raglay_2021_rgs_rlt_1co_book/1co/14.json

{
  "1": "Iỡuq tui pơgui kaya anĩt duman sì tluỡiq gơhuar duãh tui dơgrữq kaya anĩt gah suàt vơngãq, hlơu avih la hũ đơp hwơr. ",
  "2": "Kơyua mơnuĩh đơp pơnuaĩq chrih krơi ôh đơp sì anàq mơnuĩh, nữn đơp sì Yàc Pô Lơngĩq, yơu nữn ôh asơi thơu pãc, kơyua mưng pơnõq nhũ đơp dơgrữq vruãq dơlãp dơđỡuq dơlãp vơngãq hatai. ",
  "3": "Nữn mơnuĩh đơp hwơr đơp sì anàq mơnuĩh pioh vỡq padỡc, ngãq padờp sì paluờ padờp. ",
  "4": "Mơnuĩh đơp pơnuaĩq chrih krơi vữq pa-tơgùq rùp phuỗt drơi, dòq mơnuĩh đơp hwơr nữn ròq vữq padữc Sàc Pơjũm Sơđah. ",
  "5": "Hlãq chơkhãq chàc avih dơgrữq pơnõq adơi sơai rgơi đơp pơnuaĩq chrih krơi, dơgrữq kaya hlãq chơkhãq chàc rlao tơra la pơnõq adơi sơai đơp hwơr. Mơnuĩh đơp hwơr prong màc rlao mơnuĩh đơp sãp chrih krơi ( mĩn tũq halơi mơnuĩh nữn ràc pa-tơviãq pioh Sàc Pơjũm Sơđah hũ vỡq padỡc). ",
  "6": "Pa-thơu ga adơi sơai, mơyah làiq hlãq trôh pãq anĩh adơi sơai đơp pơnuaĩq chrih krơi, nữn hlãq ròq dõc iãq kaya hagĩq ga pơnõq adơi sơai, mơyah làiq ôh đơp tơviãq pơnuaĩq dơlãp dơđỡuq, pơnuaĩq jãc thơu, pơnuaĩq hwơr, hẽla pơnuaĩq pơto pơđar? ",
  "7": "Vloh avih dơgrữq kaya ôh hũ yua  pơh tơviãq sãp, yơu tõq tơliãq hẽla tơpĩng kathur, mơyah làiq ôh tơviãq jỡc sãp krơi, nữn mơnuĩh halơi thơu pa-chơlah jỡc mơnuĩh ãn ayùq hagĩq dơlãp tõq tơliãq hẽla tơteh hagĩq dơlãp bẽq tơpĩng kathur? ",
  "8": "Hẽla mơyah làiq gơdèt ayùq sãp mơnhĩ ôh tơviãq nĩq nũn nữn asơi rơchãc pơkhrà lơĩq pioh tơviãq nao mơsôh? ",
  "9": "Pơweh sì pơnõq adơi sơai kung yơu nữn. Mơyah làiq adơi sơai angui dơlãh đơp pơnuãiq ôh nĩq-nũn, nữn asơi thơu pãc jỡc pơnõq adơi sơai ãn đơp kaya hagĩq? Kơyua adơi sơai đơp ôh hũ gơtha hagĩq. ",
  "10": "Thơu làiq pãq dơlãp dun kơyua nĩ hũ lũ pơnuaĩq đơp, sì ôh pơnuaĩq đơp halơi la ôh hũ gơtha. ",
  "11": "Nữn mơyah làiq hlãq ôh thơu pãc gơtha sa pơnuãiq đơp halơi nữn, nữn hlãq ròq la mơnuĩh lơgar lơniãu pơweh sì mơnuĩh ãn đơp nữn, sì mơnuĩh nữn kung la mơnuĩh lơgar lơniãu pơweh sì hlãq. ",
  "12": "Pơweh sì pơnõq adơi sơai kung yơu nữn. Kơyua pơnõq adơi sơai chơkhãq khiãng ưng hũ dơgrữq kaya anĩt gah suàt vơngãq, yơu nữn iỡuq ngãq hayơu halơi hũ jỡc savĩq dơlah dơlài pioh vỡq padỡc tơgùq Sàc Pơjũm Sơđah. ",
  "13": "Mơnuĩh đơp pơnuãiq chrih nữn iơu lakơu tồq drơi pơlih rgơi ràc pa-tơviãq ga dơgrữq mơnuĩh thơu pãc jỡc. ",
