raglay_2021_rgs_rlt_rom_book/rom/16.json

{
  "1": "Hlãq akhàt pa-thơu ga pơnõq adơi sơai sa aràc adơi sơai kamơi pơnõq hlãq hũ la Phe-be, mơnuĩh duh vruãq Sàc Pơjũm Sơđah pãq Xen-kơ-re, ",
  "2": "pioh ga pơnõq adơi sơai tồq ròq nhũ dơlãp Yàc, tui pơnẽq đang mang sì dơgrữq mơnuĩh gơnuar pơđar sơđah, sì dõc nhũ dơlãp avih dơgrữq kaya halơi nữn nhũ chàc trôh pơnõq adơi sơai. Kơyua rùp phuỗt nhũ kung song dõc lũ mơnuĩh, dơlãp nữn hũ hlãq. ",
  "3": "Lakơu chuãq Be-rit-sin sì A-qui-la, dơgrữq ban mayơu ngãq vruãq sigỡuq hlãq hũ dơlãp Yàc Dõc Pơtlah Je-su, ",
  "4": "dơgrữq mơnuĩh song tlàq kaya hadiuq pioh dõc hlãq. Hlãq ỡn ngai pơnõq nhũ, nữn ôh mĩn sa aràc hlãq, nữn avih dơgrữq Sàc Pơjũm Sơđah vual vơla lơniãu hũ kung ỡn ngai pơnõq nhũ. ",
  "5": "Lakơu chuãq Sàc Pơjũm Sơđah pơjũm pơtõm pãq sàc pơnõq nhũ. Lakơu chuãq E-bai-net, mơnuĩh adơi sơai anĩt anar hlãq hũ, la voh akõq thũt ga Yàc Dõc Pơtlah pãq A-si. ",
  "6": "Lakơu chuãq Ma-ri, mơnuĩh song ãt-ỡl dleh dlàr kơyua mưng pơnõq adơi sơai. ",
  "7": "Lakơu chuãq An-tô-ni-kơ sì Giu-ni-a, gỡuq gãt sì mơnuĩh kađòc krỡq sigỡuq sì hlãq. Pơnõq nhũ la dơgrữq mơnuĩh tiẽng dơnai di khrah dơgrữq mơnuĩh gơnuar pơđar, sì kung dòq dơlãp Yàc Dõc Pơtlah hlơu sì hlãq. ",
  "8": "Lakơu chuãq Am-li-a, ban mayơu anĩt anar hlãq hũ dơlãp Yàc. ",
  "9": "Lakơu chuãq U-rơ-ban, la mơnuĩh ngãq vruãq sigỡuq sì hlãq dơlãp Yàc Dõc Pơtlah, sì Es-ta-chy, la ban mayơu anĩt anar hlãq hũ. ",
  "10": "Lakơu chuãq A-be-lơ, la mơnuĩh hũ tồq kaya lòc dơlãp Yàc Dõc Pơtlah. Lakơu chuãq dơgrữq mơnuĩh dơlãp sàc anĩh A-ris-tô-bu. ",
  "11": "Lakơu chuãq He-rô-đi-ôn, la gỡuq gãt hlãq. Lakơu chuãq mơnuĩh sàc anĩh Nat-sĩt hũ, la dơgrữq mơnuĩh dòq dơlãp Yàc. ",
  "12": "Lakơu chuãq Tri-phe-nơ sì Tri-phô-sơ, la dơgrữq mơnuĩh ãt dleh dlàr dơlãp Yàc. Lakơu chuãq Bet-sit-đơ la mơnuĩh hlãq anĩt anar, mơnuĩh song ãt dleh dlàr lũ dơlãp Yàc. ",
  "13": "Lakơu chuãq Ru-phus, la mơnuĩh hũ duỡt ruãh dơlãp Yàc, sì lakơu chuãq wãc ami nhũ nữn, kung la ami hlãq mĩn. ",
  "14": " Lakơu chuãq A-sin-kơ-rit, Phơ-le-gôn, Het-me, Ba-trô-bas, Het-ma, sì dơgrữq pơnõq adơi sơai dòq sì pơnõq nhũ. ",
