raglay_2021_rgs_rlt_jud_book/jud/1.json

{
  "1": "Ju-đe, halỗt mơnãq Yàc Dõc Pơ-tlah Je-su hũ sì adơi Ja-kơ hũ, pơyua ga dơgrữq mơnuĩh hũ duỡt ruãh, hũ anĩt duman dơlãp Yàc Pô Lơngĩq la Ama, sì hũ rơmiãq jàc ga Yàc Dõc Pơtlah Je-su: ",
  "2": "Lakơu kaya anĩt, kaya dadu lơngai sigỡuq sì kaya khiãng duman bluãq pơtãl lũ rlao ga pơnõq adơi sơai. ",
  "3": "Pơnõq adơi sơai anĩt duman, bôh làiq hlãq sơga wãq ga pơnõq adơi sơai mưng kaya dõc pơtlah sigỡuq pơnõq drơi hũ, nữn hlãq vloh rãn avih prãn pioh wãq ga pơnõq adơi sơai tồq pơto pa-sơdor pơnõq adơi sơai tluỡiq gơhual mưng kaya mơsôh kơyua mưng voh-tui song hũ pơjao vrơi ga vual vơla sơđah sa bãc la tãl avih. ",
  "4": "Kơyua hũ tơkìq mơnuĩh song dỡuq tlẽq tơma dơlãp khrah pơnõq adơi sơai, dơgrữq mơnuĩh mưng suơi rơwìq song kađòc ngãq gơnĩt ga kaya ngãq dlàiq nĩ, dơgrữq anàq mơnuĩh ôh hũ pơnuaĩq yàc song ngãq ga kaya anĩt Yàc Pô Lơngĩq pơnõq drơi hũ tơviãq jỡc kaya ôh hũ lơnãq apãt akõq, kơmlah Pitao Apãt Akõq prong avih sì Yàc pơnõq drơi la Yàc Dõc Pơtlah Je-su. ",
  "5": "Tũq nĩ, hlãq ưng pa-sơdor pơnõq adơi sơai- bôh làiq pơnõq adơi sơai song gãm thơu gơnĩt kaya nĩ- làiq Yàc Je-su dõc sa vual vơla tơviãq tlah mưng lơgar E-jip-tơ, nữn hadơi nữn Pitrai vloh pa-lơhiãq dơgrữq mơnuĩh ôh pãc-tui. ",
  "6": "Vloh kung yơu nữn, dơgrữq mơnuĩh gơnrơh ôh mãq rơmiãq pioh gơnuar chơnuãq krơi drơi hũ, nữn vloh tlàq luơi anĩh dòq pioh ga drơi, yơu nữn Yàc Pô Lơngĩq song apãt rơmiãq pơnõq nhũ dơlãp kaya wãc rơsì akãq talơi srẽng gãm gãm, dòq pãq anĩh sồp kơnãm viãq, pioh dòq chàc kađòc chahrơna dơlãp harơi prong. ",
  "7": "Kung drưh yơu Sô-đôm sì Gô-mô-rơ sigỡuq sì dơgrữq palơi tòp-dar pơnõq nhũ, mĩn gãm pa-suỡt drơi tơma dơlãp kaya drì drõc drưh yơu kaya ngãq nao pơnõq nhũ đuaĩq tui dơgrữq kaya ham khiãng suẽl sì kaya krơi nhũ. Pơnõq nhũ kađòc akhàt tơviãq ngãq kaya pa-mơyơu mưng dơgrữq mơnuĩh ãt kaya ngãq dlàiq mưng apôi gãm gãm. ",
  "8": "Nữn vloh kung sa pơnẽq nữn, dơgrữq mơnuĩh pìq lapơi nĩ kung ôh mĩn ngãq tasỡuq vrỡuq rùp phàp drơi. Nữn vloh pơnõq nhũ dòq kơmlah gơnuar chơnuãq, sì đơp dơgrữq pơnuaĩq siẽq sẽl dơgrữq pitao gơhluh. ",
  "9": "Nữn vloh mơnuĩh gơnrơh prong Mi-chel, dơlãp tũq nhũ gơrlah pơnuaĩq sì kamlai sì duah pơnuaĩq đơp sì nhũ mưng rùp atơu Môi-se hũ, kung ôh khĩn angui pơnuaĩq chahrơna halơi hũ kaya sơnơng đơp siẽq siẽl pioh jơdrãq sì nhũ. Pa-vlữq wỡq, nhũ mĩn đơp, \"Lakơu Yàc gơloh pơkhè hã!\" ",
  "10": "Yơu nữn tơpuôl nĩ siẽq siẽl dơgrữq pơnuaĩq nữn pơnõq nhũ ôh pãc jỡc. Dòq dơgrữq kaya pơnõq nhũ thơu tui kaya ngãq, yơu anàq asỡq ôh hũ kaya sơnơng, nữn la dơgrữq kaya pa-lơhiãq pơnõq nhũ. ",
  "11": "Dleh dlàr ga pơnõq nhũ! Kơyua pơnõq nhũ nao dơlãp jơlàt Ka-in hũ sì kơyua mưng kaya hajũc hlàq nữn gơluh tơma dơlãp kaya sỗq suẽl Ba-la-am hũ. Pơnõq nhũ song kađòc pa-lơhiãq kơyua ngãq jơdrãq yơu Kô-re. ",
