ilo_udb/26-EZK.usfm

\id EZK
\ide UTF-8
\h Ezekiel
\toc1 Ezekiel
\toc2 Ezekiel
\toc3 ezk
\mt Ezekiel

\s5
\c 1
\p
\v 1-2 "Siak ni Ezekiel, idi agtawenak ti tallopulo, nakipagnaedak kadagiti Israelita iti igid ti Karayan Kebar nga adda iti abagatan ti Babilonia. Impanawdakami dagiti taga-Babilonia manipud iti daga ti Juda ket inyegdakami ditoy. Iti maikalima nga aldaw ti maikapat a bulan iti dayta a tawen, kasla naglukat ti tangatang ket nakitak dagiti sirmata manipud iti Dios. Iti maikalima nga aldaw ti maikapat a bulan iti agarup lima a tawen kalpasan iti pannakaipanaw ni Ari Jehoyakin a kas balud."
\v 3 Inted ngarud ti Dios dagiti mensahe kenni Ezekiel a padi a putot a lalaki ni Buzi idiay Babilonia kabayatan ti kaaddana iti igid ti Karayan Kebar. Immay kenkuana sadiay ti pannakabalin ni Yahweh.

\s5
\v 4 Iti maysa kadagiti sirmata, nakitak ti alipugpog a naggapu ti amianan. Adda nakapuspuskol nga ulep, ken awan sardeng ti panagkimkimat iti tengnga daytoy, ken adda naraniag a lawag a nanglikmut iti ulep. Iti tengnga a paggilgilapan ti kimat, adda apuy a maris bronse.
\v 5 Iti tengnga ti bagyo, nakitak ti langa ti uppat a sibibiag a parsua. Aglanglangada a kasla tattao,
\v 6 ngem tunggal maysa kadakuada ket addaan iti uppat a rupa ken uppat a payak.

\s5
\v 7 Kasla gurong ti tao dagiti gurongda, ngem dagiti sakada ket aglanglanga a saka dagiti baka a kasla napasileng a bronse.
\v 8 Kadagiti uppat a sikiganda iti sirok dagiti payakda, ket adda kasla ima ti tao.
\v 9 Bayat a nakatakder sadiay dagiti uppat a parsua, nagpormada iti patimbukel a nagsisinnagid ti murdong dagiti payakda. Saanda nga agpusipos no kasta nga umakarda; maymaysa ti turongda.

\s5
\v 10 Tunggal maysa kadagiti parsua ket addaan iti uppat a rupa. Iti sango ket adda rupa a kalanglanga ti tao. Ti rupa nga adda iti kannawan ket kalanglanga ti leon. Ti rupa nga adda iti kannigid ket kalanglanga ti baka. Ti akin-likud a rupa ket kalanglanga ti agila.
\v 11 Nakangato ti agparis a payak ti tunggal parsua ken nagsisinnagid ti murdong dagiti payak ti agsumbangir a sikigan dagiti parsua. Nakababa met dagiti sabali pay nga agparis a payak ti tunggal parsua a naiyabbong kadagiti bagida.
\v 12 Maymaysa ti turong dagiti parsua iti aniaman a pangiturongan ti Espiritu ti Dios, a mangiturong iti sadinoman a kayatna a papananda, a saanda a balbaliwan ti turongda bayat iti panagakar-akarda.

\s5
\v 13 Kasla beggang wenno pagsilawan dagiti uppat a parsua. Adda kasla gumilgil-ayab nga apuy nga agalis-alis iti tengnga dagiti parsua, ken agkanabsiit a kimat ti aggapgapu kadakuada.
\v 14 Nakaparpardas unay ti panagsublisubli dagiti parsua, isu a kaslada rimat ti kimat.

\s5
\v 15 Bayat iti panangmatmatko kadagiti uppat a sibibiag a parsua, nakitak ti maysa a pilid a simmagid iti daga iti abay ti tunggal maysa kadakuada.
\v 16 Agpapada dagiti pilid, ken nasileng amin dagitoy a kas iti napateg a bato. Tunggal pilid ket adda kasla naipasukot iti unegna a maysa pay a pilid.

\s5
\v 17 No kasta nga umakarda, maysa laeng ti turongenda kadagiti uppat a direksion a sinangoda; saanda nga agturong iti sabali a direksion bayat iti panagakarda.
\v 18 Nakaskasdaaw ken nakabutbuteng dagiti rueda dagiti pilid, ken napakalupkopan dagitoy kadagiti mata.

\s5
\v 19 No kasta nga umakar dagiti sibibiag a parsua, maisurot met kadakuada dagiti pilid. Isu a tunggal agpangato dagiti parsua manipud iti daga, agpangato met dagiti pilid.
\v 20 Sadinoman a pagiturongan ti Espiritu ti Dios kadagiti parsua, iti kayatna a pangipanan kadakuada, idiay ti turongenda; ken maisurot met dagiti pilid kadakuada, gapu ta ti espirituda ti mangiturturong kadagiti pilid.
\v 21 Tunggal umakar dagiti parsua, umakar met dagiti pilid. Tunggal agsardeng dagiti parsua, agsardeng met dagiti pilid. Tunggal agpangato dagiti parsua manipud iti daga, maisurot met kadakuada nga agpangato dagiti pilid.

\s5
\v 22 Iti ngatoen ti ulo dagiti parsua, adda kasla pimmag-ong nga atep. Sumilap daytoy a kas iti kristal, ken nakapinpintas daytoy.
\v 23 Iti sirok ti pimmag-ong nga atep, inyukrad dagiti parsua dagiti payakda. Tunggal parsua ket addaan iti agparis a payak a naisagid iti murdong dagiti payak iti sikigan ti agsumbangir a parsua, ken adda pay agparis a payak a nangabbong iti mismo a bagi ti tunggal parsua.

\s5
\v 24 No kasta nga umakar dagiti parsua, aguni dagiti payakda a kasla daranudor dagiti dalluyon iti baybay. Kasla pay timek daytoy ti Mannakabalin-amin a Dios, ken kasla danapeg ti dakkel a bunggoy ti armada a magmagna. Tunggal agsardeng dagiti parsua iti daga, ibabada dagiti payakda.
\v 25 Bayat a nakatakderda iti daga a nakababa dagiti payakda, adda timek a naggapu iti pimmag-ong nga atep iti ngatoen dagiti uloda.

\s5
\v 26 Iti ngatoen ti pimmag-ong nga atep, adda kasla dakkel a trono a naaramid iti dakkel a safiro. Adda agtugtugaw iti trono a kalanglanga ti tao.

\s5
\v 27 Nakitak iti ngatoen ti siketna ti langana a kasla agbegbeggang a landok a kasla nakabarbara nga apuy ti adda iti uneg daytoy. Ket nakitak nga iti baba ti siketna ket adda nagraniag a lawag a nanglikmut kenkuana.
\v 28 Kasla bullalayaw daytoy a nagraniag kadagiti ulep no tiempo ti panagtutudo. Dayta ti naraniag a lawag a mangipakita iti presensia ni Yahweh. Idi nakitak daytoy, nagpaklebak iti daga, ket nangngegko a nagsao isuna!

\s5
\c 2
\p
\v 1 Kinunana kaniak, "Anak ti tao, tumakderka bayat a kasasaoka."
\v 2 Bayat a kasasaonak, simrek kaniak ti Espiritu ti Dios ket pinatakdernak. Ket nangegko isuna a nagsao kaniak.
\v 3 Kinunana, "Anak ti tao, ibaonka kadagiti Israelita. Isuda dagiti tattao a timmalikud ken nagsukir kaniak. Sinukirdak dagiti kapuonanda ken uray isuda a mismo ket agsuksukirda pay laeng kaniak.

\s5
\v 4 Kasta unay ti kinatangsit dagiti tattao a pangibaonak kenka. Ngem ibagam kadakuada, 'Kastoy ti kuna kadakayo ni Yahweh nga Apo.'
\v 5 Ket inton ibagam kadakuada dagiti mensahek, nalabit nga ipangag dagiti nasukir a tattao dagiti mensahek ken nalabit a saanda a denggen dagitoy; ngem maammoandanto a kaduada ti maysa a profeta!

\s5
\v 6 Ket sika, anak ti tao, saanka a rumbeng nga agbuteng kadakuada wenno agbuteng iti ibagada. Ti pannakipagnaedmo kadakuada ket arigna ti agnanaed iti kasisiitan wenno kadagiti manggagama, ngem saanka nga agbuteng kadakuada. Nasukirda a tattao ngem saanmo nga itulok a butbutngendaka.

\s5
\v 7 Ibagam kadakuada ti mensahek, ngem saanmo a namnamaen nga ipangagda daytoy, gapu ta nasukirda unay.
\v 8 Ngem anak ti tao, masapul nga ipangagmo ti ibagak. Saanka koma nga agbalin a nasukir a kas kadakuada. Ita, agngangaka ket kanem ti itedko kenka."

\s5
\v 9 Kalpasanna, bayat iti panangmatmatko, nakitak ti imana a naiyunnat iti sangoanak. Iggemna ti nalukot a pagbasaan.
\v 10 Inukradna daytoy. Naisurat iti agsumbangir daytoy dagiti sasao a nangiyebkas iti leddaang ken ladingit ken sasao maipapan iti riribuk.

\s5
\c 3
\p
\v 1 Kinunana kaniak, "Anak ti Tao, kanem daytoy nalukot a pagbasaan nga adda iti sangoanam. Ket mapanka makisarita kadagiti Israelita."
\v 2 Nagngangaak ngarud, ket intedna kaniak ti nalukot a pagbasaan tapno kanek daytoy.
\v 3 Ket kinunana kaniak, "Anak ti Tao, kanem ti nalukot a pagbasaan nga intedko kenka. Agbussogka." Kinnanko ngarud daytoy, ket kas kasam-it iti diro ti panagramanko iti daytoy.

\s5
\v 4 Ket kinunana kaniak, "Anak ti Tao, mapanka kadagiti Israelita ket ibagam ti mensahek kadakuada.
\v 5 Dagiti tattao a pangibabaonak kenka ket saan a dagiti tattao a narigat nga adalen ti pagsasaoda, ti pagsasao a saanmo a maawatan. Ibabaonka kadagiti tattaom nga Israelita.
\v 6 Ibabaonka kadagiti tattao a maawatam a nasayaat ti pagsasaoda. No ibaonka kadagiti tattao a narigatmo a maawatan ti pagsasaoda, mabalin nga ipangagda ti ibagam kadakuada.
\v 7 Ngem dagiti Israelita ket saanda a kayat ti dumngeg kenka gapu ta saanda a kayat ti dumngeg kaniak. Saanda a kayat ti dumngeg gapu ta nasusukirda amin.

\s5
\v 8 Ngem sika—pagbalinenka a natangsit ken natured a kas kadakuada.
\v 9 Patibkerenka a kas iti katatangkenan a bato, wen kas iti bato. Isu nga uray no nasusukirda a tattao, saanka nga agbuteng kadakuada; saanmo nga ipalubos a butbutngendaka.

\s5
\v 10 Kinunana pay kaniak, "Anak ti Tao, dumngegka a naimbag iti ibagak kenka, ken laglagipem a kanayon daytoy.
\v 11 Mapanka kadagiti padam nga Israelita nga agnanaed ditoy kalpasan iti pannakaipanawda a kas balud, ket kasaritam ida. Ibagam kadakuada, 'Kastoy ti kuna ni Yahweh nga Apo' ket ibagam ngarud ti mensahek kadakuada, kayatda man a denggen daytoy wenno pilienda ti mapukaw iti agnanayon."

\s5
\v 12 Ket iti sirmata, impangatonak ti Espiritu ti Dios, ket nangegko manipud iti likudak ti maysa a tao nga agsasao iti nakapigpigsa, a kas iti napigsa a ginggined. Adda nangngegko a nagkuna, "Madaydayaw ti nadayag nga Apotayo a ni Yahweh iti lugar a pagnanaedanna idiay langit!"
\v 13 Nangegko ti agririnnisiris a payak dagiti uppat a sibibiag a parsua, kasta met ti karadakad dagiti pilid nga adda kadagiti sikiganda. Nakapigpigsa nga uni a kas kapigsa iti ginggined.

\s5
\v 14 Impannak ti Espiritu iti adayo. Iti kaunggak, kasta unay a sakit ti nakem ken pungtotko, ket nariknak ti sibibileg a panangidurduron kaniak ni Yahweh.
\v 15 Dimtengak kadagiti naipanaw a kas balud a nagnaed iti ili ti Tel Abib nga asideg ti Karayan Kebar iti Babilonia. Ket, nakipagnaedak kadakuada iti las-ud ti pito nga aldaw. Nakigtotak kadagiti amin a naimatangak.

\s5
\v 16 Mapalabas ti pito nga aldaw, imbaga kaniak ni Yahweh daytoy a mensahe:
\v 17 "Anak ti Tao, dutokanka nga agbalin a kas iti agwanwanawan. Isu a dumngegka kadagiti mensahe nga ibagak kenka, ket ibagamto kadakuada dagitoy a mensahe a mangballaag kadakuada.
\v 18 Ibagak a no maipapan kadagiti dadduma a nadangkes a tattao, 'Awan duadua a mataydanto gapu kadagiti basolda,' no saanmo ida a ballaagan wenno ibaga kadakuada a masapul a tallikudanda ti kinadakesda no kayatda nga isalakan dagiti bibiagda, mataydanto gapu iti basolda, ket sungbatamto daytoy agsipud ta saanka a nagtignay tapno malapdan daytoy.
\v 19 Ngem no ballaagam dagiti nadangkes a tattao ket saanda a tinallikudan ti amin a kinadakesda, mataydanto gapu kadagiti basolda, ngem naispalmo ti bagim manipud iti pannusak.

\s5
\v 20 Kasta met, a no tallikudan dagiti nalinteg a tattao ti kinalintegda ken aramidenda dagiti dakes nga aramid, ipalak-amkonto dagiti dakes a banbanag a mapasamak kadakuada. Ngem masapul a ballaagam ida. No saanmo ida a ballaagan, no saanda nga isardeng ti kinamanagbasolda, mataydanto gapu kadagiti basolda. Saankonto a lagipen dagiti naimbag a banbanag nga inaramidda iti napalabas, ngem sika ti mangsungbat iti ipapatayda.
\v 21 Ngem no ballaagam dagiti nalinteg a tattao a saan nga agbasol ket saandan nga agbasol; awan duadua nga agtalinaedda a sibibiag gapu ta impangagdaka, ket naispalmo ti bagim manipud iti pannusak."

\s5
\v 22 Nariknak ti panangiturong ni Yahweh, ket nagsao isuna kaniak ket kinunana, "Agrubwatka ket mapanka iti patad a lugar, ket kasaritaka sadiay."
\v 23 Nagrubwatak ngarud ket napanak iti patad a lugar. Ket nakitak ti dayag ni Yahweh sadiay, a kas iti dayag a nakitak iti igid ti Karayan Kebar. Ket nagpaklebak iti daga.

\s5
\v 24 Kalpasanna, simrek kaniak ti Espiritu ti Dios ket pinatakdernak. Kinunana kaniak, "Mapanka iti balaymo ket agtalinaedka iti uneg.
\v 25 Reppetendakanto dagiti tattao, ket gapu iti dayta saankanto a makaruar a makipulapol kadagiti tattao.

\s5
\v 26 Uray no nasusukirda a tattao, idekketkonto ti dilam iti ngangawmo ket gapu iti dayta saankanto a makasao ken saanmonto ida a mababalaw.
\v 27 Ngem inton kasaritaka manen, pagsaoenkanto ket ibagam kadakuada, 'Kastoy ti ibagbaga kadakayo ni Yahweh nga Apo.' Ti mayat a dumngeg kaniak ket mangngegnakto, ngem matayto ti tao a saan a mangikankano iti mensahe, agsipud ta nasusukirda a tattao!"

\s5
\c 4
\p
\v 1 Intuloy ni Yahweh ket kinunana, "Anak ti tao, mangalaka iti dakkel a tapi ti pitak ket uged-ugedam ti rabaw daytoy a mangiladawan iti Jerusalem.
\v 2 Ket mangikur-itka kadagiti sinan-tao iti aglikmut daytoy a mangiladawan kadagiti kabusor a soldado a mangibangonto kadagiti patakder babaen iti daga ken sarikedked iti aglawlaw ti siudad tapno sakupenda daytoy. Mangikabilka kadagiti ladawan dagiti sinan- maso iti aglikmut daytoy.
\v 3 Kalpasanna, mangalaka iti pariok, ket ikabilmo daytoy nga agserbi a kas landok a bakud iti nagbaetam ken ti naikur-it a ladawan ti siudad. Ket sumangoka iti naikur-it a ladawan. Iladawan daytoy a dagiti bunggoy a kabusor ket palawlawandanto ti siudad tapno rautenda daytoy. Agserbinto dayta a ballaag kadagiti Israelita.

\s5
\v 4-5 Kalpasanna, agiddaka nga agsikig iti kannigidmo, ket agtalinaedka a kasta iti 390 nga aldaw. Sikanto ti mailadawan a mangbaklay ti pannusa gapu kadagiti basol dagiti Israelita, ti akin-amianan a pagarian; masapul a kasta ti panagiddam iti maysa nga aldaw para iti tunggal tawen a panangdusak kadakuada.

\s5
\v 6 Kalpasan dayta, agiddaka manen. Iti daytoy a kanito, agiddaka nga agsikig iti makannawanmo iti las-ud ti uppat a pulo nga aldaw. Dayta ti mangiladawan a dagiti tattao a taga-Juda, ti akin-abagatan a pagarian, ket madusadanto gapu kadagiti basolda, maysa a tawen ti katukad ti maysa nga aldaw a panagiddam sadiay.
\v 7 Sumangoka iti ladawan ti Jerusalem ket ileslesmo ti manggas ta badom a kas iti soldado nga agsagsagana a makiranget, ket ipadtom ti mabalin a mapasamak iti siudad.
\v 8 Saankanto a mabalin nga agballikid; kaslanto pinarautanka tapno saanka a makaballikid agingga a malpasmo nga iladawan ti adu a tawen a pannakalakub ti siudad.

\s5
\v 9 Sakbay nga aramidem dayta, mangalaka iti sumagmamano a trigo, sebada, bukbukel, patani, miho ken espelta; ket paglalaokem dagitoy iti maysa a pagkargaan a banga, ket daytanto ti lutoem a tinapaymo. Daytanto ti kanem iti las-ud ti 390 nga aldaw bayat nga agid-iddaka a nakasikig iti kannigidmo.
\v 10 Agarup dua gasut a gramo a tinapay ti kanem iti agmalem.
\v 11 Kasta met a mangsukatka iti agarup kagudua a litro ti danum nga inaldaw nga inumem iti agmalem.

\s5
\v 12 Kanem dayta a tinapay a kasla mangmanganka iti maysa nga iwa a sebada a tinapay. Ngem usarem ti namaga a rugitmo a pangluto iti tinapay bayat a buy-buyaendaka dagiti tattao.
\v 13 Daytanto ti mangipakita a mapilitanto a mangan dagiti Israelita kadagiti taraon a saan a makaay-ayo kaniak inton agnaedda kadagiti nasion a pangpilitak kadakuada a papananda."

\s5
\v 14 Ket kinunak, "Saan, Apo a Yahweh! Saannak a piliten a mangaramid iti dayta! saanko a pulos a tinulawan ti bagik tapno saanak a maikari iti imatangmo. Manipud iti kinaubingko, saanak pay a nangan ti karne iti aniaman nga ayup a natay wenno pinatay dagiti atap nga ayup. Ken saanak pay a nangan ti aniaman a karne a saan a maikari kenka."
\v 15 Insungbat ni Yahweh, "Gapu iti dayta, palubosanka a mangluto iti tinapaymo babaen iti namaga a rugit ti baka imbes a rugit ti tao iti panglutom."

\s5
\v 16 Ket kinunana kaniak, "Anak ti tao, paisardengkonton ti panangited ti taraon iti Jerusalem. Ket manganto dagiti tattao iti bassit a taraon ken uminondanto iti bassit a danum nga ited dagiti mangidadaulo kadakuada, ket kastanto unay ti pannakariribuk ken panagdanagda bayat nga ar-aramidenda dayta,
\v 17 gapu ta agkurangto ti danum ken taraon. Maimatanganto ti tunggal maysa kadakuada ti napalalo a panagkuttong ken panagkapsutda; ngem mapasamakto daytoy ta madusdusada gapu kadagiti basol nga inaramidda."

\s5
\c 5
\p
\v 1 "Ket sika, anak ti tao, inton irugim nga aramiden dagidiay a banbanag, mangalaka iti natadem a kampilan ket aramatem daytoy a kas iti labaha ti barbero a pangkuskosmo iti ulom ken iti barbasmo. Itimbangmo ti buok a nakuskosmo, ket pagkatloem dagiti buok iti agpapada a bingay.
\v 2 Inton malpas ti aldaw ti panangiladawanmo iti siudad a napalawlawan iti bunggoy dagiti kabusor, ikabilmo ti maysa a kakatlo ti buok iti uneg ti ladawan ti siudad ket puoram daytoy. Alaem ti maysa pay a kakatlo ti buok, iwarawaram daytoy iti aglawlaw ti ladawan ti siudad, ket putdem daytoy babaen iti kampilanmo. Iladladladawan dayta a duyokekto dagiti tattao ti Jerusalem babaen kadagiti kampilan dagiti kabusorda. Ket bay-am nga iwarawara ti angin ti sabali pay a kakatlo ti buok. Iladladawan dayta nga urayno no aglibasda manipud iti siudad, ipakamatkonto ida kadagiti kabusorda ket rautendanto ida babaen kadagiti kampilan.

\s5
\v 3 Ngem mangalaka ti bassit iti buokmo ket igalotmo dagitoy kadagiti manggasmo.
\v 4 Ket mangalaka pay iti bassit kadagidiay a buok, ipurruakmo iti apuy, ket puoram dagitoy. Iladladawan dayta nga agkayamkamto ti apuy manipud Jerusalem ket dadaelen daytoy dagiti banag iti entero nga Israel.

\s5
\v 5 Kastoy ti kunak, Siak a ni Yahweh nga Apo: Daytoy a ladawan ti mangibagi iti Jerusalem, ti siudad nga insaadko iti tengnga dagiti nasion, a napalawlawan kadagiti dadduma pay a nasion.
\v 6 Ngem nagsukir dagiti nadangkes a tattao ti Jerusalem ket sinalungasingda dagiti bilinko, ket impakitada a nadangkangkesda ngem kadagiti tattao nga adda kadagiti pagilian iti aglawlawda. Linaksidda dagiti lintegko ket nagkedkedda nga agtulnog kadagiti bilinko.

\s5
\v 7 Ngarud, kastoy ti kunak, Siak a ni Yahweh nga Apo: Dakayo a tattao ti Jerusalem, nasuksukirkayo pay ngem dagiti tattao kadagiti nasion iti aglawlawyo; saankayo a nagtulnog iti aniaman kadagiti lintegko. Saankayo a nagtulnog uray kadagiti linteg dagiti nasion iti aglawlawyo!
\v 8 Ngarud, kastoy ti kunak, Siak a ni Yahweh nga Apo: Bumusorak kadakayo a tattao ti Jerusalem. Dusaenkayonto, ket maimatanganto daytoy dagiti tattao kadagiti dadduma a nasion.

\s5
\v 9 Gapu kadagiti amin a makarimon a didiosenyo ken aramidyo, dusaenkayonto a tattao ti Jerusalem kas iti saanko pay nga inaramid idi ken saankonton nga aramiden manen.
\v 10 Gapu iti dayta, kanento dagiti nagannakyo dagiti annakda, ket kanento met dagiti annak dagiti nagannakda gapu ta awanen ti sabali a kanenda. Dusaenkayonto iti nakaro, ken dagiti agtalinaed a sibibiag ket iwarawarakto ida iti amin a suli ti lubong.

\s5
\v 11 Ngarud, ipakpakaammok daytoy, Siak a ni Yahweh nga Apo! Nga iti naganko nga adda iti agnanayon, saankayonto a bendisionan, gapu ta tinulawanyo ti templok kadagiti makarurod a didiosenyo ken kadagiti dadduma a nakaal-alinggaget a banbanag nga ar-aramidenyo. Saanakto a maasian kadakayo wenno saankayonto a kaasian.
\v 12 Matayto iti uneg ti siudad ti kakatlo kadagiti tattaoyo babaen kadagiti didigra a lak-amendanto wenno gapu iti nakaro a panagbisin. Ti maysa pay a kakatlo kadagiti tattaom ket mapapatayto babaen kadagiti kampilan dagiti kabusoryo iti ruar ti siudad. Ken ti maysa pay a kakatlo ket iwarawarakto iti amin a suli ti lubong, ngem kamatendakayonto dagiti kabusoryo ken patayendakayo babaen kadagiti kampilanda.

\s5
\v 13 Ket agbaawton ti pungtotko kadakayo; isardengkonto ti panangdusak kadakayo kalpasan a mabaleskayo. Ket inton isardengkon ti panangdusak kadakayo, maammoanyonto a Siak a ni Yahweh, ti nagsao kadakayo gapu ta nalpasen ti panangdusak kadakayo gapu iti ungetko.
\v 14 Dadaelekto ti siudadyo tapno dagiti amin a tattao kadagiti dadduma a nasion iti aglawlawyo a lumabas ken makaimatang iti daytoy ket laisendakayo.

\s5
\v 15 Umsien ken laisendakayonto. Inton dusaenkayo gapu iti nakaro a pungtotko, agbutengdanto ket agbalinkayonto a ballaag kadakuada. Awan duadua a mapasamakto dayta gapu ta Siak a ni Yahweh ti nangibaga iti daytoy.
\v 16 Ket inton isardengko ti panangipaay iti taraonyo, ken pakaroek pay ti panagbisin iti siudadyo, kaslanto panpanaenkayo nga isunto ti pakatayanyo.
\v 17 Isu nga ipalak-amkonto kadakayo ti nakaro a panagbisin, ken ibaonkonto dagiti atap nga ayup a mangdarup kadakayo ken mangpatay kadagiti annakyo, ket mapapatayto dagiti amin nga annakyo. Lak-amenyonto dagiti didigra ken mapadasanyonto ti gubgubat, ket ibaonkonto dagiti sikakampilan a kabusoryo a mangraut kadakayo. Awan duadua a mapasamakto dayta gapu ta Siak a ni Yahweh ti nangibaga iti daytoy."

\s5
\c 6
\p
\v 1 Maysa pay a mensahe ti imbaga kaniak ni Yahweh. Kinunana,
\v 2 "Anak ti tao, sumangoka kadagiti bantay ti Israel, ket ipadtom ti maipapan iti mapasamakto kadakuada, ket kunaem,
\v 3 'Banbantay ti Israel, denggenyo ti ibagbaga ti Apo a ni Yahweh kadakayo! Ibagbagana daytoy kadagiti bantay ken kadagiti nangangato a turod ken kadagiti igid ti waig ken kadagiti tantanap. Kunana: Dandanin iti panangibaonko kadagiti kabusoryo a soldado a nakakampilan tapno dadaelenda amin dagiti pagdaydayawan kadagiti tapaw ti katurturodanyo.

\s5
\v 4 Burakendanto dagiti amin nga altaryo a pagdaydayawanyo kadagiti didiosen, kasta met dagiti adigiyo, ket papatayendanto dagiti adu nga Israelita iti sangoanan dagiti didiosenda.
\v 5 Maiwalangto dagiti bangkayda iti sangoanan dagiti didiosenda, ket maiwarawaranto dagiti tulangda iti aglawlaw dagiti altarda.

\s5
\v 6 Sadinoman ti pagnaedanyo nga Israelita, madadaelto dagiti pagilianyo ken marumekto dagiti altar a pagdaydayawanyo kadagiti didiosen. Maburakto dagiti altaryo, ken amin a gamengyo ket agbalinto a gabsuon dagiti nadadael.
\v 7 Adunto kadagiti tattaoyo ti mapapatay iti mismo a sangoananyo; ket maammoanyonto a Siak a ni Yahweh, ket addaan ti pannakabalin a mangaramid kadagiti banbanag nga ibagak nga aramidek.

\s5
\v 8 Ngem pagtalinaedek a sibibiag ti dadduma kadakayo. Malasatandanto ti patay inton iwarawaranakayo dagiti kabusoryo kadagiti dadduma a nasion.
\v 9 Inton mapasamak dayta, malagipdakto dagiti nakalasat iti patay kadagiti nasion a nakaipananyo a kas balud. Malagipyonto a kasta unay ti panagladingitko gapu ta tinallikudandak, gapu ta saankayo a napudno kaniak, ken gapu ta kinaykayatyo ti agdayaw kadagiti didiosenyo. Kabusoryonto dagiti bagbagiyo gapu kadagiti dakes ken nakaal-alinggaget nga inaramidyo.
\v 10 Ket maamirisyonto a Siak a ni Yahweh ti nangdusa kadakayo. Maamirisyonto nga idi binallaagankayo a dusaenkayo, awan duadua nga aramidek dayta.

\s5
\v 11 Ngarud, kastoy ti kunak kenka Ezekiel, Siak a ni Yahweh nga Apo: Danugem ta dakulapmo ken agtabbugaka ket agsangitka a mangipakita a nagladingitka, ket iyasugmo ti mapasamakto kadagiti Israelita gapu kadagiti amin a kinadakes ken makarimon nga kababalinda. Mapapataydanto babaen kadagiti kampilan dagiti kabusorda, mataydanto iti bisin, ken mataydanto gapu kadagiti didigra.
\v 12 Dagiti adayo iti Jerusalem ket mataydanto gapu kadagiti didigra, dagiti asideg iti Jerusalem ket mapapataydanto babaen kadagiti kampilan dagiti kabusorda. Dagiti agtalinaed a sibibiag kalpasan dayta ket matayto iti bisin. Kastanto ti panangdusak kadakuada.

\s5
\v 13 Dagiti bangkay ti dadduma kadagiti tattaom ket maiwalangto iti ayan dagiti didiosenda iti aglawlaw dagiti altarda, iti tapaw ti tunggal turod ken iti tuktok dagiti amin a banbantay, iti sirok dagiti amin a dadakkel a kayo—iti amin a luglugar a nagpuoranda iti insenso tapno agdayawda kadagiti didiosenda. Inton mapasamak daytoy, maamirisyonto a Siak a ni Yahweh ti nangaramid iti daytoy.
\v 14 Ta dusaekto ida babaen iti pannakabalinko ken pagbalinekto a langalang ti tunggal lugar a pagnanaedanda iti pagilianyo, manipud iti desierto iti dippaar ti abagatan agingga iti pagilian ti Dibla iti dippaar ti amianan. Ket maamirisdanto a Siak a ni Yahweh ti nangipatungpal iti daytoy."'

\s5
\c 7
\p
\v 1 Maysa pay a mensahe ti imbaga kaniak ni Yahweh. Kinunana,
\v 2 "Anak ti tao, kastoy ti kunak, siak a ni Yahweh nga Apo, kadagiti tattao ti Israel: Iti entero nga Israel, madadaelto iti mabiit dagiti amin nga adda kadagiti beddeng daytoy.

\s5
\v 3 Dakayo a tattao ti Israel, dimtengen ti panungpalan. Dusaenkayonto iti nakaro. Ukomenkayo gapu kadagiti dakes nga inaramidyo, ket pagbayadenkayo gapu iti makarimon nga kababalinyo.
\v 4 Saankayonto a kaasian wenno saanakto a maasian kadakayo. Awan duadua a dusaenkayonto gapu iti kinadakesyo. Ket maammoanyonto a napasamak daytoy gapu ta Siak a ni Yahweh ti nangipatungpal iti daytoy.

\s5
\v 5 Kastoy pay ti kuna ni Yahweh nga Apo: Iti mabiit, lak-amenyonto dagiti nakabutbuteng a didigra!
\v 6 Daytoyto ti kanibusanan ti Israel; mapukawton ti pagilianyo! Ken mapapataykayonto!
\v 7 Daytoyto ti paggibusanyo dakayo a tattao nga agnanaed iti daga ti Israel. Dimtengen ti tiempo; asidegen ti tiempo a pannakadadaelyo. Iti dayta a tiempo, saanto a naragsak dagiti tattao nga agdaydayaw kadagiti didiosen iti tuktok dagiti bantay; agdanagdanto.

\s5
\v 8 Makaungetak unay kadakayo ket dandanikon idissuor ti pannusak kadakayo. Ukomenkayonto gapu kadagiti amin a kinadakes nga inaramidyo ket pagbayadenkayonto gapu iti makarimon a kababalinyo.
\v 9 Saankayonto a kaasian wenno saanakto a maasian kadakayo. Awan duadua a dusaenkayonto gapu iti nadangkes a kababalinyo. Ket maammoanyonto a Siak a ni Yahweh, iti nangdusa kadakayo.

\s5
\v 10 Adtoyen ti aldaw a pannakadusayo! Dimtengen! Dimteng dagiti didigra gapu iti kinatangsityo.
\v 11 Nakarangranggas dagiti tattao ken ad-adda nga agar-aramidda iti kinadakes. Ket awanto ti matda a kukua dagitoy a tattao, awan uray ti kuartada, ket saanto ida a raemen ti uray siasinoman.

\s5
\v 12 Itan ti tiempo; dimtengen dayta nga aldaw. Saan a rumbeng nga agrag-o dagiti tattao nga aggatgatang kadagiti banag, gapu ta nalalaka ti pananggatangda kadagitoy ken saan a rumbeng nga agliday dagiti agtagilako gapu ta inlakoda iti nalaka dagiti tagilakoda, gapu ta dusaento ni Yahweh dagiti amin a tattao.
\v 13 Dagiti tattao a mangilako iti sumagmamano kadagiti sanikuada ket saandan a mabalin a gatangen manen daytoy—saandanto pay a makasubli a mangkita iti daytoy; gapu ta nagbasolda, mataydanto amin.

\s5
\v 14 Pagunniento dagiti papanguloyo dagiti trumpeta tapno pagsaganaen ti armada a makiranget, ngem awan ti uray maysa nga aggunay, gapu ta makaungetakto unay kadagiti amin a tattao.
\v 15 Inton mapasamak dagitoy a banbanag, addanto iti ruar ti siudad dagiti kabusoryo nga awitda dagiti kampilanda, ket dumtengto dagiti didigra ken ti nakaro a panagbisin iti uneg ti siudad. Dagiti matiliw iti ruar ti siudad kadagiti away ket mapapatayto babaen kadagiti kampilan dagiti kabusorda ken dagiti adda iti uneg ti siudad ket matayto gapu iti nakaro a bisin ken kadagiti didigra.
\v 16 Dagiti makalasat a makalibas ket agkamangdanto kadagiti banbantay, ket agasugdanto amin gapu kadagiti basolda, kas iti panagasug dagiti kalapati.

\s5
\v 17 Gapu ta kastanto unay ti butengda, malpay ken kumapuyto ti ima dagiti tattao, ken agkutukutto dagiti tumengda ket saandanto a makatakder.
\v 18 Agkawesdanto kadagiti pagan-anay a naaramid iti nakersang a lupot, ket kastanto unay ti butengda. Makitanto kadagiti rupada ti kasta unay a bainda, ket kalboandanto dagiti uloda a mangipakita iti kasta unay a kinalidayda.
\v 19 Ibellengdanto ti pirakda kadagiti kalsada, ken ibilangdanto a basura ti balitokda, gapu ta maamirisdanto a saan ida a maispal dagiti pirak ken balitokda inton dusaen ida ni Yahweh. Saandanto a makagatang iti taraon a kanenda, gapu ta ti kinaadu ti balitok ken pirakda ti nangiturong kadakuada nga agbasol.

\s5
\v 20 Napagpannakelda, iti kasta inaramatda dagiti agkakapintas nga alahasda tapno makaaramidda kadagiti makarurod ken makarimon nga estatua dagiti didiosenda. Isu nga ipakitakto kadakuada ti kinarimon ken kinarugit dagitoy a banbanag.
\v 21 Itedkonto ti pirak ken balitokda kadagiti ganggannaet a mangraut iti pagilianyo ket tagikuaenda dagiti amin nga agkakapateg a gamengyo. Itedkonto dagitoy kadagiti nadangkes a tattao, ket saanakto a makibiang inton aramidenda dagiti nakababain a banbanag kadagiti banag nga alaenda.
\v 22 Baybay-akto a sumrek dagiti agtatakaw iti nasantoan a templok ken tulawanda daytoy.

\s5
\v 23 Isaganayo dagiti kawar a maikawar kadakayo inton tiliwendakayo dagiti kabusoryo kas pannusa para iti saan a nainkalintegan a panagsayasay ti dara iti entero a pagilian, ken ti kinaranggas nga adda iti uneg ti siudad.
\v 24 Iti kasta, iyegkonto dagiti armada dagiti nasion a makin-tattao kadagiti nadangkes unay tapno tagikuaenda dagiti balay dagiti Israelita. Ipaamiriskonto kadagiti Israelita nga awanen ti mabalinda nga ipannakkel. Dagiti lugar a pagdaydaywanyo ket pagbalinento dagiti kabusoryo a saanen a maikari a maaramat.
\v 25 Inton butbutngendakayo dagiti kabusoryo, agpakpakaasikayonto kadakuada a makikappia ngem awanto ti kappia.

\s5
\v 26 Lak-amenyonto ti adu a didigra, ket agsasarunonto ti mangngegyo a sayangguseng maipapan kadagiti didigra a mapaspasamak kadagiti nadumaduma a lugar. Agpakpakaasinto dagiti tattao kadagiti profeta tapno ibagada dagiti sirmata a nakitada, ngem awanto uray ania a sirmata a makita dagiti profeta. Saanton nga isuro dagiti papadi kadagiti tattao dagiti linteg nga intedko kenni Moises. Uray dagiti mamasirib a panglakayen ket awanto ti maisungbatda.
\v 27 Agladingitto ti ariyo, ket saanton a mangnamnama ti anakna a lalaki kadagiti nasayaat a banag a mapasamakto. Agpigergerto ti ima dagiti tattao iti entero a pagilian. Ket aramidekto ti rumbeng kadakuada gapu ti kinadakesda. Ukomen ken ilunodkonto ida kas iti panangukom ken panangilunodda kadagiti dadduma. Kalpasanna, maammoandanto a Siak, a ni Yahweh, ket addaan iti pannakabalin a mangipatungpal iti imbagak nga aramidek."

\s5
\c 8
\p
\v 1 Iti maikalima nga aldaw ti maikanem a bulan, iti agarup maikanem a tawen kalpasan ti panangipan dagiti taga-Babilonia kadakami nga Israelita iti dagada, agtugtugawak idi iti balayko a kaduak dagiti panglakayen ti Juda idi mariknak ti presensia ni Yahweh nga Apo nga immay manen kaniak.
\v 2 Ket iti maysa a sirmata, nakitak ti kalanglanga ti maysa a tao, ngem iti baba ti siketna, ti bagina ket kasla apuy ken ti ngatoen iti siketna ti bagina ket kasla agbegbeggang a landok a kasta unay ti pudotna.

\s5
\v 3 Adda kasla ima nga inggaw-atna ket ginammatanna ti buokko. Impangatonak ti Espiritu iti tangatang, ket kadagiti sirmata, innalanak ti Dios manipud Babilonia ket inturongnak idiay Jerusalem. Impannak iti templo, iti akin-uneg a ruangan iti amianan a disso nga ayan ti didiosen a makagapu iti kasta unay a pannakarimon ken panagpungtot ni Yahweh.
\v 4 Ket iti sangoanak, adda nakaranraniag unay a lawag ti Dios a sigud a daydayawen dagiti Israelita. Kas met la iti daytoy ti nakitak a sirmata idi idiay patad.

\s5
\v 5 Kinuna ti Dios kaniak, "Anak ti tao, kumitaka iti amianan!" Kimmitaak ngarud, ket nakitak ti pagserkan a ruangan nga asideg iti altar dayta a didiosen a makagapu iti kasta unay a pannakarimon ken panagpungtot ni Yahweh.
\v 6 Kinunana kaniak, "Anak ti tao, makitam kadi ti ar-aramiden dagiti Israelita? Ar-aramidenda ditoy dagiti makaparurod a banbanag, dagiti banag a makagapu tapno panawak ti templok. Ngem makitamto dagiti banbanag nga ad-adda pay a makaparurod."

\s5
\v 7 Ket impannak iti pagserkan ti paraangan. Kimmitaak ket nakitak ti maysa nga abut iti pader.
\v 8 Kinunana kaniak, "Anak ti tao, kadakkelem ti abut ti pader ditoy," Inabutak ngarud ti pader ket nakitak ti maysa a ruangan iti uneg.
\v 9 Kinunana kaniak, "Sumrekka ket kitaem ti nadangkes ken dagiti makaparurod a banbanag nga ar-aramidenda ditoy!"

\s5
\v 10 Simrekak ngarud iti ruangan ket kimmitaak, ket nakitak ti aglawlaw dagiti pader ti nalalawa a siled, dagiti ladawan ti amin a kita dagiti parsua nga agkarkarayam iti daga ken dagiti dadduma nga ayup a maibilang a narugit, ken dagiti ladawan ti amin a kita dagiti didiosen a daydayawen dagiti tattao ti Israel.
\v 11 Iti sangoanan dagitoy, nakatakder dagiti pitopulo a panglakayen ti Israel. Kaduada nga agtaktakder ni Jaazanias a putot a lalaki ni Safan. Tunggal maysa kadakuada ket nakaiggem iti pagpuoran kadagiti insenso, ket agpangpangato ti nabanglo nga asuk ti mapupuoran nga insenso.

\s5
\v 12 Kinuna ti Dios kaniak, "Anak ti tao, kitaem ti ar-aramiden dagiti panglakayen dagiti Israelita ditoy kasipngetan, agtaktakder ti tunggal maysa kadakuada iti sangoanan ti imahen ti didiosenda! Ibagbagada, 'Saannatayo a makita ni Yahweh; Pinanawanen ni Yahweh daytoy a pagilian."'
\v 13 Kinunana pay, "Ngem makitamto dagiti ad-adda pay a makaparurod a banbanag!"

\s5
\v 14 Ket impannak iti pagserkan nga adda iti akin-ruar ti amianan a ruangan ti templo. Nakitak dagiti babbai nga agtugtugaw sadiay, agladladangitda gapu iti pannakatay ni Tammuz, a didiosen dagiti tattao a taga-Babilonia.
\v 15 Kinunana kaniak, "Anak ti tao, makitam kadi daytoy? Ket makitamto dagiti nakarkaro pay a makaparurod a banbanag ngem iti daytoy!"

\s5
\v 16 Ket impannak iti akin-uneg a paraangan ti templo. Sadiay iti pagserkan ti templo, iti nagbaetan ti pasdek ken ti altar, adda agarup dua pulo ket lima a lallaki. Nakatallikudda iti templo, ket nakasangoda iti daya; agkurkurnoda tapno agrukbab iti didiosen a ni Semes kabayatan ti panagsingising ti init iti daya.

\s5
\v 17 Kinunana kaniak, "Anak ti tao, makitam kadi ti ar-aramidenda? Panagkunam kadi ket saan a nadagsen a basol ti ar-aramiden dagitoy a tattao ti Juda, nga agdaydayaw kadagitoy makaparurod a banbanag ditoy? Ngem adda pay dadduma a nakabutbuteng nga ar-aramidenda. Pinasaknapda ti kinaranggas iti entero a pagilianda, ket kankanayondak a pagpungpungtoten. Kitaem ida! Pabpabainandak gapu iti palso a panagdaydayawda!
\v 18 Isu nga ipakitakto kadakuada a makapungtotak unay. Saankonto ida a kaasian wenno saanakto a maasian kadakuada. Ket uray pukkawandak iti napigsa tapno tulongak ida, saankonto ida nga ipangag."

\s5
\c 9
\p
\v 1 Kalpasanna, impukkaw ni Yahweh, "Dakayo a lallaki a mangdusa iti daytoy a siudad, iyegyo ditoy dagiti igamyo a pagdadael."
\v 2 Ket adda nakitak nga innem a lallaki nga um-umay manipud iti akin-amianan a ruangan ti templo. Tunggal maysa ket adda awit-awitna nga igam. Adda kaduada a maysa a lalaki a nakakawes iti puraw a kagay a lino. Adda nakasalikad kenkuana a pagkargaan a naglaon kadagiti banbanag a mausar iti panagsurat. Simrekda amin ket nagtakderda iti abay ti bronse nga altar.

\s5
\v 3 Ket ti dayag a mangipakita iti kaadda ti Dios ti Israel ket nagpangato manipud iti ngatoen dagiti uppat ti payakna a parsua ket immakar iti pagserkan ti templo, ket inayaban ni Yahweh ti tao a nakakawes iti kagay a lino,
\v 4 ket kinunana kenkuana, "Mapanka iti entero a Jerusalem ket markaam ti muging dagiti malidliday unay gapu kadagiti nakarimon a banbanag a maar-aramid iti uneg ti siudad."

\s5
\v 5 Bayat a dumdumngegak, kinunana iti sabali pay nga innem a lallaki, "Surotenyo ti lalaki a nakakagay iti puraw, ket papatayenyo dagiti tattao. Saanyo a kaasian ida wenno saankayo nga agtignay a siaasi kadakuada.
\v 6 Papatayenyo dagiti lallakay, agtutubo a lallaki ken babbai, babbaket ken ub-ubbing; ngem saanyo a dangran ti siasinoman nga addaan iti kasta a marka iti mugingda. Irugiyo iti templok." Inrugida ngarud babaen iti panangpatayda kadagiti panglakayen nga agdaydayaw kadagiti didiosen iti sangoanan ti templo.

