadagiti banbanag a makaay-ayo kaniak. Makaungetak unay kadakuada!

\s5
\v 6 Ti kababain iti daytoy ket naggapu iti Israel daytoy a didiosen! Inaramid daytoy ti maysa a kumikitikit. Maysa laeng daytoy a didiosen; daytoy ket saan a mabalin a pudno ken sibibiag a Dios! Ipasiguradok nga addanto ti mangburak iti daytoy.
\v 7 Daytoy ket gapu iti panagaramid dagitoy a tattao iti awan serserbina a banbanag, isu nga addanto ti nakaam-amak a banag a mangdadael kadakuada. Awanto ti maapitda iti sitatakder a trigo kadagiti talon. Ket uray no adda maapitda, kanento amin dagiti ganggannaet a soldado dagiti amin nga ibungada.

\s5
\v 8 Dinadael dagiti dadduma a nasion ti bileg ti Israel. Ita, maiyarig ti Israel iti daan, naburak a banga nga awan iti mangayat.
\v 9 Nagkiddawda iti tulong iti ari ti Asiria; kaslada atap nga asno nga agkatangkatang nga agmaymaysa. Pinadas dagiti tattao ti Israel ti nangtangdan kadagiti sabali a nasion tapno mangsalaknib kadakuada.
\v 10 Uray no aramidenda daytoy, ummungekto ida iti mabiit tapno dadaelek ida. Mangrugidanto nga agbalin a nakurapay gapu ta kasapulan nga agbayadda iti ari ti Asiria.

\s5
\v 11 Nangbangon dagiti tattao ti Efraim kadagiti adu nga altar a pagidatonanda gapu kadagiti basbasolda; nupay kasta, nagbalin dagitoy nga altar a lugar a nagaramidan dagiti tattao iti nakaro a basol kaniak.
\v 12 Uray no insuratko dagiti lintegko iti maminsangapulo a ribu a daras kadagiti tattao ti Israel, agkedkedda nga agtulnog kadagitoy. Ibagadanto a saanda pay a nangngegan dagitoy.

\s5
\v 13 Panunotentayo koma ti maipapan kadagiti daton nga it-itedda kaniak. Idatonda ti karne ket kalpasanna kanenda daytoy; ngem Siak a ni Yahweh, ket saanak a maragsakan kadagidiay a daton. Lagipekto dagiti basbasolda ket dusaekto dagiti tattao gapu kadagitoy. Pagsubliekto ida idiay Egipto.
\v 14 Ket apay a napasamak daytoy? Linipatdak dagiti tattao ti Israel, ti Dios a namagbalin kadakuada a maysa a nasion. Imbes a daydayawendak, nangipatakderda ketdi kadagiti dadakkel a pagtaengan a pagnaedanda. Ket imbes nga agdaydayawda kenni Yahweh, nangipatakder ketdi dagiti tattao ti Juda kadagiti pader iti aglawlaw dagiti siudadda para iti pannakasalaknib. Daytoy ngarud ti aramidekto, Siak a ni Yahweh: Mangiyegakto iti apuy a mangdadadelto kadagiti amin a palasioda ken kadagiti amin a nasarikedkedan a siudadda."

\s5
\c 9
\p
\v 1 Kastoy ti kuna ni Oseas: Saankayo nga agragsak, O Israel; saankayo nga agrambak a kas kadagiti dadduma a bunggoy dagiti tattao! Nagbalinkayo a saan a napudno iti Diosyo. Nagkedkedkayo a mangaramid iti imbagana kadakayo. Kadagiti amin a lugar a pagirikan dagiti tattao iti trigoda, mangtedkayo kadagiti daton ken sakripisisyo kadagiti didiosen. Maiyarigkayo kadagiti lallaki nga agbayad tapno makikaidda kadagiti babbai.
\v 2 Ita, awanton ti umanay a trigo wenno arak a maipakan kadagiti tattaoyo. Saankayton mangnamnama a maddaan iti baro nga arak, ta saanen nga agbunga dagiti ubasyo.

