raglay_2021_rgs_rlt_1co_book/1co/9.json

{
  "1": "Viãq mĩn hlãq ôh hũ lơnơng lơnai? Viãq mĩn hlãq ôh iỡuq la sa aràc mơnuĩh gơnuar pơđar? Viãq mĩn hlãq ka-ôh pãp Yàc Je-su, Yàc pơnõq drơi? Viãq mĩn adơi sơai la vruãq hlãq ngãq dơlãp Yàc yơh? ",
  "2": "Mơyah làiq hlãq ôh iỡuq la mơnuĩh gơnuar pơđar pơweh sì mơnuĩh tơmo, nữn hlãq kung la mơnuĩh gơnuar pơđar pơweh sì pơnõq adơi sơai. Kơyua mưng adơi sơai la kaya ngãq chưng mưng vruãq mơnuĩh gơnuar pơđar hlãq hũ dơlãq Yàc. ",
  "3": "Nĩ la pơnuãiq hlãq đơp dõc jơga krơi drơi pãq anãq dơgrữq mơnuĩh đơp chahrơna sì drơi: ",
  "4": "Viãq mĩn pơnõq hlãq ôh hũ gơnuar bõc mơ-nhũm? ",
  "5": "Hayơu vloh pơnõq hlãq ôh hũ gơnuar dui-va sa aràc sơdiuq pãc-tui Yàc, yơu dơgrữq mơnuĩh gơnuar pơđar tơmo sì dơgrữq adơi sơai Yàc hũ kung yơu Sê-pha rơđãp ngãq mĩn, yơh? ",
  "6": "Hẽla mĩn Ba-na-ba gãm sì hlãq ôh hũ gơnuar ngãq padưh ngãq vruãq? ",
  "7": "Mơnuĩh halơi nao lĩng nữn vloh rơchãc krơi jĩn vơlàt ga drơi lơĩh? Mơnuĩh halơi pơlà vỡn nho nữn vloh ôh bõc voh nhũ? Hẽla hũ mơnuĩh halơi dlãc iãq tơpuôl avo nữn ôh mơnhũm ia tasơu mưng tơpuôl avo nữn? ",
  "8": "Hlãq ôh đơp dơgrữq vruãq nĩ tui yơu pơnẽq anàq mơnuĩh rơđãp đơp mĩn yơh? Hẽla, iỡuq lỡiq voh-va ôh đơp yơu nữn? ",
  "9": "Kơyua mưng Voh-va Môi-se hũ wãq: \"Juơi sròq vai tơma mơvah anàq lơmo ãn duãq vơdai.\" Ôh iỡuq Yàc Pô Lơngĩq ka-ồq ga lơmo, iỡuq lỡiq? ",
  "10": "Hẽla Pitrai đơp yơu nữn avih dơgrữq kaya la mưng pơnõq drơi? Pơnuãiq nữn hũ wãq kơyua mưng pơnõq drơi, mưng mơnuĩh lơ-oa hamã nữn iỡuq lơ-oa dơlãp kaya chàc gơnang, mơnuĩh juãq vơdai iỡuq juãq mưng hatai chơkhãq chàc ròq hũ mơpha pơnah. ",
  "11": "Mơyah làiq pơnõq hlãq dràq dơgrữq vruãq suàt vơngãq pãq khrah pơnõq adơi sơai, nữn ngãq uãn lỡiq mơyah làiq pơnõq hlãq yuãq pẽq voh chơtai mưng pơnõq adơi sơai? ",
  "12": "Mơnuĩh tơmo hũ gơnuar nữn pãq dlòc adơi sơai, adah làiq pơnõq hlãq! Bôh làiq yơu nữn, pơnõq hlãq ôh duah tơnĩa gơnuar nữn. Pa-vlữq wỡq, pơnõq hlãq ãt ỡn dơgrữq kaya pioh ôh chơkhãq pơgãt Pơnuãiq Siàp Yàc Dõc Pơtlah hũ. ",
  "13": "Adơi sơai ôh thơu làiq mơnuĩh duh vruãq dơlãp sàc talơvãt nữn bõc dơgrữq kaya song pioh padỡc ga sàc talơvãt, sì mơnuĩh ngãq vruãq pãq ban talơvãt nữn hũ vơnah dơlãp ban talơvãt, hayơu? ",
  "14": "Kung yơu nữn, Yàc song pơto pơđar làiq mơnuĩh akhàt vrơi thơu Pơnuãiq Siàp nữn iỡuq hadiuq gơnang mưng Pơnuãiq Siàp. ",
