raglay_2021_rgs_rlt_rev_book/rev/10.json

{
  "1": "Suet, hlãq song bôh sa aràc mơnuĩh gơnrơh tơmo pran khãc viãq mưng dlòc lơngĩq trôt, hũ khũc hual tlõm tòpdar. Di akõq nhũ hũ jơgro-chãc, bòq mơta nhũ yơu ia harơi, tơkai nữn yơu gữc apôi. ",
  "2": "Dơlãp tơngãn nhũ apãt sa tãp sơrãq-pơpòq tìt pơh tơviãq. Tơkai hanuãq nhũ dỡc pãq dlòc tơsìq, tơkai iao dỡc pãq dlòc hlồq. ",
  "3": "Nhũ priao sa sãp prõc; yơu sãp rơmong phum priao tơgùq. Tũq nhũ priao tơgùq, nữn tơjuh sãp grim mơnhĩ. ",
  "4": "Bãc tũq tơjuh grim mơnhĩ vloh, nữn hlãq ưng wãq pơnuaĩq nữn, yơu nữn hlãq hmỡq sa pơnuaĩq mưng dlòc lơngĩq đơp laìq: Kadrỡq vẽq dơgrữq pơnuaĩq tơjuh grim katãl song đơp; sì juơi wãq.",
  "5": "Tũq nữn mơnuĩh gơnrơh sì hlãq song bôh dỡc pãq tơsìq sì pãq dlòc hlồq yơr tơngãn hanuãq tơgùq lơngĩq, ",
  "6": "Tơchơi Pitao hadiuq gãm gãm, la Pitao song chrơng pơjơc lơngĩq sì avih dơgrữq kaya dòq pãq dlòc lơngĩq, hlồq sì avih dơgrữq kaya dòq pãq hlồq, tơsìq sì avih dơgrữq kaya dòq dơlãp tơsìq, sì sơtãp rồp laìq: Ôh dòq tũq jơ halơi tra; ",
  "7": "yơu nữn trôh di dơgrữq harơi mơnuĩh gơnrơh bãc tơjuh ròq ayùq taliãq, nữn kaya tơđơuq tơwơr Yàc Pô Lơngĩq ròq tơviãq jơc wil tãl, yơu pơnuaĩq Pitrai song akhàt sì dơgrữq halôt mơnãq Pitrai la dơgrữq mơnuĩh ganuar-huar. ",
  "8": "Pơnuaĩq đơp sì hlãq song hmỡq mưng dlòc lơngĩq, đơp sì hlãq wơq laìq: Nao vẽq, mãq sơrãq-pơpòq tìt song pơh dơlãp tơngãn mơnuĩh gơnrơh dỡc pãq dlòc tơsìq sì pãq dlòc hlồq. ",
  "9": "Nữn, hlãq nao trôh pãq mơnuĩh gơnrơh sì lơkơu nhũ vrơi ga hlãq sơrãq-pơpòq tìt nữn. Nhũ đơp sì hlãq laìq: Mãq vẽq nhũ sì bõc, nhũ ròq tơviãq jơc phìq dơlãp tũc hã, yơu nữn nhũ ròq tơviãq jơc jơman yơu ia chlơko dơlãp chơboai hã. ",
  "10": "Hlãq mãq s'rãq-pơpòq tìt nữn mưng tơngãn mơnuĩh gơnrơh sì luôt; yơu nữn dơlãp chơboai hlãq jơman yơu ia chlơko, yơu nữn bãc hlãq luôt nhũ vloh nữn dơlãp tũc hlãq tơviãq jơc phìq. ",
  "11": "Sì hũ pơnuaĩq đơp sì hlãq laìq: Sa bãc tra hã iơuq đơp ganuar-huar wơq lu ga vual-vơla, lu lơgar, lu pơnuaĩq đơp sì lu mơnuĩh pitao mĩn."
}