raglay_2021_rgs_rlt_rom_book/rom/11.json

{
  "1": "Yơu nữn hlãq lakơu tơnĩa: Iỡuq lơĩq Yàc Pô Lơngĩq song pa-trơh luơi vual vơla Pitrai? Ôh tũq halơi hũ vruãq nữn. Kơyua hlãq kung la sa aràc mơnuĩh Is-ra-el, anàq tơcho A-bra-ham, pơweh sì apõc pơtiàt Ben-ja-min. ",
  "2": "Yàc Pô Lơngĩq ôh pa-trơh luơi vual-vơla Pitrai, la vual vơla Pitrai song thơu hlơu. Hẽla pơnõq adơi sơai ôh thơu pơnuaĩq Srãq Sơđah wãq hagĩq mưng E-li, dơlãp tũq ung yãq dlàiq vual-vơla Is-ra-el sì Yàc Pô Lơngĩq? ",
  "3": "\"Talơvãt Yàc, pơnõq nhũ song pamơtai dơgrữq mơnuĩh gơnuar hwơr Pitrai, dòq mĩn sa aràc anàq, nữn pơnõq nhũ ãn duah pơnẽq pioh pamơtai anàq.\" ",
  "4": "Nữn Yàc Pô Lơngĩq song hẽ pơnuaĩq ga ung wỡq yơu halơi? \"Kơu song pioh luơi ga Kơu tơjuh ravơu mơnuĩh lakơi ka-ôh aguãl tơ-ồq pãq anãq Ba-al.\"  ",
  "5": "Kung drưh yơu nữn, tũq nĩ kung dòq sa vơnah dòq wỡq hũ duỡt ruãh kơyua mưng kaya anĩt. ",
  "6": "Nữn mơyah làiq nữn la kơyua mưng kaya anĩt, nữn ôh iỡuq mưng vruãq tơra. Mơyah làiq ôh yơu nữn, kaya anĩt ròq ôh dòq la kaya anĩt. ",
  "7": "Yơu nữn la yơu hayơu? Kaya nữn vual-vơla Is-ra-el duah tui nữn pơnõq nhũ ôh hũ, nữn dơgrữq mơnuĩh hũ duỡt ruãh nữn song hũ tồq mãq, dơlãp tũq katĩh mơnuĩh dòq wỡq tơviãq jỡc khãc hatai. ",
  "8": "Iỡuq yơu pơnuaĩq song wãq, làiq, \"Yàc Pô Lơngĩq song vrơi ga pơnõq nhũ suàt vơngãq gơla pơtòq, mơta ôh bôh, tanĩa ôh hmỡq, tãl trôh harơi nĩ.\" ",
  "9": "Dòq Đa-vĩt nữn đơp, \"Lakơu ban pơnõq nhũ hũ tơviãq jỡc dãq sơnhuãl, vơrẽq, ngãq jỡc voh patơu sơnẽq tơkai, sì kaya yor đồq tơngãn pioh ga pơnõq nhũ. ",
  "10": "Lakơu mơta pơnõq nhũ kađòc  vùp sồp pioh ôh bôh, sì kơ-iãng atồq rõc pơnõq nhũ miẽt kađòc ka-kồc gãm.\" ",
  "11": "Yơu nữn, hlãq lakơu tơnĩa, \"Iỡuq lơĩq pơnõq nhũ sơnẽq tơkai tồq vloh lẽq lơvũh yơh?\" Ôh tũq hlaơi hũ vruãq nữn. Pa-vlữq wỡq yơu nữn, kơyua mưng kaya alah pơnõq nhũ hũ, kaya dõc pơ-tlah song trôh sì vual vơla lơniãu, pioh pasũl ga pơnõq nhũ mơvai lơmùq. ",
  "12": "Mơyah làiq kaya alah pơnõq nhũ hũ ngãq mơda gơnãp ga dun kơyua, sì mơyah làiq kaya lơduh lơhuãi pơnõq nhũ hũ ngãq mơda gơnãp ga vual vơla lơniãu, nữn vruãq pơnõq nhũ hũ vuh tơma tãl katih ròq siàp makrơ rlao ôh thơu hadùp tơra? ",