  "15": "Lakơu chuãq Phi-lô-lô-gơ, Ju-li, Ne-re sì sơai kamơi nhũ nữn, sigỡuq Ô-lim sì avih dơgrữq mơnuĩh pãc-tui yàc dòq sì pơnõq nhũ. ",
  "16": "Lakơu chuãq gỡuq mưng kaya chũm sơđah sơchih. Avih dơgrữq Sàc Pơjũm Sơđah Yàc Dõc Pơtlah hũ lakơu chuãq rơwãc pơnõq adơi sơai. ",
  "17": "Pathơu pơnõq adơi sơai, hlãq pa-sơdor pơnõq adơi sơai iỡuq gơrhia iãq dơgrữq mơnuĩh ưng ngãq pa-chơlah sì mãq pakỡuq, suẽl sì kaya pơto pơđar nữn pơnõq adơi sơai song hũ mơgrũ. Iỡuq pleh atah pơnõq nhũ. ",
  "18": "Kơyua dơgrữq mơnuĩh yơu nữn ôh duh vruãq Yàc Dõc Pơtlah pơnõq drơi, nữn duh vruãq tũc tiàt pơnõq nhũ hũ mĩn. Pơnõq nhũ angui pơnuaĩq đơp jơman sì đơp lavơr pioh pa-gơla dơgrữq mơnuĩh lamuỡn hatai pãc-tui. ",
  "19": "Kơyua dơgrữq mơnuĩh kung thơu hatai duh huaĩq pơnõq adơi sơai hũ. Yơu nữn hlãq uỗt sơh mưng pơnõq adơi sơai, nữn hlãq ưng pơnõq adơi sơai jãc rgơi mưng kaya siàp, sì sơđah sơchih pơweh sì kaya mơsãc. ",
  "20": "Yàc Pô Lơngĩq kaya dadu lơngai hũ ròq sơmar juãq jơlìq Sa-tan pãq ala tơkai pơnõq adơi sơai. Lakơu kaya anĩt Yàc Dõc Pơtlah Je-su pơnõq drơi hũ dòq sigỡuq sì pơnõq adơi sơai. ",
  "21": "Ti-mô-the, ban mayơu ngãq vruãq sigỡuq sì hlãq, Lu-si-us, Ja-sôn, sì Sô-si-pa-te, dơgrữq mơnuĩh gỡuq gãt hlãq hũ, pơyua pơnuaĩq chuãq rơwãc pơnõq adơi sơai. ",
  "22": "Hlãq, la Tet-tiu, mơnuĩh wãq sơrãq pơyua nĩ, lakơu chuãq pơnõq adơi sơai dơlãp Yàc. ",
  "23": "Gai-us, la mơnuĩh song tồq ròq hlãq sì gãm Sàc Pơjũm Sơđah, kung chuãq rơwãc pơnõq adơi sơai. E-ras-tu, la mơnuĩh pô pioh Jĩn priãq palơi prõng, sigỡuq sì mơnuĩh adơi sơai la Qua-tus, kung chuãq rơwãc pơnõq adơi sơai. ",
  "24": "Lakơu kaya anĩt Yàc Dõc Pơtlah Je-su pơnõq drơi hũ dòq sì pơnõq adơi sơai. A-men)",
  "25": "Lakơu Pitao hũ gơnuar pơlih ngãq ga pơnõq adơi sơai jỡc gơjãp kađỡc tui pơnuaĩq siàp hlãq hũ sì kaya ràc akhàt Yàc Dõc Pơtlah Je-su, tui kaya akhàt pa-tơviãq mưng kaya dơlãp dađỡuq song pioh rơmiãq gơnĩt mưng rài sơđãq, ",
  "26": "nữn tũq nĩ song hũ akhàt pa-tơviãq sì ràc tơviãq ga dơgrữq vual vơla kơyua mưng pơnuaĩq đơp hwơr dơlãp Sơrãq Sơđah tui yơu gơnuar pơđar Yàc Pô Lơngĩq hũ gãm gãm, tồq va pơnõq nhũ trôh pãq kaya duh huaĩq voh-tui hũ. ",
  "27": "Lakơu Yàc Pô Lơngĩq jãc rgơi mĩn Yàc hũ gơhluh gãm gãm, mưng Yàc Dõc Pơtlah Je-su. A-men. "
}