\s5
\v 3 Saanton nga agtultuloy nga agnaed dagiti tattao ti Israel iti daga a pinili ni Yahweh a kukuana. Ngem ketdi, iti maysa nga aldaw ket agsublidanto idiay Egipto. Ket idiay Asiria, mangandanto kadagiti taraon nga imparit ti Dios a kanenda.
\v 4 Awanton ti maibukbokda nga arak a maidaton kenni Yahweh; saanton a makaay-ayo kenkuana dagiti datonda. Saanto a maikari iti Dios dagiti datonda a kas iti taraon a kankanen dagiti tattao iti pagminatayan; ket amin a mangan iti dayta a taraon ket agbalin a saan a maikari iti Dios. Daytanto laeng ti kanenda a taraon; saandanto a mabalin nga ipan daytoy iti balay ni Yahweh tapno idatonda daytoy kenkuana.

\s5
\v 5 Sadiay, iti pagilian nga adayo iti pagtaenganyo, saankayonton a makapagrambak kadagiti fiesta nga imbilin ni Yahweh a rambakanyo.
\v 6 Kitaenyo! No aglibaskayo ket saandakayo a patayen dagiti taga-Asiria, tiliwendakayonto ti armada ti Egipto. Mataykayonto sadiay ket itabondakayonto dagiti tattao iti siudad ti Memfis. Agbalinto amin a kasla let-ang dagiti kinabaknangyo a pirak kasta met dagiti balayyo.

\s5
\v 7 Daytoyen ti tiempo a dusaennakayo ti Dios; dimtengen ti tiempo a singirennakayo ti Dios iti tunggal basol nga inaramidyo. Ket dakayo amin a tattao ti Israel, masapul a maamirisyo a mapasamakto dagitoy a banbanag. Isu a maag dagiti palso a profetayo ken pudno nga agmauyong dagiti impagarupyo a pinabileg ti Dios. Daytoy ket gapu ta nagbasolkayo unay ken gapu ta nagbalinkayo a kabusor ni Yahweh.

\s5
\v 8 Dagiti pudno a profeta ket agbanbantay kadagiti tattao ti Israel ket adda ti Diosko kadakuada. Ngem iti sadinoman a papananda, adda dagiti mangpalpalab-og kadakuada; uray iti templo ti Diosda, kagura ida dagiti dadduma.
\v 9 Rinugitan dagiti tattao dagiti bagbagida iti panagbasbasolda a kas iti inaramid idi dagiti Israelita idiay Gabaa. Saanto a malipatan ti Dios dagiti nadangkes a banbanag nga inaramidda; awan dua-dua a dusaennanto ida.

\s5
\v 10 Kuna ni Yahweh, "Idi nasarakak ti Israel, kayariganna daytoy ti maysa a tao nga agbirbirok kadagiti pinuon ti ubas, nga agtubtubo idiay let-ang. Idi nakitak dagiti kapuonanyo, kayariganda dagiti umuna a bunga ti igos nga agparang iti tiempo ti panagbubunga iti kabaroan a kayo ti igos. Ngem idi dimtengda iti Bantay Peor, impaayda a naan-anay dagiti bagbagida iti dayta a makarimon a didiosen a ni Baal ket nagbalinda a narugit a kas iti didiosen nga inayatda.

\s5
\v 11 Ti dayaw ti Efraim ket mapukawto a kas iti billit a tumayab a pumanaw. Saankonton a pagpasngayen dagiti babbai, awanton ti babai nga agsikog ken awanton ti agnginaw.
\v 12 Uray no agpadakkelda kadagiti saanda a bukod nga annak, ipanawkonto ida kadagiti innada. Daytoyto ti karirigatan a mabalin a mapasamak kadakuada, inton baybay-ak ida!

\s5
\v 13 Nakitak dagiti tattao ti Israel; kaiyariganda ti Tiro; naiyarigda iti kayo a naimula iti napintas a tanap. Ngem kapilitan nga ipandanto dagiti annakda kadagiti kabusorda, a mangpapatay kadakuda."
\v 14 Kuna ni Oseas, O Yahweh, ikkam ida— ania ti rumbeng nga itedmo kadakuada? Ikkam ida iti aanakan a maalisan, ken saanmo a patubbogen ti suso dagiti innada tapno awan iti maipasusoda kadagiti maladaga.

\s5
\v 15 Kuna ni Yahweh, "Gapu kadagiti amin a nadangkes a banbanag nga inaramid dagiti tattaok idiay Gilgal, sadiay ti nangrugiak a nanggura kadakuada. Ken gapu kadagiti amin a kinadakes nga inaramidda, papanawekto ida iti lugar a pagnanaedanda. Saankonton ida nga ayaten; karangetdak dagiti amin nga opisialda.

