See in Reader
29 lines
5.1 KiB
JSON
29 lines
5.1 KiB
JSON
{
|
|
"1": "Pathơu pơnõq adơi sơai hlãq hũ, iỡuq rơmiãq jàc voh tui dơlãp Yàc pơnõq drơi, la Yàc Dõc Pơtlah Je-su, la kaya gơhluh hũ, nữn juơi pachơlah gah sì mơnuĩh halơi. ",
|
|
"2": "Kơyua mơyah làiq hũ mơnuĩh vuh krãh mữh sigỡuq sì ao charơpha siàp makrờ mơàc mơyàc tơma dơlãp pơjũm pơtõm sì pơnõq adơi sơai, sì hũ sa aràc mơnuĩh rơbah mững ao charơpha tasỡuq nrãc kung tơma wỡq. ",
|
|
"3": "Nữn pơnõq adơi sơai iãq pãq mơnuĩh angui chồq ao chalơpha siàp makrờ sì đơp: \"Lakơu ung dòq guh pãq anĩh siàp nĩ!\", sì pơweh sì mơnuĩh rơbah, pơnõq adơi sơai đơp: \"Sơai dỡc sơgah dih\", hẽla \"Iỡuq dòq guh pãq tơkai hlãq nĩ,\"",
|
|
"4": "nữn ôh iỡuq pơnõq adơi sơai ãn pa-chơlah krơi gỡuq yơh? nữn ngãq pãq khrãh ga pơnõq adơi sơai tơviãq jỡc mơnuĩh chahrơna sì dơgrữq kaya sanơng iãh sàq yơh? ",
|
|
"5": "Pathơu pơnõq adơi sơai anĩt duman hlãq hũ, iỡuq hmỡq vẽq: Ôh iỡuq Yàc Pô Lơngĩq song duỡt ruãh mơnuĩh rơbah la-ơi dơlãp dun kơyua pioh tơviãq jỡc mơnuĩh mơda gơnãp dơlãp voh tui sì hũ tồq mãq palơi lơgar sì Pitrai song grưh sì mơnuĩh khiãng duman Pitrai yơh? ",
|
|
"6": "Yơu nữn sì pơnõq adơi sơai ròq siẽq siẽl aràc rơbah! Ôh iỡuq mơnuĩh mơda gơnãp lơđãp juãq jơlìq pơnõq adơi sơai sì pơnõq nhũ la mơnuĩh katũc va adơi sơai nao pãq anĩh chahrơna yơh? ",
|
|
"7": "Ôh iỡuq pơnõq nhũ lơđãp đơp sơvĩl trôh angãn kaya kua mang song hũ chẽq pãq dlòc pơnõq adơi sơai yơh? ",
|
|
"8": "Bôh làiq yơu nữn, mơyah làiq pơnõq adơi sơai ngãq wil tãl voh-va Pitao hũ tui yơu Sơrãq Sơđah: \"Iỡuq khiãng duman mơnuĩh jẽq phia drơi yơu rùp phuỗt drơi,\" nữn pơnõq adơi sơai ngãq iỡuq viãq. ",
|
|
"9": "Nữn mơyah làiq pơnõq adơi sơai iãq ôh sơrãp weh gah mơnuĩh halơi nữn, nữn pơnõq adơi sơai sỗq dlàiq, sì kađòc voh-va ngãq dlàiq yơu mơnuĩh sỗq voh-va. ",
|
|
"10": "Kơyua mơnuĩh halơi pơlih pãc rơmiãq avih dơgrữq voh-va, lơniãu nữn sơnẽq sỗq dòq sa pơnuaĩq, sì aràc nữn tơviãq jỡc mơnuĩh ngãq sỗq avih tãl aràc. ",
|
|
"11": "Kơyua Pitao song đơp: \"Juơi sỗq dlàiq drì drõc\", kung hũ đơp: \"Juơi pa-mơtai mơnuĩh\". Nữn mơyah làiq pơnõq adơi sơai ôh sỗq dlàiq drì drõc, nữn vloh sỗq dlàiq pa-mơtai mơnuĩh, nữn pơnõq adơi sơai tơviãq jỡc mơnuĩh ngãq sỗq voh-va. ",
|
|
