raglay_2021_rgs_rlt_rom_book/rom/1.json

{
  "1": "Pol, halỗt mơnãq Yàc Je-su Pitao Dõc Pơ-Tlah, hũ duỡt ruãh ngãq jỡc mơnuĩh gơnuar pơđar prong, sì chẽq krơi pioh pơto akhàt pơnuaĩq siàp Yàc Pô Lơngĩq hũ. ",
  "2": "Nĩ la pơnuaĩq siàp nữn Pitrai song hẽ grưh mưng hlơu pơyua mưng dơgrữq mơnuĩh gơnuar hwơr Pitrai hũ dơlãp Sơrãq Sơđah, ",
  "3": "mưng Anàq Pitrai, mơnuĩh đeh tơviãq mưng pơjẽh pơtiàt Da-vit  hũ pơweh sì ga vơnah rlo rùp. ",
  "4": "Tui yơu Yàc Vơngãq sơđah sơchih, kơyua mưng kaya hadiuq wỡq mưng kaya mơtai, Pitrai hũ angãn la Anàq Yàc Pô Lơngĩq hũ gơnuar chơnuãq, nữn la Yàc Dõc Pơ-tlah Je-su, Yàc pơnõq drơi. ",
  "5": "Gơnang mưng Pitrai, pơnõq hlãq song tồq mãq kaya anĩt sì gơnuar pơto prong pioh pơto akhàt kaya pãc sãp mưng voh-tui tơviãq ga avih dơgrữq vual vơla, kơyua mưng angãn Pitrai. ",
  "6": "Dơlãp dơgrữq vual vơla nĩ, adơi sơai kung song hũ duỡt ruãh pioh pơweh ga Yàc Dõc Pơ-tlah Je-su. ",
  "7": "Srãq wãq nĩ pơyua trôh avih dơgrữq pơnõq adơi sơai dòq pãq palơi Rô-ma, dơgrữq mơnuĩh khiãng duman Yàc Pô Lơngĩq hũ, hũ duỡt ruãh ngãq jỡc vual vơla sơđah. Lakơu pơnõq adơi sơai hũ kaya anĩt sì kaya dadu lơngai mưng Yàc Pô Lơngĩq, Ama pơnõq drơi, sì mưng Yàc Dõc Pơ-tlah Je-su. ",
  "8": "Hlơu avih, kơyua mưng Yàc Dõc Pơ-tlah Je-su, hlãq ỡn ngai Yàc Pô Lơngĩq hlãq mưng avih dơgrữq pơnõq adơi sơai, kơyua voh-tui pơnõq adơi sơai song tiẽng dơnai vãq avih dun-kơyua. ",
  "9": "Kơyua Yàc Pô Lơngĩq, la Pitao sì hlãq song mãq vơngãq hatai duh vruãq mưng vruãq akhàt vrơi pathơu pơnuaĩq siàp Anàq Pitrai hũ, ngãq chưng ga hlãq làiq hlãq gãm pa-sơdor trôh pơnõq adơi sơai. ",
  "10": "Dơlãp pơnuaĩq iơu lakơu hlãq gãm lakơu aneh athar sì Pitrai, tui hatai ưng Pitrai, mơyah làiq pơlih hũ tũq halơi nữn vrơi ga hlãq nao trôh rơwãc adơi sơai. ",
  "11": "Kơyua hlãq chơkhãq chàc ưng pãp adơi sơai, pioh pa-mơpha ga adơi sơai kaya vrơi soh gah vơngãq, tồq ga adơi sơai hũ gơjãp-kađỡc. ",
  "12": "Nữn la, hlãq khiãng hũ paluơ padờp sigỡuq pãq khrah adơi sơai, mưng kaya voh-tui sigỡuq, nữn la adơi sơai sigỡuq sì hlãq mĩn. ",
