raglay_2021_rgs_rlt_rev_book/rev/6.json

{
  "1": "Suet hlãq bôh Avo anàq suãq nữm bãc sa dơlãp tơjuh voh nữm, nữn hlãq hmỡq sa anàq asỡq dơlãp pàq anàq asỡq đơp sãp prõc yơu katãl tãq laìq; Trôh vẽq! ",
  "2": "Sì hlãq iãq, bôh sa drơi aseh kòq sì mơnuĩh đìq aseh apãt sa voh sraoq; Sì mơnuĩh vrơi ga nhũ sa voh chrơng pitao sì nhũ tơviãq nao hũ pha rlao, pioh pha rlao gãm.",
  "3": "Dơlãp tũq Avo anàq suãq nữm bãc dua, hlãq hmỡq anàq asỡq bãc dua đơp laìq Trôh vẽq! ",
  "4": "Nữn bôh sa drơi aseh tơmo tơviãq, rồp nhũ mơriãq, mơnuĩh đìq aseh hũ ganuar suãq kaya dadu lơngai mưng voh hlồq, pioh dơgrữq mơnuĩh pamơtai sigơuq; sì song vrơi ga nhũ sa voh đao prõc.",
  "5": "Dơlãp tũq Avo anàq suãq nữm bãc tlơu, hlãq hmỡq anàq asỡq bãc tlơu đơp laìq: Trôh vẽq! Sì hlãq bôh, dih, sa drơi aseh jùq sì mơnuĩh đìq aseh apãt sa voh wàl sơkãq. ",
  "6": "Hlãq hmỡq pãq khrãh pàq anàq asỡq yơu hũ pơnuaĩq đơp laìq: Sa sơkãq pơdai mi pavlơi sa đơ-ni-e, tlơu sơkãq pơdai mi pavlơi sa đơ-ni-e, dòq mơnhàq sì alãc juơi rơwơq trôh. ",
  "7": "Dơlãp tũq Avo anàq suãq nữm bãc pàq, hlãq hmỡq anàq asỡq bãc pàq đơp laìq; Trôh vẽq! ",
  "8": "Sì hlãq bôh sa drơi aseh kanhìq tơviãq, mơnuĩh đìq aseh nữn angãn la kaya mơtai, sì lơgar tơnãh ala tui mưng hadơi nhũ, song vrơi ga pơnõq nhũ ganuar pamơtai sa vơnah pàq dơlãp voh hlồq, pamơtai sì đao, sì kaya ờq lơpa rũc-rai, sì kaya ruãq sơkìq sì dơgrữq anàq asỡq dlai mơsãc-mơja dơlãp voh hlồq.",
  "9": "Dơlãp tũq Avo anàq suãq nữm bãc lơmã, hlãq bôh pãq anĩh ban tơlơvàt hũ dơgrữq suàt vơngãq dơgrữq mơnuĩh song ãt pamơtai kơyua mưng pơnuaĩq Yàc Pô Lơngĩq sì kơyua mưng pơnuaĩq ngãq chưng pơnõq nhũ song đơp. ",
  "10": "Pơnõq nhũ priao sa sãp prõc laìq: Tơlơvàt Pitao phuôt la Pitao apãt akõq sơđah sơchih sì tơpãq viãq, tãl trôh di tũq halơi Pitrai ròq charnã sì sal tơngãn mưng dơrah pơnõq hlãq, di dơgrữq mơnuĩh dòq pãq voh hlồq lơiq? ",
  "11": "Song vrơi ga tãl aràc pơnõq nhũ sa vlah ao atah kòq, sì hũ sa pơnuaĩq đơp sì pơnõq nhũ laìq iơuq dòq padơi sa asit suơi tra, tãl trôh di tũq halơi hũ tãl katih dơgrữq mơnuĩh mơyơu duh vruãq sigơuq sì pơnõq nhũ sì dơgrữq adơi sơai pơnõq nhũ hũ, la dơgrữq mơnuĩh iơuq ãt pamơtai yơu pơnõq nhũ mĩn. ",
  "12": "Dơlãp tũq Avo anàq suãq nữm bãc nãm, nữn hlãq iãq bôh, dih, bôh sa kaya sơđồq tơnãh prõc tơviãq, ia harơi tơviãq jơc jùq yơu vai vơlơu jùq, sì ia vlàt tơviãq jơc dơrah, ",
  "13": "Dơgrữq pitỗq pãq dlòc lơngĩq jruh trôt dơlãp voh hlồq, yơu dơgrữq voh ka-ôh tasãq kơyơu bãl nhũ jruh avih dơlãp tũq hũ angĩn rơvùq vluh khãc sơđồq sơđuơn. ",
  "14": "Lơngĩq nhũ ròq vơpòq wơq yơu vlah sơrãq-pơpòq sì lơhiãq thit, avih dơgrữq chỡq sì vlao kađòc va pơđuaĩq mưng pãq anĩh nhũ. ",
  "15": "Yơu nữn, dơgrữq pitao pãq voh hlồq, dơgrữq mơnuĩh prõc màc, dơgrữq mơnuĩh pô apãt akõq tơpuôl ling, dơgrữq mơnuĩh mơda-ganãp, dơgrữq mơnuĩh pran khãc, sì avih dơgrữq mơnuĩh halôt mơnãq, dơgrữq mơnuĩh lơnang-lơnai, pơnõq nhũ pơdơuq rồp nhũ tơmã lơvàc pơtơu sì pãq khrãh dơgrữq voh pơtơu pãq dlòc chỡq. ",
  "16": "Sì dơgrữq pơnõq nhũ iơu dơgrữq chỡq sì dơgrữq voh pơtơu sì đơp laìq: Hõq vẽq pãq dlòc pơnõq hlãq pioh pơdơuq pơđơuq pơnõq hlãq tlah di mơta Pitao dòq guh pãq sơvan, sì tlah mưng di kaya mvai prõc Avo anàq hũ! ",
  "17": "Mưng harơi kaya mvai prõc Pitrai hũ song trôh vloh, mơnuĩh halơi rgơi ãt jơc harơi nữn lơiq?"
}