  "13": "Tũq nĩ, hlãq lakơu đơp sì pơnõq adơi sơai la mơnuĩh lơniãu. Hlãq iãq mơàc mơyàc mưng gơnuar vruãq drơi dơlãp tũq hũ ngãq mơnuĩh gơnuar pơđar ga vual vơla. ",
  "14": "Pơlih hlãq ròq ngãq ga vual vơla hlãq pa-magơi hatai. Sì hlãq kung ròq dõc tlah hũ tơkìq mơnuĩh dơlãp pơnõq nhũ. ",
  "15": "Kơyua mơyah làiq vruãq pơnõq nhũ kađòc kơmlah luơi ngãq ga dun kơyua hũ salơnuãq sigỡuq, nữn vruãq pơnõq nhũ hũ tồq mãq ròq yơu halơi mơyah làiq ôh iỡuq la kaya hadiuq wỡq mưng kaya mơtai? ",
  "16": "Mơyah làiq voh-chơtai akõq thũt la sơđah, nữn avih tơbồq hlỡq kung yơu nữn. Mơyah làiq akhã la sơđah, nữn dơgrữq thàt kung yơu nữn. ",
  "17": "Nữn mơyah làiq hũ tơkìq thàt kađòc gỡq luơi, mơyah làiq pơnõq adơi sơai, la thàt ô-liu dlài, hũ pơtlãp tơma dơlãp đỡn, sì mơyah làiq pơnõq adơi sơai hũ tồq mãq sigỡuq kaya hadiuq dơlãp akhã kayơu ô-liu hũ, ",
  "18": "nữn pơnõq adơi sơai juơi yeh drơi rlao sì dơgrữq thàt nữn. Dòq mơyah làiq pơnõq adơi sơai yeh drơi nữn iỡuq sơdor làiq ôh iỡuq pơnõq adơi sơai ròc akhã kayơu, nữn la akhã kayơu ròc pơnõq adơi sơai. ",
  "19": "Pơnõq adơi sơai vloh đơp, \"Dơgrữq thàt nữn song kađòc gỡq luơi, tồq ga hlãq hũ pơtlãp tơmã.\" ",
  "20": "Iỡuq yơu nữn! Pơnõq nhũ kađòc gỡq luơi kơyua hatai ôh pãc-tui, dòq pơnõq adơi sơai nữn dòq dỡc gơjãp gơnang mưng voh-tui. Juơi sanơng dlòng uãn mưng drơi, nữn iỡuq thơu huaĩq. ",
  "21": "Kơyua mơyah làiq Yàc Pô Lơngĩq song ôh dumãn dơgrữq thàt phuỗt nhũ dih, Pitrai kung ròq ôh dumãn pơnõq adơi sơai ôh. ",
  "22": "Miẽt iãq tơmã kaya ngãq lơmuỡn siàp gãm sì kaya ngãq gơmrữq Yàc Pô Lơngĩq hũ: Ngãq gơmrữq sì mơnuĩh lơvuh liẽq, nữn lamuỡn siàp sì pơnõq adơi sơai, mơyah làiq pơnõq adơi sơai miẽt dòq dơlãp kaya lamuỡn siàp Pitrai. Ôh yơu nữn, pơnõq adơi sơai kung ròq kađòc kõh tlàq. ",
  "23": "Dòq vơnah pơnõq nhũ, mơyah làiq pơnõq nhũ ôh ngãq patui dơlãp kaya ôh pãc, kung ròq hũ pơtlãp wỡq. Kơyua Yàc Pô Lơngĩq pơlih pơtlãp pơnõq nhũ wỡq. ",