  "14": "Kơyua mơyah làiq hlãq iơu lakơu mưng sãp chrih, nữn la dơlãp hatai hlãq iơu lakơu, nữn dơlãp dlò hlãq ôh hũ tơviãq voh chơtai hagĩq.  ",
  "15": "Yơu nữn, hlãq iỡuq ngãq yơu halơi? Hlãq ròq iơu lakơu mưng vơngãq hatai, nữn kung iơu lakơu mưng akõq dlò. Hlãq ròq adoh mưng vơngãq hatai, nữn kung adoh mưng akõq dlò wỡq. ",
  "16": "Ôh yơu nữn , mơyah làiq adơi sơai sơ-uỗt mơyòp Yàc Pô Lơngĩq mưng vơngãq hatai, nữn ngãq yơu hayơu mơnuĩh ôh hũ kaya anĩt dòq guh vãq adũq pơjũm pơtõm pơlih đơp \"A-men\" gãm sì pơnuaĩq ỡn ngai pơnõq adơi sơai hũ, kơyua pơnõq nhũ ôh thơu pãc adơi sơai đơp hagĩq? ",
  "17": "Iỡuq viãq, pơnõq adơi sơai padỡc pơnuaĩq ỡn ngai la iỡuq, nữn mơnuĩh dih ôh hũ kaya vỡq padỡc tơgùq. ",
  "18": "Hlãq ỡn ngai Yàc Pô Lơngĩq  kơyua hlãq đơp pơnuãiq chrih krơi lũ rlao avih dơgrữq pơnõq adơi sơai. ",
  "19": "Nữn dơlãp Sàc Pơjũm Sơđah,  siàp rlao hlãq đơp lơmã ơkhar nữn dlò sơnơng hlãq pãc jỡc pioh pơlih pơto pơđar mơnuĩh tơmo, rlao sì avih rơvơu rơvơu ơkhar mưng pơnuaĩq chrih krơi. ",
  "20": "Pa-thơu pơnõq adơi sơai, juơi ngãq yơu lơđeh tìt dơlãp dlò sơnơng drơi hũ. Pa-vlữq wỡq, iỡuq ngãq yơu lơđeh tìt mưng kaya mơsãc, nữn iỡuq prong tơgùq dơlãp kaya sơnơng. ",
  "21": "Dơlãp voh-va hũ wãq, Yàc đơp, \"Kơu ròq đơp sì vual vơla nĩ mưng dơgrữq mơnuĩh đơp dơgrữq sãp tơmo sì mưng mơvah chơbuai dơgrữq mơnuĩh thuãi chrih; nữn vloh mưng pơnẽq nữn pơnõq nhũ kung ôh hmỡq kơu.\" ",
  "22": "Yơu nữn, pơnuaĩq chrih krơi sa nỡm, ôh iỡuq vrơi ga mơnuĩh pãc-tui, nữn vrơi ga mơnuĩh ka ôh pãc-tui. Dòq đơp hwơr nữn ôh iỡuq vrơi ga mơnuĩh ka ôh pãc-tui, nữn la vrơi ga mơnuĩh pãc-tui. ",
  "23": "Tũq avih dơgrữq Sàc Pơjũm Sơđah pơtõm gỡuq sa anĩh sì avih dơgrữq tãl aràc kung đơp pơnuaĩq chrih krơi, mơyah làiq mơnuĩh ôh hũ kaya anĩt sì mơnuĩh ka ôh pãc-tui tơma pơtõm sigỡuq, ôh iỡuq pơnõq nhũ ròq đơp pơnõq adơi sơai mơnuĩh kruãq hanruơi yơh? ",
  "24": "Nữn mơyah làiq avih tãl aràc adơi sơai kung đơp hwơr dơlãp tũq hũ mơnuĩh ka ôh pãc-tui hẽla ôh hũ kaya anĩt tơma pơjũm sigỡuq, nữn mơnuĩh nữn ròq kađòc dơgrữq aràc iơu jàq sì kađòc dơgrữq chahrơna, ",
  "25": "dơgrữq kaya padỡuq dơđỡuq dơlãp hatai pơnõq nhũ ròq kađòc ràc tơviãq, tồq vloh ga pơnõq nhũ iỡuq vơviar rùp trỗt pãq ala hlùq nữn duh talơvãt Yàc Pô Lơngĩq, sì vrơi thơu làiq Yàc Pô Lơngĩq viãq dòq pãq khrãh pơnõq adơi sơai. ",