  "13": "Ơ adơi sơai, hlãq ôh ưng adơi sơai ôh thơu hagĩq mưng hatai ngãq gơnĩt  halơu thrơi hlãq hũ la nao rơwãc adơi sơai, ( nữn trôh tũq nĩ hlãq gãm dòq pãp kaya mãq pakỡuq), pioh yuãq hajũc hlàq dơlãp pơnõq adơi sơai, kung yơu hlãq song ngãq dơlãp khrãh dơgrữq vual-vơla lơniãu tơmo. ",
  "14": "Hlãq tơwãq srẽ sì dơgrữq mơnuĩh Grec gãm sì dơgrữq vual-vơla ôh iỡuq la mơnuĩh Grec, sì mơnuĩh jãc rgơi gãm sì dơgrữq mơnuĩh gơla pơtòq. ",
  "15": "Kơyua yơu nữn, pơweh sì hlãq, hlãq hũ hatai rơchãc lơĩh pioh akhàt vrơi pathơu pơnuaĩq siàp ga pơnõq adơi sơai pãq plơi Rô-ma. ",
  "16": "Kơyua hlãq ôh malơu ala mưng pơnuaĩq siàp, kơyua nữn la kaya gơnuar chơnuãq Yàc Pô Lơngĩq hũ pioh dõc pơtlah dơgrữq mơnuĩh pãc tui, hlơu la mơnuĩh Ju-đa, hadơi la mơnuĩh Grec. ",
  "17": "Kơyua dơlãp pơnuaĩq siàp nữn hũ akhàt pa-tơviãq kaya tơpãq dãng Yàc Pô Lơngĩq hũ, mưng voh-tui trôh voh-tui, yơu hũ wãq, \"Mơnuĩh tơpãq dãng ròq hadiuq mưng voh-tui.\" ",
  "18": "Kơyua kaya ơnõc mơvai prong Yàc Pô Lơngĩq hũ mưng dlòc lơngĩq hũ akhàt pa-tơviãq pơweh sì avih dơgrữq kaya ôh duh huaĩq sì dơgrữq kaya ôh tơpãq dãng anàq mơnuĩh hũ, dơgrữq mơnuĩh angui kaya ôh tơpãq dãng pioh mãq pakỡuq pơnuaĩq tơpãq. ",
  "19": "Nữn la kơyua kaya hagĩq rgơi thơu mưng Yàc Pô Lơngĩq nữn song akhàt tơviãq pãq-anãq pơnõq nhũ, kơyua Yàc Pô Lơngĩq song ràc-tơviãq ga pơnõq nhũ.  ",
  "20": "Kơyua dơgrữq kaya Pitrai hũ drơi ôh bôh jỡc, nữn la gơnuar chơnuãq gãm gãm sì vơngãq hatai Pitrai, nữn mưng tũq chrơng pajỡc lơngĩq tơnãh song bôh nĩq-nũn, thơu kơnãl jỡc  mưng dơgrữq kaya song hũ chrơng pajỡc. Yơu nữn pơnõq nhũ ôh hũ kaya kơnoh gơtha dõc jơga. ",
  "21": "Nữn la kơyua bôh-làiq pơnõq nhũ thơu mưng Yàc Pô Lơngĩq, nữn pơnõq nhũ ôh ưng sơ-uỗt mơyòp Pitrai la Yàc Pô Lơngĩq, kung ôh ưng ỡn ngai Pitrai. Pa-vlỡq wỡq, pơnõq nhũ vloh tơviãq jỡc gơla pơtòq dơlãp kaya sơnơng drơi, dòq hatai kruãq hanruơi pơnõq nhũ hũ tơviãq jỡc sồp kơnãm. ",
  "22": "Pơnõq nhũ angãn krơi ga drơi la jãc rgơi, nữn vloh tơviãq jỡc gơla pơtòq. ",