  "24": "Mơyah làiq pơnõq adơi sơai song kađòc kõh mưng phuỗt nữn mưng phuỗt akhã nhũ la kayơu ô-liu dlài, sì hũ pơtlãp tơmã kayơu ô-liu siàp sa kaya ngãq ôh iỡuq yơu phuỗt akhã nhũ, nữn mơnuĩh miẽt gãm la dơgrữq thàt ôh mưng phuỗt akhã krơi nhũ dih, vloh đang mang hũ pơtlãp tơmã wỡq dơlãp phuỗt kayơu ô-liu pơnõq nhũ hũ thơu kor halơi? ",
  "25": "Pathơu pơnõq adơi sơai, hlãq ôh ưng adơi sơai ôh thơu mưng kaya dơlãp dađỡuq nĩ, pioh pơnõq adơi sơai ôh jãc rgơi tui yơu kaya sanơng krơi drơi hũ. Kaya dơlãp dađỡuq nữn la sa vơnah vual vơla Is-ra-el song khãc hatai, tãl trôh tũq katih vual vơla lơniãu va-vũh tơmã wil tãl. ",
  "26": "Yơu nữn avih vual vơla Is-ra-el  ròq hũ dõc pơtlah, yơu song wãq làiq: \"Pitao dõc suãq ròq trôh mưng Si-ôl. Pitrai ròq suãq prah kaya ôh pãc tlah mưng Ja-kôp, ",
  "27": "Sì nĩ ròq la kaya hẽ grưh Kơu sì pơnõq nhũ hũ, dơlãp tũq Kơu ròq suãq va dơgrữq dlàiq dơnũh pơnõq nhũ hũ.\" ",
  "28": "Pơweh mưng pơnuaĩq siàp, pơnõq nhũ la mơnuĩh jơdrãq kơyua mưng pơnõq adơi sơai. Nữn pơweh mưng kaya duỡt ruãh Yàc Pô Lơngĩq, nữn pơnõq nhũ hũ khiãng anĩt kơyua mưng dơgrữq ung kõq drơi. ",
  "29": "Kơyua dơgrữq kaya alĩn vrơi sì duỡt ruãh Yàc Pô Lơngĩq hũ ôh tũq halơi pa-sơdua. ",
  "30": "Kơyua yơu tũq halơu dih pơnõq adơi sơai song ôh ngãq tui Yàc Pô Lơngĩq, nữn nĩ vloh hũ anĩt dumãn kơyua mưng kaya ôh ngãq tui pơnõq nhũ hũ, ",
  "31": "nữn, dơgrữq mơnuĩh Ju-da nĩ tũq nĩ kung ôh ngãq tui. Kaya hajũc hlàq la tũq nĩ pơnõq nhũ kung pơlih hũ anĩt dumãn gơnang mưng kaya khiãng dumãn song ràc tơviãq ga pơnõq adơi sơai. ",
  "32": "Kơyua Yàc Pô Lơngĩq song krỡq dơgrữq mơnuĩh dơlãp kaya ôh ngãq tui, pioh Pitrai ràc tơviãq kaya khiãng-anĩt ga avih tãl aràc. ",
  "33": "Viãq, kaya jãc rgơi sì kaya pãc thơu Yàc Pô Lơngĩq hũ dơlãp dađỡuq, mơda gơnãp thơu hadùp! Kaya chahrơna Pitrai hũ ôh mơnuĩh halơi duah jỡc, jơlàt ơthua Pitrai ôh mơnuĩh halơi thơu jỡc! ",
  "34": "\"Kơyua mơnuĩh halơi lơĩq thơu kaya sanơng Yàc hũ? Hẽla mơnuĩh halơi lơĩq song vơyai vruãq ga Pitrai? ",
  "35": "Hẽla mơnuĩh halơi song padỡc hagĩq ga Yàc Pô Lơngĩq hlơu, pioh ga hũ Pitrai vơyiar wỡq?\" ",
  "36": "Kơyua avih dơgrữq kaya la mưng Pitrai, kơyua mưng Pitrai, sì pơweh mưng Pitrai. Lakơu Pitrai hũ gơhluh gãm gãm. A-men. "
}