\s5
\v 7 Kalpasanna, kinuna ni Yahweh kadagiti lallaki, "Tulawanyo ti templo babaen iti panangpunnoyo iti paraangan daytoy kadagiti bangkay dagiti pinapatayyo! Rugianyo itan!" Napanda ngarud ket rinugianda ti panangpapatayda kadagiti tattao iti entero a siudad.
\v 8 Bayat nga ar-aramidenda dayta, sisiak laeng ti nabati. Nagpaklebak iti daga ket impukkawko, "Yahweh nga Apok, pukawem kadi amin dagiti dadduma a tattao ti Israel a sibibiag pay laeng, bayat a dusdusaem iti nakaro dagiti tattao ti Jerusalem?"

\s5
\v 9 Insungbatna, "Adu ken nakaro unayen dagiti basol dagiti tattao! Adda pammapatay iti sadinoman a paset daytoy a pagilian, ken daytoy a siudad ket napnoan kadagiti tattao nga agar-aramid iti kinakillo. Kunada, 'Binaybay-anen ni Yahweh daytoy a pagilian, ken saanna a makitkita ti ar-aramidentayo.'
\v 10 Isu a saanko ida a kaasian wenno saanak nga agtignay a siaasi kadakuada. Aramidek kadakuada dagiti dakes a naaramidda kadagiti dadduma a tattao."
\v 11 Kalpasanna, nagsubli ti tao a nakakagay iti lino, ket kinunana, "Naaramidkon ti imbilinmo kaniak nga aramidek."

\s5
\c 10
\p
\v 1 Kalpasanna, nakitak ti kasla maysa a trono a naaramid iti safiro iti naglukong nga atep nga adda iti ngatoen ti ulo dagiti parsua nga uppat ti payakna.
\v 2 Kinuna ni Yahweh iti lalaki a nakakagay iti lino, "Mapanka iti nagbaetan dagiti pilid nga adda iti sirok dagiti parsua nga adda payakna. Mangakupka iti adu a beggang a kabaelam nga akupen, ket iwarawaram dagitoy iti entero a siudad." Ket bayat a buybuyaek, pimmanaw ti lalaki a nakakagay iti lino.

\s5
\v 3 Nakatakder dagiti uppat a parsua nga adda payakna iti akin-abagatan a paset ti templo idi simrek ti lalaki a nakakagay iti puraw. Ket adda ulep a nangpunno iti akin-uneg a paraangan ti templo.
\v 4 Ket nagpangato ti dayag ni Yahweh manipud iti ngatoen dagiti parsua nga adda payakna ket nagturong iti ruangan ti templo. Pinunno ti dayag ni Yahweh ti entero a templo babaen iti ulep ken amin a banag nga adda iti paraangan ket naraniag gapu iti nadayag a presensia ni Yahweh.
\v 5 Nangngegko met ti uni dagiti payak dagiti parsua nga adda payakna iti paraangan ti templo. Napigsa unay daytoy, kas iti timek ti Dios a Mannakabalin-amin no kasta nga agsao isuna.

\s5
\v 6 Idi binilin ni Yahweh ti lalaki a nakakawes iti kagay a lino a mapan mangala iti beggang nga adda iti nagbaetan dagiti parsua nga adda payakna, napan ti lalaki iti paraangan ket nagtakder iti abay ti maysa kadagiti pilid.
\v 7 Kalpasanna, maysa kadagiti parsua nga adda payakna, ti nangigaw-at iti imana iti apuy nga adda iti nagbaetanda. Nangakop ti parsua kadagiti beggang ket inkabilna dagitoy iti ima ti lalaki a nakakagay iti lino, ket innala dayta a lalaki dagitoy ket pimmanaw.
\v 8 Iti sirok dagiti payak dagiti parsua nga addaan payak ket adda kasla ima ti tao.

\s5
\v 9 Ket adda nakitak nga uppat a pilid iti abay dagiti parsua nga adda payakna. Adda maysa a pilid iti abay ti tunggal parsua nga adda payakna. Agranraniag dagiti pilid a kas iti napapateg unay a bato.
\v 10 Agpapada amin dagiti pilid: Tunggal pilid ket adda maysa a pilid a naipakuros iti tengngana.
\v 11 Tunggal agkuti dagitoy, agturong dagitoy iti sadinoman a sangoen a pagturongan ti maysa kadagiti parsua nga adda payakna. Saan a sumiasi dagiti pilid iti sabali a direksion bayat nga agtaytayab dagiti parsua nga adda payakna.

\s5
\v 12 Dagiti bagida agraman dagiti bukot, ima ken payakda ket napnoan iti mata. Napnoan met dagiti pilid kadagiti mata.
\v 13 Nangngegko nga adda nangawag kadagitoy iti 'dagiti agtaytayyek a pilid.'
\v 14 Tunggal maysa kadagiti parsua nga adda payakna ket adda uppat a rupana. Ti maysa ket kasla rupa ti kalakian a baka, ti maysa ket kasla rupa ti tao, ti maysa ket kasla rupa ti leon, ket ti maysa ket kasla rupa ti agila.

\s5
\v 15 Kalpasanna, nagtayab a nagpangato dagiti parsua nga adda payakna. Dagitoy met laeng dagiti sibibiag a parsua a nakitak idi iti igid ti karayan Kebar.
\v 16 No kasta nga aggaraw dagiti parsua nga adda payakna, sumurot met dagiti pilid. No kasta nga iyukrad dagitoy dagiti payakda tapno agtayab, sumurot dagiti pilid iti abayda.
\v 17 No kasta nga agsardeng dagiti parsua nga adda payakna, agsardeng met dagiti pilid. No kasta nga agtayab dagiti parsua nga adda payakna, makitayab met kadakuada dagiti pilid, gapu ta ti Espiritu dagiti sibibiag a parsua ket adda kadagiti pilid.

\s5
\v 18 Kalpasanna, pimmanaw ti dayag ni Yahweh iti ruangan ti templo ket nagsardeng iti ngatoen dagiti parsua nga adda payakna.
\v 19 Bayat a buybuyaek, inyukrad dagiti parsua nga adda payakna dagiti payakda ket nagtayabda, ket simmurot kadakuada dagiti pilid. Nagsardeng dagitoy iti akin-daya a paset ti templo, ket adda iti ngatoen dagitoy ti dayag ti Dios, a dinaydayaw dagiti Israelita.

\s5
\v 20 Dagitoy met laeng dagiti uppat a sibibiag a parsua a nakitak idi iti igid ti karayan Kebar, ket nailasinko a dagitoy dagiti parsua nga adda payakna.
\v 21 Tunggal maysa kadakuada ket adda uppat a rupa ken uppat a payakda, ket iti sirok dagiti payakda ket adda kasla maysa nga ima ti tao.
\v 22 Dagiti rupada ket kasla met laeng kadagiti rupa a nakitak iti karayan Kebar. Tunggal maysa kadakuada ket nagtayab iti paset a sinangoda.

\s5
\c 11
\p
\v 1 Kalpasanna, impangatonak ti Espiritu ti Dios ket impannak iti ruangan iti akin-daya a paset ti templo. Ket iti ruangan, adda duapulo ket lima a lallaki. Ket iti ayanda, nakitak dagiti mangidadaulo kadagiti tattao, a ni Jaazanias a putot ni Azur, ken ni Pelatias a putot ni Benaias.

\s5
\v 2 Kinuna ni Yahweh kaniak, "Anak ti tao, dagitoy dagiti barbaro a mangidadaulo iti Jerusalem nga agpangpanggep nga agaramid kadagiti dakes a banbanag ken mangmangted iti dinadangkes a pammagbaga kadagiti tattao iti daytoy a siudad.
\v 3 Kunada, 'Saan pay a panawen ti panangipatakder kadagiti balay, ngem kas kadagiti karne a maikarga ken makaluban a nalaing kadagiti kaldero, masalaknibantayo kadagiti dakes a banbanag a mapasamak kadagiti dadduma.'
\v 4 Isu a sika nga anak ti tao, ipadtom dagiti nakaal-alinggaget a banbanag a mapasamakto kadakuada."

\s5
\v 5 Ket immay kaniak ti Espiritu ni Yahweh ket imbagana nga ibagak kadagiti tattao, "Kastoy ti kuna ni Yahweh, 'Dakayo nga Israelita, ibagbagayo dagidiay a banbanag, ket ammok dagiti panpanunotenyo.
\v 6 Adu a tattao ti pinapatayyo iti daytoy a siudad ket pinunnoyo dagiti kalsada kadagiti bangkayda.
\v 7 Isu a kastoy ti kuna ni Yahweh nga Apo, 'Dagiti bangkay dagiti tattao a pinapatayyo ditoy ket maiyarig iti karne, ket ti Jerusalem ket maiyarig iti dakkel a kaldero, ngem papanawenkayonto, dakayo a tattao iti daytoy a siudad!

\s5
\v 8 Mabutengkayo a mapapatay babaen kadagiti kampilan dagiti kabusoryo, isu a kastanto ti ipalak-amko a mapasamak kadakayo.
\v 9 Papanawenkayonto iti daytoy a siudad ket ikkakto iti kabaelan dagiti ganggannaet a mangtiliw ken mangdusa dakayo.
\v 10 Papatayendakayto babaen kadagiti kampilanda; madusakayonto ditoy met laeng Israel! Ket maamiristo dagiti tattao a Siak a ni Yahweh, ket addaan iti pannakabalin a mangaramid iti ibagak nga aramidek.

\s5
\v 11 Daytoy a siudad ket saanto a lugar a pakasalaknibanyo, a kas iti karne a naikarga iti maysa a nakaluban a kaldero. Dusaenkayto iti sadinoman nga ayanyo iti Israel.
\v 12 Ket maammoanyonto a Siak a ni Yahweh, ket impadtok a mapasamakto dayta, gapu ta saanyo a tinungpal dagiti bilin ken lintegko; ngem ketdi, tinuladyo dagiti dinadangkes a kababalin dagiti tattao kadagiti kabangibang a nasion."

\s5
\v 13 Bayat nga ipadpadtok dayta, pagammoan, natay ni Pelatias a putot ni Benaias. Ket nagpaklebab iti daga ket impukkawko, "O Yahweh nga Apok, kasta met laeng kadi ti panangpukawmo kadagiti amin nga Israelita a sibibiag pay laeng?"

\s5
\v 14 Ket inted ni Yahweh kaniak daytoy a mensahe,
\v 15 "Anak ti tao, dagiti tattao nga adda pay laeng iti Jerusalem ket pagtutungtonganda ti maipapan kadagiti kakabagiam, iti pulim, ken kadagiti amin a dadduma nga Israelita a naipanaw a kas balud, kunkunada, 'Addada iti Babilonia, adayo kenni Yahweh. Pinanawanda dagiti sanikuada ditoy Israel, isu a kukuatayon dagiti sanikuada!"'

\s5
\v 16 Isu nga ibagam kadakuada, "Kastoy ti kuna ni Yahweh nga Apo: Uray impaipanawko ida manipud iti Israel ket inwarawarak ida kadagiti dadduma a nasion iti ababa a tiempo, siakto ti agbalin a sarikedkedda kadagiti pagilian a nakaipananda."
\v 17 Isu nga ibagam pay kadakuada, "Kastoy ti kuna ni Yahweh nga Apo: Dumtengto ti aldaw, ummongenkayto manipud kadagiti nasion a nakaipananyo ket isublikayo iti Israel, ket agnaedkayto manen iti pagilianyo.
\v 18 Inton agsublikayo iti pagilianyo, ikkatenyonto amin dagiti awan serserbina nga estatua ken dagiti makarimon a didiosenyo.

\s5
\v 19 Pagkaykaysaekto ti pusoyo ket ikkankayto iti baro a panagpanpanunot inton agsublikayo idiay Israel. Saankayonton a nasukir, ngem natulnogkayonton.
\v 20 Inton aramidek dayta, tungpalenyonto a sipapasnek dagiti amin a lintegko. Dakayonto dagiti tattaok, ket siakto ti Diosyo.
\v 21 Ngem no maipanggep kadagiti pagaayatda ti agdaydayaw kadagiti awan serserbina nga estatua ken makarimon a didiosen, dusaekto ida, a kas iti maiparbeng kadagiti dakes nga inaramidda." Kastoy ti impakaammo ni Yahweh.

\s5
\v 22 Ket dagiti parsua nga adda payakna, inukradda dagiti payakda ket timmayabda, agraman dagiti pilidda nga adda iti abayda, ket adda iti ngatoenda ti makasisirap a lawag ni Yahweh.
\v 23 Pimmanaw dayta a lawag manipud iti siudad ket nagsardeng iti tapaw ti bantay iti daya ti siudad.

\s5
\v 24 Iti sirmata a makitkitak, impangatonak ti Espiritu ti Dios ket insublinak iti ayan dagiti naipanaw a kas balud iti Babilonia. Kalpasanna, nagpukaw ti sirmata a makitkitak,
\v 25 ket imbagak kadagiti naipanaw a kas balud dagiti amin a banag nga impakita ni Yahweh kaniak iti sirmata.

\s5
\c 12
\p
\v 1 Inikkannak ni Yahweh iti maysa pay a mensahe. Kinunana,
\v 2 "Anak ti tao, makipagnanaedka kadagiti tattao a nakasuksukir unay. Adda matada ngem saanda a makita ti kayatko a makitada; adda lapayagda ngem saanda a mangngeg ti kayatko a mangngegda, gapu ta nasukirda a tattao.

\s5
\v 3 Isu a sika, anak ti tao, irubbuatmo dagiti gargaretmo a kasla maipanawka a maipan iti sabali a pagilian. Kalpasanna, kabayatan ti aldaw, bayat a buybuyaen dagiti tattao, agsaganaka a mapan iti sabali a lugar. Uray nasukir dagiti tattao, nalabit a maawatanda ti ipaspasimudaagmo.

\s5
\v 4 Kabayatan ti aldaw, bayat a buybuyaenda, irruarmo dagiti banbanag a kayatmo nga itugot, ket irubbuatmo dagitoy. Ket iti rabii, bayat a buybuyaenda, aramidem ti kas iti ar-aramiden dagiti matiliw a maipan iti sabali a pagilian.
\v 5 Abutam ti pader ti siudad ket ditoymo nga iruar dagiti gargaretmo.
\v 6 Ikabilmo dagiti gargaretmo iti sako a baklay-baklaymo bayat a buybuyaendaka, ket pumanawka inton nasipngeten. Abbongam ti rupam tapno saanmo a makita ti dalan. Kayatko nga aramidem daytoy, gapu ta kayatko a ballaagam dagiti Israelita.”

\s5
\v 7 Inaramidko ngarud ti imbaga ni Yahweh kaniak nga aramidek. Kabayatan ti aldaw, inruarko iti balayko dagiti gargaretko a kaslaak la agrubrubbuat a mapapanaw a maipan iti sabali a pagilian. Ket iti rabii, inabutak ti pader ti siudad. Ket bayat a buybuyaen dagiti tattao, imbaklayko ti sako a nagianan dagiti gargaretko ket pimmanawak.

\s5
\v 8 Iti simmaruno a bigat, inted ni Yahweh kaniak daytoy a mensahe,
\v 9 "Anak ti tao, saan kadi a nagdamag kenka dagiti nasukir a tattao ti Israel a kunada, 'Ania ti ar-aramidem?'
\v 10 Agsublika ngarud ket ibagam kadakuada, 'Ti inaramidko ket maipapan iti ari ti Jerusalem ken kadagiti amin a tattao ti Israel nga adda sadiay.'

\s5
\v 11 Ibagam kadakuada, 'Ti inaramidko ket maysa a pakdaar kadakayo. Ti inaramidko iti sangoananyo, mapasamakto amin dagitoy. Matiliwdanto ket mapilitanda a mapan iti sabali a pagilian.
\v 12 Inton nasipngeten, ibaklayto ti ari dagiti gargaretna, ket ikagumaanna ti aglibas. Abutanto dagiti adipenna ti pader ti siudad, ket irruarnanto ditoy dagiti gargaretna. Abbongannanto ti rupana tapno saanto a mailasin isuna dagiti dadduma ken saannanto a makita ti daga.
\v 13 Ngem arignanto a mangisarwagak iti iket kenkuana tapno matiliw; tiliwento isuna dagiti kabusor a soldado, bulsekenda isuna, ket ipanda iti siudad ti Babilonia a pagnanaedan dagiti Caldeo. Ngem saannanto a makita daytoy gapu ta mabulsekto isuna; ket matayto isuna sadiay.

\s5
\v 14 Iwarawarakto amin dagiti nga adda iti aglawlawna—dagiti mambagbagana ken dagiti soldadona—iti amin a paset; ket ipakamatkonto ida kadagiti kabusorna, a nakakampilan a nakasagana a mangpapatay kadakuada.
\v 15 Kalpasanna, inton iwarawarak ida kadagiti adu a nasion, maammoandanto a Siak a ni Yahweh, ket addaan iti pannakabalin a mangaramid iti imbagak nga aramidek.
\v 16 Ngem ispalekto ti dadduma kadakuada manipud iti pannakapapatayda babaen iti kampilan, wenno manipud iti pannakatayda iti nakaro a bisin, wenno manipud iti pannakatayda gapu kadagiti sakit, tapno maisuratda a nagar-aramidda kadagiti makarimon a banbanag, ket maammoandanto a Siak a ni Yahweh, ket addaan iti pannakabalin a mangaramid iti ibagak nga aramidek."

\s5
\v 17 Kalpasanna, inikkannak ni Yahweh iti maysa pay a mensahe. Kinunana,
\v 18 "Anak ti tao, agpigergerka bayat a kankanem ti taraonmo, ken agpigergerka bayat nga in-inumem ti danummo.

\s5
\v 19 Ibagam daytoy kadagiti Israelita: 'Kastoy ti kuna ni Yahweh nga Apo, maipapan kadagiti agnanaed pay laeng iti Jerusalem, ken kadagiti dadduma a lugar iti Israel. Mabutbutengdanto met bayat a mangmanganda ken umin-inumda iti danum, gapu ta iti mabiit maipanawto amin a banag iti pagilianda. Mapasamakto dayta gapu ta dagiti tattao nga agnanaed sadiay ket agtultuloy nga agar-aramid iti kinaranggas.
\v 20 Madadaelto dagiti ili a pagnanaedan dagiti tattao, ken agbalinto a langalang ti daga. Kalpasanna, dakayo a tattao, maammoanyonto a Siak a ni Yahweh, ket addaan pannakabalin a mangaramid iti ibagak nga aramidek.'"

\s5
\v 21 Inikkannak ni Yahweh iti maysa pay a mensahe. Kinunana,
\v 22 "Anak ti tao, adda pagsasao dagiti tattao ti Israel a kunana, 'Agtultuloy ti panaglabas dagiti aldaw, ket saan a pulos a mapasamak ti impadto dagiti profeta.'
\v 23 Isu nga ibagam kadakuada, 'Kastoy ti kuna ni Yahweh nga Apo: Paneknekak a saan a pudno ti ibagbagada, ket kalpasanna, saandanton a pulos nga ibaga manen dayta iti Israel.' Ibagam kadakuada, 'Umadanin ti tiempo a pannakapasamak ti amin a banag nga impadto dagiti profeta.'

\s5
\v 24 Awanton dagiti profeta a mangibaga kadagiti Israelita kadagiti saan a pudno a sirmata, wenno awanton dagiti profeta a mangibaga kadagiti tattao kadagiti padto tapno laeng maay-ayoda.
\v 25 Ngem ketdi, Siak a ni Yahweh, ti mangibaganto iti kayatko nga ibaga kadagiti tattao, ket mapasamakto a dagus ti ipadtok. Dakayo a managsukir a tattao, ipatungpalko amin a banag nga imbagak a mapasamak. Dayta ti ibagak, Siak a ni Yahweh nga Apo.'"

\s5
\v 26 Inted pay ni Yahweh kaniak daytoy a mensahe. Kinunana,
\v 27 "Anak ti tao, kankanayon nga ibagbaga dagiti Israelita ti maipanggep kenka, kunada, 'Dagiti banag a masirsirmatana ket saan a mapasamak iti mabiit. Dagitoy a banbanag ket mapasamakto adu a tawen manipud ita, mabayag pay a mapasamak.'
\v 28 Ngarud, ibagam kadakuada, 'Kastoy ti kuna ni Yahweh nga Apo: Saankon nga itantan pay ti pannakapasamak ti aniaman kadagiti banbanag nga impadtok. Aniaman nga impadtok, ket mapasamak iti mabiit.'"

\s5
\c 13
\p
\v 1 Inikkannak ni Yahweh iti maysa pay a mensahe. Kinunana,
\v 2 "Anak ti tao, ipadtom ti maysa a ballaag maibusor kadagiti profeta iti Israel nga agipadpadto. Adda dadduma kadakuada a mangipadpadto kadagiti banag nga isuda a mismo ti nangparmata. Ibagam kadakuada, 'Dumngegkayo iti kuna ni Yahweh!
\v 3 Kunana, "Nakaal-alingagetto ti mapasamak kadagiti nadangkes a profeta a mangibaga kadagiti bukodda a kapanunotan ken saan met a nakakita kadagiti sirmata manipud kaniak.
\v 4 Dakayo nga Israelita, maiyarig dagiti profetayo kadagiti atap nga aso idiay disierto, maiyarigda kadagiti ayup a mangmangan kadagiti basura.

\s5
\v 5 Gapu ta dumdumngegkayo kadakuada, saanyo a tinarimaan dagiti rengngat wenno saanyo a pinalagda dagiti paderyo. Masapul a maaramid dayta tapno agbalin a nalagda daytoy inton Siak a ni Yahweh ket mangibaon kadagiti kabusoryo a mangraut kadakayo.
\v 6 Dagiti sirmata ken dagiti padto dagidiay a profeta ket saan a pudno. Kunada, 'Kastoy ti imbaga ni Yahweh kaniak.' Saanko nga imbaon ida kadakayo a kas profetak, ngem namnamaenyo a ti ipadtoda kadakayo ket pudno a mapasamakto!
\v 7 Kunada a nakakitada kadagiti sirmata, ngem saan a pudno dagidiay a sirmata, ket dagiti banbanag nga ipadpadtoda ket inuulbod. Kunada, 'Kastoy ti imbaga ni Yahweh kaniak,' ngem awan met a pulos ti imbagbagak kadakuada!

\s5
\v 8 Isu a kastoy ti kunak, Siak a ni Yahweh nga Apo: Gapu ta saan a pudno ti imbaga ken inuulbod ti sirmatayo, dakayo a profeta, bumusorak kadakayo.
\v 9 Dusaenkayonto amin, dakayo a profeta nga agkunkuna nga adda nasirmatayo ken agipadpadto iti inuulbod. Awanton ti lugaryo kadagiti tattaok, saanto a maisurat dagiti naganyo iti listaan dagiti Israelita, ken saankayonto a pulos a makasubli idiay Israel. Ket maammoanyonto a Siak a ni Yahweh ket addaan iti pannakabalin a mangaramid iti ibagak nga aramidek.

\s5
\v 10 Al-allilawenda dagiti tattaok a kunada, “Nasayaatto ti pagbanagantayo” idinto ta saan met a nasayaat ti pagbanaganda. Arigna la a kayatda a panunoten dagiti tattao nga adda nalagda unay a paderda idinto ta saan met a nalagda daytoy.
\v 11 Isu nga ibagam kadagidiay a profeta a nangpintor iti puraw iti pader nga awan duadua a marbanto ti pader. Agtudonto iti napigsa. Pagtudoekto iti uraro. Addanto napigsa unay nga angin a mangdupar iti daytoy.
\v 12 Inton marba ti pader, sigurado a kunaento dagiti tattao kadagidiay a profeta, "Saan met a pinalagda ti pintor a puraw ti pader!"

\s5
\v 13 Isu a kastoy ti kuna ni Yahweh nga Apo: Gapu ta makaungetak unay kadakayo, mangibaonakto kadagiti kabusor nga armada a mangdadael iti Jerusalem. Arigna a mangibaonakto iti napigsa unay nga angin, uraro ken napigsa unay a tudo a mangdadael kadakayo.
\v 14 Dagiti saan a pudno a padto dagiti profetayo ket maiyarig iti pader a pinintoranda iti puraw, ngem rebbaekto daytoy, dadaelekto iti kasta unay, nga uray la makita dagiti tattao dagiti pundasionna. Inton marban ti pader, mapapataykayonto met, ket maammoanto ti tunggal maysa a siak a ni Yahweh ket addaan iti pannakabalin a mangaramid iti ibagak nga aramidek.

\s5
\v 15 Babaen iti dayta, maipakitak a makaungetak unay kadagiti tattao a nangaramid iti pader ken dagidiay a nangpintor iti puraw iti daytoy ket napapatayen.
\v 16 Dagidiay dagiti profeta a nangipadto a nasayaatto ti pagbanagan dagiti tattao iti Jerusalem, idinto ta saan met a nasayaat ti pagbanaganda.’

\s5
\v 17 Isu a sika, anak ti tao, ipakitam a makaungetka kadagiti babbai iti Jerusalem nga agipadpadto kadagiti banag nga isuda a mismo ti mangparparmata, ket ibagam ti pudno a padto maibusor kadakuada.
\v 18 Ibagam kadakuada, 'Kastoy ti kuna ni Yahweh nga Apo: Nakaal-alinggagetto ti mapasamak kadakayo a babbai nga agikabkabil iti banag a pagsalamangka kadagiti pungoapungoanyo ken agar-aramid kadagiti agduduma a kita ti belo a maisuot iti uloyo tapno maallilaw dagiti tattao. Ipagarupyo a maallilawyo dagiti dadduma babaen iti panangibagayo kadakuada nga ammoyo ti mapasamakto iti masakbayan, ken maisalakanyo ti bukodyo a biag.

\s5
\v 19 Saandak a rinaem babaen iti panangibagayo iti inuulbod tapno makaalakayo iti sangkarakem a sebada ken sumagmamano a pidaso ti tinapay manipud kadagiti tattaok. Dimngeg dagiti tattaok kadagiti inuulbod; ket dakayo a babbai nga agul-ulbod kadakuada, impapatayyo dagiti tattao a saan a rumbeng a mapapatay, ket inispalyo dagiti saan a rumbeng nga agbiag.'

\s5
\v 20 Isu a kastoy ti kuna ni Yahweh nga Apo kadagidiay a babbai: 'Kagurak dagiti banag a pagsalsalamangkayo a pangal-allilawyo kadagiti tattao a kas iti panangsilsilo dagiti dadduma a tattao kadagiti billit. Pugsatekto manipud iti pungoapungoanyo dagidiay a pagsalsalamangkayo, ken saankonton nga ipaallilaw kadakayo dagiti tattao nga inal-allilawyo.
\v 21 Pisangekto met dagiti beloyo ket ispalek dagiti tattaok manipud iti agtultuloy a panangal-allilawyo, ket saanyonton a maiturayan ida. Ket maammoanyonto a Siak a ni Yahweh ket addaan iti pannakabalin a mangaramid iti ibagak nga aramidek.

\s5
\v 22 Inupayyo dagiti nalinteg a tattao babaen iti panangibagayo kadakuada kadagiti inuulbod, idinto ta saanko ida a pinagladingit. Ket inallukoyyo dagiti nadangkes a tattao tapno itultuloyda ti panangaramidda iti dinadangkes nga aramidda; no nagbabawianda koma dagitoy, agbiagda pay koma.
\v 23 Ngarud, saanyonton a siuulbod nga ibaga nga adda nakitayo a sirmata wenno saanyonto nga ibaga kadagiti tattao ti mapasamakto iti masakbayan tapno maay-ayoyo ida. Ispalekto dagiti tattaok iti panangal-allilawyo kadakuada. Ket kalpasanna, maammoanyonto a Siak a ni Yahweh ket addaan iti pannakabalin a mangaramid iti ibagak nga aramidek.'"

\s5
\c 14
\p
\v 1 Maysa nga aldaw, adda sumagmamano a panglakayen ti Israel ti immay kaniak ket nagtugawda iti sangoanak.
\v 2 Kalpasanna, inted ni Yahweh daytoy a mensahe kaniak:
\v 3 "Anak ti tao, agdaydayaw dagitoy a lallaki kadagiti didiosen, ket itultulokda a guyugoyen ida dagiti didiosen nga agbasol. Isu a rumbeng aya a sungbatak ida no agkiddawda kaniak iti pammagbaga?

\s5
\v 4 Ngem ibagam daytoy kadakuada: 'Kastoy ti kuna ni Yahweh nga Apo: Inton adda siasinoman a tao nga Israelita a mangayat nga agdayaw kadagiti didiosen a mangguyugoy kenkuana nga agbasol, ket umasideg isuna iti maysa a profeta tapno agkiddaw iti pammagbaga, Siak a ni Yahweh, isungbatkonto kenkuana ti isu met laeng a maiparbeng a maisungbat kenkuana, gapu ta agdaydayawda kadagiti didiosen.
\v 5 Aramidekto daytoy tapno dagiti Israelita, a nangtallikud kaniak tapno agdayawda laeng kadagiti didiosenda, ket sipupudnodanton nga agdayaw manen kaniak.'

\s5
\v 6 Ngarud, ibagam kadagiti Israelita, 'Kastoy ti kuna ni Yahweh nga Apo; Agbabawikayon! Isardengyon ti panagdaydayawyo kadagiti didiosenyo, ken isardengyon dagiti amin a makarimon a kababalinyo!'

\s5
\v 7 Inton adda siasinoman kadakayo nga Israelita wenno siasinoman a ganggannaet a makipagnanaed kadakayo ti mangtallikud kaniak ken mangrugi nga agdaydayaw kadagiti didiosen a mangguyugoy kenkuana nga agbasol, ket kalpasanna, mapan iti maysa a profeta tapno ammoenna no ania ti kayatko nga aramidenna, siakto a mismo ti mangsungbat kenkuana.
\v 8 Ipakitakto a kadurmenko isuna, ket pagbalinekto a ballaag kadagiti dadduma ti mapasamak kenkuana, ken agbalinto a pakaum-umsianna kadagiti tattao ti mapasamak kenkuana. Saankonto nga ipalubos a makipulapol isuna kadagiti tattaok. Ket maammoanyonto a Siak a ni Yahweh, ket addaan iti pannakabalin a mangaramid iti ibagak nga aramidek.

\s5
\v 9 Ket no adda profeta a naallilaw ket nagipadto iti saan a pudno, uray pinalubosak isuna a mangibaga iti dayta a mensahe, pukawekto isuna ken ikkatekto manipud kadagiti tattaok nga Israelita.
\v 10 Agpada a makabasolto ti profeta ken ti tao a nagkiddaw kenkuana iti pammagbaga, ket agpadadanto a dusaek.
\v 11 Ket saandakton a tallikudan dagiti Israelita, ket saandanton nga agbalin a narugit iti imatangko gapu kadagiti basolda. Isudanton dagiti tattaok, ket siakto ti Diosda. Kasta ti ibagak, Siak a ni Yahweh nga Apo."

\s5
\v 12 Inikkannak ni Yahweh iti maysa pay a mensahe. Kinunana,
\v 13 "Sika a tao, no dagiti tattao iti dadduma a pagilian ket agbasol kaniak babaen iti panangtallikudda kaniak, ken dusaek ida babaen iti saankon a panangipaay iti taraonda ken babaen iti panangiyegko iti nakaro a panagbisin tapno matay dagiti tattao ken dagiti ayup,
\v 14 uray no adda sadiay ni Noah, ni Daniel, ken ni Job, dagiti laeng bagbagida ti maisalakanda gapu iti kinalintegda. Kasta ti ipakaammok, Siak a ni Yahweh nga Apo.

\s5
\v 15 Wenno, no mangibaonak kadagiti narurungsot nga ayup iti entero a pagilian, ket darupen ken papatayenda ti adu kadagiti tattao, tapno ti panagdaliasat iti dayta a pagilian ket agbalin a napeggad unay, ken awanto ti agdaliasat iti dayta a pagilian,
\v 16 isapatak iti naganko, uray no adda iti dayta a pagilian dagidiay a tallo a lallaki, saandanto a maisalakan uray dagiti bukodda nga annak a lallaki wenno babbai manipud iti pannakapapatayda. Isudanto laeng a tallo ti maisalakan, ket agbalinto a langalang ti pagilian. Kasta ti ipakaammok, Siak a ni Yahweh nga Apo.

\s5
\v 17 Wenno, no mangibaonak kadagiti kabusor a soldado a mangpapatay kadagiti tattao ken kadagiti ayup iti entero dayta a pagilian babaen kadagiti kampilanda—
\v 18 isapatak iti naganko, uray no adda iti dayta a pagilian dagidiay a tallo a lallaki, saandanto a kabaelan nga isalakan uray dagiti bukodda nga annak a lallaki wenno babbai manipud iti pannakapapatayda. Dagiti bagbagida laeng ti maisalakanda. Kasta ti ipakaammok, Siak a ni Yahweh nga Apo.

\s5
\v 19 Wenno, no mangibaonak iti angol iti dayta a daga ket ipapatayko dagiti tattao ken dagiti ayup babaen iti angol, gapu ta nakaro ti pungtotko kadagidiay a tattao,
\v 20 isapatak iti naganko, uray no adda iti dayta a pagilian ni Noah, ni Daniel, ken ni Job, saandanto a kabaelan nga isalakan dagiti annakda a lallaki ken babbai. Dagiti bagbagida laeng ti maisalakanda gapu iti kinalintegda. Kasta ti ipakaammok, Siak a ni Yahweh nga Apo.

\s5
\v 21 Isu nga ita, kastoy ti ibagak, Siak a ni Yahweh nga Apo: Ipalak-amkonto ti uppat a banag kadagiti tattao iti Jerusalem tapno dusaek ida iti nakaro. Addanto dagiti tattao ken ay-ayup a mapapatay babaen kadagiti kampilan, ti dadduma ket matayto babaen iti nakaro a panagbisin, ti dadduma ket papatayento dagiti narurungsot nga ayup, ken ti dadduma ket matayto gapu kadagiti angol.

\s5
\v 22 Ngem addanto sumagmamano kadagiti tattaom ti agtalinaed a sibibiag, nataengan ken ub-ubbing. Umaydanto kenka, Ezekiel. Ket inton makitam dagiti makarimon a kababalin ken dagiti aramidda, maamirismonto nga adda nasayaat a rasonko iti panangipalak-amko kadagiti tattao ti Jerusalem kadagiti nakaro a didigra nga impalak-amko kadakuada.
\v 23 Inton makitam dagiti ar-aramidenda, maammoamto nga adda dagiti nasayaat a rasonko a nangaramid iti amin a banag nga impalak-amko kadakuada. Kasta ti ipakaammok, Siak a ni Yahweh nga Apo."

\s5
\c 15
\p
\v 1 Inikkannak ni Yahweh iti maysa pay a mensahe. Kinuna,
\v 2 "Anak ti tao, ti puon ti ubas ket pudno a saan a naserserbi ngem kadagiti sanga dagiti kayo iti kabakiran.
\v 3 Awan man laeng ti makaaramid iti pasok manipud kadagitoy tapno pagibitinanda iti uray ania a banag.
\v 4 Ket kalpasan a maipuruak iti apuy ti sanga ti ubas, ket mapuoran ti nagpinnungto ken nagbalinen nga uging ti tengnga daytoy, mausar kadi pay laeng dagitoy?

\s5
\v 5 Saan; no awan serserbi daytoy sakbay a napuoran, sigurado nga awan met ngarud ti pakausaranna kalpasan a mapuoran ken dumapo daytoy.
\v 6 Isu a kastoy ti kuna ni Yahweh nga Apo: Ti puon dagiti ubas ket mausar laeng a pangparubrob. Kasta met laeng ti kinaawan serserbi dagiti tattao nga agnanaed iti Jerusalem.

\s5
\v 7 Laksidekto ida. Arigna a nakalisida iti apuy, ngem addanto latta apuy a manguram kadakuada. Ket inton dusaek ida, dakayo a tattao nga agtalinaed a sibibiag, maammoanyonto a siak a ni Yahweh, inaramidkon daytoy.
\v 8 Pagbalinekto a langalang ti pagilianyo gapu ta saan a nagbalin a napudno dagiti tattaom kaniak. Kasta ti kunak, Siak a ni Yahweh nga Apo."

\s5
\c 16
\p
\v 1 Nagsao manen ni Yahweh kaniak a kunana
\v 2 "Anak ti tao, ipakaammom kadagiti tattao a taga-Jerusalem ti maipanggep kadagiti makarimon a kababalinda.
\v 3 Ibagam kadakuada, 'Kastoy ti kuna ni Yahweh nga Apo kadakayo a tattao a taga-Jerusalem: Kaskayo la iti maysa a babai a ti amana ket nagtaud iti bunggoy dagiti Amoreo ken ti inana ket nagtaud iti bunggoy dagiti Heteo.

\s5
\v 4 Iti aldaw a naipasngayka, arigna a saan a naputed ti pusegmo, ken saan a nabugguan ti bagim iti danum wenno nalinisan babaen iti asin wenno nabungon iti lampin, a kasla iti kanayon a maar-aramid kadagiti maladaga nga Israelita.
\v 5 Awan ti naasi wenno nagaramid iti naimbag kenka babaen iti panangaramidda kenka kadagitoy a banbanag. Ngem ketdi, arigna a ginuradaka. Apaman a naipasngayka ket imbellengdaka iti tay-ak tapno matayka.

\s5
\v 6 Ket arigna a limmabasak iti ayanmo ket nakitaka a nakaidda nga agkusaykusay iti bukodmo a dara. Ket kabayatan a nakaiddaka sadiay nga agkusaykusay iti bukodmo a dara, kinunak kenka, "Kayatko nga agtalinaedka a sibibiag!"
\v 7 Arigna a pinadakkelka, a kas iti panagdakkel dagiti mula iti tay-ak; dimmakkelka ket nagbalinka a kasla iti napateg nga alahas. Nagbalinka a napintas a babai, ngem lamolamoka latta.

\s5
\v 8 Idi nakitaka kalpasan iti sumagmamano a tawen, arigna nga inyukradko ti kagayko kenka a kas simbolo nga asawaenka, isu a saankan a lamolamo. Sipapasnek nga inkarik nga asawaenka ket nakitulagak kenka nga asawaenka, ket nagbalinka nga asawak.' Kastoy ti kuna ni Yahweh nga Apo.

\s5
\v 9 Ken arigna a diniguska ken inugasak ti daram ket sinapsapoanka iti lana.
\v 10 Kasla kinagayanka iti napintas a lino ken inikkanka kadagiti nangingina a pagan-anay. Kinawesanka iti nabordaan a pagan-anay ken sinandaliasanka iti lalat.
\v 11 Kasla kinabilak kadagiti pulseras dagiti imam ken iti kuwentas ti tengngedmo. Amin dagitoy a banbanag ket addaan iti napipintas nga alahas a naikapet kadagitoy.
\v 12 Kinabilak iti balitok a singsing ti agongmo ken kinabilak kadagiti aritos dagiti lapayagmo ken kinabilak iti napintas a korona ti ulom.

\s5
\v 13 Isu a kasla nakasuotka kadagiti balitok ken pirak a pang-arkos. Addaanka kadagiti pagan-anay a naaramid manipud iti nasayaat a lino ken dadduma pay a nangingina a lupot, ken addaanka iti naburdaan a kawes. Nangnanganka iti nasayaat nga arina, diro, ken lana. Sika ti kapipintasan a babai ket pinagbalinka a reyna.
\v 14 Kasta unay ti pintasmo, isu a nangngeg dagiti tattao kadagiti dadduma a nasion ti maipanggep kenka, gapu ta ammoda a Siak, a ni Yahweh nga Apo, ti namagbalin kenka a nakapimpintas unay.

\s5
\v 15 Ngem kasla nalipatam a siak ti namagbalin kenka a napintas ket rinugiam ti nagbalbalangkantis iti tunggal lalaki a lumabas, ket rinagragsakda amin ti kinapintasmo.
\v 16 Kasla nangalaka iti sumagmamano kadagiti pagan-anaymo tapno mangaramidka kadagiti napintas a disso a naarkosan a pagdaydayawam kadagiti didiosen, ket sadiay ti pakikakaiddaam kadagiti lallaki. Dagitoy a banbanag ket rumbeng a saanto a pulosen a mapasamak!

\s5
\v 17 Innalam dagiti napipintas a balitok ken pirak nga alahas nga intedko kenka ket nangaramidka kadagiti lallaki a didiosen a para kenka, tapno makikaiddaka kadakuada.
\v 18 Nangalaka kadagiti naburdaan a pagan-anaymo tapno ikawesmo kadagitoy a didiosen, ken nangpuorka kadagiti lana ken insenso iti sangoananda a kas panagdayawmo kadakuada.
\v 19 Ken indatonmo ti tinapay a naaramid manipud iti nasayaat nga arina ken ti lana ti olibo ken ti diro nga intedko a kanem, tapno mangipaay iti nabanglo a sayamusom kadagitoy a didiosen. Siak, a ni Yahweh nga Apo, ipakpakaammok a kastoy ti napasamak.

\s5
\v 20 Ket innalam uray dagiti annakmo a lallaki ken babbai a maidaton koma kaniak ket indaton ken pinapataymo ida para kadagitoy a didiosen a kasla saan a napatpateg dagitoy nga annakmo ngem iti panagbalinmo a balangkantis.
\v 21 Pinapataymo ida, isuda a kasla annakko, ket indatonmo ida a kas sakripisio kadagitoy a didiosen!
\v 22 Kabayatan dagiti amin a tiempo a nagbalbalangkantiska ken nangar-aramid kadagiti dadduma pay a makarimon a banbanag, saanmo a pinanunot ti tiempo idi a kaska la ubing unay a lamolamo ken nakaidda nga agkusaykusay iti bukodmo a dara iti tay-ak.

\s5
\v 23 Isu a Siak, a ni Yahweh nga Apo, ipakaammok a nakaam-amakto a banbanag ti mapasamak kenka. Kas kanayunan kadagiti dadduma pay a nadadangkes a banbanag nga inar-aramidmo,
\v 24 nangbangonka iti disso a pagdaydayawan kadagiti didiosen iti tunggal plasa ti siudad.

\s5
\v 25 Iti pangrugian ti tunggal kalsada ket nangbangonka iti disso a pagdaydayawan kadagiti didiosen, ken impakitam kadagiti tattao ti napintas a pammagim, indiayam ti bagim tapno makikaiddaka iti tunggal lalaki a lumabas, ket ad-adda pay a limmatakka a kas balangkantis iti inaldaw-aldaw.
\v 26 Kasla nakikakaiddaka kadagiti lallaki a taga-Egipto a sigagagar a makikaidda kenka, lallaki nga agnanaed iti asideg ti Israel. Pinagungetnak iti kasta unay gapu ta sigagagarka pay a makikaidda iti ad-adu pay kadakuada.

\s5
\v 27 Isu a dinusaka ken pinasakupko kadagiti kabusormo ti sumagmamano kadagiti nasionmo. Pinaparmekka kadagiti naagum a kabusormo a taga-Filistia; uray no nakigtotda iti nakababain a kababalinmo.
\v 28 Kasta met a kasla nakikakaiddaka kadagiti soldado a taga-Asiria, gapu ta kankanayon a kayatmo ti makikaidda kadagiti ad-adu pay a lallaki. Ket kalpasan dayta, saanka latta a napnek.
\v 29 Isu a nakikakaiddaka met kadagiti soldado a taga-Babilonia, a nasion nga addaan iti adu nga agtagtagilako, ngem uray ti panangaramidmo iti kasta ket saannaka a pinennek.

\s5
\v 30 Siak, a ni Yahweh nga Apo, ipakaammok nga idi inaramidmo amin dagitoy a banbanag, ti panagtigtignaymo a kas iti balangkantis a babai, ipakpakitam a saanmo a matengngel ti kinaderrepmo ket aramidem ti aniaman a kaykayatmo, uray no makarimon unay, ta kayatmo a mapnek dagiti tarigagaymo.
\v 31 Ngem idi nangbangonka kadagiti disso a pagdaydayawan kadagiti didiosen iti tunggal plasa ti siudad, iti kinapudnona ket nalablabeska ngem iti balangkantis gapu ta agpabpabayad dagiti balangkantis. Nagkedkedka nga umawat iti kuwarta a kas bayad dagiti inar-aramidmo!

\s5
\v 32 Kaska la iti babai a makikamkamalala: Ad-adda a kaykayatmo ti makikakaidda kadagiti ganggannaet ngem iti asawam.
\v 33 Mabaybayadan dagiti balangkantis, ngem kasla sika ti mangmangted kadagiti sagut kadagiti amin a kaayan-ayatmo; pasuksukam ida tapno umayda kenka manipud iti sadinoman tapno kaiddaendaka.
\v 34 Isu nga uray no agtigtignayka a kas iti balangkantis, iti kinaagpaysona ket sika ti kasupadi dagiti balangkantis! Imbes nga isuda ti mangted kenka iti kuwarta, sika ketdi ti mangmangted iti kuwarta kadagiti lallaki tapno kaiddaendaka!