\s5
\v 16 Maiyarig ti Efraim iti lanut ti ubas a nagango ken saan nga agbunga. Uray no aganakda, papatayekto dagiti ubbing nga ay-ayatenda."
\v 17 Kuna ni Oseas, Linaksid ti Diosko dagiti tattao ti Israel gapu ta saanda a nagtulnog kenkuana ket agalla-alladanto kadagiti pagilian.

\s5
\c 10
\p
\v 1 Maiyarig ti Israel iti lanut ti ubas nga agbunga iti adu a rinaay. Ngem bayat nga immad-adu dagiti bungada, ad-adda a bumakbaknangda. Babaen iti dayta a kuarta nakaipatakderda pay iti ad-adu nga adigi a bato a kas pammadayaw kadagiti didiosenda.
\v 2 Manangallilaw ken saanda a mapagtalkan; ngem dimtengen ti tiempo a masapul nga agsagabada gapu kadagiti basbasolda. Burakento ni Yahweh dagiti altarda-- dagiti lugar a pagdatdatonanda kadagiti didiosenda, ken inkarina pay a dadaelenna dagiti nasagradoan nga adigi a pagdaydayawanda kadagiti palso a diosda.

\s5
\v 3 Kunada, "Awanen ti arimi ita gapu ta saankami a nagdayaw wenno nagraem kenni Yahweh. Ngem uray no addaankami iti ari, kasano a matulungannakami ti maysa nga ari?"
\v 4 Nagkari iti inuulbod ken saan a pudno ti pannakitulag dagiti tattao ti Israel; ken gapu ta saanda a tinungpal dagiti karida, ti killo a hustisiada ket agpapatay kadagiti tattao a kas iti aramiden dagiti makasabidong a ruot iti talon.

\s5
\v 5 Agtigerger iti buteng dagiti tattao ti Samaria gapu iti napasamak kadagiti sinan-urbon a baka a didiosen idiay Bet-Aven. Agladladingit dagiti tattao iti napasamak kadagiti didiosen, kasta met dagiti papadi a nagserbi kadakuada; nagrag-oda kadagitoy ken dinayawda ti kinapintasda, ngem ita, naipanaw dagiti didiosen kadakuada.
\v 6 Maipanto dagiti didiosenda idiay Asiria tapno agbalin a sagut iti nabileg nga ari. Maibabainto dagiti tattao ti Israel; mabaindanto gapu ta nagtalekda iti pammagbaga a naawatda babaen iti pannakiumanda kadagiti didiosen.

\s5
\v 7 Matayto ti ari ti Samaria. Kaiyarigannanto ti maysa a bassit a pidaso ti kayo a tumtumpaw a maiyanod iti waig.
\v 8 Madadaelto amin dagiti lugar a nalatak gapu iti kinadakesda— dagiti altar a nagdaydayawan dagiti tattao kadagiti didiosen. Agtubonto dagiti sisiit ket abbongannanto amin dagiti altar nga adda idiay Samaria. Agpakaasinto dagiti tattao kadagiti bantay ket kunada, "Lingedandakami!" ken ibagada kadagiti turod, "Gaburandakami!"

\s5
\v 9 Tattao ti Israel, agbasbasolkayon sipud pay kadagiti aldaw ti Gabaa; kasla agnanaekayo pay laeng sadiay sipud idi. Rinaut dagiti kabusor dagiti kapuonanyo idiay Gabaa.

\s5
\v 10 Kuna ni Yahweh, "Inton agtignayak, dusaekto ida. Agguumongto dagiti bunggoy ti tattao a makiranget kadakuada; tiliwento ida dagiti bunggoy ti tattao ken ikawardanto ida gapu kadagiti adu a basbasolda.
\v 11 Maiyarig ni Efraim iti nasursuroan nga urbon a baka a pagay-ayatna iti agirik ti trigo, ti panangisina iti trigo manipud iti taep, ken saanko nga inikkan iti nadagsen a sangol ti napintas a teltelna. Ngem ita, ikabilkon ti Efraim iti dayta a sangol, ket masapul nga agarado ti Juda ken masapul a burburen ti Jacob ti daga babaen iti suyod.

