raglay_2021_rgs_rlt_jas_book/jas/1.json

{
  "1": "Ja-kơ, halỗt mơnãq Yàc Pô Lơngĩq hũ sì Yàc Dõc Pơtlah Je-su hũ, pơyua ga sa plôh dua apỗc pơtiàt dòq hadiuq chơlah chaluỡn: Lakơu chuãq rơwãc pơnõq adơi sơai dơlãp sơh sơr!",
  "2": "Pathơu pơnõq adơi sơai hlãq hũ, dơlãp tũq pơnõq adơi sơai tơmã dơlãp avih tãl kaya lòc , nữn iỡuq iãq mững nữn la kaya wil tãl. ",
  "3": "Kơyua thơu làiq kaya lòc voh-tui pơnõq adơi sơai  tơviãq jỡc kaya rgơi thơu ãt-ỡl. ",
  "4": "Nữn, kaya rgơi thơu ãt ỡl iỡuq ngãq wil tãl vruãq nhũ, pioh ga pơnõq adơi sơai hũ pơlih hũ haduc hlàq drơi hũ sì ngãq wil tãl, ôh siẽuq kaya halơi. ",
  "5": "Dòq mơyah làiq aràc asơi dơlãp pơnõq adơi saai siỡuq kaya jãc rgơi, mơnuĩh nữn iỡuq rãn lakơu mưng Yàc Pô lơngĩq, la Pitao vrơi kaya anĩt lanơng lơnai ga dơgrữq mơnuĩh lakơu nữn ôh gơloh pơkhè, nữn kaya jãc rgơi ròq vrơi ga mơnuĩh nữn. ",
  "6": "Nữn mơnuĩh nữn iỡuq rãn lakơu dơlãp voh-tui, ôh dỡq dỡng hagĩq. Kơyua mơnuĩh dỡq dỡng drưh yơu ia tơsìq, kađòc poh ryàq nao  mai tui yua angĩn vluh sì sỡm-nãiq tơgùq. ",
  "7": "Mơnuĩh yơu nữn juơi chơkhãq chàc laìq drơi ròq tồq mãq hũ hagĩq mưng Yàc. ",
  "8": "Nữn la mơnuĩh lơđãp dỡq dỡng, ôh gơjãp gơnĩt dơlãp dơgrữq jơlàt athua drơi. ",
  "9": "Pơnõq adơi sơai dòq dơlãp kaya sieũq rơbah iỡuq yeh drơi mưng anĩh dòq mơàc mơyàc drơi hũ, ",
  "10": "dòq pơnõq adơi sơai mơda gơnãp iỡuq yeh drơi mưng anĩh dòq ôh jỡc ôh chãq drơi hũ, kơyua mơnuĩh nữn ròq gãt tơpà vloh yơu vơngà pãq blàc rỡq. ",
  "11": "Ia harơi tơviãq tơgùq gãm sì kaya tluỡiq gơhuar chôh sì ngãq thô krò tơhiũ rỡq kayơu. vơngà nhũ thô jơrũh, kaya siàp makrờ nhũ tơal rơai. Kung yơu nữn, mơnuĩh mơda gơnãp kung ròq ãt thô thiãq dơlãp rài hadiuq nhũ. ",
  "12": "Lơngai ga mơnuĩh ãt lòc dleh dlàr, kơyua tũq hadơi ròq hũ sì tũq song nao gãt kaya lòc vloh pơnõq nhũ ròq tồq mãq chrang mữh kaya hadiuq, la kaya sì Yàc Pô Lơngĩq ròq gưh vrơi ga dơgrữq aràc asơi khiãng duman Pitrai. ",
  "13": "Tũq kađòc kaya aniãi, juơi hũ asơi đơp làiq: \"Hlãq kađòc Yàc Pô Lơngĩq ngãq aniãi\", kơyua Yàc Pô Lơngĩq ôh tũq halơi kađòc kaya mơsãc ngãq aniãi, sì mĩn rùp phuỗt Pitrai kung ôh ngãq iãh aràc asơi. ",
  "14": "Nữn dơgrữq mơnuĩh kađòc ơniãi, tũq kađòc dui va sì pa-gơla kơyua mưng kaya hãm khiãng krơi rùp phuỗt drơi hũ.",