\s5
\v 35 Ngarud, dakayo a tattao a taga-Jerusalem, dakayo a kasla iti balangkantis, dumngegkayo iti ibagbaga ni Yahweh nga Apo kadakayo!
\v 36 Ibagbagana a ti inaramidmo ket kasla tinarigagayam dagiti amin nga adda iti aglawlawmo ket nakikakaiddaka kadakuada ken kadagiti lallaki a didiosen nga inaramidmo, isu nga uray dagiti bukodmo nga annak ket indatonmo kadagitoy.
\v 37 Isu a ti aramidek ket arigna nga ummongekto dagidiay nga impagarupmo a nangay-ayat kenka ken dagidiay a ginurguram. Ummongekto ida iti aglawlawmo tapno rautendaka, ken ti aramidekto ket kasla labusanka ket makitadakanto inton naan-anay a lamolamoka.

\s5
\v 38 Dusaenkanto a kas iti pannakadusa dagiti babbai a makikamkamalala ken dagiti mangpappapatay kadagiti tattao. Balsenkanto ken pukawenkanto gapu ta napalalo ti pungtotko kenka.
\v 39 Palubosakto dagiti kabusormo nga impagarupmo a nangay-ayat kenka a rebbaenda dagiti disso a pagdaydayawam ken dagiti pagano nga altarmo. Labusandakanto ken alaenda dagiti pagan-anay ken alahasmo, ket panawandakanto nga awanan iti maiyabbong iti bagim.

\s5
\v 40 Mangiyegdanto iti adu a tattao a mangdarup kenka, ket uborendakanto dagita a tattao ken rangrangkayendakanto babaen kadagiti kampilanda.
\v 41 Puorandanto dagiti balaymo ken dusaendakanto kabayatan buybuyaen ti adu a babbai. Bay-akto nga aramidenda ti kastoy tapno makasursuroka gapu iti napalalo a kinabalangkantismo ken gapu iti panangbaybayadmo kadagiti tattao tapno kaiddaendaka.
\v 42 Kalpasanna, saankanton a kaunget. Saanakton nga agimon gapu ta mapnekakto iti pannakadusam.

\s5
\v 43 Nalipatam dagiti nakaskasdaaw a banbanag nga inaramidko kenka kadagiti napalabas a tawtawen. Pinagungetnak iti kasta unay gapu kadagiti amin a dakes a banbanag nga inaramidmo. Kas kanayunan kadagiti amin a makarimon a banbanag nga inaramidmo, nagaramidka pay kadagiti adu a basol a mainaig iti seksual. Isu nga ipakaammok a Siak, a ni Yahweh nga Apo, a dusaenkanto gapu iti panangaramidmo kadagitoy a banbanag.

\s5
\v 44 Dagiti tattao a kayatda ti mangadaw kadagiti proberbio ket adawendanto daytoy a proberbio maipanggep kenka: 'Agtigtignay dagiti annak a babbai a kas iti panagtigtignay dagiti inada.'
\v 45 Kaska la iti inam; kasla ginulibanna ti asawana ken dagiti annakna. Kaska la kadagiti kakabsatmo a babbai, a nanggura met kadagiti assawada ken kadagiti annakda. Kasla ti amam ket nagtaud iti bunggoy dagiti Amoreo ken ti inam ket nagtaud iti bunggoy dagiti Heteo.

\s5
\v 46 Ken kasla a ti inauna a kabsatmo a babai ket ti Samaria, ket isuna ken dagiti annakna a babbai ket agnanaed iti amianam, ken kasla ti inaudi a kabsatmo a babai ket ti Sodoma, ken dagiti annakna a babbai ket agnanaed iti abagatanmo.

\s5
\v 47 Saanmo laeng a tinulad dagiti makarimon a kababalinda, ngem dagdagus a nagbalinka a dakdakes ngem isuda.
\v 48 Siak, a ni Yahweh nga Apo, sipapasnek nga ipakaammok nga iti naganko a sibibiag, dagiti tattao nga agnanaed iti Sodoma ken kadagiti dadduma a kabangibang a siudad ket saanda pulos nga inaramid dagiti makarimon a banbanag nga inaramidyo a tattao a taga-Jerusalem ken dagiti dadduma a lugar iti Juda.

\s5
\v 49 Dagitoy dagiti basbasol dagiti tattao nga agnanaed iti Sodoma a kasla kadagiti kakabsatmo a babbai: natangsitda ken saanda a pinanunot a madusadanto. Saanda nga inkaskaso dagiti nakurapay ken dagiti agkasapulan a tattao iti aglawlawda.
\v 50 Napasindayag dagiti tattao a taga-Sodoma ken kadagiti kabangibang a siudad ken nagar-aramidda kadagiti makarimon a banbanag iti imatangko, isu a pinukawko ida idi nakitak ti ar-aramidenda.

\s5
\v 51 Kasta met a saan nga inaramid dagiti tattao a taga-Samaria ti kagudua man laeng koma dagiti adu a basbasol nga ar-aramidem. Ad-adu ti inaramidmo a makarimon a banbanag ngem iti inaramidda. Pinagbalinmo nga agparang a nasaysayaat dagiti tattao a taga-Samaria ngem sika.
\v 52 Nakarkaro dagiti basolmo ngem dagiti basolda, isu a kasla nadangdangkeska ngem isuda. Isu a dusaenka iti nakarkaro ngem iti panangdusak kadakuada. Isu a maibabain ken madadaelto ti dayawmo.

\s5
\v 53 Nupay kasta, addanto aldaw a parang-ayekto manen dagiti tattao a taga-Sodoma ken taga-Samaria ken dagiti kabangibangda a siudad. Ket parang-ayenkanto met manen.
\v 54 Mababainkanto iti kasta unay gapu kadagiti nadangkes a banbanag nga inaramidmo, ket daytanto ti mangted iti karit kadagiti tattao kadagidiay a siudad.
\v 55 Rumang-ayto manen dagiti tattao a taga-Sodoma ken taga-Samaria, ken rumang-aykanto met ken dagiti tattao kadagiti kabangibang a siudad.

\s5
\v 56 Linaismo dagiti tattao a taga-Sodoma idi napasindayagka,
\v 57 sakbay a naiparangarang a nadangdangkeska ngem isuna. Ket ita, um-umsien ken lalaisendaka dagiti amin a tattao a taga-Edom ken dagiti tattao a taga-Filistia.
\v 58 Ket madusdusaka gapu kadagiti amin a dakes a kababalinmo ken gapu kadagiti dadduma pay a makarimon a banbanag nga inaramidmo. Kastoy ti ibagbaga ni Yahweh kenka!

\s5
\v 59 Kastoy ti kunak, Siak, a ni Yahweh nga Apo: itultuloyko ti panangdusak kenka a kas iti dusa a maikari kenka, gapu ta babaen iti pananglaksidmo iti katulagak kenka, linaismo dayta a napasnek a katulagan nga inkarim a tungpalen.

\s5
\v 60 Ngem saanko a lipaten ti katulagak kenka idi un-unana a panawen, ket makitulagak kenka iti tulag nga agpaut iti agnanayon.
\v 61 Ket mapanunotmonto dagiti inar-aramidmo, ket mababainkanto gapu kadagidiay a banbanag inton pasangbayem dagiti tattao a taga-Sodoma ken taga-Samaria, siudad a maiyarig nga annakmo a babbai, ngem saandanto a maaddaan iti isu met laeng a katulagan nga aramidek kenka.

\s5
\v 62 Ipasdekkonto ti katulagak kenka, ket maammoamto a Siak, a ni Yahweh, ket adda pannakabalinko a mangaramid iti ibagak nga aramidek.
\v 63 Ket inton mapakawanka kadagiti amin a basol nga inaramidmo, mapanunotmonto dagiti amin a basbasol nga inaramidmo ket mababainkanto. Saankanton pulos nga agpalangguad manen gapu kadagitoy, gapu ta maibabainkanto." Siak, ni Yahweh nga Apo, imbagak daytoy!' Kastoy ti pakaammo ni Yahweh nga Apo."

\s5
\c 17
\p
\v 1 Inikkannak ni Yahweh iti maysa pay a mensahe. Kinunana,
\v 2 "Anak ti tao, ibagam daytoy nga istoria kadagiti tattao ti Israel, a kas maysa a panangiladawan.
\v 3 Ibagam kadakuada, 'Kastoy ti kuna ni Yahweh nga Apo: Adda maysa nga agila nga addaan kadagiti napipigsa a payak ken atitiddog a napipintas a dutdot nga agduduma ti marisna ti timmayab a napan idiay Lebanon. Ginammatanna ti murdong ti kayo a sedro
\v 4 ket tinukkolna daytoy. Kalpasanna, impan ti agila daytoy idiay Canaan, maysa a pagilian nga addaan iti adu nga agtagtagilako, ket inmulana daytoy iti maysa kadagiti siudad sadiay.

\s5
\v 5 Kalpasanna, nangala dayta nga agila iti maysa a bukel manipud iti pagilianyo ket inmulana daytoy iti nadam-eg a talon. Inmulana daytoy kas iti panangimula dagiti tattao iti maysa a kimmawayan a kayo, iti igid ti waig a nabuslon ti danumna.
\v 6 Dimmakkel daytoy ket nagbalin a nababa nga ubas a nagsaknap iti daga. Nagpangato dagiti sangana iti ayan ti agila, ngem nagpauneg dagiti ramutna iti daga. Isu a nagbalin daytoy a narukbos nga ubas ket adu dagiti sangana ken bulongna.

\s5
\v 7 Ngem adda sabali pay a dakkel nga agila nga addaan iti napipigsa a payak ken napipintas a dutdot. Ket dadduma kadagiti ramut ti ubas, nagturong met iti ayan dayta nga agila, ken kasta met dagiti sangana, mangnamnama a makaiyeg kenkuana dayta nga agila iti ad-adu pay danum.
\v 8 Napasamak dayta iti laksid ti kinapudno a naimula ti ubas iti nadam-eg a daga, nga addaan iti nabuslon a danum, a makagapu no apay nga addaan daytoy iti adu a sanga ken adu a bunga ken nagbalin a nalangto unay nga ubas.

\s5
\v 9 Ket kalpasan a maibagam dayta kadagiti tattao, ibagam kadakuada, 'Kastoy ti kuna ni Yahweh nga Apo: Saanto nga agtalinaed a nalangto dayta nga ubas. Parutento daytoy ti agila a nangimula iti daytoy, ken marurosto amin dagiti bungana ken magangonto dagiti bulongna. Ket saannanto a kasapulan ti napigsa a tao wenno adu a tattao a mangparut iti daytoy.
\v 10 Uray no maiyakar a maimula dayta nga ubas, saanto a dumakkel. Inton pul-oyan daytoy ti napudot nga angin nga agtaud iti daya, naan-anayto a magango daytoy, iti mismo a nakaimulaanna!’”

\s5
\v 11 Kalpasanna, inted ni Yahweh daytoy a mensahe kaniak;
\v 12 "Damagem kadagitoy a nasukir nga Israelita, 'Ammoyo kadi ti kaipapanan daytoy a pangngarig?' Ibagam kadakuada nga iladladawan daytoy a napan ti ari ti Babilonia idiay Jerusalem a kakuyogna ti armadana ket tiniliwda ti ari ti Juda ken dagiti opisialna ket inkuyogna ida idi nagsublida idiay Babilonia.

\s5
\v 13 Kalpasanna, innalana ti maysa kadagiti asideg a kabagian ti ari, dinutokanna ti maysa kadakuada a kas ari, ket nakitulag isuna kenkuana, pinilitna isuna nga isapatana nga agtalinaed isuna a napudno. Impan pay ti ari ti Babilonia idiay Babilonia dagiti dadduma pay a napapateg nga umili ti Juda,
\v 14 tapno saanto manen a bumileg ti pagarian ti Juda. Gandat ti ari ti Babilonia a pukawen ti pagarian ti Juda no saan a tungpalen dagiti tattao dayta a katulaganna iti ari ti Babilonia.

\s5
\v 15 Bimmusor ti ari ti Juda iti ari ti Babilonia babaen iti panangibaonna kadagiti opisial a mapan idiay Egipto tapno agkiddaw kadakuada kadagiti kabalio ken maysa a dakkel nga armada a makigubat iti armada ti Babilonia. Ngem awan duadua a saanto nga agballigi ti ari ti Juda. Dagiti mangiturturay a kas kadagita ken saan nga agtungpal iti napasnek a katulagan ket saanto a makalisi iti pannusa.
\v 16 Siak a ni Yahweh nga Apo, isapatak iti naganko, matayto iti Babilonia ti ari ti Juda, iti siudad a nangisaadan kenkuana ti ari ti Babilonia a kas ari ti Juda. Matayto isuna gapu ta saanna a tinungpal ti napasnek a katulagan ken saanna nga inaramid ti inkarina nga aramidenna.

\s5
\v 17 Saanto a matulongan ti ari ti Egipto ken ti dakkel unay nga armadana ti ari ti Juda: Mangigabsuonto dagiti soldado ti Babilonia kadagiti daga a pagbatayanda nga umuli kadagiti pader ti siudad ken mangikabilda kadagiti banbanag a pangrebbada kadagiti pader. Sumrekdanto iti Jerusalem ket papatayendanto dagiti adu a tattaona.
\v 18 Saan a tinungpal ti ari ti Juda ti napasnek a katulagan babaen iti saanna a panangtungpal iti katulagan. Uray sipapasnekna nga inkarina nga agpaituray isuna iti ari ti Babilonia, nangibaon isuna kadagiti opisial nga agkiddaw iti tulong manipud iti Egipto. Saanto ngarud isuna a makalisi iti panangdusa ti ari ti Babilonia.

\s5
\v 19 Isu a kastoy ti kuna ni Yahweh nga Apo: Isapatak iti naganko, ipadusakto ti ari ti Juda gapu iti panangiyaleng-alengna iti napasnek a katulaganna iti ari ti Babilonia ket kalpasanna saanna a tinungpal daytoy, agsipud ta linabsing daytoy ti ninamnamak.
\v 20 Arigna a mangisarwagakto iti iket tapno matiliw isuna, ket matiliwto isuna babaen iti daytoy. Matiliwto isuna ken maipanto idiay Babilonia ket madusanto gapu ta bimmusor kaniak.
\v 21 Kaaduanto kadagiti soldado a mangpadas nga aglibas ket mapapatayto babaen kadagiti kampilan dagiti kabusorda, ket dagiti makalasatto, maiwarawaranto iti amin a paset. Ket maammoanyonto a siak a ni Yahweh ket addaan iti pannakabalin a mangaramid iti ibagak nga aramidek.

\s5
\v 22 Kastoy pay ti kuna ni Yahweh nga Apo: "Arigna a mangalaakto iti saringit manipud iti murdong ti maysa a natayag unay a kayo a sedro, ket imulak daytoy iti sabali a lugar. Imulakto daytoy iti tapaw ti nangato unay a bantay.
\v 23 Arigna nga imulakto daytoy iti maysa a bantay iti Israel, ket agtubonto daytoy ket agbalin a narukbos a kayo a serdo. Nadumaduma a kita dagiti bilbillit ti agumokto iti daytoy a kayo, ket malinungandanto kadagiti sangana.

\s5
\v 24 Arigna nga aminto dagiti kaykayo iti tay-ak ket maammoanda a siak a ni Yahweh, dadaelek dagiti natatayag a kaykayo ket padakkelek dagiti nababa a kaykayo. Pagangoek dagiti nalalangto a kaykayo, ken palangtoek dagiti nagango a kaykayo. Siak a ni Yahweh ti nangibaga iti daytoy, ket awan duadua nga aramidek ti imbagak nga aramidek."

\s5
\c 18
\p
\v 1 Nagsao manen ni Yahweh kaniak a kunana,
\v 2 "Dakayo a tattao ket ad-adawenyo daytoy a proberbio ken ibagbagayo a maipanggep daytoy iti Israel: 'Nangan dagiti nagannak kadagiti naalsem nga ubas, ngem dagiti annakda ti naalino.' Kayatna a sawen daytoy a panpanunotenyo a masapul nga agsagabakayo gapu kadagiti basol nga inaramid dagiti kapuonanyo.

\s5
\v 3 Ngem Siak, a ni Yahweh nga Apo, ipakaammok nga iti naganko a sibibiag, dakayo nga Israelita ket saanyonton nga ibaga daytoy a proberbio.
\v 4 Amin a sibibiag ket kukuak. Karaman dagiti annak ken dagiti nagannakda; kukuak amin ida. Ket dagiti nagbasol ti matayto gapu kadagiti basbasolda.

\s5
\v 5 Isu a kas pangarigan adda iti nalinteg a tao a kanayon a mangar-aramid iti nalinteg ken husto.
\v 6 Saan isuna a mangan iti karne a naidaton kadagiti didiosen kadagiti tapaw dagiti turod; saan isuna a dumawat iti tulong kadagiti didiosen a kas iti ar-aramiden dagiti dadduma iti Israel. Saan isuna a makikaidda iti asawa dagiti dadduma wenno iti maysa a babai kabayatan iti binulan a panagreglana.

\s5
\v 7 Saanna nga idadanes dagiti tattao; kanayonna nga isubli dagiti isalda dagiti bumulod kenkuana iti kuwarta sakbay iti ililinnek ti init. Saanna a takawan dagiti tattao. Ikkanna iti taraon dagiti mabisin a tattao. Ikkanna iti pagan-anay dagiti tattao nga agkasapulan kadagiti pagan-anay.
\v 8 Inton agpautang isuna iti kuwarta kadagiti tattao, saanna a paanakan daytoy. Saanna nga aramiden dagiti banag a dakes. Kanayon a sililinteg isuna a mangeddeng.
\v 9 Tungtungpalenna a sipupudno dagiti amin a lintegko. Dayta a tao ket pudpudno a nalinteg; agtalinaedto isuna a sibibiag. Dayta ti karik, Siak a ni Yahweh nga Apo.

\s5
\v 10 Ngem kas pangarigan addaan dayta a tao iti anak a lalaki nga agar-aramid iti rinaranggas, a mammapatay kadagiti tattao ken mangar-aramid iti aniaman kadagitoy a banbanag, uray no saan nga inaramid ti amana ti aniaman kadagitoy.
\v 11 Mangan isuna iti karne a naidaton kadagiti didiosen kadagiti tapaw dagiti turod. Kaiddaenna dagiti assawa dagiti dadduma.

\s5
\v 12 Idadanesna dagiti nakurapay ken agkasapulan a tattao. Takawanna dagiti tattao. No adda ti mangted kenkuana iti maysa a banag tapno patalgedanna a bayadanna ti kuwarta a binulodna, ti saan a nalinteg a tao ket saanna pulos nga isubli kenkuana daytoy sakbay iti ililinnek ti init. Dumawat isuna iti tulong kadagiti didiosen. Agaramid isuna kadagiti dadduma pay a makarimon a banbanag.
\v 13 Inton agpautang isuna, paanakanna daytoy. No ipagarupyo a pagtalinaedek a sibibiag ti kasta a tao, nagbiddutkayo. Gapu ta inaramidna amin dagitoy a makarimon a banbanag, awan duadua a papatayek isuna, dayta ket gapu met laeng iti basolna.

\s5
\v 14 Ngem kas pangarigan addaan dayta a tao iti anak a lalaki a makakita kadagiti amin a basol nga inaramid ti amana, ngem saanna nga aramiden dagitoy a banbanag.
\v 15 Saan isuna a mangan iti karne a naidaton kadagiti didiosen kadagiti tapaw dagiti turod. Saan isuna a dumawat iti tulong kadagiti didiosen. Saanna a kaiddaen dagiti assawa dagiti dadduma.

\s5
\v 16 Saanna nga idadanes ti siasinoman. No pautanganna ti maysa a tao, saanna a dawaten iti dayta a tao nga ikkanna isuna iti pammatalged a bayadannanto ti kuwarta. Saanna a takawan ti siasinoman. Ikkanna iti taraon dagiti agkasapulan iti taraon. Ikkanna iti pagan-anay dagiti agkasapulan kadagiti pagan-anay.
\v 17 Saan isuna nga agbasol, saan a kasla iti amana, ken saanna a paanakan inton agpautang iti kuwarta. Tungtungpalenna a sipupudno dagiti amin a lintegko. Siguradoek a saan a matay dayta a tao gapu kadagiti basol ti amana; awan duadua nga agtalinaed isuna a sibibiag.

\s5
\v 18 Ngem siguradoek a matay ti amana gapu kadagiti basbasol nga inaramidna, gapu ta sinaur ken tinakawan ti amana dagiti tattao, ken nangaramid pay kadagiti dadduma a banag a dakes.

\s5
\v 19 No saludsodenyo, 'Apay a rumbeng a saan nga agsagaba ti anak gapu kadagiti dakes nga inaramid ti amana?', Isungbatko a gapu ta inaramid ti anak ti nalinteg ken husto ken nagtulnog kadagiti amin a lintegko, awan duadua nga agtalinaed ngarud isuna a sibibiag.
\v 20 Dagiti nagbasol ti matayto gapu kadagiti basolda. Saanko a dusaen dagiti tattao gapu ta nagbasol dagiti nagannakda, wenno gapu ta nagbasol dagiti annakda. Gunggonaak dagiti tattao nga agbibiag a sililinteg, ket dusaek dagiti nadangkes a tattao, dagiti agbibiag iti kinadakes.

\s5
\v 21 Ngem no isardeng ti nadangkes a tao dagiti amin a dakes nga aramidna iti napalabas, ket no tungpalenna a sipupudno dagiti amin a lintegko, ken no aramidenna ti nalinteg ken husto, awan duadua nga agtalinaedto isuna a sibibiag; Saanko isuna a papatayen.
\v 22 Saanko isuna a dusaen gapu kadagiti basol nga inaramidna iti napalabas. Gapu kadagiti nasayaat a banbanag nga inaramidna manipud iti dayta a tiempo, palubosak nga agtalinaed isuna a sibibiag.

\s5
\v 23 Ipakaammok, Siak, a ni Yahweh nga Apo, a pudpudno a saanak a maragsakan maipapan iti pannakatay dagiti nadangkes a tattao. Ngem ketdi, maragsakanak no isardengda dagiti nadangkes a banag nga ar-aramidenda ket agtalinaedda a sibibiag a kas pagbanaganna.

\s5
\v 24 Ngem no isardeng ti nalinteg a tao ti panangaramidna iti nasayaat ket agbasol ken aramidenna ti isu met laeng a makarimon a banbanag nga ar-aramiden dagiti nadangkes a tattao, awan duadua a saanko a pagtalinaeden isuna a sibibiag. Saanko a panunoten dagiti nalinteg nga inaramidna iti napalabas. Gapu ta saanna a sipupudno nga inaramid dagiti makaay-ayo kaniak, ken gapu kadagiti amin a basol nga inaramidna, awan duadua a matayto isuna.

\s5
\v 25 Ngem kunayo a saan a nalinteg dagiti ar-aramidek, Siak, a ni Yahweh. Dakayo nga Israelita, denggenyo ti ibagak: Awan duadua a saan a ti ar-aramidek ti saan a nalinteg;, no diket ti agtultuloy nga ar-aramidenyo ti saan a nalinteg.
\v 26 No tallikudan ti nalinteg a tao ti panangaramidna iti nalinteg ket agbasol, matay isuna gapu iti panangaramidna kadagitoy a basol.

\s5
\v 27 Ngem no tallikudan ti nadangkes a tao ti panangar-aramidna kadagiti nadangkes a banbanag ket aramidenna ti nalinteg ken husto, maisalakanna ti bagina manipud iti pannakatay.
\v 28 Gapu ta naamirisna dagiti amin a dakes a banag nga inaramidna ket tinallikudanna ti panangaramidna kadagitoy, awan duadua a palubosak isuna nga agbiag. Saankonto a papatayen isuna.

\s5
\v 29 Ngem dakayo nga Israelita, ibagbagayo a saan a nalinteg dagiti aramidko. Dakayo a tattao ti Israel, kankanayon a nalinteg dagiti aramidko. Dakayo ti dakes dagiti aramidna.
\v 30 Ngarud, dakayo nga Israelita, Siak, a ni Yahweh nga Apo ket ukumekto ti tunggal maysa kadakayo segun iti inaramidyo. Agbabawikayo! Tallikudanyo dagiti amin a nadangkes a kababalinyo! Ket saankayonto a dadaelen gapu kadagiti dakes a banbanag nga inaramidyo.

\s5
\v 31 Isardengyo ti panangar-aramidyo kadagiti nadangkes a banbanag; pabaroenyo ti panunotyo. Dakayo nga Israelita, kayatyo kadi a papatayenkayo gapu kadagiti basbasolyo?
\v 32 Siak, a ni Yahweh nga Apo, ipakaammok a saanak a maragsakan no mataykayo. Isu a tallikudanyo dagiti basbasolyo ket agtalinaedkayo a sibibiag!"

\s5
\c 19
\p
\v 1 Kinuna ni Yahweh kaniak,
\v 2 "Ezekiel, kantaem daytoy a naliday a kanta iti panagdung-aw nga agbalinto a pangngarig maipapan kadagiti mangidadaulo iti Israel. Ibagam kadagiti Israelita, 'Ti inam ket kasla natured a kabaian a leon a nangpadakkel kadagiti urbonna iti nagbabaetan dagiti dadduma a leon.
\v 3 Sinuroanna ti maysa kadakuada nga aganup kadagiti dadduma nga ayup a papatayenda, ken nasursuro pay ti anakna ti mangpatay ken manglamut kadagiti tattao.
\v 4 Idi nangngeg dagiti tattao manipud kadagiti dadduma a nasion ti maipanggep kenkuana, pinalab-oganda isuna babaen iti abut. Ket impanda isuna iti Egipto babaen iti panangusarda iti kallawit a pinangguyodda kenkuana.

\s5
\v 5 Inur-uray ti inana ti panagsublina, ngem iti saan a nagbayag ket insardengnan ti mangnamnama a mapasamak dayta. Isu a nangpadakkel manen isuna iti maysa pay nga urbon a nagbalin met a narungsot unay.
\v 6 Nakianup isuna kadagiti dadduma a leon, nangan-anupda kadagiti ayup a papatayenda, ket nasursurona pay uray ti mangpapatay ken manglamut kadagiti tattao.
\v 7 Rinamesna dagiti balo dagiti biktimana, ken dinadaelna dagiti siudadda. No agngernger isuna iti napigsa, mabutbuteng ti tunggal maysa ket pinanawanda dagiti amin a kukuada.

\s5
\v 8 Isu a pinanggep dagiti tattao kadagiti dadduma a nasion a papatayen isuna; ket adda lallaki nga immay manipud kadagiti adu a lugar a mangiwayat iti iket kenkuana. Natiliwda isuna babaen iti daytoy.
\v 9 Inkabilda isuna iti landok a tangkal ket ingguyodda babaen kadagiti kallawit ken kawar; impanda isuna iti ari ti Babilonia. Sadiay, impupokda isuna iti kulongan iti bantay, isu nga awan ti nakangngeg kadagiti turod ti Israel iti panagngerngerna manen.' Kasta met, ibagam kadagiti Israelita:

\s5
\v 10 'Maiyarig ti inam iti ubas a naimula iti igid ti waig. Adda adu a danumna, isu nga adu ti sangana ken nagbunga iti adu.
\v 11 Dimmakkel dayta nga ubas ket nagbalin a nataytayag ngem kadagiti amin a kayo iti asidegna; makita ti tunggal maysa a natibker unay daytoy ken nalangto. Ket mayat dagitoy a sanga a maaramid a setro a mangisimbolo iti pannakabalin ti ari.

\s5
\v 12 Ngem nakaunget iti kasta unay ni Yahweh, isu a pinarutna ti ubas sana imbelleng iti daga a no sadino ket pinagango ti napudot unay nga angin manipud iti disierto dagiti amin a bungana. Nalaylay dagiti natibker a sanga ket naipuor iti apuy.
\v 13 Ita, immula ni Yahweh dayta nga ubas iti napudot ken natikag a disierto.

\s5
\v 14 Adda apuy a nang-uram iti ruting daytoy, agingga a dimmanon kadagiti sanga; pinuoran daytoy dagiti amin a bungana. Ita, awan ti uray maysa a natibker a sanga a nabati; saandanto pulos a maaramid a setro ti ari.' Daytoy a kanta a pangdung-aw ket masapul a sililiday a makanta."

\s5
\c 20
\p
\v 1 Agarup pito a tawen kalpasan nga impandakami nga Israelita dagiti taga-Babilonia iti dagada, iti maikasangapulo nga aldaw iti maikalima a bulan iti dayta a tawen, immay kaniak ti sumagmamano a panglakayen dagiti Israelita tapno saludsudenda no adda mensahek kadakuada manipud kenni Yahweh.

\s5
\v 2 Ket nagtimek ni Yahweh kaniak para kadakuada. Kinunana,
\v 3 "Anak ti tao, kasaom dagiti panglakayen ket ibagam kadakuada a kastoy ti kuna ni Yahweh nga Apo: 'Kunayo nga umaykayo agsaludsod no adda mensahek para kadakayo, ngem iti naganko a sibibiag a Dios, saankayo palubosan nga agsaludsod iti aniaman a mensahe kaniak.'

\s5
\v 4 No situtulokka a mangballaag kadakuada, ipalagipmo kadakuada dagiti makarimon a banbanag nga inaramid dagiti kapuonanda.
\v 5 Ket ibagam kadakuada, 'Iti aldaw a pinilikayo nga Israelita tapno agbalin a kukuak, napasnek a nagsapataak kadagiti kapuonanyo kabayatan nga addada pay laeng idiay Egipto. Kinunak kadakuada, "Siak ni Yahweh a Diosyo.
\v 6 Iruarkayo iti Egipto ket idalankayo a mapan iti daga a pinilik para kadakayo. Isu ti kadadam-egan ken kapipintasan a daga iti lubong.

\s5
\v 7 Masapul nga ibelleng ti tunggal maysa kadakayo dagiti makarimon a didiosen nga ay-ayatenyo, ken dagiti didiosen a nasursuroyo a dayawen idiay Egipto, a gapu kadagitoy ket inaramidyo a saankayo a maikari nga awatek. Ibagbagak daytoy kadakayo, Siak, a ni Yahweh a Diosyo.'"

\s5
\v 8 Ngem nagrebeldeda kaniak. Saandak nga ipangag. Saanda nga imbelleng dagiti makarimon a didiosen nga ay-ayatenda; saanda a linaksid dagiti didiosen a nakitada idiay Egipto. Isu a gapu ta kaungetko ida, kinunak a dusaek ida idiay Egipto.
\v 9 Ngem gapu iti dayawko, inkeddengko ti mangaramid iti maysa a banag kadagiti tattaom tapno saandak a katawaan dagiti dadduma a bunggoy dagiti tattao ken saanda nga ibaga nga awananak iti pannakabalin. Inkeddengko a makitada ti panangiruarko kadagiti tattaok idiay Egipto.

\s5
\v 10 Ngarud, indauloak dagiti tattaoyo a rimmuar iti Egipto ket impanko ida idiay let-ang.
\v 11 Intedko kadakuada dagiti amin a linteg ken alagadek, tapno pagtulnoganda dagitoy, ket iti kasta agbiagda iti napaut.
\v 12 Kasta met nga impaulogko ti Aldaw a Panaginana tapno agbalin daytoy a palagip iti nagbaetanmi, tapno maammoanda a Siak ni Yahweh, a nangilasin kadakuada gapu iti dayawko.

\s5
\v 13 Ngem nagrebelde met kaniak dagiti Israelita iti let-ang. Saanda a nagtulnog kadagiti bilinko; linaksidda dagitoy, uray no pumaut ti panagbiagda no agtulnogda kadagitoy, ken saanda a nginilin ti Aldaw a Panaginana. Isu a kinunak a dadaelek ida iti let-ang, gapu ta dayta ti mangipakita a kaungetko unay ida.
\v 14 Ngem manen, tapno saandak a katawaan dagiti dadduma a bunggoy dagiti tattao, inkeddengko ti mangaramid iti maysa a banag tapno ipakitak kadagidiay a bunggoy dagiti tattao a mannakabalinak latta a kas idi nakitada nga inruarko dagiti tattaok idiay Egipto.

\s5
\v 15 Sipapasnek nga insapatak kadagiti kapuonanyo idiay let-ang a saanko ida nga ipan iti daga nga inkarik nga itedko kadakuada, daga a kadadam-egan ken kapipintasan iti lubong.
\v 16 Insapatak daytoy gapu ta linaksidda ken saanda a nagtulnog kadagiti amin a lintegko, ken gapu ta saanda a nginilin ti Aldaw a Panaginana. Ken impapilitda ti agdaydayaw kadagiti didiosenda.
\v 17 Ngem kinaasiak latta ida, isu a saanko ida a dinadael idiay let-ang.

\s5
\v 18 Kinunak kadagiti annakda, a simmaruno a henerasion, 'Saanyo nga ar-aramiden dagiti kankanayon nga ar-aramiden dagiti nagannakyo. Saanyo a dayawen dagiti didiosenda nga isu ti makagapu a saankayo a maikari nga awatek.
\v 19 Siak ni Yahweh a Diosyo. Sipapasnek nga agtulnogkayo kadagiti linteg ken bilinko.
\v 20 Ngilinenyo ti Aldaw a Panaginana, tapno babaen iti panangaramidyo iti dayta, ipalagip daytoy kadakayo a kukuakayo.'

\s5
\v 21 Ngem nagrebelde met kaniak dagiti annakda. Saanda a nagtulnog kadagiti lintegko uray no agbiag iti napaut ti siasinoman nga agtulnog kadagitoy; ken saanda met a nginilin ti Aldaw a Panaginana. Isu a kinunak manen a papatayek amin ida idiay let-ang, ket iti kastoy a wagas, saanakon nga agunget.
\v 22 Ngem saanko nga inaramid dayta. Inkeddengko iti maminsan pay a mangaramidak iti maysa a banag tapno saan nga agkatawa dagiti dadduma a bunggoy dagiti tattao a nakakita nga inruarko dagiti tattaoyo idiay Egipto ken saanda nga ibaga a napukawko ti pannakabalinko.

\s5
\v 23 Isu nga insapatak kadakuada idiay let-ang nga iwarawarak ida kadagiti adu a bunggoy dagiti tattao,
\v 24 gapu ta linaksid ken saanda a nagtulnog kadagiti amin a lintegko, ken gapu ta saanda a nginilin ti Aldaw a Panaginana--ken gapu ta sigagagarda nga agdayaw kadagiti didiosen a dinaydayaw dagiti nagannakda.

\s5
\v 25 Isu a pinalubosak met ida nga agtulnog kadagiti linteg a saan a nasayaat, linteg a saan makatulong kadakuada nga agbiag iti napaut.
\v 26 Pinalubosak ida a mangaramid kadagiti banbanag a namagbalin kadakuada a saan a maikari nga awatek: pinalubosak ida a puoranda dagiti umuna nga annakda a kas daton. Pinalubosak ida nga aramidenda dayta tapno agbutengda kadagiti bagbagida, ken tapno maammoanda a Siak a ni Yahweh, ket addaan iti pannakabalin a mangaramid iti ibagak nga aramidek.

\s5
\v 27 Ngarud, anak ti tao, agsaoka kadagiti Israelita. Ibagam daytoy kadakuada, 'Kastoy ti kuna ni Yahweh nga Apo kadakayo: Kastoy ti maysa a wagas a panangibabain dagiti kapuonanyo kaniak babaen iti panangtallikodda kaniak.
\v 28 Kalpasan nga impanko ida iti daga nga inkarik nga ited kadakuada, tunggal makakitada iti nangato a turod wenno dakkel a nalangto a kayo, sadiay ti pangidatonanda kadagiti sakrifisioda kadagiti didiosen. Nangidatonda kadagitoy a didiosen, ket dayta ti nangpaunget kaniak. Indatagda kadagitoy a didiosen dagiti datonda a mangipaay iti nabanglo nga ayamuom, ken imbukbokda dagiti datonda nga arak a para kadagitoy a didiosen.
\v 29 Ket sinaludsodko kadakuada, "Siasino ti nangibaga kadakayo nga agdayawkayo iti kastoy a lugar a pagdaydayawan, iti tapaw daytoy a turod?" Isu a maaw-awagan dagitoy agingga ita iti Bamah, a ti kaipapananna ket 'disso a pagdaydayawan kadagiti didiosen kadagiti turod'.'"

\s5
\v 30 Ngarud, ibagam daytoy kadagiti Israelita: "Kastoy ti kuna ni Yahweh nga Apo: Apay a tultuladenyo dagiti aramid dagiti kapuonanyo nga isu ti pakaigapuan a saankayo a maikari nga awatek? Agtigtignaykayo a kas kadagiti balangkantis a pinanawanda dagiti assawada gapu kadagiti dadduma a lallaki. Iti kastoy met laeng a wagas, pinanawandak tapno agdayawkayo kadagiti makarimon a didiosen.
\v 31 Idi puoranyo dagiti annakyo a kas daton, inaramidyo a saankayo a maikari nga awatek. Kasta met idi agrukbabkayo kadagiti didiosenyo. Dakayo nga Israelita, rumbeng kadi a palubosankayo nga agsaludsod kaniak tapno idalankayo iti aniaman a banag? Ibagak, Siak a ni Yahweh nga Apo, nga iti naganko a sibibiag, saankayo a sungbatan no agsaludsodkayo kaniak.
\v 32 Kunayo, 'Kayatmi ti agbalin a kas kadagiti dadduma a bunggoy dagiti tattao iti lubong. Kayatmi ti agdayaw kadagiti didiosen a naaramid manipud iti kayo ken bato a kas iti ar-aramidenda.' Ngem saanto pulos a mapasamak ti kayatyo.

\s5
\v 33 Ibagak, Siak a ni Yahweh, nga iti naganko a sibibiag, usarek ti naindaklan a pannakabalinko a mangituray kadakayo, ken tapno ipakitak a kapungtotkayo.
\v 34 Ummongenkayonto babaen iti naindaklan a pannakabalinko manipud kadagiti lugar a nangiwarawaraak kadakayo.
\v 35 Ipankayonto iti maysa a let-ang a napalawlawan kadagiti dadduma a nasion. Sadiay, ukomenkayonto bayat a kitkitaenkayo.

\s5
\v 36 Dusaenkayonto a kas iti panangdusak kadagiti kapuonanyo idiay let-ang iti asideg ti Egipto.
\v 37 Pagpaiturayenkayto kaniak; Pilitenkayonto nga agtulnog iti katulagak kadakayo.
\v 38 Dadaelekto dagiti tattao nga adda kadakayo nga agrebelde kaniak. Uray no iruarkonto ida iti Babilonia a pagnanaedanda ita, saandanto a sumrek iti Israel. Ket maammoanyonto a Siak ni Yahweh nga addaan iti pannakabalin a mangaramid iti ibagak nga aramidek.

\s5
\v 39 Kadakayo nga Israelita, kastoy ti kunak, Siak a ni Yahweh nga Apo: Mapankayo agdayaw itan kadagiti didiosenyo, tunggal maysa kadakayo. Ngem kalpasanna, awan duadua nga ipangagdakton ken saandakton nga ibabain babaen iti panangipanyo kadagiti sagutyo kadagiti didiosenyo.

\s5
\v 40 Siak a ni Yahweh nga Apo, ipakpakaammok nga iti tapaw ti Sion a nasagradoan a turodko iti Israel, iyegyonto dagiti sagutyo kaniak ket awatekto dagitoy. Kiddawekto kadakayo nga iyegyo dagiti sagut ken datonyo sadiay, ken dagiti sakrifisioyo nga ilasinyo para kaniak.
\v 41 Inton iruarkayo kadagiti dadduma a nasion a nakaiwarawaraanyo, awatenkayonto a kaskayo la iti nabanglo nga insenso. Ipakitak kadagiti tattao kadagiti dadduma a nasion nga inlasinko ti bagik a kas nasantoan, tapno maidayawak.

\s5
\v 42 Ket, inton ipankayo iti daga ti Israel, a daga nga inkarik nga ited kadagiti kapuonanyo, maammoanyonto a Siak a ni Yahweh ti nangaramid iti daytoy.
\v 43 Ket sadiay Israel malagipyonto no kasano ti panagbiagyo iti napalabas, dagiti aramid a namagbalin kadakayo a saan a maikari kaniak, ket kagurayonto dagiti bagbagiyo gapu kadagiti dakes a banbanag nga inar-aramidyo.
\v 44 Inton aramidek dagitoy kadakayo nga Israelita, aramidek dagitoy tapno salaknibak ti dayawko saan ket a gapu kadagiti dakes nga aramid ken kababalinyo, maammoanyonto dakayo nga Israelita, a Siak a ni Yahweh ket addaan iti pannakabalin a mangaramid iti ibagak nga aramidek." Kastoy ti pakaammo ni Yahweh nga Apo.

\s5
\v 45 Nagtimek pay ni Yahweh kaniak a kunana,
\v 46 "Anak ti tao, sumangoka iti abagatan. Ikasabam ti mapasamak iti dayta a natikag a daga, iti kabakiran dayta a lugar.
\v 47 Ibagam iti kabakiran iti akin-abagatan a let-ang ti Israel: Denggem daytoy a mensahe nga ibagbaga ni Yahweh nga Apo maipanggep kenka: Dandaniakon mangpasged iti apuy iti ayanmo, ket puoranto daytoy dagiti amin a kayom, dagiti nalangto ken dagiti nagango. Awanto ti makaiddep iti daytoy. Ket sinitento ti apuy ti rupa ti tunggal maysa nga agnanaed iti dayta a disso, manipud iti abagatan agingga iti amianan.

\s5
\v 48 Makitanto ti amin a Siak a ni Yahweh ti nangpasged iti daytoy nga apuy, ket awanto ti makaiddep iti daytoy."
\v 49 Ket kinunak, "O Yahweh nga Apok, saandak a patpatien dagiti tattao no mangibagaak iti kastoy kadakuada. Kunkunada maipanggep kaniak, 'Mangibagbaga laeng isuna kadagiti pangngarig.'"

\s5
\c 21
\p
\v 1 Inikkannak ni Yahweh iti maysa pay a mensahe. Kinunana,
\v 2 “Anak ti tao, sumangoka iti abagatan. Bumusorka kadakuada. Ikasabam ti maibusor iti abagatan ken agipadtoka iti maibusor iti kabakiran ti akin-abagatan a let-ang ti Juda.
\v 3 Ibagam kadakuada, ‘Kastoy ti kuna ni Yahweh: Bumusorak kadakayo, ket kasla asutekto ti kampilanko manipud iti kaluban daytoy tapno agpapada a papatayek dagiti nalinteg ken nadangkes a tattao!

\s5
\v 4 Isu a ti aramidekto kenka ket kasla asutekto ti kampilanko manipud iti kaluban daytoy ket tagbatenka. Papatayekto ti tunggal maysa, agraman dagiti nalinteg ken nadangkes a tattao. Pukawekto ti tunggal maysa, manipud abagatan agingga iti amianan.
\v 5 Ket maammoanto ti amin a Siak a ni Yahweh, ket kasla tinagbatko dagiti tattao babaen iti kampilanko, ket saankonto nga isubli manen daytoy iti kalubanna.’

\s5
\v 6 Ngarud, anak ti tao, agasugka! Agasugka iti nakalidliday ken nakasasaem iti sangoanan dagiti Israelita.
\v 7 Ket inton saludsodenda kenka, ‘Apay aya nga agas-asugka?’ Ibagam kadakuada a gapu daytoy kadagiti damag a mangngegdanto iti mabiit. Agbutengdanto amin iti kasta unay, ket saandanto a malapdan ti panagtigerger dagiti imada, ket agkutukotto dagiti tumengda a kasla danum nga agayus. Addanto maysa a nakaro a didigra a mapasamak iti mabiit. Kastoy ti ikarkari ni Yahweh nga Apo.”

\s5
\v 8 Inikkannak ni Yahweh iti maysa pay a mensahe. Kinunana,
\v 9 “Anak ti tao, agipadtoka ken ibagam kadakuada, ‘Kastoy ti kuna ti Apo: Patademek ti kampilanko ken pasilengek daytoy.

\s5
\v 10 Mapatademto daytoy tapno mapapatayko ti adu a tattao babaen iti daytoy; pasilengekto daytoy tapno aggilap a kasla kimat. Saanto nga agrambak dagiti tattao ti Juda maipanggep iti setro ti arida, gapu ta saanto a malapdan daytoy ti kampilan nga um-umay a maibusor iti daytoy.
\v 11 Isu a pasilengekto ti kampilan, ket kalpasanna, maiyawatto daytoy iti maysa a tao a naikari a mangiggem iti daytoy. Natadem itan daytoy; aggilgilap itan daytoy, nakasagana nga usaren ti mammapatay!

\s5
\v 12 Isu nga, Anak ti tao, agsangit ken agdung-awka, gapu ta usarekto ti kampilanko tapno papatayek dagiti tattaok, agraman dagiti mangidadaulo ti Israel. Papatayento ida dayta a kampilan agraman amin dagiti dadduma pay a tattaok; papatayento amin ida ti kampilanko, isu a danugenyo dagiti barukongyo a mangipakita a nalidaykayo.
\v 13 Umadanin a suotek dagiti tattaok, ket anianto pay ti mapasamak no saan a malapdan ti setro ti ari? Kastoy ti kunak, Siak a ni Yahweh.