\s5
\v 12 Agaradokayo itan, ken aramidenyo ti umno, ket apitenyonto ti bunga ti napudno nga ayat. Aramidenyo ti narigat a trabaho a mangarado iti saan a naarado a daga, ta itan ti tiempo a dumawatkayo iti asi kenni Yahweh, tapno umay ket ispalennakayo gapu ta ar-aramidenna ti umno.
\v 13 Nagbasolkayo a sidadangkes ket ita lak-amenyo dagiti bungana. Nagulbodkayo, ket ita sagabaenyo ti nagbanagan ti kinaulbod nga imbagayo. Nagtalekkayo kadagiti bukodyo a kabaelan ken kinasirib, ken nagtalekkayo kadagiti soldado iti armadayo.

\s5
\v 14 Ti kanalbuong ti gubat ket addanto kadagiti tattaoyo; madadaelto amin dagiti nasarikedkedan a siudadyo. Kaslanto idi dinadael ni Salmana ti Bet-Arbel iti gubat, idi napapatay dagiti inna bayat nga ub-ubbaenda dagiti annakda.
\v 15 Kastanto ti mapasamak kadakayo, dakayo a tattao iti siudad ti Betel gapu kadagiti dakes a banbanag nga inaramidyo. Inton mangrugi ti gubat iti parbangon, madadaelto ti ari ti Israel; papatayento isuna ti kabusor."

\s5
\c 11
\p
\v 1 Kuna ni Yahweh, "Idi ti nasion ti Israel ket kasla maysa nga agtutubo, inayatko isuna. Isuna ket kasla maysa nga anak kaniak, nga inayabak manipud idiay Egipto.
\v 2 Ngem no ad-adda nga ay-ayabak ida, ad-adda met nga umad-adayoda kaniak. Inaldaw nga agidatonda kadagiti sagutda kadagiti didiosen a managan ti Baal, ken nagpuorda kadagiti insenso a pangdayaw kadakuada.

\s5
\v 3 Ngem siak ti nangisuro kadakuada nga agaramid kadagiti amin a naimbag, a kas iti maysa nga ama a mangisursuro iti anakna a magna. Kaslaak maysa nga ama, a mangkibkibin kadagiti babassit a takkiagda. Ngem saanda a naawatan a siak ti mangay-aywan kadakuada.
\v 4 Tinarabayko ida babaen iti asi, indalanko ida babaen iti panangipateg. Kasta unay ti panagayatko a nangtarabay kadakuada ken indalanko ida babaen iti bukodko nga ima. Nagtrabahoda iti nadagsen, a kas iti sangol ti baka a mangguyguyod iti arado, ngem pinalag-anko ti sangolda ken pinalukayak ti bosal kadagiti sangida, tapno saanda a sagabaen ti ut-ot.

\s5
\v 5 Ngem awan duadua nga agsublinto ti Israel idiay Egipto, ken awan duadua nga iturayanto ida ti Asiria, gapu ta nagkedkedda nga agsubli ken agdayaw kaniak a kas Diosda.
\v 6 Rautento dagiti kabusorda dagiti siudad ti Israel babaen iti kampilan; dadaelento dagiti kabusorda dagiti balunet a mangserserra ken mangpatpatalged kadagiti ruanganda. Dadaelento dagiti kabusorda dagiti tattao ti Israel ken pasardengenda dagiti amin a pinanggepda.
\v 7 Desidido dagiti tattaok nga umadayo kaniak. Agpammarangda nga umawag kaniak, a Kangatoan a Dios, ngem awanto a pulos ti palubosak a mangtulong kadakuada.

\s5
\v 8 Ngem dakayo a tattao ti Israel— patgek nga Israel— saankayo a mabaybay-an. Saankayo a maiyawat kadagiti kabusoryo. Saanko a kayat nga aramiden kadakayo ti kas iti inaramidko iti Adma wenno pagbalinenkayo a kas ti Zeboim—dagiti siudad a dinadaelko a pakairamanan ti Sodom. Saankayon a dusaen; sipapasnekak a mangngaasi kadakayo.
\v 9 Inkeddengko a saankayon a dusaen iti nakaro. Saanko a kayat a dadaelenkayo a tattaok iti Israel, nga ay-ayatek. Nalaka kadagiti tattao ti agikeddeng nga aramiden dayta, ngem Siak ket Dios, saanak a tao. Siak ti Nasantoan nga agnanaed kadakayo; saanak nga umay ken makapungtot kadakayo.

