raglay_2021_rgs_rlt_rom_book/rom/4.json

{
  "1": "Yơu nữn, pơnõq drơi ròq đơp A-bra-ham, ung kõq pơnõq drơi mưng gah vơnah rlo rùp, tồq mãq hũ hagĩq? ",
  "2": "Kơyua mơyah làiq A-bra-ham hũ angãn la tơpãq dãng mưng vruãq ngãq, ung song hũ kanoh gơtha pioh yeh drơi, nữn pãq anãq Yàc Pô Lơngĩq ôh iỡuq yơu nữn. ",
  "3": "Kơyua Sơrãq Sơđah đơp hayơu? \"A-bra-ham pãc tui Yàc Pô Lơngĩq, sì vruãq nữn hũ angãn la tơpãq dãng ga ung.\" ",
  "4": "Pơweh sì mơnuĩh halơi ngãq vruãq, nữn kaya pơnõq nhũ tồq hũ ôh iỡuq la kaya anĩt, nữn la kaya sơrẽ. ",
  "5": "Dòq mơnuĩh halơi ôh ngãq vruãq, nữn mĩn pãc tui dơlãp Pitao angãn ga mơnuĩh ôh pãc tui Yàc la tơpãq dãng, nữn voh tui mơnuĩh nữn hũ angãn la tơpãq dãng. ",
  "6": "Da-vit kung akhàt vrơi pa-thơu kaya lơngai mơnuĩh nữn hũ, la mơnuĩh Yàc Pô Lơngĩq angãn la tơpãq dãng ôh iỡuq mưng vruãq ngãq. ",
  "7": "Làiq, \"Lơngai ga mơnuĩh halơi hũ tơleh dơgrữq vruãq ngãq sỗq suẽl drơi, hũ sapỡq avih dlàiq dơnũh drơi. ",
  "8": "Lơngai ga mơnuĩh Yàc ôh angãn la mơnuĩh hũ dlàiq.\" ",
  "9": "Yơu nữn, kaya lơngai nĩ mĩn hũ akhàt pa-tơviãq ga mơnuĩh ãt sìq kalìq soh, hẽla kung vrơi ga mơnuĩh ôh-ka ãt sìq kalìq wỡq? Kơyua pơnõq drơi đơp, \"Voh-tui hũ angãn la tơpãq dãng ga A-bra-ham.\" ",
  "10": "Yơu nữn, voh tui nữn hũ angãn yơu halơi? Dơlãp tũq A-bra-ham song ãt sìq kalìq hẽla ka-ôh sìq kalìq? Ôh iỡuq hadơi sì tũq song ãt sìq kalìq, nữn la hlơu sì tũq ka-ôh ãt sìq kalìq. ",
  "11": "Ung song tồq hũ nỡm sìq kalìq ngãq chưng tang kaya tơpãq dãng hũ kơyua mưng voh-tui nữn drơi hũ tồq tũq ka-ôh ãt sìq kalìq, pioh tơviãq jỡc ama ga dơgrữq mơnuĩh pãc tui, bôh làiq pơnõq nhũ ôh-ka ãt sìq kalìq, pioh ga pơnõq nhũ kung ròq hũ angãn la tơpãq dãng. ",
  "12": "Ung kung tơviãq jỡc ama mưng kaya ãt sìq kalìq pơweh sì dơgrữq mơnuĩh ôh iỡuq mĩn ãt sìq kalìq soh, nữn kung nao tui nỡm voh-tui A-bra-ham hũ la ung-kõq pơnõq drơi hlơu sì tũq ung ãt sìq kalìq. ",
  "13": "Kơyua ôh iỡuq gơnang mưng kaya voh-va nữn pơnuaĩq hẽ grưh la mơnuĩh hũ tồq mãq palơi lơgar dun-kơyua hũ vrơi ga A-bra-ham sì anàq tơcho ung, nữn la gơnang mưng kaya tơpãq dãng kơyua mưng voh-tui. ",
  "14": "Kơyua mơyah làiq mơnuĩh hadiuq tui voh-va la mơnuĩh hũ tồq, nữn voh-tui tơviãq jỡc ôh kuơ sì pơnuaĩq hẽ grưh kung tơviãq jỡc ôh kuơ màc hagĩq. ",
  "15": "Kơyua kaya voh-va va trôh kaya ơnõc mơvai prong, sì anĩh halơi ôh hũ kaya voh-va, nữn anĩh nữn kung ôh hũ kaya sỗq voh-va. ",
  "16": "Yơu nữn, la kơyua mưng voh-tui, pioh pơnuaĩq hẽ grưh la gơnang mưng kaya anĩt sì hũ gơjãp gơnĩt ga avih dơgrữq anàq tơcho A-bra-ham, - ôh iỡuq mĩn vrơi ga mơnuĩh dòq pãq ala gơnuar kaya voh-va, nữn kung vrơi ga mơnuĩh hũ voh-tui yơu A-bra-ham. Ung la ung-kõq avih dơgrữq pơnõq drơi hũ, ",
  "17": "yơu hũ wãq, \"Kơu song padỡc anàq ngãq jỡc ama lũ vual-vơla hũ,\" pãq anãq Yàc Pô Lơngĩq nữn ung chàc gơnang, Pitao vrơi kaya hadiuq ga mơnuĩh mơtai sì ngãq dơgrữq vruãq ôh hũ tơviãq jỡc hũ. ",
  "18": "Ung pãc gơnĩt, hatai vãq kaya chàc gơnang dơlãp tũq ôh dòq kaya chàc gơnang, làiq drơi ròq tơviãq jỡc ama lũ vual-vơla, tui yơu pơnuaĩq song hẽ grưh ga drơi, làiq, \"Pơjẽh pơtiàt anàq ròq hũ yơu nữn.\" ",
  "19": "Voh-tui ung ôh lơmuỡn lơduh, bôh làiq ung mững rùp phàp drơi yơu song mơtai, ( kơyua ung song hũ pơgãp sarơtôh thũt) - sigỡuq sì pơsrãng anàq song thô tơhiu Sa-ra hũ. ",
  "20": "Nữn gơnang mưng pơnuaĩq hẽ grưh Yàc Pô Lơngĩq hũ, A-bra-ham ôh dỡq dỡng dơlãp kaya ôh pãc tui. Pa-vlữq wỡq ung brõq prãn tơgùq dơlãp voh-tui sì sơ-uỗt mơyòp Yàc Pô Lơngĩq. ",
  "21": "Ung pãc gơnĩt wil tãl kaya halơi Yàc Pô Lơngĩq song grưh, nữn Pitrai kung pơlih ngãq jỡc. ",
  "22": "Yơu nữn voh-tui nữn hũ angãn la tơpãq dãng ga ung. ",
  "23": "Pơnuaĩq wãq \"voh-tui hũ angãn ga ung\" nữn ôh iỡuq mĩn pioh ga A-bra-ham, ",
  "24": "nữn kung pioh luơi ga pơnõq drơi, mơnuĩh hũ angãn la tơpãq dãng gơnang mưng kaya pãc tui dơlãp Pitao song ngãq ga Yàc Je-su pơnõq drơi hadiuq wỡq mưng kaya mơtai. ",
  "25": "Nữn la Pitao song kađòc pơjao kơyua mưng dlàiq dơnũh pơnõq drơi nữn kung song hadiuq wỡq kơyua mưng kaya tơpãq dãng pơnõq drơi. "
}