\s5
\v 14 Isu nga, Anak ti tao, agipadtoka; agtipatka a mangipakita a nakaro unay ti panaglidaymo gapu iti mapasamakto. Tagtagbatento ti kampilanko dagiti tattaok; daytoy ket kampilan a pangpapatay iti adu a tattao, bayat a rarautek ida iti sadinoman a disso.

\s5
\v 15 Tapno agbuteng iti nakaro dagiti tattao ken tapno adunto a tattao ti mapapatay, nangikabilak kadagiti soldado iti tunggal ruangan ti siudad, a nakasagana a mangpapatay kadagiti tattao. Aggilapto ti kampilanko a kasla kimat, bayat a patpatayen dagiti soldado dagiti tattao.
\v 16 Ibagak iti kampilanko nga agtagbat iti kannawan ken iti kannigid, ken agsawar iti sadinoman a paset agingga nga awan mabati nga uray maysa a sibibiag.
\v 17 Kalpasanna, agtipatakto gapu iti balligi; ket kalpasan dayta, saanakton nga agpungtot pay. Awan duadua a mapasamakto dayta, gapu ta Siak a ni Yahweh, ti nangibaga iti daytoy.’ “

\s5
\v 18 Inikkannak ni Yahweh iti maysa pay a mensahe. Kinunana,
\v 19 “Anak ti tao, agaramidka iti mapa ti dua a kalsada a pagnaan ti ari ti Babilonia a kaduana ti armadana. Inton pumanawda iti mismo nga ilida, makadanondanto iti maysa a poste a pagilasinan, no sadino ket nagudua ti maymaysa a kalsada iti dua a paset.
\v 20 No turongenda ti maysa kadagita a kalsada, rautendanto ti siudad ti Rabba, a kabisera ti bunggoy dagiti Ammonita. No turongenda met ti maysa a kalsada, makadanondanto iti Juda ken Jerusalem, ti siudad a napalikmutan kadagiti pader.

\s5
\v 21 Inton makadanon ti armada ti Babilonia iti nagsangaan ti kalsada, agsardengto ti armada, bayat nga ar-aramiden ti ari ti seremonia a mangikeddeng no sadino a kalsada ti turongenda. Mangibiatto isuna kadagiti pana; kalpasanna, makiumanto isuna kadagiti didiosen no sadino a dalan ti turongenda, ket sukimatennanto ti dalem ti maysa a karnero.
\v 22 Babaen iti makannawan nga imana, pidutennanto ti pana a namarkaan iti nagan ti Jerusalem. Ket bilinennanto dagiti soldadona a mapanda iti Jerusalem. Inton makadanonda sadiay, isaganada dagiti maso tapno rebbaenda dagiti pader, ket kalpasanna, bilinento ida ti ari a papatayenda dagiti tattao. Ipukkawdanto ti gubat, ken isaganadanto dagiti maso a pangrebbada kadagiti ruangan. Mangibuntondanto iti daga a pagbatayanda iti bangir dagiti pader iti aglikmut ti siudad, ken mangipasdekdanto kadagiti pader a maibusor iti siudad.
\v 23 Dagiti tattao iti Jerusalem a nagkari nga agtalinaed a napudno iti Babilonia ket maamirisdanto a dagidiay a salamangka ket biddut. Maamirisdanto a saan a rumbeng a rarauten ida ti armadana. Ngem palagipannanto ida iti saanda a panagbalin a napudno nga isu ti nagbasolanda, ken ibagananto a linabsingda ti nakitulaganda kenkuana.

\s5
\v 24 Isu nga ibagam kadagiti Israelita a kastoy ti kuna ni Yahweh nga Apo: ‘Dakayo a tattao, impalubosyo a makita ti amin a tattao a suksukirenyo ti ari ti Babilonia, ket babaen iti panangaramidyo iti dayta, impakitayo nga amin a banag nga aramidenyo ket basol. Isu a tiliwennakayonto ket ipannakayo idiay Babilonia.’

\s5
\v 25 Ken ibagam pay iti ari ti Juda, ‘Sika a nadangkes unay nga ari ti Israel, dimtengen ti tiempo iti pannakataymo. Dimtengen ti tiempo ni Yahweh a panangdusana kenka.’
\v 26 Ket Siak a ni Yahwen nga Apo, kastoy ti ibagak kadakayo maipanggep iti ariyo iti Jerusalem, ‘Ussobem ti turbante ti ari ken ti koronana, gapu ta ita ket nagbaliwen ti tiempo a saan a kas iti kallabes. Ikkakto iti bileg dagiti awanan, ket ibabainkonto dagiti addaan iti bileg.
\v 27 Palubosakto dagiti tattao iti Babilonia a mangdadael iti amin a banag. Awanto ti agbalin nga ari manen iti Juda, awan agingga nga umay ti maikari nga agbalin nga ari. Ket pagbalinekto isuna nga ari.’

\s5
\v 28 Ket sika, Anak ti tao, agipadtoka ken ibagam a kastoy ti kunak, Siak a ni Yahweh nga Apo, ibagam ti maipanggep kadagiti bunggoy dagiti Ammonita, ken ti maipanggep iti panangibabainkonto kadakuada: Kunaento ti ari ti Babilonia, ‘Dagiti soldadok ket addaan kadagiti kampilan; inasutda dagidiay a kampilan tapno papatayenda ti adu a tattao. Pinasilengda dagitoy tapno papatayenda dagiti tattao, ken tapno aggilap a kasla kimat.
\v 29 Dagiti profetayo nga Ammonita ket nangibagada kadakayo kadagiti saan a pudno a sirmata maipapan iti mapasamakto kadakayo, ken nangaramidda kadagiti awan serserbina a seremonia a nangted kadakayo kadagiti saan a pudno a mensahe. Isu a tagbatento dagiti kampilan dagiti tengnged dagidiay a nadangkes a tattao; daytoyen ti tiempo tapno papatayen ida dagiti soldadok; ti aldaw a panangdusak kadakuada gapu ta saanda a nagbalin a napudno kaniak.’

\s5
\v 30 Ngem iti saan nga agbayag, isublinto dagiti soldado ti Babilonia dagiti kampilanda kadagiti kaluban dagitoy, gapu ta agpatingganto ti tiempo ti panangpapatayda kadagiti kabusorda. Ukomekto dagitoy a tattao iti Babilonia iti pagilian a nakaiyanakanda.
\v 31 Idissuorkonto ti pannusak kadakuada. Gapu ta nakaro unay ti pungtotko kadakuada, puoranto ida ti ipuyotko kadakuada a kasla apuy. Palubosakto a sakupen ida dagiti naranggas a lallaki, dagiti lallaki nga nalaing iti panangpapatay kadagiti tattao.

\s5
\v 32 Maiyarigdanto iti pagsungrod a mapuoran. Agsayasayto ti darada iti bukodda a daga. Awanto ti siasinoman a makalagip kadakuada iti kaanuman. Awan duadua a mapasamakto dayta, gapu ta Siak a ni Yahweh, ti nangibaga iti daytoy.”

\s5
\c 22
\p
\v 1 Inikkannak ni Yahweh iti maysa pay a mensahe. Kinunana,
\v 2 “Anak ti tao, nakasaganaka kadin a mangikeddeng kadagiti tattao ti Jerusalem? Siudad daytoy a napnoan kadagiti mammapatay. Ipalagipmo kadakuada dagiti amin a makarimon a banbanag nga inar-aramidda.
\v 3 Ket kunaem, ‘Kastoy ti kuna ni Yahweh nga Apo: Babaen iti panangpappapatayyo kadagiti tattao ken babaen iti panangtulawyo kadagiti bagbagiyo, babaen iti panangar-aramidyo kadagiti didiosen, dakayo a tattao iti daytoy a siudad ket inyegyo kadagiti bagbagiyo ti tiempo a panangdusak kadakayo.

\s5
\v 4 Nakabasolkayo gapu iti panangpapatayyo kadagiti awan basolna a tattao. Pinagbalinyo a saankayo a maikari nga awatek, babaen iti panangaramidyo kadagiti didiosenyo. Inyasidegyo ti tiempo ti panaggibusyo. Isu a pagbalinenkayonto a pagkakatawaan dagiti dadduma a bunggoy ti tattao ket lalaisendakayonto.
\v 5 Pagkakatawaandakayonto dagiti tattao kadagiti pagilian nga asideg kadakayo ken dagiti tattao nga agnanaed iti adayo kadakayo, gapu ta napnoan ti siudadyo iti riribuk, ken gapu ta pinagbalinyo a saankayo a maikari nga awatek, Siak a mismo a Diosyo.

\s5
\v 6 Panunotenyo no kasano nga inusar ti tunggal ariyo nga Israelita ti turayda tapno mangpapatay kadagiti tattao.
\v 7 Saan a raraemen dagiti tattaoyo dagiti nagannakda; indadanesda dagiti ganggannaet; ginundawayanda dagiti ulila ken kadagiti balo.
\v 8 Tinulawanyo dagiti nasantoan a lugarko ken banbanag a kukuak, ken saanyo a ngilinen ti Aldaw a Panaginana ket imbilangyo daytoy a kas kadawyan laeng nga aldaw.
\v 9 Kaduayo dagiti lallaki nga agibagbaga kadagiti inuulbod tapno mapapatay ti dadduma a tao. Adda pay dagiti mangmangan iti taraon a naidaton kadagiti didiosen kadagiti lugar a pagdaydayawan, ken ipakpakitada pay ti panangar-aramidda kadagiti dakes nga aramid.

\s5
\v 10 Adda pay dagiti lallaki a kaiddaenda dagiti asawa ti amada, ken lallaki a kaiddaenda dagiti babbai kabayatan iti panagbinulanda.
\v 11 Adda dagiti lallaki a mangkaidda iti asawa ti dadduma a lallaki. Sumagmamano kadagiti lallakiyo ket kakaiddaenda dagiti manugangda a babbai wenno dagiti mismo a kakabsatda a babbai wenno babbai a kabsatda iti ama wenno iti ina.
\v 12 Kakaduayo dagiti lallaki nga umaw-awat kadagiti pasuksok tapno papatayenda ti dadduma a tao. Paanakanyo dagiti kuarta nga ipautangyo kadagiti tattao. Bimmaknangkayo babaen iti panangpilpilityo kadagiti tattao nga ikkandakayo iti kuarta. Ket linipatdak, Siak a ni Yahweh.

\s5
\v 13 Isu a dusaenkayonto gapu kadagiti panagtaktakawyo ken kadagiti mammapatay a makipagnanaed kadakayo.
\v 14 Inton malpasko ti panangdusak kadakayo, saankayonton nga agbalin a natured. Siak a ni Yahweh, imbagak ti aramidekto kadakayo, ket ipatungpalkonto daytoy.
\v 15 Iwarawarakayonto kadagiti adu a bunggoy ti tattao, ket pasardengenkayonto iti panagbasbasolyo.
\v 16 Inton makita dagiti tattao kadagiti sabali a nasion a naibabainkayo, maammoanyonto a Siak a ni Yahweh, addaanak iti pannakabalin a mangaramid iti imbagak nga aramidek.’ ”

\s5
\v 17 Kalpasanna, kinuna ni Yahweh kaniak,
\v 18 “Anak ti tao, dagiti tattaom nga Israelita ket nagbalinen nga awan serserbina kaniak. Maiyarigda a rugit kaniak. Maiyarigda iti awan serserbina a gambang, lata, landok, ken buli a nabati kalpasan a narunaw ti pirak iti napudot unay nga urno.
\v 19 Ngarud, kastoy ti kunak, Siak a ni Yahweh: Gapu ta nagbalinkayo amin a kasla rugit, ummongenkayonto iti Jerusalem.

\s5
\v 20 Mangikabkabil dagiti tattao kadagiti mineral nga addaan iti pirak, gambang, landok, buli ken lata iti napudot unay nga urno ket runawenda dagitoy iti gumilgil-ayab nga apuy tapno mapuoran ti kinarugit daytoy. Kastoyto met laeng ti panangummongko kadakayo iti uneg ti Jerusalem, ket gapu ta nakaro ti pungtotko kadakayo, ti aramidekto ket arigna a runawenkayonto.
\v 21 Arigna nga ipuypuyotko kadakayo ti napudot nga anges a mangipakita iti nakaro a pungtotko, ket arigna a marunawkayonto,
\v 22 arigna a marunawkayonto a kas iti pannakarunaw ti pirak iti urno, ket maammoanyonto a Siak a ni Yahweh, ket dinusakayo.”

\s5
\v 23 Inikkannak ni Yahweh iti maysa pay a mensahe. Kinunana,
\v 24 “Anak ti tao, ibagam kadagiti tattao nga Israelita, ‘Makarimonkayo iti imatang ni Yahweh, naan-anay a saan a maikari kenkuana. Isu a kapungtotnakayo ni Yahweh. Awanto ti tudo iti pagilianyo.’
\v 25 Maiyarig dagiti mangidadauloda kadagiti leon a mangrangrangkay kadagiti ayup a pinapatayda. Daddadaelen dagiti mangidadaulo dagiti tattaoda. Takawenda dagiti kinabaknang ken dadduma pay a napapateg a banbanag manipud kadagiti tattao, ken adu a lallaki ti patpatayenda isu a mabalo dagiti assawada.

\s5
\v 26 Linabsing dagiti papadida dagiti lintegko ken saanda a rinaem dagiti nasantoan a banbanag a kukuak babaen iti panangibagbagada nga awan ti nagdumaan dagiti nasagradoan a banbanag kadagiti saan a nasagradoan, ken babaen iti saanda a panangikaskaso kadagiti lintegko maipanggep iti panagngilin iti Aldaw a Panaginana. Gapu iti daytoy, saandakon a raraemen.
\v 27 Maiyarig dagiti opisialda kadagiti lobo a mangrangrangkay iti ayup a pinapatayda. Mangpapatayda kadagiti tattao tapno alaenda dagiti kuartada.
\v 28 Padpadasen a kaluban dagiti profetada dagidiay a basol babaen iti panangibagbagada a nakaawatda kadagiti sirmata a naggapu iti Dios, ngem babaen iti panangtedda kadagiti saan a pudno a mensahe. Kunkunaenda, ‘Kastoy ti kuna ni Yahweh ng Apo,’ idinto ta awan a pulos ti imbagak kadakuada.

\s5
\v 29 Pilpiliten dagiti Israelita dagiti dadduma tapno mangtedda iti kuarta kadakuada, ken taktakawanda dagiti tattao. Idaddadanesda dagiti napanglaw, ken gungundawayanda dagiti ganggannaet nga adda kadakuada babaen iti saan a patas a panangtratoda kadakuada kadagiti pangukoman.

\s5
\v 30 Nangbirokak kadakuada iti maysa a tao a mabalin nga agkararag para kadagiti tattao ken mangikaluya kadakuada tapno saan a kasapulan a dadaelek ida. Ngem awan pulos ti nabirokak.
\v 31 Isu a gapu ta nakaro ti pungtotko kadakuada, dusaekto ida iti nakaro gapu kadagiti amin a nadangkes a banbanag nga inar-aramidda. Awan duadua a mapasamakto dayta gapu ta Siak a ni Yahweh nga Apo, ti nangibaga iti daytoy.”

\s5
\c 23
\p
\v 1 Kinuna kaniak ni Yahweh,
\v 2 “Anak ti tao, dumngegka iti daytoy a pangngarig maipapan iti Jerusalem ken Samaria. Adda idi dua a babbai nga annak ti maysa nga ina.
\v 3 Nagnaedda idiay Egipto. Ket sipud pay iti kinabalasitangda, nagbalinda a balangkantis. Iti dayta a daga, rinamas dagiti lallaki dagiti susoda a saan pay a nakutkuti.
\v 4 Ni Ohola ti inauna, ket ni Oholiba ti inaudi a kabsatna. Iti saan a nagbayag, ket kasla nagbalinda nga assawak. Saan a nagbayag, nangipasngayda kadagiti annak a lallaki ken babbai. Ibagbagi ni Ohola ti Samaria, ken ibagbagi ni Oholiba ti Jerusalem.

\s5
\v 5 Intultuloy ni Ohola ti kinabalangkantisna idinto ta asawak isunan. Tinarigagayanna ti makikaidda kadagiti ay-ayatenna—dagiti soldado manipud Asiria.
\v 6 Sumagmamano kadakuada ket opisial ti armada ken mangidadaulo. Nakakawesda kadagiti napipintas a maris ube nga uniporme. Natataerda amin nga agtutubo a lallaki a kumakabalio.
\v 7 Nagtignay isuna a kasla balangkantis kadagiti amin a napapateg nga opisial ti Asiria. Saankon a maawat isuna a kas kukuak, gapu ta daydayawenna amin dagiti didiosen dagiti lallaki a kayatna a pakikaiddaan.

\s5
\v 8 Idi balasitang isuna idiay Egipto, rinugianna ti kinabalangkantisna, ken intulokna dagiti agtutubo a lallaki a ramasenda dagiti susona ken kaiddaenda isuna; idi baket isunan, saanna nga insardeng ti kinabalangkantisna.
\v 9 Isu nga intulokko dagiti soldado a taga-Asiria, a kayatna pakikaiddaan, a sakupenda isuna.
\v 10 Linabusanda isuna. Impanawda dagiti annakna. Ket kalpasanna, pinatayda isuna babaen iti kampilan. Rinugian dagiti dadduma a babbai a pagsasaritaan ti maipanggep iti pannakaibabainna iti kasta unay, ken ti maipanggep iti pannakaikarina nga agsagaba.

\s5
\v 11 Nakita ti inaudi a kabsatna a ni Oholiba dagidiay a banbanag a napasamak kenni Ohola, ngem maysa met laeng isuna a balangkantis, ket nakarkaro pay ti tarigagayna a makikaidda kadagiti lallaki ngem iti panagtarigagay ti inauna a kabsatna.
\v 12 Kayat met laeng ni Oholiba ti makikaidda kadagiti soldado a taga-Asiria. Ti dadduma kadakuada ket opisial ti armada ken mangidadaulo. Nakakawesda amin kadagiti napipintas nga uniporme. Natataerda amin nga agtutubo a lallaki. Ken kumakabalioda amin.
\v 13 Nakitak ti inar-aramidna a nakaigapuan a saankon a mabalin nga awaten isuna, a kas iti inauna a kabsatna.

\s5
\v 14 Ngem nakarkaro pay a dakes a banbanag ti inaramidna. Nakakita isuna kadagiti ladawan dagiti lallaki a taga-Babilonia kadagiti pader, a napinturan iti nalabbaga.
\v 15 Dagiti lallaki iti ladawan ket nakabarikes ken adda nagaatiddog a turbante kadagiti uloda. Aminda ket kaing-ingasda dagiti opisial manipud iti Babilonia nga agsaksakay kadagiti karuahe.

\s5
\v 16 Apaman a nakitana dagidiay a ladawan, kayatnan ti makikaidda kadagidiay a lallaki, ket nangibaon isuna kadagiti mensahero a mapan kadakuada iti Babilonia.
\v 17 Ket immay ngarud kenkuana dagiti soldado manipud iti Babilonia, ket kinaiddada isuna iti kamana. Kalpasanna, kinadurmenna ida ket pinanawanna ida.

\s5
\v 18 Ngem idi intultuloyna ti pangipakpakitana iti kinabalangkantisna ken ti panangipakpakitana iti kinalamolamona kadagiti sabali a tattao, naumaak kenkuana ket inlaksidko isuna a kas iti panangilaksidko iti inauna a kabsatna.
\v 19 Ngem kimmarkaro pay ti kinaderrepna, bayat iti pananglagipna iti kinabalasitangna idi mangrugrugi pay laeng isuna a kas maysa a balangkantis idiay Egipto.

\s5
\v 20 “Sadiay, kayatnan ti makikaidda kadagiti mangay-ayat kenkuana, a ti mabagbagida ket atiddog unay, a kas iti mabagbagi dagiti asno, ken ti panagparuar dagiti mabagbagida ket adu, a kas iti panagparuar dagiti kabalio.”
\v 21 Isu a tinarigagayanna ti agbalin a balangkantis a kasla idi balasitang pay laeng isuna, idi rinamas dagiti lallaki idiay Egipto dagiti susona a saan pay a nakutkuti.

\s5
\v 22 Ibagbaginakayo ni Oholiba, dakayo a tattao iti Jerusalem. Isu a kastoy ti kunak, Siak a ni Yahweh nga Apo: Dagidiay a soldado a nangayat kenka ngem tinallikudam ida gapu ta kinadurmenmo ida—pagpungtotek ida kenka. Pagsubliekto ida ket rautendaka iti sadinoman a disso—
\v 23 dagiti soldado manipud Babilonia ken ti amin a lugar idiay Babilonia, ken dagiti kakaduada manipud iti rehion ti Pekod, Soa, ken Koa, ken amin nga armada ti Asiria. Wen, aminda ket natataer nga agtutubo a lallaki, opisial ti armada ken mangidadaulo, ken opisial a nalatak unay, aminda ket kumakabalio.

\s5
\v 24 Rautendakanto dagiti adu nga armadada a nakaigam, nakasakayda kadagiti karuahe ken iguyguyodda dagiti kariton a nakailuganan dagiti kasapulan ti armada. Palikmutandakanto, addaandanto kadagiti dadakkel ken babassit a kalasag, ken nakahelmetda. Itulokkonto a sakupen ken dusaendaka a kas iti wagas ti panangdusada kadagiti kabusorda.
\v 25 Gapu ta kasta unay ti pungtotko kenka, bay-akto ida a mangaramid iti kayatda kenka gapu iti pungtotda. Isinadanto dagiti agong ken dagiti lapayagmo. Kalpasanna, dagiti nabatbati a sibibiag, papatayendanto ida babaen kadagiti kampilanda. Ipanawdanto dagiti annakmo, ket kaslanto maysa nga apuy daytoy a manguram kadagiti kaputotam.

\s5
\v 26 Pigisendanto dagiti pagan-anaymo ken alaendanto dagiti napipintas nga alahasmo, ket ipanawdanto amin dagitoy.
\v 27 Iti kasta a wagas, mapasardengkonto ti kinaderrepmo a nangrugi idi nagbalinka a balangkantis iti Egipto. Saanmonton a tarigagayan pay nga aramiden dagidiay a banbanag; saanmonton a lagipen pay ti maipanggep iti inaramidmo iti Egipto.

\s5
\v 28 Kastoy ti kunak, Siak a ni Yahweh nga Apo: Dagiti kinaguram, dagiti kinaumaam ken kadagiti pinanawam—umadanin a palubosak ida a mangraut kenka.
\v 29 Naranggasdanto; ipanawdanto amin dagiti banbanag a kukuam. Panawandakanto a naan-anay a lamolamo, ket makitanto ti amin a pudno launay a balangkantiska.

\s5
\v 30 Gapu kadagiti inar-aramidmo ket madusakanto iti kasta a wagas; nabayagen a maysaka a naderrep a balangkantis; nakikaiddaka kadagiti lallaki kadagiti dadduma a nasion, ket pinaneknekam a rumbeng laeng a saanka nga awaten, gapu ta nagdaydayawka kadagiti didiosenda.
\v 31 Nagtignayka a kas kadagiti tattao iti Samaria, isuda a kas iti inauna a kabsatmo. Isu a dusaenkanto a kas iti pannakadusada.

\s5
\v 32 Kastoy ti kunak, Siak a ni Yahweh nga Apo: Agsagabakayonto a kas iti panagsagaba dagiti tattao inton uminumda iti kasta unay ti paitna nga arak a naikabil iti maysa a kopa. Kaslakanto imminum iti kopa a naginuman dagiti tattao ti Samaria; maysa a dakkel ken nauneg ti lansadna a kopa. Gapu ta uminomka iti naikabil iti dayta a kopa, adunto a tattao ti manglais ken mangumsi kenka, gapu ta adu ti mainum a naikabil iti dayta a kopa.

\s5
\v 33 Inton mabartekka iti kasta unay, aglidaykanto iti kasta unay, gapu ta ti pananginummo iti nagian dayta a kopa ket dadaelennakanto; panawandakanto ti amin. Kastoyto ti mapasamak kadagiti tattao ti Samaria, isuda a kas iti kabsatmo.
\v 34 Inumemto amin ti likido a linaon dayta a kopa; kalpasanna, buongemto dayta a kopa ket usarem dagiti nabuong a pidaso ti kopa a mangsugat iti barukongmo gapu ta aglidaykanto iti kasta unay. Awan duadua a mapasamakto dayta, gapu ta Siak a ni Yahweh, ti nangibaga iti daytoy.

\s5
\v 35 Ngarud, kastoy ti kunak, Siak a ni Yahweh nga Apo: Gapu ta linipat ken linaksidnak, rumbeng laeng a dusaenka gapu iti kinaderrep ken iti kinabalangkantismo."

\s5
\v 36 Kinuna ni Yahweh kaniak, "Anak ti tao, ukomem dagiti tattao kadagidiay a dua a siudad nga ibagbagi da Ohola ken Oholiba. Masapul nga ipalagipmo kadakuada dagiti makarimon a kababalinda.
\v 37 Kasla nakikamalalada ken pimmatayda kadagiti tattao. Nagbalinda a saan a napudno kaniak gapu iti panagdaydayawda kadagiti didiosen. Pinuoranda a kas daton dagiti bukodda nga annak a kukuak.

\s5
\v 38 Nagaramidda kadagiti dadduma pay a nakababain a banbanag. Tinulawanda ti templok ken imbilangda ti Aldaw a Panaginana a kasla kadawyan laeng nga aldaw.
\v 39 Iti isu met laeng nga aldaw a panangidatonda kadagiti annakda kadagiti didiosenda, simrekda iti templok nga isu ti makagapu a saan a maikari dayta a lugar a pangdaydayawan kaniak. Inaramidda dagitoy a banbanag iti mismo a balayko!

\s5
\v 40 Nangipatulodda kadagiti mensaheda kadagiti lallaki kadagiti adayu a pagilian. Ket bayat nga um-umay dagidiay a lallaki, indigusan ida dagiti dua nga agkabsat, pinintaanda dagiti kidayda ken nagaruatda kadagiti napipintas nga alahas.
\v 41 Nagtugawda iti maysa a napintas a pagiddaan, nga adda lamisaan iti sangoanan daytoy a nangikabilanda iti insensok ken lanak.

\s5
\v 42 Saan a nagbayag, adda ariwawa dagiti nakaad-adu a tattao iti aglawlawda. Kadagitoy a nakaad-adu a tattao, adda lallaki manipud Seba nga immay a naggapu idiay disierto ti Arabia. Pulserasanda dagiti takkiag dagitoy a dua nga agkabsat, ken balangatanda ida kadagiti napipintas a korona.

\s5
\v 43 Ket kinunak iti bagik maipanggep iti dayta a babai a naruam a makikaidda kadagiti adu a lallaki, "Ita, dagidiay a lallaki ket agtignayda kenkuana a kasla maysa isuna a balangkantis, gapu ta pudno a kasta ti kababalinna.'
\v 44 Isu a kinaiddada da Ohola kenni Oholiba, kas iti pannakikakaidda dagiti lallaki kadagiti balangkantis.
\v 45 Ngem kednganto ida dagiti nalilinteg a lallaki tapno madusada, kas iti pannakadusa dagiti babbai a nakikamalala ken nangpatay iti padada a tao, gapu ta dagidiay a babbai ket nakikamalala ken pimmatayda iti padada a tao.

\s5
\v 46 Isu a kastoy ti kunak, Siak a ni Yahweh nga Apo, "Mangiyegka iti bunggoy a mangraut iti Samaria ken Jerusalem, ket palubosam dayta a bunggoy a butbutngenda dagiti tattao kadagidiay a siudad; palubosam dayta a bunggoy a takawanda ida.
\v 47 Uborento ida dayta a bunggoy tapno matayda; rangrangkayendanto ida babaen kadagiti kampilanda, papatayendanto dagiti annakda, ken uramendanto dagiti babbalayda.

\s5
\v 48 Iti kasta a wagas, mapasardengkonto ida iti kinaderrepda. Agserbinto daytoy a kas ballaag kadagiti dadduma a babbai a saanda a tuladen dagiti ar-aramidenyo, dakayo a tattao ti Jerusalem.
\v 49 Dusaenkayonto, dakayo a tattao ti Jerusalem gapu iti kinaderrepyo ken panangdaydayawyo kadagiti didiosen. Kalpasan daytoy, maammoanyonto a Siak a ni Yahweh, ket addaan iti pannakabalin a mangaramid iti imbagak nga aramidek."

\s5
\c 24
\p
\v 1 Agarup siam a tawenen kalpasan ti panangipan dagiti taga-Babilonia kadakami nga Israelita iti dagada, iti maikasangapulo nga aldaw ti maikasangapulo a bulan iti dayta a tawen, kastoy ti mensahe nga inted kaniak ni Yahweh:
\v 2 “Anak ti tao, isuratmo ti aldaw iti daytoy a bulan. Iti daytoy nga aldaw, pinalawlawanen ti armada ti ari ti Babilonia ti Jerusalem.

\s5
\v 3 Ibagam ti maysa a pangngarig kadagidiay a nasukir nga Israelita nga adda iti Babilonia. Kastoy ti ibagam kadakuada: Kastoy ti kuna ni Yahweh nga Apo: ‘Mangibukbokka iti danum iti kaldero a paglutoan ket isaangmo ti kaldero iti apuy.
\v 4 Ipisokmo iti kaldero ti sumagmamano a pidaso ti karne ti pinartim a maysa kadagiti kasayaatan a karnerom: ipisokmo ti luppo ken ti abaga, a kasasayaatan. Kalpasanna, ipunnom iti kaldero dagiti dadduma a kasasayaatan a tulang.
\v 5 Sungrodam pay ti apuy, ket angerem dagiti tulang ken ti lasag iti agburburek a danum.’

\s5
\v 6 Aramidem dayta gapu ta kastoy ti kuna ni Yahweh nga Apo: ‘Nakaam-amakto ti mapasamak iti Jerusalem; daytoy ket siudad a napnoan kadagiti mammapatay, maysa a siudad a kasla aglatlati a gambang a kaldero, ket saan a maikkat ti latina. Adawem dagiti pidaso ti karne iti kaldero, ngem saanmo a pilien no ania dagiti adawem.

\s5
\v 7 Ti dara dagiti tattao a napapatay idiay Jerusalem ket adda pay laeng sadiay; napapatayda kadagiti kabatbatoan, saan nga iti daga, a no sadino ket mabalin a magaburan ti darada.
\v 8 Ngem Siak ti nangipulagid iti dara dagiti napapatay kadagiti kabatbatoan, isu a saan a nagaburan ti darada; inaramidko dayta tapno makitak daytoy ket makapungtotak ken makaibalesak.’

\s5
\v 9 Ngarud, kastoy ti makunak, Siak a ni Yahweh nga Apo: ‘Nakaam-amakto ti mapasamak iti dayta a siudad a napnoan kadagiti mammapatay! Arignanto nga ibuntonko met dagiti kayo iti apuy.
\v 10 Isu a sungrodanyo pay iti adu a kayo ket pasgedanyo ti apuy! Angerenyo a nasayaat ti karne, ken rekadoanyo daytoy; angerenyo daytoy agingga a makset dagiti tulang.

\s5
\v 11 Kalpasanna, isaangyo ti kaldero nga awan nagianna kadagiti beggang agingga a pumudot daytoy iti kasta unay ken lumabbaga ti gambangna, iti kasta maikkat ti lati daytoy.
\v 12 Arigna a pinadasko nga inikkat ti latina, ngem saanko latta a maikkat daytoy, uray pay insaangko iti apuy daytoy a kaldero.

\s5
\v 13 Ti lati iti banga ket ibagbagina dagiti makadurmen a kababalinyo. Pinadasko a dalusan ti kinadangkesyo, ngem saandak a pinalubosan a mangaramid iti dayta. Isu a saankayonto a madalusan manipud kadagiti nakaro a basolyo agingga a dusaenkayo ken agbaawto ti pungtotko.

\s5
\v 14 Siak a ni Yahweh, imbagak nga awan duadua a dusaenkayonto. Ket daytoyen ti tiempok a mangaramid iti dayta. Saanto nga agbaliw ti pangngeddengko; saanko nga ibabawi ti panangdusak kadakayo, ken saankayonto a kaasian. Ukomen ken dusaenkayonto a kas iti maiyannatup a pannakadusayo gapu iti kinamanagbasolyo. Awan duadua a mapasamakto dayta gapu ta Siak a ni Yahweh nga Apo, ti nangibaga iti daytoy.”’

\s5
\v 15 Maysa nga aldaw, kastoy ti mensahe nga inted kaniak ni Yahweh:
\v 16 “Anak ti tao, kellaatekto nga alaen kenka ti asawam babaen iti sakit, ti asawam nga ay-ayatem unay. Ngem inton matay isuna, saanmo nga ipakita a nalidayka wenno saanka nga agdung-aw wenno agsangit.
\v 17 Agasugka a siuulimek; saanmo nga ipakita ti panagsangitmo para kenkuana. Saanmo nga ikkaten ti turbante iti ulom, ken imbes nga agsakasakaka, saanmo nga ikkaten dagiti sandaliasmo. Saanmo nga abbongan ti rupam a mangipakita a nalidayka. Ken saanmo a kanen ti kita ti taraon a kadawyan a kankanen dagiti tattao nga agladladingit.”

\s5
\v 18 Isu nga iti maysa nga agsapa, nakisaritaak kadagiti tattao a kas iti kadawyan nga ar-aramidek, ket iti dayta a rabii, kellaat a natay ti asawak. Kabigatanna, inaramidko ti imbaga ni Yahweh nga aramidek.

\s5
\v 19 Kalpasanna, sinaludsod kaniak dagiti tattao, “Ania ti kayat nga ipasimudaag kadakami dagiti banbanag nga ar-aramidem?”
\v 20 Insungbatko kadakuada, “Kastoy ti imbaga kaniak ni Yahweh:
\v 21 ‘Ibagam kadagiti Israelita nga umadanin ti panangdadaelko iti templo, ti pasdek nga ipanpannakkelyo unay, ti pasdek a pagaayatyo a kitkitaen. Dagiti annakyo nga imbatiyo iti Jerusalem idi pinilitdakayo nga ipan idiay Babilonia—papatayento ida dagiti kabusoryo.

\s5
\v 22 Inton mapasamak dayta, aramidenyonto met ti kas iti inaramidko: saanyonto nga abbongan dagiti rupayo, wenno kanen dagiti kita ti taraon a kadawyan a kankanen dagiti tattao nga agladladingit.
\v 23 Saanyo nga ikkaten dagiti turbante kadagiti uloyo ken saanyo nga ikkaten dagiti sandalias kadagiti sakayo. Saankayonto nga agladingit wenno agsangit, ngem kumottongkayonto iti kasta unay ket in-inutkayo a matay gapu kadagiti basbasolyo. Ket aglilinnadingitkayonto.
\v 24 Ni Ezekiel ti agserbi a kas ballaag kadakayo, ket masapul nga aramidenyo ti kas iti inaramidna. Inton mapasamak dayta, maammoanyonto a Siak a ni Yahweh ket addaan iti pannakabalin a mangaramid iti imbagak nga aramidek.’”

\s5
\v 25 Kalpasanna, kinuna ni Yahweh kaniak, “Anak ti tao, iti mabiit ket dadaelekto ti nasagradoan a temploda, a pagragrag-oanda, raraemenda ken pagaayatda a kitkitaen, ken pukawekto met dagiti annakda a lallaki ken babbai.
\v 26 Iti dayta nga aldaw, addanto makalibas manipud iti Jerusalem nga umay mangipadamag kenka ti napasamak sadiay.
\v 27 Inton mapasamak dayta, makapagsaokanto manen a saan a mapilpilitan. Agsaritakayonto a dua. Agserbikanto a kas ballaag kadagiti tattao; ket maammoandanto a Siak a ni Yahweh, ket addaan iti pannakabalin a mangaramid iti imbagak nga aramidek.”

\s5
\c 25
\p
\v 1 Saan a nagbayag, inikkannak ni Yahweh iti maysa pay a mensahe. Kinunana,
\v 2 “Anak ti tao, sumangoka iti disso a pagnanaedan dagiti taga-Ammon, ket ipadtom ti maipanggep kadagiti nakaal-alinggaget a mapasamakto kadakuada.

\s5
\v 3 Ibagam kadakuada, ‘Kastoy ti kuna ni Yahweh nga Apo: Nagpukkawkayo a sirarag-o idi nadadael ti templok iti Jerusalem, ken idi nadadael ti pagilian ti Israel, ken idi naipanaw dagiti tattao iti Juda a kas balud idiay Babilonia.
\v 4 Ngarud, palubosakto ti armada dagiti tattao iti daya tapno umaydakayo sakupen. Iyaramiddanto dagiti toldada iti pagilianyo ket agnaedda sadiay. Kanendanto ti bunga dagiti mulayo ken inumendanto ti gatas dagiti bakayo.
\v 5 Pagbalinekto a pagipasturan kadagiti kamelio ti kabisera ti siudadyo a Rabba, ken ti dadduma a paset ti Ammon, a pagnanaedan ita dagiti tattaoyo, pagbalinekto a lugar a pagaponan laeng dagiti karnero. Ket maammoanyonto, a Siak a ni Yahweh, ket addaan iti pannakabalin a mangaramid iti imbagak nga aramidek.

\s5
\v 6 Kastoy ti kunak, Siak a ni Yahweh nga Apo: Sirarag-okayo a nangitipat kadagiti imayo ken nangitabbuga kadagiti sakayo, ket nagkatawakayo gapu ta inumsiyo dagiti tattao iti daga ti Israel.
\v 7 Isu nga usarekto ti pannakabalinko maibusor kadakayo, ken ikkakto iti kabaelan dagiti dadduma a nasion a mangsakup kadakayo ket ipanawdakayo a kas iti panangipanawda kadagiti sanikuayo. Dadaelenkayto a naan-anay, ket saankayonto nga agbalin a maysa kadagiti nasion iti kaanuman. Inton mapasamak dagita, maammoanto dagiti tattao a Siak a ni Yahweh, ket addaan iti pannakabalin a mangaramid iti imbagak nga aramidek.”’

\s5
\v 8 Kastoy pay ti kuna ti Apo a ni Yahweh: Dagiti tattao ti Moab iti abagatan ti Ammon ken dagiti tattao ti Seir iti abagatan ti Moab ket inum-umsida ti Israel a kunada, “Nagbalinen nga awan seserbi dagiti tattao ti Israel a kas kadagiti dadduma a nasion!”
\v 9 Ngarud, dadaelekto dagiti siudad a mangsalsalaknib kadagiti beddeng ti Moab, manipud iti Bet Jesimot, Baal Meon, ken Kiriatim, dagiti kasasayaatan a siudad ti Moab.
\v 10 Ikkakto iti kabaelan dagiti tattao manipud iti daya a mangsakup iti Moab ken kasta met iti Ammon. Kas nagbanaganna, kasla pinagbalinko ti Ammon tapno saan idan a malagip pay dagiti dadduma a nasion,
\v 11 kasta met a dusaekto dagiti tattao ti Moab. Inton mapasamak dagitoy, maammoanto dagiti tattao a Siak a ni Yahweh, ket addaan iti pannakabalin a mangaramid iti imbagak nga aramidek.”

\s5
\v 12 Kastoy pay ti kuna ni Yahweh nga Apo: “Dakayo a tattao ti Edom ket nakabasol gapu iti panangbalesyo kadagiti tattao iti Juda.
\v 13 Isu a kastoy ti kunak, Siak a ni Yahweh nga Apo: Usarekto ti pannakabalinko a maibusor kadagiti tattao ti Edom ken papatayekto dagiti lallaki ken dagiti ayupda. Dadaelekto ti daga manipud iti rehion ti Teman iti sentro ti Edom agingga iti rehion ti Dedan iti abagatan ti Edom, ket papatayento dagiti kabusorda dagiti adu a tattao.

\s5
\v 14 Usarento dagiti Israelita ti bilegda a mangbales kadagiti tattao ti Edom. Ipakitadanto kadagiti tattao ti Edom a kasta unay ti pungtotko kadakuada ket dusaekto ida. Balsekto dagiti tattao ti Edom. Ket maammoandanto a Siak a ni Yahweh nga Apo, ket addaan iti pannakabalin a mangaramid iti imbagak nga ramidek.”

\s5
\v 15 Kastoy pay ti kuna ni Yahweh nga Apo: “Nabayagen a tiempo a kayat la unay dagiti Filisteo a balsen dagiti tattao ti Juda. Kasta la unay kadakes ti tarigagayda a mangdadael iti Juda.
\v 16 Isu a kastoy ti kunak, Siak a ni Yahweh nga Apo: Usarekto ti pannakabalinko a maibusor kadagiti Filisteo. Papatayekto ti bunggoy dagiti tattao iti Keret ken amin dagiti agnanaed iti igid ti Karayan Mediterano.
\v 17 Balsekto ida iti nakaro ken ipakitak a kasta unay ti pungtotko kadakuada babaen iti wagas ti panangdusak kadakuada. Ket inton nabalesko ida, maammoandanto a Siak a ni Yahweh, ket addaan iti pannakabalin a mangaramid iti imbagak nga aramidek.”

\s5
\c 26
\p
\v 1 Agsangapulo ket maysa a tawen kalpasan iti panangipan dagiti taga-Babilonia kadakami nga Israelita iti dagada, iti umuna nga aldaw ti bulan, inikkannak ni Yahweh iti sabali pay a mensahe. Kinunana kaniak,
\v 2 "Anak ti tao, sirarag-o nga impukkaw dagiti tattao nga agnanaed iti siudad ti Tiro iti Jerusalem, 'Jerusalem, ti siudad a paggapgapuan dagiti agtagtagilako a mapmapan kadagiti adu a nasion ket nadadaelen. Ket ita, umayto kadatayo dagiti tattao manipud iti entero a lubong tapno gumatang ken aglako kadagiti banbanag. Gapu ta nadadaelen ti Jerusalem, rumang-aytayonto!'

\s5
\v 3 Ita ngarud, kastoy ti kunak, siak a ni Yahweh nga Apo: 'Siak itan ti kabusoryo, dakayo a tattao ti Tiro. Paumayekto dagiti armada dagiti adu a nasion tapno rautenda ti siudadyo, a kas iti panangdungpar dagiti dalluyon ti baybay kadagiti igid ti baybay.
\v 4 Dadaelento dagiti soldadoda dagiti pader iti aglawlaw ti Tiro ken rebbaendanto dagiti torreyo. Naan-anayto a madadael ti siudad. Kalpasanna, karusendanto dagiti natebtebbag a paset ti siudad ken pagbalinenda a kasla nakawara a bato ti siudad.

\s5
\v 5 Iti baybay, ti paset ti siudadmo nga adda iti maysa nga isla ket agbalinto a lugar a pagpamagaan dagiti tattao kadagiti iketda. Awan duadua a mapasamak dayta gapu ta siak a ni Yahweh nga Apo ti nangibaga iti dayta: Alaento dagiti tattao kadagiti adu a nasion dagiti amin a napapateg a banbanag iti siudadyo.
\v 6 Dagiti tattao kadagiti babassit a bario iti igid ti baybay iti asideg ti Tiro—papatayento ida dagiti kabusoryo babaen kadagiti kampilanda. Ket maammoanto dagiti tattao a Siak a ni Yahweh ket addaan iti pannakabalin a mangaramid iti imbagak nga aramidek.'

\s5
\v 7 Kastoy ti kunak a mapasamak, siak a ni Yahweh nga Apo: Manipud iti daya, iyegkonto ti kabibilegan nga ari iti lubong, ni Ari Nebucadnesar iti Babilonia, agraman ti armadana tapno rautenda ti Tiro. Mangyegdanto kadagiti kabalio ken karuahe, ken kadagiti kumakabalio ken dagiti mangiturturong kadagiti karuahe; dakkelto daytoy nga armada.
\v 8 Kadagiti paggugubatan kadagiti babassit a bario iti igid ti baybay, adunto a tattao ti papatayen dagiti soldadoda babaen kadagiti kampilanda. Ket mangisaganadanto kadagiti igam a pangrebbada iti pader iti aglawlaw ti siudad ti Tiro. Mangaramiddanto iti gabsuon ti daga agingga a dumanon daytoy iti tuktok ti pader ken mangiggemdanto kadagiti kalasag a pangsalaknibda kadagiti bagbagida manipud kadagiti pana a maipaspasaksak kadakuada manipud iti daga.

\s5
\v 9 Bilinento ti ari dagiti soldado a mangus-usar kadagiti igam a pangrebba a rebbaenda ti pader, ken dagiti mangusar kadagiti landok a pangrebbada kadagiti torre iti pader.
\v 10 Adunto ti kabalio ti ari, ken mangparnuayto iti tapok ti panagbaddebaddek dagiti saka dagiti kabalio a manggabur iti entero a siudad. Kaslanto nga agkintayeg dagiti pader gapu iti ariwawa dagiti kabalio, dagiti kariton, ken dagiti karuahe inton serkenda ti siudad babaen iti paset ti pader a rinebba dagiti kabusor.
\v 11 Ipayatpayatto dagiti kabalio dagiti amin a kalkalsada ti siudad. Papatayento dagiti soldado dagiti tattao babaen kadagiti kampilanda; rebbaendanto dagiti estatua a nangrambak iti pigsada.

