raglay_2021_rgs_rlt_rev_book/rev/19.json

{
  "1": "Hadơi dơgrữq vruãq nữn, hlãq hmỡq sãp drưh yơu sãp đơp prong dơlãp sa tơpuôl mơnuĩh lũ viãq pãq dlòc lơngĩq, làiq, \"Ha-le-lu-ya. Kaya dõc pơ-tlah, kaya gơhluh sì gơnuar chơnuãq pơweh sì Yàc Pô Lơngĩq pơnõq drơi. ",
  "2": "Kơyua kaya chahrơna Pitrai hũ la tơpãq viãq sì tơpãq rĩng, kơyua Pitrai song chahrơna mơnuĩh kamơi drĩ drõc prong, nữn la mơnuĩh miẽt gãm ngãq ga voh hlùq kađòc lơduh hadơ mưng kaya lơđãp ngãq drĩ drõc nhũ hũ. Pitrai song yơr đồq tơngãn ga dơrãh dơgrữq mơnuĩh halỗt mơnãq Pitrai hũ dơlãp tơngãn nhũ.\" ",
  "3": "Nữn pơnõq nhũ vloh đơp sa bãc tơra, làiq: \"Ha-le-lu-ya! Asãq mưng anĩh nhũ miẽt por tơgùq gãm gãm, ôh luỗiq.\" ",
  "4": "Dua plôh pàq aràc mơnuĩh pô tơha sì pàq drơi anàq asỡq vơviar rùp trỗt duh talơvãt Yàc Pô Lơngĩq, Pitao ãn dòq guh pãq dlòc sơvan, làiq, \"A-men. Ha-le-lu-ya!\" ",
  "5": "Vloh hũ sãp mưng sơvan đơp tơviãq, làiq, \"Iỡuq sơ-uỗt mơyòp Yàc Pô Lơngĩq pơnõq drơi, ơ avih dơgrữq mơnuĩh halỗt mơnãq Pitrai, sì dơgrữq mơnuĩh duh huaĩq Pitrai, bôh làiq mơnuĩh lơđeh tìt hẽla mơnuĩh prong!\" ",
  "6": "Vloh hlãq hmỡq sãp hagĩq nữn ngãq yơu sãp sa tơpuôl mơnuĩh lũ viãq, sì drưh yơu sãp lũ anĩh ia đuaĩq, kung drưh yơu sãp kơtãl-tãq prong, làiq, \"Ha-le-lu-ya! Kơyua Yàc la Yàc Pô Lơngĩq pơnõq drơi hũ, Pitao Gơnuar Chơnuãq apãt akõq. ",
  "7": "Pơnõq drơi iỡuq uỗt sơh, sơh sơr, sì padỡc tơgùq kaya gơhluh ga Pitrai kơyua harơi bõc uỗt sơh pa-khiãng Avo Anàq hũ song trôh, sì sơdiuq song pơkhrà rùp rơchãc lơĩh vloh. ",
  "8": "Nai hũ pa-chồq ao mưng pơcha lơmuỡn siàp sơdah blãc sì sơđah sơchih ( Kơyua pơcha lơmuỡn siàp la dơgrữq vruãq ngãq tơpãq dãng mơnuĩh gơnuar pơđar sơđah hũ). ",
  "9": "Nữn mơnuĩh gơnrơh đơp sì hlãq, \"Iỡuq wãq pơnuaĩq nĩ: Lơngai ga dơgrữq mơnuĩh halơi hũ iơu jàq tơma dơlãp harơi bõc uỗt sơh pa-khiãng Avo Anàq.\" Nhũ kung đơp sì hlãq, \"Nĩ kung la dơgrữq pơnuaĩq tơpãq viãq Yàc Pô Lơngĩq hũ.\" ",
  "10": "Hlãq vơviar rùp trỗt pãq ala tơkai nhũ pioh duh talơvãt, nữn nhũ đơp sì hlãq, \"Juơi ngãq yơu nữn! Hlãq kung la halỗt mơnãq yơu sơai sì dơgrữq pơnõq adơi sơai hũ, dơgrữq mơnuĩh rơmiãq pơnuaĩq ngãq chưng mưng Yàc Je-su. Iỡuq duh talơvãt Yàc Pô Lơngĩq, kơyua pơnuaĩq ngãq chưng mưng Yàc Je-su nữn la vơngãq hatai pơnuaĩq đơp hwơr hũ.\" ",
