raglay_2021_rgs_rlt_rev_book/rev/18.json

{
  "1": "Hadơi dơgrữq vruãq nữn hlãq bôh sa aràc mơnuĩh gơnrơh tơmo mưng dlòc lơngĩq trỗt. Mơnuĩh hũ gơnuar chơnuãq prong, sì kaya gơhluh nhũ pơsàc sơđah vãq avih voh hlùq. ",
  "2": "Mơnuĩh hũ gơnuar prãn khãc akhàt vrơi pa-thơu, làiq, \"Ba-by-lôn prong jơlưh tơ-hlỗp vloh! Nhũ song tơviãq jỡc anĩh dòq dơgrữq kamlai, anĩh dòq dơđỡuq dơgrữq vơngãq tasỡuq nrãc, sì anĩh dòq dơđỡuq dơgrữq pơjẽh anàq chĩp tasỡuq vrỡuq hũ sì đang mang kier amier. ",
  "3": "Kơyua dơgrữq pơjẽh vual vơla song mơnhũm alãc arĩh athãm ling lang nhũ hũ. Dơgrữq pitao pãq dlòc voh hlùq song sỗq dlàiq drĩ drõc sì nhũ. Mơnuĩh kãq pa-vlơi dơlãp voh hlùq song mơda gơnãp gơnang mưng kaya hadiuq dĩq-dĩl ling lang nhũ hũ.\" ",
  "4": "Vloh hlãq hmỡq sa sãp tơmo mưng lơngĩq đơp, \"Ơ vual vơla kơu, tơviãq tlah mưng nhũ vẽq, pioh pơnõq anàq ôh tơ-bàq trôh dơlãp dơgrữq dlàiq dơnũh nhũ hũ, sì pioh pơnõq anàq ôh ãt kaya rũc rài halơi pa-trỗt pãq dlòc nhũ. ",
  "5": "Kơyua dlàiq nhũ hũ song dãq-pơđuà trôh tãl lơngĩq, sì Yàc Pô Lơngĩq song sơdor wỡq dơgrữq vruãq ngãq iãh mơsãc nhũ hũ. ",
  "6": "Iỡuq yơr đồq tơngãn ga nhũ kaya nhũ song ngãq tơviãq, sì pơyar wỡq ga nhũ pơtãl dua dơgrữq kaya hagĩq nhũ song ngãq; dơlãp chơwàt nữn nhũ song jrơu, iỡuq jrơu ga nhũ pơtãl lũ pơgãp dua. ",
  "7": "Nhũ song pa-dlòc rùp drơi sì hadiuq pròc preh ling lang yơu halơi, nữn kung iỡuq ngãq ga nhũ ãt kaya pơđìq pơđua sì ka-ồq ka-ãn yơu nữn. Kơyua nhũ đơp dơlãp hatai, làiq, \"Drơi dòq guh rĩng yơu sa aràc kamơi pitao; drơi ôh iỡuq la kamơi vlơu, sì ròq ôh tũq halơi hũ kaya sia chõq.' ",
  "8": "Yơu nữn mĩn dơlãp sa harơi, dơgrữq kaya rũc rài nhũ hũ ròq dơvrũh dơvrah trôh: halơi la kaya mơtai lơhiãq, sia chõq, ờq lơpa. Nhũ ròq kađòc apôi chôh pa-lơhiãq, kơyua Yàc la Yàc Pô Lơngĩq viãq gơnuar chơnuãq, sì Pitrai la Pitao chahrơna nhũ.\" ",
  "9": "Dơgrữq pitao dơlãp voh hlùq la dơgrữq mơnuĩh sỗq dlàiq drĩ drõc sì hadiuq ling lang sì nhũ ròq sia chõq, suãq yuà buah yuãm mưng nhũ tũq nhũ bôh asãq apôi chôh nhũ por tơgùq. ",
  "10": "Kơyua huaĩq mưng kaya ãt ngãq dlàiq yơu nhũ, yơu nữn pơnõq nhũ ròq dòq dỡc gah atah pơh sãp, làiq, \"Dleh dlàr, dleh dlàr ga palơi prong Ba-by-lôn, la palơi vãq kaya gơnuar prãn! Kơyua mĩn dơlãp sa tũq jơ nữn kaya ngãq dlàiq ha song trôh.\" ",
  "11": "Vloh dơgrữq mơnuĩh kãq pa-vlơi pãq dlòc voh hlùq sia chõq sì anĩt dơman nhũ, kơyua ôh dòq mơnuĩh halơi vlơi kaya pơnõq nhũ hũ tơra- ",
  "12": "dơgrữq kaya nữn la mữh, priãq, patơu-màc, patơu akràc, pơcha lơmuơn siàp, pơcha lơngãt, pơcha lơngãu, pơcha mơriãh, tãl dơgrữq kayơu gơhlơu, sì dơgrữq kaya angui ngãq mưng vơlà rơman, dơgrữq kaya angui ngãq mưng kayơu màc, mưng kơsuãn, mưng pasơi, sì mưng patơu-kràc. ",