\s5
\v 12 Alaendanto dagiti amin a napapateg a sanikua dagiti tattao ken takawendanto dagiti lako dagiti agtagtagilako. Rebbaendanto dagiti pader dagiti balbalay ken dadaelenda dagiti agkakapintas a balbalayda. Ket ibellengdanto iti baybay dagiti batbato a naaramat kadagiti pader dagidiay a balbalay, dagiti tabla ken dagiti natebtebbag a paset dagitoy.
\v 13 Saanen nga agkanta dagiti tattao kadagiti naariwawa a kankanta wenno agtukar kadagiti arpada.
\v 14 Pagbalinendanto a bilag a bato ti siudad ken pagpamagaanto laengen daytoy dagiti tattao kadagiti iketda. Ken saanton a pulos a maibangon manen ti siudad.'" Awan duadua a mapasamak dagidiay a banbanag gapu ta ti Apo a ni Yahweh ti nangipakaammo a mapasamak dagitoy.

\s5
\v 15 Kastoy pay ti kuna ni Yahweh nga Apo maipanggep iti Tiro: Inton agasug dagiti taga-Tiro gapu ta sinugatan ida dagiti kabusor, inton adu a tattao ti matay, ken inton ti siudad ket dadaelen dagiti kabusor, agpigergerto dagiti tattao nga agnanaed kadagiti igid ti baybay gapu ta mabutengda.
\v 16 Ket bumabanto kadagiti tronoda dagiti amin nga ari kadagiti siudad nga adda iti igid ti baybay ket ikkatenda dagiti kagayda ken dagiti naburdaan a kawesda. Agbuteng ken agtugawdanto iti daga, nga agpigpigerger. Maklaatdanto gapu iti napasamak iti siudad ti Tiro.

\s5
\v 17 Ket agkantadanto iti naliday a kanta maipanggep iti siudad, a kas iti daytoy: 'Awanen ti nalatak a siudad, a pagnanaedan dagiti tattao a naglayag kadagiti baybay! Nabileg dagiti tattao iti dayta a siudad kabayatan ti panaglayagda, ngem ita ket addadan iti tengnga ti baybay; pinagbutengda dagiti amin a tattao nga agnanaed iti asidegda.
\v 18 Ngem ita, nagbuteng dagiti amin a tattao nga agnanaed iti igid ti baybay gapu ta dinadael dagiti kabusor ti nabileg a siudad. Kasla agpigpigerger ti daga iti asideg ti igid ti baybay; nagbuteng dagiti tattao nga adda kadagiti isla iti baybay gapu ta awanen ti siudad.'

\s5
\v 19 Kastoy pay ti kuna ni Yahweh nga Apo: 'Inton papanawek dagiti amin a tattao iti siudad ti Tiro, a kas iti panangpanaw dagiti tattao kadagiti dadduma a siudad nga awanen a pulos ti agnanaed kadagitoy, ken inton lapunosek ti siudad iti dadakkel a dalluyon ti baybay,
\v 20 ket ipankonto dagiti tattao iti dayta a siudad iti ayan dagiti tattao a natay, dagiti natay iti nabayagen a tiempo. Pagnaedekto ida iti lugar iti uneg ti daga a kasla nabayagen a nadadael, a kadua dagiti bimmaba idi iti dayta nga abut ket saandanton a pulos nga agsubli iti daga a pagnanaedan dagiti tattao.
\v 21 Ipaluboskonto a matayda iti nakabutbuteng a wagas, ket daytanto ti kanibusananda. Birukento dagiti tattao dayta a siudad ngem awanen daytoy." Kastoy ti impakaammo ti Apo a ni Yahweh a mapasamak.

\s5
\c 27
\p
\v 1 Imbaga ni Yahweh daytoy kaniak,
\v 2 "Anak ti tao, agkantaka iti pangnatay a kanta maipanggep iti Tiro.
\v 3 Ti siudad ti Tiro ket adda iti isla iti igid ti baybay, ket makisinsinnukat dagiti agtagtagilako kadagiti bunggoy dagiti tattao nga agnanaed kadagiti adu nga igid ti baybay. Kastoy ti kuna ni Yahweh nga Apo a rumbeng nga ibagam kadakuada: Dakayo a tattao ti Tiro, imbagayo a nakapimpintas ti siudadyo.

\s5
\v 4 Tengngelyo ti gatgatangen ken ilaklako dagiti tattao—dagiti tattao nga agnanaed iti igid ti baybay. Dagiti nangbangon iti siudadyo ket napintas ti panangaramidda iti siudadyo.
\v 5 Dakayo ken ti siudadyo ket kasla dakkel a barko nga inaramidyo manipud iti kayo a saleng idiay Bantay Hermon. Ket nangalakayo iti kayo a sedro a naggapu iti Libano tapno aramidenyo a palo ti barko.

\s5
\v 6 Nangkitikitkayo kadagiti gaud manipud iti kayo a lugo a naggapu iti rehion ti Basan. Inaramidyo ti kamarote manipud iti cypress a kayo a naggapu iti isla ti Cyprus, ket kinalupkopanyo dagiti kamarote iti marfil.
\v 7 Inaramidyo dagiti layag manipud iti naburdaan a lino a naggapu iti Egipto; dagitoy a layag ket kasla bandera a mabalin a makita dagiti tattao manipud iti adayo.

\s5
\v 8 Dagiti lallaki manipud kadagiti siudad ti Sidon ken Arvad ti mangguyguyod kadagiti gaudyo; dagiti lallaki a mangiturturong iti barko ket nasanay nga aglaylayag a taga-Tiro.
\v 9 Adda iti barko dagiti kumikitikit a lallaki a naggapu iti Gebal. Tinarimaanda dagiti birri dagiti barkoyo. Immay dagiti aglaylayag manipud kadagiti adu a pagilian a nakasakay kadagiti barkoda tapno gumatang ken aglako kadakayo kadagiti banbanag.

\s5
\v 10 Dagiti lallaki a naggapu manipud kadagiti adayu a daga ti Persia, Lud, ken Put ket soldado iti armadayo. Imbitinda dagiti kalasag ken dagiti helmetda kadagiti pader ti siudadyo; daytoy ti namagbalin kadagiti adu a tattao nga agsiddaaw iti siudadyo.
\v 11 Dagiti lallaki a naggapu kadagiti siudad ti Arvad ken Helek ti taga-wanawan kadagiti pader ti siudadyo; adda kadagiti torreyo dagiti lallaki a naggapu iti siudad ti Gamad. Imbitinda met dagiti kalasagda kadagiti paderyo; pinapintasda met iti kasta unay ti siudadyo.

\s5
\v 12 Gapu kadagiti adu a banbanag a kasapulan nga ilakoyo, nangibaon dagiti tattao a taga-Tarsis kadagiti agtagtagilako a nangyeg kadagiti pirak, landok, lata ken buli tapno isukatda kadagiti banbanag nga adda kadakayo.
\v 13 Nangyeg dagiti agtagtagilako manipud kadagiti rehion ti Grecia, Tubal ken Mesec kadagiti tagabu ken banbanag a naaramid iti bronse tapno isukatda kadagiti banbanag nga adda kadakayo.

\s5
\v 14 Nangyeg dagiti tattao a taga-Bet Togarma kadagiti pagtrabaho a kabalio, pakigubat a kabalio ken mulo tapno isukatda kadagiti banbanag nga adda kadakayo.
\v 15 Immay kadakayo dagiti agtagtagilako a naggapu iti isla ti Rodes. Nakinegosio kadakayo iti igid ti baybay dagiti tattao a naggapu kadagiti adu a nasion; nangyegda kadagiti marfil ken agkakangina a nangisit a kayo a ballatinaw tapno isukatda kadagiti banbanag nga adda kadakayo.

\s5
\v 16 Gapu ta adu unay dagiti banbanag a masapul nga pakisinnukatanyo, nangyeg kadakayo dagiti tattao a naggapu iti daga ti Aram kadagiti agkakangina a batbato, purpura a lupot, naburdaan a lupot, napino a lino a lupot, ken alahas a naaramid iti koral ken kadagiti rubi.
\v 17 Nangyeg dagiti tattao a taga-Juda ken Israel kadagiti trigo a naggapu iti siudad ti Minnith idiay Amon, ken igos, diro, lana ti olibo ken agas a pangsapsapo tapno isukatda kadagiti banbanag nga adda kadakayo.
\v 18 Gapu ta addaankayo kadagiti adu unay a banbanag nga ilakoyo, nangyeg dagiti taga-Damasco iti arak a naggapu iti ili ti Helbon ken puraw a lupot a naaramid iti buok ti karnero manipud iti paset ti Zahar tapno isukatda kadagiti adu a banbanag nga adda kadakayo.

\s5
\v 19 Nangyeg dagiti lallaki a naggapu iti tribu ti Dan ken griego ken dagiti tattao a naggapu iti paset ti Uzal kadagiti banbanag a naaramid iti landok, cinnamon, ken nabanglo a bukel ti calamus tapno isukatda kadagiti banbanag nga adda kadakayo.
\v 20 Immay dagiti agtagtagilako a taga-Dedan iti akin-abagatan a paset ti Edom nga adda insangpetda a lupot a pagap-ap iti pagsakayan tapno isukatda kadagiti banbanag nga adda kadakayo.
\v 21 Nangibaon dagiti taga-Arabia ken dagiti amin a mangiturturay iti rehion ti Kedar kadagiti agtagtagilako tapno mangisukatda kadagiti urbon a karnero, kalakian a karnero ken kalakian a kalding kadagiti banbanag nga ada kadakayo.

\s5
\v 22 Nangyeg dagiti agtagtagilako a taga-Seba ken Raama iti Arabia kadagiti adu a kita dagiti kasasayaatan a bangbanglo, alahas ken balitok tapno isukatda kadagiti banbanag nga adda kadakayo.
\v 23 Immay dagiti taga-Haran, Canne, Eden, Seba, Asur ken Kilmad idiay Mesopotamia a tugotda dagiti tagilakoda.

\s5
\v 24 Nangyegda kadagiti agkakapintas a banbanag tapno isukatda kadakayo: asul a lupot, naburdaan a lupot, ken alfombra a nadumaduma ti marisna a nalukot ken nasiglotan kadagiti tali.
\v 25 Kinarga amin dagiti pangkarga a barko a naggapu iti Tarsis dagidiay a banbanag nga inlakoyo; napno dagiti pagiduldulinan a balay iti islayo kadagidiay amin a banbanag ken nangted kadakayo iti dayaw.

\s5
\v 26 Impan dagiti lallaki a mangiturturong kadagiti barkoyo dagiti barko a napno kadagiti karga idiay dakkel a baybay. Ngem ita, dinadael ti napigsa nga angin iti daya dagidiay a barko.
\v 27 Napukaw amin nga adda kadagiti barko—dagiti amin a napapateg a karga ken adu kadagiti aglaylayag ken marinero ti barko, dagiti agtrabtrabaho iti barko ken agtagtagilako ken soldado. Iti aldaw a nadadael dagiti barko, limned amin dagiti tripulanteda iti baybay.

\s5
\v 28 Nagpigerger dagiti tattao nga agnanaed kadagiti siudad nga adda iti igid ti baybay idi nangngegda ti panagasug dagiti tripulante iti barkoyo.
\v 29 Panawanto dagiti amin a lallaki nga aggagaud dagiti barko; mapanto dagiti aglaylayag ken dagiti tripulante iti igid ti baybay ket agtakderda iti ababaw a paset daytoy.
\v 30 Agasugdanto iti napigsa gapu iti napasamak kadakayo, ket agsangitdanto iti nasaem. Mangipuruakdanto iti daga iti uloda ken agtulidda kadagiti dapo.

\s5
\v 31 Kuskusanda dagiti uloda tapno mangipakita a nalidayda unay gapu iti napasamak kadakayo, ket agkawesda iti nakersang a lupot nga agladingit. Sangitandakayo iti nasaem ken agladingitda para kadakayo.
\v 32 Bayat nga agdungdung-aw ken agladladingitda gapu iti napasamak kadakayo, ikantada daytoy a pangnatay a kanta: 'Awan a pulos ti siudad idi a kas iti Tiro, a naulimek itan, a nalapunos iti dalluyon ti baybay.'
\v 33 Dagiti tagilako nga insukat idi dagiti agtagtagilakoyo ket banbanag a nangay-ayo kadagiti tattao kadagiti adu a pagilian. Bimmaknang dagiti ari kadagiti adayu a lugar gapu iti kuarta a naparnuayda babaen iti panaggatang ken panaglakoda kadakayo.

\s5
\v 34 Ngem ita, ti siudadyo ket kas iti barko a nadadael iti baybay, ket nadadael dagiti amin nga adda iti daytoy, iti tengnga ti baybay. Limned dagiti amin a kargayo ken dagiti aglaylayagyo iti tengnga ti baybay.
\v 35 Napaay dagiti amin a tattao nga agnanaed iti igid ti baybay gapu iti napasamak kadakayo. Mabutbuteng unay dagiti arida; agpigpigergerda iti buteng bayat nga agbuybuyada.
\v 36 Nagwingiwing dagiti agtagtagilako dagiti dadduma a nasion gapu ta saanda a patien ti napasamak; ita, napukawen ti siudadyo, ket agnanayon nga awanton daytoy."

\s5
\c 28
\p
\v 1 Ket inikannak ni Yahweh iti sabali pay a mensahe. Kinunana:
\v 2 "Anak ti tao, itedmo iti ari ti Tiro daytoy a mensahe a naggapu kaniak a ni Yahweh nga Apo: 'Sitatangsit nga imbagam a maysaka a dios, a saandaka a mabalin a sagiden, sipud idi nagtugawka iti trono iti maysa a siudad iti maysa nga isla! Ipalpalangguadmo a maysaka a dios, ngem ti kinapudnona ket taoka laeng, saanka a dios.
\v 3 Ipagarupmo a nasirsiribka ngem ni Daniel, ken ipagarupmo a maawatam amin a palimed.

\s5
\v 4 Gapu ta nasiribka ken nasariritka iti panagnegosio, bimmaknangka iti kasta unay; nakaurnongka iti adu a balitok ken pirak kadagiti pagiduldulinam.
\v 5 Wen, pudno a bimmaknangka babaen iti nasirib a panaggatgatang ken panaglaklakom; ken gapu ta nabaknangka, nagbalinka a natangsit unay.

\s5
\v 6 Ngarud, ibagbaga ni Yahweh a gapu ta ipagarupmo a nasiribka a kas iti kinasirib ti maysa a dios,
\v 7 mangiyegto isuna iti armada dagiti ganggannaet a mangraut iti pagiliam, armada a mangbutbuteng kadagiti dadduma a nasion. Asutendanto dagiti kampilanda tapno tagbatendaka, sika a mangipagpagarup nga addaanka iti nakaskasdaaw a kinasirib, ket dadaelendanto dagiti amin a napipintas a banbanag nga adda kenka ken pagbalinenda dagitoy a nalaad.

\s5
\v 8 Ipababadakanto iti pakaitanemam; mataykanto iti naranggas a wagas a kas kadagidiay natay iti baybay.
\v 9 Ket awan duadua a saanmonto nga ibaga kadagiti mangpapatay kenka a maysaka a dios, gapu ta maammoandanto a saanka a dios; taoka laeng.
\v 10 Mataykanto a kas iti pannakatay dagiti dadduma a tattao, dagidiay saan a maikari iti Dios, dagidiay pinatay dagiti ganggannaet. Awan dua-dua a mapasamakto dayta gapu ta ni Yahweh ti nangibaga.'"

\s5
\v 11 Inted pay ni Yahweh kaniak daytoy a mensahe:
\v 12 "Anak ti tao, agkantaka iti naliday a kanta maipanggep iti ari ti Tiro. Ibagam kenkuana nga ibagbaga ni Yahweh nga Apo daytoy kenkuana: 'Awan pulos pagkurangam, nasiribka unay ken nataer.
\v 13 Nanam-ay idi ti panagbiagmo, gapu ta addaka idi iti napintas a minuyongak idiay Eden. Naarkusan idi dagiti kawesmo kadagiti adu a kita iti napapateg a batbato—rubi, topasio, esmeralda, chrysolite, onix, haspe, turquoise ken beryl a batbato. Dagidiay a batbato ket naikabil idi iti balitok a pagkabilan nga insaganak para kenka iti aldaw a pinarsuaka.

\s5
\v 14 Dinutokanka nga agbalin a napigsa nga anghel a mangbantay kadagiti tattao. Insaadka iti nasantoan a bantayko, ket nagnaka kadagiti rumimatrimat a batbato.
\v 15 Kasta unay idi ti kinaimbagmo kadagiti amin nga inaramidmo manipud iti aldaw a naparsuaka, agingga a rinuggiam ti nagaramid kadagiti nadadangkes a banbanag.

\s5
\v 16 Ket nakumikomka iti panaggatgatang ken panaglaklakom, rinuggiam ti nagbalin a naranggas, ket nagbasolka. Isu nga imbabainka. Sika nga anghel a mangbantay koma kadagiti tattao—pinilitka a pumanaw iti bantayko; pinilitka a panawam dagidiay rumimatrimat a batbato.
\v 17 Napalalo idi ti kinatangsitmo gapu ta nataerka unay. Gapu ta inayatmo dagiti agkakapintas a banbanag, nagaramidka kadagiti banbanag a saan nga ar-aramiden dagiti nasisirib a tattao. Isu nga imbellengka iti daga, ket impalubosko a katawaandaka dagiti dadduma nga ari a makakita kenka.

\s5
\v 18 Babaen iti panagbasbasolmo ken babaen iti panangsasaormo iti panaggatgatang ken panaglaklakom, pinagbalinmo a saan a maikari kaniak dagiti lugar a pagdaydayawan kaniak dagiti tattao. Isu a mangpasgedak iti apuy a manguram iti siudadmo. Naan-anayto a mauram ti siudadmo; makitanto dagiti tattao a mangbuybuya iti pannakaurammo a daponto laeng ti matda.
\v 19 Maupayto dagiti amin a tattao a sigud a makaammo iti siudadmo. Ita, mapukawen ti siudadmo, ket awanton daytoy iti agnanayon.'"

\s5
\v 20 Ket inikkannak ni Yahweh iti sabali pay a mensahe. Kinunana,
\v 21 "Anak ti tao, sumangoka iti siudad ti Sidon ket iwaragawagmo dagiti nakabutbuteng a banbanag a mapasamakto iti siudad.
\v 22 Itedmo kadagiti taga-Sidon daytoy a mensahe a naggapu kenni Yahweh nga Apo. Ibagam kadakuada: 'Siak ti kabusoryo, dakayo a taga-Sidon. Babaen iti aramidek kadakayo, ipakitak kadakayo ti kinabilegko, ket maammoanyonto a ni Yahweh ti mangdusdusa kadakayo ken nalinteg a manguk-ukom kadakayo. Maammoanyonto a naidumdumaak kadakayo, ket mapadayawanakto babaen iti aramidek kadakayo!

\s5
\v 23 Mangiyegakto iti didigra kadakayo, ken mangibaonakto kadagiti kabusor nga umay mangpapatay kadakayo kadagiti kalsadayo. Rautendakayonto manipud iti sadinoman, ket papatayendanto dagiti tattaoyo iti uneg dagiti pader ti siudadyo. Ket maammoanto ti tunggal maysa a siak a ni Yahweh ket addaan iti pannakabalin a mangaramid iti imbagak nga aramidek.'
\v 24 Saanton a pulos ida a dangran dagiti tattao nga agnanaed kadagiti asideg dagiti tattao ti Israel a kas iti panangsugat dagiti sisiitan a mula ken dagiti natitirad a siit kadagiti tattao. Ket maammoanto dagiti Israelita a siak a ni Yahweh ket addaan iti pannakabalin a mangaramid iti imbagak nga aramidek."

\s5
\v 25 Ken kastoy pay ti kuna ni Yahweh nga Apo: "'Ummongekto ida manipud kadagiti adayu a pagilian a nangiwarawaraak kadakuada. Ket makitanto dagiti dadduma a bunggoy ti tattao a naidumdumaak ken mararaemak, inton aramiden dagiti Israelita dagiti pagtaenganda iti daga nga intedko iti adipenko a ni Jacob!
\v 26 Sitatalgedto nga agnaed dagiti tattaok idiay Israel; mangipatakderdanto kadagiti balbalay ken agmuladanto kadagiti ubas. Ket inton dusaek dagiti bunggoy dagiti tattao nga agnanaed iti asideg a nangumsi kadakuada, maammoanto dagiti tattaok a siak a ni Yahweh a Diosda ti nangaramid iti daytoy."

\s5
\c 29
\p
\v 1 Agarup sangapulo a tawen kalpasan iti panangipan dagiti taga-Babilonia kadakami nga Israelita iti dagada, iti maikasangapulo ket dua nga aldaw iti maika-sangapulo a bulan iti dayta a tawen, inikkannak ni Yahweh iti sabali pay a mensahe. Kinunana kaniak,
\v 2 "Anak ti tao, sumangoka iti Egipto ket iwaragawagmo dagiti nakabutbuteng a mapasamakto iti ari ti Egipto ken kadagiti amin a tattaona.
\v 3 Ibagam iti ari daytoy a mensahe a naggapu kaniak, a ni Yahweh nga Apo: "Sika nga ari ti Egipto, siak a ni Yahweh, siak ket kabusormo; kaska la dakkel nga ayup nga agid-idda kadagiti waig iti igid ti karayan Nilo. Ibagbagam a kukuam ti Karayan Nilo, ken inaramidmo daytoy a para kenka.

\s5
\v 4 Ngem kasla banniitankanto ket ipuruakkanto iti daga, agraman dagiti lames a kimpet kadagiti siksikmo.
\v 5 Panawankanto ken amin dagidiay a lames tapno mataykayo iti disierto; maidasaykanto iti daga ken awanto ti mangala iti bangkaymo tapno itabonnaka, gapu ta imbagak nga agpaayto ti bangkaymo a kas taraon kadagiti atap nga ayup ken billit.

\s5
\v 6 Inton mapasamak dayta, maammoanto dagiti amin a tattao ti Egipto a siak a ni Yahweh, ti addaan iti pannakabalin a mangaramid iti imbagak nga aramidek. Nagtalek dagiti Israelita a tulongam ida. Ngem nagbalinka a kasla runo kadagiti imada.
\v 7 Ket idi nagsadagda iti dayta a runo, natukkol daytoy ket sinugatanna dagiti abagada. Idi nagsadagda kenka, kaska la runo a natukkol, ket kas nagbanaganna nadangram dagiti patongda.'

\s5
\v 8 Ngarud, kastoy ti kuna ni Yahweh nga Apo, 'Iyegkonto ti kabusor ti Egipto a mangraut kadakuada babaen kadagiti kampilanda; papatayendanto dagiti tattao ken ayup ti Egipto.
\v 9 Agbalinto a langalang a disierto ti Egipto. Ket maammoanto dagiti tattao ti Egipto a siak a ni Yahweh, ti addaan iti pannakabalin a mangaramid iti ibagbagana nga aramidenna, ken dusaennanto dagiti tattao ti Egipto gapu iti panangibagada a kukuada ti Karayan Nilo gapu ta inaramidda daytoy.
\v 10 Bumusorak kadakayo ken kadagiti waigyo, ken dadaelekto ti Egipto ket pagbalinek daytoy a langalang a disierto, manipud iti siudad ti Migdol iti amianan agingga iti Siene iti abagatan, agingga iti abagatan a beddeng ti Cus.

\s5
\v 11 Iti unos ti uppat a pulo a tawen, awan ti siasinoman a magna iti dayta a paset, ken awanto iti agnaed sadiay.
\v 12 Agbalinto a langalang ti Egipto, ket mapalikmutanto daytoy kadagiti nabaybay-an a nasion. Agbalinto a langalang dagiti siudad ti Egipto ken awanto iti matatao daytoy iti unos ti uppat a pulo a tawen, ket kastanto met ti mapasamak kadagiti dagdaga nga adda iti aglawlaw daytoy. Iwarawarakto dagiti tattao ti Egipto kadagiti pagilian iti adayu.'

\s5
\v 13 Ngem kastoy pay ti kuna ni Yahweh nga Apo: 'Inton malpas ti uppat a pulo a tawen, pagawidekto dagiti tattao ti Egipto kadagiti pagtaenganda.
\v 14 Isublikto dagiti tattao ti Egipto a tiniliw dagiti kabusorda, ket palubosakto ida nga agnaed manen iti rehion ti Patros iti abagatan, a sigud a nagnaedanda. Ngem agtultuloyto nga agbalin ti Egipto a saan a napateg a pagarian.

\s5
\v 15 Isunto ti kababaan kadagiti amin a nasion; saanton a pulos nga agbalin daytoy a nabilbileg ngem kadagiti kabangibang a nasion. Pakapsutekto ti Egipto, ket saandanton a pulos nga iturayan dagiti dadduma a nasion. Inton mapasamak dayta, saanton a panunoten dagiti mangidadaulo ti Israel nga agpatulong iti Egipto.
\v 16 Inton dusaek ti Egipto, mapalagipanto dagiti Israelita a nagbasolda idi babaen iti panagtalekda a matulongan ida ti Egipto. Ket maammoanto dagiti tattao ti Israel a ni Yahweh nga Apo ket addaan iti pannakabalin a mangaramid iti imbagana nga aramidenna.' "

\s5
\v 17 Agarup duapulo ket pito a tawen kalpasan iti pannakaipanmi nga Israelita a balud idiay Babilonia, iti umuna nga aldaw ti baro a tawen, inted kaniak ni Yahweh daytoy a mensahe:
\v 18 "Anak ti tao, impasnek ti armada ni Nebucadnesar nga ari ti Babilonia ti nakiranget iti Tiro, nga uray la nagkalbo dagiti uloda gapu kadagiti helmetda, ken uray la nagasgasan dagiti abagada. Ngem awan ti naala ni Nebucadnesar ken ti armadana nga uray aniaman a napateg a banbanag manipud iti Tiro tapno magunggunaanda iti kasta unay a panagtrabahoda iti dayta a pannakigubatda.

\s5
\v 19 Ngarud, imbaga ni Yahweh nga Apo nga ipalubosna a maparmek ti armada ni Ari Nebucadnesar ti Egipto. Alaendanto amin a napapateg a banbanag sadiay, tapno maited ti ari dagitoy kadagiti soldadona.
\v 20 Imbaga ni Yahweh nga ipalubosna a maparmekda ti Egipto a kas bayad ti inaramidda iti Tiro, gapu ta agtrabtrabaho ni Nebucadnesar ken ti armadana para kenkuana, inaramidda ti kayatna nga aramidenda a panangdadaelda iti Tiro."

\s5
\v 21 Kinuna ni Yahweh kaniak, "Addanto aldaw a pagbalinek a nabileg a nasion ti Israel. Inton mapasamak dayta, pagdengngegekto ida iti ibagam kadakuada. Ket maammoandanto a napasamak amin daytoy gapu ta siak a ni Yahweh, ti mangaramid iti daytoy."

\s5
\c 30
\p
\v 1 Inikkannak ni Yahweh iti sabali pay a mensahe. Kinunana,
\v 2 “Anak ti tao, ipadtom ti maipanggep iti mapasamakto iti Egipto. Ibagam a kastoy ti kunak, siak a ni Yahweh nga Apo: ‘Agsangit ken agdung-awka, gapu ta nakabutbuteng a banbanag ti mapasamakto iti maysa nga aldaw.
\v 3 Asidegen dayta nga aldaw, ti aldaw nga inton siak a ni Yahweh, ket dusaek dagiti tattao; daytoy ket kaslanto aldaw a napnoan iti ulep ti bagyo ken didigra kadagiti adu a nasion.

\s5
\v 4 Umayto ti armada ti kabusor a mangraut iti Egipto babaen kadagiti kampilanda, ket addanto nakaro a panagliday para kadagiti tattao idiay Cus. Adunto a tattao idiay Egipto ti papatayen ti armada ti kabusor; alaendanto amin a napapateg a banbanag, ken rebbaendanto pay dagiti pasdek agingga kadagiti pundasion dagitoy.
\v 5 Dagiti soldado ti Cus, Libya, Lydia ken amin a ganggannaet iti daga ti Egipto, agraman dagiti Judio nga agnanaed idiay Egipto—mataydanto amin gapu iti gubat.'

\s5
\v 6 Kastoy ti kuna ni Yahweh: ‘Parmekento daytoy nga armada dagiti kakadua ti Egipto, ken aggibusto ti pannakabalin nga ipanpannakkel unay dagiti tattao ti Egipto. Manipud iti siudad ti Migdol iti amianan agingga iti siudad ti Siene iti abagatan, papatayendanto dagiti soldado dagiti kakadua ti Egipto. Kastoy ti pakaammo ni Yahweh nga Apo.
\v 7 Maklaatto dagiti soldado dagiti kakadua ti Egipto, ket madadaelto dagiti siudad a kakadua ti Egipto, a napalawlawan kadagiti nadadael a siudad dagiti kabangibang a nasion.

\s5
\v 8 Kalpasanna, inton pagbalinek a mapuoran dagiti amin a banag idiay Egipto, ken inton ikkak dagiti kabusorda iti kabaelan a mangparmek kadagiti amin a kakaduada, maammoanto dagiti tattao a Siak, a ni Yahweh, ket addaan iti pannakabalin a mangaramid iti imbagak nga aramidek.
\v 9 Iti dayta a tiempo, mangibaonakto kadagiti mensahero a napartak a mapan iti Karayan Nilo babaen kadagiti bangka tapno butbutngenda dagiti tattao ti Cus, a mangipagpagarup a natalgedda. Agbutengdanto inton mangngegda a nadadaelen ti Egipto. Mapasamakto daytoy iti mabiit!

\s5
\v 10 Kastoy ti kunak, Siak, a ni Yahweh: Babaen iti bileg ni Ari Nebucadnesar iti Babilonia, papatayekto dagiti adu a tattao idiay Egipto.
\v 11 Ni Nebucadnesar ken ti armadana, a dagiti soldadona ket awanan asi iti siasinoman, ket umayto a mangdadael iti Egipto. Asutendanto dagiti kampilanda ket punoenda ti Egipto kadagiti bangkay dagiti pinapatayda.

\s5
\v 12 Paatianakto dagiti waig ti Karayan Nilo, ken ilakokto ti nasion ti Egipto kadagiti dakes a tattao. Babaen iti bileg dagiti ganggannaet, dadaelek ti daga ken dagiti amin nga adda iti daytoy. Awan duadua a mapasamakto dayta gapu ta Siak, a ni Yahweh ti nangibaga a mapasamak daytoy.

\s5
\v 13 Kastoy pay ti kunak, Siak, a ni Yahweh nga Apo: ipaluboskonto a dadaelen dagiti kabusor dagiti didiosen iti siudad ti Memfis. Awanton a pulos ti ari idiay Egipto, ken butbutngek ti amin a tattao iti daga ti Egipto.
\v 14 Papanawek dagiti amin a tattao manipud iti rehion ti Patros iti abagatan a paset ti Egipto. Mangpasgedak iti apuy iti siudad ti Zoan iti amianan a daya ti Egipto ken dusaekto dagiti tattao iti siudad ti Tebes iti abagatan a paset ti Egipto.

\s5
\v 15 Dusaekto dagiti soldado iti sarikedked ti Pelusium iti amianan a paset ti Egipto, ken papatayekto dagiti tattao idiay Tebes.
\v 16 Puorakto ti Egipto; agsagabanto dagiti tattao idiay Pelusium iti nakaro nga ut-ot. Ti Tebes ket sakupento dagiti kabusor, ken mabutbutengto latta dagiti tattao ti Memfis.

\s5
\v 17 Adu nga agtutubo a lallaki ti papatayento ti kabusor kadagiti siudad ti Heliopolis ken Bubastis iti amianan a paset ti Egipto, ket dagiti tattao a nabatbati ket masapul a mapan idiay Babilonia.
\v 18 Nakaal-alinggagetto daytoy nga aldaw a pannakadadael ti siudad ti Tafnes idiay amianan a daya ti Egipto inton gibusak ti bileg ti Egipto; saanton nga agbalin a nabileg dayta a pagilian. Kasla abbonganto ti nasipnget nga ulep ti Egipto, gapu ta dagiti tattao kadagiti bario daytoy ket maipanto iti Babilonia a kas balud.
\v 19 Kastanto ti panangdusak iti Egipto, ket maammoanto dagiti tattao a Siak, a ni Yahweh ket addaan iti pannakabalin a mangaramid iti imbagak nga aramidek."’

\s5
\v 20 Agarup sangapulo ket maysa a tawen kalpasan ti panangipan dagiti taga-Babilonia kadakami nga Israelita iti pagilianda, inikkannak ni Yahweh iti sabali pay a mensahe iti maika-pito nga aldaw iti umuna a bulan iti dayta a tawen. Kinunana,
\v 21 “Anak ti tao, inikkak ti armada ni Nebucadnesar iti kabaelan a mangparmek iti armada ti ari ti Egipto. Kasla tinukkolko ti maysa kadagiti takkiag ti ari ti Egipto, ket saan a nabedbedan daytoy tapno umimbag koma daytoy, ken saan a nakabilan daytoy iti aniaman a banag a mangpaimbag koma iti nabullo a takkiagna tapno kalpasan nga umimbag daytoy ket kabaelanton ti takkiagna a mangiggem iti kampilan.

\s5
\v 22 Ngarud, kastoy ti kunak, Siak, a ni Yahweh nga Apo; Siak ti kabusor ti ari ti Egipto. Naan-anayto a dadaelek ti bileg ti Egipto, kasla tukkolek itan dagiti dua a takkiag ti ari, ti saan a natukkol ken ti natukkol, ket tinnagek ti kampilan manipud iti imana.
\v 23 Iwaraskonto dagiti tattao ti Egipto kadagiti nasion.
\v 24 Kasla papigsaekto dagiti takkiag ti ari ti Babilonia ket ikkakto isuna iti kampilan, ken kasla tukkolekto dagiti takkiag ti ari ti Egipto, ket agasugto isuna iti sangoanan ti ari ti Babilonia a kasla maysa a soldado a nasugatan a dandanin a matay.

\s5
\v 25 Papigsaekto ti ari ti Babilonia, ket pakapsutek iti kasta unay ti ari ti Egipto. Inton mapasamak dayta, inton papigsaek ti armada ti Babilonia, aramatendanto dayta a bileg a mangraut iti Egipto.
\v 26 Iwaraskonto dagiti tattao ti Egipto kadagiti nasion. Ket inton mapasamak dayta, maammoanto dagiti tattao a Siak, a ni Yahweh, ket addaan iti pannakabalin a mangaramid iti imbagak nga aramidek.

\s5
\c 31
\p
\v 1 Agarup sangapulo ket maysa a tawen kalpasan ti panangipan dagiti taga- Babilonia kadakami nga Israelita iti dagada, inikkannak ni Yahweh iti maysa pay a mensahe, iti umuna nga aldaw ti maikatallo a bulan iti dayta a tawen. Kinunana,
\v 2 “Anak ti tao, ibagam iti ari ti Egipto ken kadagiti amin nga adipenna, “Ipagarupyo nga awan ti pagilian a nabileg a kas iti kabileg ti pagilianyo.

\s5
\v 3 Ipagarupyo a nabileg ti pagilianyo a kas iti kabileg ti Asiria. Ngem ti Asiria ket maiyarig iti maysa a nangato a kayo a sedro idiay Lebanon; addaan daytoy kadagiti dadakkel a narangpaya a sanga a manglinong kadagiti dadduma a kaykayo iti kabakiran. Nangato unay daytoy; nangatngato daytoy ngem kadagiti dadduma a kaykayo.
\v 4 Nagturong kadagitoy ti danum a nagtaud kadagiti adalem nga ubbog, isu a ti kayo a sedro ket dimmakkel a nakataytayag ken nakalanglangto unay. Ket nagayus ti danum iti aglikmut ti arisadsad ti kayo nga agturong kadagiti pagay-ayusan ti danum a mangsibog kadagiti dadduma pay a kaykayo nga adda iti asideg.

\s5
\v 5 Dayta a kadakkelan a kayo ket dimmakkel a nakataytayag, nataytayag ngem kadagiti amin a kaykayo iti aglawlaw daytoy. Dagiti sanga daytoy ket narukbos ken narangpaya unay gapu ta nabuslon ti danum iti arisadsad ti kayo.
\v 6 Nagumok dagiti billit kadagiti sanga daytoy, ken naganak dagiti atap nga ayup iti sirok dagidiay a sangsanga. Ket kaiyariganna a dagiti tattao kadagiti nabibileg a nasion ket nagnaed iti linong dayta a kayo.
\v 7 Nakangayngayed ken nakapinpintas daytoy; dagiti sanga daytoy ket nakaat-atiddog gapu ta dagiti ramut ti kayo ket immuneg iti daga nga ayan iti nabuslon a danum.

\s5
\v 8 Dagiti kayo a sedro iti minuyongak idiay Eden ket saan a kas iti kinangayed dayta a kayo, ken dagiti sanga dagiti kayo nga igos ket saan a kas iti karangpaya ken karukbos dagiti sanga dayta a kayo a sedro. Ken dagiti sanga ti gagangay a kayo ket saan a kas iti kinarangpaya ken kinarukbos daytoy. Awan ti kayo iti minuyongak a kas iti kapintas dayta a kayo a sedro.
\v 9 Gapu ta pinapintasko unay dayta a kayo babaen iti kinangayed dagiti sangana, amin dagiti mangidadaulo kadagiti dadduma a nasion nga ibagbagi dagiti dadduma a kayo iti Eden ket inapalanda ti pagilian nga ibagbagi dayta a kayo.’

\s5
\v 10 Isu a kastoy ti kunak, Siak a ni Yahweh nga Apo: ‘Dayta a kayo, a mangibagbagi iti Asiria ket timmayag iti kasta unay; nataytayag pay daytoy ngem kadagiti dadduma a kaykayo, ket nagbalin daytoy a napannakkel gapu ta nangato unay daytoy.
\v 11 Isu nga inikkak iti kabaelan ti maysa pay a nabileg a nasion a mangsakup iti daytoy, tapno dadaelen daytoy, a kas iti rumbeng a pannakadadaelna. Inlaksidkon daytoy.

\s5
\v 12 Pinukan ken pinanawan daytoy ti maysa nga armada dagiti ganggannaet, dagidiay a mangbutbuteng kadagiti tattao kadagiti dadduma a nasion. Naregreg dagiti sangana kadagiti banbantay ken kadagiti tanap. Ti dadduma kadagiti sanga daytoy ket natukkol ken naregreg kadagiti rangkis iti daga. Amin dagiti tattao iti dadduma a nasion nga adda iti linongna ket pinanawanda daytoy.

\s5
\v 13 Nagapon dagiti billit kadagiti natumba a kayo, ken nagnaed dagiti atap nga ay-ayup kadagiti sanga daytoy. Kastoy ti nakaiyaspingan dagiti dadduma a nasion idi nangnamnamada iti Asiria.
\v 14 Ita, awanen ti sabali pay a kayo—awanen ti sabali pay a nasion, nga uray nabuslon ti pannakasibugna, ti dumakkel a nakangatngato ket agbalin a napannakkel, wenno nangatngato ngem kadagiti sanga dagiti dadduma pay a kaykayo. Saanto nga agbalin a napigsa dagiti dadduma a nasion a kas iti kinapigsa dayta a nasion; awan duadua a matay amin ken agrupsanto dagiti nasion, kas iti pannakatay ken pannakaitanem dagiti tattao.”

\s5
\v 15 Kastoy ti kuna ni Yahweh nga Apo: “Inton mapukan dayta a nangayed a kayo, arigna a dagiti ubbog a nangsibsibog iti daytoy ket agladingit gapu iti daytoy, gapu ta pinatianak ti nabuslon a danum nga aggapgapu kadagiti ubbog. Arigna a pinagladingitko dagiti banbantay iti Lebanon gapu iti daytoy, ken arigna a pinagsangitko dagiti amin a kaykayo nga adda sadiay.

\s5
\v 16 Pinagkintayegko dagiti tattao kadagiti dadduma a nasion idi nangngegda a natumba dayta a kayo iti daga—idi nangngegda a nadadaelen ti Asiria. Amin dagiti dadduma a bunggoy dagiti tattao ket sigud met a napintas, nasayaat ti pannakasibog dagiti kaykayo iti Lebanon, ngem naliwliwada idi dimteng kadakuada ti ari nga ibagbagi dayta a kayo a sedro iti lugar nga ayanda a kas natay a tattao.

\s5
\v 17 Dagiti tattao nga ibagbagi dagiti kaykayo a dimmakkel iti linong dayta a dakkel a kayo, dagiti kakadua ti nabileg a nasion nga ibagbagi ti kayo a sedro, ket natayda met ket napanda iti lugar nga ayan dagiti natay a tattao.
\v 18 Daytoy a pangngarig ket maysa a ballaag kadakayo a tattao ti Egipto. Ipagarupyo nga awanen ti sabali pay a nasion a nabileg ken napintas a kas iti nasionyo. Ngem madadaelto met ti nasionyo, karaman dagiti dadduma pay a nasion. Addanto sadiay dagiti tattaom a kaduada dagiti dadduma pay a tattao a saan a maikari nga agdayaw kaniak, tattao a napapatay babaen kadagiti kampilan dagiti kabusorda. Kastanto ti mapasamak iti ari ti Egipto ken kadagiti amin nga adipenna.” Kastoy ti impakaammo ti Apo a ni Yahweh a mapasamakto.

\s5
\c 32
\p
\v 1 Agarup sangapulo ket dua a tawen kalpasan ti panangipan dagiti taga-Babilonia kadakami nga Israelita iti dagada, iti umuna nga aldaw iti maika-sangapulo ket dua a bulan iti dayta a tawen, inikannak ni Yahweh iti sabali pay a mensahe. Kinunana kaniak,
\v 2 “Anak ti tao, agkantaka iti naliday a kanta maipanggep kenni Faraon nga ari ti Egipto. Kantaem daytoy kenkuana: ‘Maiyarigka iti maysa a leon kadagiti nasion; maiyarigka iti narungsot nga ayup iti karayan a mangkibkibur iti danum, leblebegem ti danum babaen kadagiti sakam ket pagbalbalinem a kapitakan daytoy.

\s5
\v 3 Ngem Siak, nga Apo a ni Yahweh, ibagak kenka a mangibaonakto iti adu a tattao a mangtabukol kenka, ket iyaondaka iti daga.
\v 4 Ipuruakdakanto iti away a pangpanawak kenka. Palubosakto a pagbatayandaka dagiti billit, ken kanento dagiti amin nga atap nga ayup ti lasag ti bangkaymo agingga a mabsugda.

\s5
\v 5 Palubosakto nga iwarawarada ti lasagmo kadagiti turod ken punoendanto dagiti tanap kadagiti inegges a bagim.
\v 6 Palubosak ida a punoenda ti daga iti daram, kasta met kadagiti bantay, punoendanto iti daram dagiti pagayusan ti danum.

\s5
\v 7 Inton papatayenka agraman dagiti kaputotam, abbongakto ti tangatang ket saanko a pagraniagen dagiti bituen. Serraakto ti init iti nangisit nga ulep, ket saanto nga agraniag ti bulan.
\v 8 Pagsipngetekto dagiti bituen iti tangatang, ket agsipngetto iti entero a dagam; awan duadua a mapasamak dayta gapu ta Siak, a ni Yahweh nga Apo, ti nangibaga iti daytoy.

\s5
\v 9 Ket inton mangngeg dagiti tattao kadagiti adu a nasion ti maipanggep iti pannakadadaelmo, adunto kadakuada ti agbuteng—tattao nga agnanaed kadagiti pagilian a saanmo a pulos idi nga am-ammo.
\v 10 Kellaatekto dagiti adu a tattao gapu iti napasamak kenka; agbuteng ken agpigergerto dagiti arida gapu ta dinadaelka, inton iwasawasko ti kampilanko iti sangoananda tapno papatayenka. Iti dayta a tiempo a mataykanto, agpigergerdanto amin, agbutengda a papatayek met ida.

\s5
\v 11 Siak, nga Apo a ni Yahweh, ibagak kenka Egipto a dangrannaka dagiti kampilan ti armada ti ari ti Babilonia.
\v 12 Ipalubosko a papatayen dagiti maingel a soldado ti Babilonia dagiti kalaingan a soldadom—dagiti soldado ti Babilonia a nauy-uyong ngem kadagiti soldado dagiti dadduma a nasion. Gibusandanto ti kinatangsit dagiti tattao iti Egipto, gapu ta adunto a tattaom ti papatayenda.

\s5
\v 13 Papatayek dagiti amin a baka idiay Egipto, nga agar-arab iti igid dagiti waig. Kas pagbanaganna, saanton a pulos a malibeg dagiti danum kadagidiay a waig gapu kadagiti tattao ken ayup a magmagna kadagitoy.
\v 14 Kalpasanna, ipalubosko nga agbalin a nalinaay manen dagiti karayan idiay Egipto ken agayus a kas kalammuyot ti panagayus ti lana ti olibo.’” Kastoy ti ipakpakaammo ti Apo a ni Yahweh.

