raglay_2021_rgs_rlt_rev_book/rev/3.json

{
  "1": "Wãq vẽq ga mơnuĩh gơnrơh sàc pơjũm sơđah Sar-dơ laìq; Nĩ, la dơgrữq pơnuaĩq đơp Pitao hũ tơjuh vơngãq Yàc Pô Lơngĩq sì tơjuh voh pitỗq; Kơu thơu dơgrữq vruãq ngãq hã. Hã hũ angãn la hadiuq yơu nữn laìq la mơtai. ",
  "2": "Mơ oah mơdơh vẽq, sì ngãq gơjãp-gơnĩt dơgrữq kaya dòq hũ la dơgrữq kaya jẽq mơtai; mưng kơu ôh bôh dơgrữq vruãq hã la wil tãl, pãq anãq Yàc Pô Lơngĩq kơu hũ. ",
  "3": "Yơu nữn, sơdơr wơq vẽq dơgrữq pơnuaĩq hã song tồq mãq sì song hmỡq, chròq rơmiãq vẽq dơgrữq pơnuaĩq nữn, sì mvai tlàq dlaìq vẽq. Mơyah-laìq hã ôh mơ oah mơdơh, kơu ròq trôh yơu mơnuĩh tlẽq, sì hã ôh thơu tũq halơi kơu ròq nao trôh pãq hã. ",
  "4": "Yơu nữn dơlãp Sar-dơ hã dòq hũ sa asit mơnuĩh ka-ôh ngãq tơsơuq ao lơniao drơi; Dơgrữq mơnuĩh nữn ròq chồq ao kòq sì nao sigơuq sì kơu, mưng pơnõq nhũ la iơuq viãq yơu nữn. ",
  "5": "Mơnuĩh halơi hũ pha rlao nữn ròq chồq ao kòq yơu nữn mĩn, kơu ôh sơpỡq angãn nhũ mưng dơlãp sơrãq kaya hadiuq, sì kơu ròq akhàt tơviãq angãn nhũ pãq anãq Ama kơu sì pãq anãq mơnuĩh gơnrơh Pitrai mĩn. ",
  "6": "Mơnuĩh halơi hũ taniã, hmỡq vẽq pơnuaĩq Yàc Vơngãq đơp sì dơgrữq sàc Pơjũm Sơđah.",
  "7": "Wãq vẽq ga mơnuĩh gơnrơh sàc pơjũm sơđah Phi-la-del-phi laìq: Nĩ la dơgrữq pơnuaĩq đơp Pitao sơđah sơchih hũ, Pitao tơpãq viãq, la Pitao hũ anàq tlir Da-vit, la Pitao pơh nữn ôh mơnuĩh halơi rgơi krỡq, krỡq nữn ôh mơnuĩh halơi rgơi pơh jơc; ",
  "8": "Kơu thơu dơgrữq vruãq ngãq hã. Nĩ, kơu song pơh pãq anãq hã sa voh bãc, ôh mơnuĩh halơi rgơi krỡq; kơu thơu hã hũ mĩn sa asit pran, bôh-laìq yơu nữn hã song rơmiãq jàc pơnuaĩq kơu sì ôh kamlah angãn kơu. ",
  "9": "Nĩ, kơu ròq ngãq ga dơgrữq mơnuĩh mưng dơlãp tơpuôl kamlai Satan, la mơnuĩh angãn krơi rồp drơi la mơnuĩh Ju-đa sì ôh iơuq la mơnuĩh Ju-đa, nữn pơnõq nhũ đơp lor. Nĩ, kơu ròq ngãq ga pơnõq nhũ trôh paviar rồp di ala tơkai hã, sì ròq vrơi ga pơnõq nhũ thơu laìq kơu khiãng dôman hã. ",
  "10": "Kơyua mưng hã song rơmiãq jàc pơnuaĩq kơu sì dỡc gơjãp, nữn kơu kung ròq iãq jàc hã dơlãp tũq lòc dleh dlàr, la tũq ròq tơviãq trôh vãq avih dun-kayua pioh lòc dơgrữq mơnuĩh dòq pãq voh hlồq. ",
