raglay_2021_rgs_rlt_rom_book/rom/15.json

{
  "1": "Pơnõq drơi la mơnuĩh prãn khãc, iỡuq gui anong kaya hagĩq mơnuĩh lơduh lamuỡn ngãq ôh jỡc, sì juơi ngãq pioh ga siàp hatai drơi. ",
  "2": "Avih tãl aràc mơnuĩh dơlãp pơnõq drơi iỡuq ngãq siàp hatai mơnuĩh tơmo kơyua kaya sa kanoh siàp makrờ, nữn la pioh vỡq padỡc pơnõq nhũ. ",
  "3": "Kơyua rùp phuỗt Yàc Dõc Pơtlah kung ôh ngãq ga siàp hatai drơi, yơu hũ wãq làiq, \"Pơnuaĩq đơp sàq dơgrữq mơnuĩh siẽq siẽl Pitrai hũ song tôh wỡq pãq dlòc anàq.\" ",
  "4": "Kơyua dơgrữq kaya hũ wãq wỡq mưng hlơu thrơi la pioh pơto pơđar pơnõq drơi, tồq gơnang mưng kaya ãt ỡl sì kaya paluơ padờp Sơrãq Sơđah hũ nữn pơnõq drơi hũ tồq kaya chơkhãq chàc gơjãp gơnĩt. ",
  "5": "Lakơu kaya ãt-ỡn sì kaya paluơ padờp Yàc Pô Lơngĩq hũ vrơi ga pơnõq adơi sơai hũ sa hatai sì gỡuq dơlãp kaya sanơng, tui yơu Yàc Dõc Pơtlah Je-su. ",
  "6": "Lakơu Pitrai ngãq kaya nữn tồq ga pơnõq adơi sơai pơlih sa hatai, salơvãq sigỡuq dơlãp kaya sơuỗt mơyòp Yàc Pô Lơngĩq, la Ama Yàc Dõc Pơtlah Je-su pơnõq drơi hũ. ",
  "7": "Yơu nữn, pơnõq adơi sơai iỡuq tồq ròq gỡuq, vloh kung yơu Yàc Dõc Pơtlah song tồq ròq pơnõq adơi sơai, pioh sơ-uỗt mơyòp ga Yàc Pô Lơngĩq. ",
  "8": "Kơyua hlãq lakơu đơp la Yàc Dõc Pơtlah song kơyua mưng pơnuaĩq tơpãq Yàc Pô Lơngĩq hũ trôh duh vruãq mơnuĩh ãt sìq kalìq, tồq pioh ngãq krung pahanh pơnuãiq hẽ grưh song vrơi ga dơgrữq ung kõq, ",
  "9": "sì pioh ga dơgrữq vual vơla lơniãu sơuỗt mơyòp Yàc Pô Lơngĩq kơyua mưng hatai anĩt duman Pitrai hũ. Yơu hũ pơnuaĩq wãq, \"Kơyua yơu nữn, anàq ròq sơ-uỗt mơyòp Pitrai di khrah dơgrữq vual vơla lơniãu sì adoh sơ-uỗt mơyòp angãn Pitrai.\" ",
  "10": "Vloh kung hũ pơnuaĩq wãq, \"Ơ dơgrữq vual vơla lơniãu, iỡuq uỗt sơh sigỡuq sì vual vơla Yàc.\" ",
  "11": "Wãq wỡq làiq, \"Avih dơgrữq tãl aràc pơnõq hã la vual vơla lơniãu, iỡuq sơuỗt mơyòp Yàc; sì dơgrữq vual vơla iỡuq sơ-uỗt mơyòp Pitrai.\" ",
  "12": "E-sai kung đơp làiq, \"Akhã Je-se hũ ròq tơmuh tơgùq, la Pitao pa-bôh tơviãq tồq apãt akõq dơgrữq vual vơla lơniãu. Dơgrữq vual vơla lơniãu ròq chơkhãq chàc dơlãp Pitrai.\" ",
  "13": "Tũq nĩ, lakơu Yàc Pô Lơngĩq kaya chơkhãq chàc hũ ngãq ga pơnõq adơi sơai vãq srè kaya uỗt sơh sì dadu lơngai kơyua pơnõq adơi sơai pãc-tui Pitrai, tồq gơnang mưng gơnuar chơnuãq Yàc Vơngãq Sơđah hũ, kaya chơkhãq chàc ròq pơtãl dơlah dơlãi dơlãp pơnõq adơi sơai. ",
  "14": "Pathơu pơnõq adơi sơai, rùp phuỗt hlãq pãc làiq mĩn pơnõq adơi sơai kung vãq srè hatai lamuỡn siàp, vãq srè kaya jãc thơu, vloh thơu pơto pa-sơdor gỡuq. ",
  "15": "Nữn, hlãq kung pơtãl kaya chãc khĩn nữn wãq ga pơnõq adơi sơai hadùp pơnuaĩq, tồq akhàt pioh ga pơnõq adơi sơai sador, mưng kaya anĩt Yàc pô lơngĩq alĩn vrơi,",
  "16": "Kaya anĩt nữn duỡt ruãh hlãq ngãq mơnuĩh halỗt mơnãq Yàc Dõc Pơtlah Je-su hũ trôh sì dơgrữq vual vơla lơniãu, pioh ngãq gơnuar adãt padỡc duh vruãq pơnuaĩq siàp Yàc Pô Lơngĩq hũ. Hlãq iỡuq ngãq vruãq nĩ tồq ga vual vơla lơniãu tơviãq jỡc kaya adãt padỡc hũ tồq mãq, sì hũ Yàc Vơngãq Sơđah ngãq jỡc sơđah sơchih. ",