\s5
\v 15 Kastoy pay ti kunana: “Inton pagbalinek a langalang ti Egipto, inton ikkatek dagiti amin nga agtubtubo iti daga, ken inton papatayek dagiti amin a tattao nga agnanaed sadiay, maammoanto dagiti tattao a Siak, a ni Yahweh ti addaan iti pannakabalin a mangaramid iti imbagak nga aramidek.
\v 16 Dayta ti naliday a kanta a kantaen dagiti tattao maipanggep iti Egipto. Kantaento dayta dagiti babbai kadagiti adu a nasion; ulit-ulitenda nga ibalikas ti maipanggep iti Egipto ken kadagiti amin nga adipenna.” Awan duadua a mapasamak daytoy gapu ta imbaga ni Yahweh a mapasamak daytoy.

\s5
\v 17 Iti maika-sangapulo ket lima nga aldaw iti dayta met laeng a bulan, inikkannak ni Yahweh iti sabali pay a mensahe. Kinunana,
\v 18 "Anak ti tao, dung-awam dagiti adipen ti Egipto, gapu ta ipanko ida iti lugar iti uneg ti daga, nga isunto ti pagtalinaedanda ken dagiti tattao kadagiti dadduma a nabibileg a nasion. Ipanko ida sadiay, a kaduada dagiti dadduma, iti lugar nga ayan dagiti natay a tattao.

\s5
\v 19 Ibagam kadakuada, ‘Dakayo a tattao ti Egipto, pagarupenyo a napinpintaskayo ngem dagiti tattao kadagiti dadduma a nasion. Ngem maipababakayonto met iti lugar nga ayan dagiti awan diosna a natay a tattao.
\v 20 Mataykayonto a kaduayo dagiti adu pay a tattao a pinatay dagiti kabusorda. Inasut dagiti kabusorda dagiti kampilanda a dimmarup ket papanawendanto ti adu a tattao ti Egipto ken dagiti adipenna.
\v 21 Iti lugar nga ayan dagiti natay a tattao, pagaangawandakayonto dagiti nabibileg a mangidadaulo dagiti dadduma a pagilian, dakayo a tattao ti Egipto ken dagiti kakaduayo. Ibagadanto nga immaykayo agulbod kadakuada, nga awan diosna a tattao a pinapatay dagiti kabusorda.

\s5
\v 22 Addanto met sadiay dagiti bangkay dagiti tattao ti Asiria ken ti armadada. Mapalawlawandanto kadagiti bangkay dagiti dadduma a pinapatay dagiti kabusorda.
\v 23 Dagiti tanemda ket addanto iti nauneg nga abut, ken maidasayto iti aglikmut dagiti tanemda dagiti bangkay dagiti soldado ti armadada. Addanto met sadiay dagiti bangkay dagiti amin a nangbutbuteng iti adu a tattao, ta papatayento met ida dagiti kabusorda.

\s5
\v 24 Addanto met sadiay dagiti adu a tattao manipud iti pagilian ti Elam, ken dagiti adipen ti Elam gapu ta pinapatay ida dagiti kabusorda. Dagitoy ket soldado a nangbutbuteng kadagiti tattao kadagiti adu a lugar. Iti dayta a tiempo, maitabondanto iti nauneg nga abut iti uneg ti daga ket maibabaindanto agraman dagiti kakaduada a naipan sadiay.
\v 25 Maitanemto sadiay dagiti tattao ti Elam ken dagiti adipenna a kadua dagiti dadduma a napapatay, a napalawlawan kadagiti adu a tanem dagiti dakkel a bunggoy dagiti dadduma a tattao. Idi sibibiagda pay laeng, binutbutengda dagiti tattao kadagiti dadduma a nasion; ngem awan diosda, ket ita, gapu ta pinapatay ida dagiti kabusorda, maitanemdanto a kaduada dagiti dadduma iti dayta a nauneg nga abut, a mababain la unay.

\s5
\v 26 Addanto sadiay dagiti bangkay dagiti amin a soldado iti daga ti Meses ken Tubal, a napalawlawan kadagiti tanem dagiti adu nga adipenda. Idi sibibiagda pay laeng, binutbutengda met dagiti tattao kadagiti adu a luglugar. Aminda ket awan diosda, a pinapatay dagiti kabusorda.
\v 27 Maitanemdanto sadiay, iti abay dagiti saan a nakugit a mannakigubat a natayen. Maipakuyogto dagiti kalasagda kadagiti bangkayda, ken pagpungananda dagiti kampilanda. Idi sibibiagda pay laeng, binutbutengda ti adu a tattao iti rabaw ti daga.

\s5
\v 28 Sika nga ari ti Egipto, papatayenka met, ket maitanemkanto sadiay a kaduam dagiti dadduma a tattao nga awan diosna a pinapatay dagiti kabusorda.
\v 29 Addanto sadiay dagiti tattao ti Edom a kaduada dagiti arida ken dagiti mangidadauloda. Nabilegda unay, ngem papatayekto ida. Maitanemdanto sadiay, iti lugar a nakaitaneman dagiti dadduma a tattao nga awan ti diosna.

\s5
\v 30 Addanto sadiay dagiti amin a mangiturturay kadagiti pagilian iti amianan ti Israel, agraman dagiti tattao manipud iti siudad ti Sidon. Gapu iti bilegda, binutbutengda dagiti dadduma a tattao, ngem maitanemdanto sadiay. Awan ti diosda, ket maitanemdanto sadiay a kaduada dagiti dadduma a tattao a pinapatay dagiti kabusorda. Maibabaindanto, agraman dagiti amin a maipababa iti dayta a nauneg nga abut.

\s5
\v 31 Makitanto ida ti ari ti Egipto ken ti amin nga armadana, ket maliwliwadanto iti pannakatay dagiti adipenda, gapu ta ammoda nga adda met sabali a dakkel a bunggoy dagiti tattao a pinapatay dagiti kabusorda.
\v 32 Idi sibibiag pay laeng dayta nga ari, pinalubosak isuna a butbutngenna dagiti dadduma a tattao kadagiti adu a pagilian, ngem isuna ken ti dakkel nga armadana ket maitiponto kadagiti dadduma a tattao nga awan ti diosna a pinapatay dagiti kabusorda.” Awan duadua a mapasamak daytoy gapu ta imbaga ti Apo a ni Yahweh a mapasamak daytoy.

\s5
\c 33
\p
\v 1 Inikkannak manen ni Yahweh iti maysa pay a mensahe. Kinunana,
\v 2 "Anak ti tao, kasaritam dagiti padam nga Israelita, ket ibagam daytoy kadakuada: 'Kas pangarigan a mangiyegak iti kabusor nga armada a mangraut iti maysa a pagilian, ket mangdutok dagiti tattao iti dayta a pagilian iti maysa kadakuada nga agbalin a para-wanawanda.
\v 3 Ket kas pangarigan a nakitana nga um-umay ti kabusor nga armada, ket puyotanna ti trumpeta tapno ballaaganna ti amin.
\v 4 No siasinoman ti makangngeg iti trumpeta ngem saanna nga ipangag, ket no natay dayta a tao gapu iti kabusor, dayta a tao ti akin-basol iti mismo a pannakatayna.

\s5
\v 5 No impangagna, naisalakanna koma ti bukodna a biag. Ngem kas iti daytoy, matayto isuna, ket isunanto ti akin-basol.
\v 6 Ita, kas pangarigan a makitkita ti para-wanawan nga um-umay ti kabusor nga armada ket saanna a pinuyotan ti trumpeta tapno maballaagan dagiti tattao. Ket kas pangarigan ta maysa kadagiti tattaona ti matay gapu iti kabusor. Matayto dayta a tao gapu iti bukodna a biddut, ngem pabasolekto ti para-wanawan gapu iti daytoy.

\s5
\v 7 Anak ti tao, adda ti kayat a sawen daytoy a pangngarig para kenka. Dinutokanka nga agbalin a para-wanawan para kadagiti Israelita. Isu a kanayon a dumngegka iti ibagak ket ballaagam dagiti tattao para kaniak.
\v 8 No ibagak kadagiti dadduma a nadangkes a tao. 'Sika a nadangkes a tao, sigurado a matayka gapu kadagiti basolmo,' masapul nga ibagam kenkuana ti imbagak. Ket no saanmo a kinasarita dayta a tao tapno ballaagam a tallikudanna dagiti basolna, matay dayta a nadangkes a tao gapu kadagiti basolna, ngem sika ti pabasolek iti pannakatayna.
\v 9 Ngem no ballaagam dayta a nadangkes a tao tapno tallikudanna dagiti basolna, ngem no saanna nga aramiden, matayto ngarud isuna gapu kadagiti basolna, ngem maisalakanmonto ti bukodmo a biag.

\s5
\v 10 Anak ti tao, ibagam kadagiti Israelita, 'Kastoy ti ibagbagayo amin: "Ti basol a marikriknami gapu iti saanmi a panagtulnog kadagiti linteg ti Dios ken ti panagbasolmi ket kasla nadagsen kadakami, saksaktandakami, ket in-inut a matmataykami. Isu nga ania ti aramidenmi tapno agtalinaedkami a sibibiag?"'
\v 11 Ibagam kadakuada, 'Kinuna ni Yahweh nga Apo, "Iti naganko nga adda iti agnanayon, saanak a maragsakan no matay dagiti nadangkes a tattao; kaykayatko a tallikudanda ti nadangkes a kagagaladda ket agtuloyda nga agbiag. Isu nga agbabawikayo! Tallikudanyo ti dakes a kababalinyo! Dakayo nga Israelita, pudno kadi a kayatyo ti matay?"'

\s5
\v 12 Isu nga anak ti tao, ibagam kadagiti padam nga Israelita a no rugian dagiti naimbag a tattao ti saan nga agtulnog kaniak, ti kinapudnona nga isuda ket nalinteg idi ket saanto a daytoy ti manglapped kaniak a mangdusa kadakuada. Kasta met a no tallikudan dagiti nadangkes a tattao dagiti nadangkes a kagagaladda, saanda a matay gapu kadagidiay a basol. Ket no rugian dagiti naimbag a tattao ti agbasol, saanko nga ipalubos a ti kinasayaatda idi ti manglapped kaniak a mangdusa kadakuada ita.
\v 13 Ibagam kadakuada a no ibagak kadagiti naimbag a tattao a sigurado nga agtalinaedda a sibibiag, ngem no ipagarupda a mabalindan nga agaramid iti dakes a saanko ida a dusaen—gapu iti dayta, saankonto a lagipen dagiti nasayaat nga inaramidda idi. Siguradoek a mataydanto gapu kadagiti dakes a banbanag nga ar-aramidenda ita.

\s5
\v 14 Ituloymo nga ibaga dagitoy a banbanag kadagiti tattao: No ibagak kadagiti dadduma a nadangkes a tao, 'Sigurado a matayka gapu kadagiti basolmo,' nalabit nga isardeng dayta a tao ti dakes nga aramidna ket aramidenna ti nalinteg ken umno.
\v 15 Kas pangarigan, mabalin nga isublina ti innalana iti sabali a tao a mangpaneknek a bayadan dayta a tao ti inutangna, wenno mabalin nga isublina dagiti banbanag a tinakawna, wenno mabalin nga agtulnog isuna kadagiti linteg a mangpatalinaed a sibibiag kadagiti agtulnog kadagitoy. No mapasamak daytoy, sigurado nga agtalinaedto isuna a sibibiag; saan isuna a matay gapu kadagiti basol nga inaramidna idi.
\v 16 Saankonto a lagipen dagiti basol nga inaramidna idi; sigurado nga agtalinaedto isuna a sibibiag.

\s5
\v 17 Ibagam daytoy kadagiti tattao: kinunada a saan a nalinteg ti ar-aramidek, ngem ti ar-aramidenda ket isu ti pudno a saan a nalinteg. Ngarud, ibagam pay dagitoy a banbanag kadakuada:
\v 18 No isardeng ti naimbag a tao ti agaramid iti nasayaat ket irugina ti agaramid iti dakes, rumbeng laeng a matay isuna gapu kadagiti basolna.
\v 19 Ket no tallikudan ti nadangkes a tao ti nadangkes a kagagaladna ket aramidenna ti umno ken nalinteg, rumbeng laeng nga agtalinaed isuna a sibibiag gapu iti panangaramidna iti dayta.
\v 20 Ipalagipmo kadagiti tattao nga ibagbagada pay laeng a ti ar-aramidek ket saan a nalinteg. Mabalinda nga ibaga dagiti kaykayatda, ngem dusaekto ti tunggal maysa kadakuada gapu iti ar-aramidenda. Ibagam daytoy kadakuada."

\s5
\v 21 Iti agarup sangapulo ket dua a tawen kalpasan a datayo nga Israelita ket impan dagiti taga-Babilonia iti dagada, iti maikalima nga aldaw ti maikasangapulo a bulan iti dayta a tawen, immay kaniak idiay Babilonia ti maysa a tao a nakalibas manipud Jerusalem ket kinunana, "Nasakupen ti Jerusalem!"
\v 22 Iti rabii sakbay a dimteng dayta a lalaki, tinengngelnak ni Yahweh. Isu nga idi dimteng dayta a lalaki, inikkannak ni Yahweh iti kabaelan nga agsao manen; saanakon a napilitan nga agulimek.

\s5
\v 23 Kalpasanna, inikkannak ni Yahweh iti mensahe. Kinunana,
\v 24 "Anak ti tao, ibagbaga dagiti tattao nga agnanaed kadagiti nadadael idiay Israel, 'Maymaysa laeng a tao ni Abraham ngem inkari kenkuana ni Yahweh a tagikuaenna ken dagiti kaputotanna daytoy a daga. Ngem adutayo; isu a sigurado nga inted ni Yahweh kadatayo daytoy a daga tapno tagikuaentayo.'

\s5
\v 25 Isu nga agipatulodka iti mensahe kadakuada. Ibagam, 'Kastoy ti ibagbaga ni Yahweh nga Apo: "Mangmangankayo iti karne nga adda pay laeng ti darana. Agdaydayawkayo pay laeng kadagiti didiosen. Ken patpatayenyo pay laeng dagiti dadduma. Isu a rumbeng kadi a tagikuaenyo daytoy a daga?
\v 26 Agtalekkayo iti panangaramatyo kadagiti kampilanyo tapno magun-odyo dagiti banbanag a kayatyo. Agar-aramidkayo kadagiti makarimon a banbanag. Tunggal maysa kadakayo ket makikakaidda iti asawa ti sabali a lallaki. Isu a rumbeng kadi a tagikuaenyo ti daga ti Israel?"'

\s5
\v 27 Ipatulodmo daytoy a mensahe kadakuada, ibagam kadakuada a kastoy ti kunak, siak a ti Apo a ni Yahweh. 'Iti naganko nga adda iti agnanayon, dagiti agnanaed kadagiti nadadael idiay Jerusalem—papatayento ida dagiti kabusorda. Ken dagiti agnanaed kadagiti away—papatayento ida dagiti narungsot nga ayup. Dagiti agnanaed kadagiti nasarikedkedan ken rukib ket matayto iti sakit.
\v 28 Pagbalinekto a langalang ti pagilianyo. Saanyonton nga ipagpannakkel a nabileg ti pagilianyo. Mabaybay-anto unay dagiti kabanbantayan ti Israel, a ti pagbanaganna ket awanto a pulos ti agdaliasat kadagitoy.'
\v 29 Ket inton pinagbalinkon a langalang ti pagilianda gapu kadagiti amin a makarimon a banbanag nga inaramidyo, maammoandanto a siak a ni Yahweh, ket adda pannakabalinko a mangaramid kadagiti imbagak nga aramidekto."

\s5
\v 30 Ket maipapan kenka, anak ti tao, dagiti kakaduam nga Israelita ditoy Babilonia ket nakatakder iti abay ti pader ti siudad wenno kadagiti ruangan dagiti balbalayda ket agtutungtongda. Ibagbagada, 'Umaykayo dumngeg kadagiti mensahe manipud kenni Yahweh.'
\v 31 Umay kenka dagiti tattaok a kas iti masansan nga ar-aramidenda, ket agtugawda iti sangoanam tapno dumngegda iti ibagam. Ngem saanda nga ar-aramiden ti imbagam a rumbeng nga aramidenda. Kunada nga ay-ayatendak babaen kadagiti ngiwatda, ngem kadagiti kaungganda, sipipingetda a manggun-od kadagiti banbanag babaen iti panangaramidda iti saan a nainkalintegan.

\s5
\v 32 Para kadakuada, maysaka laeng a tao nga agkankanta kadakuada kadagiti napipintas a kanta ken nalaing nga agtukar iti instrumento a pangmusiko. Mangngegda dagiti ibagam, ngem saanda nga aramiden dagiti ibagam nga aramidenda.
\v 33 Dagiti nakabutbuteng a banbanag nga imbagak a mapasamakto kadakuada ket sigurado a mapasamakto. Ket maammoandanto nga adda kadakuada ti profeta, ket sika dayta a profeta."

\s5
\c 34
\p
\v 1 Inikkannak ni Yahweh iti maysa pay a mensahe. Kinunana,
\v 2 "Anak ti tao, ibagam ti mensahek maibusor kadagiti mangidadaulo ti Israel. Rumbeng nga aywananda dagiti tattaok a kas iti panangaywan dagiti agpaspastor kadagiti arbanda. Ibagam kadakuada a kastoy ti kayatko nga ibaga kadakuada, siak ti Apo a ni Yahweh: 'Dakayo nga agpaspastor iti Israel, nakabutbuteng a banbanag ti mapasamakto kadakayo gapu ta ti bagiyo laeng ti ay-aywananyo. Rumbeng koma nga aywananyo dagiti karnerok.
\v 3 Ngem maiyarigkayo kadagiti agpaspastor a mangmangan kadagiti nalukmeg a karnero, a mangpatpatay kadagiti kasasayaatan nga ayup para iti lupot a maaramid kadagitoy. Saankayo a pudno nga agpaspastor.

\s5
\v 4 Saanyo nga inaywanan ti masakit a karnero; saanyo nga inkaskaso dagiti nasugatan. Saanyo a sinapul ti naiyaw-awan a karnero. Inturayanyo ida babaen iti panangpilit ken kinaranggas.
\v 5 Gapu ta saanyo ida nga inaywanan, naiyaw-awan dagiti tattaok a kasla kadagiti karnero. Ket kabayatan a nawarawarada, darupen ken patayen ida dagiti narungsot nga ayup, ken kanenda dagiti lasagda.
\v 6 Naiyaw-awan dagiti tattaok a kas kadagiti karnero kadagiti amin a nangangato a turod ken bantay. Naiwarasda iti entero a daga, ket awan ti mangsapsapul kadakuada.

\s5
\v 7 Rumbeng ngarud nga agtignaykayo a kas kadagiti agpaspastor, dumngegkayo iti ibagak kadakayo, siak a ni Yahweh nga Apo.
\v 8 Iti naganko nga adda iti agnanayon, dagiti tattaok ket kas iti arban ti karnero nga awan ti siasinoman a pastorna, gapu it daytoy, kasla dinarup dagiti narungsot nga ayup dagiti tattaok ket kinnanda ida. Dakayo nga agpaspastor, saanyo ida a sinapul; ngem ketdi, dagiti laeng bagbagiyo ti kayatyo nga ipaayan iti taraon.

\s5
\v 9 Ngarud, dakayo a rumbeng koma nga agpastor kadagiti tattaok dumngegkayo kaniak.
\v 10 Maibusorak kadakayo a mangidadaulo. Dusaenkayo gapu iti saan a nasayaat a panangtratoyo kadagiti tattaok. Saankonto nga ipaaywan kadakayo dagiti tattaok; saanyonton a pulos a taraonan dagiti bagbagiyo kabayatan a laklaksidenyo ida. Ispalekto dagiti tattaok manipud kadakayo, ket saanyonton ida a mapapatay ken kanen.

\s5
\v 11 Siak ti Apo a ni Yahweh, ibagak kadakayo a mangidadaulo a siakto a mismo ti mangsapul kadagiti karnerok ket aywanak ida.
\v 12 Kas iti panangay-aywan ti agpaspastor kadagiti karnerona, ispalekto dagiti tattaok manipud kadagiti amin a lugar a nangiwaraanyo kadakuada, inton maidissuor kadakuada dagiti didigra ket agbutengda.
\v 13 Isublikto ida manipud kadagidiay a pagilian ket ummongekto ida manen iti bukodda a daga. Iturongkonto dagiti karnerok iti nasayaat a pagpasturan kadagiti tapaw dagiti turod ti Israel, kadagiti pagayusan ti danum, ken kadagiti bario ti Israel.

\s5
\v 14 Agarabto dagiti karnerok kadagiti nasayaat a pagpasturan kadagiti tapaw dagiti bantay. Agiddadanto kadagiti napintas a pagaraban.
\v 15 Siakto a mismo ti mangaywan kadagiti tattaok ken ipaluboskonto nga agidda ken aginanada. Daytoy ti karik, siak a ni Yahweh nga Apo.
\v 16 Sapulekto dagiti napukaw; isublikto dagiti naiyaw-awan. Bedbedakto dagiti nasugatan ken papigsaekto dagiti agkakapuy. Ngem dadaelekto dagiti nalukmeg ken nabileg. Agtignayakto a sililinteg kadagiti karnerok, kadagiti tattaok.

\s5
\v 17 Ket no maipapan kadakayo a tattaok ken karnerok, kastoy ti kuna ni Yahweh nga Apo: 'Ukomekto ti tunggal maysa kadakayo; ilasinkonto dagiti managkappia manipud kadagiti naulpit ken nabileg.
\v 18 Dakayo a mangidadaulo, a kas kadagiti napigsa a karnero nga agar-aramid iti dakes kadagiti dadduma: saan a nasayaat a tagikuaenyo dagiti kasasayaatan a pagpasturan para kadagiti bagbagiyo. Nakarkaro pay nga ibaddebaddekyo dagiti nasayaat a ruot. Saan a nasayaat a dakayo a mismo ti umin-inum iti nalitnaw a danum. nakarkaro pay a liblibegenyo ti danum.
\v 19 Pilpilitenyo ti arbanko nga agarab iti ruot a binaddebaddekanyo ken uminum iti danum a linibegyo!

\s5
\v 20 Daytoy ngarud ti ibagak kadakayo, siak a ni Yahweh nga Apo: Siakto a mismo ti mangukom kadakayo a kas kadagiti nalulukmeg a karnero ken kadagiti nabatbati a tattaok a kas kadagiti nakukuttong a karnero.
\v 21 Dakayo a kas kadagiti napigsa a karnero, induronyo dagiti dadduma babaen kadagiti abaga ken patongyo. Sinangdoyo ida agingga a napagtalawyo ida manipud iti nasayaat a pagaraban.

\s5
\v 22 Ngem ispalekto dagiti tattaok, ket saanyonto idan a matakawan. Ukomekto ti tunggal maysa a tao.
\v 23 Ket mangdutokakto iti maysa a pangulo para kadakuada, maysa a tao a kaslanto kenni Ari David, a nagserbi kaniak iti nasayaat unay. Daytanto a mangidaulo ti mangaywan kadakuada ket agbalinto a kas iti pastorda.
\v 24 Siakto a ni Yahweh ti Diosda, ken kaslanto kenni Ari David ti agbalin nga arida. Awan duadua a mapasamakto dayta gapu ta siak a ni Yahweh ti nangibaga iti daytoy.

\s5
\v 25 Makitulagakto kadagiti tattao ti Israel. Ikarikto nga ipaayak ida iti kappia. Ikarikto a pukawek dagiti amin nga atap nga ayup iti Israel, tapno agbiag a sitatalged dagiti tattaok, uray kadagiti let-ang ken kabakiran.
\v 26 Bendisionakto ida, ken bendisionakto dagiti turod iti dagak. Bendisionakto ida babaen iti panangipaayko kadakuada iti tudo iti umno a panawen, agbalinto dagitoy nga arbis a mangbendision kadakuada.
\v 27 Agbunganto dagiti kayo nga agbungbunga, ken mangipaayto ti daga kadagiti mula. Ket agbiagto a sitatalged dagiti tattaok iti dagada. Inton ispalek ida manipud kadagiti tattao a nangtagabu kadakuada, maammoandanto a siak a ni Yahweh ket addaan iti pannakabalin a mangaramid kadagiti imbagak nga aramidek.

\s5
\v 28 Saanton a pulos nga alaen dagiti soldado iti dadduma a nasion dagiti napapateg a gamengda ken saanto ida a darupen dagiti atap nga ayup. Agbiagdanto a sitatalged ket awanto ti mangbutbuteng kadakuada.
\v 29 Pagbalinekto a natalna ti dagada ken pagtuboekto dagiti nasayaat a mula. Awanton a pulos ti panagbisin iti daga, ket saanto ida a pulos a laisen dagiti tattao kadagiti dadduma a nasion.

\s5
\v 30 Ket maammoandanto a siak, a ni Yahweh a Diosda, ti mangtultulong kadakuada, ket maammoandanto nga isuda nga Israelita dagiti tattaok.
\v 31 Kaslanto a dakayo a tattaok ket karnerok nga aywanakto, ket siakto ti Diosyo. Dayta ti impakaammok, siak a ni Yahweh nga Apo.'"

\s5
\c 35
\p
\v 1 Inikkannak manen ni Yahweh iti maysa pay a mensahe. Kinunana,
\v 2 "Anak ti tao, sumangoka iti Edom ket ipadtom ti mapasamak kadagiti tattao daytoy. Kastoy ti ibagam kadakuada:
\v 3 'Dakayo nga agnanaed iti asideg ti Bantay Seir idiay Edom, siak ti kabusoryo. Aramatekto ti pannakabalinko a mangdusa kadakayo ken mangdadael iti pagilianyo.

\s5
\v 4 Dadaelekto dagiti siudadyo, ket panawanto ti tunggal maysa dagitoy. Inton mapasamak dayta, maammoanyonto a siak a ni Yahweh ket adda ti pannakabalinko a mangaramid iti imbagak nga aramidek.
\v 5 Kanayon a kabusordakayo dagiti Israelita. Nagrag-okayo idi nakapadasda iti nakaro a didigra, idi rinaut ida dagiti kabusorda, idi kasta unay ti panangdusak kadakuada gapu kadagiti basol nga inaramidda.
\v 6 Ngarud, siak a ni Yahweh nga Apo ti nangipakaammo nga iti naganko nga adda iti agnanayon, palubosakto dagiti kabusoryo a mangpapatay kadakayo. Kanayondakayonto a rauten. Rinagragsakyo a buybuyaen a matmatay dagiti dadduma a tattao, isu a papatayenkayonto.

\s5
\v 7 Papanawekto ngarud ti tunggal maysa iti Bantay Seir, dadaelekto ti siasinoman a sumrek wenno pumanaw iti daytoy.
\v 8 Punnoekto dagiti bantayyo kadagiti bangkay dagiti napapatay. Maidasayto kadagiti turodyo, kadagiti tanapyo ken kadagiti amin a pagayusan ti danumyo dagiti bangkay dagiti pinapatay dagiti kabusoryo.
\v 9 Pagbalinekto nga awan ti tao iti dagayo iti agnanayon. Awanto ti agnaed manen kadagiti iliyo. Inton mapasamak dayta, maammoanyonto a siak a ni Yahweh ket adda ti pannakabalinko a mangaramid iti imbagak nga aramidek.

\s5
\v 10 Dakayo a tattao, kinunayo, 'Kukuatayonto ti Israel ken Juda. Tagikuaentayonto dagiti masakupanda!' Kinunayo dayta uray no siak a ni Yahweh ket adda pay laeng sadiay a mangay-aywan kadakuada.
\v 11 Ngarud, siak a ni Yahweh nga Apo, a mangipakaammo nga iti naganko nga adda iti agnanayon, dusaenkayonto gapu iti panagpungtotyo kadagiti tattaok, gapu iti panangapalyo kadakuada, ken gapu iti pananggurayo kadakuada. Ket inton dusaenkayo, siguradoek a maammoanto dagiti Israelita a siak ti nangdusa kadakayo.

\s5
\v 12 Ket maammoanyonto a siak a ni Yahweh ket nangngegko dagiti amin a makarimon a banbanag nga imbagayo maipapan iti daga ti Israel; kinunayo a nadadael ti daga ket mabalinyo a sakupen daytoy para kadagiti bagiyo.
\v 13 Linaisdak; nagngegko dagiti amin nga imbagayo maipapan kaniak.

\s5
\v 14 Isu a kastoy ti kunak, siak a ni Yahweh nga Apo: Dakayo a tattao nga agnanaed iti Bantay Seir ken kadagiti dadduma a lugar idiay Edom, inton papanawek ti tunggal maysa iti dagayo, agrag-onto ti tunggal maysa iti lubong.
\v 15 Nagragsakkayo idi nadadael ti daga dagiti Israelita, isu a kastanto met ti aramidek iti dagayo. Inton mapasamak dayta, maammoanto dagiti tattao a siak a ni Yahweh ket addaan iti pannakabalin a mangaramid kadagiti imbagak nga aramidek.’”

\s5
\c 36
\p
\v 1 Imbaga ni Yahweh kenni Ezekiel' "Anak ti tao, mangtedka iti mensahe iti turod a pagilian ken kadagiti bantay ti Israel a kasla dagitoy ket tattao. Ibagam a dumngegda iti mensahek para kadakuada.
\v 2 Daytoyen: dagiti kabusor ti Israel, dagiti bunggoy dagiti tattao nga agnanaed iti asideg ket naragsak unay itan, gapu ta ibagbagada a nadadaelen ti Jerusalem, isu a kukuadanto ti turod a pagilian ken dagiti bantay ti Israel.
\v 3 Isu a sika, Ezekiel, rumbeng nga ibagam kadagiti bantay ti Israel ti ibagbagak kadakuada, siak ti Apo a ni Yahweh: 'Rinautdakayo dagiti armada dagiti dadduma a nasion manipud iti amin a suli, ket pinanawandakayo ti tunggal maysa. Adda itan iti dagayo dagitoy a ganggannaet nga armada. Nagsaoda iti makarurod unay maipapan kadagiti tattaoyo nga Israelita ken imbagada ti amin a kita ti inuulbod maipapan kadakuada.

\s5
\v 4-6 Ngarud, dakayo a bantay ti Israel, dumngegkayo iti daytoy a mensahek. Siak a ni Yahweh nga Apo, ket adda ibagak kadakayo a turod ken bantay, kadakayo a pagayusan ti danum ken tanap, kadakayo nga ili ken siudad a pinuoran dagiti kabusor, nga awanen a pulos ti agnanaed, manipud iti nangalaan ti kabusor kadagiti amin nga agkakapateg a banbanag, a makin-tattao kadagiti bunggoy dagiti tattao iti aglawlawyo a manguy-uyaw kadakayo. Kastoy ti ipakaammok, siak a ni Yahweh nga Apo: Makapungtotak unay kadagiti tattao ti Edom ken kadagiti dadduma a bunggoy dagiti tattao; linaisda dagiti tattaoyo nga Israelita ken siraragsakda nga innala dagiti dagada a kas pagpaaraban. Isu a rumbeng nga agsao ni Ezekiel kadakayo para kaniak, daga ti Israel, dagiti bantay ken turod, dagiti tanap ken pagayusan ti danum: Siak a ni Yahweh nga Apo, ket makapungtotak unay gapu ta linaisnakayo ti kabusor.

\s5
\v 7 Ngarud, kastoy ti kunak, siak a ni Yahweh nga Apo: Sipapasnekak a mangipakaammo a pabainakto dagiti tattao dagiti nasion nga adda iti aglawlawyo.

\s5
\v 8 Ngem ibagak kadakayo a bantay ti Israel nga agbunganto iti adu dagiti kayoyo a maipaay kadagiti tattaok nga Israelita, gapu ta iti mabiit, agawiddanto manipud iti Babilonia.
\v 9 Agtrabahoakto tapno tulongankayo ken kaasiankayonto. Ikkakto iti kabaelan dagiti mannalon a mangarado iti daga ken mulaandakayonto.

\s5
\v 10 Paaduekto dagiti tattao nga agnanaed sadiay, kadakayo a bantay ken sadinoman iti Israel. Agnaedto dagiti tattao kadagiti siudad ken ibangondanto manen dagiti balay iti ayan dagiti nadadael.
\v 11 Paaduekto dagiti tattao ken ayup. Adunto ti annak dagiti tattao. Pagnaedekto dagiti tattao sadiay a kas iti inaramidda iti napalabas, ket parang-ayekto ida a kas iti inaramidda idi. Ket maammoanyonto a siak a ni Yahweh ket adda pannakabalinko a mangaramid kadagiti imbagak nga aramidek.
\v 12 Papagnaekto dagiti tattaok nga Israelita kadagiti bantayyo. Tagikuaendanto ti dagayo; kukuadakayonto iti agnanayon. Agbungakayonto a kanayon tapno adda umanay a taraon a kanenda ket saandanton a pulos a mabisinan ken matay.

\s5
\v 13 Siak a ni Yahweh ti Apo, kastoy ti ibagbagak kadakayo a bantay: Pudno a kinuna dagiti tattao a saanda a makapagmula kadakayo iti adu, isu a matayda iti bisin.
\v 14 Ngem saanton a mapasamak dayta.
\v 15 Dakayo a bantay, saandakayonton a laisen pay dagiti dadduma a bunggoy dagiti tattao. Saandakayonton a katawaan; dakayo a bantay, saanyonton a pagsagabaen ti nasionyo gapu iti pannakaparmek. Siak ti Apo a ni Yahweh ti mangibagbaga a mismo iti daytoy.'"

\s5
\v 16 Inikkannak ni Yahweh iti maysa pay a mensahe. Kinunana,
\v 17 "Anak ti tao, idi agnanaed dagiti Israelita iti bukodda a daga, tinulawanda daytoy babaen kadagiti banbanag nga inaramidda. Pinagbalinda daytoy a saan a maikari kaniak. Imbilangko a makarimon ti kagagaladda a kas iti lupot nga ar-aramaten dagiti babbai iti binulan a panagreglada.
\v 18 Isu a dinusak ida iti kasta unay gapu ta pinapatayda ti adu a tattao ken gapu ta nagdaydayawda kadagiti didiosen sadiay. Pinagbalinda ti entero a dagada a saan a maikari kaniak.

\s5
\v 19 Isu a pinaiwarak ida kadagiti kabusorda kadagiti dadduma a daga. Dinusak ida a kas rumbeng a pannakadusada gapu ta adu a dakes a banbanag ti inaramidda.
\v 20 Sadinoman a papananda kadagidiay a daga, isuda ti nakaigapuan a linaisdak dagiti dadduma a tattao, idi rumbeng koma a dayawendak. Ibagbaga dagidiay a tattao, 'Maibilang kenni Yahweh dagiti Israelita, ngem saan a naan-anay a napigsa isuna tapno salaknibanna ida. Nasken a panawanda ti daga nga intedna kadakuada.'
\v 21 Imbabaindak dagiti tattao ti Israel kadagiti bunggoy dagiti tattao a napananda, imbes koma a dayawendak dagitoy a bunggoy dagiti tattao.

\s5
\v 22 Isu a sika, Ezekiel, ibagam kadagiti Israelita a kastoy ti ibagbagak kadakuada, siak a ti Apo a ni Yahweh: 'Saan a para kadakayo nga Israelita ti panangispalko kadakayo manipud kadagiti kabusoryo. Ngem ketdi, aramidekto daytoy tapno dagiti tattao kadagitoy dadduma a daga ket dayawendakto a kas Dios. Inaramidyo ti kabaelanyo tapno pabainandak iti sadinoman a napnapananyo.
\v 23 Ipakitakto a dagitoy a dadduma a bunggoy dagiti tattao ket rumbeng a dayawendak a kas Dios, uray no saandanto a pulos a maammoan daytoy babaen iti panangkitada iti panagtignayyo. Inton paneknekak kadakuada a mannakabalinak ken kabaelak nga aramiden ti aniaman a banag, ket maammoandanto a tungpalekto dagiti amin nga imbagak nga aramidek. Ket makitadakayonto a daydayawendak a kas Dios a nasantoan.

\s5
\v 24 Ti aramidekto ket isublikayo manipud kadagidiay nga adayo a daga. Ummongenkayonto manipud kadagidiay amin a lugar a napananyo, ket isublikayonto iti bukodyo a daga.
\v 25 Kaslanto iwarsik ti nadalus a danum kadakayo ket madalusankayonto. Dalusankayonto manipud kadagiti amin a banag a nanglaksidak kadakayo, ket pasardengenkayonto iti panagdaydayawyo kadagiti didiosen.

\s5
\v 26 Ikkankayonto iti baro a naan-anay a panagpanpanunot. Pasardengenkayonto manipud iti kinatangken ti uloyo, ket ipaluboskonto nga agtulnogkayo manipud iti kaungganyo.
\v 27 Itedkonto kadakayo ti Espirituk ken ikkankayonto iti kabaelan a mangsurot kadagiti lintegko.
\v 28 Agnaedkayonto manen iti daga nga intedko kadagiti kapuonanyo. Dakayonto dagiti tattaok ket siakto ti Diosyo.

\s5
\v 29 Wayawayaankayonto manipud kadagiti amin a banag nanglaksidak kadakayo. Paaduekto ti trigoyo, ket saankonton nga ibaon manen ti panagbisin kadakayo.
\v 30 Pagbungaekto iti adu dagiti kayoyo, ken paaduekto dagiti nasasayaat a mula iti dagayo, a ti pagbanaganna ket saandakayonton a laisen dagiti tattao iti sabali a daga gapu ta awan ti umanay a taraonyo.
\v 31 Inton mapasamak dayta, mapanunotyonto ti maipapan iti dakes a kagagaladyo ken dagiti nadangkes nga aramidyo iti naglabas, ket saankayonto a maay-ayo kadagiti bagbagiyo gapu kadagiti basol ken makarimon a banbanag nga inaramidyo.

\s5
\v 32 Ngem siak a ti Apo a ni Yahweh, kastoy ti ibagbagak: Saan a para kadakayo nga aramidekto dagitoy a banbanag. Dakayo nga Israelita ket rumbeng nga agbainkayo gapu iti kagagaladyo.
\v 33 Siak a ti Apo a ni Yahweh, kastoy pay ti ibagak kadakayo: Iti tiempo a dalusankayo manipud kadagiti amin a basol nga inaramidyo, palubosankayonto nga agnaed manen kadagiti siudadyo ken agibangonkayo kadagiti balbalay iti ayan dagiti nadadael.
\v 34 Makitanto dagiti tattao a lumabas iti pagilianyo a mulmulaanyo manen ti dagayo ken agnanaed manen dagiti tattaoyo iti daytoy.

\s5
\v 35 Ket ibagadanto, "Daytoy a daga a nadadael ket nagbalin a nadam-eg a kas iti minuyongan ti Eden. Dagiti siudad a nagbalin a gabsuon ti pannakadadael, awan agnanaed ken nadadael, itan ket addan balbalay iti aglawlaw dagitoy, ken agnanaeden dagiti tattao kadagitoy a siudad."
\v 36 Inton mapasamak dayta, maammoanto dagiti tattao a nabati kadagiti daga iti aglawlawyo a siak a ti Apo a ni Yahweh ti nangipaay iti kabaelanyo nga ibangon manen dagiti nadadael, ken tapno agmula manen kadagiti taltalon nga awan iti agtubtubo kadagitoy. Siak a ni Yahweh ti nangibaga a mapasamakto daytoy, ket siakto ti makagapu a mapasamak daytoy.

\s5
\v 37 Kastoy pay ti kunak, siak a ni Yahweh nga Apo: Sungbatakto manen dagiti kiddawyo kaniak a paaduek dagiti tattao a kas kaadu dagiti karnero.
\v 38 Pagbalinekto ida a kas iti kaadu dagiti arban ti karnero a kasapulanto para iti panangidaton idiay Jerusalem iti tiempo dagiti naituding a fiestayo. Dagiti siudad a nadadael ita ket mapnonto kadagiti tattao, ket maammoanyonto a siak a ni Yahweh, ti nangaramid iti daytoy.'"

\s5
\c 37
\p
\v 1 Maysa nga aldaw, inikkannak ni Yahweh iti maysa pay a sirmata. Iti sirmata, nariknak ti pannakabalin ti Apo kaniak, ket babaen iti Espirituna impannak iti tengnga ti maysa a tanap. Napunno daytoy kadagiti tulang dagiti tattao a napapatay.
\v 2 Inturongnak a magna nga agsublisubli iti ayan dagidiay a tulang. Nakitak nga adu unay dagiti tulang sadiay, tultulang a namaga unay.
\v 3 Sinaludsodnak, "Anak ti tao, ipagarupmo kadi nga agbiag pay a kas tattao dagitoy a tulang?" Insungbatko, "Yahweh nga Apok, sika laeng ti makaammo no mapasamak dayta."

\s5
\v 4 Kalpasanna, kinunana kaniak, "Agmensaheka kadagitoy a tulang para kaniak. Ibagam kadagitoy, 'Dakayo a namaga a tulang, dumngegkayo iti ibagbaga ni Yahweh.
\v 5 Kastoy ti kuna ni Yahweh nga Apo kadakayo a tulang: Itedkonto ti angesko iti tunggal maysa kadakayo, ket agbiagkayonto manen.
\v 6 Ikkakto iti pennet dagiti tulangyo ken mabalkotto iti lasag dagiti tulangyo. Balkotekto iti kudil ti lasagyo. Ket pagangsenkayonto, ket agbiagkayonto. Inton mapasamak dayta, maammoanyonto a siak a ni Yahweh ket addaan iti pannakabalin a mangaramid iti imbagak nga aramidek.'~"

\s5
\v 7 Isu a nagsaoak kadagiti tulang a kas imbilin kaniak ni Yahweh. Kabayatan nga agsasaoak, adda daranudor, uni ti gingined, ket nagtitipon ken nagsusuop dagiti tulang.
\v 8 Kabayatan a kitkitaek, nakitak dagiti pennet a maikabkabil kadagitoy ket mabalbalkot dagitoy iti lasag, kalpasanna ket binalkot ti kudil ti lasag, ngem saanda nga agang-anges.

\s5
\v 9 Kalpasanna, kinunana kaniak, "Anak ti tao, agmensaheka iti angin para kaniak. Ibagam iti angin, 'Angin, ibagbaga ni Yahweh kenka nga aganginka manipud iti amin a suli. Angsam dagitoy a tattao a napapatay tapno agbiagda manen!'"
\v 10 Isu nga imbagak ti imbilinna kaniak nga ibagak, ket naikkanda iti anges, ket nagangesda. Nagbiagda ket timmakderda a kas iti dakkel nga armada.

\s5
\v 11 Kalpasanna, kinunana kaniak, "Anak ti tao, ibagbagi dagitoy a tulang dagiti amin nga Israelita. Ibagbaga dagiti tattao, 'Kasla namaga dagiti tulangmi; awanen a pulos ti namnamaentayo a nasayaat; nadadael ti nasiontayo.'
\v 12 Isu nga ibagam ti mensahek kadakuada, 'Kastoy ti kuna ti Apo a ni Yahweh: Tattaok, kaslan ilukatkonto dagiti tanemyo ket pagbiagekto manen dagiti bangkayyo. Isublikayonto iti Israel.

\s5
\v 13 Ket inton mapasamak dayta, maammoanyonto a tattaok a siak a ni Yahweh ti nangaramid iti daytoy.
\v 14 Itedkonto ti espirituk kadakayo, ket kasla agbiagkayonto manen, ket ipaluboskonto nga agbiagkayo manen iti bukodyo a daga. Ket maammoanyonto a siak a ni Yahweh ti nangibaga a maaramid daytoy ken nangaramid iti daytoy. Kasta ti impakaammok, siak a ni Yahweh.' "

\s5
\v 15 Inikkannak ni Yahweh iti maysa pay a mensahe. Kinunana,
\v 16 "Anak ti tao, mangalaka iti maysa a kayo ket isuratmo iti daytoy, 'Ibagbagi daytoy ti Juda ken dagiti amin a tribu iti Juda.' Kalpasanna, mangalaka ti maysa pay ket isuratmo iti daytoy, 'Ibagbagi daytoy ti Israel ken dagiti amin a tribu iti Israel.'
\v 17 Ket pagtiponem dagitoy a kasla dagitoy ket maysa a kayo iti imam.

\s5
\v 18 Inton saludsoden kenka dagiti padam nga Israelita, 'Ania ti kayat a sawen daytoy a tignay?',
\v 19 ibagam kadakuada, 'Kastoy ti kuna ti Apo a ni Yahweh: Ti maysa a pidaso a kayo iti ima ni Ezekiel ket ibagbagina ti Israel ken dagiti amin a tribu iti Israel. Itiponko daytoy iti maysa a pidaso ti kayo a mangibagbagi iti Juda, tapno agbalin a maymaysa iti imana.'
\v 20 Kalpasanna, Anak ti tao, ingatom dagiti pidaso ti kayo a sinuratam tapno makita dagitoy dagiti tattao.

\s5
\v 21 Ibagam kadagiti tattao, 'Kastoy ti kuna ni Yahweh nga Apo: Irruarkayonto nga Israelita kadagiti pagilian a naipilit a nakaipananyo. Ummongenkayonto manipud kadagidiay amin a daga, ket isublikayonto iti bukodyo a daga.
\v 22 Ket pagbalinenkayonto manen a maysa a nasion iti dagayo, kadagiti bantay ti Israel. Ket addanto maysa nga ari a mangituray kadakayo amin. Saankayonton a pulos nga agbalin a dua a nasion wenno magudua iti dua a pagarian.
\v 23 Saanyonton a pulos a tulawan dagiti bagiyo babaen iti panagdaydayaw kadagiti didiosen ken makarimon nga estatua dagiti didiosenyo, gapu ta pasardengenkayonton nga agbasol ken manglaksid kaniak. Dakayonto dagiti tattaok, ket siakto ti Diosyo.'

