{
  "1": "А кана, прикхарав тэˍкэрэн анґил сарэстыр манґипэна и тэˍманґэн Дэвлэс, пхэнэн наис пал сарэндэ манушэндэ,",
  "2": "пал царендэ и пал сарэндэ шэралэндэ, соб амэндэ тэˍавэл мирно и лачё джиипэн, дэ саро тэˍполас Дэвлэс.",
  "3": "Ада чялёл Дэвлэскэ Саво Зракхья амэн,",
  "4": "Саво камэл, соб сарэ мануша тэˍзракхэнпэ и тэˍуджинэн Дэвлэско чячибэн.",
  "5": "Пал адава со екх Дэвэл, и екх кон машкир Дэвлэстэ и манушэндэ – мануш Иисусо Христосо",
  "6": "Саво плоскирдя кокоро Пэса пал сарэндэ манушэндэ. Адалэса Ёв допхэндя дэ пэскиро дэвэс,",
  "7": "ваш со ман чивдя тэˍроспхэнав и тэˍавав апостолоса ракирав чячибэн дэ Христостэ, на хохавав, роспхэнав и сыклякирав манушэн савэ нанэ евреи до патябэн и чячибэн.",
  "8": "И, мэ камам, соб мурша тэˍманґэнпэ пэ сарэ штэты, тэˍґадэн свэнта васта би холяко жужэ илэса.",
  "9": "Адякэ и джювля, дэ ладжь и патыв мэк сыкавэн пэс, мэк на урьенпэ дэ дрого идя чи сумнакай, и на пхутён екх анґил екхатэ,",
  "10": "а мэк кэрэн лаче рынды савэ трэби джювлякэ и ґинэн Дэвлэс дэ пэскиро ило.",
  "11": "Ромня мэк сыклён тэˍшунэн и тэˍавэн штыл, дэ саро кандуны.",
  "12": "Тэˍсыклякирэ джювлякэ мэ запхэнав, и тэˍавэл хуланы пэ ромэстэ мэ запхэнав нэ тэˍавэл штыл.",
  "13": "Пал дова со анґил сыс скэрдо Адамо, а тэнче Ева,",
  "14": "и хохадо сыс нанэ Адамо, а джювлы сави пэя до бэзэх.",
  "15": "Нэ заракхэлапэ сыр биянэла чяворэн и ачелапэ до патябэн и камлыпэн и свэнто джиипэн.",
  "front": "\\p"
}