raglay_2021_rgs_rlt_jud_book/jud/1.json

{
  "1": "Ju-đe, halỗt mơnãq Yàc Dõc Pơ-tlah Je-su hũ sì adơi Ja-kơ hũ, pơyua ga dơgrữq mơnuĩh hũ duỡt ruãh, hũ anĩt duman dơlãp Yàc Pô Lơngĩq la Ama, sì hũ rơmiãq jàc ga Yàc Dõc Pơtlah Je-su: ",
  "2": "Lakơu kaya anĩt, kaya dadu lơngai sigỡuq sì kaya khiãng duman bluãq pơtãl lũ rlao ga pơnõq adơi sơai. ",
  "3": "Pơnõq adơi sơai khiãng duman, dơlãp tũq hlãq avih prãn rãn pioh wãq ga pơnõq adơi sơai mưng kaya dõc pơ-tlah sigỡuq pơnõq drơi hũ, hlãq bôh iỡuq chàc wãq ga pơnõq adơi sơai pioh pơto pa-sơdor pơnõq adơi sơai tluỡiq gơhual kơyua voh-tui song hũ pơjao ga vual vơla sơđah sa bãc tãl vloh. ",
  "4": "Kơyua hũ hadup aràc mơnuĩh song tlẽq dỡuq pa-mơlỗq tơma dơlãp khrah pơnõq adơi sơai, dơgrữq mơnuĩh mưng suơi rơwĩ song kađòc pỡc đĩn ga kaya ngãq dlàiq nĩ, dơgrữq anàq mơnuĩh ôh pãc-tui yàc song ngãq kaya anĩt Yàc Pô Lơngĩq pơnõq drơi hũ tơviãq jỡc kaya drì drõc, kơmlah tlàq Pitao Pô Apãt Akõq mĩn sa aràc sì Yàc pơnõq drơi la Yàc Dõc Pơ-tlah Je-su.  ",
  "5": "Tũq nĩ hlãq ưng pa-sơdor pơnõq adơi sơai- bôh làiq pơnõq adơi sơai gãm thơu gơnĩt kaya nĩ- làiq Yàc Je-su song dõc sa vual vơla tơviãq tlah mưng lơgar E-jip-tơ, nữn hadơi nữn Pitrai vloh pa-lơhiãq dơgrữq mơnuĩh ôh pãc-tui. ",
  "6": "Kung yơu nữn, dơgrữq mơnuĩh gơnrơh ôh rơmiãq jàc anĩh gơnuar krơi drơi hũ,  nữn vloh tlàq luơi anĩh dòq pioh ga drơi, yơu nữn Yàc Pô Lơngĩq song apãt mãq pơnõq nhũ dơlãp talơi prĩq gãm gãm, dòq pãq anĩh viãq sồp kơnãm, pioh kađòc chahrơna dơlãp harơi prong màc. ",
  "7": "Drừh yơu  Sô-đôm sì Gô-mô-rơ kung dơgrữq pơlơi top dar sigỡuq song ngãq drơi tơmã kaya dri-drõc, drữh yơu rai hdiuq nhũ hũ đuaiq tui dơgrữq hatai ham khiang suẽl si  ngãq krơi, pơnõq nhũ kađõc patơgũq ngãq pamơyơu mưng dơgrữq mơnuĩh ãt ngãq dlàiq mưng apôi dòq gãm gãm, ",
  "8": "Sanơng làiq, dơgrữq mơnuĩh pìq lapơi Nĩ ôh  dơgrữq ngãq tơsơuq nrãc rùpphàp drơi, si pơnõq nhũ dòq tùq mãq ganuar-chơnuãq sì đơp dơgrữq pơnuaĩq siẽq siẽl dơgrữq Pitao gahluh sơđah. ",
  "9": " Kơya mai wỡq,mơnuĩh gơnrơh prõc rlao Mi-chen, Tũq mơnuĩh mvlah mãq sigơuq kamlai si dõc Jơga si nhũ mưng rồp atơu Môi-se hũ, ôh khin va tơviãq pơnuaĩq chahrnã hũ siẽq siẽl halơi pioh sòq Jơdrãq nhũ. pavlỡq wỡq nữn nhũ mĩm đơp:  Lơkơu Yàc gơrloh pơkhe hã!",
  "10": "Yơu nữn tơpuôl  nĩ, siẽq siẽl dơgrữq kaya hgĩq pơnõq nhũ ôh thơu pãc Jỡc dòq dơgrữq kaya pơnõq nhũ thơu pãc mưng kaya hũ krơi yơu anàq asỡq ôh hũ dlo sơning,nữn la dơgrữq kaya lơhiãq lơmuôĩq pơnõq nhũ. ",
  "11": "Dleh dlàr ga pơnõq nhũ! Kơyua pơnõq nhũ nao sigơuq tơmã jalàt Ka-in hũ si kơyua hajũc hlàq si prah tơmã kaya sỗq kơprah Ba-la-am hũ. pơnõq nhũ song kađòc lơhiãq lơmuiq dơlãp kaya sòq jơdrãq Kô-re hũ.",