  "13": "Cađoh kwẽq, vơjrơu, thồp gơhlơu, chai-trỗq, jrao vơlhũ, alãc, mơnhàq, tơpồc lơmuỡn, pơdai mi, anàq asỡq, ave avo, ơseh, sì rơdeh ơseh, sigỡuq sì mơnuĩh ngãq halỗt, sì vơngãq yua anàq mơnuĩh. ",
  "14": "Dơgrữq voh tơsãq, kaya nữn suàt vơngãq hã chơkhãq khiãng, song đuaĩq atah hã. Dơgrữq kaya siàp mơkrờ sì mơàc mơyàc song tlàq luơi hã vloh, sì tơpuôl nhũ ròq ôh tũq halơi duah jỡc wỡq. ",
  "15": "Dơgrữq mơnuĩh kãq pa-vlơi dơgrữq kaya nữn, miẽt gơnang mưng nhũ hũ mơda gơnãp mĩn dòq dỡc mưng atah prong sãp sia chõq, dơman kơyua huaĩq ãt kaya pơđìq pơđua yơu nhũ. ",
  "16": "Pơnõq nhũ ròq đơp, \"Pơđìq pơđua, pơđìq pơđua ga palơi prong gãm chồq ao pơcha lơmuỡn siàp, pơcha lơngãt, pơcha phun mơriãh, sì kaya pơkhrà rùp mưng mữh, patơu màc, asar patơu kràc!   ",
  "17": "Mĩn dơlãp sa tũq jơ nữn kaya mơda gơnãp mơàc mơyàc yơu nữn kađòc pa-lơhiãq. Dơgrữq mơnuĩh yuỡq apãt ahòq ia prong, dơgrữq mơnuĩh thuai đìq dơlãp ahòq, dơgrữq ngãq vruãq dơlãp ahòq, sigỡuq sì dơgrữq mơnuĩh hadiuq mưng vruãq ngãq nao tơsìq kung dòq dỡc gah atah. ",
  "18": "Pơnõq nhũ driãu papơ tũq iãq bôh ơsãq apôi chôh bõc nhũ. Pơnõq nhũ đơp, \"Hũ palơi halơi drưh yơu palơi prong?\" ",
  "19": "Pơnõq nhũ sơprai thũl pãq dlòc akõq, sì driãu papơ, sia chõq, dơman, làiq, \"Pơđìq pơđua, pơđìq pơđua palơi prong, anĩh dơgrữq mơnuĩh hũ ahòq ia nao tơsìq kung gơnang mưng kaya mơnã nhũ nữn hũ mơda gơnãp. Kơyua mĩn dơlãp sa tũq jơ nữn nhũ song kađòc yah pa-lơhiãq avih.\" ",
  "20": "\"Ơ lơngĩq, iỡuq uỗt sơh mưng nhũ, sigỡuq sì avih dơgrữq mơnuĩh gơnuar pơđar sơđah, mơnuĩh gơnuar pơđar, sì gãm dơgrữq mơnuĩh gơnuar hwơr wỡq, kơyua Yàc Pô Lơngĩq song akhàt vrơi pa-thơu kaya ngãq dlàiq pãq dlòc nhũ!\" ",
  "21": "Vloh hũ sa aràc mơnuĩh gơnrơh prãn khãc pồq voh patơu prong drưh yơu tơlõq rơsũc prong tơgùq sì prah nhũ trỗt pãq ala ia tơsìq, đơp \"Palơi prong Ba-by-lôn ròq kađòc prah khãc trỗt yơu halơi nĩ, sì ròq ôh dòq bôh wỡq tơra. ",
  "22": "Ròq ôh dòq mơnuĩh halơi hmỡq sãp mơnuĩh pẽq kanhìq tơpĩng kathũr, mơnuĩh pẽq kanhìq, mơnuĩh ayùq tơliãq, sì mơnuĩh ayùq gơdèt dơlãp hã tơra. Ròq ôh duah bôh avih dơgrữq mơnuĩh ngãq vruãq rgơi khưh halơi dơlãp hã tơra. Ròq ôh dòq mơnuĩh halơi hmỡq sãp dơnai rơsũc gơlìq-sòq pãq anĩh hã.  ",
  "23": "Kaya sơđah apôi đeng ròq ôh dòq tuỗiq pơsàc dơlãp hã tơra. Anàq mơnuĩh ròq ôh hmỡq bôh sãp mơnuĩh mơtơu lakơi sì mơtơu kamơi pãq anĩh hã tơra, kơyua mơnuĩh kãq pa-vlơi hã hũ la dơgrữq yàc phũm pãq dlòc voh hlùq, sì dơgrữq lơgar song kađòc pa-gơla kơyua mưng kaya jũh-proh hã. ",
  "24": "Pãq anĩh nhũ, aràc bôh dơrãh dơgrữq mơnuĩh gơnuar hwơr sì dơgrữq mơnuĩh gơnuar pơđar sơđah hũ, sigỡuq sì dơrãh dơgrữq mơnuĩh song kađòc pa-mơtai pãq dlòc voh hlùq hũ.\"  "
}