raglay_2021_rgs_rlt_rev_book/rev/21.json

{
  "1": "Patui nữn, hlãq bôh lơngĩq vơhrơu sì tơnãh vơhrơu, kơyua lơngĩq chơmrờp sì tơnãh chơmrờp song lơhiãq vloh, ia tơsìq kung ôh dòq tơra. ",
  "2": "Vloh hlãq bôh palơi prong sơđah sơchih nữn la Je-ru-sa-lem vơhrơu, mưng Yàc Pô Lơngĩq dlòc lơngĩq trỗt, rơchãc-pơkhra lơĩh yơu sa aràc mơnuĩh sơdiuq vơhrơu pơkhra rùp pioh tồq ròq vơsàc drơi. ",
  "3": "Hlãq hmỡq sa sãp đơp prong mưng sơvan tơviãq, làiq, \"Dih! Anĩh dòq Yàc Pô Lơngĩq hũ dòq sigỡuq sì anàq mơnuĩh, sì Pitrai ròq hadiuq sì pơnõq nhũ. Pơnõq nhũ ròq ngãq vual vơla Pitrai, sì rùp phuỗt Yàc Pô Lơngĩq ròq dòq sì pơnõq nhũ. ",
  "4": "Pitrai ròq uãq avih ia mơta dơlãp mơta pơnõq nhũ, sì ròq ôh dòq kaya mơtai, ka-ồq ka-yãp, sia chõq, hẽla pơđìq pơđua. Kaya nữn ôh dòq tơra kơyua dơgrữq vruãq halơu thrơi song lơhiãq vloh. ",
  "5": "Vloh Pitao dòq guh pãq dlòc sơvan đơp, \"Dih! Kơu song ngãq vơhrơu avih dơgrữq kaya.\" Pitrai kung đơp sì hlãq, \"Anàq iỡuq wãq wỡq kơyua dơgrữq pơnuaĩq nĩ kung đang mang chàc gơnang sì tơpãq viãq.\"  ",
  "6": "Pitrai kung đơp sì hlãq, \"Dơgrữq vruãq nữn wil tãl vloh! Kơu la AL-PHA sì Ô-ME-GA, la pơdòq chơmrờp sì luỗiq hadơi. Mơnuĩh halơi mơhao ia, Kơu ròq vrơi mơnhũm soh mưng chroh ia kaya hadiuq. ",
  "7": "Mơnuĩh halơi hũ pha rlao ròq hũ tồq dơgrữq kaya nĩ, sì Kơu ròq ngãq Yàc Pô Lơngĩq pơnõq nhũ hũ, dòq pơnõq nhũ ròq ngãq anàq lakơi kơu.  ",
  "8": "Nữn dòq vơnah ga dơgrữq mơnuĩh ôh chãc khĩn, mơnuĩh ôh tui tơpãq, mơnuĩh kier amier, mơnuĩh pa-mơtai mơnuĩh, mơnuĩh drì drõc, mơnuĩh ngãq kaya juh proh, mơnuĩh duh talơvãt rùp rãp, sigỡuq sì dơgrữq mơnuĩh vlữq lor, nữn anĩh dòq tơpuôl nhũ hũ ròq la dơlãp lơvàc apôi chôh bõc gãm sì ka dier. Nữn la kaya mơtai bãc dua.\" ",
  "9": "Hũ sa aràc dơlãp tơjuh aràc mơnuĩh gơnrơh hũ chơwàt vuh vãq jơjuh kaya rũc rài luỗiq hadơi trôh đơp sì hlãq, làiq, \"Iỡuq trôh pãq đì, hlãq ròq vrơi ga sơai bôh kamơi sơdiuq, nữn la sơdiuq Avo Anàq hũ.\" ",
  "10": "Vloh nhũ va hlãq nao dơlãp Vơngãq Sơđah trôh sa voh chỡq prong sì dloòng, sì pơto ga hlãq palơi prong Je-ru-sa-lem mưng Yàc Pô Lơngĩq dòq pãq dlòc lơngĩq trỗt. ",
  "11": "Palơi prong hũ kaya gơhluh Yàc Pô Lơngĩq, sì kaya siàp mơkrờ palơi prong nữn drưh yơu gar patơu màc, yơu patơu kràc sơdah ngãq yơu chai kràc. ",
  "12": "Palơi nữn hũ jơnãng palơi prong sì dloòng, gãm sì sa plôh dua sơvòq bãc sì hũ sa plôh dua aràc mơnuĩh gơnrơh dòq pãq dơgrữq sơvòq bãc. Dơgrữq angãn hũ wãq pãq dlòc sơvòq bãc, nữn la angãn sa plôh dua apõc pơtiàt anàq tơcho Is-ra-el. ",