\s5
\v 24 Maysa a tao a kas kenni Ari David, a nagserbi kaniak a nasayaat ti agbalinto nga ari dagiti kaputotanyo, ket kasla isunanto ti pastorda. Sipapasnekto a tungpalenda dagiti lintegko.
\v 25 Agnaeddanto iti daga nga intedko kenni Jacob a nagserbi met kaniak a nasayaat; agnaeddanto iti daga a nagnaedan dagiti kapuonanyo. Agnaeddanto sadiay iti agnanayon kasta met dagiti annakda ken dagiti appokoda, ket ti maysa a tao a kas kenni Ari David ti agbalinto nga arida iti agnanayon.

\s5
\v 26 Makitulagakto kadakuada nga ipaayko kadakuada ti kappia; maysa daytoy a katulagan nga agpautto iti agnanayon. Itedkonto manen kadakuada dayta a daga ket paaddoekto ida. Ket ipasdekkonto kadakuada ti templok iti agnanayon.
\v 27 Ti balayko a pagnaedakto ket addanto iti sibayda; siakto ti Diosda ket isudanto dagiti tattaok.
\v 28 Ket inton addanto manen sadiay ti templok, maammoanto dagiti tattao kadagiti nasion a siak a ni Yahweh ti nangilasin iti Israel nga agpaay iti dayawko."

\s5
\c 38
\p
\v 1 Inikkannak ni Yahweh ti maysa pay a mensahe. Kunana kaniak,
\v 2 "Anak ti tao, sumangoka iti Magog, ti pagilian a ni Gog ti ari. Isuna pay ti mangiturturay kadagiti nasion ti Mesec ken Tubal. Iwaragawagmo ti mensahek maipapan kadagiti nakabutbuteng a banbanag a mapasamakto kenkuana.
\v 3 Ibagam daytoy: 'Kastoy ti kuna ti Apo a ni Yahweh: Gog, sika nga agturturay iti Mesec ken Tubal, siak ti kabusormo.

\s5
\v 4 Kasla pagbaw-ingenka ket kaw-itakto dagiti sangim ket ipanka iti Israel—sika ken dagiti amin nga armadam, agraman dagiti kabaliom, ken dagiti lallaki a nakaawit kadagiti igam a nakasakay kadagidiay a kabalio, ken dagiti dadduma a soldado nga agaw-awit kadagiti dadakkel ken babassit a kalasag, aminda a nakaawit kadagiti kampilan.
\v 5 Karaman pay dagiti soldadom kadagiti armada manipud iti Persia, Etiopia, ken Put, aminda a nakakalasag ken nakahelmet—
\v 6 kasta met dagiti amin a soldado a naggapu iti Gomer ken maysa nga armada a naggapu iti Bet Togarma—dagitoy a daga ket agpada nga adda iti adayo iti amianan ti Israel. Kadduamto nga umay dagiti armada dagiti adu a nasion.'

\s5
\v 7 Ibagam kenni Gog daytoy: 'Agsaganaka, ken agsaganaka nga agbalin a pangulo dagidiay amin a soldado.
\v 8 Iti umay a tiempo, bilinennakanto ni Yahweh a mangidaulo kadagidiay nga armada a mangraut iti Israel, ti pagilian a dagiti pasdekna ket naibangon manen kalpasan a nadadaelda kadagiti gubat. Maisublinto dagiti tattaoda manipud kadagiti adu a nasion tapno agnaed manen kadagiti turod ti Israel, nga awan a pulos ti nagnaed iti nabayag a panawen. Isublinto ni Yahweh dagiti Israelita kadagiti dadduma a daga, ket agnaeddanto a sitatalna.
\v 9 Sika ken dagiti amin nga armada manipud kadagiti adu a nasion ket sumang-atto iti Israel, umas-asidegda a kasla napigsa a bagyo. Ti armadam ket kaslanto napuskol nga ulep a mangakkub iti daga.

\s5
\v 10 Ngem kastoy ti kunak, siak a ni Yahweh nga Apo: Iti dayta nga aldaw, panggepemto ti agaramid iti maysa a banag a dakes unay.
\v 11 Ibagamto daytoy iti bagim: "Rautento ti armadak ti pagilian a dagiti bario ket awanan kadagiti pader iti aglawlawda. Rautenminto dagiti tattao a natalged ken mangipagpagarup nga awan ti makadangran kadakuada. Dagiti ili ken barrioda ket awanan kadagiti pader nga addaan kadagiti ruangan ken balunet.
\v 12 Isu a nalakaminto a rauten dagitoy a tattao. Isuda dagiti tattao a nagsubli manipud kadagiti adu a pagilian a nagnaedanda iti adu a tawen, dagiti tattao nga agnanaed itan a sitatalged iti dagada karaman dagiti amin nga ayup ken dagiti dadduma a sanikuada. Agnanaedda iti pagilian nga adda iti tengnga dagiti napapateg a pagilian iti lubong. Alaento dagiti soldadotayo dagiti amin a napapateg a sanikuada."

\s5
\v 13 Ket umayto dagiti tattao ti Seba, Dedan ken dagiti agtagtagilako ti Tarsis ket ibagadanto kenka, "Um-ummongem kadi dagiti amin a soldadom tapno rautem ti Israel ket alaem dagiti amin a pirak ken balitokda? Panggepmo kadi nga alaen dagiti ayupda ken dagiti dadduma a napapateg a sanikuada? "'

\s5
\v 14 Ngarud, Anak ti tao, denggem ti mensahek maipanggep kenni Gog ket ibagam kenkuana, 'Kastoy ti kuna ti Apo a ni Yahweh: Iti dayta a tiempo, inton agnanaed a sitatalged dagiti tattaok iti Israel, pudno a panunotemto ida.
\v 15 Umaykanto manipud iti lugarmo iti amianan ti Israel, a kaduam dagiti armada dagiti adu nasion, dagiti amin a kumakabalio, ken dakkel nga armada.
\v 16 Magnakanto nga umasideg kadagiti tattaok nga Israelita, ket saknapanto dagiti soldadom ti daga a kas iti napuskol nga ulep. Gog, iyegkonto dagiti soldadom a mangraut iti pagilian a kukuak, ngem ti aramidekto kenka ket mangipakitanto kadagiti tattao kadagiti dadduma a nasion a nasantoanak.

\s5
\v 17 Kastoy ti kunak kenni Gog, siak a ni Yahweh nga Apo: Kadagiti napalpalabas a tawen, idi intedko dagiti mensahe kadagiti adipenko a profeta idiay Israel, ket adda dagiti mensahe maipapan kenka. Iti dayta a tiempo, kinunada iti adu a tawen nga iyegkonto dagiti armadam a mangraut kadagiti tattaok.
\v 18 Isu a kastoy ti kunak a mapasamakto, siak a ni Yahweh nga Apo: Inton rauten ti armadam ti Israel, makaungetakto kenka iti kasta unay.

\s5
\v 19 Makapungtotakto, ket tapno ipakitak a makaungetak, addaanto nakaro a ginggened idiay Israel, nga ayanto dagiti armadam.
\v 20 Agbutengto gapu iti aramidek dagiti lames iti baybay, dagiti billit, dagiti atap nga ayup, ken dagiti ayup nga agkarkarayam iti daga, ken dagiti amin a tattao iti rabaw ti daga. Margaayto dagiti bantay ken dagiti turod, ken marbanto iti daga dagiti pader a naipatakder iti sadinoman.

\s5
\v 21 Gog, kadagiti amin a bantay iti pagilian a kukuak ket pagrarangetekto dagiti soldadom a maibusor iti tunggal maysa.
\v 22 Dusaenkanto ken dagiti soldadom babaen kadagiti didigra, ket papatayekto ida. Iyegkonto kenka ken kadagiti bunggoymo a naggapu kadagiti adu a daga dagiti napipigsa a tudo, uraro, ken umap-apuy nga asufre manipud iti tangatang.
\v 23 Iti kastoy a wagas, ipakaammokto kadagiti tattao kadagiti adu a nasion a naindaklanak unay, ken ipakitakto kadakuada ti kinasantok. Ket makitadanto no siasinoak ken maammoandanto a siak ni Yahweh.'"

\s5
\c 39
\p
\v 1 Kinuna ni Yahweh kaniak, “Anak ti tao, agsaoka para kaniak maipapan kadagiti nakabutbuteng a mapasamakto kenni Gog. Ibagam kenkuana daytoy: ‘Gog, siak ti kabusormo, sika a mangiturturay iti Mesec ken Tubal.
\v 2 Ibaw-ingkanto ket iguyodkanto ken dagiti armadam manipud iti adayo a paset ti amianan ti Israel ket ibaonka a makigubat kadagiti bantay ti Israel.
\v 3 Inton addaka sadiay, agawekto ti baim manipud iti makannigid nga imam ken patinnagekto dagiti panam iti makannawan nga imam.

\s5
\v 4 Sika ken dagiti soldado a kakaduam ket matayto kadagiti bantay ti Israel. Itedkonto dagiti bangkayyo a kas taraon kadagiti billit a mangmangan kadagiti lasag ti natay, ken kadagiti atap nga ayup.
\v 5 Mataykayonto kadagiti nalawa a tay-ak. Awan duadua a mapasamakto daytoy gapu ta Siak a ni Yahweh nga Apo ti nangibaga a mapasamak daytoy.
\v 6 Mangpataudakto kadagiti apuy a mangpuor iti Magog ken kadagiti amin nga agnanaed a sitatalged kadagiti lugar nga adda iti igid ti baybay, ket maammoandanto a Siak a ni Yahweh ti addaan iti pannakabalin a mangaramid iti imbagak nga aramidek.

\s5
\v 7 Ipakaammokto kadagiti tattaok nga Israelita a nasantoanak. Saankon nga ipalubos a laisendak, ket maammoanto dagiti bunggoy dagiti tattao kadagiti sabali a daga a siak ni Yahweh, ti Dios a daydayawen ken raraemen ti Israel.
\v 8 Siak a ni Yahweh nga Apo, ipakaammok a mapasamakto dagitoy a banbanag iti mabiit. Umadanin dayta nga aldaw.

\s5
\v 9 Iti dayta a tiempo, rummuarto dagiti tattao nga agnanaed kadagiti siudad ti Israel ket urnongenda dagiti igam manipud kadagiti natay a soldado, ket usarendanto dagitoy a pagsungrod tapno iluto dagiti taraonda. Puorandanto dagiti babassit ken dadakkel a kalasag, dagiti bai ken pana, dagiti pang-or a panggubat, ken dagiti gayang. Addanto ti umanay nga igam a mausar a pagsungrod iti pito a tawen.
\v 10 Saandanto a kasapulan ti mapan mangayo kadagiti tay-ak wenno agpukan kadagiti kayo kadagiti bakir, gapu ta umanayto dagidiay nga igam a pagsungrodda. Ket agsamsamdanto kadagiti napateg a banbanag manipud kadagiti nagsamsam kadakuada, ken agtakawdanto kadagiti banbanag manipud kadagiti tattao a nagtakaw kadakuada. Kasta ti imbagak a mapasamakto, siak a ni Yahweh nga Apo.

\s5
\v 11 Iti dayta a tiempo, mangaramidakto iti maysa a tanem a maipaay kenka, Gog, ken kadagiti soldadom, iti tanap iti daya ti Natay a Baybay. Serraanto dayta a tanem ti kalsada a masansan a pagpagnaan dagiti agdaldaliasat, gapu ta sika, O Gog ken dagiti amin a soldado iti adu nga armadam ket maitabonto sadiay. Isu a managananto daytoy a Tanap ti Hamon Gog.

\s5
\v 12 Pito a bulan nga itabtabonto dagiti tattao ti Israel dagiti bangkayyo. Kasapulanto nga itabon ida amin, tapno saan a matulawan ti daga gapu iti aniaman a saan a naitabon a bangkay.
\v 13 Amin dagiti tattao ti Israel ket agitabunto kadagiti bangkay. Iti aldaw nga agballigiak, dayawendakto, ket agnanayon a laglagipendanto dayta nga aldaw.

\s5
\v 14 Kalpasan dayta a pito a bulan, mangdutokto dagiti Israelita kadagiti lallaki nga agsursor iti daga a mangitabon iti aniaman a nabati a bangkay, tapno saan nga agtalinaed a natulawan ti daga.
\v 15 Inton sursorenda ti daga, tunggal makakita ti maysa kadakuada iti tulang ti tao, mangikabil isuna iti pagilasinan iti abay daytoy. Inton makita dagiti agitabon dagiti pagilasinan, pidutendanto dagiti tulang ket itabonda dagitoy iti Tanap ti Hamon Gog.
\v 16 Addanto sadiay ti maysa a siudad a napanaganan iti Hamonah. Ket babaen daytoy a panangitabon kadagiti bangkay, dalusandanto ti daga.’”

\s5
\v 17 Kinuna ni Yahweh kaniak, “Anak ti tao, kastoy ti kunak, Siak a ni Yahweh nga Apo: Ayabam dagiti amin a kita ti billit ken atap nga ayup. Ibagam kadakuada, ‘Aguummongkayo manipud iti amin a disso ket umaykayo iti padaya nga isagsagana ni Yahweh para kadakayo. Dakkelto daytoy a padaya iti rabaw dagiti bantay ti Israel. Sadiay mangankayonto kadagiti lasag dagiti lallaki ken inumenyonto ti darada.
\v 18 Kanenyonto ti lasag dagiti nabileg a soldado ken inumenyonto ti dara dagiti ari a kaslada la nalulukmeg nga ayup manipud iti rehion ti Basan—a kasda la dagiti kalakian a karnero, urbon a karnero, kalding, ken kalakian a baka.

\s5
\v 19 Iti padaya nga isagsagana ni Yahweh a maipaay kadakayo, mangankayonto iti taba agingga a mabsugkayo, ken uminomkayonto iti dara agingga a kasla nabartekkayo.
\v 20 Kasla a mangmangankayonto iti maysa a lamisaan nga insaganak para kadakayo. Kanenyonto ti amin a kayatyo kadagiti lasag dagiti kabalio ken dagiti nagsakay kadakuada, dagiti amin a kita ti nabileg a soldado.’ Kasta ti impakaammok, Siak a ni Yahweh nga Apo.

\s5
\v 21 Ipakitakto kadagiti tattao kadagiti nasion a mannakabalinak, ket makitanto dagiti amin a nasion no kasano a dusaek dagiti Israelita.
\v 22 Iti dayta a tiempo, maamiristo dagiti Israelita a siak a ni Yahweh a Diosda, adda pannakabalinko a mangaramid iti imbagak nga aramidek.

\s5
\v 23 Ket maammoanto dagiti tattao kadagiti sabali a daga nga napilitan a napan dagiti Israelita kadagiti sabali a pagilian gapu ta nagbasolda ta saanda a napudno kaniak. Tinallikudak ida, ken inpalubosko a sakupen ida dagiti kabusorda ken papatayen ti adu kadakuada.
\v 24 Dinusak ida segun iti rumbeng kadakuada gapu kadagiti makarurod nga aramid ken basbasolda, ken tinallikudak ida.

\s5
\v 25 Ngarud, Siak a ni Yahweh nga Apo, kastoy ita ti kunak: Isublikon manipud iti pannakaitalaw a kas balud dagiti kaputotan ni Jacob; kaasiakto dagiti amin nga Israelita, ken siguradoek pay nga idayawdakto.
\v 26 Inton agsubli dagiti Israelita iti pagilianda, agnaedanto a sitatalged iti dagada, nga awan ti siasinoman a mangbutbuteng kadakuada. Lipatendanto ti maipapan kadagiti nakababain a banbanag ken ti panagsukir nga inaramidda iti napalabas.
\v 27 Inton naisublik ida manipud kadagiti pagilian dagiti kabusorda, ket naummongko ida iti Israel, maammoanto dagiti tattao kadagiti adu a nasion a nasantoanak gapu iti inaramidko para kadagiti tattaok.

\s5
\v 28 Maammoanto dagiti Israelita a Siak a ni Yahweh ti nangaramid iti daytoy. Maammoandanto dayta gapu ta pinilitko ida a mapan kadagiti sabali a pagilian, ket kalpasanna, inummongko ida iti bukodda a pagilian. Awanto ti ibatik uray maysa kadakuada kadagidiay a pagilian.
\v 29 Saankonto idan a tallikudan; itedkonto ti Espirituk kadagiti Israelita. Awan duadua a mapasamakto daytoy gapu ta Siak a ni Yahweh nga Apo ti nangibaga iti daytoy.”

\s5
\c 40
\p
\v 1 Idi agarup dua pulo ket lima a tawen kalpasan ti panangipan dagiti taga-Babilonia kadakami nga Israelita iti dagada, iti maikasangapulo nga aldaw ti umuna a bulan iti dayta a tawen, idi agarup sangapulo ket uppat a tawen kalpasan iti pannakadadael ti Jerusalem, tinengngelnak ni Yahweh babaen iti pannakabalinna, ket iti maysa a sirmata, impannak iti Israel.
\v 2 Indissonak iti nangato unay a bantay. Iti abagatan a paset iti dayta a bantay, adda dagiti sumagmamano a pasdek a kasla paset ti maysa a siudad.

\s5
\v 3 Idi impannak sadiay, nakitak ti maysa a lalaki a ti langana ket kasla naaramid iti bronse. Agtaktakder isuna iti uneg ti ruangan ti siudad, ket nakaiggem isuna iti lino a lubid ken kayo a pagrukod.
\v 4 Kinunana kaniak, "Anak ti tao, kitaem a nalaing dagiti amin a banag nga ipakitak kenka, ken ipangagmo dagiti amin nga ibagak ken dagiti amin nga ipakitak kenka, gapu ta dayta ti makagapu nga inyegnaka ti Dios ditoy. Ket kalpasan daytoy, masapul nga ibagam kadagiti Israelita dagiti amin a nakitam ditoy."

\s5
\v 5 Iti sirmata, nakitak nga adda pader a naan-anay a naipalikmut iti ayan ti templo. Ti kaatiddog ti kayo a pagrukod nga ig-iggaman ti lalaki ket agarup 3.2 a metro. Rinukodna ti pader; agarup 3.2 a metro ti kapuskolna ken agarup 3.2 a metro ti kangatona daytoy.
\v 6 Kalpasanna, napan isuna iti ruangan iti pader ti templo nga adda iti daya a paset ti templo. Immuli isuna iti agdan ket rinukodna ti pagserkan a nakasango iti ruar; agarup 3.2 a metro ti kaatiddog.
\v 7 Kalpasanna, adda dagiti babassit a siled para kadagiti guardia ti templo, agarup 3.2 a metro ti kaatiddog ken kalawa ti tunggal maysa kadagitoy. Ti kaadayo dagiti diding a nagbabaetan ti tunggal siled ket agarup 2.7 a metro. Ti pagserkan a nakasango iti akin-uneg, nga agturong iti portiko ti templo ket agarup 3.2 a metro met laeng ti kaunegna.

\s5
\v 8 Kalpasanna, rinukodna ti portiko nga adda iti labes ti ruangan; agarup 3.2 a metro ti kaatiddog daytoy.
\v 9 Rinukodna met laeng ti kauneg daytoy, nga agarup 3.2 a metro. Ti agsinnumbangir nga adigi ti ruangan ket agarup maysa a metro ti kapuskolna. Daytoy ti portiko a naisilpo iti ruangan ti templo iti akin-uneg a paset ti ruangan, nakasango daytoy iti templo.
\v 10 Iti uneg ti akin-daya a ruangan, adda tallo a siled iti tunggal sikigan ti ruangan para kadagiti guardia. Agpapa ti kaatiddog ken kalawa dagitoy. Ken agpapa ti kaadayo ti diding iti nagbabaetanda.

\s5
\v 11 Kalpasanna, rinukodna ti silulukat a ruangan; agarup 5.4 a metro ti kaakaba daytoy, ken ti pagserkan manipud iti ruangan ket agarup pito a metro ti kaatiddogna.
\v 12 Iti sangoanan dagiti siled ket adda nababa a diding nga agarup kagudua a metro ti kangatona. Ti tunggal sikigan ti tunggal siled ket agarup 3.2 a metro ti kaatiddogna.
\v 13 Kalpasanna, rinukod ti lalaki ti kaakaba ti pagserkan manipud iti atep ti siled iti maysa a bangir agingga iti atep ti siled nga adda iti sabali a bangir. Ti kaadayo daytoy ket agarup 13.5 a metro, manipud iti pagserkan ti maysa a siled agingga iti pagserkan ti sabali a siled.

\s5
\v 14 Ket rinukod ti lalaki ti diding a nangbingay-bingay kadagiti siled; tallopulo ket dua a metro ti kaatiddog daytoy. Rinukodna dagitoy agingga iti portiko ti ruangan.
\v 15 Ti kaadayo manipud iti pagserkan ti ruangan agingga iti murdong ti portiko ti ruangan ket agarup duapulo ket pito a metro.
\v 16 Adda dagiti babassit a tawa kadagiti diding dagiti siled, kasta met kadagiti akin-uneg a diding a nagbabaetan dagiti siled. Addaan met laeng ti akin-uneg a paset ti portiko iti kas kadagitoy a tawa. Ti diding nga adda iti nagbabaetan dagiti siled ket naarkosan kadagiti naikitikit a kaykayo a palma.

\s5
\v 17 Kalpasanna, impannak ti lalaki iti akin-ruar a paraangan ti templo. Sadiay, adda nakitak a sumagmamano a siled, ken dalan a naaramid iti bato idiay paraangan. Adda tallopulo a siled a nakasango iti paraangan.
\v 18 Ti dalan a naaramid iti bato ket naipalikmut iti paraangan, ket dumanon daytoy manipud kadagiti pader agingga iti paraangan ket agpada ti kalawa daytoy iti kaatiddog dagiti ruangan a pagserkan. Dayta ti akin-baba a dalan.
\v 19 Ket rinukod ti lalaki ti kalawa ti akin-ruar a paraangan ti templo, ti nagbaetan ti akin-ruar a ruangan ken ti akin-uneg a paraangan; agarup limapulo ket uppat a metro iti daya paset, kasta met iti amianan a paset ti paraangan.

\s5
\v 20 Kalpasanna, rinukodna ti kaatiddog ken kaakaba ti akin-amianan a pagserkan, nga isu ti pagserkan iti akin-ruar a paraangan ti templo.
\v 21 Adda tallo a siled para kadagiti guardia iti agsinnumbangir a paset iti dayta a pagserkan. Manipud iti pagserkan agingga iti murdong ti portiko daytoy ket agarup duapulo ket pito a metro ti rukodna, ken agarup 13.5 a metro ti kaakaba dagitoy.

\s5
\v 22 Addaan daytoy kadagiti tawa, portiko, siled dagiti guardia ken kadagiti arkos a kaykayo a palma a kas iti adda iti akin-daya a ruangan. Kas iti akin-daya a ruangan, adda pito a tukad nga umuli iti daytoy ken iti portiko daytoy.
\v 23 Iti batug ti akin-amianan a ruangan nga adda iti akin-ruar a paraangan ket adda ruangan nga agturong iti akin-uneg a paraangan, kas iti adda iti daya a paset. Rinukod ti lalaki ti nagbaetan ti akin-amianan a ruangan ken ti ruangan nga agturong iti akin-uneg a paraangan; agarup limapulo ket uppat a metro ti rukod daytoy.

\s5
\v 24 Ket impannak iti akin-uneg a paraangan babaen iti akin-abagatan a ruangan, ket rinukodna ti pagserkan. Ti rukod daytoy ket kas iti rukod dagiti dadduma a pagserkan. Ti rukod dagiti siled, dagiti diding a nagbabaetan dagiti siled, ken ti siled a pagserkan daytoy ket kas iti rukod dagiti adda kadagiti sabali a bangir.
\v 25 Ti pagserkan ken ti portiko daytoy ket addaan kadagiti babassit a tawa kadagiti diding, a kas iti adda iti dadduma a pagserkan. Agarup duapulo ket lima a metro ti kaatiddog ken agarup 13.5 a metro ti kaakaba ti pagserkan ken ti portiko daytoy.

\s5
\v 26 Adda agdan a pito ti tukadna nga umuli iti dayta a ruangan ken iti portiko daytoy. Addaan met laeng ti ruangan kadagiti naikitikit a kaykayo a palma kadagiti diding a nagbabaetan dagiti siled.
\v 27 Iti batug ti akin-abagatan a ruangan nga adda iti akin-ruar a paraangan ket adda maysa a ruangan nga agturong iti akin-uneg a paraangan. Rinukod ti lalaki manipud iti dayta a ruangan agingga iti pagserkan nga adda iti abagatan a paset ti akin-ruar a paraangan; agarup limapulo ket uppat a metro met laeng ti nagbaetan dagitoy.

\s5
\v 28 Kalpasanna, impannak ti lalaki iti akin-uneg a paraangan babaen iti akin-abagatan a pagserkan, ket rinukodna ti akin-abagatan a pagserkan. Agpada ti rukod daytoy iti rukod dagiti dadduma a ruangan.
\v 29 Rinukodna dagiti siled, dagiti diding, ken ti portiko ti ruangan babaen iti isu met laeng a pagrukod nga ar-aramatenna. Ti aglikmut ti ruangan ken ti portiko daytoy ket addaan kadagiti tawtawa. Ti ruangan ken ti portiko daytoy ket agarup duapulo ket pito a metro ti kaatiddogna ken agarup 13.5 a metro ti kalawana.
\v 30 Dagiti portiko kadagiti akin-uneg a ruangan, nga agturong iti akin-uneg a paraangan ket agarup 13.5 a metro ti kaatiddogna ken agarup 2.7 a metro ti kalawana.
\v 31 Ti pagserkan dagiti portiko ket nakasango iti akin-ruar a paraangan. Naiyarkos kadagiti diding dagiti naikitikit a kaykayo a palma, ken adda agdan a walo ti tukadna nga umuli iti pagserkan.

\s5
\v 32 Kalpasanna, inturongnak ti lalaki iti daya a paset ti akin-uneg a paraangan, ket rinukodna ti ruangan. Ti rukod daytoy ket kas iti rukod dagiti dadduma a ruangan.
\v 33 Ti rukod dagiti siled, dagiti diding ken ti portiko ti ruangan ket kas iti rukod dagiti adda kadagiti dadduma a ruangan. Addaan kadagiti tawa ti aglikmut ti ruangan ken ti portiko daytoy. Ti ruangan ken ti portiko daytoy ket agarup duapulo ket pito a metro ti kaatiddogna ken agarup 13.5 a metro ti kalawana.
\v 34 Nakasango iti akin-ruar a paraangan ti portiko daytoy. Addaan met laeng dagiti diding daytoy kadagiti naikitikit a kaykayo a palma, ken adda agdan a walo ti tukadna nga umuli iti daytoy.

\s5
\v 35 Ket inturongnak iti akin-amianan a pagserkan ket rinukodna daytoy. Ti rukod daytoy ket kas iti rukod dagiti dadduma a pagserkan.
\v 36 Dagiti siled, dagiti diding nga adda iti nagbabaetan dagitoy ken ti siled a pagserkan ket addaan kadagiti babassit a tawa. Ti rukod dagitoy amin ket kas iti rukod dagiti dadduma a ruangan. Duapulo ket pito a metro ti kaatiddog ken 13.5 a metro ti kalawa ti ruangan ken ti portiko daytoy.
\v 37 Ti portiko ti ruangan ket nakasango iti akin-ruar a paraangan. Addaan met laeng daytoy kadagiti naikitikit a kaykayo a palma a naiyarkos kadagiti diding, ken addaan daytoy iti agdan a walo ti tukadna nga umuli iti daytoy.

\s5
\v 38 Iti tunggal akin-uneg a pagserkan ket adda maysa a siled nga adda ruanganna. Dagitoy dagiti siled a pakabugguan dagiti ayup a naananay a mapuoran iti altar.
\v 39 Adda dua a lamisaan iti tunggal portiko, maysa iti agsinnumbangir daytoy. Iti rabaw dagidiay a lamisaan ti pakapartian dagiti ayup a naananay a mapuoran, kasta met dagiti ayup a maidaton gapu kadagiti basol nga inaramid dagiti tattao, ken daton a panangbigbigda iti nagbasalonda kadagiti dadduma a tattao.

\s5
\v 40 Iti ruar ti akin-uneg a paraangan, iti akin-kanigid dagiti tukad nga umuli iti akin-amianan a ruangan daytoy, adda dua a lamisaan, ken iti akin-kannawan dagiti tukad ket adda pay dua a lamisaan.
\v 41 Adda uppat a lamisaan iti ruar ti tunggal ruangan ti akin-uneg a paraangan, ken adda met laeng uppat a lamisaan iti uneg ti ruangan. Kadagitoy a lamisaan ti pakapartian dagiti ayup a maidaton.

\s5
\v 42 Adda met laeng uppat a lamisaan a naaramid iti bato para iti panangisagana kadagiti daton a naananay a mapuoran, agarup 0.8 a metro ti kaatiddog ti tunggal sikigan dagitoy ken agarup kaguddua a metro ti kangato dagitoy. Iti rabaw dagidiay a lamisaan a bato ti pangikabilan dagiti padi kadagiti alikamen a maaramat iti panagparti kadagiti amin nga ayup.
\v 43 Maikabil kadagidiay a lamisaan a bato dagiti karne a maidaton. Adda dagiti kaw-it a pakaisab-itan dagiti karne, tunggal maysa ket adda dua a tiradna, nga agarup walo a sentimetro ti kaatidogna, a naikapet kadagiti diding dagiti portiko.

\s5
\v 44 Iti ruar ti dua nga akin-uneg a pagserkan, iti akin-uneg a paraangan, adda dagiti siled para kadagiti mangidadaulo iti panagkankanta bayat iti panagdaydayaw, maysa iti amianan a paset ken maysa iti abagatan a paset.
\v 45 Kinuna ti lalaki kaniak, "Ti siled a nakasango ti ruanganna iti abagatan ket para kadagiti papadi nga agserserbi iti templo.

\s5
\v 46 Ti siled a nakasango ti ruanganna iti amianan ket para kadagiti padi nga agserserbi iti altar. Isuda dagiti kaputotan ni Zadok; isuda laeng dagiti kaputotan ni Levi a napalubusan nga umasideg kenni Yahweh bayat nga agserserbida kenkuana."
\v 47 Kalpasanna, rinukodna ti paraangan; kuadrado daytoy, agarup limapulo ket uppat a metro ti kaatiddogna ken agarup limapulo ket uppat a metro ti kaakabana. Ti altar ket adda iti sangoanan ti santuario.

\s5
\v 48 Kalpasanna, impannak iti portiko ti santuario ket rinukodna dagiti adigi dagiti ruangan ken dagiti diding iti agsinnumbangir ti pagserkan; agarup 2.7 a metro ti kapuskol dagitoy. Ti pagserkan ket agarup pito a metro ti kaakabana, ken agarup 1.6 a metro ti kaakaba ti tunggal sikigan daytoy.
\v 49 Ti portiko ket agarup sangapulo ket maysa a metro ti kaakabana, ken ti kaunegna ket agarup innem a metro iti agsinnumbangir a sikigan. Adda dagiti tukad nga umuli iti daytoy, ken adda dagiti adigi iti agsinnumbangir ti portiko.

\s5
\c 41
\p
\v 1 Ket iti sirmata, impannak ti lalaki iti uneg ti nasantoan a disso iti templo ket rinukodna dagiti adigi ti ruangan nga adda iti agsinnumbangir ti pagserkan; agarup 3.2 a metro ti kaakaba ti tunggal maysa kadagitoy.
\v 2 Ti pagserkan ket agarup 5.4 a metro ti kaakabana, ken dagiti diding iti agsinnumbangir a paset ket agarup 2.7 a metro ti kaatiddogna. Rinukodna met laeng ti nasantoan a lugar; agarup duapulo ket dua a metro ti kaatiddogna ken agarup sangapulo ket maysa ti kaakabana.

\s5
\v 3 Kalpasanna, simrek isuna iti akin-uneg a siled ti templo, ti kasasantoan a disso, ket rinukodna dagiti diding iti agsinnumbangir a sikigan ti pagserkan; tunggal maysa ket agarup maysa a metro ti kapuskolna. Ti kaakaba ti ruangan ket agarup 3.2 a metro, ken ti kaatiddog dagiti diding iti agsinnumbangir ti pagserkan ket agarup 3.8 a metro.
\v 4 Kalpasanna, rinukodna ti akin-uneg a siled; agarup sangapulo ket maysa a metro ti kaatiddogna ken agarup sangapulo ket maysa ti kaakabana. Ket kinunana kaniak, "Daytoy ti kasasantoan a disso."

\s5
\v 5 Kalpasanna, rinukodna ti diding ti templo; agarup 3.2 a metro ti kapuskol daytoy. Adda intar dagiti siled iti igid ti akin-ruar a diding ti templo. Ti tunggal siled ket agarup dua a metro ti kaakabana.
\v 6 Tallo a kadsaaran dagiti siled, addaan iti tallopulo a siled ti tunggal kadsaaran. Addaan kadagiti paladpad iti aglikmut ti diding ti templo a mangsarsarapa kadagiti siled iti ngato. Awan ti kanayonan a mangsarapa a naiyaramid iti diding ti santuario.
\v 7 Nalawlawa dagiti siled nga adda iti ngato ngem dagiti adda iti siruk dagitoy. Naiyaramid nga umuna dagiti kababassitan a siled iti kababaan a paset. Kalpasanna, naiyaramid dagiti nalawlawa a siled iti ngatoen dagitoy, ket dagiti kalalawaan ket adda iti tuktok. Naiyaramid dagiti agdan manipud iti kababaan a kadsaaran a lumasat iti akin-tengnga a kadsaaran agingga iti kangangatoan a kadsaaran.

\s5
\v 8 Nakitak nga adda balkonahe iti aglikmut ti templo. Ti balkonahe ket isu ti pundasion dagidiay a siled; agarup 3.2 a metro ti kangato daytoy.
\v 9 Agarup 2.7 a metro ti kapuskol ti akin-ruar a diding dagidiay a siled. Iti aglikmut ti santuario, adda nawaya a disso iti nagbaetan dagidiay a siled

\s5
\v 10 ken dagiti siled dagiti padi a naipalikmut iti paraangan; adda agarup sangapulo ket maysa a metro a nagbaetan dagiti siled dagiti padi ken dagiti siled iti santuario.
\v 11 Adda dua a ruangan manipud kadagiti siled ti santuario nga agturong iti sabali pay a nawaya a disso; nakasango ti maysa iti amianan ken nakasango ti maysa iti abagatan. Agarup 2.7 a metro ti kalawana daytoy a nawaya a disso.

\s5
\v 12 Adda dakkel a pasdek iti laud a paset ti templo. Agarup tallopulo ket walo a metro ti kaakaba daytoy, ken addaan daytoy iti diding nga agarup 2.7 a metro ti kapuskolna ken agarup uppat a pulo ket siam a metro ti kaatiddogna.
\v 13 Kalpasanna, rinukod ti lalaki ti templo. Agarup limapulo ket uppat a metro ti kaatiddogna, ken ti paraangan ti templo nga ayan ti dakkel a pasdek ket agarup limapulo ket uppat a metro ti kaakabana. Agpada ti rukod ti pasdek ken dagiti diding daytoy.
\v 14 Ti paraangan iti daya a paset ti templo, iti batug ti sangoanan ti templo, ket agarup limapulo ket uppat a metro met laeng ti kaakabana.

\s5
\v 15 Kalpasanna, rinukodna ti pasdek iti akin-laud a paset. Agarup limapulo ket uppat met laeng ti kaatidogna agraman dagiti didingna. Dagiti akin-ruar a diding ti nasantoan a disso, ti kasasantoan a disso, ken ti portiko,
\v 16 dagiti akin-uneg a diding iti ngato ken iti babaen dagiti babassit a tawa, ken dagiti balkon iti amin a kadsaaran—amin dagitoy ket natapkalan iti tabla.
\v 17 Amin dagiti diding iti uneg ti templo ket naarkosan kadagiti naikitikit a nagpayak a parsua ken kaykayo a palma; iti nagbaetan ti tunggal ladawan ti nagpayak a parsua ket adda naikitikit a kayo a palma.

\s5
\v 18-19 Ti tunggal napayakan a parsua ket addaan iti dua a rupa. Ti maysa ket rupa ti tao, ken ti maysa ket rupa ti leon. Dagidiay a ladawan ket naikitikit kadagiti diding iti aglikmut iti uneg ti templo, ken ti tunggal rupa ket kimmita iti naikitikit a kayo a palma.
\v 20 Naikitikit dagitoy kadagiti amin a diding, manipud iti datar agingga iti diding nga adda iti ngatoen ti pagserkan.

\s5
\v 21 Iti pagserkan ti kangrunaan a siled ti templo ket adda dagiti kuadrado nga adigi ti ruangan, agpapada ti langa dagitoy.
\v 22 Iti sango ti kasasantoan a disso, adda altar a naaramid iti kayo. Agarup 1.6 a metro ti kangatona ken agarup maysa a metro ti kaakaba ti tunggal sikigan. Dagiti suli, sakaanan, ken dagiti sikigan daytoy ket naaramid amin iti kayo. Kinuna ti lalaki kaniak, “Daytoy ti lamisaan nga adda iti presensia ni Yahweh."
\v 23 Ti nasantoan a disso ken ti nasantoan unay a disso ket addaan kadagiti agkulpi a ridaw.
\v 24 Ti tunggal ridaw ket addaan iti dua a paset nga aglukat babaen kadagiti bisagra.

\s5
\v 25 Kadagitoy a ridaw ket adda naikitikit a nagpayak a parsua ken kaykayo a palma. Adda met laeng bubong a kayo iti akin-sango a portiko ti santuario.
\v 26 Kadagiti diding ti portiko ket adda dagiti babassit a tawa nga addaan kadagiti ladawan ti kaykayo a palma a naikitikit kadagiti sikigan dagiti tawa. Dagiti siled iti aglikmut ti templo ket addaan met laeng kadagiti nagdawadaw nga atep.

\s5
\c 42
\p
\v 1 Kalpasanna, iti sirmata, inruarnak ti lalaki manipud iti akin-uneg a paraangan, babaen iti ruangan nga adda iti amianan a paset. Simrekkami iti akin-ruar a paraangan ket nakadanonkami kadagiti siled a nakasango iti akin-ruar a pader nga adda iti akin-amianan.
\v 2 Ti pasdek nga addaan kadagidiay a siled ket agarup limapulo ket uppat a metro ti kaatiddogna ken agarup duapulo ket pito a metro ti kaakabana.
\v 3 Iti dayta a pasdek, adda dagiti siled a nakasango iti akin-uneg a paraangan. Ti nagbaetan dagidiay a siled ken ti santuario a kangrunaan a pasdek ti templo ket agarup sangapulo ket maysa a metro. Naipatakder dagitoy a siled iti tallo a kadsaaran. Adda pagnaan kadagiti akin-ngato a siled, iti ngatoen dagiti akin-baba a siled. Adda dagiti siled a tuman-aw iti nawaya a disso iti akin-ruar a paraangan.

\s5
\v 4 Iti bangir a paset dagiti siled ket adda pagnaan nga agarup 5.4 a metro ti kaakabana ken agarup limapulo ket uppat a metro ti kaatiddogna. Amin dagiti ruangan dagiti siled ket nakasango iti amianan a paset.
\v 5 Nail-ilet dagiti siled nga adda iti ngato ngem dagiti siled nga adda iti sirok dagitoy, gapu ta adda pagnaan iti sangoanan dagiti akin-ngato a siled.
\v 6 Awanan kadagiti adigi dagiti siled kadagiti akin-ngato a kadsaaraan a mangpatibker kadagitoy a kas iti adda iti paraangan, gapu ta dagidiay a siled ket pinatibker dagiti diding dagiti akin-baba a siled.

\s5
\v 7 Naiabay ti akin-ruar a pader kadagiti siled a nakasango iti akin-ruar a paraangan; daytoy a paset ti akin-ruar a pader ket agarup duapulo ket pito a metro ti kaatiddogna.
\v 8 Ti intar dagiti siled nga adda iti igid ti akin-ruar a paraangan ket agarup duapulo ket pito a metro ti kaatiddogna, ken ti intar dagiti siled a nakasango iti templo ket agarup limapulo ket uppat a metro ti kaatidogna.
\v 9 Adda pagserkan iti daya a sikigan ti kababaan a kadsaaran, no aggapu iti akin-ruar a paraangan.

\s5
\v 10 Iti akin-daya a paset, iti igid ti akin-ruar a pader ti akin-ruar a paraangan, iti abay ti paraangan ti templo, adda met laeng ti intar dagiti siled.
\v 11 Adda pagnaan iti sangoanan dagitoy. Dagitoy a siled ket kas kadagiti siled nga adda iti amianan a paset. Agpapada ti kaatidog ken ti kaakaba dagitoy, ken agpada met laeng ti langa dagiti pagserkan dagitoy.
\v 12 Adda met ruangan dagiti siled nga adda iti abagatan a paset a kapada ti adda iti amianan a paset. Adda akin-uneg a pagnaan nga addaan iti akin-ruar a ruangan; ti pagnaan ket addaan kadagiti ruangan nga agturong kadagiti amin a siled. Iti daya a murdong ti pagnaan ket adda akin-ruar a ruangan nga agturong iti daytoy.

\s5
\v 13 Ket kinuna ti lalaki kaniak, "Dagiti siled iti akin-amianan ken akin-abagatan a paset a tuman-aw iti santuario ti templo ket para laeng kadagiti naisangsangayan a panggep ni Yahweh. Ditoy ti panganan dagiti padi, a mangidatdaton kadagiti sakripisio kenni Yahweh, kadagiti bingayda kadagidiay a daton. Gapu ta dagitoy a siled ket naisangsangayan, mausarto dagitoy a pagidulinan kadagiti daton para kenni Yahweh: Ti arina para kadagiti sagut nga arina, para kadagiti daton gapu kadagiti basol nga inaramid dagiti tattao, ken para kadagiti idatdaton dagiti tattao gapu iti basolda.
\v 14 Inton pumanaw dagiti padi iti templo, saanda a mapalubosan a sumrek a dagus iti akin-ruar a paraangan. Masapul nga ikkatenda nga umuna ti pagan-anay nga inusarda iti uneg ti nasantoan a disso, gapu ta naisangsangayan dagidiay a pagan-anay, a nairanta iti panagserbida. Masapul nga agkawesda iti sabali sakbay a sumrekda kadagiti paset ti templo a paguummongan dagiti tattao."

\s5
\v 15 Idi nalpas a rinukod ti lalaki ti uneg ti templo, inruarnak babaen iti akin-daya a pagserkan ket rinukodna ti entero nga aglawlaw ti templo.

\s5
\v 16-19 Rinukodna ti uppat a paset ti lugar. Adda pader a naipalikmut iti aglawlaw nga agarup 270 a metro ti kaatiddogna iti tunggal paset.

\s5
\v 20 Pinagsina dayta a pader ti nasantoan a disso ken dagiti saan a nasantoan a disso.

\s5
\c 43
\p
\v 1 Kalpasanna, impannak ti lalaki iti pagserkan iti daya a paset.
\v 2 Pagammoan, nakitak ti dayag ti Dios ti Israel nga um-umay manipud iti daya. Ti uni ti iyu-umayna ket kas iti daranudor ti naapres a karayan, ken nagraniag dayta nga entero a disso gapu iti dayagna.

\s5
\v 3 Ti nakitak iti daytoy a sirmata ket kas iti nakitak iti immuna a sirmatak, umuna iti igid ti Karayan Kebar ken idi immay ti Dios a mangdadael iti Jerusalem. Nagpaklebak iti daga.
\v 4 Simrek ti dayag ni Yahweh iti templo babaen iti akin-daya a pagserkan,
\v 5 ket kalpasanna, inngatonak ti Espiritu ket impannak iti akin-uneg a paraangan, ket pinunno ti dayag ni Yahweh ti templo.

\s5
\v 6 Kalpasanna, kabayatan nga agtaktakder ti lalaki iti abayko, adda nangngegko a nagsao kaniak manipud iti uneg ti templo.
\v 7 Kinunana, “Anak ti tao, daytoy ti templok, ti disso no sadino ket pagtugtugawak iti tronok ken pangibadbaddekak kadagiti sakak. Ditoy ti pakipagnaedakto kadagiti Israelita iti agnanayon. Dagiti Israelita ken dagiti arida ket saandanto manen a mangaramid iti pakaibabainak babaen iti panagdaydayawda kadagiti didiosen kadagiti disso a pagdaydayawanda, wenno babaen iti panangaramidda kadagiti awan biagna a didiosen dagiti immun-una nga arida.
\v 8 Inyabay dagiti padam nga Israelita dagiti altarda iti altarko, ken dagiti adigi dagiti ruangan dagiti temploda ket naiyabay kadagiti adigi ti ruangan ti templok. Ket pader laeng ti nagbaetan dagitoy. Ken imbabaindak babaen kadagiti makarimon a banbanag nga inaramidda. Isu a nakaungetak ket dinadaelko ida.

\s5
\v 9 Ita, masapul nga isarengda daytoy a makarimon a panagdaydayaw kadagiti didiosen ken dagitoy a seremonia a kas panagdayawda kadagiti didiosen dagiti ari. No isardengda ti panagaramidda kadagidiay a banbanag, makipagnaedakto kadakuada iti agnanayon.

