raglay_2021_rgs_rlt_1pe_book/1pe/1.json

{
  "1": "Pier, mơnuĩh gơnuar pơđar Yàc Dõc Pơ-tlah Je-su hũ, pơyua ga dơgrữq mơnuĩh hũ duỡt ruãh dòq di khrãh vual vơla lơniãu hadiuq gơvrah gơvrĩc vãq avih dơgrữq char-palơi Bông, Ga-la-ti, Kap-ba-đỗc, A-si sì Bi-thi-ni. ",
  "2": "tui yơu kaya thơu halơu Yàc Pô Lơngĩq hũ, la Ama, kơyua Yàc Vơngãq Sơđah ruãh chẽq krơi ga kaya duh huaĩq sì kaya sơrah dơrãh Yàc Dõc Pơ-tlah Je-su hũ. Lakơu kaya anĩt dòq sigỡuq sì pơnõq adơi sơai sì lakơu kaya dadu lơngai brõq pơtãl tơgùq pãq dlòc pơnõq adơi sơai hũ dơlãh dơlai. ",
  "3": "Đang mang sơ-uỗt mơyòp viãq Yàc Pô Lơngĩq la Ama Yàc pơnõq drơi hũ la Yàc Dõc Pơtlah Je-su, Pitao kơyua tui yơu hatai anĩt duman prong rlao Pitrai hũ, song pa-sơdua vơhrơu pơnõq drơi tơma dơlãp kaya chơkhãq chàc hadiuq gơnang mưng kaya hadiuq wỡq Yàc Dõc Pơtlah Je-su hũ mưng kaya mơtai, ",
  "4": "nữn la pioh pơnõq drơi hũ tồq mãq apôh hama ôh vrũq lơmuĩq, ôh tơsỡuq nrãc, sì ôh lơhiãq thĩt, song hũ rơmiãq jàc lơĩh pãq dlòc lơngĩq ga pơnõq adơi sơai, ",
  "5": "la pioh ga dơgrữq mơnuĩh gơnang mưng voh-tui, hũ iãq jàc kơyua mưng gơnuar chơnuãq Yàc Pô Lơngĩq ga kaya dõc pơtlah, la kaya rơchãc lơĩh tồq ràc pa-tơviãq dơlãp rài luỗiq hadơi. ",
  "6": "Kơyua gơnang mưng kaya nữn, pơnõq adơi sơai uỗt sơh viãq, bôh làiq dơlãp tũq nĩ viãq iỡuq ãt kaya ka-ồq ka-iãp sa tũq lơwah dơlãp tãl dơgrữq kaya lòc ",
  "7": "tồq pioh ga kaya ràc pa-tơviãq mưng voh tui pơnõq adơi sơai hũ - la kaya kuơ màc rlao sì mữh, la kaya kađòc vrũq lơmuĩq nữn dòq ãt kaya lòc rơyiãq mưng apôi - voh tui pơnõq adơi sơai ròq chơtai voh mưng kaya sơ-uỗt mơyòp, sì kaya gơhluh, sì kaya ki ngãm dơlãp kaya pa-bôh tơviãq Yàc Dõc Pơ-tlah Je-su hũ,  ",
  "8": "Pitrai la Pitao nữn pơnõq adơi sơai khiãng duman nữn ka ôh-bôh, tũq nĩ kung ôh-bôh Pitrai nữn kơyua mưng kaya chàc gơnang dơlãp Pitrai, yơu nữn pơnõq adơi sơai sơh sơr mưng kaya uỗt sơh ôh akhàt tơviãq jỡc sì hũ vãq srè kaya gơhluh, ",
  "9": "pơnõq adơi sơai tồq mãq ga drơi hũ voh chơtai dơlãp voh-tui drơi hũ, nữn la kaya dõc pơtlah vơngãq yua pơnõq adơi sơai. ",
  "10": "Dơgrữq mơnuĩh gơnuar hwơr song duah iãq sì iãq pơwih nĩq nũn mưng kaya dõc pơtlah nĩ, nữn la dơgrữq mơnuĩh song akhàt hwơr hlơu mưng kaya anĩt pioh ga pơnõq adơi sơai, ",
  "11": "tũq duah iãh pioh thơu mưng mơnuĩh halơi nữn hẽla dơlãp tũq halơi nữn Vơngãq Sơđah Yàc Dõc Pơtlah dòq dơlãp pơnõq nhũ song pơto akhàt gãm, vrơi pa-thơu halơu mưng kaya pơđìq pơđua Yàc Dõc Pơtlah hũ sì kaya gơhluh hadơi dơgrữq vruãq nữn. ",