  "13": "Gah ia harơi tơgùq hũ tlơu voh sơvòq bãc, gah prìq hũ tlơu voh sơvòq bãc, gah prang hũ tlơu voh sơvòq bãc, gah ia harơi tơma hũ tlơu voh sơvòq bãc. ",
  "14": "Dòq jơnãng palơi nữn hũ sa plôh dua voh rơnỡq, sì pãq dlòc nữn hũ wãq angãn sa plôh dua aràc mơnuĩh gơnuar pơđar prong Avo Anàq. ",
  "15": "Mơnuĩh gơnrơh đơp sì hlãq tơngãn apãt sa voh gai sơnua dũq ngãq mưng mữh pioh dũq palơi prong, dơgrữq sơvòq bãc palơi sì jơnãng palơi. ",
  "16": "Palơi hũ ngãq padỡc pàq gah rĩng gỡuq; gah ơtah palơi prong rĩng gah lơnang. Mơnuĩh gơnrơh angui gai sơnua dũq nữn dũq palơi nữn hũ sa-plôh dua rơvơu Et-ta-đơ dơgrưh gah ( gah ơtah, gah lơnang sì gah dloòng rĩng gỡuq). ",
  "17": "Mơnuĩh gơnrơh kung dũq jơnãng palơi, jơnãng kơpar sarơtôh pàq plôh pàq ku-đe tui yơu sơnua dũq anàq mơnuĩh hũ ( kung la sơnua dũq mơnuĩh gơnrơh hũ.) ",
  "18": "Jơnãng palơi hũ vữq padỡc mưng patơu kràc sơdah, dòq palơi prong nữn mưng mữh viãq, drưh yơu krơh chai sơdah. ",
  "19": "Dơgrữq rơnỡq jơnãng palơi prong nữn hũ pơkhra mưng dơgrữq patơu-màc. Rơnỡq chơmrờp ngãq mưng patơu kràc sơdah, rơnỡq bãc dua ngãq mưng patơu- màc lơngãt, rơnỡq bãc tlơu la patơu màc phôr, rơnỡq bãc pàq la patơu màc langơu hlàq kayơu, ",
  "20": "Rơnỡq lơmã ngãq mưng pơtơu akẽq mơriãq, rơnỡq nãm ngãq mưng pơtơu-mang mưriãq, rơnỡq tơjuh ngãq mưng pơtơu đèc chràq, rơnỡq pãn ngãq mưng pơtơu tali ia, rơnỡq salapãn ngãq mưng pơtơu akẽq agur, rơnỡq sa plôh ngãq mưng pơtơu tali kachràq, rơnỡq sa plôh sa ngãq mưng pơtơu-mang gur tali, rơnỡq sa plôh dua ngãq mưng pơtơu-mang gur. ",
  "21": "Sa plôh dua voh bãc prõc la sa plôh dua voh pơtơu akràc màc, tãl voh bãc la sa voh pơtơu akràc màc. Jalàt pơlơi prõc ngãq sì mữh soh, sơđah yơu krơh. ",
  "22": "Dơlãp pơlơi nữn hlãq ôh bôh sàc tơlơvàt halơi; mưng Yàc la Yàc Pô Lơngĩq ganuar-chơnuãq sì Avo anàq la sàc tơlơvàt pơlơi prõc nữn. ",
  "23": "Pơlơi prõc nữn ôh chàc ia harơi sì ia vlàt pioh pasàc sơđah, mưng kaya gahluh Yàc Pô Lơngĩq sơđah kachràq, sì Avo anàq la kaya sơđah pơlơi prõc hũ. ",
  "24": "Dơgrữq vual-vơla ròq nao pãq khrãh kaya sơđah pơlơi nữn sì dơgrữq pitao pãq hlồq ròq va kaya gahluh pơnõq nhũ tơmã pãq nữn. ",
  "25": "Dơgrữq voh bãc prõc pơlơi nữn ôh hũ tũq halơi krỡq dơlãp tũq harơi, sì pãq đỡn ôh hũ mơlãp. ",
  "26": "Kaya gahluh sì kaya mơang-mơyàc dơgrữq vual-vơla ròq hũ va patơmã pãq đỡn.",
  "27": "Ôh kaya srôh-srah halơi, ôh bôh mơnuĩh tơsơuq sì mơnuĩh đơp lor nữn ôh jơc tơmã pơlơi prõc nữn; Yơu nữn hũ mĩn dơgrữq mơnuĩh song hũ wãq angãn dơlãp sơrãq kaya hadiuq Avo anàq."
}