rml_ol_2024_rml_rhb_1ti_tcore_L2_S3_ling/1ti/2.json

{
  "1": "Акана́, прикхара́в тэˍманґэ́нпэ анґи́л сарэ́стыр и тэˍманґэ́н Дэвлэ́с, тэˍпхэнэ́н наи́с па́л сарэ́ндэ манушэ́ндэ,",
  "2": "па́л царе́ндэ и па́л сарэ́ндэ шэралэ́ндэ, со́б амэ́ндэ тэˍавэ́л ми́рно и лачё́ джиипэ́н, дэ саро́ тэˍпола́с Дэвлэ́с.",
  "3": "Адава́ ку́ч до якха́ Зракхипнарё́скэ амарэ́скэ Дэвлэ́скэ,",
  "4": "Саво́ камэ́л, со́б сарэ́ мануша́ тэˍзракхэ́нпэ и тэˍуджинэ́н Дэвлэ́ско чячибэ́н.",
  "5": "Па́л адава́ со е́кх Дэвэ́л, и е́кх ко́н машки́р Дэвлэ́стэ и манушэ́ндэ – ману́ш Иису́со Христо́со",
  "6": "Саво́ плоскирдя́ кокоро́ Пэ́са па́л сарэ́ндэ манушэ́ндэ. Адалэ́са Ёв допхэндя́ дэ пэ́скиро дэвэ́с,",
  "7": "ва́ш со ма́н чивдя́ тэˍроспхэна́в и тэˍава́в апостоло́са ракира́в чячибэ́н дэ Христо́стэ, наˍхохава́в, роспхэна́в и сыклякира́в манушэ́н савэ́ нанэ́ евре́и до патябэ́н и чячибэ́н.",
  "8": "И, мэ́ кама́м, со́б мурша́ тэˍманґэ́нпэ пэ сарэ́ штэ́ты, тэˍґадэ́н свэ́нта васта́ би холя́ко жужэ́ илэ́са.",
  "9": "Адя́кэж и джювля́, дэ ла́джь и паты́в мэ́к сыкавэ́н пэ́с, и мэ́к на́ˍурьенпэ дэ дро́ґо и́дя чи сумнака́й, и наˍпхутё́н е́кх анґи́л екха́тэ,",
  "10": "а мэ́к кэрэ́н лаче́ ры́нды савэ́ трэ́би джювля́кэ и ґинэ́н Дэвлэ́с дэ пэ́скиро ило́.",
  "11": "Джювлы́ мэ́к сыклё́л тэˍшунэ́л и тэˍавэ́л шты́л, дэ саро́ кандуны́.",
  "12": "Тэˍсыклякирэ́ джювля́кэ мэ́ запхэна́в, и тэˍавэ́л хуланы́ пэ ромэ́стэ мэ́ запхэна́в нэ тэˍавэ́л шты́л.",
  "13": "Па́л одова́ со анґи́л исы́с скэрдо́ Ада́мо, а тэ́нче Е́ва,",
  "14": "и хохавдо́ исы́с нанэ́ Ада́мо, а джювлы́ сави́ пэя́ до бэзэ́х.",
  "15": "Нэ зракхэ́лапэ сы́р биянэ́ла чяворэ́н и аче́лапэ до патябэ́н и камлыпэ́н и свэ́нто джиипэ́н.",
  "front": "\\p"
}