  "11": "Vloh hlãq bôh lơngĩq pơh tơviãq, sì hũ sa drơi anàq ơseh kòq! Piao đìq pãq dlòc ơseh hũ iơu ngãn la TUI TƠPÃQ SÌ TƠPÃQ VIÃQ. Pitrai chahrơna sì mơsôh ơtòc tui pơnuaĩq tơpãq dãng. ",
  "12": "Mơta Pitrai drưh yơu dơlãh apôi, dòq akõq Pitrai tơruãq lũ chrơng pitao. Pitrai hũ sa angãn hũ wãq nữn lơniãu Pitrai nữn ôh mơnuĩh halơi thơu jỡc. ",
  "13": "Pitrai chồq sa vlah ao ơtah nhõm dơlãp dơrãh, sì angãn Pitrai hũ iơu la Pơnuaĩq Yàc Pô Lơngĩq Hũ. ",
  "14": "Nao tui Pitrai la dơgrữq tơpuôl lĩng pãq dlòc lơngĩq đìq pãq dlòc ơseh kòq, rùp chồq pơcha lơmuỡn siàp kòq sì sơchih. ",
  "15": "Mưng mơvah Pitrai pa-tơviãq đao thõc hluỡq pioh Pitrai pơlih angui nhũ poh dơgrữq palơi lơgar. sì Pitrai ròq dlãc-va pơnõq nhũ mưng gai hơwai pasơi. Pitrai juãq thũng tơniẽq alãc vuh kaya ơnõc mơvai prong Yàc Pô Lơngĩq Pitao Gơnuar Chơnuãq hũ. ",
  "16": "Pãq dlòc ao ơtah sì pãq dlòc pha Pitrai hũ wãq sa angãn: \"Pitao dơgrữq pitao, sì Yàc dơgrữq yàc.\" ",
  "17": "Vloh hlãq bôh sa aràc mơnuĩh gơnrơh dòq dỡc dơlãp ia harơi. Nhũ angui sãp prong iơu avih dơgrữq pơjẽh anàq chĩp ãn por pãq dlòc lơngĩq, làiq: \"Iỡuq mai trôh pơtõm gỡuq wỡq nữn bõc uỗt-sơh kaya pa-khiãng prong Yàc Pô Lơngĩq hũ, ",
  "18": "vloh tơpuôl hã pơlih bõc rơlo dơgrữq pitao, rơlo dơgrữq pô apãt akõq prong, rơlo mơnuĩh prãn khãc, rơlo ơseh sì mơnuĩh lĩng đìq pãq dlòc ơseh, sigỡuq sì rơlo dơgrữq mơnuĩh hũ, gãm mơnuĩh lơnang lơnai sì mơnuĩh ngãq halỗt, gãm mơnuĩh lơđeh tìt sì mơnuĩh prong.\" ",
  "19": "Vloh hlãq bôh anàq asỡq sì dơgrữq pitao pãq dlòc voh hlùq sigỡuq sì tơpuôl lĩng tơpuôl nhũ hũ. Tơpuôl nhũ pơtõm gỡuq wỡq pioh mơsôh ơtòc sì Pitao đìq pãq dlòc ơseh sì tơpuôl lĩng Pitrai hũ.  ",
  "20": "Vloh anàq asỡq kađòc krỡq, sigỡuq sì nhũ hũ mơnuĩh gơnuar hwơr vlữq lor, mơnuĩh ngãq tơviãq dơgrữq kaya nỡm krơi pãq anãq nhũ, gơnang mưng nữn nhũ pa-gơla hũ dơgrữq mơnuĩh song tồq mãq nỡm anàq asỡq nữn sì duh talơvãt rùp rãp nhũ. Avih dua aràc tơpuôl nhũ kađòc prah hadiuq tơma dơlãp lơvàc apôi bõc sì ka-dier. ",
  "21": "Katih dòq wỡq dơlãp tơpuôl nhũ nữn kađòc pa-mơtai kơyua mưng đao thõc Pitao đìq pãq dlòc ơseh hũ, nữn la đao thõc tơviãq mưng mơvah Pitrai. Avih dơgrữq anàq chĩp bõc rơlo tơpuôl nhũ tarơi tũc. "
}