\s5
\v 10 Agbiagdanto a sumursurot kadagiti bilinko. Agngerngerakto a kas iti leon. Ket inton agngerngerak, mangngegto dagiti tattaok ket umaydanto nga agtigtigerger. Agsublidanto kaniak manipud iti adayo— manipud iti daya ket agsublidanto kaniak.
\v 11 Umaydanto nga agpaypayakpak iti daga a kas kadagiti pangen dagiti billit nga aggapu idiay Egipto. Ket kaslanto kadagiti kalapati dagiti dadduma a sumangpet nga aggapu idiay Asiria. Palubosakto ida nga agnaed manen kadagiti pagtaenganda, iti daga ti Israel. Siak a ni Yahweh, inkarik daytoy"

\s5
\v 12 Nagtultuloy a nagul-ulbod kaniak dagiti tattao ti Israel. Ngem agtultulnog latta kaniak dagiti tattao ti Juda ken napudnoda kaniak, a Nasantoan."

\s5
\c 12
\p
\v 1 Ar-aramiden laeng dagiti tattao ti Israel ti awan serserbina; ar-aramidenda laeng dagiti banbanag a makadadaelto kadakuada. Ad-adda ti panagul-ulbodda; ad-adda ti panagar-aramidda iti kinaranggas. Makitulagda iti Asiria, ken agipatulodda kadagiti lana ti olibo idiay Egipto, tapno allukoyenda dagitoy a nasion a mangsalaknib kadakuada.
\v 2 Pabpabasolen pay ni Yahweh dagiti tattao ti Juda iti saanda a panangtungpal iti katulaganna. Dusaennanto dagiti kaputotan ni Jacob gapu iti inaramidda. Dusaennanto ida; itednanto ti maiparbeng kadakuada.

\s5
\v 3 Idi adda ni Jacob iti aanakan ti inana, iniggamanna ti mukod ti kabsatna a ni Esau gapu ta kayatna nga agawen ti lugar ti kabsatna ket agbalin isuna nga inauna. Idi dimmakkelen ni Jacob, nakigubal isuna iti Dios.
\v 4 Idi nagparang ti anghel kenkuana, kinaginnubalna ket nagballigi isuna. Nagsangit ni Jacob iti anghel ket nagpakaasi kenkuana a bendisionanna isuna. Nasarakan ni Jacob ni Yahweh idiay Betel; ket sadiay a nakisao ni Yahweh kenkuana.

\s5
\v 5 Daytoy ni Yahweh, ti Dios a Mannakabalin-amin! "Yahweh" ti nagan a rumbeng a pangdaydayawytayo kenkuana.
\v 6 Agsublikayo iti Diosyo! Agtulnogkayo iti katulaganna ken aramidenyo iti umno. Saankayo a pulos nga agsardeng nga agtaltalek iti Diosyo a mangtulong kadakayo.

\s5
\v 7 Nadangkes dagiti aglaklako; agusarda kadagiti pagtimbangan a saan a husto ti pagrukodna, tapno masaurda dagiti gumatang kadakuada.
\v 8 Agpasindayag dagiti tattao ti Israel, "Nakabakbaknangkami ket nakasarakkami kadagiti wagas nga ad-adda pay a mangpabaknang kadakami ngem iti kasasaadmi ita. Iti amin a panaggatgatang ken panaglaklakomi, awan ti makita ti siasinoman a biddut nga ar-aramidenmi."

\s5
\v 9 Ngem kuna ni Yahweh, "Siak ni Yahweh, a rumbeng a daydayawenyo; siak ti nangiruar kadagiti kapuonanyo manipud Egipto. Papanawenkayo kadagiti pagtaenganyo ket pagnaedenkayo manen kadagiti tolda a kas iti panagnaedyo kadagiti tolda iti sumagmamano nga aldaw iti tunggal tawen no agrambakkayo iti Fiesta dagiti Abong-abong.
\v 10 Adu a daras a nagsaoak kadagiti profeta ken inikkak ida kadagiti mensahe, tapno ibagada kadakayo; ken nangipakitaak kadakuada iti adu a sirmata para kadakayo, ken inikkak ida kadagiti pangngarig tapno isaritada kadakayo."