  "23": "Pơnõq nhũ pa-sơdua kaya gơhluh Yàc Pô Lơngĩq hũ ôh tũq halơi vrũq lơmuĩq pioh duh talơvãt rùp ràc pơjẽh anàq mơnuĩh hũ gãm vrũq lơmuĩq, kung yơu dơgrữq anàq chĩp, anàq sỡq, sì pơjẽh anàq sỡq ruơi. ",
  "24": "Kơyua yơu nữn, Yàc Pô Lơngĩq pơjao pơnõq nhũ ga dơgrữq kaya tasỡuq nrãc tui hatai pơnõq nhũ hũ, pioh rùp phàp pơnõq nhũ kađòc mơlơu ơlah dơlãp khrah rùp phuỗt pơnõq nhũ hũ. ",
  "25": "Mĩn pơnõq nhũ la dơgrữq mơnuĩh pa-sơdua pơnuaĩq tơpãq Yàc Pô Lơngĩq tơviãq jỡc vlữq lor, kakôh talơvãt sì duh vruãq dơgrữq kaya song chrơng pajỡc ala ga Pitao Chrơng Pajỡc, la Pitao hũ sơ-uỗt mơyòp dòq gãm gãm. A-men. ",
  "26": "Kơyua yơu nữn, Yàc Pô Lơngĩq song tlàq luơi pơnõq nhũ ga dơgrữq kaya ham khiãng mơlơu alah; sì avih dơgrữq mơnuĩh kamơi kung pa-sơdua kaya rơđãp đih dòq tơpãq tơviãq jỡc jơdrãq wỡq sì kaya rơđãp đih dòq ôh tơpãq. ",
  "27": "Sì kung yơu nữn, mơnuĩh lakơi tlàq luơi kaya rơđãp đih dòq tơpãq sì mơnuĩh kamơi sì đih dòq sigỡuq tui hatai ham khiãng krơi. Pơnõq nhũ la dơgrữq mơnuĩh lakơi ngãq kaya tasỡuq vrỡuq sigỡuq sì mơnuĩh lakơi, sì va-tơvuh mãq kaya ngãq dlàiq đang mang sì vruãq ngãq sỗq suãl drơi hũ. ",
  "28": "Kơyua mưng pơnõq nhũ ôh ưng kơnãl thơu Yàc Pô Lơngĩq, yơu nữn Yàc Pô Lơngĩq song tlàq luơi pơnõq nhũ ga kaya sơnơng sỗq suãl, pioh pơnõq nhũ ngãq dơgrữq kaya ôh kuơ hagĩq. ",
  "29": "Pơnõq nhũ pioh rơmiãq dơgrữq kaya ôh tơpãq dãng, mơsãc-mơjia, ham guãm, mãq-mãl, pơnõq nhũ vãq kaya buah mơvai, mơnuĩh pa-mơtai mơnuĩh, mơvlah kơchah, vlữq lor, sì hatai iãh. Pơnõq nhũ rơđãp đơp puaĩq vlơi,",
  "30": "rơđãp đơp pơdah soh, lơmùq mơvai Yàc Pô Lơngĩq, pơ-chrìq, pơchrìq rùp, yeh drơi, jãc ngãq pơnuaĩq mơsãc; sì ôh pãc sãp ami ama. ",
  "31": "Pơnõq nhũ gơla pơtòq, ôh ngãq tui pơnuaĩq hẽ sigỡuq, ôh hũ hatai khiãng-anĩt, sì ôh hũ hatai anĩt anar. ",
  "32": "Bôh-làiq pơnõq nhũ thơu pãc voh-va tơpãq dãng Yàc Pô Lơngĩq hũ ngãq gơnĩt dơgrữq mơnuĩh sỗq dlàiq dơgrữq vruãq yơu nữn la iỡuq mơtai, nữn pơnõq nhũ ôh iỡuq mĩn ngãq sỗq dơgrữq kaya nữn, nữn kung ngãq ga mơnuĩh tơmo sỗq sigỡuq sì drơi. "
}