raglay_2021_rgs_rlt_rev_book/rev/14.json

{
  "1": "Nữn hlãq iãq bôh wơq Avo anàq dỡc pãq dlòc chỡq Si-ôn, sigơuq sì Pitrai hũ sarơtôh pàq plôh pàq rơvơu aràc mơnuĩh hũ wãq angãn Pitrai sì angãn Ama Pitrai pãq thơi pơnõq nhũ. ",
  "2": "Hlãq hmỡq mưng dlòc lơngĩq sa pơnuaĩq mơnhĩ yơu mơnhĩ lu chroh dơnai, yơu grim katãl prõc; pơnuaĩq hlãq hmỡq nữn nhũ ngãq yơu sãp kanhi mơnuĩh dòq pẽq. ",
  "3": "Sì pơnõq nhũ adoh sa kaya adoh vơhrơu di anãq sơvan, sì pãq anãq pàq anàq asỡq sì dơgrữq mơnuĩh pô taha. Ôh hũ mơnuĩh halơi rgơi mơgru kaya adoh nữn, mĩn sarơtôh pàq plôh pàq rơvơu aràc mơnuĩh thơu soh, nữn la mơnuĩh song hũ dõc pơtlah mưng dun-kayua. ",
  "4": "Dơgrữq mơnuĩh nữn ka-ôh hũ tơsơuq vrơuq mưng mơnuĩh kamơi, mưng pơnõq nhũ gãm dòq soh, Avo anàq nao pãq halơi nữn pơnõq nhũ nao tui pãq đỡn. Pơnõq nhũ song hũ dõc pơtlah mưng pãq khrãh pơjẽh anàq mơnuĩh, tồq tơviãq jơc dơgrữq voh akõq thôt ga Yàc Pô Lơngĩq sì ga Avo anàq. ",
  "5": "Dơlãp chơboai pơnõq nhũ ôh hũ sa kaya vlữq lor halơi, mưng pơnõq nhũ ôh hũ nữm tơsơuq halơi.",
  "6": "Suet hlãq bôh sa aràc mơnuĩh gơnrơh tơmo por pãq khrãh lơngĩq, hũ pơnuaĩq siàp dòq gãm gãm pioh pơto akhàt ga dơgrữq mơnuĩh dòq pãq hlồq, nữn la avih dơgrữq lơgar, pơjẽh pơtiàt, dơgrữq pơnuaĩq đơp sì dơgrữq vual-vơla. ",
  "7": "Nhũ priao sãp prõc laìq: Duh huaĩq vẽq di Yàc Pô Lơngĩq sì sơuôt mơyòp Pitrai, mưng tũq charnã Pitrai song trôh vloh, kakôh tơlơvàt vẽq Pitao song chrơng pơjơc lơngĩq, tơnãh, ia tơsìq sì chroh ia.",
  "8": "Hũ sa aràc mơnuĩh gơnrơh tơmo tra, la mơnuĩh gơnrơh bãc dua, nao tui sì đơp laìq: Ba-bi-lôn dih song tarlah vloh, tarlah vloh, nhũ song ngãq ga avih dơgrữq vual-vơla mơnhũm alãc dri-drõc nhũ hũ.",
  "9": "Hũ sa aràc mơnuĩh gơnrơh tơmo tra mĩn, la mơnuĩh gơnrơh bãc tlơu, nao tui sì đơp prõc laìq: Mơyah-laìq mơnuĩh halơi kakôh tơlơvàt anàq asỡq pàq tơkai sì vơngãq rồp nhũ, sì tồq nữm di thơi hela di plàq tơngãn,",
  "10": "Nữn mơnuĩh nữn kung yơu nữn, ròq mơnhũm alãc kaya mvai prõc ôh sơrlơuq Yàc Pô Lơngĩq tuh dơlãp choàt kaya mvai prõc Pitrai; sì ròq ãt kaya pơđìq pađua dơlãp apôi sì kadier dòq pãq anãq dơgrữq mơnuĩh gơnrơh sơđah sơchih sì pãq anãq Avo anàq. ",
  "11": "Asãq kaya pơđìq pađua pơnõq nhũ, por tơgùq gãm gãm ôh luôiq, dơgrữq mơnuĩh kakôh tơlơvàt anàq asỡq pàq bẽq tơkai sì vơngãq rồp nhũ, sì dơgrữq mơnuĩh tồq mãq nữm angãn nhũ, nữn harơi mơlãp ôh tũq halơi pơnõq nhũ hũ padơi. ",
  "12": "Kơyua mưng nữn dơgrữq mơnuĩh sơđah iơuq hũ ãt-ơn, la dơgrữq mơnuĩh rơmiãq jàc dơgrữq kaya pơđar Yàc Pô Lơngĩq sì hatai pãc tui di Yàc Je-su. ",
  "13": "Hlãq hmỡq mưng dlòc lơngĩq hũ pơnuaĩq đơp laìq: Wãq vẽq pơnuaĩq nĩ, Mưng nĩ tãl vơgi kadĩh lơngai ga dơgrữq mơnuĩh mơtai dơlãp Yàc! Yàc Vơngãq đơp: Viãq yơu nữn, mưng pơnõq nhũ hũ padơi mưng dơgrữq vruãq dleh dlàr pơnõq nhũ, mưng dơgrữq vruãq pơnõq nhũ hũ tui sigơuq sì pơnõq nhũ.",
  "14": "Hadơi nữn, hlãq iãq bôh, hũ sa hual kòq, pãq dlòc hual nữn hũ sa Pitao dòq guh drơh yơu anàq mơnuĩh, akõq truãq chrơng pitao ngãq sì mữh, tơngãn apãt wãc hluơq. ",
  "15": "Hũ sa aràc mơnuĩh gơnrơh tơmo tơviãq mưng sàc tơlơvàt, iơu priao prõc sì Pitao dòq guh pãq dlòc hual laìq: Mãq vẽq wãc Pitrai sì yuãq, mưng tũq yuãq song iơuq vloh, sì vlàt yuãq pãq hlồq song tasãq avih vloh. ",
  "16": "Pitao dòq guh pãq dlòc hual prah wãc drơi trôt pãq hlồq, sì pãq hlồq nhũ ãt yuãq. ",
  "17": "Hũ sa aràc mơnuĩh gơnrơh tơmo tơviãq mưng sàc tơlơvàt pãq dlòc lơngĩq, sì nhũ kung apãt sa voh wãc hluơq. ",
  "18": "Hũ sa aràc mơnuĩh gơnrơh tơmo tra tơviãq mưng ban tơlơvàt, la mơnuĩh hũ ganuar pãq dlòc apôi, mãq pơnuaĩq iơu prõc mơnuĩh gơnrơh apãt wãc hluơq laìq: Mãq vẽq wãc hluơq hã sì koh dơgrữq tarkũm voh nho pãq hlồq, mưng dơgrữq voh nho song tasãq vloh. ",
  "19": "Yơu nữn, mơnuĩh gơnrơh prah wãc drơi trôt hlồq sì koh voh nho pãq hlồq, sì prah tơmã lơsũc prõc kaya mvai prõc Yàc Pô Lơngĩq. ",
  "20": "Mơnuĩh juãq voh nho dơlãp avũq iãng alãc nữn pãq gah lơniao pơlơi prong, nữn hũ dơrah hõq tơviãq mưng avũq, dơrah nữn đìq tơgùq trôh mvah aseh, atah pơgãp dua ratôh pãn plôh lơmã ka-sồq.f</sup>"
}