\s5
\v 11 Kuna dagiti profeta a no pudno a nadangkes dagiti tattao idiay rehion ti Galaad, ket awan duadua nga awan met serserbida! Idiay Gilgal, mangpatayda kadagiti bulog a baka ket idatonda dagitoy kadagiti didiosenda; ngem marebbanto dagitoy nga altar ket agbalinto a gabsuon dagiti batbato kadagiti talonda.
\v 12 Nagkamang ni Jacob iti daga ti Aram; isuna a baliwanto ti Dios ti naganna iti Israel, ket nagtrabaho iti adu a tawen tapno makaasawa. Inaywananna dagiti karnero ti ulitegna tapno maasawana ni Raquel.

\s5
\v 13 Inusar ni Yahweh ni Moises a profeta a mangiruar iti Israel manipud Egipto, ket inaywananna ida babaen iti profeta a nangidaulo kadakuada.
\v 14 Pinagpungtot dagiti tattao ti Israel ni Yahweh; kuna ti Apoda a nagbasolda iti ipapatay dagiti adu a tattao, ken ti basolda ket agtalinaed kadakuada. Dusaennanto ida gapu ta linaisda isuna kadagiti nakababain nga aramidda.

\s5
\c 13
\p
\v 1 Kuna ni Yahweh, "Idi nagsao dagiti mangidadaulo ti Israel, nagtigerger dagiti tattao; mararaemda idiay Israel. Ngem gapu ta nagdaydayawda amin kenni Baal, nagbasolda ket natayda.
\v 2 Ita ad-adda pay ti panagbasolda; nangsukogda kadagiti landok nga imahen manipud iti pirak tapno aramidenda a didiosenda. Dagitoy a didiosen ket dagiti estatua a napintas iti pannakaaramidna, ngem inaramid laeng dagitoy dagiti agkitkitikit. Ngem makitkita dagiti dadduma a tattao a dagiti lallaki ti Israel ket agidatdatonda kadagitoy a sinan-baka a didiosen ken umagepda a mangdayaw kadagitoy.

\s5
\v 3 Isu nga agpukawto dagiti tattao ti Israel a kas iti dagus a panagpukaw dagiti ulep iti agsapa, a kas iti dagus a panagpukaw ti linnaaw, no mainitan daytoy. Agpukawdanto a kas iti alisto a panagpukaw ti taep a maiyangin manipud iti pagirikan. Agpukawdanto a kas iti kapartak a panagpukaw ti asuk a rumuar iti simborio.

\s5
\v 4 Ngem siak ni Yahweh, a rumbeng a daydayawenyo; siak ti nangiruar kadakayo manipud iti daga ti Egipto. Masapul a saankayo nga agdaydayaw iti sabali a Dios; masapul a siak laeng ti dayawenyo. Awanen ti sabali pay a makaispal kadakayo.
\v 5 Inaywanankayo idiay let-ang, iti disierto nga awan iti mainom a danum.
\v 6 Idi nangipaayak iti taraon para kadakayo, nangankayo agingga a kaykayatyo ket nabsugkayo. Ngem idi saankayon a mabisin, nagbalinkayo a napalangguad ket linipatyo iti maipapan kaniak.

\s5
\v 7 Isu a darupenkayonto a kas iti panagdarup iti maysa a leon; darupenkayto a kas iti maysa a leopardo nga agur-uray iti igid ti dalan a kellaat a mangtukma iti maysa nga agdaldaliasat.
\v 8 Umayakto a maibusor kadakayo a kas iti maysa a babai nga oso no adda nangtakaw kadagiti annakna, ket burayrayakto dagiti barukongyo. Kas iti leon a dumardarup— kas iti panangrangkay kadakayo iti maysa nga atap nga ayup.

\s5
\v 9 Dakayo a tattao ti Israel, madadaelkayonto gapu ta nakirangetkayo kaniak— a maibusor iti makatulong kadakayo. Awanen iti ariyo a makaisalakan kadakayo iti aniaman kadagiti siudadyo.
\v 10 Awanen iti uray maysa kadagiti mangiturturay kadakayo a kiniddawyo kaniak nga itedko kadakayo.
\v 11 Idi inikkankayo iti ari, intedko isuna kadakayo idi nakaungetak kadakayo. Ket gapu ta nakaungetak kadakayo, innalak dagiti ariyo.

\s5
\v 12 Nakitak dagiti amin a nadangkes nga aramid nga inaramidyo a tattao ti Israel; inlistak dagiti amin a basbasolyo.
\v 13 Kaslakayo maladaga a nakasagana a maipasngay, ngem maagkayo, gapu ta kaslakayo iti ubing nga agkedked a maipasngay.