  "12": "Tơpuôl nĩ la dơgrũq khrung tơsơuq nrãc dơlãp dơgrữq kaya bõc mơnhũm anĩt duman adơi sơai hũ tũq pơnõq nhũ bõc mơnhũm savĩq ôh thơu mơlơu ơlãh yơu mơnuĩh ròc avo mĩn rơchãc ròc drơi,pơnõq nhũ la dơgrữq yơu khũc huãl ôh hũ haJàt kađõc pađuaĩq nao kơyua angĩn, pơnõq nhũ la dơgrữq kayơu vơlàt phàt ôh hũ voh, mơtai dua bãc kađòc vũiq tơgũq kloh akha.",
  "13": "Pơnõq nhũ la dơgrữq dalah ia tơsơuq nrãc pãq dlòc tơsìq,tơviãq jrơnu mơlơu ơlãh drơi hũ. pơnõq nhũ la dơgrữq pitỗq nao sỗq kaprah,si  sồp kanãm chĩc gam gam song pioh lơiq ga pơnõq nhũ. ",
  "14": "Kơyua yơu nĩ, nữn mữ He-nõc, tacho tơjuh rai patui mưng A-đam, song đơp ganuar-hwơr mưng pơnõq nhũ,làiq: iỡuq iãq dĩh! Yàc trôh sigơuq tơlãc tơmỡl mơnuĩh sađah sachih Pitrai hũ.",
  "15": "Pitrai trôh pioh ngãq kaya chahrnã pơweh si dơgrữq arãc mơnuĩh, pitrai trôh pioh ngãq dlàiq dơgrữq arãc mơnuĩh mưng avih dơgrữq vruãq duh huaĩq pơnõq nhũ hũ si pơnõq nhũ song sỗq suẽl,si mưng dơgrữq pơnuaĩq yeh drơi si dơgrữq dlàiq dơnuh duh huaĩq song đơp Jơdrãq si pitrai. ",
  "16": "Pơnõq nhũ la dơgrữq mơnuĩh đơp rbõm, dơgrữq mơnuĩh boah-yuam hdiuq ngãq tui  dơgrũq kaya ham khiang tơsỡuq narãc drơi hũ. chơboai dơlah pơnõq nhũ prõc sãq yeh drơi, dơgrữq arãc mơnuĩh tơma pioh hajũc halàq ga drơi.",
  "17": "Yơu nữn adơi sơai, la dơgrữq mơnuĩh khiãng duman, iỡuq sơdơr dơgrữq pơnuaĩq song hũ đơp hlơu Nĩ kơyua dơgrữq mơnuĩh ganuar pơđar Yàc hũ pơnõq drơi, Yàc dõc patlah Je-su.  ",
  "18": "Pơnõq nhũ song đơp sì adơi sơai: dơlãp tũq harơi luôiq hadơi, ròq hũ dơgrữq mơnuĩh siãq siẽl hdiuq tui hatai ham khiãng ôh duh huaĩq mĩn drơi hũ. ",
  "19": "Tơpuôl Nĩ mĩn la dơgrữq mơnuĩh ngãq jơc pachalah; pơnõq nhũ ngãq tui rlo-rồp,si ôh hũ Yàc Vơngãq sơđah.",
  "20": "Yơu nữn adơi saai, la dơgrữq mơnuĩh añit duman, iỡuq pơdỡc tơgùq sigỡuq mưng Voh-tui viãq sơchih drơi hũ, sì iơu lơkơu dơlãp Yàc Vơngãq sơđah. ",
  "21": "Iỡuq rơmiãq Jãc drơi dơlãp kaya khiãng duman Yàc Pô lơngĩq hũ,sì chơkhãq chàc kaya anĩt anar hũ Yàc pơnõq drơi, yàc dõc pơtlah Je-su, va adơi saai trôh kaya hadiuq gãm gãm. ",
  "22": "Iỡuq lơnơng lơnai sigỡuq dơgrữq mơnuĩh rđãp wi-wơ, ",
  "23": "Iỡuq dõc suãq dơgrữq mơnuĩh dih ngãq yơu hayơu katũc pơnõq nhũ tơviãq tlah apôi. Iỡuq anĩt duman sigỡuq duh huãiq dơgrữq mơnuĩh Dĩh, tơviãq Jỡc mvai lơmùq tlàq sa vlãh ao song kađõc mơgãp pãq tơsơuq nrãc kơyua rồp rlo. ",
  "24": "Dòq pơnãh tamo lơkơu Pitao hũ gơnuar chơnuãq rơmiãq jàc adơi sơai tlah sơnẽq sỗq sì ngãq ga adơi sơai dỡc kajãp pãq anãq kaya tơviãq mơta gahluh sađah Pitrai hũ savĩq ôh halũh lơka si vãq sơh sơr, ",
  "25": "Lakơu Yàc Pô Lơngĩq mĩn hũ sa, Yàc Dõc pơnõq drơi hũ, mưng Yàc Dõc Pơtlah Je-su, Yàc pơnõq drơi, hũ gơhluh, mơàc-mơyàc, gơnuar prãn, sì gơnuar chơnuãq mưng hlơu avih ôh thơu hadùp, mưng tũq nĩ sì tãl trôh gãm gãm. A-men. "
}