  "12": "Tơpuôl nĩ la dơgrữq krung patơu dỡuq dơlãp dơgrữq kaya pơyãq bõc anĩt duman pơnõq adơi sơai hũ, dơlãp tũq pơnõq nhũ bõc mơnhũm nữn ôh thơu mơlơu alah- yơu mơnuĩh dlãc avo mĩn ngãq hayơu ga vãq tũc drơi. Pơnõq nhũ la dơgrữq pỗc huãl ôh hajàt, kađòc angĩn va nao. Pơnõq nhũ la dơgrữq  kayơu vlàt phàc ôh hũ voh- mơtai dua bãc, kađòc vrùq tơgùq trôh akhà. ",
  "13": "Pơnõq nhũ la dơgrữq rơyàq mơsãc pãq ia tơsìq, jơrnũ tơviãq kaya mơlơu alah drơi hũ. Pơnõq nhũ la dơgrữq ia pitỗq nao sỗq sì sồp kơnãm chĩc gãm gãm pioh ga pơnõq nhũ. ",
  "14": "Vloh kung yơu rùp phuỗt He-nõc, tơcho tơjuh rài mưng A-đam, song đơp hwơr mưng pơnõq nhũ, làiq, \"Dih! Yàc ãn trôh gãm sì tơlãc tơmỡn mơnuĩh gơnuar pơđar sơđah Pitrai. ",
  "15": "Pitrai trôh pioh ngãq kaya chahrơna pơweh sì dơgrữq mơnuĩh. Pitrai trôh pioh ngãq dlàiq dơgrữq tãl aràc mưng dơgrữq vruãq ôh tơpãq nữn pơnõq nhũ song ngãq sa pơnẽq ôh tơpãq, sì mưng dơgrữq pơnuaĩq pơ-chrìq nữn dơgrữq mơnuĩh dlàiq ôh duh huaĩq song đơp sơvĩl trôh Pitrai.\" ",
  "16": "Pơnõq nhũ la dơgrữq mơnuĩh đơp mơ-mõn, mơnuĩh suãq yuà, hadiuq ngãq tui dơgrữq kaya ham khiãng iãh sàq drơi hũ. Mơvah dơlãh pơnõq nhũ prong sãp yeh drơi, đơp papồq mơnuĩh tơmo pioh tồq mãq kaya hajũc hlàq ga drơi. ",
  "17": "Nữn pơnõq adơi sơai, dơgrữq mơnuĩh anĩt duman, iỡuq sơdor dơgrữq pơnuaĩq song hũ đơp hlơu thrơi mưng dơgrữq mơnuĩh gơnuar pơđar Yàc Dõc Pơtlah Je-su pơnõq drơi hũ. ",
  "18": "Pơnõq nhũ song đơp sì pơnõq adơi sơai, \"Dơlãp rài luỗiq hadơi ròq hũ dơgrữq mơnuĩh tlao vlơi hadiuq tui dơgrữq kaya ham khiãng ôh hũ pơnuaĩq siàp rùp phuỗt drơi hũ.\" ",
  "19": "Rùp phuỗt tơpuôl nĩ la dơgrữq mơnuĩh ngãq tơviãq kaya pa-chơlah; pơnõq nhũ đơp chơ-kơlãq sì ôh hũ Yàc Vơngãq Sơđah. ",
  "20": "Nữn pơnõq adơi sơai, dơgrữq mơnuĩh anĩt duman, iỡuq vỡq padỡc gỡuq mưng voh-tui sơđah viãq drơi hũ sì iơu lakơu dơlãp Yàc Vơngãq Sơđah. ",
  "21": "Iỡuq rơmiãq jàc rùp drơi dơlãp kaya khiãng duman Yàc Pô Lơngĩq hũ sì chơkhãq chàc kaya anĩt duman Yàc Dõc Pơtlah Je-su pơnõq drơi hũ va pơnõq adơi sơai trôh kaya hadiuq gãm gãm. ",
  "22": "Iỡuq lơnơng lơnai pơweh sì dơgrữq mơnuĩh dỡq dỡng. ",
  "23": "Iỡuq dõc suãq dơgrữq mơnuĩh tơmo mưng pơnẽq katũc pơnõq nhũ tơviãq tlah apôi, gãm sì mơnuĩh tơmo wỡq. Iỡuq anĩt duman gãm sì ka-ồq huaĩq, vloh lơmùq mơvai vlah ao kađòc pãq tasỡuq kơyua mưng rơlo rùp. ",
  "24": "Vơnah tơmo, lakơu Pitao hũ gơnuar chơnuãq pơlih apãt rơmiãq ga pơnõq adơi sơai tlah mưng kaya sơnẽq lơvuh sì ngãq ga pơnõq adơi sơai dòq dỡc pãq anãq kaya pa-bôh gơhluh Pitrai hũ ôh nỡm hlôh sì vãq kaya uỗt sơh, ",
  "25": "lakơu mĩn Yàc Pô Lơngĩq la prong rơlao avih, Yàc Dõc pơnõq drơi hũ, mưng Yàc Dõc Pơtlah Je-su, Yàc pơnõq drơi, hũ gơhluh, mơàc-mơyàc, gơnuar prãn, sì gơnuar chơnuãq mưng chơmrờp ôh luỗiq, tũq nĩ sì tãl trôh gãm gãm. A-men. "
}