  "26": "Yơu nữn, pa-thơu pơnõq adơi sơai, iỡuq ngãq yơu halơi nĩ? Tũq pơnõq adơi sơai pơtõm gỡuq wỡq, asơi kung hũ pơnuaĩq đơp adoh, pơnuaĩq pơto pơđar, sa pơnuaĩq ràc tơviãq kaya dơlãp dơđỡuq, pơnuaĩq đơp chrih krơi, hẽla pơnuaĩq ràc pa-tơviãq. Dơgrữq kaya pioh vỡq padỡc Sàc Pơjũm Sơđah. ",
  "27": "Mơyah làiq hũ mơnuĩh đơp pơnuãiq chrih krơi, nữn mĩn dua aràc hẽla lũ rlao wỡq la tlơu aràc, nữn đơp tui lơnãq sì iỡuq hũ mơnuĩh ràc pa-tơviãq. ",
  "28": "Dòq mơyah làiq ôh hũ asơi ràc pa-tơviãq, nữn pơnõq nhũ iỡuq dòq sua lìt dơlãp sàc Pơjũm Sơđah, nữn mĩn hũ đơp ga rùp phuỗt drơi gãm sì Yàc Pô Lơngĩq. ",
  "29": "Iỡuq luơi vẽq ga dua aràc hẽla tlơu aràc đơp hwơr, dòq dơgrữq mơnuĩh tơmo nữn iãq pơweh dơgrữq pơnuãiq hagĩq pơnõq nhũ đơp. ",
  "30": "Nữn mơyah làiq sa aràc mơnuĩh dơlãp dơgrữq mơnuĩh ãn dòq guh pơjũm hũ vrơi kaya ràc tơviãq kaya dơlãp dơđỡuq, nữn mơnuĩh bãc sa iỡuq dòq sua lìt. ",
  "31": "Kơyua avih tãl aràc kung pơlih tui lơnãq hũ đơp hwơr, tồq ga dơgrữq mơnuĩh pơlih mơgrũ thơu sì dơgrữq mơnuĩh kung ròq hũ kaya pơlua padờp. ",
  "32": "Vơngãq hatai dơgrữq mơnuĩh gơnuar hwơr hũ iỡuq ngãq tui dơgrữq mơnuĩh gơnuar hwơr. ",
  "33": "Kơyua Yàc Pô Lơngĩq ôh iỡuq la Yàc Pô Lơngĩq wãc rơsi kaya gơvũl gơvãl hũ, nữn la kaya lơnang lơnai hũ. Yơu dơlãp avih dơgrữq Sàc Pơjũm Sơđah dơgrữq mơnuĩh gơnuar pơđar sơđah hũ, ",
  "34": "mơnuĩh kamơi iỡuq dòq sua lìt dơlãp Sàc Pơjũm Sơđah. Kơyua pơnõq nhũ ôh hũ gơnuar đơp, nữn iỡuq ngãq tui, yơu kaya voh-va song pơto pơđar. ",
  "35": "Mơyah làiq tơpuôl mòq ưng mơgrũ thơu kaya hagĩq, nữn tơpuôl mòq iỡuq tơnĩa vơsàc drơi pãq sàc, kơyua mơnuĩh kamơi pơh sãp đơp dơlãp Sàc Pơjũm Sơđah la sa kaya đang mang mơlơu alah. ",
  "36": "Iỡuq mĩn pơnuaĩq Yàc Pô Lơngĩq hũ akhàt tơviãq mưng pơnõq adơi sơai? Hẽla iỡuq yơh pơnuaĩq nữn mĩn trôh sì pơnõq adơi sơai nữn soh? ",
  "37": "Mơyah làiq hũ mơnuĩh halơi sơnơng làiq drơi la mơnuĩh gơnuar hwơr hẽla mơnuĩh gah suàt vơngãq, nữn mơnuĩh nữn iỡuq kơnãl thơu làiq dơgrữq pơnuaĩq hlãq wãq ga pơnõq adơi sơai la gơnuar pơđar mưng Yàc. ",
  "38": "Nữn mơyah làiq mơnuĩh halơi ôh iãq thơu yơu nữn, nữn luơi vẽq ga pơnõq nhũ. ",
  "39": "Yơu nữn, pa-thơu pơnõq adơi sơai, iỡuq duah vẽq kaya đơp hwơr sì juơi pakỡuq đơp pơnuaĩq chrih krơi. ",
  "40": "Nữn iỡuq ngãq tơviãq dơgrữq vruãq ngãq tui iỡuq sì hũ lơnãq. "
}