  "15": "Nữn hlãq ka-ôh lakơu yòc gơnuar halơi dơlãp dơgrữq katih nữn. Sì hlãq kung ôh wãq dơgrữq vruãq nĩ tồq gơnuar nữn jỡc angui ga drơi, kơyua hlãq vloh mơtai siàp rơlao la luơi ga mơnuĩh halơi tlẽq sơwah thĩt kaya pa-prõc rùp nĩ. ",
  "16": "Mơyah làiq hlãq pơto akhàt Pơnuãiq Siàp hlãq ôh hũ ka-noh gơtha hagĩq tồq yeh pa-dlòc rùp drơi, kơyua gơnuar vruãq nĩ song pơjao ga hlãq. Viãq dleh dlàr ga hlãq mơyah làiq hlãq ôh pơto akhàt Pơnuãiq Siàp! ",
  "17": "Mơyah làiq hlãq rơchãc lơĩh hatai ngãq vruãq nữn, nữn ròq hũ kaya ban. Dòq mơyah làiq ôh rơchãc lỡih hatai, nữn hlãq gãm hũ sa gơnuar vruãq jỡc pơjao ga drơi. ",
  "18": "Yơu nữn, kaya ban hlãq hũ la kaya hagĩq? Nữn la tũq pơto akhàt Pơnuãiq Siàp ôh chàc jĩn, nữn hlãq pơlih rgơi akhàt tơviãq Pơnuãiq Siàp, ôh angui gơnuar krơi drơi hũ dơlãp Pơnuãiq Siàp. ",
  "19": "Bôh làiq hlãq hũ lanơng lơnai pơweh sì dơgrữq adơi sơai, nữn mưng hlãq ưng chẽq hatai ngãq halỗt ga dơgrữq aràc, tồq hlãq pơlih katũc iỡu jàq hũ lũ mơnuĩh rơlao. ",
  "20": "Pơweh sì mơnuĩh Ju-đa, hlãq tơviãq jỡc yơu mơnuĩh Ju-đa, pioh iơu jàq lũ mơnuĩh Ju-đa. Pơweh sì mơnuĩh dòq pãq ala Voh-va, hlãq tơviãq jỡc yơu mơnuĩh dòq pãq ala Voh-va bôh làiq hlãq ôh iỡuq dòq pãq ala gơnuar Voh-va, pioh iơu jàq dơgrữq mơnuĩh dòq pãq ala Voh-va. ",
  "21": "Pơweh sì mơnuĩh dòq pãq lơniãu Voh-va, nữn hlãq tơviãq jỡc yơu mơnuĩh dòq lơniãu Voh-va ( Bôh làiq hlãq ôh iỡuq dòq lơniãu Voh-va Yàc Pô Lơngĩq, sì dòq pãq ala voh-va Yàc Dõc Pơtlah), tồq ga hlãq pơlih rgơi iơu jàq mơnuĩh lơniãu Voh-va. ",
  "22": "Pơweh sì mơnuĩh lơduh lơmuỡn, hlãq tơviãq jỡc yơu mơnuĩh lơduh lơmuỡn, tồq ga hlãq hũ pơlih iỡu jàq mơnuĩh lơduh lơmuỡn. Hlãq song tơviãq jỡc dơgrữq pơnẽq pơweh sì dơgrữq mơnuĩh, pioh pơlih mưng dơgrữq pơnẽq tồq dõc suãq hũ tơkìq mơnuĩh. ",
  "23": "Hlãq ngãq dơgrữq vruãq kơyua mưng Pơnuãiq Siàp, tồq hlãq kung hũ vơnah dơlãp nữn. ",
  "24": "Adơi sơai ôh thơu làiq dơlãp sa kaya pơlòc, avih tãl aràc kung đuãiq, nữn mĩn sa aràc hũ kaya ban yơh? Kơyua yơu nữn, adơi sơai iỡuq đuãiq hayơu tồq hũ kaya ban. ",
  "25": "Dơgrữq tãl aràc mơvlah kachah dơlãp dơgrữq kaya pơlòc kung mơgrũ ngãq gơrhia rùp phuỗt drơi dơlãp dơgrữq vruãq. Pơnõq nhũ ngãq yơu nữn pioh tồq mãq hũ chrang mữh ròq thô lơhiãq, nữn pơnõq drơi ngãq yơu nữn la tồq hũ chrang mữh ôh tũq halơi thô lơhiãq. ",
  "26": "Kơyua yơu nữn, hlãq đuãiq, ôh iỡuq la đuãiq wi-wơ; hlãq poh, ôh iỡuq la hlãq poh angĩn.",
  "27": "Nữn hlãq mãq pơgùq pơẽq rùp phàp drơi sì ngãq ga nhũ jỡc halỗt mơnãq, tồq hadơi sì tũq hlãq song pơto akhàt ga mơnuĩh tơmo nữn rùp phàp drơi ròq ôh kađòc pa-trơh luơi. "
}