  "17": "Yơu nữn, dơlãp Yàc Dõc Pơtlah Je-su, hlãq hũ kanoh gơtha pioh yeh drơi mưng kaya duh vruãq Yàc Pô Lơngĩq drơi hũ. ",
  "18": "Kơyua hlãq ôh khĩn đơp mưng avih dơgrữq kaya tơmo lơniãu sì dơgrữq vruãq nữn Yàc Dõc Pơtlah Je-su song ngãq wil tãl tơpa hlãq, tồq va vual vơla lơniãu trôh kaya duh huaĩq. Dơgrữq vruãq nữn hũ ngãq tơviãq mưng pơnuaĩq đơp gãm sì vruãq ngãq, ",
  "19": "mưng kaya prãn khãc dơgrữq kaya nỡm krơi, kaya krơi tơmo, sì mưng gơnuar chơnuãq Vơngãq Sơđah Yàc Pô Lơngĩq hũ. Nữn la tồq hlãq pơlih ngãq wil tãl gơnuar pơđar ràc akhàt pơnuaĩq siàp Yàc Dõc Pơtlah hũ mưng palơi Je-ru-sa-lem sì dơgrữq phũm tòp-dar tãl trôh pãq palơi I-ly-ri. ",
  "20": "Yơu nữn, kaya chơkhãq khiãng hlãq hũ hlơu thrơi la pơto akhàt pơnuaĩq siàp, nữn ôh iỡuq dơlãp angãn Yàc Dõc Pơtlah song hũ hmỡq thơu, pioh ôh vỡq padỡc pãq dlòc ranỡq mơnuĩh tơmo hũ. ",
  "21": "Nữn yơu hũ pơnuaĩq wãq làiq: \"Mơnuĩh ôh-ka hmỡq pơnuaĩq siàp mưng Pitrai ròq bôh Pitrai, mơnuĩh ôh-ka hmỡq ròq pãc thơu.\" ",
  "22": "Kung kơyua yơu nữn, nữn lũ bãc hlãq kađòc mãq pakỡuq nao trôh rơwãc pơnõq adơi sơai. ",
  "23": "Nữn tũq nĩ hlãq ôh dòq anĩh halơi dơlãp dơgrữq phũm nĩ tơra, dơlãp tũq dơgrữq thũt nao gãt hlãq gãm chơkhãq khiãng ưng nao trôh rơwãc pơnõq adơi sơai. ",
  "24": "Viãq hlãq chơkhãq chàc ròq hũ pãp pơnõq adơi sơai pãq jơlàt nao Es-spa-in, sì hũ pơnõq adơi sơai dõc dơlãp jơlàt nao trôh đỡn, hadơi sì tũq rơngai hatai dòq sì pơnõq adơi sơai dơlãp sa asĩt tũq. ",
  "25": "Dòq tũq nĩ hlãq ròq nao pãq Je-ru-sa-lem tồq va dơgrữq kaya pioh dõc vruãq ga dơgrữq mơnuĩh pãc-tui Yàc. ",
  "26": "Kơyua mơnuĩh Ma-se-đoan sì mơnuĩh lơgar A-chai song siàp hatai iơu pơtom rìq jĩn pioh dõc pơnõq adơi sơai rơbah rơbờp di khrah dơgrữq mơnuĩh gơnuar pơđar sơđah pãq palơi Je-ru-sa-lem. ",
  "27": "Viãq, pơnõq nhũ hũ hatai sơh sơr ngãq vruãq nĩ kơyua pơnõq nhũ kung kađòc srẽ dơgrữq mơnuĩh nữn. Kơyua mơyah làiq vual vơla lơniãu hũ tồq mãq sigỡuq dơgrữq kaya anĩt gah suàt vơngãq, nữn pơnõq nhũ kung hũ  pioh rùp duh vruãq dơgrữq mơnuĩh dih mưng gah vơnah rài nĩ. ",
  "28": "Yơu nữn, dơlãp tũq hlãq ngãq wil tãl vruãq sì thơu gơnĩt pơnõq nhũ song tồq mãq hũ kaya alĩn pơgòp, tũq nữn hlãq ròq nao pãq Es-spa-in sì dơlãp jơlàt nao hlãq kung gãt rơwãc pơnõq adơi sơai. ",
  "29": "Hlãq thơu làiq dơlãp tũq hlãq trôh rơwãc pơnõq adơi sơai, hlãq ròq va tui kaya anĩt wil tãl Yàc Dõc Pơltah hũ. ",
  "30": "Pathơu pơnõq adơi sơai, kơyua mưng Yàc Dõc Pơtlah Je-su pơnõq drơi hũ, sì kơyua mưng kaya khiãng dumãn dơlãp Vơngãq Sơđah, hlãq lakơu pơnõq adơi sơai mơsôh sigỡuq sì hlãq mưng kaya iơu lakơu Yàc Pô Lơngĩq ga hlãq. ",
  "31": "Lakơu pơnõq adơi sơai iơu lakơu tồq ga hlãq hũ dõc suãq tlah mưng dơgrữq mơnuĩh ôh ngãq tui pãq phũm Ju-đe, kung yơu pioh ga gơnuar vruãq hlãq hũ pãq Je-ru-sa-lem ròq hũ dơgrữq mơnuĩh gơnuar pơđar sơđah tồq mãq. ",
  "32": "lakơu pơnõq adơi sơai iơu lakơu tồq kơyua mưng hatai ưng Yàc Pô Lơngĩq hũ, hlãq pơlih uỗt sơh trôh rơwãc pơnõq adơi sơai, sì hũ padơi dleh sigỡuq sì pơnõq adơi sơai. ",
  "33": "Lakơu Yàc Pô Lơngĩq dadu lơngai dòq sigỡuq sì avih dơgrữq pơnõq adơi sơai. A-men. "
}