  "11": "Kơu trôh sơmar; rơmiãq kơjãp vẽq kaya hã song hũ, tồq ôh hũ mơnuĩh halơi suãq chrơng pitao hã hũ,",
  "12": "Mơnuĩh halơi hũ pha rlao, nữn kơu ròq ngãq ga nhũ tơviãq jơc sa bẽq gữc dơlãp sàc tơlơvàt Yàc Pô Lơngĩq kơu hũ, sì nhũ ôh tũq halơi tơviãq tlah mưng anĩh nữn tra. Kơu ròq wãq pãq dlòc nhũ angãn Yàc Pô Lơngĩq kơu hũ, angãn pơlơi prõc Yàc Pô Lơngĩq kơu hũ, la pơlơi Je-ru-sa-lem vơhrơu pãq dlòc lơngĩq mưng Yàc Pô Lơngĩq kơu hũ sì trôt, sigơuq sì angãn vơhrơu kơu hũ. ",
  "13": "Mơnuĩh halơi hũ taniã hmỡq vẽq pơnuaĩq Yàc Vơngãq đơp sì dơgrữq sàc pơjũm sơđah.",
  "14": "Wãq vẽq ga mơnuĩh gơnrơh sàc pơjũm sơđah Lao-di-se laìq: Nĩ la dơgrữq pơnuaĩq đơp Pitao Ami nhũ, la Pitao ngãq chưng tin tơpãq, la Pitao chơmrờp dơlãp kaya chrơng pơjơc Yàc Pô Lơngĩq hũ. ",
  "15": "Kơu thơu dơgrữq vruãq ngãq hã. Hã ôh mơrìt sì kung ôh kluaĩq mĩn. Kơu jơkhãq-khiãng hã mơrìt hela kluaĩq nữn rlao! ",
  "16": "Yơu nữn, kơyua mưng hã la pơđiãq pơđao, ôh kluaĩq kung ôh mơrìt, nữn kơu ròq kachôh hã tơviãq tlah mưng mvah kơu. ",
  "17": "Mưng hã đơp: Hlãq mơda, hlãq song mơda-ganãp vloh, ôh chàc kaya halơi tra, yơu nữn hã ôh thơu hã la mơnuĩh dleh dlàr, iơuq anĩt anar, kasuãn rbah, sồp mơta sì dòq kalôh. ",
  "18": "Yơu nữn, kơu pơto pasơdơr hã vlơi vẽq mữh kơu song riãq dơlãp apôi, tồq ga hã tơviãq jơc gơnãp-mơda. Vlơi dơgrữq ao kòq, tồq ga hã chồq pioh vơvãc dơđơuq kaya mơlơu mưng kaya dòq kalôh hã hũ, sì vlơi jrao pioh vroah mơta tồq ga hã bôh. ",
  "19": "Dơgrữq mơnuĩh halơi kơu khiãng dôman, nữn kơu gơrloh pơkhe sì ngãq dlaìq paknãl mĩn, yơu nữn hũ vẽq hatai kher-vơđer sì mvai tlàq dlaìq vẽq! ",
  "20": "Nĩ, Kơu dỡc lơniao bãc sì tatoh; mơyah-laìq mơnuĩh halơi hmỡq pơnuaĩq Kơu sì pơh bãc nữn Kơu ròq tơmã sì mơnuĩh nữn, bõc tlãp sì nhũ sì nhũ sì Kơu. ",
  "21": "Mơnuĩh halơi hũ pha rlao, nữn kơu ròq vrơi ga nhũ dòq guh sơvan kơu sigơuq sì kơu, yơu rùpphuôt kơu song pha rlao vloh sì dòq guh sigơuq sì Ama pãq dlòc sơvan Pitrai hũ mĩn. ",
  "22": "Mơnuĩh halơi hũ taniã nữn hmỡq vẽq pơnuaĩq Yàc Vơngãq đơp sì dơgrữq sàc pơjũm sơđah."
}