  "15": "Patui nữn, hadơi sì tũq ròq ãt mơtiàt, kaya hãm khiãng nữn ròq đeh tơviãq jỡc dlàiq dơnũh, sì hadơi sì tũq nữn dlàiq dơnũh nhũ tơviãq jỡc kaya mơtai. ",
  "16": "Pathơu pơnõq adơi sơai anĩt anar hlãq hũ, juơi luơi drơi kađòc pa-gơla. ",
  "17": "Dơgrữq kaya alĩn vrơi siàp makrờ sì dơgrữq kaya alĩn vrơi wil tãl la mưng dlòc dlòng. La kaya trôh mưng Ama kaya sơdah hũ. Sì dơlãp Pitrai nữn ôh hũ vruãq halơi pa sơdua hẽla tarsẽq vơngãq thĩt pa-sơdua. ",
  "18": "Tui yơu ngãq gơnĩt, Pitrai song đeh pơnõq drơi tơviãq mưng pơnuaĩq tơpãq hũ, pioh pơnõq drơi ròq la voh akõq thũt dơlãp dơgrữq kaya chrơng pajỡc Pitrai hũ. ",
  "19": "Pathơu pơnõq adơi sơai anĩt anar kơu hũ, iỡuq  thơu làiq: Dơgrữq aràc iỡuq sơmar hmỡq, rơlẽq đơp, sì ôh drah nõng. ",
  "20": "Kơyua kaya nõng anàq hũ mơnuĩh ôh ngãq jỡc kaya tơpãq dãng Yàc Pô Lơngĩq hũ. ",
  "21": "Kơyua yơu nữn, hadơi sì tũq wàq tlàq avih dơgrữq kaya tasỡuq nrãc sigỡuq sì dơgrữq kaya iãh sàq, iỡuq tồq mãq dơlãp kaya siàp \n lamỡn pơnuaĩq song dràq pơla, la pơnuaĩq pơlih dõc suãq vơngãq yuà pơnõq adơi sơai. ",
  "22": "Iỡuq tơviãq jỡc dơgrữq mơnuĩh ngãq tui pơnuaĩq, juơi mĩn la mơnuĩh hmỡq nữn pa-gơla rùp drơi. ",
  "23": "Kơyua mơyah làiq mơnuĩh halơi la mơnuĩh hmỡq pơnuaĩq sì ôh iỡuq la mơnuĩh ngãq tui, mơnuĩh nữn drưh yơu sa aràc mơnuĩh wãq akhar dơlãp rùp pơsàc iãq bòq mơta vơhiãn drơi hũ dơlãp krơh. ",
  "24": "Mơnuĩh nữn song tuỗiq pơsàc rùp drơi vloh  tlàq nao, nữn vloh wơr dlài bòq mơta drơi la yơu halơi. ",
  "25": "Nữn mơnuĩh halơi iãq pơwih voh-va wil tãl kaya lanơng lơnai hũ, sì miẽt patui wỡq ngãq yơu nữn, ôh iỡuq mĩn hmỡq vloh wơr thĩt, nữn la mơnuĩh ngãq tui pơnuaĩq, nữn mơnuĩh nữn ròq hũ lơngai dơlãp vruãq ngãq drơi hũ. ",
  "26": "Mơyah làiq asơi sanỡng drơi hũ tui jơlàt kakôh talơvãt, nữn ôh iãq gơrhia dơlah drơi, vloh dòq pa-gơla hatai drơi, nữn vruãq pãc tui jơlàt kakôh talơvãt mơnuĩh nữn la ôh kuơ hagĩq.",
  "27": "Jơlàt kakôh talơvãt sơdah sơchih sì ôh nỡm khrung pãq anãq Yàc Pô Lơngĩq, la Ama pơnõq drơi, nữn la dõc mơnuĩh nai nhi mơnuĩh kamơi vlơu rơbah la ơi dleh dlar pơnõq nhũ, sì rơmiãq rùp drơi ôh kađòc kơyua mưng dũn kơyua tasỡuq nrãc. "
}