  "12": " Kaya song hũ ràc pa-tơviãq ga pơnõq nhũ, nữn la pơnõq nhũ mĩn ôh duh vruãq ga rùp phuỗt pơnõq nhũ, nữn duh vruãq ga pơnõq adơi sơai, mưng dơgrữq kaya nữn tũq nĩ song hũ akhàt vrơi pa-thơu ga pơnõq adơi sơai mưng dơgrữq mơnuĩh pơto akhàt Pơnuaĩq Siàp ga pơnõq adơi sơai kơyua mưng Yàc Vơngãq Sơđah ãt pơđar mưng lơngĩq - pơweh sì dơgrữq kaya nữn, dơgrữq mơnuĩh gơnrơh kung chơkhãq khiãng ưng bôh. ",
  "13": "Yơu nữn, iỡuq rơchãc lơĩh kaya sơnơng drơi. Iỡuq mơ-uãh chơkhãq. Iỡuq luơi avih kaya chơkhãq chàc tơma dơlãp kaya anĩt ròq hũ va trôh ga pơnõq adơi sơai tũq Yàc Dõc Pơ-tlah Je-su pa-bôh tơviãq. ",
  "14": "yơu anàq tơcho thơu pãc sãp, ôh ngãq tui dơgrữq kaya ham khiãng halơu thrơi pơnõq adơi sơai dòq dơlãp kaya ôh thơu pãc, ",
  "15": "pa-vlữq wỡq, drưh yơu Pitao song iơu jàq pơnõq adơi sơai la sơđah, viãq rùp phuỗt pơnõq adơi sơai kung iỡuq tơviãq jỡc sơđah dơlãp tãl avih dơgrữq kaya bõc dòq drơi hũ. ",
  "16": "Kơyua hũ pơnuaĩq wãq: \"Iỡuq tơviãq jỡc sơđah kơyua kơu la sơđah.\" ",
  "17": "Sì mơyah làiq pơnõq adơi sơai iơu Pitao chahrơna la tơpãq dãng tui vruãq ngãq dơgrữq tãl aràc hũ la \"Ama\" nữn iỡuq hadiuq sa rài hadiuq mưng hatai duh huaĩq dơlãp rài hadiuq padơh drơi hũ nĩ, ",
  "18": "pơnõq adơi sơai thơu làiq ôh iỡuq gơnang mưng dơgrữq kaya pơlih vrũq lơmuĩq yơu priãq hẽla mữh nữn pơnõq adơi sơai song hũ dõc tlah mưng rài hadiuq gơla pơtòq drơi hũ kơyua mưng ung kõq pơnõq drơi, ",
  "19": "nữn la gơnang mưng dơrãh màc Yàc Dõc Pơtlah hũ, yơu avo anàq ôh halôh nỡm sì ôh tasỡuq nrãc,  ",
  "20": "Pitrai hũ duỡt ruãh halơu sì tũq chrơng pajỡc, nữn hũ ràc pa-tơviãq dơlãp rài luỗiq hadơi nĩ kơyua mưng pơnõq adơi sơai, ",
  "21": "la dơgrữq mơnuĩh gơnang mưng Pitrai pãc tui Yàc Pô Lơngĩq, Pitao song ngãq ga Pitrai hadiuq wỡq mưng kaya mơtai sì vrơi kaya gơhluh ga Pitrai, pioh voh-tui sì kaya chơkhãq chàc pơnõq adơi sơai hũ dòq dơlãp Yàc Pô Lơngĩq. ",
  "22": "Dơlãp tũq ngãq sơchih vơngãq yuà drơi gơnang mưng kaya duh huaĩq pơnuaĩq tơpãq pơweh trôh kaya khiãng duman adơi sơai tơpãq viãq, pơnõq adơi sơai iỡuq khiãng duman gỡuq avih hatai gãm sì hatai sơđah sơchih, ",
  "23": "kơyua pơnõq adơi sơai song hũ pa-sơdua vơhrơu, ôh iỡuq mưng gar pơjẽh pơlih vrũq lơmuĩq, nữn mưng gar pơjẽh ôh tũq halơi vrũq lơmuĩq, gơnang mưng pơnuaĩq gãm hadiuq sì dòq gãm Yàc Pô Lơngĩq hũ. ",
  "24": "Kơyua: \"Dơgrữq rơlo rùp drưh yơu rỡq, sì dơgrữq kaya gơhluh nhũ hũ drưh yơu vơngà rỡq lơniãu blàc. Rỡq thô, sì vơngà jruh, ",
  "25": "nữn pơnuaĩq Yàc dòq tãl trôh gãm gãm.\" Nữn la Pơnuaĩq Siàp song hũ akhàt vrơi pa-thơu ga pơnõq adơi sơai. "
}