\s5
\v 14 Salaknibankayo kadi manipud iti ipapatay? Ispalenkayo kadi manipud iti ipapatay? Saan! Baybay-ankayo a matay, baybay-ankayo a mapukaw. Awanen ti nabati nga asik kadakayo."

\s5
\v 15 Kuna ni profeta Oseas, "Uray no nabakbaknangkayo a tattao ti Israel ngem kadagiti taga-Juda, umadanin ti aldaw a dadaelenakayonto ni Yahweh. Mapadasanyonto ti didigra. Alaento dagiti kabusoryo dagiti amin a napapateg a banag manipud kadakayo.

\s5
\v 16 Nagbasol dagiti tattao iti siudad ti Samaria gapu ta nagsukirda iti Dios. Papatayento ida dagiti kabusorda babaen kadagiti kampilan. Ipuruakdanto dagiti annakda iti daga ket patayenda ida; burayrayandanto dagiti masikog a babbaida."

\s5
\c 14
\p
\v 1 Israel, agsublikayo kenni Yahweh a Diosyo! Nagbasolkayo gapu ta nagaramidkayo kadagiti nadangkes a banbanag.
\v 2 Isu nga ita, agsublikayon kenni Yahweh, ket panunotenyo no kasano nga ipudnoyo dagiti basbasolyo kenkuana. Ibagayo daytoy kenkuana: "Pakawanem amin dagiti basbasolmi, ket awatennakami; pangngaasim ta maasika kadakami. Pangngaasim ta awatennakami manen, tapno idaydayawdaka kadagiti sasao ken kankantami.

\s5
\v 3 Saannakami a maisalakan ti Asiria. Awan serserbina kadakami ti agsakay kadagiti kabalio a mapan iti gubatan. Saanminto pulos nga ibaga, 'Dakayo dagiti diosmi' kadagiti didiosen nga aramid dagiti imami. Uray dagiti ubbing nga awanan kadagiti amma ket agkamangda kenka, O Yahweh ket masarakanda a naasika kadakuada."

\s5
\v 4 Kuna ni Yahweh, "Pakawanekto dagitoy a tattao iti panangtallikodda kaniak, ken ayatekto ida iti saan nga agpatingga gapu ta inkeddengkon a saanakon nga agunget kadakuada.
\v 5 Tulongakto dagiti tattao ti Israel a kas iti panagtultulong ti linnaaw iti daga. Rumang-aydanto a kas iti panagsabong dagiti lirio. Agbalindanto a natibker a kas kadagiti kayo ti sedro idiay Libano.
\v 6 Maiyarigdanto kadagiti kayo a rumangpaya dagiti sangada. Napintasdanto kas iti kinapintas dagiti kayo ti olibo, ket maay-ayonto dagiti dadduma a tattao a kas iti kinabanglo dagiti kayo a sedro idiay Libano.

\s5
\v 7 Agsublidanto ken agnaeddanto iti salinongko ket salaknibakto ida manipud iti pakarigatanda. Lumangtodanto a kas kadagiti trigo iti talon a dumakkel, kas kadagiti ubas a dumakkel a nasayaat. Agbalindanto a nalatak a kas iti arak nga ar-aramiden dagiti tattao idiay daga ti Libano.
\v 8 Kunanto dagiti tattao ti Israel, 'Awanen ti pakasapulanmi kadagiti didiosen!' Siak, a ni Yahweh, ti mangaywanto kadakayo. Awan ti didiosen a makaaramid iti dayta. Maiyarigakto iti kayo a saleng nga agtubo ken agtalinaed a nalangto iti makatawen; aggapu kaniak dagiti amin a naimbag a sagutyo."

\s5
\v 9 Maawatanto ti tunggal nasirib a tao ti maipapan kadagiti banbanag nga insuratko; dagiti addaan iti pannakaawat ket adalennanto dagitoy a banbanag ket ipangagnanto a nasayaat dagitoy. Ti wagas a kayat ni Yahweh a panagbiagtayo ket nalinteg. Dagiti agaramid iti nalinteg ket pagbiaganna dagitoy. Nupay kasta, dagiti nasukir a tattao, agbasolda ket saanda nga agtulnog kenkuana.