\s5
\v 10 Anak ti tao, iladawam kadagiti Israelita daytoy a templo nga impakitak kenka iti maysa a sirmata, tapno agbainda gapu kadagiti basolda.
\v 11 No agbainda gapu kadagiti amin a dakes a banbanag nga inaramidda, ibagam kadakuada ti amin a maipapan iti templo nga impakitak kenka: Ti disenyo daytoy, dagiti pagruaran ken pagserkan, ken amin a maipapan iti daytoy. Ken ibagam kadakuada dagiti amin a lintegko ken alagadek maipapan iti panagdayaw kaniak iti daytoy a templo. Isuratmo amin dagitoy kabayatan a buybuyaendaka, tapno matungpalda dagitoy a sipupudno.

\s5
\v 12 Ken daytoy ti kangatoan a linteg maipapan iti templo: Masapul nga agtalinaed a sagrado ken nasantoan dagiti amin a disso iti tapaw ti turod a pakaipatakderanto ti templo.

\s5
\v 13 Dagitoy dagiti rukod ti altar, maaramat ti isu met laeng a kita ti pagrukod a nausar iti templo: Adda pagayusan iti aglikmut ti altar nga agarup kagudua a metro ti kaunegna ken maysa ket kagudua a metro ti kaakabana. Adda ngarab iti aglikmut daytoy nga agarup 23 a sentimetro ti kaakabana. Daytoyto ti sakaanan ti altar.
\v 14 Ti akin-baba a paset ti pagayusan ket agarup maysa a metro ti kangatona agingga iti akin-baba a paladpad a naipalikmut iti altar. Ti akin-baba a paladpad ket agarup kagudua a metro ti kaakabana. Manipud iti dayta a paladpad agingga iti akin-ngato a paladpad ket agarup 2.1 a metro. Dayta a paladpad ket kagudua a metro met laeng ti kaakabana.

\s5
\v 15 Ti pagpuoran iti rabaw ti altar ket 2.1 a metro ti kangatona, ken adda ti sinan-sara a nakatudo iti ngato manipud iti tunggal uppat a suli.
\v 16 Dayta a paset iti rabaw ti altar ket kuadrado, agarup 6.5 a metro ti kaatiddog ti tunggal sikigan.
\v 17 Ti akin-ngato a paladpad a naipalikmut iti pagpuoran ket kuadrado met laeng, agarup 7.6 a metro ti kaatiddog ti tunggal sikigan, ken addaan iti ngarab nga agarup duapulo ket pito a sentimetro ti kaakabana. Adda pagayusan a kagudua a metro ti kaakabana iti kababaan a paset ti altar. Iti daya a sikigan ti altar, adda agdan nga umuli iti altar.”

\s5
\v 18 Kalpasanna, kinuna ti lalaki kaniak, “Anak ti tao, kastoy ti kuna ni Yahweh nga Apo: Dagitoy dagiti alagaden iti panangidatag kadagiti daton a naan-anay a mapuoran ken iti panangiwarsi iti dara kadagiti sikigan ti altar inton naipatakder daytoy:
\v 19 Masapul a mangtedka kadagiti padi iti maysa a bumaro a baka a kas daton gapu iti basol dagiti padi, dagiti kaputotan ni Levi, manipud iti puli ni Zadok, nga umas-asideg iti altar tapno agserbi kaniak.

\s5
\v 20 Masapul a mangalaka iti dara manipud iti bumaro a baka ket ipulagidmo daytoy iti uppat a sara ti altar ken iti uppat a suli ti akin-ngato a paladpad, ken iti entero a ngarab tapno awatek ti altar, ken tapno agbalin a kukuak laeng ti altar.
\v 21 Masapul a puoram dayta a bumaro a baka iti ruar ti templo iti paset ti templo a nairanta a pagpuoran.

\s5
\v 22 Iti sumaruno nga aldaw, masapul a mangidatonka iti kalakian a kalding nga awan pakapilawanna, a kas daton tapno awatek ti altar. Kalpasanna, masapul a dalusam manen ti altar a kas iti inaramidmo iti bumaro a baka nga indatonmo.
\v 23 Inton malpasmo nga aramiden amin dayta, masapul a mangidatonka iti bumaro a baka ken kalakian a karnero, nga agpada nga awan ti uray ania a pakapilawanna.
\v 24 Masapul nga idatonmo dagitoy kaniak, siak a ni Yahweh. Masapul a mangiwarakiwak iti asin dagiti padi kadagitoy ket puoranda a naan-anay dagitoy iti rabaw ti altar a kas sakripisio kaniak.

\s5
\v 25 Kalpasanna, iti las-ud ti pito nga aldaw, inaldaw a masapul a mangipanka iti padi iti kalakian a kalding a kas sakripisio para iti panangidaton tapno awatek ti altar. Masapul pay a mangidatonka iti awan pakapilawanna a bumaro a baka ken kalakian a karnero, nga isabet dagiti padi.
\v 26 Iti las-ud ti pito nga aldaw, ikonsagrar dagiti papadi ti altar tapno awatek ti altar. Babaen iti panangaramidda iti dayta, mailasinda daytoy para iti dayawko.
\v 27 Kalpasan dayta a pito nga aldaw, mangrugi iti sumaruno nga aldaw, ituloy dagiti padi a mangidatag iti rabaw ti altar kadagiti daton a mapuoran a naan-anay ken kadagiti daton a mangikari iti panakigayyem kaniak. Ket awatenkayonto. Kasta ti pakaammok, siak a ni Yahweh nga Apo.”

\s5
\c 44
\p
\v 1 Kalpasanna, insublinak ti lalaki iti akinruar a pagserkan iti ayan ti disso ti templo, ti pagserkan nga adda iti daya, ngem nakarikep ti ruangan.
\v 2 Kinuna ni Yahweh kaniak, "Masapul nga agtalinaed a nakarikep daytoy a ruangan. Masapul nga awan ti siasinoman a manglukat iti daytoy; awan ti mapalubosan a sumrek iti daytoy. Masapul a nakarikep daytoy gapu ta Siak a ni Yahweh, ti Dios ti Israel, inaramidko daytoy a naisangsangayan idi simrekak iti daytoy.
\v 3 Ti laeng agturturay iti Israel ti mapalubosan nga agtugaw iti uneg daytoy a pagserkan nga umay a mangan iti taraon iti presensiak. Masapul a sumrek ken rummuar isuna iti daytoy a ruangan."

\s5
\v 4 Kalpasanna, inturongnak ti lalaki iti amianan a pagserkan iti sango ti templo. Kimmitaak ket nakitak a napno ti templo iti dayag ni Yahweh, ket nagpaklebak iti daga.
\v 5 Kinuna ni Yahweh kaniak, "Anak ti tao, kumita ken dumngegka a nalaing kadagiti amin a banag nga ibagak kenka maipapan kadagiti amin nga alagaden iti templo. Tandaanam a naimbag dagiti pagserkan ken amin a pagruaran iti templo.

\s5
\v 6 Ibagam daytoy kadagiti managsukir nga Israelita: 'Kastoy ti ibagak, Siak a ni Yahweh nga Apo: Dakayo nga Israelita, saankon a maanusan dagiti makarimon a banbanag nga ar-aramidenyo!
\v 7 Kanayonna pay dagiti makarimon a banbanag nga inaramidyo, ket impanyo iti templok dagiti ganggannaet a lallaki a saan pay a nakugit ken pulos nga awan ammoda maipapan iti panagdayaw kaniak. Gapu iti dayta nga inaramidyo, pinagbalinyo ti templok a saan a maikari a lugar a pagdayawan kaniak, bayat iti panangidatonyo iti taraon, dara ken taba, ken sinukiryo ti tulagko kadakayo.

\s5
\v 8 Imbes nga aramidenyo dagiti imbilinko nga aramidenyo maipapan kadagiti nasantoan a banbanag a kukuak, nangdutokkayo ketdi kadagiti ganggannaet a mangaywan iti templok.
\v 9 Ngem kastoy ti kunak, Siak a ni Yahweh: 'Awan kadagiti ganggannaet, awan kadagiti lalaki a saan a nakugit, awan kadagiti tattao nga awan diosna ti mapalubosan a sumrek iti templok, uray dagiti ganggannaet a makipagnaed nga agnanayon kadakayo nga Israelita.

\s5
\v 10 Adu kadagiti kaputotan ni Levi ti nangtallikud kaniak a kadua dagiti kaaduan nga Israelita, ken nangrugida a nagrukbab kadagiti didiosen. Dusaek ida gapu kadagiti basolda.
\v 11 Palubosakto ida nga agtrabaho iti templok ken agbantay kadagiti ruangan ti templo. Kabaelandanto a papatayen dagiti ayup a mapuoran a naan-anay iti rabaw ti altar ken mangpuor kadagiti dadduma a daton dagiti tattao, ken kabaelandanto a tulongan dagiti tattao.
\v 12 Ngem gapu ta tinulonganda dagiti tattao nga agdayaw kadagiti didiosen ken pakaigapuan ti panagbasol dagiti tattao ti Israel babaen iti panagdaydayawda kadagiti didiosen, isapatak a dusaekto ida gapu kadagiti basolda.

\s5
\v 13 Masapul a saanda nga umasideg kaniak tapno agserbida a kas padi. Masapul a saanda nga umasideg kadagiti nasantoan a banbanag wenno kadagiti nasantoan a daton. Ibaindanto dagiti banbanag nga inaramidda, nga isu ti nagbasolanda.
\v 14 Ngem isaadkonto latta ida a mangaywan kadagiti trabaho iti uneg ti templok, ken palubosakto ida a mangaramid kadagiti amin a kasapulan a maaramid sadiay.

\s5
\v 15 Ngem dagiti papadi a nagtaud iti kaputotan ni Levi ken iti puli ni Zadok ket sipupudno a nagtrabaho iti templok idi pinanawandak dagiti dadduma nga Israelita. Isu a masapul nga umasidegda kaniak tapno agtrabahoda para kaniak. Tumakderdanto iti sangoanak a mangidatag kadagiti daton a taba ken dara ti ayup. Isuda laeng dagiti mapalubosan nga umuneg iti templok.
\v 16 Isuda laeng dagiti mapalubosan nga umasideg iti altarko nga agserbi kaniak ken mangaramid kadagiti ipaaramidko kadakuada.

\s5
\v 17 Inton sumrekda iti pagserkan a ruangan nga agturong iti akin-uneg a paraangan ti templo, masapul nga agkawesda iti puraw a lino a pagan-anay. Masapul a saanda nga agkawes kadagiti aniaman a pagan-anay a de lana bayat iti panagtrabtrabahoda iti ruangan ti akin-uneg a paraangan wenno iti uneg ti templo.
\v 18 Masapul nga agisuotda kadagiti lino a turban kadagiti uloda ken akin-uneg a kawes a lino a nakabarikes kadakuada. Masapul a saanda nga agusar kadagiti kawes a mangpaling-et kadakuada.

\s5
\v 19 Sakbay a rummuarda iti paraangan ti templo nga ayan dagiti tattao, masapul nga ussobenda dagiti pagan-anay nga ikawesda ket ibati kadagiti nasagradoan a siled, ket agkawesda kadagiti sabali a pagan-anay, tapno saan a mapagbalin a nadalus dagiti tattao gapu iti panangsagidda kadagiti nasagradoan a pagan-anayda.

\s5
\v 20 Saan a rumbeng nga agpakalbo dagiti padi wenno agpaatiddog iti buok; ngem masapul a mapukisan dagiti buokda.
\v 21 Masapul a saan nga uminom iti arak dagiti padi sakbay nga umunegda iti akin-uneg a paraangan ti templo.
\v 22 Kasta met a masapul a saan a makiasawa dagiti papadi kadagiti nabalo dagiti lallaki a saan a padi, wenno kadagiti babbai nga insina ti asawana. Mapalubosanda a makiasawa laeng kadagiti birhen wenno nabalo dagiti sabali a padi.

\s5
\v 23 Masapul a suroanda dagiti tattao iti paggidiatan dagiti banbanag a nasantoan ken dagiti saan a nasantoan, ken suroanda ida tapno maammoanda dagiti banbanag a maikari kaniak ken dagiti saan a maikari.
\v 24 No adda ti pagririrrian dagiti tattao, masapul a tumakder dagiti papadi a kas ukom ken mangikeddeng kadagiti banbanag a maiyannatup kadagiti paglintegak. Masapul a tungpalenda dagiti amin a linteg ken bilbilinko a maipapan kadagiti nasagradoan a piesta, ken masapul nga ibilangda ti Aldawko a Panaginana a kas naisangsangayan para kaniak.

\s5
\v 25 Mapalubosan nga umasideg dagiti papadi kadagiti bangkay dagiti ama wenno inada, putotda, kabsatda a lalaki wenno babai nga awan asawana. Ngem masapul a saanda a rugitan dagiti bagbagida babaen iti iyaasidegda iti bangkay ti siasinoman.
\v 26 No masagid ti padi ti bangkay ti nasinged a kabagianna, masapul nga aramidenna dagiti ritual tapno maikarida manen nga agserbi kaniak. Kalpasan ti panangaramidna kadagiti seremonia, masapul nga aguray isuna iti pito nga aldaw.
\v 27 Kalpasanna, iti aldaw nga iseserrekna iti akin-uneg a paraangan ti templo tapno agserbi manen kaniak iti uneg ti templo, masapul a mangidatag isuna iti daton tapno maawan ti basolna. Daytoy ti ipakaammok, Siak a ni Yahweh nga Apo.

\s5
\v 28 Awanto ti maipatawid a daga kadagiti padi. Dagiti laeng ipaayko kadakuada ti kukuada.
\v 29 Kanendanto dagiti daton a naaramid manipud iti arina, dagiti daton a mangikkat kadagiti basbasol dagiti tattao gapu ta nagbasolda, ken dagiti daton dagiti tattao no saanda a naited dagiti banbanag a kiniddawko nga itedda. Dagiti amin a banbanag nga adda iti Israel nga ipaayda kaniak ket kukuanto dagiti padi.

\s5
\v 30 Dagiti kasasayaatan a bunga dagiti umuna a paset ti tunggal apit ken dagiti amin a naisangsangayan a sagut ket kukuanto dagiti padi. Masapul nga itedyo kadakuada dagiti umuna a paset dagiti arinayo, tapno bendesionak dagiti tattao nga agnanaed iti balaymo.
\v 31 Saan a rumbeng a mangan dagiti padi kadagiti karne dagiti aniaman a natayen a billit wenno ayup a nasarakan a natay wenno dagiti pinatay dagiti narungsot nga ayup.

\s5
\c 45
\p
\v 1 Inton mabingay-bingay ti daga ti Israel kadagiti sangapulo ket dua a tribu, masapul nga itedyo kenni Yahweh ti maysa a paset ti daga a nagbalin a nasagradoan a distrito. Agarup 13.5 a kilometro ti kaatiddogna ken 5.4 a kilometro ti kalawana daytoy. Mailasinto daytoy a sibubukel a paset para kenni Yahweh.
\v 2 Iti paset dayta a lugar, maysa a kwadrado nga agarup 270 a metro ti kaatiddogna iti tunggal igidna ti mabati a bakante iti aglawlaw ti templo. Adda pay nayonna a paset ti daga nga agarup 27 a metro ti kalawana, ti agtalinaed a bakante iti aglawlaw ti templo.

\s5
\v 3 Iti uneg ti nasagradoan a distrito, mangrukodka iti paset nga agarup 13.5 a kilometro ti kaatiddogna ken agarup 5.4 a kilometro ti kalawana.
\v 4 Daytoyto ti agpaay a nasagradoan a paset ti daga a para kadagiti papadi nga agtrabtrabaho iti uneg ti templo, dagiti umas-asideg kenni Yahweh tapno agserbi kenkuana. Agbalin daytoy a naisangsangayan unay para kenni Yahweh, kadagiti balay dagiti padi, ken kasta met iti templo.
\v 5 Maysa a paset nga agarup 13.5 a kilometro ti kaatiddogna, 5.4 a kilometro ti kalawana ket agpaayto kadagiti kaputotan ni Levi nga agtrabtrabaho iti templo. Kukuadanto dayta a paset. Ket mabalinda ti mangipasdek iti ili sadiay a pagnaedanda.

\s5
\v 6 Iti asideg daytoy a nasantoan a lugar, addanto maysa a paset ti daga nga agarup 13.5 a kilometro ti kaatiddogna ken 2.7 a kilometro ti kalawana. Daytoyto ti siudad a mabalin a pagnaedan ti siasinoman a tao iti Israel.
\v 7 Kukuanto ti agturturay iti Israel ti daga nga adda iti tunggal paset ti disso a naaramid babaen iti tunggal igid ti naipatakder a templo ti distrito ken ti siudad. Nayonna daytoy iti laud manipud iti akin-laud a beddeng dagidiay a lugar ken iti akin-daya a beddeng dagidiay a lugar. Ti akin-daya ken akin-laud a beddeng iti daga ti ari ket maipada iti rukod dagiti kabatog a beddeng dagiti sabali a masakupan.

\s5
\v 8 Daytoy a paset ti daga ket kukuanto ti mangiturturay. Tapno awanton ti pambarda a mangparigat kadagiti tattaok ken mangtagikua kadagiti dagada. Isaadda dagiti nabatbati a paset ti daga iti Israel iti tunggal tribu tapno mabingay-bingay kadagiti tattao.

\s5
\v 9 Kastoy ti kuna ni Yahweh nga Apo: Dakayo a mangiturturay iti Israel, masapul nga agsardengkayon a mangparparigat ken mangrangranggas kadagiti tattao! Masapul nga aramidenyo ti maiparbeng ken kinalinteg. Isardengyon ti mangsamsam kadagiti daga dagiti tattao; isardengyon ti panangpappapanaw kadakuada iti dagada!
\v 10 Kasta met a masapul nga agusarkayo kadagiti husto a pagtimbangan ken husto a pagrukod kadagiti banbanag.
\v 11 Masapul nga agpada ti kadakkel ti basket a mausar a pagrukod kadagiti namaga a banbanag ken dagiti pagrukod kadagiti banbanag a likido; masapul nga umanay kadagitoy ti 22 a litro—ti maawagan iti efa (pagrukod iti namaga) ken bat (pagrukod kadagiti likido).
\v 12 No kasta a rukodenyo dagiti banbanag, masapul nga agusarkayo kadagiti pagrukod nga ibilbilang dagiti tattao a husto. Ti siklo ket mabingay iti 20 a gera, ket ti maysa a mina ket 60 a siklo ti gatadna.

\s5
\v 13 Masapul a mangtedkayo iti mangiturturay ti maysa a rukod ti trigo wenno sebada iti tunggal 60 a rukod ti maapityo.
\v 14 Masapul nga ikkanyo isuna iti maysa a rukod ti lana ti olibo iti tunggal sangagasut a rukod ti maapityo.
\v 15 Kasta met nga ipakpakaammo ni Yahweh a mangalakayo iti maysa a karnero wenno kalding manipud iti tunggal 200 iti arbanyo iti narukbos a pagpaaraban ti Israel. Masapul a mangidatonkayo iti karnero wenno kalding kadagiti nadumaduma a panagidaton: dagiti daton a mapuoran ken dagiti daton a pannakigayyem kenni Yahweh, daton a para iti pannakapakawan dagiti basol dagiti tattao. "Daytoy ti bilin ni Apo a Yahweh."

\s5
\v 16 Masapul a sangsangkamaysa dagiti amin a tattao iti daga iti panangitedda kadagitoy a daton iti mangiturturay iti Israel.
\v 17 Masapul a mangted ti mangiturturay kadagiti ayup a naan-anay a mapuoran iti altar, arina a para iti daton manipud iti bukel, ken arak a para kadagiti nasagradoan a fiesta nga naikeddeng para kadagiti tattao ti Israel—pakairamanan dagiti fiesta ti panagrambak para kadagiti baro a bulan, ken dagiti daton para iti Aldaw a Panaginana. Masapul a mangted isuna kadagiti ayup a maidaton tapno maikari dagiti tattao iti sangoanan ti Dios, daton nga arina manipud iti bukel, dagiti daton a naan-anay a mapuoran, ken dagiti daton a pannakigayyem kenni Yahweh, tapno mapakawan dagiti basbasol dagiti tattao ti Israel.”

\s5
\v 18 Kastoy pay ti ipakpakaammo ni Apo a Yahweh: "Iti umuna nga aldaw iti umuna a bulan iti tunggal tawen, masapul a mangalaka iti maysa nga urbon a kalakian a baka nga awan pakapilawanna ket idatonmo daytoy tapno madalusan ti templo.
\v 19 Masapul a mangala ti padi iti bassit a dara manipud iti naidaton ket masapul nga iwarasna daytoy kadagiti poste ti ruangan, kadagiti uppat a suli ti akin-ngato a hamba ti ruangan a nakapalikmut iti templo, ken iti poste dagiti ruangan iti akin-uneg a paraangan ti pangukoman.
\v 20 Masapul nga aramidenyo met laeng daytoy iti tunggal maikapito nga aldaw ti bulan para kadagiti siasinoman a tattao a nakabasol a saanda nga inggagara wenno saanda ammo a nagbasolda. Babaen iti panangaramidmo iti dayta, madalusanyo ti templo.

\s5
\v 21 Iti umuna a bulan iti tunggal tawen, iti maika-14 nga aldaw ti bulan, masapul nga irugim a rambakan ti Fiesta ti Ilalabas. Pito nga aldaw ti kapaut ti fiesta. Bayat iti dayta a tiempo, saankayonto a mangan iti aniaman a tinapay nga adda lebadurana.
\v 22 Iti umuna nga aldaw, masapul a mangted ti mangiturturay iti kalakian a baka a kas datonna para iti bagina ken para kadagiti sabali a tattao iti dayta a pagillian.

\s5
\v 23 Ket iti inaldaw iti las-ud dayta a pito nga aldaw, masapul a mangted isuna iti pito a kalakian a baka ken pito a kabaian a baka nga awan pakapilawanna, nga maidaton tapno maikari dagiti tattao iti Dios.
\v 24 Masapul pay a mangted isuna iti 22 a litro ti arina a kas daton a kakuyog ti tunggal kalakian a baka, ket kasta met a rukod ti arina ti kakuyog ti tunggal kabaian a baka, ket kasta met iti uppat a litro a lana ti olibo a kakuyog ti tunggal daton nga arina.

\s5
\v 25 Bayat iti pito nga aldaw ti fiesta a panagrambak dagiti Israelita a nagnaed idi kadagiti tolda kabayatan ti iruruarda manipud Egipto, a mangrugi iti maika-15 nga aldaw iti maikapito a bulan iti tunggal tawen, masapul a mangted ti mangiturturay kadagiti isu met laeng a maidaton tapno maikari dagiti tattao iti Dios, para kadagiti daton a naan-anay a mapuoran, dagiti maidaton a manipud iti bukbukel, ken dagiti maidaton a lana ti olibo.

\s5
\c 46
\p
\v 1 Kastoy pay ti pakaammo ni Yahweh nga Apo: 'Ti akin-daya a pagserkan iti akin-uneg a paraangan ti pangukoman ket masapul a maiserra kabayatan ti innem nga aldaw a panagtrabaho iti tunggal lawas, ngem tunggal Aldaw a Panaginana ken kadagiti aldaw nga adda baro a bulan, masapul a nakalukat ti pagserkan.
\v 2 Masapul a sumrek ti mangiturturay iti paraangan ti pangukoman babaen iti siled a pagserrekan a ruangan, ket agtakderto iti asideg ti poste ti ruangan ti akin-uneg a paraangan ti pangukoman. Ket masapul nga idatag ti padi dagiti daton a naan-anay a mapuoran iti rabaw ti altar, kasta met ti datonna para iti sapata a pannakigayyem kaniak. Masapul a dayawennak ti mangiturturay iti ayan ti pagserkan iti akin-uneg a ruangan, kalpasanna, masapul a pumanaw isuna. Ngem saan a maiserra dayta a ruangan agingga iti rabii.

\s5
\v 3 Kadagiti Aldaw a Panaginana ken kadagiti aldaw nga adda ti baro a bulan, masapul met a dayawendak dagiti tattao iti pagserkan daytoy a ruangan.
\v 4 Ti daton a naan-anay a mapuoran a rumbeng nga iyeg ti mangiturturay iti Aldaw a Panaginana ket masapul nga innem nga urbon a karnero ken maysa a kabaian a baka, amin dagitoy ket masapul nga awan pakapilawanna.
\v 5 Ti daton a masapul nga itedna a nayon ti kabaian a baka ket agarup 22 a litro nga arina, ket ti arina a masapul nga idatagna a nayon dagiti urbon a karnero ket no mano ti ikeddengna nga ited, a maikuyog iti maysa a litro a lana ti olibo iti tunggal 22 a litro ti arina.

\s5
\v 6 Ket tunggal aldaw nga adda iti baro a bulan, masapul a mangidaton isuna iti maysa nga urbon a kalakian a baka, innem a karnero ken maysa a kabaian a baka, dagitoy amin ket masapul nga awan pakapilawanna.
\v 7 Masapul pay a mangted isuna iti 22 a litro ti arina a nayon ti kalakian a baka, isu met laeng ti kaadu ti arina a nayon ti kabaian a baka, ken no mano ti ikeddengna nga ited a nayon ti urbon a karnero, agraman ti maysa litro a lana ti olibo iti tunggal 22 a litro ti arina.
\v 8 Inton sumrek ti mangiturturay iti paset ti templo, masapul a sumrek isuna iti ruangan ken iti siled daytoy a pagserkan, ket isu met laeng ti rumbeng a pagruaranna.

\s5
\v 9 No kasta nga umay dagiti tattao nga agdayaw kaniak, kadagiti fiesta nga imbilinko, siak a ni Yahweh, dagiti sumrek iti akin-amianan a ruangan ket masapul a rummuar iti akin-abagatan a ruangan. Ket dagiti sumrek iti akin-abagatan a ruangan ket masapul a rummuar iti akin-amianan a ruangan. Masapul a saan a rummuar dagiti tattao iti ruangan a nagserkanda; masapul a rummuarda babaen iti kasinnumbangirna a ruangan.
\v 10 Masapul nga umuneg ti mangiturturay inton umuneg dagiti tattao, ket rummuar met inton rummuar dagiti tattao.

\s5
\v 11 Kabayatan dagiti fiesta a salsalimetmetanyo a maipaay kaniak, masapul nga agidatag ti ari iti 22 a litro ti arina a kanayon ti maysa a kalakian wenno kabaian a baka, ken no mano nga arina ti ikeddengna nga ited a kas nayon dagiti urbon a karnero, kasta met a maysa a litro a lana ti olibo iti tunggal 22 a litro ti arina.
\v 12 No mangted ti mangiturturay iti sagut a saan a kasapulan, daton man a naan-anay a mapuoran wenno daton iti panagrambak iti pannakikappia kaniak, rumbeng a malukatan ti ruangan iti daya para kenkuana. Masapul ngarud nga idatagna dagiti datonna a kas iti ar-aramidenna iti Aldaw a Panaginana. Kalpasanna, rummuarto isuna, ket no rummuar isuna, iserrana ti ruangan.

\s5
\v 13 Iti tunggal agsapa iti inaldaw, masapul nga adda mangted iti karnero a maysa ti tawenna ken awan pakapilawanna a kas daton kaniak, daton a naan-anay a puoran dagiti padi.
\v 14 Masapul met nga adda binigat a mangted kaniak iti daton nga arina. Masapul a 3.5 a litro daytoy nga arina a nailaok iti maysa litro a lana ti olibo. Masapul a saanyo nga isardeng ti inaldaw a panagidatonyo kaniak kadagiti daton nga arina ken lana ti olibo, siak a ni Yahweh.
\v 15 Ti urbon a karnero ken ti daton nga arina ken lana ket masapul a maidatag kaniak iti tunggal agsapa, a naan-anay a mapuoran iti rabaw ti altar.

\s5
\v 16 Kastoy ti ipakpakaammo ni Yahweh nga Apo: No mangted ti mangiturturay iti dadduma a paset iti dagana iti maysa kadagiti annakna, a kukuana iti agnanayon, sigurado a kukuanto dayta dagiti kaputotan ti anakna a lalaki.
\v 17 Nupay kasta, no itedna ti dadduma a paset ti dagana iti maysa kadagiti adipenna, mabalin nga agtalinaed iti adipenna dayta a daga agingga iti Tawen ti Pannakawayawaya. Kalpasanna, maisublinto daytoy a sanikua iti mangiturturay. Ngem no mangted ti mangiturturay iti daga kadagiti annakna, kukuadanto dayta iti agnanayon.
\v 18 Masapul a saan a mangala ti mangiturturay kadagiti aniaman a daga dagiti tattao ket pilitenna ida nga agnaed iti sadinoman. Ti daga nga itedna kadagiti annakna ket masapul a naggapu iti bukodna a sanikua, saan a naggapu iti sanikua ti sabali, tapno saan a mapukaw dagiti tattaok ti bukodda a sanikua.’”

\s5
\v 19 Kalpasanna, iti sirmata, impannak ti lalaki iti pagserkan nga abay ti ruangan nga agturong kadagiti nasagradoan a siled iti akin-amianan a paset dagiti siled a kukua dagiti papadi, ken impakitana kaniak ti lugar nga adda iti patingga ti laud.
\v 20 Kinunana kaniak, "Daytoy ti lugar a pangilutoan dagiti papadi kadagiti karne a daton dagiti tattao gapu ta saanda a naaramid ti inkarida kenni Yahweh nga aramidenda, ket dagiti daton tapno maikari dagiti tattao iti Dios, ken ti lugar a pagluttoanda iti tinapay babaen iti arina a naiyeg a kas daton. Lutoenda dagidiay a banag iti siledda tapno maliklikan ti panangipanda kadagitoy iti akinruar a paraangan ti pangukoman tapno mailuto sadiay, tapno saan nga agbalin a nadalus ti siasinoman a makasagid kadagitoy."

\s5
\v 21 Kalpasanna, impannak ti lalaki iti akinruar a paraangan ti pangukoman ket inturongnak kadagiti uppat a suli daytoy. Iti tunggal suli, nakakitaak iti paset a naserraan;
\v 22 tunggal maysa ket adda agarup 22 a metro ti kaatiddogna ken agarup 16 a metro ti kalawana.
\v 23 Iti aglawlaw ti tunggal siled dagitoy a paset a naserraan ket adda pasetna a natuping a bato, addaan dagitoy iti paset a pagpuoran iti baba ti hamba.
\v 24 Ket kinuna kaniak ti lalaki, "Dagitoy dagiti kusina a paglutoan dagiti kaputotan ni Levi nga agtrabtrabaho iti templo kadagiti daton nga iyeg dagiti tattao."

\s5
\c 47
\p
\v 1 Kalpasanna, iti sirmata, insublinak ti lalaki iti ruangan ti templo. Ket nakitak sadiay ti danum nga agay-ayus manipud iti sirok ti ruangan ken agay-ayus nga agturong iti daya. Agay-ayus ti danum manipud iti akin-abagatan a paset ti ruangan nga agturong iti makannawan a paset ti altar.
\v 2 Kalpasanna, inruarnak babaen iti akin-amianan a ruangan, ket inturongnak iti aglawlaw ti akin-daya a ruangan, iti akinruar a pasetna.

\s5
\v 3 Bayat iti pannagna ti lalaki nga agturong iti daya, nakitak nga adda iggemna a pagrukod. Nangrukod isuna iti agarup 540 a metro ket impannak iti danum nga agingga kadagiti lipaylipayko.
\v 4 Kalpasanna, nangrukod manen isuna iti agarup 540 a metro ket impannak iti danum a pagattumengko. Kalpasanna, nangrukod manen isuna iti agarup 540 a metro ket impannak iti danum a pagatsiketko.
\v 5 Kalpasanna, nangrukod manen isuna iti agarup 540 a metro ket impannak iti maysa a karayan a saankon maballasiw, gapu ta adalem unay ti danum; no itultuloyko pay ti mapan iti ad-adayo ket masapul a languyek daytoy.

\s5
\v 6 Ket dinawatna kaniak, "Anak ti tao, panunotem a naimbag daytoy." Kalpasanna, inturongnak iti paset a pagurnongan ti danum iti karayan,
\v 7 ken nagsublikami iti disso a naggapuanmi. Nakitak sadiay dagiti adu a kayo a nagtubo iti agsinnumbangir nga igid ti karayan.
\v 8 Kinunana kaniak, "Agayus daytoy a danum iti daya a bumaba iti Natay a Baybay. Ket inton mapan ti danum iti Natay a Baybay, agtalinaed a nasayaat ti raman daytoy ket isublina ti raman ti Baybay ken agbalin manen a nasayaat ti raman daytoy.

\s5
\v 9 Agnaed dagiti naummo-ummong a lames iti pagayusan ti karayan. Adunto dagiti lames iti Natay a Baybay, gapu ta pasayaatento ti danum nga agay-ayus ditoy ti raman ti naapgad a danum. Sadinoman ti pagayusan ti karayan, sumayaatto amin nga adda iti asidegna.
\v 10 Agkalapto iti igid ti karayan dagiti mangngalap. Manipud iti En Gedi nga adda iti paset iti laud, agingga iti En Eglaim, addanto dagiti lugar a pagiwayatan kadagiti iket. Adunto ti naduma-duma a kita ti lames a kas iti kaadu dagiti adda iti Dakkel a Karayan.

\s5
\v 11 Ngem dagiti kadandanuman a daga ken libsong iti asideg ti baybay ket saan nga agbalin a nasayaat ti ramanna; mabatida a pagtaudan ti asin.
\v 12 Adunto a kita dagiti kaykayo nga agbunga ti agtubo iti agsinnumbangir nga igid ti karayan. Saan a malaylay dagiti bulongda, ket kankanayonto nga adda bungada. Binulan nga agbungada, gapu ta agtultuloy nga agay-ayus ti danum nga aggapu iti templo iti ayan dagiti kaykayo. Nasayaat a kanen dagiti bunga ti kayo ken mabalin a pagagas ti bulongda.

\s5
\v 13 Iti sirmata, kastoy pay ti kinuna ni Yahweh kaniak: "Daytoy ti listaan dagiti sangapulo ket dua a tribu ti Israel ken ti daga a matagikua ti tunggal tribu. Makaawat dagiti kaputotan ni Jose iti dua a kapaset.
\v 14 Pagpapadaenyo ti pannakabingay ti daga kadagiti amin a tribu. Ingngatok ti imak tapno agsapata kadagiti kapuonanyo a mangtedak iti daga kadakuada a tagikuaenda iti agnanayon.

\s5
\v 15 Dagitoyto dagiti beddeng ti daga. Iti amianan a pasetna, agpatingganto manipud iti Baybay Mediteranean nga asideg iti dalan nga agturong iti Hetlon, a lumabas iti Lebo Hamat nga agturong iti Zedad,
\v 16 agturong iti Berota, ken agturong iti Sibraim, nga adda iti beddeng ti nagbaetan ti Damasco ken Hamat. Ti beddengna ket agingga iti Hazer Haticon, nga adda iti beddeng iti region ti Hauran.
\v 17 Isu a ti beddengna ket agpatingga manipud iti Baybay Mediteranean nga agturong iti Hazar Enan iti beddeng nga adda iti nagbaetan ti Hamat nga agturong iti amianan ken Damasco iti abagatan. Daytoy ti akin-amianan a beddengna.

\s5
\v 18 Iti akin-daya a paset, ti beddengna ket agpatingga iti nagbaetan ti Hauran ken Damasco, iti abagatan nga asideg iti Karayan Jordan, iti nagbaetan ti rehion ti Galaad ken iti masakupan ti Israel, nga asideg iti Natay a Baybay agingga iti Tamar. Dayta ti beddengna nga adda iti daya.
\v 19 Iti abagatan a paset, agpatingga ti beddengna manipud iti Tamar nga agturong kadagiti ubbog nga asideg iti Meriba Kades. Kalpasanna, agpatingga iti laud nga asideg iti waig ti Egipto nga agturong iti Dakkel a Baybay. Dayta ti akin-abagatan a beddengna.
\v 20 Iti laud a paset, ti patinggana ket iti Baybay Mediteranean, iti paset iti amianan ti Lebo Hamat.

\s5
\v 21 Masapul a pagbibingayanyo daytoy a daga, kadagiti tribu ti Israel.
\v 22 Masapul nga pagtalinaedenyo ti daga a kas agnanayon a sanikua a para kadakayo ken iti siasinoman kadagiti kakaduayo a ganggannaet nga agnanaed ken mangay-aywan kadagiti annakda. Masapul nga ibilangyo ida a kas naiyanak a mismo iti tribu ti Israel.
\v 23 Sadinoman ti pagnanaedan dagiti ganggannaet, masapul nga ikkanyo ida kadagiti sumagmamano a daga nga agbalin a kukuada iti agnanayon.' Daytoy ti ipakpakaammo ni Apo a Yahweh.

\s5
\c 48
\p
\v 1 Adtoy ti listaan dagiti tribu ti Israel ken ti masakupan a maawatto ti tunggal tribu. Mangrugi iti Baybay Mediterranean ti akin-amianan a beddeng ti Israel, ket agpa-daya daytoy, iti siudad ti Hetlon, kalpasanna, agturong iti Lebo Hamat, ket bumallasiw nga agturong iti Hazar Enan, nga isu ti abagatan ti Damasco, ket aglayon daytoy agingga iti Hamat. Umawatto ti tunggal tribu iti maysa a paset ti daga manipud iti akin-daya a beddeng ti Israel nga agturong iti Dakkel a Baybay. Umawatto ti tribu ti Dan iti paset ti daga iti asideg ti akin-amianan a beddeng ti Israel.
\v 2 Iti akin-abagatan a paset ti tribu ti Dan ket masakupanto iti tribu ti Aser.
\v 3 Iti akin-abagatan a paset ti daga ti Aser ket masakupanto ti tribu ti Neftali.

\s5
\v 4 Iti abagatan a paset ti daga ti Neftali ket masakupanto ti tribu ti Manases.
\v 5 Iti abagatan a paset ti daga ti Manases ket isunto ti masakupan ti Efraim.
\v 6 Iti abagatan a paset ti daga ti Efraim ket masakupanto ti Ruben.
\v 7 Iti abagatan a paset ti daga ti Ruben ket isunto ti tribu ti Juda.

\s5
\v 8 Iti abagatan a paset ti daga ti Juda ket maysa a paset nga ited kaniak ti entero a nasion; ilasinyo daytoy para iti naisangsangayan a pakausaranna. Iti tengnga daytoy a disso ti pakaipatakderanto ti templo. Kapadanto daytoy ti kaatiddog dagiti paset ti daga a naited iti maysa a tribu ti Israel.
\v 9 Daytoy a naidumduma a paset ket agarup 13.5 a kilometro ti kaatiddogna ken 5.4 a kilometro ti kalawana. Daytoyto ti itedyo kenni Yahweh.

\s5
\v 10 Iti masakupan daytoy a naisangsangayan a disso, dagitoy dagiti rumbeng nga ipaayyo kadagiti papadi: mangipaaykayo kadakuada iti daga nga agarup 13.5 a kilometro iti akin-amianan ken akin-abagatan a pasetna; ken agarup 5.4 a kilometro iti akin-laud ken akin-daya a paset. Ti templo ni Yahweh ket adda iti tengnga daytoy a naisangsangayan a disso.
\v 11 Maipaayto ti templo kadagiti papadi, dagiti nailasin a para iti pakaidayawak, nga isu dagiti kaputotan ni Zadok. Isuda dagiti sipupudno a nagserbi kaniak ken saan nga immadayo kenni Yahweh a kas iti inaramid dagiti kaputotan ni Levi.
\v 12 Inton mabingay-bingayen ti daga, itedyonto kaniak ti naisangsangayan a disso, ta daytoy ti naisangsangayan a paset ti bingay dagiti papadi; ibilangyonto daytoy a daga a naisangsangayan unay kaniak. Iti abay ti daga a masakupan dagiti papadi ti pagnaedanto dagiti dadduma a kaputotan ni Levi.

\s5
\v 13 Ti daga nga itedyo kadagiti kaputotan ni Levi ket kapada ti kadakkel ti daga a maawatto dagiti papadi. Isu a no pagtipunen, dagitoy a dua a paset ti daga ket agarup 13.5 a kilometro ti kaatiddogna ken 11 a kilometro ti kalawana.
\v 14 Awan kadagitoy a naisangsangayan a daga, kadagitoy a kasasayaatan a daga, ti mabalin nga ilako wenno isukat, wenno usaren dagiti sabali a tattao, gapu ta kukua daytoy ni Yahweh. Nailasin daytoy a para kenkuana.

\s5
\v 15 Ti sabali pay a paset ti nabati a daga nga agarup 13.5 a kilometro ti kaatiddogna ken agarup 2.7 a kilometro ti kalawana ket maitedto kadagiti tattao nga agnanaed iti naisangsangayan a disso tapno usarenda; mabalinda ti agpatakder kadagiti balbalayda sadiay ken mabalinda a pagpaaraban, ket addanto siudad iti tengnga daytoy a paset.
\v 16 Kwadradonto ti siudad, agarup 2.4 a kilometro ti kaatiddog ti tunggal sikigan.

\s5
\v 17 Addanto maysa a nawaya a disso iti aglawlaw ti siudad, ti masakupan dayta a naisangsangayan a lugar, nga agarupto a 135 a metro ti kaunegna iti tunggal disso.
\v 18 Iti ruar ti siudad ket addanto lugar a pagtalonan a dumanonto iti agarup 5.4 a kilometro iti daya a paset ken agarup 5.4 a kilometro iti laud a paset. Mangpataudto dagiti tattao nga agtrabtrabaho sadiay kadagiti taraon para kadagiti tattao nga agtrabtrabaho iti siudad.

\s5
\v 19 Dagiti naggapu kadagiti nadumaduma a tribu tapno agtrabaho iti siudad ket mabalinda met ti agtrabaho iti daytoy a talon.
\v 20 Daytoy a sibubukel a naisangsangayan a disso, karaman ti daga a naited nga usaren ni Yahweh ken ti siudad, ket maysanto a kuadrado nga agarup 13.5 a kilometro ti kaatiddog ti tunggal sikigan.

\s5
\v 21 Dagiti paset ti daga nga agturong iti daya ken iti laud ti disso ni Yahweh ken ti siudad ket kukuanto ti mangiturturay. Ti maysa a pasetna ket dumanon iti daya nga agturong iti akin-daya a beddeng ti Israel, ken ti sabali ket agturong iti Dakkel a Baybay. Ti lugar ni Yahweh a pakairamanan ti templo ket addanto iti tengnga.
\v 22 Ti paset a kukua ti mangiturturay ket addanto iti nagbaetan ti tribu ti Juda iti daya ken ti tribu ti Benjamin iti abagatan.

\s5
\v 23 Iti abagatan ti paset ni Yahweh, makaawatto iti maysa a paset ti bingay ti tunggal maysa kadagiti tribu a nayonna ti manipud iti akin-daya a beddeng ti Israel iti laud nga agturong iti Dakkel a Baybay. Iti abagatan met ti paset ni Yahweh ket ti tribu ti Benjamin.
\v 24 Iti abagatan ti daga ti Benjamin ket ti tribu ti Simon.
\v 25 Iti abagatan ti daga ti Simon ket ti tribu ti Issacar.
\v 26 Iti akin-abagatan a paset ti bingay ti Issacar ket ti tribu ti Zabulon.

\s5
\v 27 Iti abagatan ti daga ti Zabulon ket ti daganto a para iti tribu ti Gad.
\v 28 Iti akin-abagatan a beddeng ti daga ti Gad ket nayonnanto ti abagatan ti En Gedi nga agturong iti Meriba Kades ken agturong iti laud iti asideg ti karayan ti Egipto nga agturong iti Dakkel a Baybay.
\v 29 Kastoy ti panangiladawan kadagiti daga a masapul nga itedmo kadagiti tribu ti Israel. Ta kukuada daytoy iti agnanayon.' Kastoy ti ipakaammok, Siak ni Yahweh nga Apo.

\s5
\v 30 Dagitoy dagiti ruangan ti siudad: Iti akin-amianan a paset nga agarup 2.4 a kilometro,
\v 31 addanto tallo a ruanganna. Mapanaganan ti tunggal maysa a ruangan kadagiti nagan dagiti tribu ti Israel. Ti umuna ket mapanaganan iti Ruben, ti sumaruno ket Juda, ti sumaruno ket Levi.
\v 32 Iti akin-daya a pasetna nga agarup 2.4 a kilometro ti kaatiddogna, mapanaganan dagiti ruanganna iti Jose, Benjamin ken Dan.

\s5
\v 33 Iti akin-abagatan a pasetna, nga agarup 2.4 a kilometro met laeng ti kaatiddogna, ket ruangan a mapanagananto iti Simon, Issacar ken Zabulon.
\v 34 Iti akin-laud a pasetna nga agarup 2.4 a kilometro met laeng ti kaatiddogna, ket isu dagiti ruangan a napanaganan iti Gad, Aser ken Naftali.
\v 35 Ti ngarud rukod ti aglawlaw ti siudad ket agarup 9.7 a kilometro. Manipud iti dayta a tiempo, mapanagananto ti siudad nga "Adda sadiay ni Yahweh."