"12": "Yơu nữn iỡuq đơp vẽq sì ngãq yơu dơgrữq mơnuĩh ròq kađòc chahrơna mưng voh-va kaya lanơng lơnai. ",
|
|
"13": "Kơyua kaya chahrơna ôh hũ anĩt duman mơnuĩh ôh akhàt tơviãq sa asit kaya anĩt duman. Hatai anĩt duman pha rlao kaya chahrơna. ",
|
|
"14": "Pathơu pơnõq adơi sơai hlãq hũ, hũ kuơ hagĩq mơyah làiq aràc asơi nữn đơp drơi hũ voh tui nữn vloh ôh hũ vruãq ngãq? Voh-tui nữn pơlih ôh dõc pơ-tlah mơnuĩh nữn jỡc pơnõq nhũ mĩn? ",
|
|
"15": "Bôh làiq hũ sa aràc pơnõq adơi sơai hẽla adơi sơai kamơi hũ rùp phàp ôh hũ ao chơphà sì sieuq kaya bõc dơgrữq harơi. ",
|
|
"16": "Nữn hũ sa aràc mơnuĩh dơlãp pơnõq adơi sơai đơp sì pơnõq nhũ: \"Iỡuq nao dơlãp kaya dadu lơngai, iỡuq rơmiãq pioh pơđao sì bõc trơi.\" nữn pơnõq adơi sơai ôh vrơi ga pơnõq nhũ dơgrữq kaya rùp phàp iỡuq angui, nữn hũ kuơ hagĩq? ",
|
|
"17": "Voh tui kung yơu nữn mĩn, mơyah làiq ôh hũ vruãq ngãq, nữn mơtai krơi nhũ. ",
|
|
"18": "Bôh làiq, asơi nữn ròq đơp: \"Sơai hũ voh-tui, dòq hlãq hũ vruãq ngãq.\" Iỡuq vrơi ga hlãq bôh voh-tui ôh hũ vruãq ngãq sơai hũ, vloh hlãq ròq vrơi ga sơai bôh voh-tui kơyua mưng vruãq ngãq hlãq hũ. ",
|
|
"19": "Sơai pãc làiq mĩn sa Yàc Pô Lơngĩq; Sơai pãc tui iỡuq. Kamlai satan kung pãc tui pơnõq nhũ nữn sì huaĩq tatơh. ",
|
|
"20": "Nĩ mơnuĩh gơla pơtòq, sơai ưng thơu laìq voh tui ôh hũ vruãq ngãq la ôh kuơ lơĩq? ",
|
|
"21": "Ôh iỡuq A-bra-ham, ung kõq pơnõq drơi, ròq hũ angãn tơpãq dãng mưng vruãq ngãq tũq ung pioh padữc anàq Y-sac, anàq la kơi drơi, pãq dlòc ban talơvãt yơh? ",
|
|
"22": "Sơai bôh làiq voh-tui sigỡuq sì vruãq ngãq ung hũ, sì gơnang vruãq ngãq, voh-tui ung jỡc wil tãl. ",
|
|
"23": "Pơnuaĩq Sơrãq Sơđah nĩ song tơviãq jỡc iỡuq yơu nữn: \"A-bra-ham pãc tui Yàc Pô Lơngĩq, sì kaya nữn hũ angãn la tơpãq dãng ga ung\". sì ung hũ angãn la ban mayơu Yàc Pô Lơngĩq hũ. ",
|
|
"24": "Pơnõq adơi sơai bôh nữn, sa aràc hũ angãn tơpãq dãng mưng vruãq ngãq, sì ôh iỡuq kơyua voh-tui nữn soh. ",
|
|
"25": "Kung yơu nữn mĩn, ôh iỡuq mơnuĩh kamơi Ra-hap hũ angãn tơpãq dãng kơyua mưng vruãq ngãq dơlãp tũq nhũ tồq ròq dơgrữq mơnuĩh ãt pơđar sì va pơnõq nhũ nao mưng jơlàt tơmo yơh? ",
|
|
"26": "Kơyua yơu rơlo rùp, ôh hũ vơngãq nữn mơtai yơu halơi, voh-tui ôh hũ vruãq ngãq nữn kung mơtai yơu nữn. "
|
|
}
|